Հունաստան

Տարածությունը՝ 131 957 կմ² Բնակչությունը՝ 10 772 967 Մայրաքաղաքը՝ Աթենք (հուն.՝ Αθήνα) Ազգային արժույթը՝ Եվրո (Euro), նախկինում՝ հունական դրամ Մեծ քաղաքներ՝ Աթենք, Սալոնիկ. Պատրա Ժամային գոտի՝ (UTC+2) ամռանը (UTC+3) Ազգային դոմեյնային զոնա՝ .gr Հեռախոսային կոդը՝+30։

Կարևոր է օգնել մեր բարեկամ և դաշնակից երկրին բոլոր միջազգային հարթակներում. Հունաստանի ԱԳ նախարարի հայտարարությունը ՀՀ այցից հետո

Կարևոր է օգնել մեր բարեկամ և դաշնակից երկրին բոլոր միջազգային հարթակներում. Հունաստանի ԱԳ նախարարի հայտարարությունը ՀՀ այցից հետո

Հունաստանի արտաքին գործերի նախարար Յորղոս Գերապետրիտիսը հայտարարություն է տվել Հունաստանի հանրային ERT հեռուստաընկերությանը և լրագրող Կատերինա Ֆրիսային՝ Հայաստան կատարած պաշտոնական այցի ավարտից հետո: Այս մասին տեղեկացնում են Հունաստանում ՀՀ դեսպանությունից:   «Այսօր ես հնարավորություն ունեցա այցելել Հայաստան և հանդիպել վարչապետի, արտաքին գործերի նախարարի և Անվտանգության խորհրդի քարտուղարի հետ։   Միևնույն ժամանակ այցելել եմ Երևանում Հունաստանի դիվանագիտական ներկայացուցչություն։   Հայաստանի հետ Հունաստանը պատմական կապեր ունի, դարերի պատմություն ունեցող կապեր։ Այն մեզ բարեկամ երկիր է։ Հունաստանը, հենց այս հավերժական բարեկամության համատեքստում, միշտ հոգ է տանում՝ Հայաստանին ապահովելու անհրաժեշտ համերաշխությունն ու անվտանգությունը։ Հատկապես այսօր՝ մի ժամանակաշրջանում, երբ Հարավային Կովկասում տեղի ունեցող իրադարձությունների պատճառով տարածքային ամբողջականությունը լուրջ ճնշման տակ է։   Հատկապես կարևոր է թե՛ որպես խորհրդանիշ, թե՛ որպես Հունաստանի անունից լավ ծառայությունների մատուցում Հայաստանին, օգնել մեր բարեկամ և դաշնակից երկրին բոլոր միջազգային հարթակներում․ Եվրամիությունում, ինչպես նաև ՅՈՒՆԵՍԿՕ-ում՝ համաշխարհային մշակութային ժառանգության պահպանման համար, և այնտեղ, որտեղ պահանջվում է՝ տալ լուծում, որը կլինի արդար և կայուն և կհաստատի տարածքային ամբողջականության, սահմանների անձեռնմխելիության մասին ՄԱԿ-ի կանոնադրության սկզբունքները, ինչպես նաև ցանկացած թշնամական գործողությունից խուսափելու համար։   Հունական կառավարության, հունական պետության համար սկզբունքային է աջակցություն ցուցաբերել ցանկացածին, ով գտնվում է պաշտպանության մեջ ցանկացած տեսակի ագրեսիայից»,- ասված է հայտարարության մեջ:  
19:02 - 10 հունվարի, 2024
Արմեն Գրիգորյանն ու Հունաստանի ԱԳ նախարարը քննարկել են ԵՄ-ի հետ Հայաստանի գործընկերության շրջանակներում իրականացվող քայլերը

Արմեն Գրիգորյանն ու Հունաստանի ԱԳ նախարարը քննարկել են ԵՄ-ի հետ Հայաստանի գործընկերության շրջանակներում իրականացվող քայլերը

Հունվարի 10-ին ՀՀ ԱԽ քարտուղար Արմեն Գրիգորյանն ընդունել է Յորղոս Գերապետրիտիսի գլխավորած պատվիրակությանը: Այս մասին տեղեկացրին ԱԽ գրասենյակից: Զրուցակիցները բարձր են գնահատել պատմամշակութային ընդհանրությունների վրա հիմնված հայ-հունական երկկողմ բարեկամական հարաբերությունների զարգացման դինամիկան: Անդրադարձ են կատարել ինչպես երկկողմ, այնպես էլ բազմակողմ համագործակցությանն առնչվող հարցերի, այդ թվում՝ ԵՄ-ի հետ Հայաստանի գործընկերության շրջանակներում իրականացվող քայլերին, ինչի շրջանակներում քարտուղար Գրիգորյանը կարևորել է Հունաստանի ցուցաբերած աջակցությունը Հայաստանին: Հանդիպմանը կողմերն անդրադարձել են տարածաշրջանային և արտատարածաշրջանային անվտանգային իրավիճակին և ընդգծել, որ ցանկացած հակամարտություն պետք է լուծում ստանա միջազգային իրավունքի սկզբունքները խստագույնս պահպանելու միջոցով: Վերոնշյալի համատեքստում ԱԽ քարտուղարը ներկայացրել է հայ-ադրբեջանական հարաբերությունների կարգավորման շուրջ վերջին զարգացումները։
17:45 - 10 հունվարի, 2024
ՀՀ-ԵՄ հարաբերությունների խորացման գործընթացում երկար ճանապարհ կա անցնելու․ Միրզոյան
 |armenpress.am|

ՀՀ-ԵՄ հարաբերությունների խորացման գործընթացում երկար ճանապարհ կա անցնելու․ Միրզոյան |armenpress.am|

armenpress.am: Հայաստանի և Եվրամիության միջև հարաբերությունների զարգացման և խորացման գործընթացում երկար ճանապարհ կա անցնելու։ Այս մասին ասաց Հայաստանի արտաքին գործերի նախարար Արարատ Միրզոյանը՝ Հունաստանի արտաքին գործերի նախարար Յորղոս Գերապետրիտիսի հետ համատեղ ասուլիսի ժամանակ։ Նախարարը վստահեցրեց, որ սեղանին են մի շարք կոնկրետ գործողություններ ու ծրագրեր՝ բխող Համապարփակ և ընդլայնված գործընկերության համաձայնագրից, նաև դրանից դուրս։ « Մենք քիչ առաջ լսեցինք Հունաստանի արտաքին գործերի նախարարի հավաստիացումն այն մասին, որ Հունաստանը շարունակելու է իր ջանքերը և աջակցությունը համոզվելու, որ այս գործընթացը կանգ չի առնում և առարկայական և ինտենսիվ կերպով է շարունակվում։ Մենք, իհարկե, հույս դնելու ենք այդ հավաստիացումների և աջակցության վրա»,-ասաց Միրզոյանը։ Նախարարը նշեց, որ չնայած բոլոր մարտահրավերներին՝ Հայաստանը շարունակում է ժողովրդավարական բարեփոխումները։ Միրզոյանը համոզված է, որ այդ բարեփոխումները Հայաստանին ավելի են մոտեցնելու Եվրամիությանը։ ԵՄ-ի հետ երկխոսության համատեքստում Միրզոյանն ընդգծեց, որ ԵՄ դիտորդական առաքելությունը Հայաստանի համար չափազանց կարևոր նշանակություն ունի։ «Սա ևս մի կարևորագույն գործոն է, որը անվտանգություն և խաղաղություն է ապահովում Հայաստանի և Ադրբեջանի միջև սահմանին»,- նշեց Միրզոյանը՝ հիշեցնելով, որ ԵՄ-ն վերջերս որոշել է մեծացնել և երկարաձգել առաքելության մանդատը, ինչը Հայաստանը ողջունել է։
14:28 - 10 հունվարի, 2024
Խաղաղության պայմանագրում պետք է տեսնենք այն հիմքերը, որոնց վրա պետք է ընթանա սահմանազատման գործընթացը․ Արարատ Միրզոյան
 |armenpress.am|

Խաղաղության պայմանագրում պետք է տեսնենք այն հիմքերը, որոնց վրա պետք է ընթանա սահմանազատման գործընթացը․ Արարատ Միրզոյան |armenpress.am|

armenpress.am: Հայաստանի և Ադրբեջանի միջև վերջանական խաղաղությունը  անպայման պետք է խարսխված լինի մի քանի հիմնարար սկզբունքների վրա, որպեսզի հետագայում պարարտ հող չստեղծվի էսկալացիայի կամ ագրեսիայի համար։ Այս մասին ասաց Հայաստանի արտաքին գործերի նախարար Արարատ Միրզոյանը՝ Հունաստանի արտաքին գործերի նախարար Յորղոս Գերապետրիտիսի հետ համատեղ ասուլիսի ժամանակ։ Միրզոյանը տեղեկացրեց, որ նախորդ տարվա դեկտեմբերի վերջին Հայաստանը ստացել էր Ադրբեջանի առաջարկները խաղաղության պայմանագրի վերաբերյալ, որից հետո՝ հունվարի 4-ին, Հայաստանն Ադրբեջանին փոխանցել է իր առաջարկները։ «Չնայած երկկողմ հանդիպումների բացակայությանը՝ տեղի են ունեցել առաջարկների փոխանակումներ խաղաղության պայմանագրի շուրջ։ Մենք ստացել էինք Ադրբեջանի առաջարկները և հունվարի 4-ին փոխանցել ենք հայկական հերթական առաջարկները։ Կասեի, որ բովանդակային առումով ադրբեջանական առաջարկների մեջ տեսնում ենք որոշակի հետընթաց տեքստի որոշ մասերում և որոշակի առաջընթաց մի քանի այլ ուղղությամբ։ Եվ մենք շատ կառուցողական աշխատել ենք այդ առաջարկների վրա և ուղարկել ենք մեր առաջարկները, որոնք վստահ եմ, որ շատ կառուցողական են»,- ասաց Միրզոյանը։ Նախարարը խնդիրը ոչ այնքան հերթական առաջարկների, այս կամ այն հոդվածի հետընթաց կամ առաջընթաց, կառուցողական կամ ոչ կառուցողական լինելու մեջ է տեսնում, այլ սկզբունքների, որոնց վրա պետք է հենված լինի խաղաղությունը։ «Անկախ նրանից, թե տվյալ հերթական առաջարկի որևէ մի կոնկրետ հոդված առաջընթաց է, թե հետընթաց, վերջանական խաղաղությունը անպայման պետք է խարսխված լինի մի քանի հիմնարար սկզբունքների վրա։ Երկրները պետք է ճանաչեն միմյանց տարածքային ամբողջականությունը առանց որևէ այլևայլության, առանց որևէ երկիմաստության։ Սա այն հարցն է, որտեղ առավելագույն հստակություն է պետք, և վերջանական խաղաղության պայմանագիրը պետք է այս հստակությունն ապահովի։ Նաև, հասկանալիորեն, եթե երկրների միջև սահմանների սահմանազատման գործընթացը կարող է երկար ժամանակ տևել, առնվազն խաղաղության պայմանագրում պետք է տեսնենք այն հստակ հիմքերը, որոնց վրա պետք է հետագայում ընթանա սահմանազատման գործընթացը։ Սրանք այն հարցերն են, որտեղ Հայաստանի Հանրապետությունը չի կարող տեսնել և չի կարող թույլ տալ որևէ անորոշություն։ Նաև այն պատճառով, որ անորոշությունը մեծ հիմք է և պարարտ հող հետագա ագրեսիաների և էսկալացիաների համար։ Հետևաբար, եթե մենք խաղաղություն ենք հաստատում, մենք հաստատում ենք այնպիսի խաղաղություն, որը հնարավորինս դժվար կլինի կասկածի տակ դնել և խախտել»,- ընդգծեց Միրզոյանը։ Միրզոյանը նաև ներկայացրեց հաջորդ սկզբունքը, որը հայկական կողմը ուզում է տեսնել խաղաղության պայմանագրում՝ տարածաշրջանի տնտեսական կապուղիների և ենթակառուցվածքների ապաշրջափակումը՝ հենվելով արդար և հիմնարար սկզբունքների վրա։ «Խաղաղությունը միայն կրակոցների բացակայությունը չէ։ Խաղաղությունը նաև բաց սահմաններն են և ապրանքների և մարդկանց տեղաշարժն է միմյանց տարածքով։ Դժվար է Հարավային Կովկասում խաղաղության հաստատումից խոսել, երբ Հայաստանը շարունակում է մնալ շրջափակման մեջ։ Մենք շահագրգռված ենք կապուղիների ապաշրջափակմամբ, բայց մենք նաև վստահ ենք, որ այս ապաշրջափակումը պետք է տեղի ունենա մի քանի շատ պարզ, հիմնարար և արդար սկզբունքների հիման վրա»,-եզրափակեց Միրզոյանը։
14:17 - 10 հունվարի, 2024
Վարչապետն ընդունել է Հունաստանի ԱԳ նախարարին

Վարչապետն ընդունել է Հունաստանի ԱԳ նախարարին

Վարչապետ Նիկոլ Փաշինյանն ընդունել է Հունաստանի արտաքին գործերի նախարար Յորղոս Գերապետրիտիսին: Այս մասին հայտնում են ՀՀ վարչապետի աշխատակազմից։  Ողջույնի խոսքում վարչապետ Փաշինյանը նշել է. «Հարգելի նախարար, ողջունում եմ Ձեզ և Ձեր պատվիրակությանը Հայաստանի Հանրապետությունում։ Սա մեզ համար շատ կարևոր այց է, որովհետև մենք բավականին ընդգրկուն օրակարգ ունենք եղբայրական և բարեկամ Հունաստանի հետ, ինչպես նաև շատ կարևոր համագործակցություն՝ Եվրոպական Միության շրջանակում։ Առաջին հերթին կցանկանայի շնորհակալություն հայտնել այն աջակցության համար, որ Հունաստանը Եվրոպական Միության և ընդհանրապես, միջազգային հանրության հետ միասին մատուցել և մատուցում է մեզ։ Իհարկե, մենք չենք կարծում, որ կարողացել ենք ամբողջությամբ օգտագործել մեր հարաբերությունները զարգացնելու ներուժը թե՛ երկկողմ, թե՛ բազմակողմ առումով։ Հուսով եմ, որ այս այցի արդյունքում կբարձրացնենք այդ ներուժի օգտագործման մակարդակը։ Կխնդրեմ Ձեզ փոխանցել իմ ջերմագին ողջույնները վարչապետ Միցոտակիսին։ Հույս ունեմ, որ նրա հետ հանդիպելու նոր հնարավորություններ կլինեն։ Կարծում եմ՝ շատ կարևոր առանձնազրույց ենք ունեցել Գրանադայում, և, իհարկե, Հունաստանի հետ մեր հարաբերությունների խորացումը շատ կարևոր է մեզ համար» Իր հերթին Հունաստանի ԱԳ նախարարը նշել է. «Ձերդ Գերազանցություն պարոն վարչապետ, ինձ համար մեծ պատիվ է լինել այստեղ և Ձեզ անձամբ տեսնել։ Շատ արդյունավետ ու կառուցողական հանդիպում ունեցա իմ ընկեր և գործընկեր արտգործնախարար Միրզոյանի հետ։ Մեր երկու ազգերը կապված են ամուր պատմական կապերով, և մենք ոչ միայն ցանկանում ենք պահպանել այս կապերը, այլ նաև առաջ մղել դրանք, որովհետև կարծում ենք, որ հայ ժողովուրդը ոչ միայն մեր գործընկերն է, այլ նաև մեր մտերիմ ընկերը։ Մենք դարերի խորքից եկող եղբայրական հարաբերություններ ունենք։  Պարոն վարչապետ, իմ այս այցը կարևոր ազդանշան է մեր երկկողմ հարաբերությունների համար և մեր երկրի վարչապետի պատրաստակամության մասով, ով Ձեզ է հղում ջերմ ողջույններ: Ընդգծեմ, որ Հունաստանի կառավարությունը պատրաստակամ է Հայաստանին սատարելու բոլոր հնարավոր ուղղություններով, ինչպես Եվրոպական միության հետ հարաբերություններում, այնպես էլ Հայաստանի Եվրոպական ընտանիք ինտեգրման երկխոսության հեռանկարի շրջանակներում»: Զրուցակիցները քննարկել են հայ-հունական հարաբերությունների հետագա զարգացմանն ու ամրապնդմանը վերաբերող մի շարք հարցեր: Մասնավորապես, քննարկվել են քաղաքական, տնտեսական, հումանիտար և այլ ոլորտներում փոխգործակցությանը, համատեղ նոր ծրագրերի իրականացման հնարավորություններին առնչվող թեմաներ:  Մտքեր են փոխանակվել Հարավային Կովկասում տեղի ունեցող գործընթացների, այդ թվում՝ Հայաստան-Ադրբեջան խաղաղության պայմանագրի շուրջ բանակցությունների ընթացքի, Լեռնային Ղարաբաղի ժողովրդի նկատմամբ Ադրբեջանի էթնիկ զտման քաղաքականության հետևանքով բռնի տեղահանված անձանց խնդիրների լուծման ուղղությամբ ՀՀ կառավարության քայլերի վերաբերյալ: Այս առումով, կողմերը կարևորել են միջազգային հանրության աջակցությունը: Անդրադարձ է կատարվել նաև Հայաստանի և Եվրոպական միության միջև հարաբերությունների հետագա զարգացմանը: 
14:05 - 10 հունվարի, 2024
«Խաղաղության խաչմերուկ» նախագիծն իրատեսական է․ Հունաստանի արտգործնախարար
 |civilnet.am|

«Խաղաղության խաչմերուկ» նախագիծն իրատեսական է․ Հունաստանի արտգործնախարար |civilnet.am|

civilnet.am: Հունաստանի արտաքին գործերի նախարար Յորղոս Գերապետրիտիսը կարծում է, որ Հայաստանի կառավարության ներկայացրած «խաղաղության խաչմերուկ» նախագիծը տարածաշրջանում խաղաղության հաստատման խնդրի «իրատեսական և արդարացի» լուծում է ենթադրում։ «Կարծում եմ, որ «խաղաղության խաչմերուկը», որը ՀՀ կառավարությունը ներկայացրել է, շատ իրատեսական, արդարացի լուծում է խնդրի։ Մենք կարծում ենք, որ խաղաղության գործընթացը պետք է կոնկրետ խնդիրներին անդրադառնա, սահմանազատումը պետք է հստակ լինի, որ հետագայում վայրագություններ չդրսևորվեն»,- հունվարի 10-ին Երևանում հայ գործընկերոջ հետ համատեղ ասուլիսին հայտարարել է Հունաստանի արտգործնախարարը։ Նա նշում է, որ ՀՀ կառավարությունն անում է անհրաժեշտ բոլոր քայլերը խաղաղության և տարածաշրջանի բարգավաճմանը հասնելու համար։  
13:11 - 10 հունվարի, 2024
ԵՄ դիտորդական առաքելությունը կենսական նշանակություն ունի Հայաստանի անվտանգության համար. Միրզոյան  |tert.am|

ԵՄ դիտորդական առաքելությունը կենսական նշանակություն ունի Հայաստանի անվտանգության համար. Միրզոյան |tert.am|

tert.am: Իսկապես երկար ճանապարհ կա անցնելու Հայաստան-ԵՄ հարաբերությունների խորացման գործընթացում։ Այս մասին Հունաստանի ԱԳ նախարարի հետ համատեղ ասուլիսում ասաց ՀՀ ԱԳ նախարար Արարատ Միրզոյանը։ Հայաստանի արտաքին գերատեսչության ղեկավարը վստահեցրեց, որ հիմա քննարկման սեղանին են մի շարք կոնկրետ գործողություններ և ծրագրեր։ Միրզոյանը կաևորեց հատկապես ԵՄ քաղաքացիական դիտորդների նշանակությունը մեր երկրի համար։ «Այժմ Հայաստանի համար հատկապես անվտանգության հարթությունում  կենսական, չափափազանց կարևոր նշանակություն ունի ԵՄ դիտորդական առաքելությունը։ Սա ևս մեկ կարևորագույն գործոն է, որն անվտանգություն և խաղաղություն է ապահովում  Հայաստանի և Ադրբեջանի միջև սահմանային գոտում։ Սա ևս մեկ ոլորտ է, որը ենթակա է շարունակական զարգացման»,- ընդգծեց Միրզոյանը։
13:00 - 10 հունվարի, 2024
Հայաստանը վճռական է և հաստատակամ՝ կառուցելու խաղաղություն Հարավային Կովկասում. Միրզոյան |1lurer.am|

Հայաստանը վճռական է և հաստատակամ՝ կառուցելու խաղաղություն Հարավային Կովկասում. Միրզոյան |1lurer.am|

1lurer.am: Ձեր այցը համերաշխության կարևորագույն դրսևորում է մի ժամանակաշրջանում, երբ մենք իսկապես զգում ենք այդ համերաշխության և աջակցության կարիքը: Այդ մասին համատեղ ասուլիսի ժամանակ ասաց ՀՀ ԱԳ նախարար Արարատ Միրզոյանը՝ խոսքն ուղղելով Հունաստանի արտաքին գործերի նախարար Յորղոս Գերապետրիտիսին: Միրզոյանը տեղեկացրեց, որ Հունաստանի գլխավորած պատվիրակությանը հանգամանալից կերպով ներկայացրել է Հարավային Կովկասում ստեղծված իրավիճակը ԼՂ-ի հայության բռնի տեղահանությունից հետո, նաև խաղաղության գործընթացի մանրամասները, խնդիրները և Հայաստանի նախաձեռնությունները, մասնավորապես՝ «Խաղաղության խաչմերուկ» ծրագրի մասով: «Ընդգծել եմ, որ չնայած բոլոր մարտահրավերներին ու բարդություններին, չնայած դանդաղեցումներին և ապակառուցողականությանը որոշ դեպքերում, որոնց մենք ականատես ենք լինում, ՀՀ-ն վճռական է և հաստատակամ՝ կառուցելու խաղաղություն Հարավային Կովկասում, շարունակելու խաղաղության բանակցությունները, և մենք հավատում ենք, որ երկուստեք կառուցողական մոտեցման ցուցաբերման դեպքում, քաղաքական կամքի դեպքում մենք շատ մոտ ապագայում կարող ենք շոշափելի հանգրվանի հասնել խաղաղության հաստատման հարցում»,- ասաց նախարարը:
11:53 - 10 հունվարի, 2024
Հայ գերիների և հատկապես ԼՂ ղեկավարների վերադարձը հնարավոր կլինի միայն միջազգային հանրության ուժեղ ճնշման ներքո․ դեսպան Տիգրան Մկրտչյան

Հայ գերիների և հատկապես ԼՂ ղեկավարների վերադարձը հնարավոր կլինի միայն միջազգային հանրության ուժեղ ճնշման ներքո․ դեսպան Տիգրան Մկրտչյան

Հունաստանում, Կիպրոսում և Ալբանիայում ՀՀ արտակարգ և լիազոր դեսպան Տիգրան Մկրտչյանը հարցազրույց է տվել եվրոպական The European Conservative ամսագրին։ Ներկայացնում ենք հարցազրույցը՝ Հունաստանում Հայաստանի դեսպանության թարգմանությամբ։  «Արցախում էթնիկ զտումները ավելի քան 100 000 մարդու բռնագաղթի պատճառ են դարձել։ Ինչպիսի՞ն է նրանց վիճակը: Ինչպե՞ս է Հայաստանը դիմակայում այս հումանիտար ճգնաժամին։ Լեռնային Ղարաբաղից բռնի տեղահանված հայերը մարդիկ են, որոնք փրկվել են տասնամսյա շրջափակումից և Ադրբեջանի վերջին ռազմական ագրեսիայից։ Նրանցից շատերն առողջական լուրջ խնդիրներ ունեն՝ ամիսներ շարունակ թերսնվածության և պատշաճ բուժօգնության բացակայության հետևանքով։ Շատերն ունեն նաև հոգեբանական խնդիրներ։ Այս ամենին գումարվում են նաև սոցիալական խնդիրները, քանի որ շատերը ստիպած են եղել հապճեպորեն լքել են իրենց տները՝ չվերցնելով գումար ու արժեքավոր իրեր։ Տեղահանվածների կարիքները հոգալու նպատակով Հայաստանի Հանրապետության կառավարությունն արդեն իսկ նախաձեռնել է աջակցության ծրագրեր պետական բյուջեից։ Հայաստանի կառավարությունը հաստատել և ընդունել է բազմաթիվ որոշումներ՝ ուղղված բռնի տեղահանված փախստականների աշխատանքի, կրթության, կրթաթոշակների և կենսաթոշակների խնդիրների լուծմանը։ Այս որոշումներն իրականացվում են կառավարության համապատասխան մարմինների հատուկ ծրագրերով։ Փախստականների համար կայուն ապրուստ ապահովելու համար նախատեսվում են նաև միջնաժամկետ գործողություններ: Լեռնային Ղարաբաղի հայերն այդ տարածքի բնիկներն են և շարունակաբար ապրել են աշխարհի այս հատվածում ավելի քան երեք հազարամյակ: Ո՛չ մենք, ո՛չ միջազգային հանրությունը չեն կարող մոռանալ կամ անտեսել այդ հարցը։ Կսկիծով պետք է նշեմ, որ ամիսներ շարունակ մենք բոլոր հնարավոր հարթակներից և բոլոր հնարավոր պաշտոնական ու ոչ պաշտոնական ուղիներով ահազանգում էինք, որ Ադրբեջանն անելու է ամեն բան՝ Լեռնային Ղարաբաղի 100 հազարից ավելի հայերին էթնիկ զտումների ենթարկելու համար։ Ցավոք սրտի, միջազգային հանրությունը շոշափելի քայլեր չձեռնարկեց դա կանխելու համար, իսկ Արդարադատության միջազգային դատարանի որոշումները մնացին թղթի վրա։ Առաջին օրվանից մենք սերտորեն համագործակցում ենք մեր միջազգային գործընկերների, ՄԱԿ-ի գործակալությունների և տարբեր երկրների հետ։ Օգնության մասին հայտարարել են Կարմիր խաչի միջազգային կոմիտեն, Եվրոպական միությունը, ԱՄՆ կառավարությունը USAID-ի միջոցով և ՄԱԿ-ի գործակալությունները: Մենք երախտապարտ ենք մեր բոլոր միջազգային գործընկերներին և մասնավորապես ԵՄ-ին և նրա անդամ երկրներին՝ այս դժվարին օրերին Հայաստանին և արցախահայությանն ուղղված մարդասիրական օգնության համար։ Իսկ ի՞նչ կասեք հայկական մշակութային ժառանգության՝ եկեղեցիների, վանքերի, խաչքարերի մասին։ ՅՈՒՆԵՍԿՕ-ի կողմից արդեն եղե՞լ է որևէ հայտարարություն կամ գործնական աջակցություն այս մշակութային ժառանգությունը պաշտպանելու համար: Հայաթափված Լեռնային Ղարաբաղում մնացել է հսկայական պատմական, մշակութային և հոգևոր ժառանգություն, որը լուրջ սպառնալիքի տակ է: Ստեփանակերտի եկեղեցու գմբեթների խաչերն արդեն հանվել են. ցավոք, մեր փորձից գիտենք, թե ինչ է կատարվում հայկական պատմամշակութային ժառանգության հետ, երբ այն հայտնվում է Ադրբեջանի վերահսկողության տակ։ Պարզապես վերցրեք Նախիջևանի օրինակը. Նախիջևանի միջնադարյան խաչքարերի ավերումը, ինչպես նաև 44-օրյա պատերազմից հետո տեղի ունեցած ցավալի իրադարձությունները՝ Շուշիի Կանաչ ժամի (Կանաչ եկեղեցու) և Սբ. Ղազանչեցոցի, Հադրութի Սպիտակ Խաչի ավերումը, ինչպես նաև մի շարք գերեզմանաքարերի պղծումը, ցավոք, լավատեսություն չեն ներշնչում։ Հարկապես, երբ այս ամենը տեղի է ունենում, երբ առկա է Միջազգային քրեական դատարանի որոշում, որը պարտավորեցել է Ադրբեջանին «ձեռնարկել բոլոր անհրաժեշտ միջոցները՝ կանխելու եւ պատժելու հայկական մշակութային ժառանգության, այդ թվում՝ եկեղեցիների և այլ աղոթատեղիների, հուշարձանների, տեսարժան վայրերի, գերեզմանատների և արտեֆակտների նկատմամբ վանդալիզմի և պղծման գործողությունները»։ Եթե անգամ չեն ավիրվել, աղավաղվել է մշակութային և ճարտարապետական կողոթների հայկական ինքնությունը: Հայերից առգրավվել են միջնադարյան հայ քրիստոնեական մշակույթի բազմաթիվ հուշարձաններ, ինչպիսիք են Ամարասի վանքը (4-5-րդ դար), Դադիվանքը (9-րդ դար), Գանձասարը (13-րդ դար) և բազմաթիվ այլ հայկական սրբատեղիներ։ Ռաֆայել Լեմկինի ներկայացրած Ցեղասպանության սկզբնական սահմանումը առանցքային տեղ է հատկացրել մշակութային ցեղասպանությանը: Որպես միջազգային իրավունքի իրավական հայեցակարգ՝ մշակութային ցեղասպանությունը մշակվել է որպես ցեղասպանության (այն է՝ խմբի համակարգային և դիտավորյալ ոչնչացման փորձ) ենթակատեգորիա կամ ասպեկտ՝ ֆիզիկական և կենսաբանական ցեղասպանությանը զուգահեռ: Այն ենթադրում էր ինչպես նյութական (օրինակ՝ պաշտամունքի վայրեր), այնպես էլ ոչ նյութական (օրինակ՝ լեզվի) մշակութային կառույցների ոչնչացում։ Սա այն է, ինչի ականատեսն ենք եղել Ադրբեջանում վերջին տասնամյակների ընթացքում և ներկայումս՝ Լեռնային Ղարաբաղում։ Ադրբեջանը դեռևս հրաժարվում է Լեռնային Ղարաբաղ և հարակից տարածքներ մուտքի իրավունք տրամադրել ՅՈՒՆԵՍԿՕ-ի փաստահավաք առաքելությանը՝ կատարելու կարևորագույն մշակութային արժեքների գույքագրում, որն առաջարկվել էր ՅՈՒՆԵՍԿՕ-ի գլխավոր տնօրենի կողմից 2020 թվականի նոյեմբերին՝ որպես տարածաշրջանի ժառանգության արդյունավետ պաշտպանության նախապայման։ Ես իսկապես հույս ունեմ, որ այս անգամ միջազգային կազմակերպությունները, մասնավորապես ՅՈՒՆԵՍԿՕ-ն, իրավամբ կգործեն իրենց մանդատի շրջանակներում և կկարողանան կանխել նոր մշակութային ցեղասպանությունները։ Այս առումով ես ուզում եմ ընդգծել մի էական կետ. Ադրբեջանը պարզապես չի ոչնչացնում պատմամշակութային ժառանգությունը, Ադրբեջանը մաքրում է հայկական հետքը Լեռնային Ղարաբաղից, քանի որ այս պատմամշակութային ժառանգությունն ամենախոսուն վկայությունն է այն բանի, որ հայերը հազարավոր տարիներ ապրել են Ղարաբաղում: Արցախի Հանրապետության ղեկավարներից մի քանիսը ձերբակալվել են Ադրբեջանի կողմից և մեղադրվել ահաբեկչության մեջ։ Կա՞ հնարավորություն նրանց Հայաստան վերադարձնելու։ Այս գործում միջազգային կառույցից որևէ մեկն աջակցո՞ւմ է Հայաստանի կառավարությանը։ Ահաբեկչության մասին խոսելն ուղղակի հիմարություն է և նույնքան կեղծ, որքան Ադրբեջանի մյուս հակահայկական գործիքները։ Կարծում եմ՝ հայ գերիների և հատկապես Լեռնային Ղարաբաղի ղեկավարների վերադարձը հնարավոր կլինի միայն միջազգային հանրության ուժեղ ճնշման ներքո։ Այս հարցում մեզ աջակցում է միայն ԿԽՄԿ-ն (Կարմիր խաչի միջազգային կոմիտեն) այնքանով, որ այցելում է գերիներին և պարբերաբար տեղեկատվություն փոխանցում նրանց առողջական վիճակի մասին։ Հոկտեմբերի 4-ին Հայաստանի Հանրապետությունը դիմել է Մարդու իրավունքների եվրոպական դատարան (ՄԻԵԴ)՝ պահանջելով պարտավորեցնել Ադրբեջանին ազատ արձակել Լեռնային Ղարաբաղի ձերբակալված նախկին և ներկա ղեկավարներին։ Ի՞նչ եք կարծում, ինչո՞վ է պայմանավորված միջազգային հանրության և հիմնական լրատվամիջոցների կողմից Արցախում տեղի ունեցածի նկատմամբ լռությունը կամ ակնհայտ անտարբերությունը: Լեռնային Ղարաբաղում տեղի ունեցածը սարսափելի հանցագործություն է: Մարդիկ ոչ միայն ենթարկվել են էթնիկ զտումների, այլև հայրենազրկվել են։ Միջազգային հանրության և հիմնական լրատվամիջոցների լռության պատճառները բազմաշերտ են: Նախ, պարզվեց, որ այսօր, ցավոք, միջազգային հանրության համար ադրբեջանական նավթն ու գազն ավելի կարևոր են, քան հայերն և հայերի՝ իրենց պատմական հայրենիքում ապրելու իրավունքները («մենք չենք կարող ձմռանը տաքացնել Եվրոպային»): Բայց սրան զուգահեռ, կարծում եմ, ոչ պակաս կարևոր է, որ աշխարհը հայտնվել է փոփոխությունների և հատկապես բացասական զարգացումների սարսափելի հորձանուտում, և միջազգային հանրությունն ու լրատվամիջոցները չեն կարողանում պատշաճ կերպով արձագանքել բոլոր զարգացումներին։ Աշխարհակարգը բավականին արագ է վերաձևվվում, և արդյունքում միջազգային հարաբերությունները փոխակերպվում են ինչպես երկկողմ, այնպես էլ բազմակողմ մակարդակներում։ Կարծում եմ՝ խնդիրը գալիս է նրանից, որ ուժի միջոցով հարցեր լուծելը դարձել է նորմ և հանդուրժելի, և դա սարսափելի է, քանի որ այն իրականում երբեք խնդիրներ չի լուծել։ Մենք կարող ենք հայտնվել բաց Պանդորայի արկղի առջև, եթե չխոսենք այս հանցագործությունների դեմ: Խաղաղությունը պատերազմով չի հաստատվում, քանի որ պատերազմը՝ ուժի կիրառումը կամ նույնիսկ ուժի սպառնալիքը, ինքնին միջազգային իրավունքի կոպիտ խախտում է։ Չես կարող կարգ ու կանոն հաստատել՝ ոտնատակ տալով այդ կարգի արմատները։ Ադրբեջանի ղեկավարության կողմից հնչող այն պնդումը, թե ուժը կարող է ծնել խաղաղություն, տրամաբանության և փիլիսոփայության մեջ հայտնի է որպես argumentum ad absurdum (աբսուրդի փաստարկ): Եվ զարմանալի է, որ այդ երկրի ներկայացուցիչները արտասահմանում կրկնում են այդ պնդումը՝ չհասկանալով, թե որքան զավեշտալի է հնչում այն։ Ադրբեջանն այժմ Հայաստանից պահանջում է Սյունիքով անցնող արտատարածքային միջանցք՝ թուրքական աջակցությամբ և ռուսական պասիվությամբ։ Հաշվի առնելով, որ մինչ այժմ ունեցել է քարտ-բլանշ, ի՞նչ եք կարծում, Ադրբեջանը կարող է ռազմական ճանապարհով փորձել գրավել այդ միջանցքը: Հայաստանի նկատմամբ Ադրբեջանի հռետորաբանությունը շարունակաբար եղել է ագրեսիվ և ռազմատենչ: Դեկտեմբերի 7-ի հայտարարության համաձայն՝ Ադրբեջանը համաձայնել է ազատ արձակել 32 հայ զինծառայողի, իսկ Հայաստանն իր հերթին՝ երկու ադրբեջանցի զինծառայողի։ Կային նաև այլ փոխադարձ պարտավորություններ։ Ավելին, վերահաստատվել է հարաբերությունները կարգավորելու և տարածքային ամբողջականության և ինքնիշխանության հիման վրա խաղաղության համաձայնագիր ձեռք բերելու կողմերի մտադրությունը։ Դա պետք է նշանակի Ադրբեջանից բոլոր գերիների ազատում, ադրբեջանական ուժերի դուրսբերում Հայաստանի օկուպացված տարածքներից (այժմ մոտ 200 քառակուսի կիլոմետր հայկական հող գտնվում է ադրբեջանական օկուպացիայի տակ), սահմանազատման աշխատանքների հաջող ավարտ և ցանկացած արտատարածքային միջանցքներ պահանջի մերժում: Այն պետք է ենթադրի նաև «Մեծ վերադարձ Արևմտյան Ադրբեջան» քարոզչական արշավի դադարեցում, որը պետության կողմից հովանավորվող տխրահռչակ նախագիծ է: Դրանով կասկածի տակ է դրվում Հայաստանի գոյությունը և առաջ է քաշվում այն թեզը, թե հայերը եկվորներ են տարածաշրջանում՝ ի հեճուկս բոլոր պատմական ապացույցների: Առհասարակ, սա պետք է ենթադրի Ադրբեջանում Հայաստանի նկատմամբ անհեթեթ կեղծ պնդումների ֆինանսավորման դադարեցում։ Մենք հիմա չենք կարող պատմական բանավեճեր սկսել, բայց չենք կարող նաև թույլ տալ, որ որևէ մեկը կասկածի տակ դնի մեր պատմությունը։ Հայաստանի Հանրապետության համար երկրի տարածքային ամբողջականության պահպանումը կարմիր գիծ է հարցերի խաղաղ կարգավորման ճանապարհին: 2500 տարի է անցել այն ժամանակներից, երբ Թուկիդիդեսն ասել է՝ «ուժեղներն անում են այն, ինչ կարող են, իսկ թույլերը տառապում են այն ամենից, ինչից պետք է տառապեն», և պատերազմի ու խաղաղության կանոնները շատ են փոխվել։ Բացի այդ, հիասքանչ հույն պատմաբանի այդ նույն պատմության մեջ հաճախ փոխարինվում են ուժեղներն ու թույլերը։ Չկան հավերժական հաղթողներ և հավերժ պարտվողներ: Պատմությունը դրա վկան է։ Բայց պատմությունը նաև բազմիցս ցույց է տվել, որ խաղաղություն հնարավոր է ձեռք բերել, երբ կա զիջումների և փոխզիջումների գնալու միտում: Մեզ պետք է տևական խաղաղություն, այլ ոչ թե բռնության մշտական շրջապտույտ: Հետագա ագրեսիայի դեպքում, ի՞նչ եք կարծում, միջազգային արձագանքն ա՞յլ կլինի։ Հաշվի առնելով ուժի կիրառմամբ հարցերը լուծելու և մեղավորների անպատժելիության զգացման ծանր հետևանքները՝ միջազգային հանրությունը պետք է գործադրի բոլոր ջանքերը՝ կանխելու Ադրբեջանի կողմից ցանկացած տեսակի էսկալացիա և ռազմական ագրեսիա։ Առաջադեմ աշխարհը պետք է գիտակցի, որ Հարավային Կովկասի հակամարտությունը արժեքային համակարգերի բախման վառ օրինակ է. մի կողմում ժողովրդավարական Հայաստանն է, մյուս կողմում՝ նավթով հարուստ, բայց ավտորիտար Ադրբեջանը։ Ժողովրդավարության յուրաքանչյուր նոր ձախողում նոր ձախողումներ կբերի աշխարհի մյուս անկյուններում և ավելի կսրի միջազգային անարխիկ իրավիճակը։ Սրան պետք է վերջ դրվի. որքան շուտ, այնքան լավ բոլորի համար: Եթե 2016 և 2020 թվականների ադրբեջանական ռազմական ագրեսիաները պատշաճ արձագանք ստանային, աշխարհն այսօր գուցե այլ լիներ ոչ միայն մեր անմիջական հարևանությամբ, այլև Մերձավոր Արևելքում և աշխարհի այլ մասերում։ Հայկական կողմը շարունակում է հավատալ, որ չնայած բոլոր դժվարություններին և մարտահրավերներին, երկու երկրների միջև խաղաղություն հաստատելու իրական հնարավորություն կա, որը կարող է իրականացվել, եթե երկու կողմերն էլ քաղաքական կամք դրսևորեն։ Ինչպես նախկինում բազմիցս ի ցույց է դրվել, Հայաստանն ապացուցել է իր պատրաստակամությունը վերսկսելու բանակցություններին ներգրավվածությունը՝ առաջնորդվելով հետևյալ սկզբունքներով. միմյանց տարածքային ամբողջականության փոխադարձ ճանաչում և հարգանք՝ առանց որևէ երկիմաստության, ապագա սահմանազատման գործընթաց՝ Խորհրդային Միության ամենավերջին վարչական քարտեզների և սահմանների հիման վրա, տարածաշրջանային հաղորդակցությունների ապաշրջափակում՝ պետությունների ինքնիշխանության և իրավասության նկատմամբ լիարժեք հարգման հիման վրա և իրավահավասարության ու փոխադարձության սկզբունքներ։Այս նպատակներին հասնելու համար Հայաստանի Հանրապետության կառավարությունը ներկայացրել է «Խաղաղության խաչմերուկ» նախագիծը։ Սա մեր տարածաշրջանային երկրները երկաթուղիներով, ճանապարհներով, մալուխներով, գազատարներով, էլեկտրահաղորդման գծերով միացնելու կամ գոյություն ունեցող կապերն ամրապնդելու ծրագիր է։ Այս պահին ո՛չ Թուրքիայի, ո՛չ Ադրբեջանի հետ չունենք գործող ճանապարհ, գործող երկաթուղի, մալուխ, խողովակաշար, էլեկտրահաղորդման գիծ, և առաջարկում ենք այս իրավիճակը դրականորեն փոխել։Հարց․ Ռուսաստանը ձախողել է իր դերը՝ որպես ՀԱՊԿ-ի (Հավաքական անվտանգության պայմանագրի կազմակերպություն) անդամ դաշնակից և միավորվել է Ադրբեջանի և Թուրքիայի հետ: Որտե՞ղ են գտնվում Հայաստանի հարաբերությունները Ռուսաստանի հետ.Դեսպան Մկրտչյան․ ՀԱՊԿ-ն, ընդհանուր առմամբ, մեղմ ասած, չի արդարացրել Հայաստանի սպասելիքները: Անկախ նրանից, թե տարբեր կողմերից ինչ խաղարկային խոսքեր են հնչում, փաստ է, որ ՀԱՊԿ պայմանագրային պարտավորությունները չի կատարվել։ Մի կողմից, հայկական տարածքի խախտումը և հայկական տարածքների օկուպացումը երբեք չեն ճանաչվել: Դրանով արդարացվել է անգործությունը: Մյուս կողմից՝ 2020 թվականի հրադադարի մասին հայտարարությունը խախտվել է մի քանի կետերով ստորագրումից մեկ ամիս անց՝ ադրբեջանական կողմի խախտումներով։ Իրավիճակի սրումը կանխելու համար չի ձեռնարկվել որևէ գործնական քայլ: Ավելին, Լաչինի միջանցքի վրա հարձակումները և Լեռնային Ղարաբաղի շրջափակումը իրականացվել են ռուս խաղաղապահների քթի տակ, այն դեպքում, երբ նրանք պետք է երաշխավորեին միջանցքի և Լեռնային Ղարաբաղի հայերի անվտանգությունը։ Այս բոլոր դեպքերում մենք տեսանք վիթխարի ձախողումներ, և այդ ձախողումները արդարացնելու փորձեր։ Ի՞նչ նոր դաշինքներ կարող է ստեղծել Հայաստանը ապագայի համար։ Հայաստանը զարգացնում է հարաբերությունները բազմաթիվ երկրների հետ: Մենք ընդլայնել ենք գործընկերային համագործակցությունը ԵՄ-ի, ԱՄՆ-ի հետ, գործընկերությունը Հնդկաստանի հետ։ Մենք զարգացնում ենք հարաբերությունները արաբական աշխարհի և Լատինական Ամերիկայի երկրների հետ։ Իսկապես, մեր անմիջական հարևանությունը չափազանց կարևոր է: Մենք հիանալի հարաբերություններ ունենք Վրաստանի և Իրանի հետ, և իրապես, հույս ունենք կարգավորել հարաբերությունները Թուրքիայի հետ։ Ի վերջո, Ադրբեջանի հետ հարաբերությունները նույնպես պետք է կարգավորվեն»։
20:22 - 30 դեկտեմբերի, 2023
Հունաստանի նորանշանակ դեսպանն իր հավատարմագրերի պատճենն է հանձնել ՀՀ ԱԳ նախարարի տեղակալին

Հունաստանի նորանշանակ դեսպանն իր հավատարմագրերի պատճենն է հանձնել ՀՀ ԱԳ նախարարի տեղակալին

Դեկտեմբերի 22-ին ԱԳ նախարարի տեղակալ Պարույր Հովհաննիսյանն ընդունել է Հայաստանի Հանրապետությունում Հունաստանի Հանրապետության դեսպան Խրիստոս Սոֆիանապուլոսին՝ հավատարմագրերի պատճենի հանձնման կապակցությամբ: Շնորհավորելով դեսպան Սոֆիանապուլոսին նշանակման առթիվ՝ ԱԳ նախարարի տեղակալը համոզմունք է հայտնել, որ դեսպանը առավելագույն ջանքեր կներդնի՝ ուղղված Հայաստանի և Հունաստանի միջև բարեկամական հարաբերությունների էլ ավելի խորացմանը և ամրապնդմանը։ Հանդիպման ընթացքում զրուցակիցներն անդրադարձ են կատարել ինչպես երկկողմ, այնպես էլ բազմակողմ համագործակցությանն առնչվող հարցերի օրակարգին, այդ թվում՝ ԵՄ հետ Հայաստանի գործընկերության շրջանակներում իրականացվող քայլերին։ Հանդիպմանը Պարույր Հովհաննիսյանը զրուցակցին է ներկայացրել նաև հայ-ադրբեջանական հարաբերությունների կարգավորման շուրջ վերջին զարգացումները։ Ընդգծվել է ԵՄ դիտորդական առաքելության տեղակայման կարևորությունը Հայաստանի ինքնիշխան տարածքի նկատմամբ նոր ոտնձգությունները զսպելու համատեքստում: Անդրադարձ է կատարվել տրանսպորտային և տնտեսական փոխկապակցվածության զարգացմանն ուղղված նախագծերին, այդ թվում՝ ՀՀ կառավարության կողմից մշակված «Խաղաղության խաչմերուկ» ծրագրին:
19:07 - 23 դեկտեմբերի, 2023
Ստորագրվել են Հայաստան-Հունաստան, Հայաստան-Կիպրոս և Հայաստան-Հունաստան-Կիպրոս ռազմական համագործակցության 2024-ի ծրագրերը

Ստորագրվել են Հայաստան-Հունաստան, Հայաստան-Կիպրոս և Հայաստան-Հունաստան-Կիպրոս ռազմական համագործակցության 2024-ի ծրագրերը

Դեկտեմբերի 18-ին ՀՀ պաշտպանության նախարարության վարչական համալիրում տեղի են ունեցել հայ-հունական և հայ-կիպրական երկկողմ, ինչպես նաև Հայաստան-Հունաստան-Կիպրոս եռակողմ պաշտպանական խորհրդակցությունները։ Այս մասին տեղեկացրին ՀՀ ՊՆ-ից:   Խորհրդակցություններին հունական կողմից մասնակցել են Հունաստանի ազգային պաշտպանության գլխավոր շտաբի միջազգային հարաբերությունների վարչության պետ, բրիգադի գեներալ Վասիլեոս Յամիսի, իսկ կիպրական կողմից՝ Կիպրոսի ազգային գվարդիայի գլխավոր շտաբի միջազգային համագործակցության վարչության պետ, գնդապետ Ալկիվիադիս Ալկիվիադիսի գլխավորած պատվիրակությունները։   Խորհրդակցությունների ընթացքում քննարկվել են ՀՀ պաշտպանության նախարար Սուրեն Պապիկյանի՝ Կիպրոսի Հանրապետություն և Հունաստանի Հանրապետություն կատարած պաշտոնական այցերի արդյունքները, երկկողմ և եռակողմ համագործակցության ընթացքը, նաև տարածաշրջանային ու միջազգային անվտանգությանն առնչվող հարցեր։   ՀՀ ՊՆ պաշտպանական քաղաքականության և միջազգային համագործակցության վարչության պետ Լևոն Այվազյանը գործընկերներին է ներկայացրել ՀՀ ԶՈՒ բարեփոխումների ընթացքը։ Խորհրդակցությունների արդյունքում կողմերը ստորագրել են Հայաստան-Հունաստան, Հայաստան-Կիպրոս և Հայաստան-Հունաստան-Կիպրոս ռազմական համագործակցության 2024 թվականի ծրագրերը, որոնք ներառում են մի քանի տասնյակ միջոցառումներ փոխադարձ հետաքրքրություն ներկայացնող ոլորտներում։
19:28 - 18 դեկտեմբերի, 2023