Ադրբեջանի ԱԳՆ

Բայրամովը պահանջել է դրոշների այրումը ճանաչել որպես հանցագործություն |azatutyun.am|

azatutyun.am: Բաքուն ակնկալում է, որ Հայաստանը կձեռնարկի համապատասխան քայլեր՝ Սահմանադրությամբ ամրագրված Ադրբեջանի նկատմամբ տարածքային պահանջները վերացնելու և ԵԱՀԿ Մինսկի խումբը վերացնելու համար, այսօր Բաքվում հայտարարել է արտգործնախարար Ջեյհուն Բայրամովը՝ ԵՄ արտգործնախարարի հետ համատեղ ասուլիսի ժամանակ։Այս պահանջներից բացի Բայրամովը կոչ է արել նաև քայլեր ձեռնարկել՝ Ադրբեջանի և Թուքրիայի դրոշների այրումը որպես հանցագործություն ճանաչելու համար։ «Հայաստանում ռևանշիստական տրամադրությունները լուրջ մտահոգության տեղիք են տալիս», - ասել է նա, հավելելով․ - «Կցանկանայի նշել վերջերս Ադրբեջանի և Թուրքիայի դրոշների այրման հետ կապված միջադեպերը: Ցավոք, նմանատիպ միջադեպ տեղի ունեցավ երեկ նաև Ֆրանսիայում: Մենք ակնկալում ենք, որ այս երկրների համապատասխան մարմինները վճռական գործողություններ կձեռնարկեն՝ ապահովելու, որ մեկ այլ երկրի ատրիբուտների այրումը ճանաչվի որպես հանցագործություն»:Եվրամիության արտգործնախարարն իր հերթին հայտարարել է, թե Ադրբեջանը տարածաշրջանում ԵՄ-ի կարևոր գործընկեր է։ «Մենք ակնկալիքներ ունենք մեր հարաբերությունների ամրապնդման վերաբերյալ»,- ասել է Եվրամիության արտաքին գործերի և անվտանգության քաղաքականության հարցերով գերագույն Կայա Կալլասը՝ նախագահ Ալիևի հետ հանդիպման ժամանակ։

15:13 - 25 ապրիլի, 2025

Նախիջևան անարգել մուտքը դեռևս չի ապահովվել. Բայրամով |azatutyun.am|

azatutyun.am: Խաղաղության համաձայնագրի տեքստի վրա աշխատանքներն ավարտվել են մարտին, սակայն գործընթացի վերջնական ավարտի հարցում Բաքուն Երևանից դեռ ակնկալիքներ ունի, այս մասին այսօր հայտարարել է Ադրբեջանի արտգործնախարար Ջեյհուն Բայրամովը սլովենացի պաշտոնակցի հետ համատեղ ասուլիսի ընթացքում։ Ադրբեջանի դիվանագիտության ղեկավարի խոսքով՝ ՀՀ Սահմանադրության փոփոխությունից և Մինսկի խմբի լուծարումից բացի չլուծված է մնում նաև հաղորդակցությունների բացման հարցը։ «Ես նշել եմ Հայաստանի Սահմանադրությունում Ադրբեջանի նկատմամբ տարածքային պահանջների վերացման, ինչպես նաև Մինսկի խմբի վերացման անհրաժեշտությունը: Սահմանազատման գործընթացն ընթացքի մեջ է, բայց հաղորդակցությունների բացման հարցը դեռևս չլուծված է մնում: Կարծիքների փոխանակում է տեղի ունեցել նաև այն փաստի շուրջ, որ Նախիջևան անարգել մուտքը դեռևս չի ապահովվել», - թվարկել է Բայրամովը։ Պաշտոնական Բաքուն և Երևանը մարտի 13-ին հայտարարեցին խաղաղության համաձայնագրի վրա աշխատանքներն ավարտելու մասին։ Երևանը համաձայնագիրը ստորագրելու պատրաստակամություն է հայտնում, Բաքուն՝ պայմաններ առաջ քաշում՝ «Ադրբեջանի նկատմամբ տարածքային նկրտումներ պարունակող» Հայաստանի Սահմանադրության փոփոխություն, Ղարաբաղյան հարցով տարիներ շարունակ զբաղված ԵԱՀԿ Մինսկի խմբի լուծարում:

14:58 - 17 ապրիլի, 2025

Բայրամովը կրկին ականների ու ՀՀ Սահմանադրության հարցն է բարձրացրել |azatutyun.am|

azatutyun.am: Ադրբեջանի արտգործնախարար Ջեյհուն Բայրամովն Աբու Դաբիյում նախօրեին հանդիպել է իր գործընկեր Աբդուլլահ բին Զայեդ Ալ Նահիանի հետ, քննարկել համագործակցությունը, մասնավորապես, քաղաքական, տնտեսական, առևտրային, էներգետիկ և հումանիտար ոլորտներում։ Ըստ ադրբեջանական Azertac-ի՝ Բայրամովը Արաբական Միացյալ Էմիրությունների արտգործնախարարին է ներկայացրել «տարածաշրջանում վերականգնողական աշխատանքները», խոսել «խաղաղության պայմանագրից ու առկա մարտահրավերներից»։ Ադրբեջանի արտգործնախարարը կրկին ընդգծել է «ականների սպառնալիքներն» ու «Ադրբեջանի նկատմամբ տարածքային պահանջները», որոնք, ինչպես Բայրամովն է ասել, «առկա են Հայաստանի Սահմանադրության մեջ և մի շարք օրենսդրական ակտերում։ Ադրբեջանական կողմի փոխացմամբ, ընդգծվել է Արաբական Միացյալ Էմիրությունների աջակցության կարևորությունն «ականազերծման, ինչպես նաև Ադրբեջանի օկուպացիայից ազատագրված տարածքների վերականգնման հարցում»։ Պաշտոնական Բաքուն և Երևանը մարտի 13-ին հայտարարեցին խաղաղության համաձայնագրի վրա աշխատանքներն ավարտելու մասին։ Երևանը համաձայնագիրը ստորագրելու պատրաստակամություն է հայտնում, Բաքուն՝ պայմաններ առաջ քաշում՝ «Ադրբեջանի նկատմամբ տարածքային նկրտումներ պարունակող» Հայաստանի Սահմանադրության փոփոխություն, Ղարաբաղյան հարցով տարիներ շարունակ զբաղված ԵԱՀԿ Մինսկի խմբի լուծարում, հրադադարը խախտելու մեղադրանքներ, վերջին օրերին էլ ականների հարցն է բարձրացնում՝ պահանջելով միջազգային հանրությունից պատասխանատվության ենթարկել Հայաստանին՝ «տարածքներն ականներով պատելու ու ականազերծման աշխատանքները միտումնավոր խոչընդոտելու համար»։ Երևանը Սահմանդրությունը փոփոխելու պահանջն իր ներքին գործերին միջամտելու փորձ է որակում, ԵԱՀՄ Մինսկի խմբի լուծարումն, ասում է, հնարավոր է միայն խաղաղության պայմանագրի ստորագրումից հետո, հերքում է հրադադարի խախտումների բոլոր մեղադրանքները, իսկ ականապատ դաշտերի ավելի լավ որակի քարտեզներ, ըստ Երևանի, պարզապես չկան՝ Հայաստանն «ինչ քարտեզ ու տեղեկություն ունեցել է, արդեն փոխանցել է Բաքվին»։

13:56 - 08 ապրիլի, 2025

Գերմանական կողմը ներողություն է խնդրել Ադրբեջանից Արցախի դրոշի հրապարակման համար |azatutyun.am|

azatutyun.am: Գերմանական կողմը ներողություն է խնդրել Ադրբեջանից Արցախի դրոշի հրապարակման համար: Ադրբեջանական Azertac-ը հրապարակել է Գերմանիայի նախագահի աշխատակազմի ղեկավար, պետքարտուղար Դյորտե Դինգերի նամակն Ադրբեջանի նախագահի օգնական Հիքմեթ Հաջիևին, որտեղ պետքարտուղարը ներողություն է խնդրում հրապարակման համար՝ նշելով, որ այն տեխնիկական սխալի արդյունք է։ Դինգերը հայտնել է, որ երկրի նախագահ Շտայնմայերի առաջիկա այցը Բաքու նպատակ ունի ամրապնդել երկու երկրների միջև գործընկերությունը և աջակցել տարածաշրջանում ընթացող խաղաղ գործընթացին։ Հիշեցնենք, որ Ադրբեջանում Գերմանիայի դեսպան Ռալֆ Հորլեմանը մարտի 31-ին կանչվել էր երկրի արտգործնախարարություն։ Azertac-ի փոխանցմամբ, նրան խիստ բողոքի նոտա էր հղվել Գերմանիայի նախագահ Ֆրանկ-Վալտեր Շտայնմայերի՝ Հայաստան կատարած այցի ընթացքում Գերմանիայի նախագահի Instagram-ի պաշտոնական էջում հրապարակված Արցախի դրոշի կապակցությամբ, որն Ադրբեջանը համարել էր «ոտնձգություն երկրի տարածքային ամբողջականության նկատմամբ»։

11:00 - 01 ապրիլի, 2025

Ադրբեջանի ԱԳՆ-ն Գերմանիայի դեսպանին խիստ բողոքի նոտա է հայտնել նախագահ Շտայնմայերի կողմից սոցցանցում Արցախի դրոշի հրապարակման առնչությամբ |tert.am|

tert.am: Ադրբեջանում Գերմանիայի դեսպան Ռալֆ Հարլեմանը կանչվել է Ադրբեջանի ԱԳՆ։ Նրան խիստ բողոքի նոտա են հայտնել Գերմանիայի նախագահի կողմից սոցցանցում Արցախի դրոշի հրապարակման առնչությամբ, հաղորդում է Ադրբեջանի ԱԳՆ-ն: Հիշեցնենք, որ տարածաշրջանային այցով Երևանում գտնվող Գերմանիայի նախագահ Ֆրանկ-Վալտեր Շտայնմայերն իր սոցիալական ցանցերում լուսանկար է հրապարակել Արցախի դրոշով և անդրադարձել արցախահայության թեմային։ Հրապարակմանը կից տեքստում նախագահը մասնավորապես նշել է, որ Լեռնային Ղարաբաղը բնակեցված էր հիմնականում հայերով։

19:05 - 31 մարտի, 2025

Բաքուն պայմանագրի ստորագրման համար շարունակում է պահանջել ՀՀ Սահմանադրության փոփոխություն և ԵԱՀԿ Մինսկի խմբի լուծարում |factor.am|

factor.am: «Մենք գոհունակությամբ նշում ենք Ադրբեջանի և Հայաստանի միջև խաղաղության և միջպետական հարաբերությունների հաստատման մասին համաձայնագրի նախագծի տեքստի շուրջ բանակցությունների ավարտը»,- հայտարարել է Ադրբեջանի ԱԳՆ-ն։ Բաքուն ներկայացրել է խաղաղության պայմանագրի կնքման իր պայմանները։ «Միևնույն ժամանակ, մենք ևս մեկ անգամ ուշադրություն ենք հրավիրում Ադրբեջանի սկզբունքային դիրքորոշման վրա, որ բանակցությունների տեքստի ստորագրման հիմնական պայմանը Հայաստանի Սահմանադրության մեջ փոփոխություններ մտցնելն է՝ Ադրբեջանի ինքնիշխանության և տարածքային ամբողջականության նկատմամբ հավակնությունները վերացնելու նպատակով։ Միևնույն ժամանակ մենք ընդգծում ենք հնացած և անգործունակ ԵԱՀԿ Մինսկի խմբի և դրա հարակից կառույցների պաշտոնական լուծարման անհրաժեշտությունը»,-ասվում է հայտարարությունում։ Միաժամանակ, Բաքուն նշում է, թե պատրաստ է շարունակել երկխոսությունը երկու երկրների միջև հարաբերությունների կարգավորման գործընթացին առնչվող այս և այլ հարցերի շուրջ։

19:41 - 13 մարտի, 2025

Բայրամովը կրկին որպես խաղաղության խոչընդոտ նշել է «ՀՀ Սահմանադրությունն ու ռազմականացումը» |factor.am|

factor.am: Ադրբեջանի ԱԳ նախարար Ջեյհուն Բայրամովը հայտարարել է, թե Հայաստանը, իբր, «դեռևս տարածքային պահանջներ ունի Ադրբեջանի նկատմամբ, երկրում կան ռևանշիստական տրամադրություններ, այս ամենը շարունակում է խոչընդոտ հանդիսանալ Բաքվի և Երևանի միջև տևական խաղաղության հաստատմանը»։ Այս մասին նա հայտարարել է Աստանայում իր ղազախ գործընկեր Մուրատ Նուրթլեուի հետ համատեղ մամուլի ասուլիսում։ Նա շնորհակալություն է հայտնել Ղազախստանին անցյալ տարվա մայիսին հայ-ադրբեջանական հարաբերությունների կարգավորման բանակցությունների հարթակ տրամադրելու համար։ Ըստ Բայրամովի՝ այդ քայլը ցույց է տալիս, որ Ղազախստանը մեծ նշանակություն է տալիս Բաքու-Երևան խաղաղության գործընթացին։ «Ադրբեջանի և Հայաստանի միջև միջպետական հարաբերությունների կարգավորման և խաղաղության պայմանագրի ստորագրման գործընթացը բավականին մեծ ճանապարհ է անցել։ Չնայած դրան, տևական խաղաղության ճանապարհին բազմաթիվ խոչընդոտներ են մնում։ Հիմնականը Հայաստանի Սահմանադրության մեջ պահպանվող տարածքային պահանջներն են Ադրբեջանի նկատմամբ, այդ երկրի արագ ռազմականացումն ու ռևանշիստական տրամադրությունների աճը»,- ասել է Ադրբեջանի ԱԳ նախարարը։

11:45 - 11 մարտի, 2025

Հայաստանը չի ստանձնել որևէ պարտավորություն, որը չի կատարել. Միրզոյան |azatutyun.am|

azatutyun.am: Հայաստանը չի ստանձնել որևէ պարտավորություն, ներառյալ նաև տարածաշրջանային ենթակառուցվածքների ապաշրջափակման վերաբերյալ, որը չի կատարել, խորհրդարանում հայտարարեց արտաքին գործերի նախարար Արարատ Միրզոյանը՝ արձագանքելով թեմայի շուրջ Ադրբեջանի ԱԳՆ պաշտոնական ներկայացուցիչ Այխան Հաջիզադեի հնչեցրած մեկնաբանություններին: Բաքվից երեկ արձագանքել էին ապաշրջափակման վերաբերյալ հայկական կողմի առաջարկներին և նշել, թե Հայաստանը պետք է գործնական քայլեր ձեռնարկի տարածաշրջանում հաղորդակցության ուղիների բացման համար և կատարի «այդ ուղղությամբ ստանձնած պարտավորությունները»: Միրզոյանն այսօր վերահաստատեց՝ Հայաստանը պատրաստ է օր առաջ բացել և նպաստել տարածաշրջանային ու տրանսպորտային ենթակառուցվածքների ապաշրջափակմանը։ «Մենք հանդես ենք եկել խորը և շատ ընդգրկուն նախաձեռնությամբ՝ «Խաղաղության խաչմերուկ» և դրա տրամաբանության շրջանակում Ադրբեջանին շատ կոնկրետ առաջարկներ ենք արել, - նշեց նախարարը, ապա հավելեց, - հարցը միայն Ադրբեջանի մասին չէ։ Տարածաշրջանային ենթակառուցվածքների ապաշրջափակումը շատ ավելի լայն խոսակցություն է, որը ներառում է նաև մեր արևմտյան հարևանին, մենք Թուրքիայի հետ ունենք այդ խոսակցությունը Գյումրի -Կարս երկաթգծի մասով»:

20:35 - 05 մարտի, 2025

Հաջիզադե․ «Փաշինյանի առաջարկները անհարկի են և դժվար իրագործելի» |azatutyun.am|

azatutyun.am: «Եթե Հայաստանն իրոք ցանկանում է, որ տարածաշրջանի հաղորդակցության ուղիները բացվեն, չպետք է խուսափի իր պարտավորությունների կատարումից և պետք է գործնական քայլեր ձեռնարկի այդ ուղղությամբ», - մեկնաբանելով Հայաստանի վարչապետի այսօր հրապարակված հոդվածը՝ հայտարարել է Ադրբեջանի ԱԳՆ պաշտոնական ներկայացուցիչ Այխան Հաջիզադեն, նշելով,որ այդ քայլերը պետք է բխեն, «տարածաշրջանում առկա նոր իրողություններից»։ «Թեև Հայաստանը տեղյակ է Ադրբեջանի արևմտյան շրջանների՝ Նախիջևանի Ինքնավար Հանրապետության հետ կապի բացմանը վերաբերող իր իսկ ստորագրած գրավոր պարտավորությունների մասին, դրանք դեռ չի կատարել», - հայտարարել է Ադրբեջանի արտգործնախարարության խոսնակը։ Արձագանքելով Նիկոլ Փաշինյանի այսօրվա հոդվածին` Այխան Հաջիզադեն պնդել է, թե Երևանի կողմից ներկայացված առաջարկներն «ըստ էության անհարկի են, դժվար իրագործելի և գործնականում երթուղին երկարացնող»։ Ըստ նրա՝ դրանցով Երևանը «նպատակ ունի շեղել ուշադրությունը ստանձնած պարտավորություններից»։ «Բոլորին է հայտնի, որ Հայաստանը գրեթե 30 տարի օկուպացիայի տակ էր պահում Ադրբեջանի ինքնիշխան տարածքները, ինչը հանգեցրել է Նախիջևանի Ինքնավար Հանրապետության շրջափակման։ Հայաստանը նաև 44-օրյա պատերազմից հետո որևէ դրական ներդրում չի ունեցել հաղորդակցության ուղիների վերագործարկմանը նվիրված բանակցություններում», - նշել է Ադրբեջանի ԱԳ նախարարության խոսնակը։ Հայաստանի վարչապետն «Արմենպրես»-ում հրապարակված իր հոդվածում գրել է, մասնավորապես, որ տարածաշրջանային բոլոր տնտեսական և տրանսպորտային կոմունիկացիաների բացումը, ներառյալ նաև արևմտյան Ադրբեջանից Հայաստանի տարածքով դեպի Նախիջևան և հակառակ ուղղությամբ, Հայաստանի Մեղրիից-Երասխ Ադրբեջանի (Նախիջևանի) տարածքով և հակառակ ուղղությամբ, ամբողջությամբ նախապատրաստված է, և դրա իրագործման համար անհրաժեշտ է միայն Ադրբեջանի համաձայնությունը: «Անհասկանալի է, թե ինչու են այս առաջարկները մերժվում Ադրբեջանի կողմից: Հույս ունեմ՝ ոչ էսկալացիայի կեղծ առիթ կառուցելու համար», - ընդգծել է Նիկոլ Փաշինյանը:

19:28 - 04 մարտի, 2025

Բաքուն արձագանքել է Ադրբեջանում պահվող հայերին անհապաղ ազատ արձակելու՝ Տյուրկի հայտարարությանը |azatutyun.am|

azatutyun.am: Ադրբեջանի արտգործնախարարության խոսնակ Այխան Հաջիզադեն արձագանքել է Ադրբեջանում պահվող հայազգի անձանց անհապաղ ազատ արձակելու մասին ՄԱԿ-ի Մարդու իրավունքների բարձր հանձնակատար Վոլկեր Տյուրկի հայտարարությանը՝ նշելով. «Արդարության հասնելու համար անհրաժեշտ է պատասխանատվության ենթարկել ռազմական հանցագործությունների, էթնիկ զտումների, ռազմական ագրեսիայի, խոշտանգումների և այլ ծանր հանցագործությունների համար մեղադրվողներին կամ դատապարտվողներին»։ «Միայն ճշմարտության բացահայտմամբ և հանցագործությունների հետևանքների վերացմամբ խաղաղությունն ու հաշտությունը կհաղթեն անպատժելիությանը», - ըստ ադրբեջանական լրատվամիջոցների՝ ասել է Հաջիզադեն։ Մարտի 3-ին՝ Ժնևում ընթացող Մարդու իրավունքների Խորհրդի 58-րդ նստաշրջանի ընթացքում ներկայացրած զեկույցում Վոլկեր Տյուրկը նախ նշել է, որ հետևում է հայ-ադրբեջանական խաղաղ բանակցություններն, ապա անդրադարձել Ադրբեջանում պահվող բոլոր անձանց, ներառյալ հայերի հիմնախնդրին՝ նշելով, որ նրանք պետք է անհապաղ ազատ արձակվեն, և արդար դատավարության նրանց իրավունքները պետք է ամբողջությամբ հարգվեն։

09:46 - 04 մարտի, 2025

Բաքուն արձագանքել է գերիների վերաբերյալ Երևանի հայտարարությանը |azatutyun.am|

azatutyun.am: Ադրբեջանը «մարդասիրական վերաբերմունք է դրսևորել» և «հետևելով միջազգային մարդասիրական իրավունքի շրջանակներում ստանձնած պարտավորությանը»՝ ազատ է արձակել ու հայրենադարձել ավելի քան 200 հայերի, որ ռազմագերիներ էին կամ պահվող անձինք, ասել է Ադրբեջանի արտգործնախարարության խոսնակ Այխան Հաջիզադեն՝ արձագանքելով Հայաստանի ԱԳՆ հայտարարությանը: Բաքվում պահվող հայ գերիների վիճակի մասին ՀՀ արտգործնախարարության այսօրվա հայտարարության մեջ նշվում է, որ խորը մտահոգված են Բաքվի դատավարություններից տարածվող տեսագրություններից ու լուսանկարներից, կալանավորված անձանց նկատմամբ ներգործության, խոշտանգումների և նրանց առողջական վիճակի ակնհայտ վատթարացման մասին հացադուլի մեջ գտնվող Ռուբեն Վարդանյանի փաստաբանների տեղեկություններից: Այխան Հաջիզադեն ասել է նաև, որ հայ գերիներից մի քանիսը ազատ արձակվելուց հետո ձերբակալվել ու հարցաքննվել են Հայաստանի իշխանությունների կողմից։ Պաշտոնական Բաքուն մարդասիրության «մեծ ժեստ» է անվանում նաև այն, որ 2023 թվականին ավելի քան 10 հազար զինծառայողներին թույլ են տվել հեռանալ ադրբեջանական տարածքներից։ Հայաստանի արտաքին գերատեսչությունից վստահեցրել էին՝ շարունակում են «միջազգային հանրության, մասնավորապես տարածաշրջանում խաղաղությամբ շահագրգռված և մարդասիրական արժեքները կարևորող գործընկերների ուշադրությունը հրավիրել Ադրբեջանում պահվող հայազգի ռազմագերիների, պատանդների և այլ պահվող անձանց ազատ արձակման խնդրի, ինչպես նաև դատավարական կոպտագույն խախտումներով և խոշտանգման աղաղակող նշաններով նրանց մի մասի նկատմամբ ընթացող բեմականացված դատավարությունների վրա»: Հայկական կողմի հայտարարությունը, ըստ պաշտոնական Բաքվի, ցույց է տալիս, թե այս դատավարությունից «որքան է նյարդայնացած Հայաստանի քաղաքական վերնախավը, որը բացահայտորեն աջակցել է Ադրբեջանի դեմ ագրեսիային»։ «Հայաստանի պետական պատասխանատվությունը և այլ անօրինական գործողությունները՝ որպես օկուպանտ և ագրեսիվ երկիր, փաստ է, որը չի կարելի հերքել։ Հանցագործներին պատասխանատվության ենթարկելը արդարացի է, որը քաղաքական մանիպուլյացիաների չի կարող ենթարկվել։ Հայաստանն այսօր փոխանակ ողջունի պատերազմական հանցագործությունների մեջ մեղադրվող մարդկանց դատավարությունը, դրանք անվանում է «բեմականացված», - ասել է Հաջիզադեն։ Պաշտոնական Երևանն էլ նաև շեշտել էր, որ «հայազգի ռազմագերիները, պատանդները և այլ պահվող անձինք ապօրինաբար պահվում են Ադրբեջանում՝ ի հեճուկս նրա կողմից ստանձնած հանձնառությունների և միջազգային պարտավորությունների: Հայազգի ռազմագերիների, պատանդների և այլ պահվող անձանց կալանավորումն ու հետապնդումը հանդիսանում է միջազգային մարդասիրական իրավունքի և մարդու հիմնարար իրավունքների կոպիտ խախտում»:

18:01 - 28 փետրվարի, 2025

Ադրբեջանի ԱԳՆ-ն արձագանքել է ՀՀ-ում Ֆրանսիայի դեսպանի հայտարարություններին |factor.am|

factor.am: Ադրբեջանի ԱԳՆ մամուլի խոսնակ Այխան Հաջիզադեն արձագանքել է ՀՀ-ում Ֆրանսիայի դեսպան Օլիվիե Դըկոտինյիի՝ Հայաստանի Հանրային ռադիոյին տված հարցազրույցին։ Հաջիզադեն նշել է, թե ֆրանսիական կողմը, իբր, խեղաթյուրում է իրականությունը և շահագրգռված չէ տարածաշրջանում կայուն և իրական խաղաղության հաստատմամբ։ «Այն փաստը, որ Հայաստանում Ֆրանսիայի դեսպան Օլիվիե Դըկոտինյին հերթական անգամ կասկածի տակ է դնում Ադրբեջանի իրավական միջոցները, որոնք վերջ են դնում մեր տարածքների օկուպացիային և անջատողականությանը, մեղադրում է Ադրբեջանին հայկական տարածքների օկուպացիայի մեջ, խրախուսում է Հայաստանի ռազմականացումը, ոչ ճիշտ հղումներ է անում միջազգային դատարանի որոշումներին, հայտարարություններ անում ի պաշտպանություն Հայաստանի ոչ լիարժեք խաղաղության գաղափարների, վկայում են այն մասին, թե ինչպես է ֆրանսիական կողմը խեղաթյուրում իրողությունները և շահագրգռված չէ տարածաշրջանում կայուն և իրական խաղաղության հաստատմամբ»,- նշել է նա։ Ըստ Հաջիզադեի՝ Ֆրանսիայի Եվրոպայի և արտաքին գործերի նախարարությունը միջոցներ չի ձեռնարկում, որպեսզի դեսպանը կենտրոնանա ոչ թե հայ-ֆրանսիական հարաբերությունների վրա, այլ «Ադրբեջանի դեմ զրպարտչական արշավի վրա, ինչն առաջին հերթին Ֆրանսիայի արտաքին քաղաքականության ձախողման արդյունքն է»։ «Սրա հետ մեկտեղ, 33 տարի Հայաստանի կողմից օկուպացված Ղազախի շրջանի չորս գյուղերի վերադարձի համար Ադրբեջանի պատասխան գործողությունների կարևորության մասին անհիմն կարծիքը միջազգային իրավունքի նորմերի և սկզբունքների նկատմամբ ֆրանսիական կողմի անհարգալից վերաբերմունքի վառ օրինակ է։ Եթե ֆրանսիական կողմը շահագրգռված է խաղաղությամբ ու կայունությամբ, ապա պետք է վերջ դնի նման անհեթեթ մոտեցումներին ու հայտարարություններին»,- ասվում է հայտարարության մեջ։

20:10 - 24 փետրվարի, 2025

Ջեյհուն Բայրամովն աշխատանքային այցով մեկնել է Թուրքիա |azatutyun.am|

azatutyun.am: Ադրբեջանի արտաքին գործերի նախարար Ջեյհուն Բայրամովն աշխատանքային այցով մեկնել է Անկարա՝ մասնակցելու Ադրբեջանի, Թուրքիայի և Ուզբեկստանի արտաքին գործերի, էկոնոմիկայի/առևտրի և տրանսպորտի նախարարների երկրորդ եռակողմ հանդիպմանը։ Ինչպես հաղորդում է APA-ն, այցի շրջանակներում Բայրամովը ելույթ կունենա եռակողմ հանդիպմանը, ինչպես նաև նախատեսվում են մի շարք բարձր մակարդակի երկկողմ հանդիպումներ։

09:29 - 29 հունվարի, 2025

ՌԴ ԱԳՆ-ն տարակուսանք է հայտնել ադրբեջանական ԶԼՄ-ներում հակառուսական հրապարակումների վերաբերյալ |1lurer.am|

1lurer.am: Ռուսաստանի արտաքին գործերի նախարարի տեղակալ Միխայիլ Գալուզինը արտգործնախարարությունում ընդունել է Ադրբեջանի արտակարգ և լիազոր դեսպան Ռահման Մուստաֆաևին: «Ռուսական կողմն ընդգծել է 2022 թվականի փետրվարի 22-ին բարձր մակարդակով ստորագրված հռչակագրի հիման վրա Ռուսաստանի և Ադրբեջանի միջև ռազմավարական գործընկերության և դաշնակցային ոգով հարաբերությունների կառուցման անվերապահ կարևորությունը՝ ի շահ երկու պետությունների ազգային շահերի։ Այս կապակցությամբ տարակուսանք է հայտնվել ադրբեջանական ԶԼՄ-ներում հակառուսական ուղղվածության վերջին հրապարակումների շարքի, ինչպես նաև Բաքվում «Ռուսական տան» դեմ ապատեղեկատվական արշավի կապակցությամբ: Նշվել է հնչած մեղադրանքների բացարձակ անհիմն լինելը»,- ասված է ՌԴ ԱԳՆ հաղորդագրության մեջ։ Քննարկվել է նաև 2024 թվականի դեկտեմբերի 25-ին Ղազախստանի Ակտաու քաղաքի մոտակայքում «Ադրբեջանական ավիաուղիների» ինքնաթիռի վթարի թեման: Ընդգծվել է պաշտոնական հետաքննությունն ավարտելու և դրա արդյունքների հրապարակման անհրաժեշտությունը:

12:27 - 28 հունվարի, 2025

Բայրամովը ԱՄՆ դեմոկրատ ադմինիստրացիային մեղադրել է կողմնակալության մեջ Հայաստանին աջակցելու առումով

Ադրբեջանի արտաքին գործերի նախարար Ջեյհուն Բայրամովը անդրադարձել է ՀՀ-ի և ԱՄՆ-ի միջև ռազմավարական գործընկերության մասին փաստաթղթի ստորագրմանը: Նա լրագրողների հետ զրույցում հայտնել է, որ չի ցանկանում մեկնաբանել երկու երկրների միջև հարաբերությունները՝ միաժամանակ նշելով. «Բայց 2024 թվականին մենք ականատես եղանք միակողմանի մոտեցման․ տեսել ենք Հայաստանին միակողմանի աջակցության փաստեր, հատկապես ԱՄՆ դեմոկրատական վարչակազմի, բայց նաև որոշ եվրոպական մայրաքաղաքների կողմից։ Անցյալ տարվա ապրիլին պաշտոնական հանդիպում կայացավ ԱՄՆ պետքարտուղարի, Եվրոպական հանձնաժողովի նախագահի և Հայաստանի վարչապետի միջև։ Անընդունելի է իրենց միջնորդ անվանողների միակողմանի մոտեցումը, հատկապես հայ-ադրբեջանական հարաբերությունների կարգավորման գործընթացի ինտենսիվ փուլում»:

15:13 - 20 հունվարի, 2025

Բայրամովը Վրաստանի ԱԳ նախարարին է ներկայացրել ՀՀ-Ադրբեջան խաղաղության գործընթացում առկա խնդիրները |factor.am|

factor.am: Բաքվում գտնվող Վրաստանի ԱԳ նախարար Մակա Բոչորիշվիլին հանդիպել է Ադրբեջանի արտգործնախարար Ջեյհուն Բայրամովին։ Ադրբեջանական կողմի հաղորդագրության համաձայն՝ նախ տեղի է ունեցել պաշտոնակիցների առանձնազրույցը, որին արդեն հաջորդել է պատվիրակությունների հանդիպումը ընդլայնված կազմով։ Հանդիպմանը քննարկվել են Ադրբեջանի և Վրաստանի միջև ռազմավարական գործընկերության քաղաքական, պաշտպանական, տնտեսական, էներգետիկ, տրանսպորտի, կապի և հումանիտար ասպեկտները, ինչպես նաև փոխադարձ հետաքրքրություն ներկայացնող տարածաշրջանային և միջազգային անվտանգության հարցեր։ Նշվում է, որ Բայրամովն իր վրաց գործընկերոջը տեղեկացրել է «հետկոնֆլիկտային շրջանում տարածաշրջանի վերակառուցման գործընթացների, ականազերծման և խաղաղության հաստատմանն ուղղված ջանքերի, ինչպես նաև կայուն խաղաղության գործընթացի ճանապարհին առկա խնդիրների մասին»։ Վաղը նախատեսվում է նաև Վրաստանի վարչապետ Իրակլի Կոբախիձեի այցը Ադրբեջան։

17:49 - 16 հունվարի, 2025