Ատոմային էներգիայի միջազգային գործակալությունը (ՄԱԳԱՏԷ) պետք է հստակ դիրքորոշում ընդունի Իրանի քաղաքացիական միջուկային օբյեկտների դեմ ուղղված սպառնալիքների վերաբերյալ, ասել է Իրանի արտգործնախարար Աբբաս Արաղչին՝ ԱՄՆ նախագահ Դոնալդ Թրամփի՝ Իրանը «ռմբակոծելու» սպառնալիքից օրեր անց։ Այս մասին Արաղչին ՄԱԳԱՏԷ-ի գլխավոր քարտուղար Ռաֆայել Գրոսիին ասել է հեռախոսազրույցի ժամանակ, հայտնում է IRNA-ն։

Արաղչին ներկայացրել է Թեհրանի երկարամյա դիրքորոշումը, որը հիմնված է Իրանի հեղափոխության առաջնորդ Այաթոլլահ Խամենեիի կրոնական հրամանագրի (ֆեթվայի) վրա. այն արգելում է միջուկային զենքի մշակումը, տիրապետումը և օգտագործումը՝ վերահաստատելով, որ երկիրը ոչ մի դեպքում երբեք չի արտադրի կամ ձեռք բերի ատոմային ռումբ։

Արաղչին ընդգծել է, որ հաշվի առնելով նման սպառնալիքների կրկնությունը՝ Իսլամական Հանրապետությունը կձեռնարկի բոլոր անհրաժեշտ միջոցները՝ պաշտպանելու իր միջուկային ծրագիրը։

Գրոսսին, իր հերթին, ասել է, որ կխոսի մյուս կողմերի հետ՝ ստեղծված խնդիրների լուծման համար հարմար մթնոլորտ ստեղծելու համար: Նա նաև դիմել է ԱԳ նախարարին՝ Իրան այցելելու հարցով։ Արաղչին ընդունել է առաջարկը։

ԱՄՆ նախագահ Դոնալդ Թրամփը մարտի 30-ին հայտարարել է, որ կհրամայի ռազմական հարվածներ հասցնել Իրանին, եթե Թեհրանը Վաշինգտոնի հետ նոր համաձայնագիր չկնքի իր միջուկային ծրագրի շուրջ։ «Եթե նրանք գործարքի չգնան, ռմբակոծություններ կլինեն», – NBC News-ին տված հարցազրույցում ասել է Թրամփը։

Իրանը խոստացել է արագ և վճռական արձագանքել իր տարածքի դեմ ագրեսիայի դեպքում։

Թրամփը մարտի 12-ին Արաբական Միացյալ Էմիրությունների նախագահի դիվանագիտական խորհրդատուի միջոցով նամակ էր հղել Իրանին՝ նոր միջուկային գործարքի առաջարկով։

Պատասխան նամակում Իրանը ներկայացրել էր իր քաղաքական դիրքորոշումը՝ չի բանակցի ԱՄՆ հետ առավելագույն ճնշման և ռազմական սպառնալիքների ներքո։

2015-ին Իրանն ու միջազգային վեցնյակը (5+1)՝ Ռուսաստանը, ԱՄՆ-ն, Մեծ Բրիտանիան, Չինաստանը, Ֆրանսիան ու Գերմանիան համաձայնության էին եկել Իրանի միջուկային ծրագրի շուրջ՝ կնքելով միջուկային համաձայնագիրը:

ԱՄՆ-ն իրանական միջուկային ծրագրի համաձայնագրից դուրս է եկել 2018-ին: