Տիգրան Աբրահամյան

Տիգրան Աբրահամյանն 8-րդ գումարման խորհրդարանի «Պատիվ ունեմ» խմբակցության պատգամավոր է։

Ծնվել է 1985-ին։ 2006-2008թթ. ծառայել է ՀՀ զինված ուժերում: 2006-ին ավարտել է ԵՊՀ միջազգային հարաբերությունների ֆակուլտետը, 2010-ին՝ Երևանի մենեջմենթի համալսարանը՝ ձեռնարկությունների տնտեսագիտություն և կառավարում մասնագիտությամբ, 2011-ին՝ Քաղաքական դասընթացների երևանյան դպրոցը:

2005-2006թթ. եղել է ՀՀ ԱԺ պատգամավորի օգնական: 2009-2012թթ.՝ ՀՀ նախագահի աշխատակազմի հանրային կապերի և տեղեկատվության կենտրոնի փորձագետ, 2012-2014թթ.՝ տնօրենի խորհրդական: 2014-2017թթ.՝ ՀՀ կառավարության աշխատակազմի տեղեկատվության և վերլուծության կենտրոնի տնօրեն: 2016 թվականից Հայ-ռուսական համալսարանի դասախոս է:

2017-2020թթ. եղել է Արցախի Հանրապետության նախագահի խորհրդական: 2018-2020թթ. դասավանդել է Արցախի պետական և Արցախի Մեսրոպ Մաշտոցի անվան համալսարաններում: 2020-2021թթ. եղել է «Հենակետ» վերլուծական կենտրոնի ղեկավար։

2021թ. հունիսի 20-ին ԱԺ պատգամավոր է ընտրվել «Պատիվ ունեմ» դաշինքի համապետական ընտրական ցուցակով:

«Ի՞նչ է սա, եթե ոչ փաշինյանական հաշվարկված և պլանավորված պարտության նոր ծրագիր». Տիգրան Աբրահամյանը՝ Փաշինյանի հայտարարությունների մասին

Եթե Ադրբեջանը հասել է նրան, որ ԵՄ դիտորդական առաքելությունը Հայաստանում տեղակայվում է զուտ ՀՀ-ՌԴ հնարավոր «ագրեսիան» կանխելու համար` Փաշինյանն է պնդում, ապա սա նշանակում է, որ Ադրբեջանին հաջողվել է արտաքին աշխարհին համոզել, որ ՀՀ-ի դեմ իր հարձակումները «պաշտպանվելու» նպատակ են ունեցել: Այս մասին ֆեյսբուքյան իր էջում գրել է ԱԺ «Պատիվ ունեմ» խմբակցության պատգամավոր Տիգրան Աբրահամյանը: Նա նաեւ նշել է. «Ըստ Փաշինյանի՝ Ադրբեջանը պատերազմից հետո ՀՀ ինքնիշխան տարածքի բռնազավթումը, նոր բնագծեր, բարձունքներ վերցնելը դրանով է հիմնավորել ու փաստորեն ստացվել է: Ի՞նչ մակարդակի անտերություն ու փլուզում պետք է լինի երկրի կառավարման համակարգում, որ Արցախի ուղղությամբ լայնամասշտաբ պատերազմ ձեռնարկեն, այնուհետև 5 հարձակում Հայաստանի ու Արցախի նկատմամբ, հետո ՀՀ-ն ու Արցախն իրար կապող միակ ճանապարհը փակեն, տարածքային հսկայական զիջումներ, կորուստներ տաս, հազարավոր մարդիկ զոհվեն, իսկ դու արտաքին աշխարհին դեռ փորձում ես համոզել, որ ագրեսոր չես, պատերազմի նախաձեռնող չես, պատերազմ չես ուզում: Ու այս համատեքստում` իբր «ագրեսորի» կամ «ռևանշիստի» տպավորություն չթողնելու համար զորավարժություններ չես ձեռնարկում, բանակիդ մարտունակության բարձրացմանն ուղղված ինտենսիվ միջոցառումներ չես ձեռնարկում, դաշնակցիդ ռազմաբազան սպառնալիք ես հայտարարում ու հանգիստ սպասում, թե երբ թշնամիներդ հերթական արշավը կսկսեն քո երկրի նկատմամբ: Ի՞նչ է սա, եթե ոչ փաշինյանական հաշվարկված և պլանավորված պարտության նոր ծրագիր»,- նշված է պատգամավորի գրառման մեջ։ Հիշեցնենք, որ երեկ՝ փետրվարի 8-ին, Նիկոլ Փաշինյանը ԱԺ-ում հայտարարել էր, որ Ադրբեջանը արևմտյան հարթակներում ընդդեմ Հայաստանի իր ագրեսիվ գործողությունները բացատրում էր նրանով, որ ՀՀ վարչապետը ավելի ու ավելի շատ ռուսական զորքեր է բերում և տեղակայում Հայաստան-Ադրբեջան սահմանին և պատրաստվում է «հայ-ռուսական համատեղ ագրեսիվ հարձակում Ադրբեջանի դեմ», և Ադրբեջանը իր ագրեսիվ հարձակումներով փորձում է քիչ թե շատ հավասարակշռել իրավիճակը՝ իր «խոցելիությունը» կառավարելու համար․ «Արևմուտքում Հայաստանը փորձ էր արվում ներկայացնել որպես Ռուսաստանի ագրեսիվ քաղաքականության մասնակից, իսկ Ռուսաստանում փորձ էր արվում ներկայացնել որպես արևմտյան դավադրության մասնակից, բայց քանի որ Ռուսաստանի գործընկերները տեղում ունեին ներկայացուցիչներ և արևմտյան մեր գործընկերները սկսել են մեզ խեթ նայել, որ դուք հիմա իրականում պատասրավում եք ագրեսիվ գործողություններ իրականացնել, որովհետև ռուսական և հայկական զորքերի մեծ կուտակումներ կան, «խեղճ» ադրբեջանցիները ստիպված բարձունքներ են ուզում գրավել, որ հավասարակշռենք։ Մենք ասեցինք՝ եկեք դիտարկեք, հասկացեք, այս ամենը իրականությանը համապատասխանո՞ւմ է, թե՞ չի համապատասխանում»։ Լուսանկարը՝ ԱԺ մամուլի ծառայության

10:07 - 09 փետրվարի, 2023

Իշխանությունը նիստի էր եկել՝ մեղավորներին արդեն իսկ նշանակած․ Տիգրան Աբրահամյանը՝ Սեյրան Օհանյանի նկատմամբ քրեական հետապնդում հարուցելու համաձայնություն տալու հարցի մասին |news.am|

news.am: Այն իշխանությունը, որը նախորդ տարի Կառավարության որոշմամբ ՊՆ 71 ռազմական օբյեկտ հանել էր աճուրդի, փորձում էր քննարկում ծավալել հարցի շուրջ, թե ինչքան վտանգավոր քայլ է իրականացվել սրանից տարիներ առաջ, երբ զորանոց հանդիսացող տարածքը, որը որեւէ չափանիշի չէր համապատասխանում, հանվել է վաճառքի։ Այս մասին այսօր՝ փետրվարի 7-ին, լրագրողների հետ զրույցում ասաց «Պատիվ ունեմ» խմբակցության քարտուղար Տիգրան Աբրահամյանը` անդրադառնալով ԱԺ-ում Սեյրան Օհանյանի նկատմամբ քրեական հետապնդում հարուցելու համաձայնություն տալու հարցին։ «Խորհրդարան բերված թեման ունի մեկ նպատակ՝ հանրությանը շեղել Զինված ուժերում տեղի ունեցող ողբերգություններից, պետական կառավարման ձախողման հետեւանքով Հայաստանի ինքնիշխան տարածքի կորուստներից։ Իշխանությունն այսօրվա քաղաքական միջոցառման միջոցով նպատակ ունի իրականությունը խեղաթյուրել, հանրային, հասարակական օրակարգը փոփոխության ենթարկե, եւ իրադարձությունները ներկացնել սեփական մեկնաբանմամբ։ Իշխանությունը փորձ էր անում մեկ զորանոցի օտարումը ներկայացնել որպես Զինված ուժերին հասցված մեծագույն խնդիր։»,- ասաց Աբրահամյանը։ Ըստ Տիգրան Աբրահամյանի՝ թիրախավորվել է Սեյրան Օհանյանը, քանի որ խորհրդարանի խոշոր ընդդիմադիր խմբակցության ղեկավարն է։ «2018 թվականից էլ ի վեր Գրիգորի եւ Յուրի Խաչատուրովներն իրենց քաղաքացիական դիրքորոշումներն են արտահայտել ստեղծված իրավիճակի վերաբերյալ։ Բնականաբար, իշխանության համար թիրախ են։ Իրենք գիտակցել են, որ նման տեսակետների արտահայտումը կարող է այսպիսի իրավիճակ ստեղծել, սակայն դա նրանց տեսակն է, եւ կանգնած լինելով Զինված ուժերի ստեղծման ակունքներում՝ չէին կարող անտարբեր մնալ այս ամենի հանդեպ։ Իշխանությունը նիստի էր եկել՝ մեղավորներին արդեն իսկ նշանկած։ Հնչեցվում էին անուններ, նրանց բնութագրում էին քրեական արարքներ, որոնք դատարանի որոշմամբ հաստատված չեն։ Ես հիմք չեմ տեսնում այս իշխանությունների կողմից օբյեկտիվ քննության անցկացման մասով»,- նշեց պատգամավորը։

13:51 - 07 փետրվարի, 2023

Կոչեր տարածած միջազգային կառույցներն իրենց պոտենցիալի քիչ մասն են կիրառում՝ Ադրբեջանի նկատմամբ ճնշումը մեծացնելու համար. Աբրահամյան |armenpress.am|

armenpress.am: ՀՀ ազգային ժողովի «Պատիվ ունեմ» խմբակցության քարտուղար Տիգրան Աբրահամյանի գնահատմամբ՝ միջազգային կառույցները, որոնք Ադրբեջանի կողմից Արցախի շրջափակման առաջին օրերին հայտարարություններ, կոչեր տարածեցին, այս պահին իրենց պոտենցիալի քիչ մասն են կիրառում՝ Ադրբեջանի նկատմամբ ճնշումները մեծացնելու և իրավիճակի որոշակի հանգուցալուծմանը հասնելու համար: Աբրահամյանը նման տեսակետ հայտնեց ԱԺ հայտարարությունների ժամին: Պատգամավորը նկատեց՝ անկախ այն հանգամանքից, որ ստեղծված իրադրությունն առաջին հերթին քաղաքական ճգնաժամ է ու ենթադրում է քաղաքական հանգուցալուծում, սակայն, որպես հետևանք՝ Արցախում ստեղծված հումանիտար իրադրությունը գնալով ծայրահեղ բնույթ է ստանում: Կարմիր Խաչի միջազգային կոմիտեն հումանիտար բնույթի տարբեր խնդիրներ է փորձում լուծել՝ հատկապես դեղորայքի և ծայրահեղ ծանր վիճակում գտնվող հիվանդների Հայաստան տեղափոխման հարցում: Սակայն Աբրահամյանը նկատեց, որ ԿԽՄԿ-ի ջանքերը բավարար չեն նույնիսկ նվազագույն խնդիրներ լուծելու համար: «Միջազգային դերակատարները, կառույցները, որոնք առաջին օրերին հայտարարություններ, կոչեր տարածեցին, այս պահին իրենց հնարավորությունների քիչ մասն են կիրառում՝ Ադրբեջանի նկատմամբ ճնշումները մեծացնելու և իրավիճակի որոշակի հանգուցալուծմանը հասնելու համար»,-ասաց պատգամավորը: Նա նշեց, որ չնայած հարցը քննարկվել է ՄԱԿ-ի Անվտանգության խորհրդում, որոշ հասցեական հայտարարություններ հնչել են, սակայն որևէ շարունակություն այդպես էլ չի եղել: Ընդդիմադիր պատգամավորը մեղադրեց նաև Հայաստանի իշխանությանը՝ միջազգային դերակատարների, կառույցների հետ հետևողական աշխատանք չտանելու մեջ: Նա անբավարար գնահատեց արտաքին աշխարհի հետ աշխատանքում Հայաստանի իշխանությունների իրականացրած ջանքերը:

18:11 - 17 հունվարի, 2023

Ընդդիմադիր պատգամավորն ընկալելի չի համարում ՀՀ-ում ՀԱՊԿ-ի զորավարժության անցկացումից իշխանության հրաժարվելը |armenpress.am|

14:33 - 16 հունվարի, 2023

ՀՀ-ի ու Արցախի իշխանությունները կարևոր հարցերի շուրջ հակասություններ ունեն, Հայաստանը հրաժարվել է իր մասով ունեցած առաքելությունից․ Տիգրան Աբրահամյան |tert.am|

tert.am: Արցախում կոնսենսուս կա առ այն, որ Արցախի հարցում Հայաստանի քաղաքականությունը հակասում է Արցախյան շարժման ազատագրական պայքարի հիմքում եղած մոտեցումներին։ Այս փուլում Արցախը ունի իրավիճակի հանգուցալուծման սեփական մոտեցումը, որը էականորեն տարբերվում է Հայաստանի պաշտոնական դիրքորոշումից։ Այս մասին լրագրողների հետ ճեպազրույցի ժամանակ ասաց ԱԺ «Պատիվ ունեմ» խմբակցության քարտուղար Տիգրան Աբրահամյանը։ Պատգամավորը ընդգծեց, որ ՀՀ-ի և Արցախի իշխանությունների միջև ակնհայտորեն կան հակասություններ, բացառությամբ որոշակի ուղղությունների, ինչպես օրինակ՝ սոցիալական ուղղությամբ ընթացող աշխատանքների։ «Այս իշխանությունը փորձում է սահմանափակվել բացառապես Արցախում սոցիալական բնույթի հարցեր լուծելով։ Ակնհայտորեն, հատկապես 44-օրյա պատերազմից հետո, Արցախը միայնակ, առանց Հայաստանի քաղաքական և անվտանգային սատարման չի կարող լուծել իր առջև դրված խնդիրները։ Այն, որ Հայաստանի իշխանություններն ասում են, թե Ադրբեջանի իշխանությունները պետք է խոսեն Արցախի իշխանությունների հետ, նպատակ է հետապնդում Հայաստանին դուրս դնելու Արցախի ճակատագրի հետ կապված ցանկացած գործընթացից։ Ճիշտ է՝ առաջին հերթին Արցախում ապրող մարդիկ պետք է որոշեն իրենց ճակատագիրը, այլ բան է, որ Հայաստանը իր մասով ունեցած առաքելությունից պարզապես հրաժարվել է, ինչը անթույլատրելի է»,- նշեց Տիգրան Աբրահամյանը։ Վերջինս ընդգծեց, որ Լաչինի միջանցի բացման հարցում տարվող գործընթացներում ՀՀ իշխանությունների կատարած աշխատանքը գոհացուցիչ չէ։ Ավելի մանրամասն` tert.am-ում։

13:27 - 16 հունվարի, 2023

Արցախը պետք է անցնի ոչ ստանդարտ քայլերի, որի դեպքում կխառնվի միջազգային դերակատարների և Ադրբեջանի սցենարները․ Աբրահամյան

Ամենաբարդ հարցերի մասին. Ի՞նչ անել Հայաստանն Արցախին կապող միջանցքի բացման համար։ Կա՞ արդյո՞ք գործելու և արդյունքի հասնելու հնարավորություն՝ ադրբեջանական շանտաժն ու սպառնալիքը չընդունելով։ Այս մասին Facebook-ի իր էջում գրառում է արել ԱԺ «Պատիվ ունեմ» խմբակցության պատգամավոր Տիգրան Աբրահամյանը։ Նա նաեւ նշել է. «Հայաստանի դեպքում հնարավորություն, դուռ կբացվի, եթե բանակցողը փոխվի։ Սա ամենաակնհայտ լուծումներից է։ Այն իշխանությունը, որի քաղաքականության և որդեգրած գծի հետևանքով այս կետին ենք հասել, նույնիսկ մեծ ցանկության դեպքում հաջող բանակցելու պոտենցյալ ու ռեսուրս չունեն։ Կրկնում եմ՝ եթե նույնիսկ մեծ կամք ու ցանկություն ունենան։ Նոր բանակցող, արտաքին աշխարհի հետ շփվելու նոր հնարավորություն, բնական դաշնակիցների հետ խոսելու և համաձայնության գալու նոր հավանականություն, արտաքին շահերի համադրում, զուգահեռ երկրի ներսում կարևորագույն հարցերի շուրջ կոնսեսուսի ապահովում, համախմբում, պետական կառավարման համակարգի վերաձևավորում, անվտանգության համակարգում արմատական վերանայումներ և այլն։ Արդյո՞ք անելիք ունի շրջափակման և ծանր իրավիճակում հայտնված Արցախը։ Այո՛։ Առաջին ու գլխավոր մոտեցումը՝ Ադրբեջանի դեմ տված խաղի կանոնները պետք է մերժվեն, իսկ փոխզիջում պետք է լինի այն դեպքում, երբ Ադրբեջանը մնա մեկքայլանի կոմբինացիայի տրամաբանության մեջ, որովհետև ադրբեջանական բազմակողմանի խաղը ենթադրում է խաղաղ հանձնվելու վերջաբան։ Երկրորդ, Արցախը պետք է անցնի ոչ ստանդարտ քայլերի/գործողությունների, որի պարագայում և՛ կխառնվի այս խնդրում ներգրաված կամ հայտ ներկայացրած միջազգային դերակատարների հավանական սցենարները, և՛ Ադրբեջանի։ Կա՞ ասածիս տակ կոնկրետ հավանական ծրագիր։ Այո՛, բայց առավել բացվածքով, նպատակահարմար չի նկարագրել։ Այն մարդիկ, ովքեր պետք է Արցախում այդպես շարժվեն, համոզված եմ ընդհանուր գծերով գիտեն, կհասկանան»:

10:49 - 05 հունվարի, 2023

Արցախում տեղի ունեցողը կարող է տեղի ունենալ ՀՀ ցանկացած մարզում, այդ ժամանակ էլ են ասելո՞ւ՝ ինչ անի խեղճ իշխանությունը․ Տիգրան Աբահամյան |tert.am|

tert.am: ԱԺ-ում լրագրողների հետ ճեպազրույցի ժամանակ «Պատիվ ունեմ» խմբակցության քարտուղար Տիգրան Աբրահամյանը նշեց, որ Լաչինի միջանցքում ստեղծված իրավիճակը, հումանիտար խնդիր լինելուց զատ, առաջին հերթին քաղաքական, անվտանգային խնդիր է։ «Եթե նույնիսկ միջանցքում անխափան երթևեկությունը վերականգնվի, դրանով իրավիճակը չի հանգուցալուծվելու։ Ցանկացած իրավիճակի պատասխանատվությունը իշխանություններինն է, անկախ նրանից՝ ով է իշխանության գլխին, բայց եթե հաշվի ենք առնում օրվա իշխանությունների քաղաքական տապալման հետևանքները, որը երկիրը հասցրել է ողբերգական վիճակի, բնական է, որ իշխանությունը թիվ մեկ պատասխանատուի կարգավիճակ ունի։ Այն, ինչ տեղի է ունենում Արցախում, կարող է տեղի ունենալ ՀՀ ցանկացած մարզում, այդ ժամանակ էլ կասեն ՌԴ-ն չիրականացրեց իր պարտականությունը, ինչ անի խեղճ իշխանությունը։ Արցախում ապրում են մեր հայրենակիցները և ՀՀ իշխանությունները չեն կարող սահմանափակվել ինչ-որ նամակներով և պատասխանատվությունը բարդել միջազգային դերակատարների վրա»,- ասաց Աբրահամյանը։ Շարունակությունը՝ tert.am-ում

14:38 - 20 դեկտեմբերի, 2022

«Դեռ շատ հեռու ենք պատշաճ պաշտպանություն իրականացնելու հնարավորություն տվող բնագծեր ունենալուց»․ Տիգրան Աբրահամյան |azatutyun.am|

azatutyun.am: Հայաստանը դեռ շատ հեռու է այնպիսի բնագծեր ունենալուց, որը հնարավորություն կտա պատշաճ ձևով պաշտպանություն իրականացնել, «Ազատության» հետ զրույցում ասաց Ազգային ժողովի ընդդիմադիր «Պատիվ ունեմ» խմբակցության քարտուղար, Պաշտպանության հանձնաժողվի անդամ Տիգրան Աբրահամյանը: Պատգամավորն ընդգծեց՝ ասածները հիմնավոր ապացույցներ ունեն, և այն ծանր իրավիճակը, որ ինքն է ներկայացնում, որևէ պաշտոնյա չի կարող ուղղակի կասկածի տակ դնել։ Աբրահամյանի հետ հարցազրույցից մի հատված ներկայացնում ենք ստորև․ - Պարոն Աբրահամյան, այդ թվում՝ և այս տաղավարում, քննադատել եք առաջնագծի կահավորումը։ Նախօրիեն Ազգային ժողովի պաշտպանության հանձնաժողովի նախագահ Անդրանիկ Քոչարյանն ասում էր, որ անձամբ Ձեզ առաջարկում է՝ միասին գնալ Ջերմուկ և համոզվել, որ այնքան գործ է արվել, որ նախկինում նման բան չի եղել։ - Բնականաբար, իմ բոլոր հայտարարությունները հիմնված են փաստական տեղեկության հիման վրա։ Ես ինքս մի քանի օր առաջ եղել եմ Ջերմուկում։ Առհասարակ ես սեպտեմբերի 13-14-ի ագրեսիայից հետո եղել եմ ռազմաճակատի բոլոր հիմնական ուղղություններով՝ սկսած Ներքին Հանդից, Ճակատեն, Տեղ, Խոզնավար, Իշխանասար, Ջերմուկ, Վերին Շորժա, Սոթք, Կուտական վաղը ևս լինելու եմ առաջնագծում։ - Համարյա ամբողջ երկայքով անցել եք։ - Բոլոր ուղղություններով եղել եմ, և այս իրավիճակում այն, ինչ ես եմ հնչեցնում, այն, ինչ ես եմ արտահայտում, ես տեր եմ իմ ասածին և, կարծում եմ, որ իմ ասածը հիմնված է հիմնավոր ապացույցների վրա, և այն ծանր իրավիճակը, որ ես եմ ներկայացնում, որևէ պաշտոնյա, որևէ գործիչ չի կարող ուղղակի հերքել, կամ կասկածի տակ դնել։ - Ինչո՞ւ ժամանակը չի բավարարել, պարոն Աբրահամյան։ - Կարծում եմ՝ նույնիսկ անզեն աչքով տեսանելի է, որ առաջնահերթությունների խնդիր կա․ մի կողմից կան ռեսուրսներ, կա բյուջե, որոնք պայմանական քաղաքացիական ենթակառուցվածքների մասով գործում են, կամ ակտիվ գործում են, և կա հատկացված բյուջե, որի պայմաններում արագ, օպերատիվ մեր հրատապ խնդիրները լուծելու հանարավորություն դեռևս ամբողջական չկա։ Այսինքն՝ պայմանական կարելի է ֆիքսել ուղղություն, որտեղ կան մարտական հենակետեր, որտեղ կա առաջնագծի որոշակի կահավորում, բայց մենք դեռ շատ հեռու ենք այնպիսի բնագծեր ունենալուց, որը մեզ հնարավորություն կտա պատշաճ ձևով պաշտպանություն իրականացնել և էականորեն դրա միջոցով նվազեցնել մեր մարտական կորուստների թիվը։ Ավելի վաղ Աբրահամյանն ասել էր, որ առաջնագիծն այն աստիճան կահավորված չէ, որ Ադրբեջանը սեպտեմբերին երկու-երեք օրում հսկայական տարածքներ գրավեց։ Անդրանիկ Քոչարյանն արձագանքել էր և Տիգրան Աբրահամյանին առաջարկել հանձնաժողովի անդամների հետ Ջերմուկ գնալ և տեսնել, թե ինչ է նոր կահավորումը և ինժեներական զորքերի կայացումը ոնց է տեղի ունենում։ Հարցազրույցն ամբողջությամբ՝ azatuyun.am-ում

10:21 - 13 դեկտեմբերի, 2022

Իշխանությունները թեմայի հետ կապված անտարբեր են և այն համարում են բացառապես ռուսների խնդիրը․ Տիգրան Աբրահամյանը՝ Ստեփանակերտ-Գորիս ճանապարհի փակման մասին

Ադրբեջանցիներն Արցախը Հայաստանին կապող ճանապարհը փակել են՝ որպես հիմք ներկայացնելով Արցախում ընդերքի շահագործման հետ կապված հնարածին խնդիրները։ Այս մասին ֆեյսբուքյան իր էջում գրել է «Պատիվ ունեմ» խմբակցության անդամ Տիգրան Աբրահամյանը՝ շարունակելով, որ պատահական չէ, որ օրեր առաջ, ադրբեջանական քարոզչական ալիքներում հանքի բեռնատարների լուսանկարներ հայտնվեցին, որոնցում նաև նշվում էր, թե հայերն ապօրինի շահագործում են հանքերը։ «Ի դեպ, Ադրբեջանը նաև կեղծ տեղեկություններ էր շրջանառում իրանական դիվերսիոն խմբերի Արցախում գտնվելու վերաբերյալ։ Ինչևէ, Ադրբեջանն օգտագործում է հայաստանյան իշխանությունների հնչեցրած հայտարարությունները, որոնք կասկածի տակ են դնում Արցախի ինքնորոշման իրավունքը և այն դիտարկում Ադրբեջանի տարածքային ամբողջականության շրջանակներում։ Մյուս կողմից՝ նոյեմբերի 9-ի եռակողմ հայտարարության պայմաններում, Ադրբեջանը փորձում է միջանցքի նկատմամբ հսկողության հիմքեր գտնել, որպեսզի ռուսական կողմի հետ շփումներում ցույց տա, թե ստիպված է գնում նման քայլի։ Իրականում Հայաստանն Արցախին կապող միջանցքը փակելու որևէ հիմք Ադրբեջանը չունի, դա լավագույնս գիտակցում են նաև Մոսկվայում։ Դե Հայաստանի իշխանությունների հանգամանքը անիմաստ է քննարկել, նրանք թեմայի հետ կապված անտարբեր են և այն համարում են բացառապես ռուսների խնդիրը»։

17:18 - 03 դեկտեմբերի, 2022

Հայաստանում արձագանքում են Մինսկի խմբի վերաբերյալ Ֆիլիպ Ռիքերի հայտարարությանը |azatutyun.am|

azatutyun.am: «Մինսկի խմբի փաստացի չգործելը դժվարացնում է Լեռնային Ղարաբաղի հարցի լուծումը», - կարծում է ընդդիմադիր «Պատիվ ունեմ» խմբակցության քարտուղար Տիգրան Աբրահամյանը։ 2.5 ամիս առաջ Մինսկի խմբի ամերիկացի համանախագահ ու Կովկասի բանակցությունների հարցերով ԱՄՆ պետքարտուղարի ավագ խորհրդական նշանակված Ֆիլիպ Ռիքերը երեկ հայտարարեց՝ Մինսկի խմբի մեխանիզմն այլևս չի գործում, և Վաշինգտոնը զբաղված է Ադրբեջանի և Հայաստանի միջև խաղաղ կարգավորմամբ միայն Բաքվի և Երևանի հետ անմիջական փոխգործակցության միջոցով։ «Կարծում եմ, որ այն զարգացել է այն աստիճան, որ մենք կարող ենք կոնսենսուսի միջոցով վերջ տալ այս մանդատին»,- հայտարարել է դեսպան Ռիքերը՝ խոսելով ղարաբաղյան հիմնախնդրի լուծմամբ զբաղվող ԱՄՆ-ի, Ֆրանսիայի ու Ռուսաստանի եռանախագահության ֆորմատից։ Ամերիկացի պաշտոնյայի պնդմամբ, սակայն, նպատակն ու խմբի մանդատը պահպանվում է։ 44-օրյա պատերազմից հետո՝ երկու տարի, եռանախագահության մակարդակով բանակցությունները, փաստացի, փակուղում են։ Չնայած Հայաստանը պնդում էր հակամարտությունը հենց այս ձևաչափով կարգավորելու անհրաժեշտությունը, Ադրբեջանը հրաժարվում էր վերադառնալ բանակցություններին՝ հայտարարելով՝ նման հարց այլևս գոյություն չունի։ Չնայած ոչ էֆեկտիվ փուլեր են եղել, բայց Մինսկի խմբից շատ ավելի լավ հարթակ չի եղել, որտեղ կողմերը նստել են բանակցելու, կարծում է ընդդիմադիր Աբրահամյանը։ «Եթե այստեղ չկա միջնորդական դերակատարությունը, եթե չկա այստեղ հստակ հարթակը, ապա այս դեպքում Ադրբեջանը ավելի մեծ հնարավորություն է ստանում կլանելու խնդիրը և լուծելու այնպես, ինչպես հայտարարում է», - ընդգծեց «Պատիվ ունեմ» խմբակցության քարտուղարը: Իշխանական «Քաղաքացիական պայմանագրից» Արթուր Հովհաննիսյանը թե՛ բացասականից է խոսում, թե՛ դրականը տեսնում: «Այո, ինքնին այդ ձևաչափը ինչպես որ նախկինում էր աշխատում, հիմա այդ ձևաչափով չի աշխատում, բայց Մինսկի համանախագահ բոլոր երեք երկրները ամբողջապես ներգրավված են գործընթացում: Ըստ էության, այս մոտեցումն ավելի արդյունավետ է այն իմաստով, որ նրանց ներգրավվածությանը չեն խանգարում միմյանց միջև եղած հարաբերությունները և այսպես ասած Արևմուտքի ու Ռուսաստանի հարաբերությունները, պայմանավորված ուկրաինական հակամարտությամբ, չի տարածվում հայ-ադրբեջանական կամ Ղարաբաղի խնդրի կարգավորման գործընթացների վրա, դա ինքնին դրական է: Բացասական արձանագրելով Մինսկի խմբի այս ձևաչափի փոփոխությունը, դրական ենք արձանագրում ներկա իրավիճակը», - ընդգծեց Հովհաննիսյանը:

17:23 - 17 նոյեմբերի, 2022

Ատեստավորման հետ կապված օրենքի նախագիծը ունի բազմաթիվ ռիսկեր, անարդարության ցանկացած դրսևորում ԶՈՒ-ում բերելու է ավելի ծանր վիճակի․ Տիգրան Աբրահամյան |tert.am|

tert.am: ԱԺ Խորհրդարանական ճեպազրույցների ժամանակ «Պատիվ ունեմ» խմբակցության քարտուղար Տիգրան Աբրահամյանն անդրադարձավ Զինված ուժերին վերաբերող օրենքի երկու նախագծերին՝ «Պաշտպան Հայրենյացին» և ԶՈՒ-ում ատեստավորման գործընթացին։ «Ատեստավորման հետ կապված օրենքի նախագիծը ունի բազմաթիվ ռիսկեր, առաջին հերթին՝ նախագծում սահմանված չէ կառավարության այն որոշումը, որը կարգավորում է ատեստավորման գործընթացը, այսինքն՝ ինչ չափորոշիչներով, ինչ սկզբունքներով է այն կատարվելու։ Այս գործընթացի ցանկացած խափանում, անարդարության ցանկացած դրսևորում Զինված ուժերում բերելու է շատ ավելի ծանր վիճակի, քան այսօր ունենք։ Բացի այդ, նույնիսկ ամենասկզբունքային և ամենաարդարացի ներդրման պարագայում խրախուսման համակարգը պետք է ներդրվի այն ժամանակ, երբ բազային աշխատավարձը հասցված է համապատասխան մակարդակի և մարտական հերթապահության համար նախատեսված հավելավճարները ունեն համապատասխան վիճակ և չունեն այն վիճակը, որ ունենք այսօր»,- ասաց Տիգրան Աբրահամյանը։ Անդրադառնալով «Պաշտպան Հայրենյաց» նախագծին՝ պատգամավորը ասաց, որ այս ծրագրի իրատեսության, ԶՈՒ ներսում առկա իրավիճակի առումով որոշակի խնդիրներ է տեսնում։ «Այնուամենայնիվ, որպես պայմանագրային զինծառայողներին աջակցող ծրագիր, մենք կողմ ենք քվեարկել նախագծին, սա առաջին հերթին համարում ենք շանս բոլոր այն երիտասարդների համար, ովքեր ցանկություն կունենան 6 ամիս հետո ընտրել պայմանագրային ծառայությունը»,- ասաց Աբրահամյանը։

12:26 - 17 նոյեմբերի, 2022

Արցախի ՊԲ-ի կազմալուծման հարցը կրկին առաջնային օրակարգ են հրում․ այս անգամ և՛ հայաստանյան, և՛ արցախյան իշխանական շրջանակների կողմից․ Տիգրան Աբրահամյան

Արցախի պաշտպանության բանակի կազմալուծման հարցը կրկին առաջնային օրակարգ են հրում, սակայն եթե նախկինում դա արվում էր Ադրբեջանի նախաձեռնությամբ և դա որպես պահանջ/սպառնալիք էր ներկայացվում, ապա հիմա այն ակտիվացվում և քննարկելի են դարձնում և՛ հայաստանյան, և՛ որքան էլ զարմանալի է՝ արցախյան իշխանական շրջանակներից։ Այս մասին ֆեյսբուքյան իր էջում գրառում է արել «Պատիվ ունեմ» խմբակցության քարտուղար Տիգրան Աբրահամյանը։ «Որքան էլ ՊԲ կրճատումը՝ կարևոր չէ ամբողջական, թե մասնակի, ներկայացվի միջազգային երաշխիքների կամ Արցախում տեղակայված ռուսական խաղաղապահ զորախմբի կազմի հնարավոր ընդլայնման համատեքստում, անթույլատրելի է։ Այստեղ առաջին խնդիրն այն է, որ Հայաստանի իշխանությունը թեման օրակարգային քննարկման հարց է դարձրել, իսկ ավելի կոնկրետ՝ սակարկման, իսկ այն ներկայացվում է նաև որպես Արցախի հետ համաձայնեցված։ Երկրորդ, ես չեմ պատկերացնում, թե էլ ինչ պետք է պատահի Արցախի հետ, որ տեղում հասկանան, որ կոնկրետ այս գործընթացի նպատակը, բառիս բուն իմաստով, Արցախի հենման վերջին հենապատը հեռացնելն է։ Ադրբեջանն այս հարցով շտապում է, որպեսզի խաղաղապահների 5-ամյա ժամկետի ավարտից առաջ վերացնի դիմադրության ամենակարևոր ինստիտուտը, որի պարագայում ո՛չ բանակցելու, ո՛չ էլ պայքարելու ռեսուրս չի լինի։ Դեռ չեմ խոսում այն մասին, որ 44-օրյա պատերազմից հետո տեսել ենք, թե ինչպես են ոտնակոխ տրվել միջազգային երաշխիքներն ու խաղաղապահների ներկայությունը և Արցախի նորանոր տարածքներ բռնազավթվել»։

14:22 - 12 նոյեմբերի, 2022

Հայաստանը գնում է պայմանական ռուսական սցենարին հակառակ ուղղությամբ, Պուտինի մեսիջները ուղղված էին հայ ժողովրդին․ Տիգրան Աբրահամյան |tert.am|

tert.am: Նիկոլ Փաշինյանի հայտարարությունները շատ դժվար է մեկնաբանել այն առումով, որ վերջին չորս տարիները ցույց են տվել, որ իշխանությունները ասում են մեկ բան, անում` ճիշտ հակառակը։ Այս մասին լրագրողների հետ զրույցում նշեց «Պատիվ ունեմ» խմբակցության քարտուղար Տիգրան Աբրահամյանը՝ անդրադառնալով «Վալդայ» միջազգային քննարկման ակումբի լիագումար նիստում ՌԴ նախագահի արած հայտարարությանը, թե կա վաշինգտոնյան փաստաթուղթ, որով առաջարկվում է Արցախը թողնել Ադրբեջանի կազմում և ի պատասխան դրա՝ Նիկոլ Փաշինյանի կատարած գրառմանը։ «Փաշինյանի հայտարարություններից դժվար է ենթադրել, թե Հայաստանը ո՞ր ճանապարհով կգնա։ Հայաստանի իշխանությունների տարբեր ներկայացուցիչների հայտարարությունները ցույց են տալիս, որ Հայաստանը գնում է պայմանական ռուսական սցենարին հակառակ ուղղությամբ։ Հայաստանի իշխանությունները հրաժարվել են Արցախի ճակատագրի հետ կապված որևէ քննարկումներից։ Սցենարային առումով Հայաստանը համաձայնություն է տվել այն զարգացումներին, որը ենթադրում է Արցախը թողնել Ադրբեջանի կազմում»,- ասաց Աբրահամյանը։ Նա նշեց, որ Նիկոլ Փաշինյանի հայտարարությունները հիմք չեն՝ հասկանալու, թե Հայաստանը որ ուղղությամբ է շարժվելու։ «Նիկոլ Փաշինյանի և իշխանության ներկայացուցիչների առաջնային նպատակն է հնարավորինս ձերբազատվել Արցախի հարցից և լավագույն դեպքում սահմանափակվել հումանիտար բնույթի հարցերի բարձրաձայնմամբ»,- ասաց պատգամավորը։ Շարունակությունը՝ tert.am-ում

14:12 - 28 հոկտեմբերի, 2022

Ադրբեջանը դելիմիտացիայի եւ դեմարկացիայի գնալու նպատակ չունի. Տիգրան Աբրահամյան |hetq.am|

hetq.am: Ադրբեջանը փորձում է լուծել շատ ավելի մեծ խնդիր, քան կարելի է պատկերացնել: Գլխավոր նպատակը զուտ բնակավայրերը չեն, Ադրբեջանի նպատակն է այնպիսի վերահսկողություն հաստատել Հայաստանի կրիտիկական օբյեկտների, կոմունիկացիաների նկատմամբ, որը պարզապես Հայաստանին զրկելու է իր կենսունակությունից, այսինքն` պայքարի, բնականոն զարգացման իր հնարավորությունից. անդրադառնալով սեպտեմբերյան վերջին ագրեսիայից հետո Ադրբեջանի գործողություններին` հոկտեմբերի 27-ի խորհրդարանական ճեպազրույցների ժամանակ նշել է «Պատիվ ունեմ» խմբակցության պատգամավոր Տիգրան Աբրահամյանը: Այս մասին տեղեկացնում է ԱԺ հասարակայնության հետ կապերի և հաղորդակցության վարչությունը։ Անդրադառնալով խաղաղության պայմանագրի վերաբերյալ քննարկումներին` պատգամավորը կարծիք է հայտնել, թե Ադրբեջանն արդեն իսկ իր համար դելիմիտացիայի եւ դեմարկացիայի գործընթացը, ըստ էության, ամբողջությամբ ավարտել է, եւ նա այլեւս դելիմիտացիայի եւ դեմարկացիայի գնալու նպատակ չունի: Ըստ Տիգրան Աբրահամյանի` Ադրբեջանը բռնազավթել եւ տեղակայվել է Հայաստանի այնպիսի հատվածներում եւ դիրքերում, որի պայմաններում իր հիմնական խնդիրը մի քանի տասնամյակների կտրվածքով լուծել է: Լրագրողը հետաքրքրվել է սեպտեմբերի 13-ի ադրբեջանական ագրեսիայից հետո սահմանում տիրող իրավիճակով, ինչպես նաեւ հարցրել, թե արդյո՞ք կա լայնածավալ ռազմական գործողություններ վերսկսելու սպառնալիք` հաշվի առնելով, որ այնտեղ դիտորդներ են տեղակայված: Տիգրան Աբրահամյանը նշել է, որ սահմանագծում էսկալացիայի կանխման առումով այս պահին ինքը լավատես չէ, լավատեսություն չի ներշնչում նաեւ դիտորդների առկայությունը` հաշվի առնելով մի շարք հանգամանքներ: Մեկ այլ հարցի պատասխանելով` պատգամավորն ասել է. «Քաղաքական հարթությունում եւ դիվանագիտական ճակատում գործընթացներն այնպիսի փխրուն հունով են ընթանում, որ որեւէ պարագայում, նույնիսկ` կարճաժամկետ կտրվածքով, լայնամասշտաբ ռազմական գործողություններ բացառելն ուղղակի հնարավոր չէ»:

14:58 - 27 հոկտեմբերի, 2022

Հայաստանն Արցախին կապող միջանցքում ադրբեջանական անցակետ–հսկողության սահմանումը կբերի Արցախի հայաթափմանը․ Տիգրան Աբրահամյան

Հայաստանի դեմ տեղի ունեցած սեպտեմբերյան հարձակումից հետո, Ադրբեջանը որպես նախապայման կրկին ակտիվացրել է, այսպես կոչված, «Զանգեզուրի միջանցքի» թեման։ Ընդ որում՝ նաև Թուրքիայի ԱԳ նախարարի շուրթերով հայտարարում, թե «Լաչինի և Զանգեզուրի միջանցքները պետք է ունենան նույն կարգավիճակը։ Այս մասին գրառում է արել «Պատիվ ունեմ» խմբակցության քարտուղար Տիգրան Աբրահամյանը․«Ավելի վաղ սրա մասին հայտարարում էր Ադրբեջանի նախագահը, բայց այս փուլում այն, կարծես, առավել սուր է դրված։ Ի՞նչ է սա նշանակում։ Խնդիրը հետևյալն է, Ադրբեջանն ու Թուրքիան սպառնում են ադրբեջանական անցակետ և հսկողություն սահմանել Հայաստանն Արցախին կապող «Լաչինի միջանցքում»։ Ճիշտ է՝ այն 2020 թվականի նոյեմբերի 9-ի եռակողմ հայտարարության համաձայն, գտնվում է ռուս խաղաղապահների հսկողության ներքո և չի նախատեսում ադրբեջանական անցակետերի տեղակայում, սակայն հաշվի առնելով այն հանգամանքը, որ այդ հայտարարությունն Ադրբեջանն ըստ սեփական պատկերացումների է կիրառում, ապա այս դեպքում խնդիրն ավելի է բարդանում։Ի՞նչ հետևանքներ կունենա Հայաստանն Արցախին կապող միջանցքում ադրբեջանական անցակետ/հսկողության սահմանումը։ Անցակետի հնարավոր տեղակայումը միանշանակ կբերի Արցախի հայաթափմանը, որովհետև շատերի համար՝ Արցախում և Հայաստանում, այդ հատվածով անցնելը լուրջ անվտանգային սպառնալիք կդառնա։ Դեռ չեմ խոսում այն մասին, որ այդ ճանապարհի նկատմամբ ադրբեջանական հսկողությունը կբերի ցանկացած իրավիճակում ճանապարհի փակման վտանգ։ Կարծում եմ՝ Ադրբեջանը ՀՀ իշխանությանը ոչ թե ընտրության առաջ է կանգնեցրել՝ ՀՀ-ի տարածքով միջանցքի գոյության վերաբերյալ համաձայնություն կամ ՀՀ-ն Արցախի հետ կապող ճանապարհին անցակետի տեղակայում, այլ իրականում առաջնորդվում է և՛–և՛ սկզբունքով՝ ուղղակի ժամանակի հարց է։ Ո՞վ լիներ, որ չօգտվեր ՀՀ-ում հաստատված ռեժիմի գոյությունից և չփորձեր ստանալ առավելագույնը»։

12:44 - 18 հոկտեմբերի, 2022

Տպավորությունս այն է, որ Ադրբեջանն ու Թուրքիան իրենց պահանջների վերաբերյալ որոշակի երաշխիքներ են ստացել․ Տիգրան Աբրահամյան

Տպավորությունս ավելի շատ այն է, որ Ադրբեջանն ու Թուրքիան իրենց պահանջների վերաբերյալ որոշակի երաշխիքներ են ստացել և սպասում են դրանց արագ կյանքի կոչմանը, հակառակ դեպքում կրկին կհայտարարվի, որ Հայաստանը սահմանին «սադրանքներ է հրահրում» և նորից կմտնենք մարտական գործողությունների ակտիվ փուլ։ Այս մասին իր ֆեյսբուքյան էջում գրել է ԱԺ «Պատիվ ունեմ» խմբակցության պատգամավոր Տիգրան Աբրահամյան: «Հետաքրքիր զուգադիպությամբ Ալիևն ու Էրդողանը, մեկ օրվա տարբերությամբ, խոսում են Հայաստանի ուղղությամբ տեղի ունեցած ագրեսիայի ավարտի մասին։ Իհարկե այդ հայտարարություններից հետո Ադրբեջանը չի շտապում հետ քաշել իր ռեզերվային ուժերը կամ ռեժիմի փոփոխություն անել մարտական բարձր պատրաստականության բերված զինված ուժերի հարցում։ Ավարտվել է՞ պատերազմի այս փուլը՝ շատ դժվար է միանշանակ գնահատել։ Տպավորությունս ավելի շատ այն է, որ Ադրբեջանն ու Թուրքիան իրենց պահանջների վերաբերյալ որոշակի երաշխիքներ են ստացել և սպասում են դրանց արագ կյանքի կոչմանը, հակառակ դեպքում կրկին կհայտարարվի, որ Հայաստանը սահմանին «սադրանքներ է հրահրում» և նորից կմտնենք մարտական գործողությունների ակտիվ փուլ։ Ամեն դեպքում «խաղաղասիրական» հայտարարություններ հնչեցնելով Ադրբեջանն ու Թուրքիան նվազագույնը 2 խնդիր են լուծում՝ առաջինը, միջազգային հանրությանը ցույց տալիս, թե շահագրգիռ չեն պատերազմական գործողությունների վերսկսման համար, երկրորդ, «փափուկ բարձ» դնում Հայաստանի գլխի տակ՝ նոր հարվածի անսպասելիությունը ապահովելու համար»,- գրել է նա։

12:42 - 18 սեպտեմբերի, 2022