azatutyun.am: Եվրոպական որոշ երկրներ 2020 և 2023 թվականների իրադարձություններից հետո սկսեցին անհիմն հարձակվել Ադրբեջանի վրա, Եվրամիության անդամ առնվազն երեք պետություններ Ադրբեջանին «սառը պատերազմ» հայտարարեցին: Այդ մասին ասել է Ադրբեջանի նախագահ Իլհամ Ալիևը:

Նա այդ հայտարարությամբ հանդես է եկել երեկ Բաքվում՝ ընդունելով Թյուրքալեզու պետությունների խորհրդարանական վերհաժողովի գլխավոր քարտուղար Մեհմեթ Սուրեյա Էրիին և Ղազախստանի, Ղրղըզստանի, Ուզբեկստանի և Հունգարիայի բարձրաստիճան ներկայացուցիչներին:

«Եվրամիության հետ մեր հարաբերությունները կարելի է դրական բնութագրել, սակայն Ղարաբաղյան Երկրորդ պատերազմից և հատկապես անցյալ տարվա հակաահաբեկչական գործողությունից հետո որոշ եվրոպական երկրներ սկսեցին անհիմն և անբարեխիղճ հարձակումներ, փորձեցին նսեմացնել մեզ»,- ասել է Ալիևը:

Նրա պնդմամբ, ԵՄ երկրների նման գործողությունների հիմքում ոչ թե միջազգային իրավունքի կանոններն են, այլ «հիվանդագին անձնական հավակնությունները»:

«Ցավոք, որոշ երկրներ, որոնք ձգտում են առանձնահատուկ տեղ զբաղեցնել
Եվրոպայում, նույնիսկ կարողացան հակաադրբեջանական խումբ կազմել: Այսօր Եվրոպական միության անդամ առնվազն երեք երկրներ «սառը պատերազմ» են հայտարարել Ադրբեջանին։ Նրանք հայտնի են»,- ասել է Ալիևը՝ չնշելով որևէ պետության անուն: