Մոլդովա

ԱՊՀ-ի արտգործնախարարները պատրաստվում են Սամարղանդում կայանալիք նիստին |armeniasputnik.am|

armeniasputnik.am: ԱՊՀ արտգործնախարարների խորհրդի հերթական նիստին մասնակցելու համար Սամարղանդի Կոնգրես-կենտրոն են ժամանել Համագործակցության երկրների արտաքին քաղաքական գերատեսչությունների ղեկավարները։ Տեղեկությունը հայտնում է Sputnik Ուզբեկստանը: Տեսանյութում Ռուսաստանի արտգործնախարար Սերգեյ Լավրովն ու ԱՊՀ գլխավոր քարտուղար Սերգեյ Լեբեդևն են: Գագաթնաժողովի օրակարգում 10 հարց կա, որոնք վերաբերում են ԱՊՀ տարածքում փոխգործակցության տարբեր ոլորտներին Արտաքին քաղաքական գերատեսչությունների ղեկավարները կարծիքներ են փոխանակելու միջազգային, տարածաշրջանային հրատապ թեմաների շուրջ։ 2023 թվականին ԱՊՀ նախագահող երկիրը Ղրղզստանն է։

11:14 - 14 ապրիլի, 2023

Մոլդովան ետ է կանչում իր ներկայացուցչին ԱՊՀ գործադիր մարմիններից |azatutyun.am|

azatutyun.am: Մոլդովան որոշել է ԱՊՀ գործադիր մարմիններից ետ կանչել իր ներկայացուցիչ Տեոդոր Յովային: Նա զբաղեցրել է ԱՊՀ Գործադիր կոմիտեի փոխտնօրենի և տնտեսական համագործակցության վարչության ղեկավարի պաշտոնը: Յովային ետ կանչելու որոշումն ուժի մեջ կմտնի այս տարվա ապրիլի 14-ին: Մոլդովայի եվրոպական ինտեգրման և արտաքին գործերի նախարար Նիկու Պոպեսկուն կառավարության նիստում ասել է, թե որոշումն ընդունվել է ԱՊՀ Գործադիր կոմիտեի տեղակալների նշանակման օրենքի քվոտաների տրամադրման դրույթին համաձայն: Փետրվարի սկզբին Մոլդովայի խորհրդարանը ետ է կանչել իր ներկայացուցչին ԱՊՀ Միջխորհրդարանական վեհաժողովի խորհրդի քարտուղարությունից:

18:13 - 22 մարտի, 2023

Մոլդովան դուրս է գալիս ԱՊՀ-ից |tert.am|

tert.am: Մոլդովայի կառավարությունը սկսել է ԱՊՀ-ի շրջանակում ստորագրված համաձայնագրերի չեղարկման գործընթացը, Jurnal TV-ին ասել է արտաքին գործերի և եվրոպական ինտեգրման նախարար Նիկոլաե Պոպեսկուն, գրում է ՏԱՍՍ-ը։«Մոլդովան հայտարարել է ԵՄ-ին անդամակցելու մասին, արտաքին քաղաքական բոլոր նպատակները և մասնակցությունը միջազգային կազմակերպություններում ստորադասվելու են եվրաինտեգրման նպատակին։ Ակնհայտորեն, ԱՊՀ-ի համաձայնագրերից դուրս գալը, որոնք անհամատեղելի են մեր նպատակներին, կշարունակվեն»,- ասել է Պոպեսկուն։Նա նշել է, որ 330 պայմանագրից շատերը, որոնք հանրապետությունը ստորագրել է անկախության տարիների ընթացքում, «չեն գործում կամ չեն կիրառվում ի շահ Մոլդովայի»։ Մոլդովայի արտաքին գործերի նախարար Նիկու Պոպեսկուն ավելի վաղ հայտարարել էր, որ Մոլդովան Անկախ պետությունների համագործակցությունում (ԱՊՀ) չի տեսնում գործընթացներ, որոնք կարող են իրեն հետաքրքրել։Նշենք, որ փետրվարի սկզբին ՌԴ ԱԳ նախարար Սերգեյ Լավրովը հայտարարել էր, որ Արևմուտքը «հաջորդ Ուկրաինայի» դերի համար այժմ «դիտարկում է» Մոլդովային:

13:34 - 23 փետրվարի, 2023

Մոլդովայի նախագահը հայտարարել է երկրի պաշտպանունակությունն ամրապնդելու անհրաժեշտության մասին |armenpress.am|

armenpress.am: Մոլդովայի նախագահ Մայա Սանդուն ռումինական TVR հանրային հեռուստաալիքին տված հարցազրույցում հայտարարել է, որ Մոլդովայում չեզոքությունից հրաժարվելու հարց չկա, բայց պաշտպանունակության ամրապնդման մասին հարկավոր Է հոգ տանել: Այդ մասին տեղեկանում ենք «Интерфакс» գործակալությունից: «Հիմա չեզոքությունից հրաժարվելու մասին խոսք չկա, քանի որ չեզոքությունն ամրագրված է Մոլդովայի Սահմանադրությամբ: Մեզ անհրաժեշտ է ուժեղացնել պաշտպանունակությունը, բայց հարկավոր Է հաշվի առնել քաղաքացիների կարծիքը: Եթե վերլուծենք վերջին հարցումները, ապա կարելի Է տեսնել, որ երկրի քաղաքացիների մեծամասնությունն առաջվա պես կարծում է, թե չեզոքությունը պետք է պահպանվի: Եվ մենք հարգում ենք քաղաքացիների այս ընտրությունը», - ասել է Սանդուն։ «Մենք նաև պետք է շարունակենք լրջորեն քննարկել այն հարցը, թե ինչ պետք է անել մեզ պաշտպանելու համար: Արդյո՞ք մենք կարող ենք ինքնուրույն ապահովել խաղաղությունն ու հանգստությունը: Ստեղծված իրավիճակում դա շատ կարևոր է»,- ընդգծել է Մոլդովայի նախագահը: Մեկնաբանելով Ռումինիայի նախագահի պաշտոնում առաջադրվելու մասին խոսակցությունները՝ նա ընդգծել է, որ որևիցե պաշտոնի չի հավակնում Ռումինիայում։ «Ցանկանում եմ հստակեցնել իրավիճակը. ես Ռումինիայում որևէ պաշտոնի չեմ հավակնում: Գիտեմ, որ Պրուտի մյուս ափին կան Ռումինիայի քաղաքացիներ, որոնք հետևում են Մոլդովայում տիրող իրադրությանը, նրանցից շատերը բարձր են գնահատում այն, ինչ մենք անում ենք Քիշնևում: Մենք շատ երախտապարտ ենք նրանց: Մենք այստեղ շատ կարևոր խնդիրներ ունենք. մենք պետք է (...) Մոլդովան բերենք Եվրամիություն: Դրանք կարևոր և դժվարին խնդիրներ են, և մենք ակնկալում ենք Ռումինիայի օգնությունը», - եզրափակել է Սանդուն: Դավոսի տնտեսական համաժողովի ժամանակ Մայա Սանդուն հարցազրույց էր տվել Politico հրատարակությանը, որտեղ չէր բացառել չեզոքությունից հրաժարվելու հնարավորությունը։ «Այս պահին լուրջ քննարկում է ընթանում մեզ պաշտպանելու մեր կարողության մասին: Կարո՞ղ ենք արդյոք մենք դա ինքներս անել, թե պետք է ավելի խոշոր դաշինքի մաս կազմենք: Եվ եթե ինչ-որ պահի մենք, որպես ազգ, գանք այն եզրակացության, որ մեզ հարկավոր Է փոխել չեզոքությունը, ապա դա պետք է տեղի ունենա ժողովրդավարական ճանապարհով», - ասել էր նախագահը` պատասխանելով ՆԱՏՕ-ին հնարավոր անդամակցության մասին հարցին։

11:31 - 16 փետրվարի, 2023

Մոլդովայի նախագահ Մայա Սանդուն հայտարարել է այդ երկրում հեղաշրջման փորձի նախապատրաստման մասին |hetq.am|

hetq.am: Մոլդովայի նախագահ Մայա Սանդուն հայտարարել է, որ երկրում նախապատրաստում են սահմանադրական կարգի տապալման փորձ։ «Նախապատրաստվում է Մոլդովայի վրա հարձակում»,- երկուշաբթի կայացած ճեպազրույցի ժամանակ հայտարարել է Սանդուն։ Նրա խոսքով՝ այդ պլանները ներառում է ռազմական պատրաստվածությամբ դիվերսանտների ներգրավում։ Սանդուն հավելել է, որ պլանով նախատեսված է, որ դիվերսանտները պետք է հարձակվեն պետական հաստատությունների վրա ու պատանդներ վերցնեն։ Մոլդովայի նախագահը Քիշնևում իշխանափոխության իրականացման ցանկության մեջ մեղադրել է «այսպես կոչված ընդդիմությանը»։ Նա խորհրդարանին կոչ է արել որքան հնարավոր է արագ ընդունել նախագծեր, որոնք Դատախազությանն ու Անվտանգության ծառայությանը հնարավորություն կտան պայքարել սպառնալիքների դեմ։ Սանդուն հավելել է, որ դիվերսիաների նպատակը կայանում է նրանում, որ «տապալեն սահմանադրական կարգը, որպեսզի երկիրը փոխանցեն Ռուսաստանի տրամադրության տակ»։ Հիշեցնենք, որ ավելի վաղ հրաժարական էին տվել վարչապետ Նատալյա Գավրիլիցան ու նրա գլխավորած կառավարությունը։ Սանդուն վարչապետի պաշտոնում առաջադրել է անվտանգության խորհրդի քարտուղար Դորին Ռեչանի թեկնածությունը, իսկ Նատալյա Գավրիլիցայի կառավարությունում ռուսական Գազպրոմի հետ բանակցությունների համար պատասխանատու Անդրեյ Սպինուն նշանակվել է նախագահի աշխատակազմի ղեկավար։

15:28 - 13 փետրվարի, 2023

Մոլդովայի կառավարությունը հրաժարական է ներկայացրել |hetq.am|

hetq.am: Մոլդովայի վարչապետ Նատալյա Գավրիլիցան հայտարարել է իր հրաժարականի մասին։ Այդ մասին, Новая газета-ի փոխանցմամբ, նա նշել է ճեպազրույցի ժամանակ։ Մոլդովական Publika TV հեռուստաընկերությունը հայտնում է, որ ավտոմատաբար դա նշանակում է ողջ կառավարության հրաժարական։ «Մեկ ու կես տարի կառավարությունում աշխատելուց հետո եկել է ժամանակը հայտարարելու իմ հրաժարականի մասին։ Մենք եկել ենք իշխանության ճգնաժամային կառավարությունում և անցկացրել զարգացման, կոռուպցիայի դեմ պայքարի և Եվրամիությանն ինտեգրման քաղաքականություն։ Մենք անմիջապես բախվեցինք էներգետիկ շանտաժի հետ, և նրանք մտածում էին, որ մենք կհանձնվենք, որ կգործենք այնպես, ինչպես նախորդ կառավարությունները, որոնք դավաճանում էին ազգային շահերը, բայց դա այդպես չեղավ։ Մենք կառավարում էինք անդադար ճգնաժամի ռեժիմում»,- ասել է Գավրիլիցան։ Նատալյա Գավրիլիցան վարչապետի պաշտոնն զբաղեցնում էր 2021 թվականի օգոստոսից։ 2019 թվականին Մայա Սանդուի կառավարությունում նա զբաղեցնում էր ֆինանսների նախարարի պաշտոնը։ Սանդուն ներկայումս Մոլդովայի նախագահն է։ Խոսելով էներգետիկ շանտաժի մասին՝ Գավրիլիցան ի նկատի ուներ «Գազպրոմ»-ի սպառնալիքները, որը պնդում էր, որ կդադարեցնի գազի մատակարարումները՝ չվճարման պատճառով։ Այդ իրավիճակով պայմանավորված 2021 և 2022 թվականներին մոլդովական կառավարությունը մի քանի անգամ արտակարգ դրություն էր հայտարարել։ Շարունակությունը՝ hetq.am-ում

16:15 - 11 փետրվարի, 2023

Մոլդովան մտածում է ԱՊՀ-ում մնալու նպատակահարմարության շուրջ |hetq.am|

hetq.am: Մոլդովան Անկախ պետությունների համագործակցությունում (ԱՊՀ) չի տեսնում գործընթացներ, որոնք կարող են իրեն հետաքրքրել։ Այդ մասին Deutsche Welle-ի փոխանցմամբ TV8 հեռուստաընկերությանը տված հարցազրույցում հայտարարել է Մոլդովայի արտաքին գործերի նախարար Նիկու Պոպեսկուն։ Դիվանագետի խոսքով՝ Ուկրաինա Ռուսաստանի ներխուժումից ի վեր Մոլդովայի ներկայացուցիչները չեն մասնակցում ԱՊՀ մակարդակով հանդիպումներին, իսկ ներկայում Քիշնևում մտածում են այդ կազմակերպությունում մնալու նպատակահարմարության մասին։ «Կազմակերպությունը դառնում է քիչ համապատասխան Մոլդովային»,- նշել է Պոպեսկուն։ Մոլդովայի ԱԳ նախարարը նշել է, որ Քիշնևի համար ազատ առևտրի գոտին չի աշխատում, 2006 թվականից կան խնդիրներ ապրանքների հասանելիության հետ, կան նաև արտահանման առևտրային սահմանափակումներ։ Շարունակությունը՝ hetq.am-ում

11:43 - 13 հունվարի, 2023

Լաչինի միջանցքի շարունակվող արգելափակումը հումանիտար ճգնաժամ է առաջացնում Արցախում. ՀՀ ԱԳ նախարարի տեղակալ

Դեկտեմբերի 21-ին ՍԾՏՀԿ նախագահող երկիր Մոլդովայի փոխվարչապետ, ԱԳ նախարար Նիկու Պոպեսկուի նախագահությամբ կայացել է Սևծովյան տնտեսական համագործակցության (ՍԾՏՀ) կազմակերպության անդամ պետությունների ԱԳ նախարարների խորհրդի (ԱԳՆԽ) առցանց հանդիպումը, որին մասնակցել է ՀՀ ԱԳ նախարարի տեղակալ Վահե Գևորգյանը։ Գնահատելով տարածաշրջանի համար դժվարին շրջանում տնտեսական համագործակցության խթանմանն ուղղված մոլդովական նախագահության ջանքերը՝ նախարարի տեղակալ Վահե Գևորգյանն այս տարի նշվող ՍԾՏՀ 30-ամյակի համատեքստում կարևորել է կառույցի արդյունավետության բարձրացման և «ՍԾՏՀ տնտեսական օրակարգ» առանցքային փաստաթղթի վերանայման անհրաժեշտությունը, որի առնչությամբ ՀՀ-ն ներկայացրել է իր առաջարկները։ Նա նաև անդրադարձել է կազմակերպության շրջանակներում ՀՀ վերջին շրջանի գործունեությանը և նախաձեռնած միջոցառումներին։ Իր ելույթում Վահե Գևորգյանը տեղեկացրել է այս տարվա ընացքում ՀՀ-ում արձանագրված երկնիշ տնտեսական աճի, արտաքին առևտրի ծավալների էական ավելացման մասին, ինչը վերաբերում է նաև ՍԾՏՀ տարածաշրջանի երկրների հետ երկկողմ առևտրին։ Անդրադառնալով Ադրբեջանի կողմից Արցախի ժողովրդի և Հայաստանի դեմ ագրեսիաներին և Հայաստանի Հանրապետության ինքնիշխան տարածքների շարունակական օկուպացիային՝ ԱԳ նախարարի տեղակալը նշել է, որ դրանք լուրջ վտանգի տակ են դնում տարածաշրջանում խաղաղության և կայունության հեռանկարը։ Այս համատեքստում նա մատնանշել է Ադրբեջանի կողմից Լաչինի միջանցքի շարունակվող արգելափակումը, որը մի կողմից բացահայտորեն ոտնահարում է նոյեմբերի 9-ի եռակողմ հայտարարության առանցքային դրույթները, մյուս կողմից հումանիտար ճգնաժամ է առաջացնում Արցախում։ Հանդիպման արդյունքում ԱԳՆԽ-ն ընդունել է բանաձևեր և որոշումներ, ինչպես նաև հաստատել ՍԾՏՀԿ զբոսաշրջության աշխատանքային խմբի 2025-2026 թթ. ժամանակահատվածի համակարգման Հայաստանի թեկնածությունը։ Ավարտին ՍԾՏՀԿ-ում նախագահությունը փոխանցվել է Սերբիային։

12:17 - 22 դեկտեմբերի, 2022

Դեկտեմբերի 26-27-ը Սանկտ Պետերբուրգում կկայանա ԱՊՀ ոչ-պաշտոնական գագաթնաժողովը |azatutyun.am|

azatutyun.am: ԱՊՀ ոչ-պաշտոնական գագաթնաժողովը տեղի կունենա դեկտեմբերի 26-27-ը Սանկտ Պետերբուրգում: Այս մասին լրագրողներին հայտնել է ԱՊՀ-ի գործադիր կոմիտեի նախագահ Սերգեյ Լեբեդևը։ «Ռուսաստանի նախագահի հրավերով դեկտեմբերի 26-27-ը տեղի կունենա այդ հանդիպումը, հուսով ենք, որ դա լրացուցիչ խթան կհաղորդի համագործակցությանը», - երեքշաբթի օրը Մինսկում լրագրողների հետ զրույցում հայտարարել է Լեբեդևը։ Անկախ պետությունների համագործակցություն կազմակերպությանը անդամակցում են Հայաստանը, Ադրբեջանը, Ռուսաստանը, Բելառուսը, Ղազախստանը, Ղրղըզստանը և Մոլդովան: Հիշեցնենք, որ ՌԴ նախագահի մամուլի խոսնակ Դմիտրի Պեսկովը հայտնել էր, որ ՌԴ, Հայաստանի ու Ադրբեջանի ղեկավարներ Վլադիմիր Պուտինը, Նիկոլ Փաշինյանը ու Իլհամ Ալիևը կարող են ոչ ֆորմալ ձևով խոսել ԱՊՀ երկրների ղեկավարների ոչ պաշտոնական գագաթնաժողովի շրջանակներում։

13:42 - 20 դեկտեմբերի, 2022

Արցախի ԱԳ նախարար Դավիթ Բաբայանը զրուցել է ՄՄՀ արտգործնախարար Վիտալի Իգնատևի հետ

Նոյեմբերի 14-ին տեղի է ունեցել Արցախի Հանրապետության արտաքին գործերի նախարար Դավիթ Բաբայանի և Մերձդնեստրի Մոլդովական Հանրապետության (ՄՄՀ) արտաքին գերատեսչության ղեկավար Վիտալի Իգնատևի զրույցը տեսակապով։ Այս մասին հայտնում են Արցախի ԱԳՆ-ից։ Կողմերը մտքեր են փոխանակել տարածաշրջանային գործընթացներին, հակամարտությունների կարգավորման միտումներին վերաբերող թեմաների շուրջ։ Կարևորվել են երկու երկրների արտաքին գերատեսչությունների միջև կապերի պահպանումն ու ընդլայնումը։ Նախարար Բաբայանը մտահոգություն է հայտնել վերջին շրջանում Մերձդնեստրում ստեղծված էներգետիկ ճգնաժամի կապակցությամբ և նշել, որ Արցախում ապրումակցում են Մերձդնեստրի ժողովրդին: Նախարարը նաև հույս է հայտնել, որ ՄՄՀ ղեկավարությանը կհաջողվի հնարավորինս սեղմ ժամկետում կայունացնել իրավիճակը։

15:14 - 14 նոյեմբերի, 2022

Ռուսական հատուկ ծառայություններն այժմ նպատակաուղղված խարխլում են Մոլդովան. Մայա Սանդու |tert.am|

tert.am: Մոլդովայի նախագահ Մայա Սանդուն ասել է, որ քաղաքական կուսակցությունները, որոնք այժմ սկսել են բողոքի ակցիաները, աշխատում են ռուսական հատուկ ծառայությունների հետ՝ խարխլելու իրավիճակը Մոլդովայում։ Այս մասին նա հայտարարել է ռումինական Digi24-ին տված հարցազրույցում: Նախագահը նշել է, որ Մոլդովայի քաղաքական կյանքին ռուսական միջամտության փորձերը նորություն չեն, և ռուսամետ քաղաքական ուժերի վերջին բողոքի ցույցերի հետևում կանգնած են նաև ռուսական հատուկ ծառայությունները։ «Մենք ապացույցներ ունենք, որ կոռուպցիոն խմբավորումների կոալիցիան, որը մեծ գումարներ է գողացել Մոլդովայում, և ռուսական հատուկ ծառայությունները, Մոլդովայի ռուսամետ կուսակցությունները, բոլորն ունեն ընդհանուր նպատակ՝ ապակայունացնել Մոլդովան: Նրանք իրենց օգտին են օգտագործում քաղաքացիների առջև ծառացած դժվարությունները։ Մենք վճռական ենք պաշտպանելու ժողովրդավարությունը»,- ասել է Մայա Սանդուն։

10:10 - 02 նոյեմբերի, 2022

Մոլդովայում ՌԴ դեսպանը շտապ կանչվել է ԱԳՆ․ Քիշնևը պնդում է՝ ռուսական հրթիռները խախտել են երկրի օդային տարածքը |factor.am|

factor.am: Մոլդովայի Արտաքին գործերի և եվրոպական ինտեգրման նախարարությունը ՌԴ-ին մեղադրել է հանրապետության օդային տարածքը խախտելու մեջ։ Այս մասին հայտնում է գերատեսչության տելեգրամյան ալիքը, գրում է Lenta-ն։ Մասնավորապես, ԱԳՆ-ն հայտնում է, որ ռուսական երեք թևավոր հրթիռներ, որոնք Սև ծովում ռազմանավերից են արձակվել, խախտել են Մոլդովայի օդային տարածքը՝ անցնելով Կոլբասնա գյուղի շրջանով ու Սորոկի քաղաքով։ ԱԳ նախարար Նիկու Պոմպեսկոն նաև Քիշնևում ՌԴ դեսպան Օլեգ Վասնեցովին կանչել է արտաքին քաղաքական գերատեսչություն՝ տեղի ունեցածի համար պարզաբանումների նպատակով։

16:42 - 10 հոկտեմբերի, 2022

Մոլդովայում ցուցարարները վրաններ են տեղադրել խորհրդարանի դիմաց՝ պահանջելով կառավարության հրաժարականը |tert.am|

tert.am: Մոլդովայում ցուցարարները սկսել են վրաններ տեղադրել Մոլդովայի խորհրդարանի դիմաց՝ պահանջելով լուծարել կառավարությունը և օրենսդիր մարմնի ներկայիս կազմը, դեպքի վայրից հայտնում է ՏԱՍՍ-ի թղթակիցը։ «Մենք մնալու ենք այստեղ՝ «փոփոխությունների քաղաքում», մինչև մեր պահանջները կատարվեն, այս կառավարությունը պետք է հրաժարական տա, խորհրդարանն այլևս չի ներկայացնում իր ընտրողներին, դա տեղի կունենա, երբ մենք 100 հազար հոգի լինենք, հետո իրենք կփախնեն»,- տեսաուղերձում ասել է «Շոր» կուսակցության առաջնորդ Իլան Շորը, որն այժմ գտնվում է Իսրայելում։ Նա կոչ է արել ցուցարարներին պահանջել նախագահ Մայա Սանդուի, վարչապետ Նատալյա Գավրիլիցայի և իշխող «Գործողություն և համերաշխություն» կուսակցության հրաժարականը՝ խոստանալով մոտ ապագայում ապացույցներ ներկայացնել կոռուպցիայի մեջ նրանց մասնակցության մասին։ Շարունակությունը՝ tert.am-ում

09:37 - 19 սեպտեմբերի, 2022

Ցույց Թբիլիսիում՝ կառավարության հրաժարականի պահանջով |azatutyun.am|

azatutyun.am: Քաղաքացիական հասարակության, ընդդիմադիր կուսակցությունների ներկայացուցիչներ, ինչպես նաև շարքային քաղաքացիներ երեկ Թբիլիսիում խորհրդարանի շենքի մոտ էին՝ կառավարության հրաժարականի պահանջով։ Տասնյակ հազարավոր ցուցարարներ պահանջում էին ձևավորել ազգային համաձայնության նախարարների կաբինետ, որը կկարողանա երկրում բարեփոխումներ իրականացնել և հասնել ԵՄ անդամակցության թեկնածուի կարգավիճակի։ Հանրահավաքի մասնակիցները փակել էին Ռուսթավելի պողոտան, որտեղ գտնվում է հանրապետության խորհրդարանի շենքը։ Եվրամիության ղեկավարները հունիսի 23-ին ԵՄ գագաթնաժողովում Ուկրաինային և Մոլդովային թեկնածուների կարգավիճակ տրամադրեցին։ Նրանք ընդունեցին Վրաստանի եվրոպական հեռանկարը, ինչպես նաև մի շարք պայմանների կատարման դեպքում նրան թեկնածուի կարգավիճակ տալու պատրաստակամությունը։ Վրաստանը 2009 թվականից անդամակցում է «Արևելյան գործընկերության» ծրագրին, որն ուղղված է ԵՄ-ի և նախկին խորհրդային հանրապետությունների միջև համագործակցության զարգացմանը։ 2014 թվականին երկիրը ԵՄ-ի հետ ասոցացման համաձայնագիր է ստորագրել, որի անբաժանելի մասն է խորը և համապարփակ առևտրի մասին դրույթը։ 2017 թվականին Վրաստանի քաղաքացիները իրավունք են ստացել զբոսաշրջային ուղևորություններ կատարել Շենգենյան գոտու երկրներ՝ առանց վիզայի։

09:49 - 04 հուլիսի, 2022

Ուկրաինային և Մոլդովային ԵՄ անդամի թեկնածուի կարգավիճակ տրամադրելը Եվրոպայի ներքին գործն է․ Պեսկով

Եվրամիության անդամի թեկնածուի կարգավիճակի տրամադրումն Ուկրաինային և Մոլդովային, եվրոպական ներքին գործ է, գլխավորը, որ այդ գործընթացները մեծ խնդիրներ չառաջացնեն Ռուսաստանի հետ նշված երկրների հարաբերություններում, «Ինտերֆաքսի» փոխանցմամբ՝ հայտարարել է ՌԴ նախագահի մամուլի քարտուղար Դմիտրի Պեսկովը։ «Նախ, դրանք, իհարկե, եվրոպական ներքին գործեր են։ Մեզ համար շատ կարևոր է, որ այդ գործընթացներն ավելի շատ խնդիրներ չբերեն մեզ և մեզ հետ նշված երկրների հարաբերություններում։ Այդ խնդիրներն, առանց այն էլ, քիչ չեն», - ասել է Պեսկովը։ Գլխավորն այն է, որ այդ ամենը չհանգեցնի Ռուսաստանի և ԵՄ հարաբերությունների հետագա վատթարացման, հավելել է Պեսկովը։ Նորա Վանյան

16:47 - 24 հունիսի, 2022

Եվրախորհրդարանը կոչ է արել՝ ԵՄ-ում թեկնածուի կարգավիճակ տրամադրել Ուկրաինային |armenpress.am|

armenpress.am: Եվրախորհրդարանը պաշտպանել է բանաձեւը, որը կոչ է անում ԵՄ-ում թեկնածուների կարգավիճակ տրամադրել Ուկրաինային եւ Մոլդովային: Այդ մասին հաղորդել է ՌԻԱ Նովոստին: Փաստաթղթի օգտին քվեարկել է 529 խորհրդարանական, դեմ է արտահայտվել 45-ը, 14-ը ձեռնպահ է մնացել: «Եվրախորհրդարանը եւս մեկ անգամ հորդորել է Եվրամիության գագաթնաժողովին՝ ԵՄ-ում թեկնածուների կարգավիճակ տրամադրել Ուկրաինային եւ Մոլդովային… Ինչպես նաեւ շարունակել աշխատանքը Վրաստանին նման կարգավիճակ տրամադրելու ուղղությամբ»,-ասվում է բանաձեւում: Եվրահանձնաժողովը (ԵՀ) հունիսի 17-ին հանձնարարել է՝ Եվրամիությունում թեկնածուների կարգավիճակ տրամադրել Ուկրաինային եւ Մոլդովային: Դրա հետ մեկտեղ ԵՀ-ն կոչ է արել՝ առայժմ նման կարգավիճակ չտալ Վրաստանին: Այդ հարցի վերաբերյալ վերջնական լուծումը Եվրամիության ղեկավարները կընդունեն հունիսի 23-24-ին՝ Մադրիդի գագաթնաժողովում: Ավելի վաղ ՌԴ ԱԳՆ-ի պաշտոնական ներկայացուցիչ Մարիա Զախարովան ռադիո Sputnik-ի եթերում նենգություն է որակել Ուկրաինային եւ Մոլդովային Եվրամիության անդամի կարգավիճակներ տրամադրելու ԵՀ-ի հանձնարարականը:

15:35 - 23 հունիսի, 2022