Իսրայել

Իսրայելի պետությունը ստեղծվել է 1948 թվականի մայիսի 14-ին՝ ՄԱԿ-ի Գլխավոր ասամբլեայի 1947 թվականի նոյեմբերի 29-ի որոշմամբ, ըստ որի Մեծ Բրիտանիայի ենթամանդատային Պաղեստինը հռչակվում էր անկախ եւ նրա տարածքում ստեղծվում էին երկու ինքնուրույն՝ արաբական եւ հրեական պետություններ։

Հրեական պետությանը՝ Իսրայելին, հատկացվում էր 14 հզ. կմ2 (Պաղեստինի տարածքի 56%) տարածություն՝ խառը բնակչությամբ։ Երուսաղեմը հանձնվում էր ՄԱԿ-ի կառավարմանը։ 1948 թվականի մայիսին Իսրայելում ստեղծվեց ժամանակավոր կառավարություն, որը կազմված էր բացառապես սիոնիստական կուսակցությունների ներկայացուցիչներից։ Կառավարության առաջին իսկ՝ «Անկախության դեկլարացիայով» սիոնիզմը հռչակվեց Իսրայելի պաշտոնական գաղափարախոսություն եւ քաղաքականություն։

Արաբա-իսրայելական պատերազմներից հետո` 1974 թվականի հունվարին եւ 1975 թվականի սեպտեմբերին Եգիպտոսի, իսկ 1974 թվականի մայիսին Սիրիայի հետ Իսրայելը կնքեց զորքերի տարանջատման եւ նրանց միջեւ բուֆերային գոտիներ ստեղծելու համաձայնագրեր։ 1979 թվականին Եգիպտոսը՝ առաջին արաբական երկիրն էր, որը խաղաղության դաշինք կնքեց Իսրայելի հետ։ Արդյունքում, Իսրայելը Սինայի թերակղզին Եգիպտոսին հետ վերադարձրեց։ Հորդանանը եւ Իսրայելը խաղաղության դաշինք կննքեցին 1994 թվականին։ Իսկ 2005 թվականին Իսրայելը իր բանակը դուրս բերեց Գազայի շրջանից։

Պուտինը և Սի Ծինփինը հեռախոսազրույցում դատապարտել են Իսրայելի գործողությունները |factor.am|

factor.am: ՌԴ նախագահ Վլադիմիր Պուտինը և Չինաստանի նախագահ Սի Ծինփինը դատապարտել են Իսրայելին Իրանին հարվածելու համար և համաձայնել են, որ անհրաժեշտ է լարվածությունը թուլացնել։ Այս մասին հաղորդագրություն է տարածել Կրեմլը երկու առաջնորդների հեռախոսազրույցից հետո, գրում է Reuters-ը։ Պուտինը և Սին «խստորեն դատապարտում են Իսրայելի գործողությունները, որոնք խախտում են ՄԱԿ-ի կանոնադրությունը և միջազգային իրավունքի այլ նորմեր», այս մասին լրագրողներին ասել է Կրեմլի օգնական Յուրի Ուշակովը։ «Ե՛վ Մոսկվան, և՛ Պեկինը հիմնարար կերպով կարծում են, որ Իրանի միջուկային ծրագրի հետ կապված ներկայիս իրավիճակի և հարցերի ռազմական լուծում չկա։ Այս լուծումը պետք է ձեռք բերվի բացառապես քաղաքական և դիվանագիտական միջոցներով»։ Չինաստանի ղեկավարը հեռախոսազրույցի ժամանակ ասել է, որ տարածաշրջանում «հատուկ ազդեցություն» ունեցող «խոշոր երկրները» պետք է ակտիվացնեն դիվանագիտական ջանքերը՝ իրավիճակը հանդարտեցնելու համար։ «Պատերազմող կողմերը, մասնավորապես Իսրայելը, պետք է հնարավորինս շուտ դադարեցնեն կրակը՝ կանխելու համար լարվածության սրման ցիկլը և վճռականորեն խուսափեն պատերազմի տարածումից», – ասել է Սի Ծինփինը։ Նա նաև հորդորել է ջանքեր գործադրել քաղաքացիական բնակչությանը պաշտպանելու համար՝ կոչ անելով Իսրայելին և Իրանին նպաստել այլ երկրներից քաղաքացիների տարհանմանը։ Ռուսաստանը կոչ է արել ԱՄՆ-ին չմիանալ Իսրայելի ռմբակոծություններին։ Վերջին օրերին Պուտինը կապի մեջ է եղել ԱՄՆ նախագահ Դոնալդ Թրամփի, Իսրայելի վարչապետ Բենիամին Նեթանյահուի և Իրանի նախագահ Մասուդ Փեզեշքիանի հետ և բազմիցս հայտարարել է, որ Ռուսաստանը պատրաստ է միջնորդել պատերազմող կողմերի միջև։ Շարունակությունը՝ սկզբնաղբյուր կայքում:

20:21 - 19 հունիսի, 2025

Խամենեիի սպանությունն աղետալի հետևանքներ կունենա. «Հեզբոլլահ» |tert.am|

tert.am: Լիբանանյան «Հեզբոլլահ» շարժումը նախազգուշացրել է, որ Իրանի գերագույն առաջնորդի սպանությունը կունենա «աղետալի հետևանքներ»։ Ինչպես գրում է Times of Israel-ը, տարածված հայտարարության մեջ «Հեզբոլլահ»-ն աջակցություն է հայտնել Իրանի գերագույն առաջնորդ այաթոլլահ Ալի Խամենեիին՝ ի պատասխան Իսրայելի և ԱՄՆ առաջնորդների կողմից հնչեցված սպառնալիքների, որ նա կարող է սպանվել։ «(Խամենեիի) Սպանության սպառնալիքները հիմարություն են և անխոհեմ, և կունենան աղետալի հետևանքներ… Դրանք արդեն իսկ արտաբերելը վիրավորանք է հարյուր միլիոնավոր հավատացյալների և իսլամի հետ կապվածների համար, և դա միանգամայն դատապարտելի է: Այսօր մենք ավելի վճռական ենք և միավորված նրա շուրջ», - ասվում է հայտարարության մեջ:Հիշեցնենք, որ Ռուսաստանի Դաշնության նախագահ Վլադիմիր Պուտինը հայտարարել է, որ նույնիսկ չի ցանկանում քննարկել Իսրայելի կողմից Իրանի գերագույն առաջնորդ այաթոլլա Ալի Խամենեիին սպանելու հնարավորությունը։ «Եթե թույլ կտաք, հուսով եմ, որ սա կլինի Ձեր հարցի ամենաճիշտ պատասխանը. «Ես նույնիսկ չեմ ուզում քննարկել նման հնարավորությունը»», - ասել է նա՝ պատասխանելով այն հարցին, թե ինչպիսին կլինի Ռուսաստանի արձագանքը, եթե Իսրայելը սպանի այաթոլլահին։ AFP Europe-ի խմբագիր Քարիմ Թալբին նշել է, որ նման հնարավորությունը «արդեն բացահայտորեն քննարկվում է» ԱՄՆ նախագահ Դոնալդ Թրամփի և Իսրայելի վարչապետ Բենիամին Նեթանյահուի կողմից։«Ես լսել եմ այս ամենը, բայց նույնիսկ չեմ ուզում քննարկել դա», - պատասխանել է Պուտինը։

12:40 - 19 հունիսի, 2025

Իրանի վրա գիշերային հարվածներին մասնակցել է 40 կործանիչ․ Իսրայելի պաշտպանության բանակ |factor.am|

factor.am: Իսրայելի ռազմաօդային ուժերը այսօր առավոտյան ռմբակոծել են Իրանի Արաքի ծանր ջրի ռեակտորը, իսկ գիշերը՝ նաև տասնյակ այլ ռազմական օբյեկտներ։ Այս մասին հայտարարում է Իսրայելի պաշտպանության բանակը։ Նշվում է, որ գիշերային հարվածներին մասնակցել է 40 կործանիչ, որոնք Թեհրանում և Իրանի այլ վայրերում գտնվող տասնյակ իրանական ռազմական օբյեկտների վրա նետել են տարատեսակ 100 զինամթերք։ Բացի այդ՝ այսօր առավոտյան հարված է հասցվել Արաքի միջուկային օբյեկտին, այդ թվում՝ ռեակտորի պաշտպանիչ կառուցվածքին, որը «պլուտոնիումի արտադրության հիմնական բաղադրիչն է»։ Իսրայելի բանակը նշում է, որ կործանիչները նաև ռմբակոծել են «հումք արտադրող օբյեկտներ, բալիստիկ հրթիռների հավաքման համար օգտագործվող բաղադրիչներ, ինչպես նաև իրանական ՀՕՊ համակարգեր և հրթիռներ արտադրող օբյեկտներ», ինչպես նաև իրանական օդային պաշտպանության օբյեկտներ, հրթիռների պահեստավորման վայրեր և ռադարներ։ Իրանական Tasnim գործակալությունն էլ հայտնում է, որ Արաքի միջուկային օբյեկտին հարվածների հետևանքով զոհեր չկան,տարածքի բնակիչների համար որևէ վտանգ կամ վնաս չկա։ Շարունակությունը՝ սկզբնաղբյուր կայքում

11:55 - 19 հունիսի, 2025

Իսրայելում հայտարարել են՝ իրանական հրթիռն ընկել է «Սորոկա» հիվանդանոցի վրա |1lurer.am|

1lurer.am: Իրանական հրթիռներից մեկն ընկել է իսրայելական Բեեր-Շևա քաղաքի հարավում գտնվող «Սորոկա» հիվանդանոցի վրա, հաղորդում է բանակային ռադիոն։ ««Սորոկա» հիվանդանոցի վրա ուղիղ հարված և լրացուցիչ ուղիղ հարվածներ՝ Թել Ավիվում ու Հոլոնում: Զոհերի թիվը անհայտ է», - ասվում է ռադիոկայանի հայտարարության մեջ: Ռադիոկայանի տվյալներով՝ հրթիռային հարվածը զգալի վնաս է հասցրել, և մարդկանց խնդրում են չգալ հիվանդանոց:

09:55 - 19 հունիսի, 2025

Մենք փորձում ենք մեր նպաստը բերել տարբեր երկրների տարբեր քաղաքացիների տարհանման հարցում. Միրզոյան |1lurer.am|

1lurer.am: Ցավալիորեն մենք տեսնում ենք, որ Իրան-Իսրայել հակամարտությունը թեժանում է, առնվազն այս պահի դրությամբ շարունակաբար թեժանում է: Այդ մասին ԱԺ-Կառավարություն հարցուպատասխանի ժամանակ պատասխանելով ՔՊ խմբակցության պատգամավոր Հասմիկ Հակոբյանի հարցին՝ ասաց ԱԳ նախարար Արարատ Միրզոյանը: «Մեր մոտեցումը այս հարցին հանրահայտ է, և ընդհանրապես խաղաղության հարցում մենք մշտապես ջատագովն ենք եղել մեր մեծ տարածաշրջանում խաղաղությանը: Բայց տեսնում ենք, որ ոչ բոլոր դեպքերում է դա հաջողվում: Այս պայմաններում մենք ոչ միայն հայրենակիցների՝ Իրանում գտնվող ՀՀ քաղաքացիների կամ Իրանի քաղաքացի հայկական ծագման քաղաքացիների մասին ենք խոսում, առհասարակ տարբեր երկրների տարբեր քաղաքացիների հումանիտար հարցի մասին ենք խոսում, մենք փորձում ենք մեր նպաստը բերել տարբեր երկրների տարբեր քաղաքացիների տարհանման, ապաստան տալու, ընդառաջելու, օգտակար լինելու պրոցեսին: Եթե չեմ սխալվում՝ երեկ թե նախորդ օրը նույնիսկ հրապարակային անդրադարձ եղավ նրան, որ, օրինակ՝ Հնդկաստանի քաղաքացիների ուսանողների խմբի ենք օգնել Հայաստանի սահմանը հատելով տարհանվել, վերադառնալ հայրենիք, աֆրիկյան մի քանի պետություններ՝ Զիմբաբվեն, օրինակ՝ Չինաստանի քաղաքացիների, Ֆրանսիայի, ԱՄՆ քաղաքացիների: Սա շարունակական պրոցես է, և ինչպես կարող ենք գնահատել, առաջիկա օրերին միայն ծավալները կավելանան»,- նշեց Միրզոյանը:

19:47 - 18 հունիսի, 2025

Հայաստանը մշակում է գործողությունների սցենարներ՝ Իրանի շուրջ ճգնաժամի հետևանքների համար. փոխվարչապետ |civilnet.am|

civilnet.am: Հայաստանը մշակում է գործողությունների սցենարներ՝ Իրանի և Իսրայելի միջև սրվող լարվածության հնարավոր սոցիալական և տնտեսական հետևանքներին պատրաստ լինելու նպատակով։ Այս մասին հունիսի 18-ին Ազգային ժողովում կառավարության հետ հարցուպատասխանի ժամանակ հայտարարեց փոխվարչապետ Մհեր Գրիգորյանը։ «Խնդիրները բոլոր պոտենցիալ մոնիտորինգի տակ են ամենօրյա կտրվածքով։ Այո, և՛ փախստականների, և՛ լոգիստիկ, և՛ էներգետիկ խնդիրներ՝ չի կարելի բացառել այսօր։ Պետք է մշակել սցենարներ, որոնք X պահի կարող է պետք լինեն, բայց կարող է նաև պետք չլինեն»,- ասաց Գրիգորյանը՝ արձագանքելով պատգամավոր Զարուհի Բաթոյանի հարցին։ Բաթոյանը բարձրաձայնել էր, որ Իրանում պատերազմի սրման դեպքում Հայաստանը կարող է բախվել փախստականների հոսքի և սոցիալական բարդությունների։ Նա նաև ընդգծել էր նախապես համակարգված մոտեցման կարևորությունը՝ ներառյալ կացարանների, տեղահանվածների տեղափոխման և սոցիալական ապահովման հնարավոր խնդիրները։ Փոխվարչապետ Գրիգորյանը վստահեցրեց, որ թեման թողնված չէ ինքնահոսի. «Վստահեցնում եմ ձեզ, որ կոնսոլիդացված տարբեր գերատեսչությունների կազմով այդ հարցերը քննարկվում են։ Ուղղակի սցենարների մասով չէի ցանկանա հիմա դետալիզացնել, որովհետև կան նուրբ հարցեր, որոնց մասին կարիք չկա այս պահին խոսել»։ Նրա խոսքով՝ արդեն իսկ որոշ լոգիստիկ խնդիրներ ի հայտ են եկել, իսկ էներգետիկ կայունության հարցը նույնպես գտնվում է կառավարության ուշադրության կենտրոնում։ Ներկայում Հայաստանը պաշտոնապես որևէ արտակարգ ռեժիմ կամ սահմանային հսկողության փոփոխություն չի հայտարարել։ Սակայն կառավարության վերջին հայտարարությունները վկայում են, որ հնարավոր ճգնաժամային զարգացումների դեպքում կա գործողությունների նախապատրաստություն։

17:54 - 18 հունիսի, 2025

Էրդողանը օրինական է համարում Իսրայելի հարձակումից պաշտպանվելու Իրանի իրավունքը |hetq.am|

hetq.am: Իրանը Իսրայելի հարձակումից պաշտպանվելու օրինական իրավունք ունի։ Այդ մասին Թուրքիայի խորհրդարանում հայտարարել է այդ երկրի նախագահ Ռեջեփ Թայիփ Էրդողանը՝ ելույթ ունենալով իշխող «Արդարություն և զարգացում» կուսակցության խորհրդարանական խմբակցության նիստի ժամանակ։ «Իրանի համար միանգամայն բնական է, օրինական և իրավաբանորեն հիմնավորված պաշտպանել իրեն Իսրայելի անունով ավազակապետությունից և այդ երկրի կողմից իրագործվող պետական ահաբեկչությունից»,- նշել է նա։ Նա ընդգծել է, որ Թուրքիան անվտանգության ուժեղացված միջոցներ է ձեռնարկել Իսրայելի և Իրանի հակամարտության պատճառով։ «Մեր համապատասխան հաստատությունները գտնվում են բարձր պատրաստվածության վիճակում՝ Իսրայելի հարձակումների հնարավոր հետևանքների դեպքում։ Մենք պատրաստ ենք բոլոր տեսակի սցենարներին»,- թեման եզրափակել է նա։

16:42 - 18 հունիսի, 2025

Ամերիկացիները թող իմանան՝ ցանկացած ռազմական միջամտություն նրանց անդառնալի վնաս կպատճառի. Խամենեի |civilnet.am|

civilnet.am: Իրանի հոգևոր առաջնորդ Ալի Խամենեին հայտարարել է՝ «Իրանի ժողովուրդը հանձնվող չէ»։ Այդ մասին խոսել է հունիսի 18-ին հեռուստատեսային իր ուղերձում՝ պատասխանելով Միացյալ Նահանգների նախագահ Դոնալդ Թրամփին։ «Ամերիկացիները թող իմանան, որ ցանկացած տեսակի ռազմական միջամտություն նրանց անդառնալի վնաս կպատճառի»,- հայտարարել է Իրանի առաջնորդը՝ քննադատելով Իրանի հասցեին սպառնալից հայտարարությունները։ Նախօրեին ԱՄՆ-ի նախագահ Թրամփը X-ի հարթակում մեկը մյուսին հաջորդող երկու գրառմամբ էր հանդես եկել․ մի դեպքում Իրանին կոչ էր արել «անվերապահ անձնատուր լինել», իսկ մյուս գրառմամբ Ալի Խամենեիին «հեշտ թիրախ» էր անվանել՝ սպառնալով անկանխատեսելի հետևանքներով։ Իրանի ու Իսրայելի միջև պատերազմի ընթացքում ամերիկյան կողմը պահանջում է Թեհրանից հրաժարվել միջուկային ծրագրից՝ դադարեցնելով ուրանի հարստացումը։ Իրանական կողմը մերժում է այդ պահանջները, փոխարենը միջուկային զենք չունենալու իր պատրաստակամությունն է վերահաստատում։ Իսրայելի և Իրանի միջև պատերազմը սկսվել է հունիսի 13-ի վաղ առավոտյան՝ իսրայելական օդուժի հարձակմամբ։ Պատերազմը շարունակվում է մեծ ինտենսիվությամբ՝ փոխադարձաբար պատճառելով մեծ ավերածություններ։

16:37 - 18 հունիսի, 2025

Իրանը հայտարարել է՝ Իսրայելին նոր առաջադեմ հրթիռներով է հարվածել, որը ուղերձ է ԱՄՆ-ին |factor.am|

factor.am: Իրանի Իսլամական հեղափոխության պահապանների կորպուսը (ԻՀՊԿ) հայտարարել է, որ Թեհրանը ուղերձ է հղել «Իսրայելի ռեժիմի հովանավոր Միացյալ Նահանգներին»՝ նոր, առաջադեմ հրթիռով իսրայելական թիրախներին հարվածելով, փոխանցում է Mehr գործակալությունը։ ԻՀՊԿ-ն Իսրայելի վրա Իրանի կողմից կատարված «պատժիչ հարվածների 11-րդ ալիքից հետո» հայտարարել է, որ վերջին համազարկում օգտագործված առաջին սերնդի «Ֆաթթահ» հրթիռները բազմիցս թափանցել են Իսրայելի ՀՕՊ համակարգերը և «Իրանի հզորության մասին ուղերձ են հղել Թել Ավիվի ռազմատենչ դաշնակցին, որը մոլորեցնող ցանկություններ ունի»։ «Այս գիշերվա հրթիռային հարվածը ցույց տվեց, որ մենք լիակատար վերահսկողություն ենք ձեռք բերել օկուպացված տարածքների երկնքի նկատմամբ, որոնց բնակիչները լիովին անպաշտպան են դարձել իրանական հրթիռային հարվածներից»,- ասվում է հայտարարության մեջ։ Գիշերը Իրանը կրկին հրթիռային հարվածներ է հասցրել Իսրայելի տարածքին։ Ըստ համացանցում տարածվող կադրերի` նաև հրդեհներ են բռնկվել։ Իսրայելական կողմը տուժածների մասին տեղեկություններ դեռ չի հաղորդել։

11:30 - 18 հունիսի, 2025

Իրանական հարվածների հետևանքով հիվանդանոցներ է տեղափոխվել Իսրայելի տուժած 94 քաղաքացի |1lurer.am|

1lurer.am: Գիշերը Իրանի կողմից իսրայելական տարածքի հրթիռակոծման հետևանքով տուժած 94 մարդ է տեղափոխվել հիվանդանոցներ, հաղորդել է Իսրայելի առողջապահության նախարարությունը։ «Գիշերը հիվանդանոցներ է տեղափոխվել 94 տուժած, մեկի վիճակը միջին ծանրության է, 86-ի վիճակը բավարար է, երեքը հոսպիտալացվել են տագնապային խանգարման վիճակում, ևս 5-ը ներկայում բուժզննություն են անցնում, նրանց վիճակը դեռ հստակ չէ»,- ասված է հայտարարության մեջ։ Նախարարությունը նշել է, որ «գիշերը հրթիռային հարվածների պատճառով վիրավորների տարհանման անհրաժեշտություն չի եղել», բժշկական օգնություն է ցուցաբերվել «վիրավորներին պաշտպանված տարածքներ տեղափոխելու ճանապարհին», ինչպես նաև «հոգեբանական օգնության կարիք ունեցողներին»։

11:03 - 18 հունիսի, 2025

Հայաստանի տնտեսության վրա իրանա-իսրայելական հակամարտության հնարավոր ազդեցության մի քանի տարբերակներ ենք քննարկել. Մարտին Գալստյան |armenpress.am|

armenpress.am: Հայաստանի կենտրոնական բանկի խորհուրդը քննարկել է Հայաստանի տնտեսության վրա իրանա-իսրայելական հակամարտության հնարավոր ազդեցության հարցը: Կենտրոնական բանկի նախագահ Մարտին Գալստյանն այս մասին հայտնեց հերթական ասուլիսում: «Ա և Բ տիպի սցենարներում փորձել ենք որոշակիորեն հաշվի առնել հակամարտությունը: Բնականաբար, ոչ այն խորքային մոտեցումներով, որը կունենանք որոշակի ժամանակ անց, որովհետև ամեն ինչ շատ թարմ է: Օրինակ, եթե տեղի ունենա մի իրավիճակ, որ, ենթադրենք, պատերազմը թևակոխի ավելի ակտիվ, ավելի խորքային փուլ կամ հակամարտությունը երկարաձգվի, այդ պարագայում ընդհանուր տարածաշրջանը կդառնա ավելի ռիսկային: Այդ դեպքում կառաջանա առաջարկի կողմից եկող ապրանքների արժեշղթաների խաթարման խնդիր: Երկրորդ՝ դա կարող է որոշակի ազդեցություն ունենալ արտաքին պահանջարկի վրա տուրիստական հոսքերի տեսանկյունից: Երրորդ՝ կարող է ընդհանուր ազդեցություն ունենալ մեր տարածաշրջանի ռիսկի հավելավճարի տեսանկյունից: Այսինքն՝ այստեղ Ա տիպի մի փունջ ռիսկեր կան: Բ տիպի ռիսկերի համաձայն՝ կարող ենք առնչվել մի իրավիճակի, որ ընդհանուր տնտեսությունը կարող է թուլանալ»,- նշեց ԿԲ նախագահը: Ըստ նրա, կան նաև այլ սցենարներ, որոնք հետագայում նույնպես կքննարկեն:

17:48 - 17 հունիսի, 2025

Հայաստանի իշխանությունները գնահատել են տարածաշրջանային հնարավոր ռիսկերը՝ Իսրայելի և Իրանի միջև լարվածության ֆոնին |armenpress.am|

armenpress.am: Իրանի և Իսրայելի միջև լարվածության ֆոնին Հայաստանի իշխանությունները գնահատել են տարածաշրջանային հնարավոր ռիսկերը։ Այս մասին ասաց Ազգային ժողովի նախագահ Ալեն Սիմոնյանը։ Անդրադառնալով հարցին, թե Հայաստանի իշխանություններն արդյոք գնահատե՞լ են հնարավոր ռիսկերը, որ կարող են առաջանալ Հայաստանի համար՝ պայմանավորված Իրանի և Իսրայելի միջև հակամարտությամբ՝ Ալեն Սիմոնյանը դրական պատասխան է տվել։ «Գնահատել ենք, քննարկել ենք այդ հարցը ռազմական գործողությունները սկսվելուց հետո։ Քննարկել ենք ոչ միայն Ադրբեջանից սպասվող հնարավոր գործողությունները, այլև հնարավոր հետագա զարգացումները հենց Իրանի ներսում, մեր սահմանների վրա։ Պետք է ասեմ, որ Իրանից որևիցե հոսք չկա, մեր սահմանին որևիցե նման բան չի արձանագրվել։ Մենք գտնվում ենք կապի մեջ մեր միջազգային գործընկերների հետ, և այս պահի դրությամբ որևէ ավելացնելու բան չկա»,– ընդգծել է ԱԺ նախագահը։ Սիմոնյանը պատասխանել է նաև հարցին, թե ինչպես կարող է Իրանի և Իսրայելի միջև հակամարտությունն անդրադառնալ Հայաստանի և Ադրբեջանի հարաբերությունների, երկու երկրների միջև խաղաղության պայմանագրի շուրջ քննարկումների գործընթացի վրա. «Այս պահի դրությամբ մտահոգություն չկա, որ դա կարող է ինչ-որ ձևով ազդեցություն ունենալ Ադրբեջանի հետ մեր հարաբերությունների վրա, որովհետև խոսակցությունը շարունակվում է, և կան կոնկրետ գործընթացներ, որոնք հիմա ընթացքի մեջ են, և նման բան չենք տեսնում»,– նշեց Սիմոնյանը։

16:00 - 17 հունիսի, 2025

Իսրայելը հրթիռակոծել է Գազայում օգնության կետի մերձակայքը, ուր մարդիկ հավաքվել էին՝ ուտելիք ստանալու |azatutyun.am|

azatutyun.am: Իսրայելը հրթիռակոծել է Գազայում օգնության բաշխման կետի մերձակայքը, որտեղ հազարավոր պաղեստինցիներ էին հավաքվել՝ հաց ու ալյուր ստանալու հույսով։ Արևմուտքի կողմից ահաբեկչական ճանաչված «Համաս»-ի կողմից ղեկավարվող Առողջապահության նախարարությունը հայտնում է, որ զոհվել է 45 մարդ, կան բազմաթիվ վիրավորներ։ Հարակից հիվանդանոցը, ըստ լրատվամիջոցների, այնքան ծանրաբեռնված է, որ բժիշկները ստիպված են բազմաթիվ վիրավորների տեղավորել գետնին։Երեկ ՄԱԿ-ի մարդու իրավունքների գերագույն հանձնակատար Վոլկեր Թուրքը քննադատել էր Իսրայելին՝ Գազայի հատվածը արդեն շուրջ երեք ամիս շրջափակման մեջ պահելու համար՝ կոչ անելով հետաքննել մարդասիրական օգնության կետերի մոտ գրեթե ամենաօրյա ռեժիմով հնչող կրակոցները։

14:47 - 17 հունիսի, 2025

Իսրայելը հայտարարել է Իրանի ԶՈւ ԳՇ նոր պետի սպանության մասին |hetq.am|

hetq.am: Իրանում իսրայելական ռազմաօդային ուժերի գիշերային հարձակման հետևանքով սպանվել է Իրանի ԶՈւ ԳՇ նորանշանակ պետ Ալի Շադմանին։ Այդ մասին հայտնում է Իսրայելի պաշտպանության բանակի մամուլի ծառայությունը։ «Շադմանին Իրանի առաջնորդ Խամենեիի մերձավորներից մեկն էր»,- ընդգծել է իսրայելական կողմը։ Իրանում դեռևս պաշտոնապես չեն հաստատել նրա մահը։ Շադմանին Իրանի զինված ուժերի գլխավոր շտաբի պետի պաշտոնում նշանակվել էր մի քանի օր առաջ այն բանից հետո, երբ հունիսի 13-ին իսրայելական առաջին հարվածներից հետո սպանվել էր Գլխավոր շտաբի նախկին պետ Մոհամմադ Բաղերին։

13:48 - 17 հունիսի, 2025

Թրամփը դեռ Իրանի հետ համաձայնության հասնելու նպատակ ունի. Պենտագոնի ղեկավար |azatutyun.am|

azatutyun.am: ԱՄՆ պաշտպանության նախարար Փիթ Հեգսեթը երկուշաբթի օրը Fox News-ին ասել է, որ նախագահ Դոնալդ Թրամփը, չնայած ԱՄՆ դաշնակից Իսրայելի և Թեհրանի միջև սրացած լարվածությանը, դեռ նպատակ ունի Իրանի հետ միջուկային համաձայնության հասնել։ Հարցին, թե արդյոք Թրամփը շարունակում է ձգտել միջուկային գործարքի, Հեգսեթը պատասխանել է. «Իհարկե»։ Նա հավելել է, թե ԱՄՆ-ն տարածաշրջանում գտնվում է պաշտպանական դիրքում՝ ուժեղ լինելու և խաղաղության համաձայնագրի հասնելու նպատակով. «Եվ մենք անկեղծորեն հույս ունենք, որ հենց դա էլ տեղի կունենա»։ Միաժամանակ Սպիտակ տան ներկայացուցիչը առանձին մեկնաբանությամբ ևս մեկ անգամ շեշտել է, որ Վաշինգտոնն Իրանի դեմ հարվածներ չի իրականացնում:

11:14 - 17 հունիսի, 2025

«Մեծ յոթնյակը» հայտարարել է, որ Իրանը չպետք է միջուկային զենք ունենա |azatutyun.am|

azatutyun.am: «Մեծ յոթնյակը» (Մեծ Բրիտանիա, Կանադա, Ֆրանսիա, Գերմանիա, Իտալիա, Ճապոնիա և ԱՄՆ) երկուշաբթի տարածած հայտարարությամբ շեշտել է, որ Իրանը չպետք է երբևէ ունենա միջուկային զենք, իսկ Իսրայելն ունի ինքնապաշտպանվելու իրավունք։ G7-ի առաջնորդները, ընդգծելով «քաղաքացիական բնակչության պաշտպանության կարևորությունը», հույս են հայտնել, որ Իրանի շուրջ ճգնաժամի հանգուցալուծումը կարող է նպաստել ավելի լայն զինաթափման և լարվածության նվազեցման Մերձավոր Արևելքում, այդ թվում նաև Գազայում հրադադարի հաստատմանը։ Խումբը կոչ է արել խաղաղության և կայունության պահպանմանը տարածաշրջանում։ «Մեծ յոթնյակի» հանդիպմանը մասնակցող ԱՄՆ նախագահը նախատեսվածից շուտ է լքել հավաքը: Սպիտակ տնից հաղորդել են, որ Թրամփը վերադառնում է՝ «շատ կարևոր հարցերով» զբաղվելու նպատակով: G7-ի հայտարարությունց կարճ ժամանակ անց Թրամփը սոցիալական մեդիայում կոչ է արել Թեհրանի բնակիչներին անմիջապես լքել քաղաքը։ Իրանի և Իսրայելի միջև օդային պատերազմը սկսվել է ուրբաթ օրը՝ այն բանից հետո, երբ Իսրայելը օդային հարվածներ է հասցրել Իրանի տարածքին։ Այդ զարգացումները լուրջ մտահոգություն են առաջացրել տարածաշրջանում, որն արդեն իսկ լարված էր՝ սկսած 2023 թվականի հոկտեմբերին Գազայում Իսրայելի ռազմական գործողությունների մեկնարկից։

09:53 - 17 հունիսի, 2025