Ադրբեջանական «Ազերիգազ» ընկերությունը հաղորդագրություն է տարածել՝ նշելով, թե իբր ադրբեջանական կողմը կապ չունի Արցախում գազամատակարարման դադարեցման հետ։ 

«Անկասկած, դա միտված է միջազգային հանրությանը մոլորության մեջ գցելուն եւ միջազգային հանրային կարծիքը սխալ հուն մղելուն»,- ասված է հաղորդագրության մեջ։  

Ընկերությունից նշել են, թե Արցախի Հանրապետության տարածքում գազամատակարարումը իրականացվում է Հայաստանի կողմից և այն ինտեգրված չէ Ադրբեջանի գազամատակարարման համակարգում։

«Առաջիկա օրերին Ադրբեջանի կողմից վերահսկվող տարածքներով անցնող հատվածում կիրականացվի տեխնիկական ստուգում։ Ինչպես հայտնի է, ներկայում ցուրտ եղանակային պայմաններով պայմանավորված՝ Ադրբեջանի այլ լեռնային եւ նախալեռնային շրջաններում տեղի են ունենում գազատարի աշխատանքի խափանումներ։ Ընդհանուր առմամբ, տեխնիկական ստուգման անցկացումը դիտարկվում է որպես քայլերից մեկը, որը նախատեսված է կայուն եւ անվտանգ գազամատակարարման ապահովման համար»,- նշված է հաղորդագրության մեջ։ 

Իսկ երեկ հայտնի դարձավ, որ ադրբեջանցիների կողմից խափանվել է Արցախը սնուցող գազատարի աշխատանքը: