Ֆրանսիական համալսարանի ուսանողներն այսօր դասադուլ են իրականացրել։ Նրանք իրենց համալսարանից երթով շարժվել են դեպի Եվրոպական, Ամերիկյան ու Հայ-ռուսական (Սլավոնական) համալսարաններ, որտեղ նրանց են միացել այդ համալսարաններից ուսանողներ։ 

Ցուցարարը, սակայն, չեն կարողացել մուտք գործել Հայ-ռուսական համալսարանի բակ․ վերջինիս ղեկավարությունը փակել է մուտքի գլխավոր դարպասները։ Դարպասներից դուրս նրանք շարունակել են իրենց ակցիան՝ «Ուսանո՛ղ, միացի՛ր», «Արցախ» վանկարկումներով։

Այնուհանդերձ, ավելի ուշ ՀՌՀ–ի մի շարք ուսանողներ եւս միացել են ցուցարարներին։

Նշենք, որ դեպքի վերաբերյալ հաղորդագրություն է տարածել նաեւ ՀՌՀ-ի մամուլի բաժինը՝ նշելով, որ համալսարանում ուսումնական գործընթացը շարունակվում է բնականոն աշխատանքային ռեժիմով․ «Հայ-ռուսական համալսարանում մտահոգված են այն ամենով, ինչ կատարվում է այս օրերին Արցախում և Հայաստանում, ողջ հայ ժողովրդի հետ կիսում ենք մեր հայրենակիցների վիշտն ու ցավը։ Սակայն որևէ նպատակաուղղված գործողություններ, միտված ուսանողների և բուհի անձնակազմի մասնակցությանը քաղաքացիական անհնազանդության ակցիաներին կամ մասնակցության արգելքին, ՀՌՀ-ում չեն իրականացվում: Ուսումնական գործընթացում էական շեղումներ չեն արձանագրվել, դասերը անցկացվել սովորական կարգով»,- ասվում է համալսարանի մամուլի ծառայության հաղորդագրության մեջ:

Շարունակելով ակցիան՝ ուսանողները տարբեր խմբերով նստացույց են արել Տիգրան Մեծ փողոցում, մի պահ փակել են Ֆրանսիայի հրապարակը։ 

Այժմ մի մասն Ամիրյան փողոցում է, այնտեղ աղբամաններով փակում են փողոցը։