1lurer.am: ԱՄՆ պետքարտուղարության խոսնակ Մեթյու Միլլերը ճեպազրույցի ժամանակ անդրադարձել է USAID-ի տնօրեն Սամանտա Փաուերի հայտարարությանը՝ Աղետներին աջակցության արձագանքման թիմ տեղակայելու վերաբերյալ։ Միլլերի խոսքով այդ թիմը կգնահատի իրավիճակը և կբացահայտի առաջնահերթ կարիքները՝ ընդլայնելու օգնությունը և համագործակցելու գործընկերների հետ՝ շտապ անհրաժեշտ օգնություն տրամադրելու համար:

Նա հրաժարվել է պատասխանել ԼՂՀ լուծարման շուրջ ԱՄՆ դիրքորոշման վերաբերյալ հարցին.

«Ընդհանուր առմամբ, մենք կարևորում ենք հրադադարի պահպանումը, մարդասիրական կարիքների բավարարումը, անկախ միջազգային առաքելության վաղաժամ ստեղծումը, ինչը թափանցիկություն և վստահություն կհաղորդի Լեռնային Ղարաբաղի բնակիչներին։ Սա մեզ համար առաջնահերթություն է ստեղծված իրավիճակի ուղղությամբ աշխատելու համար»։

Նա նաև նշել է, որ ԱՄՆ կառավարությունը բավական լուրջ է վերաբերվում ԼՂ-ում տիրող իրավիճակի շուրջ միջազգային առաքելությանը.

«Մենք կարծում ենք, որ միջազգային առաքելությունը կարևոր է, քանի որ այն առնչվում է հումանիտար օգնության, տարածաշրջանում մարդասիրական կարիքների վերաբերյալ մնացած բոլոր հարցերին: Մենք այնքան լուրջ ենք վերաբերվում միջազգային առաքելությանը, որ պետքարտուղարը բարձրացրել է այս հարցն Ադրբեջանի նախագահի հետ զրույցի շրջանակներում, ճնշում է նրան՝ աջակցելու միջազգային առաքելությանը: Դուք երևի տեսել եք, որ երեկ Ադրբեջանի կառավարությունը ասաց, որ իրենք իսկապես աջակցում են միջազգային առաքելությանը, և իրականում իրենց հայտարարության մեջ ասվում է, որ դրա աջակցության պատճառներից մեկն այն է, որ իրենց դրդել են աջակցել ԱՄՆ-ի կողմից։ Այսպիսով, մենք աշխատում ենք մեր դաշնակիցների և գործընկերների հետ` գտնելու դրա իրականացման լավագույն մեխանիզմը: Բայց մենք կարծում ենք, որ կարևոր է ապահովել թափանցիկություն և հավաստիացնել, որ մարդասիրական կարիքները լուծվում են տեղում»:

Պատասխանելով, հարցին՝ որ երկրների հետ է աշխատելու ԱՄՆ-ն առաքելության ստեղծման համար, նա նշել է.

«Թե ինչ հովանու ներքո է այդ առաքելությունը մեկնարկելու, ովքեր են մասնակցելու, ինչպիսին է լինելու, այդ բոլորը քննարկման փուլում են։ Այսպիսով, ես չեմ ուզում որևէ տեսակի հայտարարություն անել նախքան մանրամասները պարզելը: Բայց դա մի հարց է, որի վրա մենք աշխատում ենք»։

Անդրադառնալով Ադրբեջանի ԱԳՆ հայտարարությունը, որում Արցախի հայերին կոչ է արվում մնալու և դառնալու Ադրբեջանի հասարակության մի մաս՝ Միլլերը նշել է, որ ԱՄՆ-ն շարունակում է մտահոգված մնալ Լեռնային Ղարաբաղում հումանիտար իրավիճակով:

«Մենք կարծում ենք, որ կարևոր է, որ Լեռնային Ղարաբաղի բնակիչները կարողանան որոշում կայացնելու հեռանալ, եթե ցանկանում են, և կարողանան վերադառնալ, եթե ցանկանում են։ Սա որոշում է, որը նրանք պետք է կայացնեն որպես անհատներ, բայց մենք կարծում ենք, որ նրանք պետք է կարողանան այդ որոշումը կայացնել իրենք իրենց համար։ Եվ մենք մտածում ենք, որ այնտեղ պետք է անարգել մարդասիրական հասանելիություն լինի, որ բնակչությունը, որը կարիքի մեջ է, վստահ լինի, որ իր կարիքները կարող են բավարարվել»,- ասել է նա։

Դարձյալ վերադառնալով միջազգային առաքելությանը՝ Միլլերը նշել է՝ լավագույն ազդեցության համար կարևոր է, որ միջազգային առաքելությունը հիմնվի՝ ապահովելու մարդասիրական կարիքների բավարարումը։