Բարձր տեխնոլոգիական արդյունաբերության նախարարություն

Ռոբերտ Խաչատրյանի և ՀՀ-ում Բելգիայի դեսպանի հանդիպմանը մանրամասներ են ներկայացվել մեր երկրի բարձր տեխնոլոգիաների ոլորտի ենթակառուցվածքների մասին

ՀՀ բարձր տեխնոլոգիական արդյունաբերության նախարար Ռոբերտ Խաչատրյանը ընդունել է Հայաստանի Հանրապետությունում Բելգիայի Թագավորության արտակարգ և լիազոր դեսպան Էրիկ Դե Մույնքին։ Ինչպես հայտնում են ՀՀ ԲՏԱՆ-ից, նախարարը ողջունել և շնորհավորել է դեսպանին Հայաստանում դիվանագիտական առաքելությունը սկսելու կապակցությամբ, այնուհետև ներկայացրել նախարարության գործունեության շրջանակները և այդ ուղղությամբ իրականացվող աշխատանքները։ Դեսպանը շնորհակալություն է հայտնել ընդունելության համար և նշել, որ իր համար պարտավորեցնող է լինել ՀՀ-ում առաջին դեսպանը: Հայաստանում Բելգիայի դեսպանատան բացումը կարող է լուրջ նախադրյալներ ստեղծել երկու երկրների տեխնոլոգիական համայնքների միջև ամուր կապեր ստեղծելու և համագործակցության հեռանկարներ նախանշելու համար: Հանդիպման ընթացքում մանրամասներ են ներկայացվել մեր երկրի բարձր տեխնոլոգիաների ոլորտի ենթակառուցվածքների, ընկերությունների գործունեության, զարգացման հեռանկարների վերաբերյալ։ Անդրադարձ է կատարվել «Ինժեներական քաղաք» ծրագրին, «Թումո» ստեղծարար տեխնոլոգիաների կենտրոնի գործունեությանը, «Սևան ստարտափ սամիթ»-ին, Հայաստանում անցկացվող տեխնոլոգիական ցուցահանդեսներին, տեխնոլոգիական կրթության ուղղությամբ իրականացվող աշխատանքներին։ Քննարկվել են երկկողմ հետաքրքրություն ներկայացնող մի շարք այլ հարցեր։ Հանդիպման ավարտին դեսպան Էրիկ Դե Մույնքին հավաստիացրել է, որ իր լիազորությունների շրջանակներում կձեռնարկի անհրաժեշտ քայլեր նախարարության գործունեության ոլորտներում Հայաստանի և Բելգիայի միջև կապեր ստեղծելու և ամրապնդելու համար։

16:19 - 26 հոկտեմբերի, 2023

ՀՌՀ-ից ստացել ենք հաղորդում որոշակի խախտումների վերաբերյալ. Ռոբերտ Խաչատրյանը՝ ՀՀ-ում հեռարձակվող ռուսական ալիքների մասին |azatutyun.am|

azatutyun.am: Բարձր տեխնոլոգիական արդյունաբերության նախարար Ռոբերտ Խաչատրյանն այսօր Ազգային ժողովի հարցուպատասխանի ժամանակ անդրադարձել է Հայաստանում հեռարձակվող ռուսական ալիքների մասին հարցին: Խաչատրյանին մասնավորապես հարցրել էին՝ ի՞նչ քայլեր են ձեռնարկվել խախտումները արձանագրելու և բացառելու համար: «Այդ հարցը մեր ուշադրության կենտրոնում է, մենք տեղյակ ենք համաձայնագրից, տեղեկացնեմ, որ համաձայնագիրը ուժի մեջ է մտել ռուսական կողմից 2023 թվականի մարտին, օրը չեմ հիշում, այսինքն, այդ կոնսուլտացիաների համար դեռ ժամանակ չի եղել, քանի որ նախկինում դեռ վավերացված չի եղել ռուսական կողմից: Անհրաժեշտության դեպքում, իհարկե, կոնսուլտացիաները կիրականացվեն, բայց աշխատանքային կարգով որոշակի շտկումներ կան և խախտումների արձանագրությունների հետ կապված պատասխանատուն է, ըստ պայմանագրի, Հեռուստատեսության և ռադիոյի հանձնաժողովը: Եվ վերջերս մենք հարցում ենք ուղարկել ու ստացել ենք որոշակի խախտումներ, որոնք արձանագրվել են վերջին շրջանում նաև ամսի 23-ին տեղի ունեցած հեռուստաեթերում հնչած որոշ հաղորդումներից ևս արձանագրություններ կան խախտումների վերաբերյալ», - պատասխանեց Խաչատրյանը:

20:47 - 25 հոկտեմբերի, 2023

«Յուքոմ»-ի բաժնետոմսերը գրավադրվել են |civilnet.am|

civilnet.am: Հեռահաղորդակցության օպերատոր «Յուքոմ»-ի բաժնետոմսերի մոտ 78 տոկոսը կգրավադրվի «Արդշինբանկ»-ում։ «Յուքոմ»-ը դիմել էր Հանրային ծառայությունները կարգավորող հանձնաժողով (ՀԾԿՀ)՝ բաժնետոմսերի գրավադրմանը համաձայնություն տալու համար, հանձնաժողովն էլ համաձայնություն է տվել գործարքին։ Այս տարվա օգոստոսի 31-ին, սակայն, ՀԾԿՀ-ն նույն գործարքի կատարումը մերժել էր, քանի որ դրան դեմ էր արտահայտվել Ազգային անվտանգության ծառայությունը։ Շուրջ 2 ամիս անց, այնուամենայնիվ, ՀԾԿՀ-ն գործարքին համաձայնություն է տվել։ Դրանով կգրավադրվեն «Յուքոմ»-ի բաժնետոմսերի մոտ 78 տոկոսը։ Դրանից ավելի քան 29 տոկոսը պատկանում է «Այյու թելեքոմյունիքեյթ» ընկերությանը, որի սեփականատերը Պետեկամուտների կոմիտեի նախկին նախագահ Գագիկ Խաչատրյանի ընտանիքն է։ Գրավադրվել են նաև Գագիկ Խաչատրյանի որդիներին՝ Գուրգեն Խաչատրյանին պատկանող 11,9 տոկոս, Արտյոմ Խաչատրյանին պատկանող 11,9 տոկոս, Գագիկ Խաչատրյանի հորեղբոր որդուն՝ Արամ Խաչատրյանին պատկանող 24 տոկոսի բաժնետոմսերը։ Սա որպես ապահովության միջոց է՝ «Արդշինբանկ»-ից վարկ ներգրավելու համար։ Բարձր տեխնոլոգիական արդյունաբերության նախարարությունն ու ԱԱԾ-ն գործարքի հարցում առարկություններ չեն ներկայացրել։ «Սիվիլնեթ»-ի հարցին, թե ինչու՞ է օգոստոսին մերժված գործարքը հավանության արժանանում հոկտեմբերին, ՀԾԿՀ նախագահ Գարեգին Բաղրամյանն ասաց՝ նախորդ անգամ բացասական եզրակացությունը եղել էր ԱԱԾ կողմից, իսկ հիմա «որոշման պայմանները փոխվել են, փոխվել է նաև ներգրաված գումարի չափը»։ Չնշելով ներգրավվելիք վարկի չափը՝ Բաղրամյանը տեղեկացրեց, որ վարկային միջոցներն ուղղվելու են ընկերության վերաֆինանսավորմանը. «Ամենագլխավոր նպատակը եղել է թեթևացնել ընկերության հիմնական ֆինանսական բեռը՝ վերցրած վարկերի մարում և այլն։ Կային նաև այլ նպատակներ»,- փոխանցեց Բաղրամյանը։ «Յուքոմ»-ը Հայաստանում ֆիքսված ինտերնետի մատուցման առաջատարն է, ունի սեփական օպտիկամանրաթելային ցանց։ Ընկերությունն ունի շուրջ 1 400 աշխատակիցներ։ «Յուքոմ»-ի ֆիքսված և շարժական կապի ծառայություններից օգտվում է ավելի քան 700 000 բաժանորդ։ Այս տարվա մարտին «Յուքոմ»-ի գլխավոր տնօրեն դարձավ «ՄՏՍ-Հայաստան»-ի երկարամյա նախկին տնօրեն Ռալֆ Յիրիկյանը։

16:28 - 24 հոկտեմբերի, 2023

Բոլոր տարբերակները քննարկվում են, բայց որոշում չունենք. ԲՏԱ նախարարը՝ ռուսական հեռուստաալիքների հեռարձակումը կասեցնելու հնարավորության մասին |1lurer.am|

1lurer.am: Բոլոր տարբերակները քննարկվում են, բայց որոշում չունենք: Կառավարության նիստից հետո լրագրողների հետ ճեպազրույցում ասաց ԲՏԱ նախարար Ռոբերտ Խաչատրյանը՝ անդրադառնալով լրագրողների այն հարցին, թե ռուսական հեռուստաալիքներում գրանցված թշնամանքի խոսքի հետևանքով հնարավո՞ր է, որ հանրային մուլտիպլեքսում դրանց հեռարձակումը կասեցվի: «Համաձայնագիր կա, համաձայնագիրը համապատասխան քայլեր նախատեսում է, եթե խախտումներ են լինում, մենք այդ համապատասխան քայլերից կօգտվենք: Բոլոր հարցերի վերաբերյալ եթե նորություն ունենանք, մենք կտեղեկացնենք»,- նշեց նա:

13:31 - 19 հոկտեմբերի, 2023

ԱՄԷ պատվիրակությունը ժամանել է Հայաստան՝ խթանելու երկու երկրների մասնավոր հատվածների միջև գործարար կապերի զարգացումը

ՀՀ բարձր տեխնոլոգիական արդյունաբերության նախարար Ռոբերտ Խաչատրյանն ընդունել է Արաբական Միացյալ Էմիրությունների (ԱՄԷ) պատվիրակության ներկայացուցիչներին՝ ԱՄԷ առևտրաարդյունաբերական պալատների ֆեդերացիայի նախագահ Աբդուլլահ Ալ Մազրուիի գլխավորությամբ: Հանդիպմանը մասնակցել է նաև Հայաստանի Հանրապետությունում ԱՄԷ արտակարգ և լիազոր դեսպան Նարիման Մուհամմեդ Շարիֆ Ալ Մուլլան: Ողջունելով պատվիրակության անդամներին՝ Ռոբերտ Խաչատրյանը ներկայացրել է նախարարության գործունեության ընդհանուր շրջանակը, առաջնահերթ ուղղությունները և իրականացվող ծրագրերը: Նախարարն անդրադարձել է Հայաստան-ԱՄԷ հարաբերություններին՝ հույս հայտնելով, որ ԱՄԷ ներկայացուցչական պատվիրակության այցը կնպաստի երկկողմ կապերի ամրապնդմանը և կուրվագծի համագործակցության նոր ուղղություններ: Աբդուլլահ Ալ Մազրուին նշել է, որ ԱՄԷ պատվիրակությունը Հայաստան է ժամանել երկու երկրների մասնավոր հատվածների միջև գործարար կապերի զարգացումը խթանելու նպատակով: Նա նաև ընդգծել է ՀՀ բարձր տեխնոլոգիական արդյունաբերության նախարարության առանցքային դերը երկկողմ գործարար կապերի և հատկապես տեխնոլոգիական ոլորտում համագործակցության զարգացման գործում: Կողմերը շեշտել են բարձր տեխնոլոգիական ոլորտի զարգացման մեծ ներուժը և պատրաստակամություն են հայտնել փոխանակվելու ունեցած գիտելիքներով և փորձով: Հանդիպման ավարտին նախարար Ռոբերտ Խաչատրյանը ներկայացրել է Հայաստանում անցկացվող տեխնոլոգիական միջոցառումները և հրավիրել ԱՄԷ ընկերություններին մասնակցելու հոկտեմբերին Երևանում կայանալիք «ԴիջիԹեք 2023» տեխնոլոգիական ցուցահանդեսին:

12:10 - 27 սեպտեմբերի, 2023

ՀՀ ԲՏԱ նախարարությունը տիեզերական գործունեություն իրականացնելու լիցենզիա է տրամադրել «Բազումք» տիեզերական հետազոտությունների լաբորատորիային

16:18 - 08 սեպտեմբերի, 2023

Հայկական արտադրության առաջին արբանյակը SpaceX-ի հրթիռով նոյեմբերի վերջին կուղարկվի տիեզերք |armenpress.am|

17:16 - 07 սեպտեմբերի, 2023

Ռոբերտ Խաչատրյանն ընդունել է Նիդերլանդների դեսպան Նիկոլաս Սխերմերսին

ՀՀ բարձր տեխնոլոգիական արդյունաբերության նախարար Ռոբերտ Խաչատրյանը սեպտեմբերի 4-ին ընդունել է Հայաստանի Հանրապետությունում Նիդերլանդների Թագավորության արտակարգ և լիազոր դեսպան Նիկոլաս Սխերմերսին, ով ավարտում է դիվանագիտական առաքելությունը Հայաստանում։ Նախարար Ռոբերտ Խաչատրյանը շնորհակալություն է հայտնել դեսպանին համատեղ աշխատանքի համար, հույս հայտնել, որ Նիդերլանդների հետ ձևավորված գործընկերային դրական փորձը կշարունակի զարգանալ ու ամրապնդվել, իրականացվող ծրագրերն էլ առաջիկայում կընդլայնվեն և նոր շոշափելի արդյունքներ կգրանցեն։ Հանդիպման ընթացքում կողմերն անդրադարձել են համագործակցության նոր հեռանկարներին, մասնավորապես՝ թվայնացման, կիբեռանվտանգության, հեռահաղորդակցության, միկրոէլեկտրոնիկայի և էլեկտրոնային կառավարման բնագավառներում: Քննարկվել են նաև ընթացիկ ծրագրերն ու դրանց շարունակականության ապահովման հարցերը: Դեսպանը շնորհակալություն է հայտնել ընդունելության համար և նշել, որ Նիդերլանդներն առանձնահատուկ վերաբերմունք ունի Հայաստանի նկատմամբ, շեշտել երկու երկրների ընդգծված հետաքրքրությունը տեխնոլոգիաների նկատմամբ, որը բարձր տեխնոլոգիաների ոլորտում համագործակցության ընդայնման համար լուրջ նախադրյալներ է ստեղծում: Դեսպանը վստահություն է հայտնել, որ առաջիկայում կմշակվեն և կիրականացվեն համատեղ նոր ծրագրեր, որտեղ նախարարությունն ակտիվ ներգրավվածություն կունենա։ Հանդիպման ավարտին նախարար Ռոբերտ Խաչատրյանը հաջողություն է մաղթել դեսպանին իր հետագա գործունեության ընթացքում:

13:07 - 05 սեպտեմբերի, 2023

ԲՏԱ նախարարը ՀՀ-ում ԱՄԷ դեսպանի հետ քննարկել է տեխնոլոգիական ոլորտում համագործակցության ընդլայնման հնարավորությունները

ՀՀ բարձր տեխնոլոգիական արդյունաբերության նախարար Ռոբերտ Խաչատրյանը օգոստոսի 2-ին ընդունել է Հայաստանի Հանրապետությունում Արաբական Միացյալ Էմիրությունների (ԱՄԷ) նորանշանակ արտակարգ և լիազոր դեսպան Նարիման Մուհամմեդ Շարիֆ Ալ Մուլլային: Այս մասին տեղեկացրին ԲՏԱ նախարարությունից: Նախարարը ողջունել է դեսպանին, ներկայացրել նախարարության գործունեության հիմնական ուղղությունները, անդրադարձել երկու երկրների միջև արդեն իսկ ձևավորված գործակցությանը և հույս հայտնել, որ առաջիկայում այն առավել արդյունավետ կդառնա՝ ընդգրկելով համագործակցության առավել լայն շրջանակներ։ Դեսպան Նարիման Ալ-Մուլլան շնորհակալություն է հայտնել ընդունելության համար, նշել, որ ԱՄԷ-ն կարևորում է Հայաստանի հետ համագործակցության ընդլայնումը բարձր տեխնոլոգիաների ոլորտում՝ հատկապես թվայնացման, կիբեռանվտանգության, տիեզերական տեխնոլոգիաների ուղղություններով։ Դեսպանը նախարարին է փոխանցել նաև ԱՄԷ պաշտպանության հարցերով պետնախարար Մուհամմադ Ահմադ Ալ-Բաուարդի Ալ-Ֆալասի հրավերը՝ մասնակցելու «Դուբայ ավիաշոու 2023» ցուցահանդեսին։ Հանդիպման ընթացքում ներկայացվել է տեղեկատվական տեխնոլոգիաների, արհեստական բանականության, կիբեռանվտանգության, փոստային կապի ոլորտներում երկու կողմերի հաջող փորձը, քննարկվել են վենչուրային հիմնադրամների, ինկուբատորների և աքսելերատորների միջև գործարար կապերի հաստատման հնարավորությունները։ Անդրադարձ է կատարվել նաև «Ինժեներական քաղաք» ծրագրին, Ազգային վենչուրային հիմնադրամին, «Թումո» ստեղծարար տեխնոլոգիաների կենտրոնին, «Արմաթ» լաբորատորիաների գործունեությանը, Հայաստանում կազմակերպվող ոլորտային ցուցահանդեսներին: Նախարար Ռոբերտ Խաչատրյանը դեսպանին առաջարկել է ճանաչողական այց կատարել «Ինժեներական քաղաք» և «Թումո» ստեղծարար տեխնոլոգիաների կենտրոն, իսկ ԱՄԷ ոլորտային ընկերություններին հրավիրել է մասնակցելու Երևանում առաջիկայում կայանալիք «DigiTec23» և «ԱրմՀայԹեք 2024» ցուցահանդեսներին:

20:07 - 03 օգոստոսի, 2023

ԲՏԱ նախարարությունը հայտնել է, թե որ դեպքում եթերազրկումներ չեն լինելու՝ անկախ պարտքերից

«Հայաստանի հեռուստատեսային և ռադիոհաղորդիչ ցանց» ՓԲԸ–ն ամբողջական ծավալով կատարում է պայմանագրերով ստանձնած պարտավորությունները, մինչդեռ հեռուստաընկերությունները պայմանագրով ստանձնած պարտավորությունները կատարել են ոչ պատշաճ: Բարձր տեխնոլոգիական արդյունաբերության նախարարության մամուլի ծառայությունը հաղորդագրություն է տարածել` անդրադառնալով կուտակված պարտքերի պատճառով հեռուստաընկերությունների հեռարձակման ժամանակավոր դադարեցումներին։ ԲՏԱ նախարարությունից նշում են, որ հեռարձակման որակի հետ կապված հազվադեպ տեխնիկական խնդիրների հայտնաբերման դեպքում ՀՀՌՑ-ն հրատապ կերպով ուսումնասիրում է խնդիրները և տալիս է համապատասխան լուծում։ Մինչդեռ նախորդող տարիներին սահմանված վճարումները հեռուստաընկերությունների կողմից առավելապես թերակատարվել են, ինչի հետևանքով գոյացել են պարտքեր: Ընդգծվում է, որ ՀՀՌՑ-ն հեռուստաընկերություններին լրացուցիչ ժամանակ է տվել մատուցված ծառայությունների դիմաց պարտավորությունները կատարելու համար, սակայն վճարումները հիմնականում չեն իրականացվել: «Վստահ ենք, որ տվյալ սուբյեկտներն իրենց կառույցների պահպանման ծախսերն ու այլ վճարումները կատարում են ժամանակին, որպեսզի ապահովեն կառույցի բնականոն գործունեությունը: Սակայն անհասկանալի է այն մոտեցումը, որ ՀՀՌՑ-ի կողմից մատուցված ծառայության դիմաց տարիներով կուտակվել են պարտքեր՝ բացասաբար անդրադառնալով պետական բյուջեի անուղղակի եկամուտների վրա»,– նշված է հաղորդագրության մեջ։ ԲՏԱ նախարարությունը շեշտում է` որևէ հիմնավորմամբ հեռուստաընկերությունների նման գործելոճը չի կարող արդարացվել: Պայմանագրով ամրագրված բոլոր պարտավորությունները պետք է պատշաճ կերպով կատարվեն: Ինչ վերաբերում է ծառայությունների գնագոյացմանը, նախարարությունից հիշեցնում են, որ դեռ 2021 թվականի մարտին մի շարք հեռուստաընկերություններ այդ հարցով դիմել էին ՀՀ տնտեսական մրցակցության պաշտպանության հանձնաժողով։ Հանձնաժողովը հարցն ուսումնասիրելուց հետո կարճել էր հարուցված վարչական վարույթը՝ դրանով իսկ հիմնավորված համարելով ՀՀՌՑ-ի կողմից մատուցվող ծառայությունների արժեքները։ Ինչ վերաբերում է ՀՀ քաղաքացիների տեղեկատվություն ստանալու սահմանադրական իրավունքի իրացման և Երևանի ավագանու առաջիկա ընտրությունների պատշաճ լուսաբանմանը, նախարարությունն ընդգծում է` լրատվական հիմնական թողարկումների և նախընտրական գովազդի ժամանակահատվածում եթերազրկումներ չեն իրականացվելու։ Հուլիսի 18-ին հայաստանյան 20 հեռուստաընկերություն հայտարարություն էին տարածել` «Հայաստանի հեռուստատեսային և ռադիոհաղորդիչ ցանց» ՓԲԸ–ից (ՀՀՌՑ) պահանջելով մինչև այս տարվա վերջ դադարեցնել անջատումները։

20:53 - 19 հուլիսի, 2023

Ռոբերտ Խաչատրյանը և Siemens-ի տարածաշրջանային փոխնախագահը քննարկել են ընկերության մասնակցությունը Հայաստանի էներգետիկ համակարգի արդիականացման ծրագրերում

ՀՀ բարձր տեխնոլոգիական արդյունաբերության նախարար Ռոբերտ Խաչատրյանը հունիսի 14-ին ընդունել է Siemens ընկերության Կենտրոնական Ասիայի և Թուրքիայի տարածաշրջանային փոխնախագահ Մաքսիմ Զուբովին։ Ինչպես հայտնում են ՀՀ ԲՏԱՆ-ից, հանդիպմանը ներկա է եղել նաև ՀՀ տարածքային կառավարման և ենթակառուցվածքների նախարարի տեղակալ Հակոբ Վարդանյանը: Հանդիպման ընթացքում քննարկվել են երկկողմ համագործակցության հնարավորությունները բարձր տեխնոլոգիաների ոլորտում, ինչպես նաև՝ ընկերության մասնակցությունը Հայաստանի էներգետիկ համակարգի արդիականացման ծրագրերում, անդրադարձ է եղել մեր երկրում կանաչ վառելիքի արտադրության հեռանկարներին։

20:09 - 14 հունիսի, 2023

ԲՏԱ նախարարն ու Իրանի դեսպանը քննարկել են բարձր տեխնոլոգիական ոլորտում ՀՀ-ի և Իրանի հարաբերությունների զարգացման հեռանկարները

16:52 - 13 հունիսի, 2023

ԲՏԱ Նախարարության թիմը պատրաստ է աջակցելու ՄԱԿ-ի հանձնաժողովին ոլորտին առնչվող նախաձեռնություններում

ՀՀ բարձր տեխնոլոգիական արդյունաբերության նախարար Ռոբերտ Խաչատրյանը հունիսի 6-ին ընդունել է ՄԱԿ-ի եվրոպական տնտեսական հանձնաժողովի գործադիր քարտուղար Օլգա Ալգայերովայի գլխավորած պատվիրակությանը: Այդ մասին հայտնում են ՀՀ բարձր տեխնոլոգիական արդյունաբերության նախարարությունից: Հանդիպման ընթացքում կողմերը քննարկել են ՄԱԿ-ի եվրոպական տնտեսական հանձնաժողովի պատրաստած «Նորարարությունը Հայաստանի կայուն զարգացման համար» երկրորդ զեկույցը: Ողջունելով հյուրերին՝ նախարար Ռոբերտ Խաչատրյանը ընդգծել է զեկույցի կարևորությունը և նշել, որ ՀՀ բարձր տեխնոլոգիական արդյունաբերության նախարարության թիմը պատրաստ է աջակցել ՄԱԿ-ի հանձնաժողովին բարձր տեխնոլոգիական ոլորտին առնչվող նախաձեռնություններում:

13:57 - 07 հունիսի, 2023

ԲՏԱ նախարարը մասնակցել է «Երևան թեք ֆորում 2023»-ին

ՀՀ բարձր տեխնոլոգիական արդյունաբերության նախարար Ռոբերտ Խաչատրյանը մասնակցել է Skill ընկերության նախաձեռնությամբ մեկնարկած «Երևան թեք ֆորում 2023» (Yerevan Tech Forum 2K23) բիզնես միջոցառմանը: Այս տարի ֆորումն անցկացվում է «Թվային փոխակերպում. առաջխաղացման ռազմավարություններ» խորագրի ներքո: Ողջունելով ֆորումի կազմակերպիչներին և մասնակիցներին՝ Ռոբերտ Խաչատրյանը բացման ելույթում խոսել է արդի աշխարհում տեխնոլոգիաների վրա հիմնված թվային տնտեսության զարգացման կարևորության մասին և շեշտել, որ պետական կառավարման բոլոր ոլորտներում գիտելիքի և տեխնոլոգիաների հիման վրա բարձրորակ, մատչելի, հասանելի ու հուսալի ծառայությունների ապահովումը ՀՀ կառավարության առաջնահերթություններից է: Նախարարի խոսքով՝ Հայաստանի 2021-2025 թթ. թվայնացման ռազմավարության ընդունումն այդ ուղղությամբ իրականացված կարևորագույն ձեռքբերումներից է: «Ինչպես գիտենք, մեր օրերում առավել քան կարևորվում է տեխնոլոգիաների վրա հիմնված թվային տնտեսության զարգացումը, և ֆորումի շրջանակում անցկացվող քննարկումները, համոզված եմ, կլինեն արդյունավետ և կնպաստեն, որպեսզի միասին գտնենք առաջընթացի նոր ուղիներ ու հնարավորություններ: Ուզում եմ հատկապես ընդգծել, որ Հայաստանի թվայնացման զարգացման և ոլորտի կայացմանն ուղղված քաղաքականության հաջողությունը մեծապես կախված է այս գործընթացում ներգրավված բոլոր շահագրգիռ կողմերի համատեղ աշխատանքից: Եվ հուսով եմ, որ «Երևան թեք ֆորումի» շրջանակում իրականացվող քննարկումները կլինեն արդյունավետ և կնպաստեն, որպեսզի միասին գտնենք ոլորտի առաջընթացի նոր ուղիներ՝ Հայաստանն իրապես տեխնոլոգիական, նորարական երկրների շարքում տեսնելու համար», - ասել է նախարարը: Ռոբերտ Խաչատրյանը նշել է, որ ՀՀ բարձր տեխնոլոգիական արդյունաբերության նախարարությունն արդեն իսկ մշակել է հանրային թվային ծառայությունների 14 ստանդարտ և դրանք կիրառելու ուղեցույց: Ստեղծվել է «Հայաստանի տեղեկատվական համակարգերի գործակալություն» հիմնադրամը: Ավարտին է մոտենում թվային նույնականացման համակարգի (eID) բարեփոխումների գործընթացը։ Մշակման փուլում են գտնվում կիբեռանվտանգության և տվյալների քաղաքականությունների ձևավորման հայեցակարգերը: Բացման խոսքով հանդես են եկել նաև ՀՀ էկոնոմիկայի նախարար Վահան Քերոբյանը, Telcell ընկերության կոմերցիոն տնօրեն Արտյոմ Ղազարյանը, Skill ընկերության հիմնադիր Սերգեյ Ուսնունցը, ինչպես նաև Porsche, BMW, Lamborghini UK-ի նախկին գործադիր տնօրեն, սերիական գործարար և հեղինակ Քևին Գասքելը։ Պաշտոնական ելույթներին հաջորդել են թեմատիկ պանելային քննարկումները: ՀՀ բարձր տեխնոլոգիական արդյունաբերության նախարարի առաջին տեղակալ Գևորգ Մանթաշյանը ֆորումի շրջանակներում մասնակցել է «Հանրային հատվածի թվային փոխակերպում․ կառուցելով կայուն ապագա» թեմայով պանելային քննարկմանը՝ խոսելով թվային աշխարհակարգում Հայաստանի դերակատարման և թվային փոխակերպման միջոցով ազգային մրցունակության բարձրացման կարևության մասին: «Երևան թեք ֆորումը» փորձագիտական հարթակ է, որը համախմբում է գործարար համայնքի բազմաթիվ ներկայացուցիչների աշխարհի տարբեր երկրներից՝ քննարկելու բիզնեսի արդի թեմաները:

18:47 - 19 մայիսի, 2023

Չեմ կարծում, որ 2023 թվականի ընթացքում մենք երկրորդ արբանյակը կունենանք. ԲՏԱ նախարար |aysor.am|

aysor.am: Հայաստանում արբանյակի կառավարման կենտրոնն ամբողջությամբ կահավորված է, իսկ ընդունիչ կայանի հետ կապված սպասում ենք որոշ սարքավորումների, լրագրողների հետ զրույցում ասաց Բարձր տեխնոլոգիական արդյունաբերության նախարար Ռոբերտ Խաչատրյանը։ «Գործընթացն ընթացքի մեջ է, մոտ ժամանակներս սպասում ենք, որ կստանանք վերջնական սարքավորումներն ու կկարողանանք կառավարման կենտրոնի ու ընդունիչ կայանի բացումն անել», - նշեց նա։ Նախարարի խոսքով՝ երկրորդ արբանյակի հետ կապված աշխատանքները նախնական փուլում են, դեռ շուկայի ուսումնասիրություն են անում, գնահատում հնարավորությունները, առաջարկները։ «Ես չեմ կարծում, որ 2023 թվականի ընթացքում մենք երկրորդ արբանյակը կունենանք, բայց, ամեն դեպքում, աշխատանքներն արվում են», - ասաց նախարարը։

12:13 - 04 մայիսի, 2023

Որքա՞ն է կազմել բարձր տեխնոլոգիական արդյունաբերության ոլորտի շրջանառությունը 2022-ին |civilnet.am|

14:15 - 12 ապրիլի, 2023