Երևանի ավագանին այսօր՝ դեկտեմբերի 24-ին, գումարել է այս տարվա վերջին նիստը: Օրակարգում ընդգրկված է 23 հարց, որից զեկուցվող են 6-ը:

Չզեկուցվող հարցերի շարքում է Երևանի զարգացման 2025 թվականի ծրագիրը հաստատելու մասին հարցը, իսկ զեկուցվողների շարքում են հետևյալ հարցերը.

• Երևանում  տեղական տուրքերի 2025 թվականի դրույքաչափերը սահմանելու մասին,
• Երևանում տեղական վճարների 2025 թվականի դրույքաչափերը սահմանելու մասին,
• Երևանում 2025 թվականի տեղական տուրքերի գծով արտոնություններ սահմանելու մասին,
• Երևանում 2025 թվականի տեղական վճարների գծով արտոնություններ սահմանելու մասին,
• Երևան քաղաքի 2025 թվականի բյուջեն հաստատելու մասին,
• Երևան քաղաքի ավագանու 2011 թվականի մարտի 15-ի N 194-Ն որոշման մեջ լրացումներ և փոփոխություններ կատարելու մասին:

Նիստի սկզբին «Մայր Հայաստան» և «Ազգային առաջընթաց» խմբակցությունների ղեկավարները առաջարկեցին զեկուցվող դարձնել օրակարգի բոլոր հարցերը, իսկ եթե դա ընդունելի չէ, ապա միայն Երևանի զարգացման 2025 թվականի ծրագիրը հաստատելու մասին հարցը ու ևս մեկ հարց։

Երևանի քաղաքապետ Տիգրան Ավինյանը, որը վարում էր նիստը, ասաց, որ Երևանի զարգացման 2025թ․ ծրագիրը և բյուջեն հետագայում մեկ նախագիծ են դառնալու, և բյուջեի քննարկման ժամանակ քննարկելու են նաև զարգացման ծրագիրը․ «Մենք անցնում ենք ծրագրային բյուջետավորման»։

Ընդդիմադիր խմբակցությունների առաջարկները քվեարկությամբ չընդունվեցին։