Հունգարիա

Հունգարիան կրկին արգելափակել է ԵՄ հիմնադրամի ֆինանսավորումը, որն օգնում է Ուկրաինային զենքով |news.am|

news.am: Եվրամիության երկրների արտաքին գործերի նախարարները երկուշաբթի՝ հուլիսի 22-ին Բրյուսելում կայացած հանդիպմանը հերթական անգամ չեն կարողացել համաձայնության գալ խաղաղության եվրոպական հիմնադրամի միջոցների ապաշրջափակման շուրջ, որը ֆինանսավորում է Ուկրաինային զենքի մատակարարումները։Այս մասին մամուլի ասուլիսի ժամանակ հաստատել է ԵՄ արտաքին քաղաքականության և անվտանգության հարցերով բարձր ներկայացուցիչ Ժոզեպ Բորելը, գրում է Европейская правда-ն։Բորելի խոսքով՝ ԵՄ արտաքին գործերի խորհրդի նիստում նախարարները քննարկել են Ուկրաինային աջակցությունն ուժեղացնելու անհրաժեշտությունը՝ հատկապես հաշվի առնելով հիվանդանոցների դեմ ռուսական վերջին հարձակումները։Ի թիվս այլ հարցերի, քննարկումը վերաբերել է Խաղաղության եվրոպական հիմնադրամից միջոցների ապաշրջափակմանը, որը կփոխհատուցի ԵՄ երկրների ծախսերn Ուկրաինային ռազմական օգնության համար։«Անդամ երկրներից շատերը պնդում էին, որ անհրաժեշտ է վերացնել այն վճարումների արգելափակումը, որոնք հետաձգվել են ամիսներով կամ մեկ տարով: Միևնույն ժամանակ, նրանք նշել են, որ անհրաժեշտ է առաջ շարժվել Ուկրաինային աջակցելու նոր հիմնադրամի վերաբերյալ որոշման հարցում, որն ավելի քան մեկ տարի արգելափակված է մեկ անդամ պետության կողմից»,- հայտարարել է Բորելը։«Այս անդամ պետությունը պնդեց, որ սա անընդունելի, անտանելի մի բան է, և, ցավոք, արգելափակման իրավիճակը շարունակվում է», - ավելացրեց նա:

12:06 - 23 հուլիսի, 2024

Եվրախորհրդարանի նոր կազմը կոչ է արել շարունակել աջակցությունն Ուկրաինային և դատապարտել Օրբանի այցը Մոսկվա |azatutyun.am|

azatutyun.am: Եվրախորհրդարանի նոր կազմը, երեկ ընդունած բանաձևով, կոչ է արել շարունակել աջակցությունը Ուկրաինային և դատապարտել Հունգարիայի վարչապետ Վիկտոր Օրբանի այցը Ռուսաստան։ Փաստաթուղթը սահմանում է Ուկրաինայի դեմ Ռուսաստանի ագրեսիվ պատերազմի վերաբերյալ առաջին պաշտոնական դիրքորոշումը, նշվում է հաղորդագրությունում։ Բանաձևն ընդունվել է ձայների 495 կողմ, 137 դեմ և 47 ձեռնպահ հարաբերակցությամբ։ Փաստաթուղթը հաստատում է աջակցությունը Ուկրաինայի անկախությանը, ինքնիշխանությանը և տարածքային ամբողջականությանը, կոչ է անում ընդլայնել Ռուսաստանի և Բելառուսի դեմ պատժամիջոցները և բռնագրավել ռուսական սառեցված պետական ակտիվները։ «Վերահաստատելով համոզմունքը, որ Ռուսաստանը պետք է փոխհատուցում վճարի Ուկրաինային հասցրած ավերածությունների համար, Եվրախորհրդարանի պատգամավորները ողջունում են ԵՄ վերջին ջանքերը՝ ռուսական սառեցված ակտիվներից եկամուտներն ուկրաինական պատերազմին ուղղելու համար», - ասված է հայտարարությունում։ Եվրախորհրդարանը դատապարտել է Վիկտոր Օրբանի վերջին այցը Ռուսաստան։ Բանաձևում ասվում է, որ նա չի ներկայացնում ԵՄ-ն, և նրա այցը «պայմանագրերի և ԵՄ ընդհանուր արտաքին քաղաքականության բացահայտ խախտում է»: Հունգարիան «պետք է պատժվի այդ գործողությունների համար», նշվում է բանաձևում։ Հուլիսի 1-ից Հունգարիան ռոտացիոն կարգով ստանձնել է Եվրոպական խորհրդի նախագահությունը, որից անմիջապես հետո վարչապետ Վիկտոր Օրբանը ացելել է Կիև, Մոսկվա, Պեկին՝ այդ երկրների ղեկավարների հետ քննարկելով Ուկրաինայի հակամարտությունը։ Նա իր հանդիպումներն անվանել է «խաղաղության առաքելություն»։ Բրյուսելն այս այցերը չի արտոնել, Օրբանն ինքն է խաղաղության շուրջ հանդիպումները նախաձեռնել։ Այս այցերից հետո Օրբանը՝ ոչ հրապարակային նամակ է հղել ԵՄ ղեկավարությանը՝ նախազգուշացնելով՝ «առաջիկա երկու ամսում ուկրաինական ճակատում հնարավոր են ավելի դրամատիկ կորուստներ և ռազմական իրադարձություններ, քան երբևէ»։ Նամակում Օրբանը Բրյուսելին տեղեկացրել է Ուկրաինայի պարտության հարցում Ռուսաստանի նախագահ Վլադիմիր Պուտինի վստահության մասին։

09:10 - 18 հուլիսի, 2024

Եվրահանձնաժողովում հայտնել են, որ չեն կարող զրկել Հունգարիային ԵՄ-ում նախագահությունից |news.am|

news.am: Եվրահանձնաժողովում հայտնել են, որ իրավաբանորեն չեն կարող զրկել Հունգարիային ԵՄ Խորհրդում նախագահությունից, բայց կարող են բոյկոտել նրան։ Այս մասին «Суспільному»-ի հարցազրույցում ասել է ԵՀ արժեքների եւ թափանցիկության գծով փոխնախագահ Վերա Յուրովան։ Նա նշել է, որ որպես իրավաբան կարող է պնդել՝ Հունգարիային չեն կարող զրկել նախագահությունից ԵՄ Խորհրդում։ «Դա անելու ոչ մի հնարավորություն չկա։ Բայց մենք կարող ենք բոյկոտել եւ ցույց տալ, որ համաձայն չենք Օրբանի քաղաքականության հետ։ Դա այն է, ինչ անում ենք հիմա, եւ աստիճանաբար պատրաստվում ենք Լեհաստանի նախագահությանը, որը կսկսվի Նոր տարուց հետո»,- ասել է պաշտոնյան։ «Հունգարիայի նախագահությունը համընկնում է այն ժամանակին, երբ Խորհուրդը ոչ մի վճռական որոշում չի կայացնելու, քանի որ մենք օրենսդրական շրջանի, ինստիտուտներում մանդատները փոխելու շրջանում ենք»,- ասել է Յուրովան։ Հունգարիայի նախագահությունը ԵՄ Խորհրդում սկսվել է հուլիսի 1-ին եւ շարունակվելու է 6 ամիս, բայց այդ ժամկետը խիստ ամրագրված չէ։ Լիսաբոնի պայմանագրի 16-րդ հոդվածում նշված է այն մասին, որ նախագահությունն «իրականացվում է հավասար փոխատեղման հիման վրա», իսկ ժամկետը եւ հաջորդականությունը որոշվում են ԵՄ գագաթաժողովում։ Հավանության համար բավական է որակյալ մեծամասնության քվեարկությունը։ Հիշեցնենք, որ ԵՄ վեց երկրներ որոշել են բոյկոտել ԵՄ նախարարական հանդիպումները Հունգարիայի նախագահության ժամանակ՝ ի նշան վարչապետ Վիկտոր Օրբանի գործողությունների դեմ բողոքի, նրա «խաղաղարար առաքելությունից» հետո։

14:02 - 17 հուլիսի, 2024

Միշելը մերժել է Օրբանի խաղաղության առաջարկները |azatutyun.am|

azatutyun.am: Եվրոպայի խորհրդի նախագահ Շառլ Միշելը պատասխան նամակ է հղել Հունգարիայի վարչապետ Վիկտոր Օրբանին՝ նշելով՝ ԵՄ խորհրդի ռոտացիոն նախագահությունը միջազգային հարթակում չի ներկայացնում Եվրամիությունը, իսկ Հունգարիան համապատասխան մանդատ չի ստացել Եվրոպական խորհրդի կողմից։ Նամակում, որը թվագրված է հուլիսի 16-ով և հայտնվել է «Ազատության» Current Time-ի տրամադրության տակ, Շառլ Միշելը նշել է, որ հաշվի է առնում Հունգարիայի վարչապետի կարծիքներն ու առաջարկները, բայց միևնույն ժամանակ հիշեցնում է, որ Ուկրաինայի վերաբերյալ ԵՄ դիրքորոշումը համաձայնեցվել է կոնսենսուսով և հաստատվել հունիսին կայացած վերջին առաջնորդների գագաթնաժողովի ժամանակ։ Եվրոպայի խորհրդի նախագահն ասել է, որ այդ օրը Եվրամիությունը վերահաստատել է Ուկրաինային և նրա ժողովրդին աջակցելու անսասան հանձնառությունը՝ որքան անհրաժեշտ կլինի։ Միշելը նաև հիշեցնում է Օրբանին, որ ԵՄ Խորհրդում ռոտացիոն նախագահող Հունգարիան միջազգային ասպարեզում Միության անունից հանդես գալու մանդատ չունի։ Շառլ Միշելը հերքել է Օրբանի պնդումը, թե ԵՄ-ն «պատերազմական քաղաքականություն» է վարում՝ նշելով, որ իրականում հակառակն է՝ «Ռուսաստանն է ագրեսորը, իսկ Ուկրաինան՝ զոհը, որն իրացնում է ինքնապաշտպանության իր օրինական իրավունքը»։ ԵՄ պաշտոնյան Ռուսաստանի կողմից իր զորքերի դուրսբերումն Ուկրաինայից համարել է խաղաղության ամենաուղիղ ճանապարհը։ Նամակում Եվրախորհրդի նախագահն ամփոփել է՝ Ուկրաինայի վերաբերյալ ոչ մի քննարկում չի կարող տեղի ունենալ առանց Ուկրաինայի։ Շառլ Միշելը նամակի կրկնօրինակն ուղարկել է ԵՄ անդամ երկրներին՝ նշելով, որ նամակագրության մասին կտեղեկացվի նաև Ուկրաինան։ Հուլիսի 1-ից Հունգարիան ռոտացիոն կարգով ստանձնել է Եվրոպական խորհրդի նախագահությունը, որից անմիջապես հետո վարչապետ Վիկտոր Օրբանը ացելել է Կիև, Մոսկվա, Պեկին՝ այդ երկրների ղեկավարների հետ քննարկելով Ուկրաինայի հակամարտությունը։ Նա իր հանդիպումներն անվանել է «խաղաղության առաքելություն»։ Պեկինից հետո Օրբանը մեկնել էր Ֆլորիդա ու հանդիպել ԱՄՆ նախկին նախագահ, նախագահի հանրապետական թեկնածու Դոնալդ Թրամփի հետ։ Թրամփի հետ հանդիպումից հետո նա X-ում գրառում է կատարել՝ նշելով․ - «Օրվա լավ լուրը. նա պատրաստվում է լուծել այս խնդիրը»։ Ավելի վաղ Թրամփը մի քանի անգամ հայտարարել է, թե նախագահ ընտրվելու դեպքում կարող է 24 ժամում կանգնեցնել արդեն ավելի քան երկու տարի շարունակվող ուկրաինական պատերազմը։ Թե ինչպես՝ մինչև այսօր չի հստակեցրել։ Բրյուսելը այս այցերը չի արտոնել, Օրբանն ինքն է խաղաղության շուրջ հանդիպումները նախաձեռնել։ Այս այցերից հետո Օրբանը՝ ոչ հրապարակայիննամակ է հղել ԵՄ ղեկավարությանը՝ նախազգուշացնելով՝ «առաջիկա երկու ամսում ուկրաինական ճակատում հնարավոր են ավելի դրամատիկ կորուստներ և ռազմական իրադարձություններ, քան երբևէ»։ Նամակում Օրբանը Բրյուսելին տեղեկացրել է Ուկրաինայի պարտության հարցում Ռուսաստանի նախագահ Վլադիմիր Պուտինի վստահության մասին։

09:49 - 17 հուլիսի, 2024

Եվրահանձնաժողովը բոյկոտում է Հունգարիայի նախագահությունը |factor.am|

factor.am: Եվրահանձնաժողովը հայտարարել է Հունգարիայի՝ ԵՄ Խորհրդի վեցամսյա նախագահության շրջանակում ոչ պաշտոնական հանդիպումները բոյկոտելու մասին՝ ի պատասխան Հունգարիայի վարչապետ Վիկտոր Օրբանի Մոսկվա և Պեկին վիճահարույց այցերի: ԵՀ-ն եվրոհանձնակատարներին չի ուղարկի Հունգարիայում ԵՄ նախարարների ոչ պաշտոնական համաժողովներին։ Փոխարենը Հանձնաժողովն այս հանդիպումներին կներկայացնեն բարձրաստիճան պաշտոնյաներ: «Հունգարիայի նախագահության մեկնարկի հետ կապված վերջին իրադարձությունների լույսի ներքո՝ նախագահը [Ուրսուլա ֆոն դեր Լեյենը] որոշել է, որ Եվրահանձնաժողովը ավագ պետական ծառայողների մակարդակով ներկայացված կլինի միայն Խորհրդի ոչ պաշտոնական հանդիպումներում»,- X-ի իր էջում հայտնել է ԵՀ խոսնակ Էրիկ Մամերը։ Նա նաև հայտարարել է Եվրահանձնաժողովի առաջին պաշտոնական այցը Հունգարիա չեղարկելու մասին։ Հուլիսի 1-ից Հունգարիայի կողմից Եվրոպական խորհրդի նախագահությունը ստանձնելուց անմիջապես հետո այդ երկրի վարչապետ Վիկտոր Օրբանն ացելել է Կիև, Մոսկվա, Պեկին՝ այդ երկրների ղեկավարների հետ քննարկելով Ուկրաինայի հակամարտությունը։ ԵՄ երկրների դեսպանները դատապարտել են Օրբանի «խաղաղության առաքելությունը»՝ նրան մեղադրելով ԵՄ որոշումների «տառն ու ոգին» խախտելու համար։ Եվրոպական դիվանագիտության ղեկավար Ժոզեպ Բորելն ասել է, որ Վլադիմիր Պուտինին այցելելիս Օրբանը գործել է ոչ թե ԵՄ-ի անունից, այլ Ռուսաստանի և Հունգարիայի «երկկողմ հարաբերությունների» շրջանակում, քանի որ Ուկրաինայի դեմ Ռուսաստանի ագրեսիայի դատապարտումը «բացառում է ԵՄ-ի և ՌԴ նախագահ Վլադիմիր Պուտինի միջև պաշտոական շփումները»։

13:15 - 16 հուլիսի, 2024

Հունգարիայի նախագահությունն արդեն վնաս է հասցրել ԵՄ-ին. Գերմանիայի ԱԳՆ |azatutyun.am|

azatutyun.am: Հունգարիայի վարչապետ Վիկտոր Օրբանն արդեն իսկ մեծ վնաս է հասցրել Եվրոպական միությանն իր երկրի նախագահության առաջին 12 օրվա ընթացքում, այսօր հայտարարել է Գերմանիայի արտաքին գործերի նախարարությունը: «Մենք պետք է տեսնենք, թե ինչպես է շարունակվում Հունգարիայի խորհրդի նախագահությունը», - ասել է նախարարության խոսնակը՝ պատասխանելով այն հարցին, թե ինչպե՞ս է Բեռլինն արձագանքում Օրբանի վերջին դիվանագիտական այցերին, այդ թվում՝ Չինաստան և Ռուսաստան: «Այսօր ընդամենը 12 օր է անցել, բայց դրանք [այցերն] արդեն մեծ վնաս են հասցրել»,- ասել է Գերմանիայի արտաքին գերատեսչության խոսնակը։ Եվրամիության խորհրդում նախագահությունը հուլիսի 1-ից անցել է Հունգարիային։ Հուլիսի 2-ին Օրբանը «խաղաղապահ առաքելությամբ» նախ այցելեց Կիև, ապա Մոսկվա, հետո Պեկինում բանակցություններ վարեց Չինաստանի նախագահի հետ, մեկնեց Վաշինգտոն՝ ՆԱՏՕ-ի գագաթնաժողովին, երեկ էլ ժամանել է Ֆլորիդա, հանդիպել ԱՄՆ նախկին նախագահ Դոնալդ Թրամփին։ Այցի մասին Օրբանը գրառում է կատարել X-ի իր էջում, նշելով՝ խաղաղության 5-րդ առաքելությամբ հանդիպել է Թրամփի հետ։ «Պատիվ է այցելել Դոնալդ Թրամփին։ Այսօր Մար-ա-Լագոյում քննարկեցինք խաղաղություն հաստատելու ուղիները։ Օրվա լավ լուրը՝ նա պատրաստվում է լուծել այն», - գրել է Օրբանը: Բրյուսելից հայտարարել են, որ Օրբանը Եվրամիության անունից բանակցություններ անցկացնելու լիազորություններ չունի։

15:57 - 12 հուլիսի, 2024

Պուտինը Օրբանի միջոցով Թրամփին ոչ մի ուղերձ չի փոխանցել. Պեսկով |azatutyun.am|

azatutyun.am: Ռուսաստանի նախագահ Վլադիմիր Պուտինը Հունգարիայի վարչապետ Վիկտոր Օրբանի միջոցով ԱՄՆ նախկին նախագահ Դոնալդ Թրամփին ոչ մի ուղերձ չի փոխանցել։ Այդ մասին լրագրողներին հայտնել է Կրեմլի խոսնակ Դմիտրի Պեսկովը։ «Ոչ, պարոն Օրբանը Պուտինին չի տեղեկացրել Թրամփի հետ հանդիպելու մտադրության մասին և ոչ մի նամակ կամ հաղորդագրություն՝ ո՛չ գրավոր, ո՛չ բանավոր, չի փոխանցվել», - ասել է խոսնակը: Հուլիսի 5-ին Օրբանն այցելել է Մոսկվա, որտեղ Պուտինի հետ քննարկել է Ուկրաինայի հակամարտության կարգավորման հարցը, մինչ այդ՝ հուլիսի 2-ին, Օրբանն այցելել է Կիև, որտեղ հանդիպել է Ուկրաինայի նախագահ Վլադիմիր Զելենսկու հետ։ Հուլիսի 8-ին Օրբանը հանդիպել է Չինաստանի նախագահ Սի Ծինփինի հետ և նրա հետ էլ է մտքեր փոխանակել այդ ճգնաժամի կարգավորման հեռանկարների շուրջ։ Հունգարիայի վարչապետն այնուհետեւ մեկնել է ԱՄՆ, որտեղ մասնակցել է ՆԱՏՕ-ի գագաթնաժողովին, ինչպես նաև հանդիպել է Թրամփին։ Ամփոփելով այդ զրույցի արդյունքները՝ Հունգարիայի վարչապետն ասել է, որ ԱՄՆ նախկին նախագահը, եթե հաղթի նոյեմբերի ընտրություններում և վերադառնա Սպիտակ տուն, մտադիր է հասնել Ուկրաինայի հակամարտության կարգավորմանը։ Օրբանը Թրամփի հետ հանդիպումն անվանել է «խաղաղապահ առաքելություն 5.0»՝ նկատի ունենալով Կիև, Մոսկվա և Պեկին կատարած վերջին այցերը, ինչպես նաև Վաշինգտոնում ՆԱՏՕ-ի գագաթնաժողովի շրջանակում Թուրքիայի նախագահ Թայիփ Էրդողանի հետ հանդիպումը, որի ընթացքում նույնպես անդրադարձ է եղել ուկրաինական հակամարտությունը:

15:06 - 12 հուլիսի, 2024

Օրբանը Ֆլորիդայում հանդիպել է Թրափի հետ |azatutyun.am|

azatutyun.am: Հունգարիայի վարչապետ Վիկտոր Օրբանը, Վաշինգտոնում ՆԱՏՕ-ի գագաթնաժողովից հետո, երեկ մեկնել է Ֆլորիդա, հանդիպել, ԱՄՆ նախկին նախագահ, նոյեմբերին կայանալիք նախագահական ընտրություններում Հանրապետական կուսակցության թեկնածու Դոնալդ Թրամփին։ Այցի մասին Օրբանը գրառում է կատարել X-ի իր էջում, նշելով՝ խաղաղության 5-րդ առաքելությամբ հանդիպել է Թրամփի հետ։ «Պատիվ է այցելել Դոնալդ Թրամփին։ Այսօր Մար-ա-Լագոյում քննարկեցինք խաղաղություն հաստատելու ուղիները։ Օրվա լավ լուրը՝ նա պատրաստվում է լուծել այն», - գրել է Օրբանը:

11:17 - 12 հուլիսի, 2024

Էրդողանն Օրբանի հետ քննարկել է ԵՄ-ին Թուրքիայի անդամակցության գործընթացը |tert.am|

tert.am: Թուրքիայի նախագահ Ռեջեփ Թայիփ Էրդողանը Հունգարիայի վարչապետ Վիկտոր Օրբանի հետ քննարկել է Եվրամիությանը Թուրքիայի անդամակցության գործընթացը և գլոբալ խնդիրները, հայտնում է Anadolu գործակալությունը։ Թուրքիայի նախագահի աշխատակազմից հայտնել են, որ Էրդողանը Վաշինգտոնում հանդիպել է Հունգարիայի վարչապետի հետ։Հանդիպման ընթացքում Էրդողանը հայտարարել է, որ Թուրքիան շարունակում է խաղաղության ջանքերը՝ վերջ դնելու ռուս-ուկրաինական պատերազմին և Գազայի հատվածի վրա Իսրայելի հարձակումներին։ Թուրքիայի ղեկավարն ընդգծել է, որ միջազգային հանրությունը պետք է ակտիվացնի ջանքերը՝ այս տարածաշրջաններում խաղաղություն հաստատելու համար։ Էրդողանն ընդգծել է, որ Հունգարիայի նախագահության ընթացքում Թուրքիայից աջակցություն է ակնկալում ԵՄ անդամակցության գործընթացի ակտիվացման և հարաբերությունների զարգացման գործում։

10:42 - 10 հուլիսի, 2024

Օրբանը Պեկինում հանդիպել է Սի Ծինփինի հետ |tert.am|

tert.am: Հունգարիայի վարչապետ Վիկտոր Օրբանը Պեկինում է, որտեղ հանդիպել է Չինաստանի նախագահ Սի Ծինփինի հետ։ Այս մասին հայտնում է Չինաստանի կենտրոնական հեռուստատեսությունը։ «ՉԺՀ նախագահ Սի Ծինփինը հուլիսի 8-ի առավոտյան Պեկինի Դյաոյութայ պետական նստավայրում հանդիպում է ունեցել Հունգարիայի վարչապետ Օրբանի հետ»,-ասված է հաղորդագրության մեջ։ Ինչպես հանդիպումից հետո հայտարարել է Օրբանը, Բուդապեշտը բարձր է գնահատում Ուկրաինայի հարցում Պեկինի խաղաղության նախաձեռնությունը։ Նրա խոսքով՝ իրենք «միշտ խաղաղության կողմնակիցն են և երբեք ոչ պատերազմի», քանի որ Հունգարիայի ժողովուրդը ձգտում է խաղաղության, հավասարակշռության և ներդաշնակության։ Նշենք, որ նախօրեին Հունգարիայի վարչապետի մամուլի քարտուղար Բերտալան Հավասին հայտարարել էր, որ Օրբանը շարունակվող «խաղաղության առաքելության» շրջանակներում ժամանել է Պեկին՝ հանդիպելու Չինաստանի նախագահի հետ։ Մինչ այդ՝ հուլիսի 2-ին, նա այցելել էր Կիև, որտեղ հանդիպել էր Ուկրաինայի նախագահ Վլադիմիր Զելենսկիի հետ, իսկ հուլիսի 5-ին Մոսկվայում բանակցություններ էր վարել ՌԴ նախագահ Վլադիմիր Պուտինի հետ։

10:46 - 08 հուլիսի, 2024

ԵՄ-ն դժգոհ է Օրբանի՝ օկուպացված Շուշիում ԹՊԿ գագաթնաժողովին մասնակցությունից |tert.am|

tert.am: Հունգարիայի վարչապետ Վիկտոր Օրբանը, որի երկիրը ներկայումս նախագահում է ԵՄ-ում, դժգոհության նոր ալիք է առաջացրել Բրյուսելում՝ օկուպացված Շուշիում Թյուրքական պետությունների կազմակերպության ոչ պաշտոնական գագաթնաժողովին իր չհամաձայնեցված մասնակցությամբ, գրում է dw.com-ը: Աղբյուրը նշում է, որ այս մասին հայտարարել է ԵՄ արտաքին և անվտանգության քաղաքականության հարցերով բարձր ներկայացուցիչ Ժոզեպ Բորելը: Նշվել է, որ Օրբանի մասնակցությունը գագաթնաժողովին տեղի է ունեցել բացառապես Հունգարիայի և այս կազմակերպության միջև երկկողմ հարաբերությունների շրջանակում: Բորելի հայտարարության մեջ ընդգծվում է, որ Հունգարիան ԵՄ-ից մանդատ չի ստացել Թյուրքական պետությունների կազմակերպության հետ հարաբերությունները խթանելու համար։ «Վարչապետ Վիկտոր Օրբանը Եվրոպական խորհրդից մանդատ չի ստացել ներկայացնելու այն Թյուրքական պետությունների կազմակերպության գագաթնաժողովում», - գրել է Բորելը։ Բացի այդ, ԵՄ դիվանագիտական ծառայության ղեկավարն ընդգծել է, որ Եվրամիությունը մերժում է թյուրքախոս երկրների կողմից Հյուսիսային Կիպրոսի թուրքական հանրապետությունը լեգիտիմացնելու փորձերը, ինչպես նաև հիշեցրել է, որ ԵՄ-ն որպես սուբյեկտ ճանաչում է միայն Կիպրոսի Հանրապետությանը:

15:28 - 07 հուլիսի, 2024

Հունգարիան չեղարկել է Գերմանիայի ԱԳ նախարարի հետ բանակցությունները՝ «տեխնիկական պատճառներով» |azatutyun.am|

azatutyun.am: Հունգարիան չեղարկել է հուլիսի 8-ին Բուդապեշտում ծրագրված՝ Գերմանիայի արտգործնախարար Անալենա Բերբոքի հետ երկրի արտգործնախարար Պետեր Սիյարտոյի բանակցությունները՝ «տեխնիկական պատճառներով»: «Նախարարի օրացույցում չնախատեսված փոփոխության պատճառով Արտգործնախարարությունը խնդրել է, որ այցը տեղի ունենա ավելի ուշ, հուսով ենք՝ մոտ ապագայում», - ասված է Հունգարիայի արտաքին քաղաքականության գերատեսչության հայտարարությունում: «Պատճառը զուտ տեխնիկական է և ոչ քաղաքական», - վստահեցնում է պաշտոնական Բուդապեշտը, որը հուլիսի 1-ից կես տարով ստանձնել է նախագահությունը Եվրամիության խորհրդում: Գերմանիայի արտգործնախարարությունը հայտարարել է, որ «զարմացած է» այցի չեղարկման փաստով, և որ «լուրջ ու ազնիվ» քննարկման կարիք կա Ռուսաստանի նախագահ Վլադիմիր Պուտինի հետ Հունգարիայի նախագահ Վիկտոր Օրբանի հանդիպումից հետո: Բրյուսելի և Կիևի կողմից չլիազորված Օրբանը ուրբաթ օրը Մոսկվայում էր, ինչպես ինքն է հայտարարել՝ «խաղաղության առաքելությամբ», և շուրջ երկուսուկես ժամ բանակցել է Պուտինի հետ: Այնուհետև Հունգարիայի նախագահը մեկնել է Շուշի, որտեղ մասնակցել է Թյուրքական պետությունների ոչ պաշտոնական գագաթնաժողովին:

14:56 - 07 հուլիսի, 2024

Հունգարիայի վարչապետ Վիկտոր Օրբանը ժամանել է Մոսկվա․ մեկնարկել է նրա հանդիպումը ՌԴ նախագահ Վլադիմիր Պուտինի հետ

Հունգարիայի վարչապետ Վիկտոր Օրբանը ժամանել է Մոսկվա․ մեկնարկել է նրա հանդիպումը ՌԴ նախագահ Վլադիմիր Պուտինի հետ։ Ռուսական «ՏԱՍՍ»-ի փոխանցմամբ՝ Օրբանը հայտարարել է, որ շուտով Հունգարիան կդառնա Եվրոպայի միակ երկիրը, որը կկարողանա երկխոսություն վարել ինչպես Ռուսաստանի, այնպես էլ Ուկրաինայի հետ։ Նշենք, որ Օրբանը նախապես չհայտարարված այց էր կատարել Կիև՝ Ուկրաինայի նախագահին առաջարկելով դիտարկել հրադադար հաստատելու և Մոսկվայի հետ բանակցություններ սկսելու հնարավորությունը։ Հիշեցնենք, որ հուլիսի 1-ից Հունգարիան նախագահում է Եվրոպական խորհուրդը։ Շառլ Միշելը երեկ «X»-ում հայտնել էր, որ ռոտացիոն կարգով Եվրոպական խորհրդում Հունգարիայի նախագահությունը մանդատ չի տալիս Ռուսաստանի հետ շփվելու Եվրամիության անունից․ «Եվրախորհուրդը հստակ է՝ ագրեսորը Ռուսաստանն է, զոհը՝ Ուկրաինան։ Ուկրաինայի շուրջ ոչ մի քննարկում չի կարող տեղի ունենալ առանց Ուկրաինայի.»։ The EU rotating presidency has no mandate to engage with Russia on behalf of the EU. The European Council is clear: Russia is the aggressor, Ukraine is the victim. No discussions about Ukraine can take place without Ukraine. — Charles Michel (@CharlesMichel) July 4, 2024

15:16 - 05 հուլիսի, 2024

Հայաստանը 10 մլն եվրո կստանա ԵՄ Խաղաղության հիմնադրամից. Հունգարիան հանել է արգելանքը |azatutyun.am|

azatutyun.am: Հայաստանն այս տարի առաջին անգամ 10 միլիոն եվրո կստանա Եվրամիության Խաղաղության հիմնադրամից` Հունգարիան հանել է այս օգնության վրա դրված արգելանքը, «Ազատությանը» փոխանցել են Եվրամիության դիվանագիտական աղբյուրները։ Ըստ նույն աղբյուրների, «Միության անդամ բոլոր երկրներն այլևս պատրաստ են կանաչ լույս վառել, և ակնկալվում է, որ նախագիծը նախ կհաստատվի հուլիսի17-ին՝ անդամ երկրների դեսպանների, ապա հուլիսի 22-ին՝ արտգործնախարարների նիստում»։ Ավելի վաղ՝ ապրիլին, Հունգարիան վետո էր դրել նախագծի վրա, պահանջելով, որ Ադրբեջանը ևս օգնություն ստանա ԵՄ Խաղաղության հիմնադրամից։ Ըստ «Ազատության» աղբյուրների, Բուդապեշտի այդ առաջարկը չի ընդունվել, սակայն փակուղուց դուրս գալու համար ընտրվել է փոխզիջումային տարբերակ՝ Բաքվին գումար կտրամադրվի ոչ թե այս հիմնադրամից, այլ՝ առանձին՝ ականազերծման աշխատանքների համար։ Կուլիսներում շարունակվող բանակցությունների ֆոնին՝ Հայաստանի արտգործնախարարն էր անցած մայիսին մեկնել Հունգարիա՝ հույս հայտնելով, որ հուլիսից մինչև այս տարեվերջ Եվրամիության նախագահությունը ստանձնող Բուդապեշտը չի խոչընդոտի Բրյուսելի հետ Հայաստանի խորացող կապերին։ «Վստահ ենք, որ հարցերը և նախատեսվող ծրագրերը շոշափելի քայլերով առաջ կգնան նաև ձեր նախագահության ընթացքում», - հունգարացի գործընկերոջ հետ համատեղ ասուլիսի ժամանակ հայտարարել էր Արարատ Միրզոյանը: Եվրամիության Խաղաղության հիմնադրամը ստեղծվել է 2021 թվականին՝ աշխարհում հակամարտությունները կանխելու և կարիքավոր երկրներին ոչ մահաբեր զինատեսակներ մատակարարելու համար: Հայաստանի դեպքում, ըստ «Ազատության» աղբյուրների, այս հիմնադրամից տրամադրվելիք 10 միլիոն եվրոյով նախատեսվում է դաշտային մոդուլային ճամբար ստեղծել մեկ գումարտակի համար, որի կազմում կլինի նաև բժշկական օգնության ամբուլատորիա։ «Նպատակն է նպաստել, որ Հայաստանի Զինված ուժերը բարձրացնեն դիմադրողականությունն ու կայունության հաստատմանն ուղղված կարողությունները և դրանով իսկ առավել լավ պաշտպանեն խաղաղ բնակչությանը ճգնաժամերի և արտակարգ պատահարների ժամանակ», - ասված է «Ազատության» տրամադրության տակ գտնվող դիվանագիտական փաստաթղթերում։ «Հայաստանն աշխատում է վերացնել մեկ երկրից կախվածությունը», - երեկ հայտարարել էր Անվտանգությւան խորհրդի քարտուղարը՝ որպես հաջողված օրինակ առանձնացնելով համագործակցությունը Եվրամիության ու անդամ երկրների հետ անվտանգության ոլորտում։ «Էս պահին ՀԱՊԿ-ի անդամ լինելով Հայաստանը Ֆրանսիայից զենք է գնում, դիմել է EPF Եվրոպական խաղաղության գործիքակազմ, և այս առումով մենք շարունակում ենք առաջ շարժվել: Ես համոզված եմ, որ Հայաստանի հնարավորությունները շատ մեծ են, ու այդ հնարավորությունները կարող ենք օգտագործել», - ասել է Արմեն Գրիգորյանը: Անցած տարիներին ԵՄ Խաղաղության հիմնադրամից օգնություն են ստացել անդամակցության ձգտող Վրաստանը, Ուկրաինան, Մոլդովան, ինչպես նաև մոտ մեկ տասնյակ աֆրիկյան երկրներ՝ Սոմալիից մինչև Կոնգո:

15:58 - 04 հուլիսի, 2024

Հունգարիան այսօրվանից՝ վեց ամիս ժամկետով ստանձնում է Եվրամիության խորհրդի նախագահությունը |azatutyun.am|

azatutyun.am: Հունգարիան՝ վարչապետ Վիկտոր Օրբանի գլխավորությամբ, այսօրվանից՝ հուլիսի 1-ից վեց ամիս ժամկետով ստանձնում է Եվրամիության խորհրդի նախագահությունը։ Մինչև տարեվերջ Հունգարիայի կառավարությունը կհամակարգի Խորհրդի նիստերը և կաշխատի եվրոպական այլ իշխանությունների հետ: 2010 թվականից Հունգարիան ղեկավարող Օրբանը, ով հայտնի է Կրեմլի հետ բարեկամական հարաբերություններով, բազմիցս է խնդիրներ ստեղծել Եվրամիության համար՝ դեմ արտահայտվել ինչպես Ռուսաստանի դեմ պատժամիջոցներին, այնպես էլ Ուկրաինային ռազմական օգնության տրամադրմանը, հրաժարվել է երկրում բարելավել ժողովրդավարության ոլորտը, ընդդիմացել հատկապես դատական ոլորտի խնդիրները լուծելու Բրյուսելի առաջարկած տարբերակներին։

19:01 - 01 հուլիսի, 2024

Եվրո-2024․ Գերմանիան հաղթեց Հունգարիային և գլխավորեց իր խմբի մրցաշարային աղյուսակը |armenpress.am|

armenpress.am: Ֆուտբոլի Եվրոպայի առաջնության երկրորդ տուրում A խմբում հանդես եկող Գերմանիայի ընտրանին մրցեց Հունգարիայի հետ: «Արմենպրես»-ի հաղորդմամբ` Շտուտգարդի քաղաքային մարզադաշտում կայացած խաղի մեկնարկային րոպեներին թիմերը փոխանակվում էին գրոհներով, սակայն առավել վտագավոր էր Գերմանիայի ընտրանու խաղը: Տանտերերը խաղակեսի միջնամասում արդեն խաղում էին «առաջին համարով» և կարողացան բացել հանդիպման հաշիվը: Ստանալով Գյունդոգանի փոխանցումը` գոլը խփեց Մուսիալան: Երկրորդ կեսում Հունգարիան առավել կտրուկ էր գործում, իսկ գերմանացիները շատ էին տիրում գնդակին: Գերմանիան կարողացավ երկրորդ գնդակը մրցակցի դարպասն ուղարկել 67-րդ րոպեին: Դիպուկ հարվածով աչքի ընկավ Գյունդոգանը: Հունգարներին այդպես էլ չհաջողվեց բեկել հանդիպման ընթացքը և Գերմանիան երկրորդ հաղթանակը տոնեց Եվրոպայի ընթացիկ առաջնությունում: Գերմանիան դուրս եկավ ԵԱ-ի փլեյ-օֆֆ: Գերմանիա-Հունգարիա`2:0: Եվրոպայի առաջնության երրորդ` վերջին տուրում Գերմանիան կխաղա Շվեյցարիայի, իսկ Հունգարիան` Շոտլանդիայի դեմ: Խաղերը կկայանան հունիսի 23-ին:

22:00 - 19 հունիսի, 2024