Ուկրաինա

Բայդենը հանձնարարել է Պենտագոնին արագացնել զենքի մատակարարումն Ուկրաինային |azatutyun.am|

10:48 - 26 դեկտեմբերի, 2024

Զելենսկին սուր քննադատել է Ֆիցոյի այցը Մոսկվա |azatutyun.am|

azatutyun.am: Ուկրաինայի նախագահ Վլադիմիր Զելենսկին սուր քննադատել է Սլովակիայի վարչապետ Ռոբերտ Ֆիցոյի այցը Մոսկվա և հանդիպումը Ռուսաստանի նախագահ Վլադիմիր Պուտինի հետ։ Ըստ Զելենսկու՝ Ֆիցոյի այցով պետք է հետաքրքրված լինեն, մասնավորապես, «Սլովակիայի իրավապահ մարմիններն ու հետախուզական ծառայությունները»։ «Ինչո՞ւ է այս ղեկավարն այդքան կախված Մոսկվայից, ինչպե՞ս են նրան վճարում, և ինչպե՞ս է նա փոխհատուցում»,- հարց է հնչեցրել Զելենսկին՝ նշելով, որ Ֆիցոյի գործողությունները կարող են վտանգել ոչ միայն Սլովակիայի, այլև ողջ Եվրոպայի անվտանգությունը։ Զելենսկին Х սոցցանցում էլ գրել է, որ փոխհատուցում են առաջարկել հենց սլովակների համար և այլընտրանք՝ ցանկացած այլ գազ՝ ռուսականից բացի․ «Մենք պատրաստ էին անել դա։ Ֆիցոն չցանկացավ փոխհատուցում սլովակների համար։ Եվ չի ցանկանում համագործակցել Եվրահանձնաժողովի հետ։ Նա ինչ-որ պատճառով Մոսկվան համարում է ավելի շահեկան»։ Նա Ֆիցոյին մեղադրել է ՌԴ նախագահ Վլադիմիր Պուտինի հետ ստվերային պայմանավորվածություններ ունենալու և «փողի համար պայքարելու» մեջ՝ միաժամանակ անձնական շահեր հետապնդելով։ «Սա կա՛մ պետական շահերով առևտուր է, կա՛մ սեփական գրպանի համար աշխատանք»,- նշել է Զելենսկին։ Ֆիցոն Մոսկվա էր այցելել կիրակի օրը՝ դեկտեմբերի 22-ին՝ նշելով, որ աշխատանքային այցը Մոսկվա արձագանքն է Զելենսկուն, որը հայտարարել է, թե մտադիր է հունվարի 1-ից դադարեցնել Ուկրաինայի տարածքով ռուսական գազի տարանցումը Սլովակիա։

10:35 - 24 դեկտեմբերի, 2024

Ֆիցոն հայտնել է Պուտինի հետ հանդիպման որոշ մանրամասներ |armenpress.am|

armenpress.am Սլովակիայի վարչապետ Ռոբերտ Ֆիցոն հայտարարել է, որ դեկտեմբերի 22-ին Մոսկվա էր մեկնել Ուկրաինայի նախագահ Վլադիմիր Զելենսկիի կողմից ռուսական գազի տարանցումն արգելելու որոշման ֆոնին: Ֆիցոն ընդգծել է, որ իր այցի մասին Եվրամիության պաշտոնյաները տեղեկացվել են դեռ դեկտեմբերի 20-ին։ «Իմ այսօրվա (խմբ.՝ դեկտեմբերի 22-ի) հանդիպումը պատասխան էր Ուկրաինայի նախագահ Վ. Զելենսկիին, որը հինգշաբթի (խմբ.՝ դեկտեմբերի 19-ին), պատասխանելով իմ անձնական հարցին, ասաց, որ դեմ է Ուկրաինայի տարածքով մեր տարածք գազի ցանկացած տարանցմանը։ Ուկրաինայի նախագահը նաև կողմ է ռուսական միջուկային ծրագրի դեմ պատժամիջոցներին։ Նման վերաբերմունքով Սլովակիան ֆինանսական վնասներ է կրում, և վտանգվում է էլեկտրաէներգիայի արտադրությունը Սլովակիայի ատոմակայաններում, ինչն անընդունելի է։ Ռուսաստանի նախագահը հաստատել է ՌԴ պատրաստակամությունը՝ գազ մատակարարելու Արևմուտքին և Սլովակիային»,- գրել է Ֆիցոն Facebook-ի իր էջում։ Կիևում հայտարարել են, որ 2025 թ. հունվարի 1-ից դադարեցնելու են Ուկրաինայի տարածքով ռուսական գազի տարանցումը, քանի որ ավարտվում է համապատասխան պայմանագրի գործողության ժամկետը։ Սլովակիայի վարչապետը նաև նշել է, որ ՌԴ նախագահ Վլադիմիր Պուտինի հետ քննարկել է երկու երկրների հարաբերությունները, ինչպես նաև ռուս-ուկրաինական հակամարտության խաղաղ կարգավորման հնարավորությունները։ «Երկարատև զրույցի ընթացքում ես և Վ. Պուտինը կարծիքներ ենք փոխանակել Ուկրաինայում պատերազմական իրադրության, պատերազմի շուտափույթ խաղաղ ավարտի հնարավորության, Սլովակիայի Հանրապետության և Ռուսաստանի Դաշնության փոխհարաբերությունների վերաբերյալ, որոնք ես մտադիր եմ ստանդարտացնել»,- Ֆիցոն գրել է սոցիալական ցանցի իր էջում: Նրա կարծիքով, դրանում կօգնեն Երկրորդ համաշխարհային պատերազմի ավարտի 80-ամյակի և ֆաշիզմի դեմ տարած հաղթանակի հետ կապված միջոցառումները, որոնցում «վճռորոշ դեր են խաղացել ռուսները, բելառուսները, ուկրաինացիները և նախկին ԽՍՀՄ-ի մյուս ժողովուրդները»։

11:14 - 23 դեկտեմբերի, 2024

Ուկրաինայի նախագահն աշխատանքից ազատել է մի շարք դեսպանների և ՄԱԿ-ում մշտական ներկայացուցչին |armenpress.am|

armenpress.am: Վլադիմիր Զելենսկին ստորագրել է ավելի վաղ հայտարարված հրամանագրեր Ուկրաինայի դիվանագիտական կորպուսում վերադասավորումների մասին։ Այս մասին նշված է Ուկրաինայի նախագահի պաշտոնական կայքում հրապարակված փաստաթղթերում։ Նշվում է, որ Վոլոդիմիր Զելենսկին աշխատանքից ազատել է ՄԱԿ-ում Ուկրաինայի մշտական ներկայացուցիչ Սերգեյ Կիսլիցային, Ճապոնիայում Ուկրաինայի դեսպան Սերգեյ Կորսունսկին և Չինաստանում դեսպան Պավել Ռյաբիկինին, ինչպես նաև պաշտպանության նախկին նախարար (2020 թվականի մարտից մինչև 2021 թվականի նոյեմբեր) Անդրեյ Տարանին, որը Սլովենիայում դեսպան էր 2022 թվականի մայիսից։ Ուկրաինայի նախագահի հրամանով՝ նոր դեսպաններ են նշանակվել Սլովենիայում, փոխարինվել են Ռուանդայում և Լիտվայում դիվանագիտական առաքելությունների ղեկավարները, նոր դեսպաններ են նշանակվել Հունգարիայում, Կոնգոյում և Ֆիլիպիններում, պաշտոնանկ են արվել դեսպանին Ինդոնեզիայում։

15:26 - 21 դեկտեմբերի, 2024

Ուկրաինայի տարածքով ռուսական գազի տարանցումը կդադարեցվի 2025 թվականի հունվարի 1-ից |armenpress.am|

armenpress.am: Ուկրաինայի տարածքով ռուսական գազի տարանցումը կդադարեցվի 2025 թվականի հունվարի 1-ի առավոտյան ՝ համապատասխան պայմանագրի գործողության ավարտի կապակցությամբ: Այս մասին հայտարարել է Ուկրաինայի վարչապետ Դենիս Շմիգալը՝ ելույթ ունենալով Գերագույն ռադայում։ Ուկրաինական «Նեվթոգազ»-ի և ռուսական «Գազպրոմ»-ի միջև տարանցիկ համաձայնագիրը ստորագրվել է 2019 թվականի վերջին ՝ հինգ տարի ժամկետով։ Ուկրաինայի տարածքով Ռուսաստանից գազը մատակարարվում է եվրոպական երկրներ։ «Այսօրվա դրությամբ մենք հասկանում ենք, որ գազի տարանցման մասին համաձայնագիրն ավարտվում է 2025 թվականի հունվարի 1-ին։ Առավոտյան ժամը 7-ին տարանցումը ֆիզիկապես կփակվի ՝ կապված այդ համաձայնագրի ավարտի հետ»,- ասել է Շմիգալը։

22:24 - 20 դեկտեմբերի, 2024

Կալասը տեղեկացրել է, որ ռուսական հարվածների հետևանքով վնասվել է Կիևում Պորտուգալիայի դեսպանությունը |1lurer.am|

1lurer.am: Եվրոպական դիվանագիտության ղեկավար Կայա Կալասը տեղեկացրել է, որ ռուսական հրթիռային հարվածների հետևանքով վնասվել է Կիևում Պորտուգալիայի դեսպանությունը։ «Ոչ մի դիվանագիտական ներկայացուցչություն երբեք չպետք է դառնա թիրախ կամ նույնիսկ ենթարկվի ազդեցության: Սա Ռուսաստանի հերթական բարբարոսական հարձակումն է քաղաքացիական օբյեկտների վրա, որը ցույց է տալիս խաղաղության ձգտման բացակայությունը։ Ես լիակատար համերաշխությունն եմ հայտնում դիվանագիտական անձնակազմին»,- նշել է Կալասը: Եվրահանձնաժողովի ղեկավար Ուրսուլա ֆոն դեր Լայենն էլ նշել է, որ Ռուսաստանի կողմից միջազգային իրավունքի անտեսումը «նոր բարձունքներ է նվաճում»։ Ուկրաինայի ԱԳՆ խոսնակն էլ հայտնել է, որ ռուսական հրթիռակոծության հետևանքով Կիևում վնասվել են նաև Ալբանիայի, Արգենտինայի, Պաղեստինի, Հյուսիսային Մակեդոնիայի և Չեռնոգորիայի դեսպանությունները:

19:52 - 20 դեկտեմբերի, 2024

Մոսկվան «պատրաստ է և՛ բանակցությունների, և՛ փոխզիջումների», նույնն ակնկալում է Կիևից |azatutyun.am|

azatutyun.am: Ռուսաստանը պատրաստ է և՛ բանակցությունների, և՛ Ուկրաինայում կարգավորման հարցում փոխզիջումների, բայց նույն պատրաստակամությունը պետք է ունենա նաև մյուս կողմը, հայտարարել է Ռուսաստանի նախագահ Վլադիմիր Պուտինը։ Ռուսաստանի նախագահը նշել է, որ Ուկրաինային հետ բանակցությունների համար Ռուսաստանը նախապայմաններ չի դնում։ Բայց միևնույն ժամանակ Պուտինը հայտարարել է, որ խաղաղության համաձայնագիր կստորագրեն միայն Ուկրաինայի լեգիտիմ իշխանությունների հետ՝ Ուկրաինայում նախագահական ընտրություններից հետո։ Ինչ վերաբերում է Ուկրաինայում Ռուսաստանի զինված ուժերի թիրախներին, ապա, ըստ Պուտինի, առաջնահերթ թիրախներն են ռազմական և ռազմարդյունաբերական օբյեկտները, սակայն, չեն բացառվում հարվածները նաև «որոշումներ կայացնող կենտրոններին։

18:45 - 19 դեկտեմբերի, 2024

Պուտինն առաջարկում է հրթիռային «մենամարտ» անցկացնել ԱՄՆ-ի հետ |azatutyun.am|

azatutyun.am: Ռուսաստանը պատրաստ է «Օրեշնիկ» գերձայնային բալիստիկ հրթիռով Կիևին հարվածելուն, այսօր հայտարարեց Ռուսաստանի նախագահn ամենամյա «Ուղիղ միացում Վլադիմիր Պուտինի հետ» հեռուստահաղորդմանը, որի ժամանակ ավելի քան 2 մլն հարց է ստացվել: Վլադիմիր Պուտինը վստահեցրեց, որ «Օրեշնիկ»-ը նոր զենք է և հնարավոր չէ խոցել, ապա առաջարկեց հրթիռային «մենամարտ» անցկացնել Միացյալ Նահանգների հետ, ինչը ցույց կտա, թե ինչպես այն կարող է շրջանցել ԱՄՆ-ի հակահրթիռային պաշտպանության ցանկացած համակարգ: «Եթե արևմտյան փորձագետները կարծում են, որ «Օրեշնիկ»-ը կարող է խոցվել, ապա թող մեզ և նրանց, ովքեր Արևմուտքում իրենց վճարում են, առաջարկեն 21-րդ դարի բարձր տեխնոլոգիական մենամարտ անցկացնել, թող բացահայտեն թիրախները Կիևում, կենտրոնացնեն հակաօդային պաշտպանությունը և հրթիռները, այնտեղ պաշտպանական համակարգերը, և մենք կհարվածենք», - ասել է Ռուսաստանի նախագահը: Պուտինը պնդեց, որ ռուսական զորքը ճակատի ողջ երկայնքով ամեն օր առաջ է գնում, ընդորում՝ կիլոմետրերով: «Խոսքը հարյուր, երկու հարյուր կամ երեք հարյուր մետրերով առաջխաղացման մասին չէ: Մեր մարտիկները վերցնում են, վերադարձնում են տարածքը քառակուսի կիլոմետրերով: Ցանկանում եմ ընդգծել՝ ամեն օր... Մարտական գործողությունները բարդ երևույթ են, այդ իսկ պատճառով դժվար է կանխատեսում անել, և կարիք էլ չկա: Սակայն մենք շարժվում ենք դեպի սկզբնական առաջադրանքների իրագործմանը, որոնք մեր առջև դրել էինք ռազմական հատուկ գործողության ժամանակ», - ընդգծել է Վլադիմիր Պուտինը: Ռուսաստանի նախագահը խոստացավ, որ Կուրսկի շրջանից ուկրաինացիներին հեռացնելուց հետո այնտեղ ամեն ինչ վերականգնեն, թեև չասաց, թե դա երբ կարող է տեղի ունենալ։ Ըստ նրա՝ Կուրսկում ոչնչացված ուկրաինական զինտեխնիկայի թիվը գերազանցել է ամբողջ տարվա ընթացքում այլ շրջաններում ոչնչացված տեխնիկայի քանակին։ Պուտինի խոսքով՝ Կուրսկում է գտնվում ՆԱՏՕ-ի զինտեխնիկայի, ինչպես ինքը ձևակերպեց, աշխարհի ամենամեծ գերեզմանոցը։ Անդրադառնալով Սիրիայի իրադարձություններին, որոնց արդյունքում վերջ տրվեց Բաշար Ասադի տասնամյակների պաշտոնավարմանը՝ Պուտինն ասաց, որ Հալեպը պաշտպանում էր 30 հազար զինվոր, սակայն նրանք առանց կռվի հանձնվեցին, երբ քաղաք մտավ հակառակորդի ընդամենը 350 զինվոր։ Ըստ նրա՝ նույնը տեղի ունեցավ ողջ Սիրիայում։ «Իհարկե, մենք ակնկալում ենք խաղաղություն Սիրիայի Արաբական Հանրապետությունում: Մենք հարաբերություններ ենք պահպանում բոլոր խմբերի հետ, որոնք վերահսկում են այնտեղ իրավիճակը, տարածաշրջանի բոլոր երկրների հետ: Նրանց ճնշող մեծամասնությունը մեզ ասում է, որ իրենք հետաքրքրված են, որպեսզի մենք Սիրիայում պահենք մեր ռազմաբազաները, չգիտեմ, մենք պետք է մտածենք դրա մասին, քանի որ պետք է ինքներս որոշենք, թե ինչպես կզարգանան մեր հարաբերությունները այն քաղաքական ուժերի հետ, որոնք այժմ վերահսկում են իրավիճակը այդ երկրում և կվերահսկեն ապագայում», - ասել է նա։ Պուտինը նաև նշեց, որ դեռ չի հանդիպել Մոսկվայում ապաստանած Բաշար Ասադին, սակայն պլանավորում է առաջիկայում հանդիպել:

18:13 - 19 դեկտեմբերի, 2024

Զելենսկին և Մակրոնը քննարկել են Ուկրաինայում օտարերկրյա զորքերի տեղակայման հարցը |armenpress.am|

armenpress.am: Ուկրաինայի նախագահ Վոլոդիմիր Զելենսկին Ֆրանսիայի նախագահ Էմանուել Մակրոնի հետ քննարկել է Ուկրաինայում օտարերկրյա զորքերի տեղակայման՝ Փարիզի նախաձեռնությունը։ Բրյուսելում տեղի ունեցած հանդիպման մասին Զելենսկին գրել է իր Telegram ալիքում: «Շարունակեցինք աշխատել նախագահ Մակրոնի նախաձեռնության վրա՝ կապված Ուկրաինայում ուժերի առկայության հետ, որոնք կարող են նպաստել խաղաղության տանող ճանապարհի կայունացմանը: Էմանուելը տեղեկացրեց մյուս գործընկերների հետ իր փոխադարձ շփումների մասին՝ խաղաղության հասնելու համար անհրաժեշտ բոլոր քայլերն իրականացնելու համար», - գրել է Զելենսկին։ Նա արդյունավետ է անվանել առանձնազրույցը և շեշտել, որ Ուկրաինայի հակաօդային պաշտպանության (ՀՕՊ) ամրապնդումը մնում է հիմնական խնդիրը։ Զելենսկին նաև հայտնել է, որ Մակրոնի հետ պայմանավորվել է Ֆրանսիայում ուկրաինական ևս մեկ բրիգադի պատրաստման շուրջ։ «Ես շնորհակալություն հայտնեցի Ֆրանսիայի կողմից մեր բանակի համար մեկ բրիգադի պատրաստման համար, պայմանավորվեցինք շարունակել այս համագործակցությունը և պատրաստել ևս մեկ բրիգադ: Ակնկալում ենք, որ մյուս գործընկերները կմիանան այդ ջանքերին և իրենց ավանդը կներդնեն լրացուցիչ ուկրաինական բրիգադների համալրման գործում», - գրել է նա։ Ըստ Զելենսկիի գրասենյակի՝ սա նրա ութերորդ հանդիպումն է Մակրոնի հետ 2024 թվականին։

12:46 - 19 դեկտեմբերի, 2024

Ուկրաինան և Ռուսաստանը հայտնում են միմյանց նկատմամբ ԱԹՍ-ներով գրոհների մասին |armenpress.am|

armenpress.am: Ուկրաինայի պաշտպանության ուժերը խոցել են 56 անօդաչու թռչող սարք, որոնցով Ռուսաստանը դեկտեմբերի լույս 15-ի գիշերը գրոհել է Ուկրաինան: Ինչպես հաղորդում է «Ուկրինֆորմ»-ը, այս մասին հայտնում են Ուկրաինայի ԶՈՒ ռազմաօդային ուժերը: Նիկոլաևում Shahed տիպի ՌԴ անօդաչու թռչող սարքի հարձակման հետևանքով վնասվել է ենթակառուցվածքային օբյեկտ, վիրավորվել է երկու աշխատակից: Interfax-ը հայտնում է, որ ռուս զինվորականները կիրակի գիշերը ոչնչացրել և որսացել են 15 ուկրաինական ԱԹՍ, հայտնել Է ՌԴ պաշտպանության նախարարությունը: Հաղորդագրության մեջ հստակեցվում է, որ 13 ԱԹՍ չեզոքացվել է Սև ծովի ջրային տարածքում, մեկական անօդաչու թռչող սարք՝ Կուրսկի և Բելգորոդի տարածաշրջաններում:

13:17 - 15 դեկտեմբերի, 2024

Ուկրաինայի ԱԳՆ-ն ՖԻՖԱ-ից ներողություն է պահանջել առանց Ղրիմի երկրի քարտեզի համար |azatutyun.am|

azatutyun.am: Ուկրաինայի ԱԳՆ-ն և Ուկրաինայի ֆուտբոլային ասոցիացիան ՖԻՖԱ-ից պահանջել են հրապարակային ներողություն խնդրել ցուցադրված քարտեզի համար, որում Ղրիմն Ուկրաինայից անջատված է։ Դեկտեմբերի 13-ին մրցաշարի վիճակահանության եթերում ցուցադրված քարտեզում ներկայացված են այն երկրները, որոնք չեն կարող խաղալ միմյանց դեմ Ֆուտբոլի աշխարհի 2026 թվականի առաջնության ընտրական փուլում: Ուկրաինայի արտաքին գործերի նախարարության մամուլի քարտուղար Գեորգի Տիխին X սոցիալական ցանցում գրել է, որ ՖԻՖԱ-ն եթերում «վերափոխել է միջազգային սահմանները» և դրանով իսկ աջակցել «ռուսական քարոզչությանը, ռազմական հանցագործություններին և Ուկրաինայի դեմ ագրեսիայի հանցագործությանը»։ Շարունակությունը՝ սկզբնաղբյուր կայքում։

11:35 - 15 դեկտեմբերի, 2024

Ներխուժման սկզբից ի վեր ռուսական զորքերը Ուկրաինայում սպանել են 50 քահանաների և ավերել 700 եկեղեցի. Զելենսկի |news.am|

news.am: 2022 թվականի լայնածավալ ներխուժման սկզբից ի վեր ռուսական զորքերը սպանել են 50 քահանաների և ավերել մոտ 700 եկեղեցի Ուկրաինայում, CBN-ին տված հարցազրույցում ասել է նախագահ Զելենսկին։ «Ռուսները ուկրաինական տարբեր եկեղեցիներին վերաբերվում են գրեթե դպրոցի պես։ Այսինքն՝ ուր մտել են մեր տարածքներ, քանդել են դպրոցներ, եկեղեցիներ։ Միայն թե հետք չմնա։ Հետեւաբար, շատ տարբեր քահանաներ գերի են ընկել կամ սպանվել: Ի դեպ, նրանք սպանել են 50 հոգեւորականի։ Նրանք սպանել են տարբեր ձևերով»,- ասել է Ուկրաինայի նախագահը։ Զելենսկու խոսքով՝ որոշ քահանաներ խոշտանգումների են ենթարկվել։ «Կան բոլոր ապացույցները, թե ինչպես են խոշտանգել նրանց։ Ինչո՞ւ են խոշտանգել նրանց։ Միայն այն պատճառով, որ նրանք «ստիպված էին» ծառայել պատրիարք Կիրիլին և նրանց եկեղեցուն, իսկ քահանան ծառայում է մարդկանց և Աստծուն», - ասել է Զելենսկին: Նա նաեւ հավելել է, որ ներխուժման ժամանակ ռուսական զորքերը ավերել են ուկրաինական 700 եկեղեցի։

11:14 - 12 դեկտեմբերի, 2024

Թրամփը հայտարարել է, որ Զելենսկին պատրաստ է խաղաղության |armenpress.am|

armenpress.am: ԱՄՆ ընտրված նախագահ Դոնալդ Թրամփը New York Post-ին տված հարցազրույցում ասել է, որ Ուկրաինայի նախագահ Վոլոդիմիր Զելենսկին պատրաստ է խաղաղության։ Այս մասին Թրամփը հայտնել է New York Post պարբերականին՝ անդրադառնալով Փարիզի Աստվածամոր տաճարի բացման արարողության շրջանակներում տեղի ունեցած հանդիպմանը։ «Նա ցանկանում է խաղաղություն հաստատել։ Սա նոր բան է։ Նա հրադադար է ուզում։ Նա խաղաղություն է ուզում։ Մենք մանրամասները չենք քննարկել: Նա կարծում է, որ եկել է ժամանակը, և (ՌԴ նախագահ) Պուտինը նույնպես պետք է մտածի, որ ժամանակն է, որովհետև երբ կորցնում ես 700 000 մարդու, ուրեմն ժամանակն է։ Այս ամենը չի ավարտվի, մինչև խաղաղություն չլինի», - ասել է Թրամփը New York Post-ին հեռախոսով։ «Ես հայեցակարգ եմ ձևավորում, թե ինչպես վերջ տալ այդ ծիծաղելի պատերազմին», - հավելել է Թրամփը։ Թրամփն իր նախընտրական քարոզարշավի ընթացքում բազմիցս հայտարարել էր, որ իշխանության գալուց հետո 24 ժամում կդադարեցնի ռուս-ուկրաինական հակամարտությունը։ Իր հերթին «ՌԻԱ Նովոստի» գործակալությունը հիշեցնում է, որ ավելի վաղ Թրամփը հայտարարել էր, որ Վոլոդիմիր Զելենսկին «կցանկանար գործարք կնքել», և անհապաղ հրադադարի և բանակցությունների կոչ էր արել։ ՌԴ նախագահի մամուլի քարտուղար Դմիտրի Պեսկովը հայտնել է, որ Ռուսաստանը ծանոթացել է Թրամփի այս հայտարարությանը, և նշել, որ Ուկրաինան շարունակում է հրաժարվել երկխոսությունից։ Պեսկովի խոսքով՝ Զելենսկին պետք է չեղարկի բանակցություններն արգելող հրամանագիրը և հանձնարարական տա վերսկսել երկխոսությունը «ստամբուլյան պայմանավորվածությունների հիման վրա՝ հաշվի առնելով տեղում ի հայտ եկած իրողությունները»։

11:28 - 09 դեկտեմբերի, 2024

Իրանի ԱԳՆ-ն Ուկրաինային կոչ է արել դադարեցնել Սիրիայում ահաբեկչական խմբավորումներին աջակցելը |tert.am|

tert.am: Իրանի ԱԳՆ-ն Ուկրաինային կոչ է արել դադարեցնել Սիրիայում ահաբեկչական խմբավորումներին աջակցելը՝ Կիևի գործողությունները որակելով «ահաբեկչության դեմ պայքարի միջազգային պարտավորությունների ակնհայտ խախտում»։ Այս մասին, ՏԱՍՍ-ի փոխանցմամբ, ասվում է գերատեսչության հայտարարության մեջ, որը տեղադրված է Իսլամական Հանրապետության կառավարության թելեգրամյան ալիքում։ «Նախարարի օգնական և Եվրասիայի հարցերով դեպարտամենտի ղեկավար Մոջթաբա Դամիրչիլուն, մատնանշելով որոշ ուկրաինացի պաշտոնյաների կողմից զենքի ապօրինի շրջանառության մասին որոշ հաղորդումներ և այս երկրի (Ուկրաինայի) աջակցությունը Սիրիայում ահաբեկչական խմբավորումներին, այդ գործողությունները որակել է ահաբեկչության կանխարգելման և դրա դեմ պայքարի երկրների միջազգային պարտավորությունների ակնհայտ խախտում և պահանջել է անհապաղ դադարեցնել դրանք»,- նշվում է փաստաթղթում։ «Մերձավոր Արևելքի տարածաշրջանի ապակայունացմանն ուղղված Ուկրաինայի գործողությունները հակասում են միջազգային բոլոր սկզբունքներին և անբարոյական քաղաքականություն: Փորձը ցույց է տալիս, որ ահաբեկչության հետ դաշինքը միշտ սպառնում է համաշխարհային անվտանգությանը և նպաստում աշխարհում բռնության տարածմանը», - ընդգծել է Իրանի արտգործնախարարի օգնականը։ Դեկտեմբերի 4-ին ՌԴ ԱԳՆ պաշտոնական ներկայացուցիչ Մարիա Զախարովան ճեպազրույցի ժամանակ ասել է, որ Սիրիայում էսկալացիան ակնհայտորեն «ուկրաինական հետք» ունի։

15:24 - 06 դեկտեմբերի, 2024

Զելենսկին հայտարարել է «Վրաստանի ռուսամետ իշխանությունների նկատմամբ» պատժամիջոցներ սահմանելու մասին |factor.am|

factor.am: Ուկրաինայի նախագահ Վլադիմիր Զելենսկին հրամանագիր է ստորագրել «Վրաստանի ռուսամետ իշխանությունների դեմ պատժամիջոցներ սահմանելու մասին»։ Այս մասին նա հայտնել է Տելեգրամում հրապարակված ուղերձում։ «Դրանք պատժամիջոցներ են Վրաստանի իշխանության այն հատվածի դեմ, որը հիմա Վրաստանը հանձնում է Պուտինին։ Այդպես լինում է միջազգային հարաբերություններում, եթե ժամանակին չես արձագանքում կամ եթե անսկզբունքային ես արձագանքում, ապա այն, ինչ հետևում է՝ կորցված տասնամյակներ են և երկրներ՝ զրկված ազատությունից։ Չի կարելի որևէ մեկին այս տարածաշրջանում կորցնել՝ ոչ Վրաստանին, ո՛չ Մոլդովային, ո՛չ էլ Ուկրաինային»,- ասել է Զելենսկին: Պատժամիջոցների ցուցակում հայտնվել է 19 մարդ՝ Վրաստանի իշխող «Վրացական երազանք» կուսակցության հիմնադիր Բիձինա Իվանիշվիլիին, Վրաստանի վարչապետ Իրակլի Կոբախիձեն, պետական անվտանգության ծառայության պետ Գրիգոլ Լիլուաշվիլին, ներքին գործերի նախարար Վախթանգ Գոմելաուրին, Թբիլիսիի քաղաքապետ Կախա Կալաձեն, Վրաստանի խորհրդարանի մի քանի պատգամավորներ ու դատավորներ։

14:49 - 05 դեկտեմբերի, 2024

ՌԴ-ն հարվածել է Տերնոպոլին․ քաղաքի մի մասը հոսանքազրկված է |factor.am|

factor.am: Դեկտեմբերի 3-ի գիշերը ռուսական բանակը «Շահեդ»-ներով հարվածել է Տերնոպոլին։ Անօդաչուն թիրախավորել է էլեկտրամատակարարման հանգույց, քաղաքի մի մասը հոսանքազրկվել է, տեղի իշխանություններին հղումով հայտնում է Current Time-ը։ «Թշնամական ԱԹՍ-ն հարվածել է Տերնոպոլի տարածքում կրիտիկական ենթակառուցվածքի։ Քաղաքի մի մասը մնացել է առանց էլեկտրականության»,- գրել է Տերնոպոլի քաղաքապետ Սերգեյ Նադալը իր տելեգրամ ալիքում։ Նրա խոսքով՝ արտակարգ ծառայությունների աշխատակիցներն ու էներգետիկներն աշխատում են գրոհի հետևանքները չեզոքացնելու ուղղությամբ։ Միևնույն ժամանակ Նադալը կոչ է արել տեղի բնակիչներին ջուր հավաքել, քանի որ էլեկտրաէներգիայի խափանման պատճառով կանխատեսվում են նաև ջրամատակարարման հետ կապված խնդիրներ։ Դեկտեմբերի 2-ի գիշերը Տերնոպոլում «Շահեդները» հարվածել էին հինգ հարկանի բնակելի շենքի, ինչի հետևանքով մահացել էր մեկ մարդ, ևս երեքը՝ վիրավորվել։ Նոյեմբերի 26-ի գիշերն էլ անօդաչու թռչող սարքի հարվածի հետևանքով քաղաքի էներգետիկ ենթակառուցվածքները լրջորեն վնասվել էին, քաղաքում հոսանքի ու ջրի մատակարարման հետ կապված խնդիրներ էին առաջացել, տրոլեյբուսները ժամանակավորապես դադարեցրել էին իրենց աշխատանքը։

11:30 - 03 դեկտեմբերի, 2024