Էստոնիա

Էստոնիա-Հայաստան խորհրդարանական խմբի անդամները հանդես են եկել Լաչինի միջանցքի արգելափակման մասին հայտարարությամբ

Էստոնիա-Հայաստան խորհրդարանական խմբի անդամները խորապես մտահոգված են Լաչինի միջանցքի արգելափակման կապակցությամբ: Նրանք հանդես են եկել համատեղ հայտարարությամբ: «Միջանցքը տարածաշրջանի տեղական բնակչության համար կենսական նշանակության կարևոր ճանապարհ է: Հոսանքի հաճախակի անջատումների և էլեկտրականության ու գազի բացակայության պատճառով հումանիտար ճգնաժամը տարածաշրջանում օրեցօր վատթարանում է: Բացի դրանից՝ ժողովուրդը կենսական իրերի կարիք ունի` դեղորայք և բժշկական օգնություն, սնունդ և վառելիք»,- նշել է խորհրդարանական խումբը համատեղ հայտարարարության մեջ: Հայտարարությամբ խմբի անդամները կոչ են արել շահագրգիռ կողմերին՝ վերադառնալ բանակցությունների սեղանի շուրջ` տարածաշրջանում կայունության և զարգացման ապահովմանն աջակցելու նպատակով: «Արգելափակումը շարունակում է վնասակար ազդեցություն ունենալ Հայաստանի և Ադրբեջանի միջև խաղաղության գործընթացի վրա: Մենք խորապես հավատում ենք, որ հումանիտար հարցերի կարգավորումը, տեղաշարժման ազատությունը և միջանցքի անվտանգությունն ունեն չափազանց կարևոր նշանակություն` առաջընթացի ապահովման համար»,- հայտարարել են խմբի անդամները: Հայտարարությունը ստորագրել են խորհրդարանական խմբի նախագահ Ռայվո Տամը և անդամներ Մատի Ռայդման, Միհայիլ Լոտմանը, Տարմո Կրուուսիմեն և Լեո Կունասը:

13:23 - 28 փետրվարի, 2023

Լատվիան ՌԴ-ի դեսպանից պահանջել է 1 ամսից լքել երկիրը |armenpress.am|

armenpress.am: Լատվիայում ՌԴ-ի դեսպան Միխայիլ Վանինը մինչև փետրվարի 24-ը պետք է լքի Լատվիան, հայտնել է այդ երկրի Արտաքին գործերի նախարարությունը։ Այդ մասին տեղեկանում ենք «Интерфакс» գործակալությունից: Լատվիայի ԱԳՆ-ում պարզաբանել են, որ երկուշաբթի օրը նախարարություն է հրավիրվել ՌԴ դեսպանը, որը տեղեկացվել է երկրի որոշման մասին, ըստ որի փետրվարի 24-ից Ռուսաստանի հետ դիվանագիտական հարաբերությունների մակարդակն իջեցվելու է մինչև գործերի հավատարմատարի մակարդակի։ Երկուշաբթի օրն ավելի վաղ Լատվիայի արտգործնախարար էդգար Ռինկևիչը հայտնել էր, որ Ռիգան որոշել է իջեցնել Ռուսաստանում դիվանագիտական ներկայացուցչության մակարդակը և փետրվարի 24-ից հետ կանչել Մոսկվայում Լատվիայի դեսպան Մարիս Ռիեկստինշին։ Համապատասխանաբար, Ռիգան Մոսկվայից պահանջել է համարժեք գործողություններ։ Նախարարի խոսքով՝ այս որոշումն ընդունվել է՝ ի նշան էստոնիայի հետ համերաշխության։ Ավելի վաղ Ռուսաստանի Արտաքին գործերի նախարարությունը հունվարի 23-ին ՌԴ-ում էստոնիայի դեսպան Մարգուս Լայդրեին կանչել էր գերատեսչություն և հայտնել, որ վերջինս փետրվարի 7-ին պետք է երկիրը լքի: Ռուսական կողմը որոշել է երկու երկրներում դիվանագիտական ներկայացուցչի պաշտոնն իջեցնել գործերի ժամանակավոր հավատարմատարի պաշտոնի: Հունվարի սկզբին էստոնիայի արտգործնախարարությունը Ռուսաստանից պահանջել էր մինչև փետրվարի 1-ը դիվանագիտական ներկայացուցչությունում իր անձնակազմի թիվը նվազեցնել և դեսպանատանն ունենալ միայն 8 դիվանագետ և վարչական, տեխնիկական և սպասարկող 15 աշխատակից: Ըստ Associated Press գործակալության՝ էստոնիայի ԱԳ նախարար Ուրմաս Ռեյնսալուն հայտարարել է, որ ի պատասխան ՌԴ քայլի, ելնելով հավասարության սկզբունքից՝ էստոնիայում Ռուսաստանի դեսպանը փետրվարի 7-ին պետք է լքի երկիրը:

12:01 - 24 հունվարի, 2023

Ռուսաստանն արտաքսել է Էստոնիայի դեսպանին, Էստոնիան համարժեք պատասխան է տվել |armenpress.am|

armenpress.am: Ռուսաստանի Արտաքին գործերի նախարարությունը ՌԴ-ում Էստոնիայի դեսպան Մարգուս Լայդրեին կանչել է գերատեսչություն և հայտնել, որ վերջինս պետք է երկիրը լքի փետրվարի 7-ին: Այս մասին տեղեկանում են ՌԴ ԱԳՆ տարածած հաղորդագրությունից: «Այժմ Էստոնիան նոր անբարյացակամ քայլ է ձեռնարկել՝ արմատապես նվազեցնելով Տալլինում Ռուսաստանի դեսպանատան անձնակազմի թվաքանակը, ինչը հաստատում է մեր երկրների միջև հարաբերությունների փլուզման միտվածությունը։ Որպես պատասխան՝ ռուսական կողմը որոշել է երկու երկրներում դիվանագիտական ներկայացուցչի պաշտոնն իջեցնել գործերի ժամանակավոր հավատարմատարի պաշտոնի», - նշվում է ՌԴ ԱԳՆ հաղորդագրությունում: ՌԴ ԱԳՆ-ն շեշտում է, որ «նման իրավիճակի զարգացման ողջ պատասխանատվությունն ընկնում է էստոնական կողմի վրա»: Ըստ Associated Press գործակալության՝ Էստոնիայի ԱԳ նախարար Ուրմաս Ռեյնսալուն հայտարարել է, որ ի պատասխան ՌԴ քայլի, ելնելով հավասարության սկզբունքից՝ Էստոնիայում Ռուսաստանի դեսպանը փետրվարի 7-ին պետք է լքի երկիրը: Հունվարի սկզբին Էստոնիայի արտգործնախարարությունը Ռուսաստանից պահանջել էր մինչև փետրվարի 1-ը դիվանագիտական ներկայացուցչությունում իր անձնակազմի թիվը նվազեցնել և դեսպանատանն ունենալ միայն 8 դիվանագետ և վարչական, տեխնիկական և սպասարկող 15 աշխատակից:

17:57 - 23 հունվարի, 2023

Հայաստանը և Էստոնիան ստորագրել են նորագույն տեխնոլոգիաների բնագավառում փոխգործակցության հուշագիր

ՀՀ բարձր տեխնոլոգիական արդյունաբերության նախարար Ռոբերտ Խաչատրյանը ՀՀ նախագահ Վահագն Խաչատուրյանի ղեկավարած պատվիրակության կազմում հունվարի 15-17-ը աշխատանքային այցով եղել է Էստոնիայի Հանրապետությունում։ Այս մասին հայտնում են ՀՀ բարձր տեխնոլոգիական արդյունաբերության նախարարությունից։ «Այցի շրջանակում նախարար Խաչատրյանը հունվարի 17-ին Տալլինում հանդիպում է ունեցել Էստոնիայի Հանրապետության ձեռնարկատիրական գործունեության և տեղեկատվական տեխնոլոգիաների նախարար Քրիստիան Յարվանի հետ, քննարկել երկու երկրների միջև տեխնոլոգիական ոլորտում գործակցության հեռանկարներին առնչվող մի շարք հարցեր: Հանդիպման ընթացքում նախարարները ստորագրել են «Հայաստանի Հանրապետության բարձր տեխնոլոգիական արդյունաբերության նախարարության և Էստոնիայի Հանրապետության տնտեսական հարցերի և հաղորդակցության նախարարության միջև նորագույն տեխնոլոգիաների բնագավառում փոխգործակցության մասին» փոխըմբռնման հուշագիր»,- նշվում է հաղորդագրության մեջ։

14:21 - 18 հունվարի, 2023

ՀՀ նախագահը ողջունել է Էստոնիայի ԱԳՆ-ի հայտարարությունները Լաչինի միջանցքի շրջափակման կապակցությամբ

Էստոնիայի Հանրապետություն կատարած այցի շրջանակում Հանրապետության նախագահ Վահագն Խաչատուրյանն աշխատանքային ճաշ է ունեցել Էստոնիայի Արտաքին գործերի նախարար Ուրմաս Ռեինսալուի հետ: Այս մասին հայտնում են ՀՀ նախագահի աշխատակազմից։ Նախագահ Խաչատուրյանը ողջունել է Էստոնիայի ԱԳՆ հայտարարությունները Լաչինի միջանցքի շրջափակման կապակցությամբ և շնորհակալություն հայտնել խնդրո առարկայի վերաբերյալ Էստոնիայի հստակ դիրքորոշման համար: «Նախարար Ռեինսալուն իր հերթին շեշտել է, որ Էստոնիան խորապես հետաքրքրված է տարածաշրջանում կայուն խաղաղության հաստատմամբ: Ուրմաս Ռեինսալուն ընդգծել է նաև, որ Էստոնիան լիովին սատարում է սահմանի երկայնքով ԵՄ տևական դիտորդական առաքելության տեղակայման որոշումը: Զրույցի ընթացքում անդրադարձ է կատարվել ինչպես հայ-էստոնական համագործակցությունն առավել խթանելուն, այնպես էլ ԵՄ Արևելյան գործընկերության հարթակն արդյունավետ օգտագործելու խնդիրներին: Անդրադառնալով Հարավային Կովկասում ներկայիս իրավիճակին ու հիմնախնդիրներին, Վահագն Խաչատուրյանը շեշտել է, որ Հայաստանը միանշանակ որդեգրել է տարածաշրջանում կայուն և հարատև խաղաղության հասնելու, հարևանների հետ բարիդրացիական հարաբերությունների հաստատման մոտեցումը: Արձագանքելով Հայաստանի նախագահին Էստոնիայի ԱԳ նախարարն իր երկրի պատրաստակամությունն է հայտնել հնարավոր բոլոր ջանքերը ներդնել տարածաշրջանում առկա խնդիրների խաղաղ կարգավորմանն աջակցելու ուղղությամբ: Նախարարը նաև ողջունել է Թուրքիայի հետ առանց նախապայմանների հարաբերությունների հաստատման վերաբերյալ հայկական կողմի պատրաստակամությունը»,- նշված է հաղորդագրության մեջ։

13:57 - 18 հունվարի, 2023

Էստոնիայի խորհրդարանի նախագահը պարզաբանել է, թե ինչու է պատերազմից հետո այցելել գրավյալ Շուշի

Հայաստանի Հանրապետության նախագահ Վահագն Խաչատուրյանն Էստոնիա կատարած աշխատանքային այցի շրջանակում այցելել է Էստոնիայի խորհրդարան՝ Ռիյգիկոգու և հանդիպում ունեցել խորհրդարանի նախագահ Յուրի Ռատասի հետ։ Այս մասին հայտնում են ՀՀ նախագահի աշխատակազմից։ Նշվում է, որ հանդիպման ընթացքում Վահագն Խաչատուրյանն անդրադարձել է տարածաշրջանային առկա զարգացումներին և հիմնախնդիրներին, մասնավորապես՝ Լաչինի միջանցքի շրջափակման հետևանքով առաջացած հումանիտար ճգնաժամի վտանգներին։ «Էստոնիայի խորհրդարանի խոսնակ Ռատասն անթույլատրելի է որակել հումանիտար աղետի սպառնալիքը և շեշտել, որ Լաչինի մարդասիրական միջանցքը և ընդհանրապես որևէ հումանիտար միջանցք չի կարող շրջափակված մնալ և վտանգել հազարավոր մարդկանց կյանքն ու առողջությունը»,- նշված է հաղորդագրության մեջ։ Ռիյգիկոգուի նախագահը, ըստ ՀՀ նախագահի աշխատակազմի, անդրադարձել է նաև Շուշի կատարած իր այցելությանը և նշել, որ նպատակ է ունեցել զուտ տեղում ծանոթանալ ընդհանուր իրավիճակին: Նա նշել է՝ Էստոնիան իր հնարավորությունների սահմաններում պատրաստ է նպաստել Հարավային Կովկասում խաղաղության հաստատման օրակարգին։ Հիշեցնենք, որ Էստոնիայի խորհրդարանի խոսնակ Յուրի Ռատասը Շուշի է այցելել 2022թ․ մայիսի 24-ին։ Ադրբեջանական լրատվամիջոցների փոխանցմամբ՝ Էստոնիայի խորհրդարանի խոսնակին ներկայացվել էին «քաղաքի պաատմությունը, Շուշիում իրականացվող վերականգնողական աշխատանքները»։ ՀՀ ԱԺ նախագահ Ալեն Սիմոնյանը Հայաստանում Էստոնիայի դեսպանի հետ 2022թ․ հուլիսի 8-ին ունեցած հանդիպմանը ծայրահեղ մտահոգիչ էր որակել Ռատասի այցը Շուշի։ ՀՀ նախագահի լրատվության բաժնից նաև հայտնում են, որ հանդիպման ընթացքում անդրադարձ է կատարվել հայ-էստոնական համագործակցության ներուժի և հնարավորությունների կյանքի կոչմանը թվայնացման, բարձր տեխնոլոգիաների ու սահմանային անվտանգության համակարգերի ներդրման ոլորտներում։ Վահագն Խաչատուրյանը և Յուրի Ռատասն առանձնահատուկ կարևորել են երկու երկրների խորհրդարանների փոխգործակցությունն ու խորհրդարանական դիվանագիտության զարգացումը»,-

16:37 - 17 հունվարի, 2023

Տալլինն աջակցում է Հայաստանի և Ադրբեջանի սահմանի երկայնքով ԵՄ դիտորդական առաքելության մեկնարկին. Էստոնիայի նախագահ

Էստոնիայի նախագահ Ալար Կարիսը անդրադարձել է Տալլինում գտնվող ՀՀ նախագահ Վահագն Խաչատուրյանի հետ հանդիպմանը ու նշել, որ «քննարկել են լարվածությունը Ղարաբաղի տարածաշրջանում»։ Ըստ նրա՝ զրուցակիցները համաձայնության են եկել, որ անհրաժեշտ է խաղաղ կարգավորում։ «Մենք բանակցային, համապարփակ ու կայուն խաղաղության կոչ ենք անում՝ միջազգային հանրության աջակցությամբ։ Էստոնիան աջակցում է Հայաստանի և Ադրբեջանի սահմանի երկայնքով ԵՄ դիտորդական առաքելության մեկնարկին»,- իր թվիթերյան էջում գրել է Ալար Կարիսը։ Լուսանկարը՝ ՀՀ նախագահի աշխատակազմի

12:47 - 17 հունվարի, 2023

Վահագն Խաչատուրյանն աշխատանքային ընթրիք է ունեցել Էստոնիայի նախագահ Ալար Կարիսի հետ

Էստոնիայի Հանրապետությունում գտնվող Հայաստանի նախագահ Վահագն Խաչատուրյանն աշխատանքային ընթրիք է ունեցել Էստոնիայի նախագահ Ալար Կարիսի հետ: Այս մասին հայտնում են ՀՀ նախագահի աշխատակազմից։ Նախագահները բարձր են գնահատել երկու երկրների միջև երկկողմ ու բազմակողմ համագործակցությունը՝ կարևորելով ապագային ուղղված ծրագրերի իրագործման անհրաժեշտությունը։

10:53 - 17 հունվարի, 2023

Հայաստանը միշտ կարևորություն է տալիս Էստոնիայի հետ հարաբերությունների զարգացմանն ու ամրապնդմանը. Վահագն Խաչատուրյան

19:27 - 16 հունվարի, 2023

Հայաստանի նախագահը և Էստոնիայի վարչապետն անդրադարձել են անվտանգային և տարածաշրջանային նշանակության հարցերի

Աշխատանքային այցով Էստոնիայի Հանրապետությունում գտնվող Հայաստանի նախագահ Վահագն Խաչատուրյանը հանդիպել է Էստոնիայի վարչապետ Կայա Կալասի հետ: Հանդիպմանը բարձր է գնահատվել երկու երկրների միջև տարբեր ուղղություններով ձևավորված սերտ համագործակցությունը: Քննարկվել է մասնավորապես՝ բարձր տեխնոլոգիաների, տիեզերագնացության, առևտրատնտեսական կապերի սերտացմանն առնչվող հարցերի լայն շրջանակ: Կողմերն անդրադարձել են նաև անվտանգային և տարածաշրջանային նշանակության հարցերի, ընդգծել կայուն և երկարատև խաղաղության հաստատման կարևորությունը:

18:33 - 16 հունվարի, 2023

ՀՀ նախագահը էստոնացի գործընկերոջը ներկայացրել է Լաչինի միջանցքի շրջափակման ու դրա հետևանքների վերաբերյալ մանրամասները

Էստոնիայի Հանրապետության նախագահի նստավայրում տեղի է ունեցել աշխատանքային այցով այդ երկիր ժամանած Հայաստանի նախագահ Վահագն Խաչատուրյանի և Էստոնիայի նախագահ Ալար Կարիսի առանձնազրույցը, որին հաջորդել է երկու երկրների պատվիրակությունների հանդիպումն ընդլայնված կազմով: Այս մասին հայտնում են ՀՀ նախագահի աշխատակազմից։ Հաղորդագրության մեջ նշվում է, որ Էստոնիայի նախագահ Ալար Կարիսը, ողջունելով նախագահ Վահան Խաչատուրյանին, նշել է, որ իր համար շատ սպասված էր այս հանդիպումը, քանի որ հայ-էստոնական հարաբերություններն ունեն լավագույն ավանդույթներ և զարգացման մեծ ներուժ։ Էստոնիայի նախագահը գոհունակությամբ է արձանագրել, որ Էստոնիայում կա թեկուզ փոքր, բայց շատ ակտիվ հայկական համայնք։ Ալար Կարիսն առանձնահատուկ շեշտել է, որ հայերն Էստոնիայի օրինակելի ու օրինապահ քաղաքացիներ են: «Նախագահ Վահագն Խաչատուրյանը շնորհակալություն է հայտնել հրավերի և ջերմ ընդունելության համար և ընդգծել նման բարձր մակարդակի հանդիպման կարևորությունը։ «Ներկայում Հայաստանը գտնվում է բավականին բարդ իրավիճակում, այնուամենայնիվ, ես սիրով ընդունել եմ Ձեր հրավերն այցելել Էստոնիա, քանի որ կարծում եմ, որ մեր երկկողմ հարաբերություններում նախագահական այցերի շուրջ 20-ամյա ընդմիջումը որևէ կերպ չի համապատասխանում երկու երկրների ու ժողովուրդների ջերմ բարեկամական հարաբերությունների ոգուն: Կարծում եմ՝ մենք այն երկրները չենք, որ նման «ճոխություն» կարող ենք մեզ թույլ տալ, և այդ բացթողումը պետք է հնարավորինս ակտիվ կերպով լրացնել և սերտացնել մեր կապերը»,- նշել է նախագահ Խաչատուրյանը: Հանդիպման ընթացքում նախագահ Խաչատուրյանն էստոնացի պաշտոնակցին է ներկայացրել հայ-ադրբեջանական և տարածաշրջանային հիմնախնդիրները, Լաչինի հումանիտար միջանցքի շրջափակման և դրա հետևանքների վերաբերյալ մանրամասները։ Այս համատեքստում Վահագն Խաչատուրյանը գոհունակություն է հայտնել Լաչինի միջանցքի ապաշրջափակման վերաբերյալ Էստոնիայի հստակ դիրքորոշման համար։ Էստոնիայի նախագահ Ալար Կարիսը վստահեցրել է, որ Էստոնիան՝ որպես առանձին երկիր և որպես ԵՄ անդամ, փորձում է հնարավորինս անկողմնակալ միջնորդական ջանքեր ներդնել՝ Հարավային Կովկասում կայուն և հարատև խաղաղության հաստատման համար: Հանդիպման ընթացքում քննարկվել է հայ-էստոնական համագործակցությանն առնչվող հարցերի լայն շրջանակ, նախանշվել փոխգործակցության հեռանկարային ուղղությունները՝ մասնավորապես բարձր տեխնոլոգիական արդյունաբերության, թվայնացման, կիբերանվտանգության, սահմանային անվտանգության համակարգերի ներդրման ոլորտները»,- նշվում է նախագահականի հաղորդագրության մեջ։ Հավելենք, որ Էստոնիայում գործում է խորհրդարանական կառավարման համակարգ։ Լուսանկարները՝ ՀՀ նախագահի աշխատակազմի

16:35 - 16 հունվարի, 2023

Ադրբեջանի ու Էստոնիայի ԱԳ նախարարները քննարկել են Լաչինի միջանցքում ստեղծված իրադրությունը |azatutyun.am|

azatutyun.am: «Ինտերֆաքս-Ազերբայջան» լրատվական գործակալության փոխանցմամբ, Ադրբեջանի արտաքին գործերի նախարար Ջեյհուն Բայրամովն Էստոնիայի արտաքին գործերի նախարար Ուրմաս Ռեինսալուի հետ հեռախոսազրույցում քննարկել է Լաչինի միջանցքի հարցը: Բայրամովը պաշտոնակցին հավաստիացրել է, թե «միջանցքի փակ լինելու մասին հայկական կողմի պնդումներն իրականությանը չեն համապատասխանում»: Նա ասել է, թե Ադրբեջանը փորձում է բարելավել հարաբերությունները Հայաստանի հետ, սակայն «հայկական կողմը տորպեդահարում է այդ ջանքերը»: Բայրամովի պնդմամբ հայերը չարաշահել են միջանցքի շահագործումը, քանի որ թույլ են տվել, որ դրանով երթևեկեն երրորդ երկրների քաղաքացիներ: Բացի այդ, ըստ Բայրամովի, միջանցքի վերաբերյալ պայմանավորվածության խախտումների մասին է վկայում նաև այն, որ «դրանով հայերը Հայաստանից Ադրբեջան են փոխադրել Հայաստանում 2021 թվականին արտադրված ականներ»: «Ինտերֆաքս-Ազերբայջան»-ի հաղորդագրությունում Լաչինի միջանցքի մասին Էստոնիայի արտգործնախարարի հայտնած տեսակետները ներառված չեն:

17:51 - 31 դեկտեմբերի, 2022

Լաչինի միջանցքի շարունակվող շրջափակումը մարդկային ծանր տառապանք է պատճառում Լեռնային Ղարաբաղի բնակչությանը․ Էստոնիայի ԱԳՆ

Լաչինի միջանցքի շարունակվող շրջափակումը մարդկային ծանր տառապանք է պատճառում Լեռնային Ղարաբաղի բնակչությանը և վնասակար ազդեցություն է ունենում Հայաստանի ու Ադրբեջանի միջև ընթացող խաղաղության գործընթացի վրա։ Այս մասին նշված է Էստոնիայի ԱԳՆ տարածած հաղորդագրության մեջ։ «Էստոնիան կողմերին կոչ է անում հավատարիմ մնալու 2020 թվականի նոյեմբերի եռակողմ հայտարարությանը և վերադառնալու խաղաղ բանակցություններին»,- նշված է ԱԳՆ թվիթերում։ Արդեն ութերորդ օրն է՝ Ադրբեջանը շարունակում է փակ պահել Արցախը Հայաստանին կապող միակ ճանապարհը: 1100 քաղաքացի, որից 270-ը անչափահաս, տուն վերադառնալու հնարավորություն չունի: Միջանցքը փակած ադրբեջանցիներն իրենց անվանում են անկախ բնապահպաններ, ճանապարհի հենց մեջտեղում վրաններ են տեղադրել։ Միջանցքը փակ է նաև շտապօգնության մեքենաների համար։ Հիվանդանոցները չեն ստանում անհրաժեշտ բժշկական ապրանքներ ու դեղորայք, մթերային խանութների դարակները կիսադատարկ են։ Ադրբեջանը դեկտեմբերի 13-ին խափանել էր նաեւ Արցախի գազամատակարարումը, որ օրեր անց վերականգնեց։

17:32 - 19 դեկտեմբերի, 2022

Արսեն Թորոսյանը Լաչինի միջանցքի փակման առնչությամբ նամակներ է հղել խորհրդարանական բարեկամական խմբերի ղեկավարներին

ՀՀ ԱԺ «Քաղաքացիական պայմանագիր» խմբակցության պատգամավոր Արսեն Թորոսյանը Ֆեյսբուքի իր էջում գրել է, որ նամակներ է հղել Հայաստան-Լիտվա, Հայաստան-Էստոնիա և Հայաստան-Մոնտենեգրո խորհրդարանական բարեկամական խմբերի ղեկավարներին: Նա տեղեկատվություն է տրամադրել Ադրբեջանի կողմից Լաչինի միջանցքի արգելափակման և Լեռնային Ղարաբաղ գազի մատակարարման խափանման վերաբերյալ՝ ակնկալելով ուշադրություն և համապատասխան արձագանք այս իրավիճակին, որը կարող է մարդասիրական ճգնաժամի հանգեցնել։

14:01 - 15 դեկտեմբերի, 2022

Արարատ Միրզոյանը հանդիպել է էստոնացի գործընկերոջը

Դեկտեմբերի 1-ին Լեհաստանի Լոձ քաղաքում ընթացող ԵԱՀԿ նախարարական համաժողովի շրջանակներում Հայաստանի արտգործնախարար Արարատ Միրզոյանը հանդիպում է ունեցել Էստոնիայի ԱԳ նախարար Ուրմաս Ռեինսալուի հետ։ ԱԳՆ հաղորդմամբ, զրուցակիցները կարևորել են փոխադարձ վստահության և ընդհանուր ժողովրդավարական արժեքների վրա հիմնված երկկողմ հարաբերությունների զարգացումը: Անդրադարձ է կատարվել նաև Հայաստան-Եվրամիություն հարաբերությունների զարգացմանը։ Արարատ Միրզոյանը և Ուրմաս Ռեինսալուն քննարկել են միջազգային և տարածաշրջանային օրակարգի հարցեր։ Հայաստանի ԱԳ նախարարն իր գործընկերոջն է ներկայացրել Հարավային Կովկասում կայուն և տևական խաղաղության հաստատման վերաբերյալ հայկական կողմի մոտեցումները։ Հայկական կողմը նաև կարևորել է Հայաստանում ԵՄ դիտորդական առաքելության գործունեությունը, որն իր նպաստն է բերում տարածաշրջանում իրավիճակի կայունացմանը:

14:35 - 01 դեկտեմբերի, 2022

ՀՀ ՄԻՊ-ը Էստոնիայի դեսպանին է ներկայացրել հայ ռազմագերիների խոշտանգման փաստերը

Հոկտեմբերի 13-ին ՄԻՊ Քրիստիննե Գրիգորյանը ընդունել է Հայաստանի Հանրապետությունում էստոնիայի Հանրապետության Արտակարգ և լիազոր դեսպան Ն.Գ. տիկին Ռինա Կալյուրանդին: Հանդիպման ընթացքում Պաշտպանը ներկայացրել է ՄԻՊ-ի գործառույթները, դերը և մանդատը: Ներկայացրել է Պաշտպանին առընթեր ձևավորված կանանց իրավունքների հարցերով խորհրդի աշխատանքները, նշել նպատակները: Քրիստիննե Գրիգորյանը կարևորել է, որ կանանց իրավունքների հարցերով խորհրդի կազմում ներգրավված են հասարակական կազմակերպություններ, իրավապաշտպաններ, որոնց մեծ մասը ՀՀ մարզերից են: Պաշտպանը խոսել է նաև կնոջ դերի մասին՝ անվտանգության և խաղաղության համատեքստում՝ շեշտելով, որ կարևորում է կանանց առավել ակտիվ ներգրավվումը իրավապահ կառույցներում: Հանդիպմանն անդրադարձ է կատարվել սեպտեմբերի 13-15-ը ՀՀ սուվերեն տարածքի վրա ադրբեջանական զինված ուժերի հարձակման հետևանքներին, որի ընթացքում 3 մարզերից տարհանվել է 7600-ից ավելի մարդ, որից 1437 երեխա, 99 հաշմանդամություն ունեցող անձ: Նշել է, որ թիրախավորվել են կենսական քաղաքացիական ենթակառուցվածքները, այդ թվում՝ դպրոցները, վիրավորվել է 7 քաղաքացիական անձ, սպանվել՝ 4-ը: Քրիստիննե Գրիգորյանը ներկայացրել է նաև ադրբեջանական ԶՈՒ-ի կողմից հայ ռազմագերիների խոշտանգման, գերիների արտադատական սպանությունների ու անդամահատումների փաստերը, որոնք ամփոփված են Պաշտպանի հրապարակած արտահերթ զեկույցներում: Պաշտպանը խոսել է նաև Մարդու իրավունքների պաշտպանի տարածքային ստորաբաժանումների մասին և կարևորել դրանց դերը կատարվող աշխատանքներում, նշել է, որ եկող տարի նախատեսվում է 5-րդ տարածքային ստորաբաժանման բացումը: Դեսպանն իր հերթին շնորհակալություն է հայտնել Պաշտպանին և ՄԻՊ թիմին կատարած աշխատանքի, փաստահավաք աշխատանքների և հայտարարությունների համար: Կողմերը պատրաստակամություն են հայտնել շարունակել արդյունավետ և վստահելի փոխգործակցությունը:

16:59 - 14 հոկտեմբերի, 2022