Էնթոնի Բլինքեն

Բլինքեն․ «Միջուկային զենքի ստեղծման համար Իրանից կարող է ընդամենը 1-2 շաբաթ պահանջվել» |azatutyun.am|

azatutyun.am: «Իրանից միջուկային զենքի ստեղծման համար կարող է ընդամենը մեկից երկու շաբաթ պահանջվել», - ամերիկյան Ասպեն հանգստավայրում ընթացող միջազգային համաժողովի ընթացքում հայտարարել է Միացյալ Նահանգների պետքարտուղար Էնթոնի Բլինքենը։ «Իրանցիները միջուկային զենքն ինքնին դեռ չեն ստեղծել։ Մեր գնահատականներով, սակայն, նրանցից այս ուղղությամբ լուրջ ճեղքման համար մեկից երկու շաբաթ կպահանջվի։ Մենք տեսնում ենք, որ վերջին շաբաթներին և ամիսներին Իրանը այս հարցում որոշակի առաջընթաց է արձանագրել», - նշել է ամերիկյան դիվանագիտության ղեկավարը։ Բլինքենի խոսքով՝ Վաշինգտոնում ուշի-ուշով հետևում են Իրանի միջուկային ծրագրի շուրջ զարգացումներին։ Պետքարտուղարի պնդմամբ՝ այս պահին ամերիկյան կողմը իրանցիներին զսպելու գլխավոր մեխանիզմ է համարում պատժամիջոցների կիրառումը։ «Այս պահին Իրանի քաղաքացիների կամ իրանական հաստատությունների դեմ ընդհանուր առմամբ շուրջ 600 պատժամիջոցներ են սահմանվել։ Դրանցից որևէ մեկը չի վերացվել», - հայտարարել է Բլինքենը։

13:40 - 20 հուլիսի, 2024

Microsoft-ի գլոբալ տեխնիկական խափանումը հաքերային հարձակման հետևանք չէ․ ԱՄՆ պետքարտուղար |armenpress.am|

armenpress.am: Ներկայումս առկա տեղեկության՝ Microsoft-ի գլոբալ տեխնիկական խափանումը հաքերային հարձակման հետևանք չէ։ «Արմենպրես»-ի հաղորդմամբ՝ այս մասին հայտարարել է ԱՄՆ պետքարտուղար Էնթոնի Բլինքենը։ «Դա ինչ-որ տեսակի խափանում էր ծրագրային ապահովման թարմացման մեջ: Դա, որքան ինձ հիմա հայտնի է, որևէ տեսակի չարամիտ հարձակում չէր», - ասել է Բլինքենը։ Խոշոր տեխնիկական խափանումն ամբողջ աշխարհում խախտել է օդանավակայանների, բանկերի և լրատվամիջոցների աշխատանքը։ Microsoft-ը հայտնել էր, որ հետաքննում է իր հավելվածներում և օպերացիոն համակարգերում առաջացած «խնդիրը»։ Չնայած ընկերությունը հայտնել է, որ որոշ ծառայություններ վերականգնվել են, այնուամենայնիվ, խնդիրը շարունակվում է, և օգտատերերը կարող են արձանագրել «ծառայությունների վատթարացում»։

21:45 - 19 հուլիսի, 2024

ԱՄՆ պետքարտուղարն ու Գերմանիայի ԱԳ նախարարը քննարկել են Հայաստանի և Ադրբեջանի միջև խաղաղության գործընթացը |armenpress.am|

armenpress.am: Միացյալ Նահանգների պետքարտուղար Էնթոնի Բլինքենը և Գերմանիայի արտաքին գործերի նախարար Անալենա Բերբոքը քննարկել են Հայաստանի և Ադրբեջանի միջև խաղաղության գործընթացը։ Այս մասին նշված է ԱՄՆ պետքարտուղար Բլինքենի X-ի միկրոբլոգում կատարված գրառման մեջ։ «Հանդիպեցի Գերմանիայի արտգործնախարար Աննալենա Բերբոքի հետ՝ քննարկելու աջակցությունն Ուկրաինային, Գազայում հրադադարի ապահովումը և Հայաստանի ու Ադրբեջանի միջև խաղաղության համաձայնագրի շուրջ առաջընթացը», - գրել է Բլինքենը:

11:03 - 11 հուլիսի, 2024

Բլինքենը Միրզոյանի ու Բայրամովի հետ հանդիպմանը կոչ է արել հնարավորինս շուտ կնքել խաղաղության պայմանագիրը |factor.am|

factor.am: Վաշինգտոնում ՆԱՏՕ-ի գագաթնաժողովի շրջանակում Հայաստանի ԱԳ նախարար Արարատ Միրզոյանի և Ադրբեջանի արտգործնախարար Ջեյհուն Բայրամովի հետ պետքարտուղար Էնթոնի Բլինքենի եռակողմ հանդիպման մասին հայտարարություն է տարածել ԱՄՆ Պետքարտուղարությունը։ «Պետքարտուղար Բլինքենը քննարկել է կայուն և արժանապատիվ խաղաղության համաձայնագրի ուղղությամբ ձեռք բերված առաջընթացը և կոչ է արել հետագա քայլեր ձեռնարկել՝ գործարքը որքան հնարավոր է շուտ ավարտին հասցնելու համար»,-ասվում է հայտարարության մեջ։ Բլինքենը նաև ընդգծել է խաղաղության կարևորությունը «տարածաշրջանային կապի խթանման գործում, որն օգուտ կբերի ողջ Հարավային Կովկասի տարածաշրջանին»:

11:02 - 11 հուլիսի, 2024

Բաքուն և Երևանը մոտ են խաղաղության պայմանագրի կնքմանը. պետքարտուղար Էնթոնի Բլինքեն |1lurer.am|

1lurer.am: Հուլիսի 10-ին Վաշինգտոնում ՆԱՏՕ-ի կազմավորման 75-ամյակին նվիրված գագաթաժողովի շրջանակներում ԱՄՆ պետքարտուղար Էնթոնի Բլինքենի նախաձեռնությամբ տեղի է ունեցել Հայաստանի և Ադրբեջանի արտգործնախարարներ Արարատ Միրզոյանի և Ջեյհուն Բայրամովի հետ եռակողմ հանդիպումը: «Ես շատ ուրախ եմ այսօր հանդիպել Ադրբեջանի և Հայաստանի արտգործնախարարների հետ։ Երևանն ու Բաքուն մեծ աշխատանք են կատարել խաղաղ բանակցությունների ուղղությամբ, որոնք նոր հնարավորություններ են բացում տարածաշրջանի երկրների և Միացյալ Նահանգների հետ հարաբերությունների զարգացման համար։ ԱՄՆ-ը Եվրամիության և մյուս գործընկերների հետ աջակցել է գործընթացին: Այսօրվա հանդիպումը հնարավորություն է վերանայելու արձանագրված առաջընթացը»,-ասել է պետքարտուղարը։ Վերլուծելով տեղի ունեցած բոլոր շփումները, այդ թվում՝ վերջին շաբաթների քննարկումները՝ Բլինքենը կարծիք է հայտնել, որ կողմերը մոտ են խաղաղության համաձայնագրի ձեռքբերմանը։ «Այսօր մենք հավաքվել ենք քննարկելու, թե ինչ կարող է անել Միացյալ Նահանգները համաձայնության հասնելու համար»,-հավելել է ԱՄՆ բարձրաստիճան պաշտոնյան։

20:47 - 10 հուլիսի, 2024

Վաշինգտոնում մեկնարկել է Միրզոյան-Բլինքեն-Բայրամով հանդիպումը

Վաշինգտոնում մեկնարկել է ՀՀ ԱԳ նախարար Արարատ Միրզոյանի, Ադրբեջանի ԱԳ նախարար Ջեյհուն Բայրամովի և ԱՄՆ պետքարտուղար Էնթոնի Բլինքենի եռակողմ հանդիպումը: Այս մասին տեղեկացնում են ՀՀ ԱԳՆ-ից: Միրզոյանի և Բայրամովի նախորդ հանդիպումը տեղի է ունեցել մայիսի 10-11-ը՝ Ալմաթիում: Իսկ ամերիկյան հարթակում Հայաստանի և Ադրբեջանի արտաքին քաղաքական գերատեսչությունների ղեկավարների նախորդ բանակցությունն անցկացվել է 2023-ի հունիսի 27-ից 29-ը: Նշված երեք օրում եղել են ինչպես Միրզոյան-Բայրամով երկկողմ հանդիպումներ, այնպես էլ հանդիպումներ եռակողմ ձևաչափով, որոնց մի մասին ներկա է եղել Բլինքենը, իսկ որոշ հանդիպումների՝ ԱՄՆ նախագահի՝ ազգային անվտանգության հարցերով խորհրդական Ջեյք Սալիվանը:

18:42 - 10 հուլիսի, 2024

Արարատ Միրզոյանն ու Էնթոնի Բլինքենը մտքեր են փոխանակել ՀՀ-ԱՄՆ երկկողմ օրակարգի և տարածաշրջանային հարցերի շուրջ․ ԱԳՆ

Հուլիսի 9-ին Վաշինգտոնում ՀՀ ԱԳ նախարար Արարատ Միրզոյանը մասնակցել է նաև ՆԱՏՕ-ի 75-ամյակին նվիրված՝ ԱՄՆ նախագահի անունից կազմակերպված պաշտոնական ընդունելությանը։ Այս մասին հայտնում են ՀՀ ԱԳՆ-ից։ Նախարար Միրզոյանը շփումներ է ունեցել ՆԱՏՕ անդամ և գործընկեր երկրների ԱԳ նախարարների հետ։ ՀՀ-ԱՄՆ երկկողմ օրակարգի և տարածաշրջանային հարցերի շուրջ մտքեր են փոխանակվել ԱՄՆ պետքարտուղար Էնթոնի Բլինքենի հետ։

10:50 - 10 հուլիսի, 2024

Այսօր տեղի կունենա Միրզոյան-Բլինքեն-Բայրամով հանդիպում

ՀՀ ԱԳՆ-ից տեղեկացնում են, որ Վաշինգտոնում ձեռք բերված պայմանավորվածության համաձայն՝ հուլիսի 10-ին տեղի կունենա ՀՀ ԱԳ նախարար Արարատ Միրզոյանի, Ադրբեջանի ԱԳ նախարար Ջեյհուն Բայրամովի և ԱՄՆ պետքարտուղար Էնթոնի Բլինքենի եռակողմ հանդիպում: Հիշեցնենք՝ արտգործնախարար Արարատ Միրզոյանն աշխատանքային այցով Վաշինգտոնում է։ Նա կմասնակցի ՆԱՏՕ-ի գագաթնաժողովի՝ գործընկերների ձևաչափով միջոցառմանը և կազմակերպության 75-ամյակին նվիրված միջոցառումներին։ Սպասվում են նաև երկկողմ հանդիպումներ։ ՆԱՏՕ-ի գագաթնաժողովին մասնակցելու են նաև Թուրքիայի նախագահը, Վրաստանի և Ադրբեջանի արտգործնախարարները:

09:06 - 10 հուլիսի, 2024

Ալիևը Բլինքենի հետ զրույցում դարձյալ խոսել է ՀՀ սահմանադրությունից

Ինչպես ավելի վաղ հայտնել էինք, հեռախոսազրույց են ունեցել ԱՄՆ պետքարտուղար Էնթոնի Բլինքենը և Ադրբեջանի նախագահ Իլհամ Ալիևը։ Ադրբեջանի նախագահի գրասենյակից հայտնում են, որ Ալիևն ընդգծել է Հայաստանում Սահմանադրության, համապատասխան օրենքների և ներքին նորմատիվ իրավական ակտերի հիման վրա Ադրբեջանի դեմ տարածքային պահանջներին վերջ տալու կարևորությունը խաղաղության օրակարգը առաջ մղելու տեսանկյունից։ Նա հավելել է, որ «վաղուց եկել է ժամանակը պաշտոնապես դադարեցնելու ԵԱՀԿ Մինսկի խմբի և դրան առնչվող բոլոր կառույցների գործունեությունը, որպեսզի ամբողջությամբ փակվի անցյալի մնացորդ հակամարտության էջը»։

09:48 - 21 հունիսի, 2024

Բլինքենը հեռախոսազրույց է ունեցել Ալիևի հետ, ընդգծել խաղաղության համաձայնագրի անհապաղ կնքման կարևորությունը |azatutyun.am|

azatutyun.am: ԱՄՆ պետքարտուղար Էնթոնի Բլինքենը երեկ հեռախոսազրույց է ունեցել Ադրբեջանի նախագահ Իլհամ Ալիևի հետ։ Պետդեպարտամենտի փոխանցմամբ, Բլինքենը շեշտել է խաղաղության համաձայնագրի ուղղությամբ Հայաստանի և Ադրբեջանի շարունակական առաջընթացը և ընդգծել անհապաղ համաձայնագրի կնքման կարևորությունը՝ վերահաստատելով այդ ուղղությամբ ԱՄՆ աջակցությունը։

09:19 - 21 հունիսի, 2024

Բլինքենն ու Ֆիդանը քննարկել են կովկասյան տարածաշրջանի զարգացումները |amerikayidzayn.com|

amerikayidzayn.com: ԱՄՆ պետքարտուղար Էնթոնի Բլինքենը Թուրքիայի արտգործնախարար Հաքան Ֆիդանի հետ հանդիպմանը Չեխիայում ՆԱՏՕ-ի արտգործնախարարների ոչ պաշտոնական հավաքի շրջանակում քննարկել է Հարավային Կովկասում տիրող իրավիճակը: Դրա մասին հաղորդել է ԱՄՆ պետքարտուղարության խոսնակ Մեթյու Միլլերը: Միացյալ Նահանգների արտաքին գերատոսչության հաղորդագրոթյան մեջ, մասնավորապես, ասված է. «Պետքարտուղար Էնթոնի Ջ. Բլինքենն այսօր Պրահայոմ հանդիպել է Թուրքիայի արտգործնախարար Հաքան Ֆիդանի հետ Չեխիայում ընթացող ՆԱՏՕ-ի արտգործնախարարների ոչ պաշտոնական հանդիպման շրջանակում: Պետքարտուղար Բլինքենը և արտգործնախարար Ֆիդանը քննարկել են Գազայում հրադադարի համաձայնության հասնելու ջանքերը, ուղղված պատանդների ազատ արձակման ապահովմանը, ինչպես նաև Գազային մարդասիրական օգնության ավելացման և տարածաշրջանային անկայունությունը կանխելու կարևորությունը: Նրանք քննարկել են նաև կովկասյան տարածաշրջանում խաղաղությանն ու բարգավաճմանը աջակցելու հնարավորությունները»,- տեղեկացրել է ԱՄՆ պետքարտուղարությունը:

09:45 - 31 մայիսի, 2024

Էնթոնի Բլինքենը մեկնել է Մոլդովա |1lurer.am|

1lurer.am: ԱՄՆ պետքարտուղար Էնթոնի Բլինքենը եվրոպական շրջագայության շրջանակներում մեկնել է Մոլդովա։ Քիշնևում պետքարտուղար Բլինքենը հանդիպել է Մոլդովայի նախագահ Մայա Սանդուի և մյուս պաշտոնյաների հետ՝ վերահաստատելու ԱՄՆ աջակցությունը ԵՄ-ին Մոլդովայի անդամակցությանը և էներգետիկ անվտանգությանը»,- ասվում է պետքարտուղարության հայտարարության մեջ: Բլինքենը նշել է, որ Վաշինգտոնը վերաբերվում է Քիշնևին որպես շատ արժեքավոր գործընկեր տարածաշրջանում: «Մենք մշտական հանձնառություն ունենք միասին աշխատելու բոլոր այն ոլորտներում, որոնք դուք առաջարկել եք, ներառյալ ճկուն ժողովրդավարության կառուցումը, աջակցությունը ներառական տնտեսական աճին, օգնությունը ձեր երկրին շարունակել դիվերսիֆիկացնել էներգիայի մատակարարումը, որպեսզի կախված չլինեք որևէ մեկից կամ մեկ աղբյուրից»,- նշել է ԱՄՆ պետքարտուղարը: Մոլդովայից հետո պետքարտուղարը կմեկնի Պրահա, որտեղ կհանդիպի Չեխիայի արտգործնախարար Յան Լիպավսկու և չեխ պաշտոնյաների հետ՝ քննարկելու Ուկրաինային աջակցությունը, համատեղ պաշտպանության արդիականացումն ու էներգետիկ կապերի խորացումը: Պրահայում Էնթոնի Բլինքենը կմասնակցի ՆԱՏՕ-ի արտգործնախարարների ոչ պաշտոնական հանդիպմանը, որի նպատակը ՆԱՏՕ-ի առաջիկա գագաթնաժողովի առաջնահերթությունների քննարկումն է։

21:29 - 29 մայիսի, 2024

ԱՄՆ-ն ողջունում է Հայաստանի և Ադրբեջանի միջև կայուն ու արժանապատիվ խաղաղության ուղղությամբ աշխատանքները. Բլինքեն |1lurer.am|

1lurer.am: ԱՄՆ պետքարտուղարը շնորհավորական ուղերձ է հղել Ադրբեջանի անկախության օրվա կապակցությամբ՝ նշելով, որ Վաշինգտոնը կարևորում է Բաքվի հետ հարաբերությունները և հանձնառու է նպաստելու այդ երկրում ժողովրդավարության զարգացմանը, մարդու իրավունքների ու հիմնարար ազատությունների հարգմանը: «Վերջին 32 տարվա ընթացքում կառուցել ենք փոխադարձ շահերի վրա հիմնված գործընկերություն, մասնավորապես՝ անվտանգության և էներգետիկ ոլորտներում: Գնահատում ենք այդ հարցերում մեր ներգրավվածությունը խորացնելու հնարավորությունը. խոսքը նաև ավելի կարևոր գլոբալ ոլորտների մասին է, ինչպիսիք են կլիմայի փոփոխությունը և անցումը կանաչ էներգիային»,- ասված է պետքարտուղարության հաղորդագրության մեջ: Էնթոնի Բլինքենը ողջունել է նոյեմբերին Բաքվում ՄԱԿ-ի Կլիմայի փոփոխության մասին շրջանակային կոնվենցիայի Մասնակիցների կոնֆերանսի 29-րդ նստաշրջանի անցկացումը: «Միացյալ Նահանգները ողջունում է նաև Հայաստանի և Ադրբեջանի միջև կայուն ու արժանապատիվ խաղաղության հաստատման ուղղությամբ տարվող աշխատանքները, պատրաստ ենք այսուհետ էլ աջակցել այդ ջանքերին՝ շրջելու երկարամյա հակամարտության էջը և կառուցելու ավելի լավ ապագա»,- նշել է դիվանագետը: Պետքարտուղարի համոզմամբ այդ գործընթացը կնպաստի հաղորդակցության ամրապմնդմանը և տնտեսական օգուտներ կբերի ամբողջ տարածաշրջանին: Բլինքենը նաև վերահաստատել է Միացյալ Նահանգների աջակցությունը Ադրբեջանի անկախությանը, տարածքային ամբողջականությանը և ինքնիշխանությանը։

12:05 - 28 մայիսի, 2024

Բլինքենը հայտարարել է ԱՄՆ-ի և Վրաստանի միջև երկկողմ համագործակցության վերանայման մասին |news.am|

news.am: Պետքարտուղար Էնթոնի Բլինքենը հայտարարել է վրացի պաշտոնյաների նկատմամբ վիզային սահմանափակման նոր քաղաքականության մասին, որոնք ընդունել են «Օտարերկրյա ազդեցության թափանցիկության մասին» օրինագիծը, որը զանգվածային բողոքի ցույցեր է առաջացրել երկրում, հայտնում է «Ամերիկայի ձայնը»։ Բլինքենը հայտարարել է, որ վերջին մի քանի ամիսների ընթացքում իշխող «Վրացական երազանք» կուսակցությունը մշակել և ընդունել է օրենսդրություն, որը «կճնշի խոսքի եւ միավորումների ազատությունը, կնեղի Վրաստանի քաղաքացիներին ծառայող կազմակերպություններին և կխոչընդոտի անկախ լրատվամիջոցների աշխատանքը»: «Քանի որ վրացիները դեմ էին օրենքին, մենք տեսանք ահաբեկման և բռնության արշավի հստակ նշաններ՝ այլախոհությունը ճնշելու համար», - ասաց Բլինքենը: Նրա խոսքով, թե՛ օրենքը, թե՛ բողոքը ճնշելու համար կիրառվող ռեպրեսիվ մարտավարությունը խարխլում է Վրաստանի ժողովրդավարությունը և հիմնարար ազատությունները, որոնց իրավունքն ունի վրաց ժողովուրդը, և հակասում է Վրաստանի վաղեմի նպատակին, որն արտացոլված է նրա Սահմանադրության մեջ՝ եվրատլանտյան համագործակցության և ԱՄՆ-ի հետ ռազմավարական գործըընկերության վերաբերյալ: Ի պատասխան այս գործողությունների՝ Պետքարտուղարությունը նոր վիզային սահմանափակման քաղաքականություն է ներմուծում Վրաստանի համար, որը կտարածվի ժողովրդավարությունը խարխլելու, խաղաղ բողոքները ճնշելու համար պատասխանատու անձանց և նրանց ընտանիքի անդամների վրա։ Ինչպես եզրակացրել է Բլինքենը, յուրաքանչյուր ոք, ով խաթարում է Վրաստանի ժողովրդավարական գործընթացները կամ ինստիտուտները, այդ թվում՝ 2024 թվականի հոկտեմբերին կայանալիք ընտրություններից առաջ, ընթացքում և դրանից հետո, այդ անձանց մերժվելու են ԱՄՆ մուտքի արտոնագրերը և Միացյալ Նահանգներ մեկնելու իրավունքը: Բացի այդ, ըստ Բլինքենի, ԱՄՆ-ի ու Վրաստանի երկկողմ համագործակցությունը կարող է վերանայվել։ «Մենք շարունակում ենք հուսալ, որ Վրաստանի իշխանությունները կվերանայեն օրինագիծը և քայլեր կձեռնարկեն ժողովրդավարական և եվրաատլանտյան նկրտումների իրականացման ուղղությամբ առաջ շարժվելու համար։ Քանի որ մենք դիտարկում ենք մեր երկու երկրների հարաբերությունները, մենք հաշվի ենք առնելու Վրաստանի գործողությունները մեր սեփական որոշումներ կայացնելիս»,- հավելել է Բլինքենը:

10:02 - 24 մայիսի, 2024

ԱՄՆ-ն ուսումնասիրում է, թե ինչպես կարող է ամրապնդել աջակցությունը Հայաստանին․ Էնթոնի Բլինքեն |armenpress.am|

armenpress.am: Ամերիկայի Միացյալ Նահանգներն ուսումնասիրում է Հայաստանի մի շարք դիմումներ, թե ինչ կարող է Միացյալ Նահանգներն անել Հայաստանին աջակցությունն ամրապնդելու և երկրի հետ հարաբերությունները խորացնելու համար։ ԱՄՆ Կոնգրեսի Ներկայացուցիչների պալատի արտաքին հարցերով հանձնաժողովում լսումների ժամանակ այս մասին ասել է ԱՄՆ պետքարտուղար Էնթոնի Բլինքենը՝ պատասխանելով կոնգրեսական Ջիմ Կոստայի հարցին։ «Մենք ուսումնասիրում ենք Հայաստանի մի շարք դիմումներ հասկանալու համար, թե ինչ կարող ենք անել, որպեսզի ամրապնդենք աջակցությունը Հայաստանին և խորացնենք հարաբերությունները Հայաստանի հետ։ Ես շաբաթներ առաջ Բրյուսելում հանդիպել եմ վարչապետ Նիկոլ Փաշինյանի և Եվրոպական հանձնաժողովի նախագահ Ուրսուլա Ֆոն Դեր Լայենի հետ, որպեսզի տեսնենք, թե ինչ կարող ենք անել մենք և Եվրամիությունը Հայաստանին աջակցելու համար, և մենք առաջ ենք շարժվելու այդ ուղղությամբ»,- ասել է Բլինքենը։ Նա կարծիք է հայտնել, որ Հայաստանի վարչապետ Նիկոլ Փաշինյանը տարբեր ոլորտներում արտասովոր աշխատանք է արել՝ երկիրը ղեկավարելով շատ բարդ ժամանակահատվածում։ Բլինքենը նաև հույս է հայտնել, որ Հայաստանն ու Ադրբեջանը կկարողանան համաձայնության հասնել խաղաղության պայմանագրի հարցում։

12:29 - 23 մայիսի, 2024

ԱՄՆ պետքարտուղարն ու Թուրքիայի ԱԳ նախարարը հեռախոսազրույց են ունեցել |factor.am|

factor.am: ԱՄՆ պետքարտուղար Էնթոնի Բլինքենն ու Թուրքիայի ԱԳ նախարար Հաքան Ֆիդանը հեռախոսազրույց են ունեցել։ Պետդեպի հաղորդմամբ՝ կողմերը քննարկել են անհապաղ զինադադարի հասնելու ջանքերը, որոնք «կապահովեն պատանդների ազատ արձակումը և կօգնեն մեղմել Գազայում պաղեստինցիների տառապանքը»: Նրանք քննարկել են նաև տարածաշրջանում կայուն և տևական խաղաղություն ապահովելու շարունակական ջանքերը: Բլինքենն ընդգծել է Մերձավոր Արևելքում հակամարտությունների սրացումից խուսափելու և Գազա մարդասիրական օգնության մատակարարումների ավելացման կարևորությունը: Թուրքական լրատվամիջոցներն էլ, վկայակոչելով դիվանագիտական աղբյուրներին , նշում են, որ հեռախոսազրույցում կողմերը քննարկել են Գազայում վերջին իրադարաձություններն ու Ուկրաինայում իրավիճակը։ Ֆիդանն ընդգծել է Գազայում հնարավորինս շուտ մշտական հրադադար հաստատելու կարևորությունը և մատնանշել այն խոչընդոտների վերացման անհրաժեշտությունը, որոնք խանգարում են մարդասիրական օգնության մատակարարմանը։ Նա նաև հայտարարել է, որ Իսրայելի հարձակումը Ռաֆահի վրա անընդունելի է: Ֆիդանն այնուհետև հեռախոսազրույց է ունեցել ՀԱՄԱՍ-ի քաղաքական բյուրոյի ղեկավար Իսմայիլ Հանիյեի հետ ու քննարկել հրադադարի շուրջ բանակցությունների ընթացքը։

12:13 - 16 մայիսի, 2024