Գեւորգ Գորգիսյան

Գեւորգ Սամվելի Գորգիսյանը (1986 հունվարի 23, Երեւան) ՀՀ ԱԺ 6-րդ եւ 7-րդ գումարման պատգամավոր է («Լուսավոր Հայաստան» կուսակցություն): ՀՀ ԱԺ «Լուսավոր Հայաստան» խմբակցության քարտուղարն է, ԱԺ Պաշտպանության եւ անվտանգության հարցերի մշտական հանձնաժողովի անդամ։

2007-2009թթ. ծառայել է ՀՀ զինված ուժերում: 2003թ. ընդունվել է Հայաստանի պետական ճարտարագիտական համալսարանի քոմփյութերային համակարգերի եւ ինֆորմատիկայի ֆակուլտետ, 2005թ.՝ տեղափոխվել «Սինոփսիս Արմենիա» ընկերության ուսումնական դեպարտամենտ եւ ավարտել 2007թ.: 2011թ. ավարտել է «Սինոփսիս Արմենիա» ուսումնական դեպարտամենտի մագիստրատուրան։

2007-ին աշխատել է «Հայնախագիծ» ԲԲԸ կրտսեր ծրագրավորող, 2009-ին՝ որպես նույն ընկերության ծրագրավորող։ 2010-2014թթ. աշխատել է «Ալտակոդ» ընկերության վեբ ծրագրավորող։ 2015-2017թթ.՝ «IAM Cloud» անգլիական ընկերության վեբ դեպարտամենտի ղեկավար։

2013-2014թթ. եղել է «ԴԵ՛Մ ԵՄ» նախաձեռնության համակարգող խմբի անդամ, 2015թ.` «Լուսավոր Հայաստան» նախաձեռնության համակարգող խմբի անդամ, նույն թվականին ընտրվել է «Լուսավոր Հայաստան» կուսակցության խորհրդի անդամ։ 2017-2019թթ.՝ ԱԺ պատգամավոր (թիվ 2 ընտրատարածք, «Ելք» կուսակցությունների դաշինք)։

2018թ. դեկտեմբերի 9-ին ԱԺ պատգամավոր է ընտրվել «Լուսավոր Հայաստան» կուսակցության թիվ 2 ընտրատարածքի տարածքային ընտրական ցուցակով:

Գևորգ Գորգիսյանն ընտրվել է «Լուսավոր Հայաստան» կուսակցության փոխնախագահ

Հունիսի 28-ին գումարվել է «Լուսավոր Հայաստան» կուսակցության Կառավարման և Քաղաքական խորհուրդների համատեղ նիստ, որի ժամանակ Գևորգ Գորգիսյանը կառավարման խորհրդի անդամների ձայների գերակշիռ մեծամասնությամբ ընտրվել է կուսակցության փոխնախագահ։ Նիստի ընթացքում քննարկվել և որոշումներ են կայացվել կուսակցական մարմինների և տարածքային կառույցների հետագա գործունեության, կուսակցության անելիքների վերաբերյալ։

16:16 - 29 հունիսի, 2021

Գորգիսյանը ներկայացրեց գյուղատնտեսական ոլորտի խնդիրները լուծելու ԼՀԿ-ի ծրագիրը |armenpress.am|

armenpress.am: «Լուսավոր Հայաստան» կուսակցությունը արտահերթ խորհրդարանական ընտրություններում հաջողության հասնելու պարագայում նախատեսում է գյուղատնտեսական ոլորտում էական փոփոխություններ կատարել՝ գյուղացուն զերծ պահելով հնարավոր բոլոր ռիսկերից: Այս մասին ասացին կուսակցության ընտրական ցուցակի անդամները: Քարոզարշավի շրջանակում քաղաքացիների հետ շփումից ԼՀԿ-ն նկատել է՝ մարդկանց համար լրջագույն խնդիրներ են շարունակում մնալ անվտանգությունն ու տնտեսական հարցերը: Անի Սամսոնյանն ասաց, որ մարզերում մարդիկ հիմնականում բողոքում են գյուղատնտեսական ոլորտի խնդիրներից, նրանք բողոքում են, որ չկա Գյուղատնտեսության նախարարություն: «Մենք այնքան պայքար էինք մղում, որ չփակեն նախարարությունը: Հիմա բոլորը խոսում են նախարարությունը բացելու մասին: Այն ժամանակ, երբ մենք խորհրդարանում կռիվ էինք տալիս, ոչ մեկը չէր մտածում աջակցել ԼՀԿ-ին»,- ասաց Սամսոնյանն ու հավելեց, որ գյուղացիները բողոքում են, որ բերքը ցանելու, շուկայում իրացնելու խնդիրներ կան: Գևորգ Գորգիսյանն ակտիվորեն ներգրավված է եղել ԼՀԿ-ի՝ գյուղատնտեսական ծրագրերը մշակելու գործում: Նա ներկայացրեց կուսակցության տեսլականը՝ գյուղատնտեսական խնդիրների, գյուացու խնդիրների լուծման համար: «Հիմա, փաստացի, գյուղացու վրա է մնացել ամբողջ բեռը՝ ուսումնասիրել շուկան, հասկանալ, թե ինչի պահանջարկ կա, ինչ սերմացու, ինչ պարարտանյութ ընտրել, ինչպես հավաքել, ինչպես իրացնել: Դա մի մարդը, նույնիսկ մի ֆերման չի կարող անել: Եվ մենք առաջարկում ենք պետություն-մասնավոր համագործակցությամբ ստեղծել կառույց, համակարգ, որը տալու է գյուղացուն ամեն ինչ, գյուղացուն մնալու է միայն ցանել, հավաքել, իրացումն իրականացնելու է այդ կազմակերպությունը, համակարգը»,- ասաց Գորգիսյանն ու հավելեց՝ գյուղացուն զերծ են պահելու բոլոր հնարավոր ռիսկերից: Դավիթ Խաժակյանն էլ խոսելով կուսակցության շանսերից՝ նշեց, որ իրենք բարձր են գնահատում ԼՀԿ-ի շանսերը: «Բոլոր հարցումները ցույց են տալիս, որ եթե մի կողմ դնենք նախկին և ներկա իշխանություններին, ապա միակ այլընտրանքի հնարավորությունը «Լուսավոր Հայաստանն է»,- ասաց նա:

12:45 - 15 հունիսի, 2021

Ընտրվելու դեպքում ԼՀԿ-ն նախատեսում է ընդլայնել նախագահի և ԱԺ-ի լիազորությունները |armenpress.am|

armenpress.am: Ընտրապայքարում հաջողության հասնելու դեպքում «Լուսավոր Հայաստան» կուսակցությունը նախատեսում է ընդլայնել նախագահի և խորհրդարանի լիազորությունները: Այս մասին ասացին կուսակցության ցուցակի անդամները Աջափնյակ համայնքում քարոզարշավի շրջանակում լրագրողների հետ զրույցում: «Լուսավոր Հայաստանը» քարոզարշավին մասնակցում է «Կա այլընտրանք, քվեարկիր» յուրահատուկ կարգախոսով` համախմբելու, ազգային համերաշխություն ձևավորելու, ազգային համերաշխության կառավարություն ձևավորելու և համատեղ ուժերով երկիրն այս իրավիճակից հանելու համար»,-ասաց Գևորգ Գորգիսյանը: Անդրադառնալով ծրագրի դրույթներից մեկին, որով ԼՀԿ-ն հաջողության հասնելու դեպքում նախատեսում է ընդլայնել նախագահի և խորհրդարանի լիազորությունները՝ Գորգիսյանն ասաց. «Մենք հիմա ունենք սուպերվարչապետական համակարգ, ինչը բերել է նրան, որ կա վարչապետ՝ չփոխզսպված մեխանիզմներով, գրեթե բացարձակ իշխանությամբ: Խոսքը վարչապետից լիազորությունների մի մասը վերցնելու և նախագահին ու ԱԺ-ին տալու մասին է, որպեսզի ունենանք ավելի հավասարակշռված համակարգ, և մի անձից կախված չլինի երկրի ճակատագիրը»: Անդրադառնալով անվտանգային հարցերի լուծմանը՝ Գորգիսյանը նկատեց, որ որևէ լուրջ խնդիր հնարավոր չէ լուծել պառակտվածության պայմաններում: «Մենք տեսնում ենք, թե ինչ մակարդակի է հասել քարոզարշավը, իրար ոտք ջարդել, ծեծել են խոստանում, իրար անպատվում, հայհոյում են, առաջին հերթին պետք է կարողանանք սա վերացնել: «Լուսավոր Հայաստանն» ամեն ինչ անելու է, որ համերաշխություն լինի, և համատեղ ուժերով կարողանանք առաջ շարժվել »,- ասաց նա ու հավելեց, որ հակառակ դեպքում, եթե ԼՀԿ-ն չունենա բավարար լծակ՝ զսպելու երկու կողմերից եկող լարվածությունը, շատ հնարավոր է, որ հունիսի 20-ից հետո լինեն բախումներ: Անի Սամսոնյանն էլ հավելեց, որ անվտանգության կարևոր բաղադրիչը ԼՀԿ-ի համար պետական սահմանի պաշտպանությունն է: ԼՀԿ-ի պատկերացմամբ՝ պետական սահմանի պաշտպանությունը պետք է իրականացնեն ոչ թե ժամկետային զինծառայողները, այլ՝ պրոֆեսիոնալ պայմանագրայինները: «Եվ ամբողջ սահմանը պետք է կահավորվի ժամանակակից հատուկ ինժեներատեխնիկական սարքավորումներով, որպեսզի չբարձրանա հարցը, թե արդյոք Հայաստանն ունի՞ այդքան ռեսուրս, զինվոր, որ կարողանա պատերազմից հետո նոր ձևավորված սահմանը պաշտպանել»:

12:27 - 09 հունիսի, 2021

Հայաստանն ունի շատ խնդիրներ և դրանք մի ուժ չի կարող լուծել, կկարողանանք բոլորին հավաքել մի սեղանի շուրջ և ասել՝ կառուցելու ժամանակն է. Գևորգ Գորգիսյան |tert.am|

tert.am: Գևորգ Գորգիսյանի նախընտրական ելույթ է ունեցել Սյունիքի մարզի Գորիս համայնքի բնակիչների հետ հանդիպման ժամանակ: Գորգիսյանը նշել է՝ճգնաժամերը պետք է հաղթահարել՝ դրանցից դասեր քաղելով ու ուժեղացած: «Ծրագրերը շատ են, որոնք կարելի է կյանքի կոչել հունիսի 21-ից սկսած, բայց դրա համար պետք է հանրային համերաշխություն, պետք է, որ ժողովուրդը տա Լուսավոր Հայաստանին այդ մանդատը՝թույլ չտալու միմյանց վերացնել ցանկացող ուժերին՝ վերացնել երկիրը: Կկարողանանք բոլորին հավաքել մի սեղանի շուրջ և ասել՝ կառուցելու ժամանակն է: Հայաստանն ունի շատ խնդիրներ և դրանք մի կուսակցություն ու մի ուժ չի կարող լուծել: Լուսավոր Հայաստանը մասնակցում է ընտրություններին հանրային համերաշխության գաղափարախոսությամբ»,- ասաց Գորգիսյանը:

12:44 - 08 հունիսի, 2021

Ակտիվացնել ԵԱՀԿ ՄԽ համանախագահների աշխատանքը․ Արցախի հարցով «Լուսավոր Հայաստան»-ի ծրագիրը |armenpress.am|

armenpress.am: Հանուն Արցախի ժողովրդի ինքնորոշման իրավունքի կեսագործման և Լեռնային Ղարաբաղի հակամարտության հայանպաստ լուծման պետք է ակտիվացնել ԵԱՀԿ Մինսկի խմբի համանախագահների աշխատանքները։ Մայիսի 23-ի կուսակցության 3-րդ համագումարի ժամանակ այս մասին ասաց «Լուսավոր Հայաստան» կուսակցության կառավարման խորհրդի անդամ, Ազգային ժողովի պատգամավոր Գևորգ Գորգիսյանը՝ ներկայացնելով իրենց կուսակցության ծրագիրը։ «Հետևողական քայլեր կատարել Արցախի բռնազավթած տարածքների վերադարձի և գործուն քայլեր ձեռնարկել պատերազմական հանցագործությունների համար Ադրբեջանի ռազմաքաղաքական ղեկավարություններին պատասխանատվության ենթարկելու նպատակով»,- ասաց Գորգիսյանը։ Նրա խոսքով՝ հանուն արդարության և ճշմարտության, հանուն հանրային համերաշխության վերակագնման և դասեր քաղելու «Լուսավոր Հայաստան»-ը խոստանում է, որ ստեղծելու է 2020 թվականի Արցախյան 44-օրյա պատերազմը ուսումնասիրող պարիտետային հանձնաժողով։ «Նաև խոստանում ենք, որ ձեռնարկելու ենք բոլոր քայլերը պատշաճ ապահովելու զոհված և վիրավորած զինծառայողների և նրանց ընտանիքների կարիքները»,- եզրափակեց Գորգիսյանը։

14:24 - 23 մայիսի, 2021

Չկա արցախյան հարց, կա Հայաստանի, հայ ժողովրդի միացյալ անվտանգության հարց․ Գևորգ Գորգիսյան |lragir.am|

lragir.am: «Ադրբեջանի ու նրան աջակցող Թուրքիայի նպատակը Հայաստանից 1-2 կիլոմետր վերցնելը չէ, նրանց նպատակը հայ ժողովրդին բնաջնջելն է, հայոց պետականության վերացումն է և սա որևէ կերպ թույլ չենք տալու», – Ազգային ժողովի արտահերթ նիստում նշեց Լուսավոր Հայաստան խմբակցության պատգամավոր Գևորգ Գորգիսյանը։ «Մենք պետք է մեր անվտանգությունն այս մոտեցմամբ կառուցենք ու ինքներս մեզ համար սահմանենք, որ չկա արցախյան հարց, կա Հայաստանի, հայ ժողովրդի միացյալ անվտանգության հարց, չկա Սյունիքի կամ Գեղարքունիքի սահման, կա Հայաստանի Հանրապետության սահման և Հայաստանի Հանրապետության անվտանգության հարց և այդ անվտանգությունն այսօր վտանգված է, և բոլոր միջոցները պետք է ձեռնարկվեն անվտանգությունը վերականգնելու համար և ամենքս մեր ուժերի ներածի չափով պիտի լծվենք այդ առաքելությանը՝ վերականգնելու Հայաստանի Հանրապետության անվտանգությունը», – նշել է Գորգիսյանը։

22:10 - 14 մայիսի, 2021

Բանակցություններ որևէ ուժի հետ չունենք. Գորգիսյանը՝ Մարուքյանի՝ նախկին ուժերին ուղղած կոչի մասին |armtimes.com|

armtimes.com: «Հայտարարությունն արվել է հրապարակային: Առանձին բանակցություններ որևէ ուժի հետ այս փուլում չունենք: Եթե լինեն բանակցություններ, մենք դա կուլիսային չենք անի»: Այսօր ԱԺ-ում անդրադառնալով Էդմոն Մարուքյանի այն հայտարարությանը, որտեղ վերջինս առաջարկեց Ռոբերտ Քոչարյանին և մյուս ընդդիմադիր ուժերին մի կողք քաշվել, որպեսզի իրենք Փաշինյանի ուժին դարձնեն քիփլիկ ընդդիմադիր խմբակցություն, ասաց ԼՀԿ պատգամավոր Գևորգ Գորգիսյանը: «Բայց ես ուզում եմ հիշեցնել 2020 թվականի «Այո», «Ոչ»-ի քարոզարշավին մեր կոչին հետևեցին քաղաքական ուժերը, և ոչ ոք չձևավորեց «Ոչ»-ի ճամբարը, և այդպիսով քարոզարշավը վերացվեց ֆարսի, քանի որ Փաշինյանը չուներ հակառակորդ ում իր սովորության համաձայն պետք է «թաղեր»: Նա ուղղակի չէր կարողանում քարոզարշավ անել»,- նկատեց պատգամավորը: Շարունակությունը՝ armtimes.com-ում։

13:06 - 20 ապրիլի, 2021

Հույս ունեմ, որ Ընտրական օրենսգրքի փոփոխության փաթեթը չեն բերի խորհրդարան․ Գևորգ Գորգիսյան |tert.am|

tert.am: Հույս ունեմ, որ այնքան խելամտություն կունենան, որ Ընտրական օրենսգրքի փոփոխության փաթեթը չեն բերի խորհրդարան, որովհետև, ըստ բոլոր հաշվարկների, Փաշինյանը պետք է ամսի 25-26-ին հրաժարական տա, իսկ դա կնշանակի Ընտրական օրենսգրքի փոփոխություն, երբ վարչապետն արդեն հրաժարական է տվել, ինչն աբսուրդ է, հուսով եմ, որ իրենք այդ ծայրահեղ հիմարությունը չեն անի. այսօր լրագրողների հետ զրույցում նշեց ԼՀԿ պատգամավոր Գևորգ Գորգիսյանը: Հարցին, թե Օնիկ Գասպարյանը դիմել է ԱԺ, որ քննիչ հանձնաժողով ստեղծվի, ի՞նչ ապագա կունենա դիմումը, նա նշեց. «Եթե հիմա ստեղծվի քննիչ հանձնաժողով, այն պետք է ղեկավարի Անդրանիկ Քոչարյանը և այնտեղ 11 հոգուց 7-ը պետք է լինեն իմքայլական, դա նպատակահարմար չէ, վստահ էլ չեմ, որ մենք պաշտոնապես այդ նամակը ստացել ենք: Իսկ մենք առաջարկել էինք պարետետային հանձնաժողով ստեղծել, որը պետք է հավասար մասնաբաժնով բաղկացած լիներ խորհրդարանական ուժերից, ՄԻՊ-ի գրասենյակից, որը մերժվել է: Այն մարդիկ, ովքեր ամբողջ պատերազմի ժամանակ սատարել են վարչապետի բոլոր գործողություններին, որևէ կերպ շահագրգիռ չեն լինելու, որ որևէ խնդիր բացահայտվի»:

12:25 - 19 ապրիլի, 2021

«Դուք մոդեռատո՞ր էիք, թե՞ վարչապետ ու գլխավոր հրամանատար». Գորգիսյանը` Փաշինյանին |hetq.am|

hetq.am: Խորհրդարանում շարունակվում է կառավարության 2020 թվականի գործունեության կատարողականի քննարկումը: Քննարկման հիմնական առանցքը արցախյան երկրորդ պատերազմն է: «Լուսավոր Հայաստան» խմբակցության քարտուղար Գևորգ Գորգիսյանը, դիմելով վարչապետ Նիկոլ Փաշինյանին, նկատեց, որ ըստ Փաշինյանի ելույթի մեղավոր էին բոլորը, բացի գերագույն գլխավոր հրամանատարից: «Մեղավոր էին նախկինները, Մինսկի խումբը, մեղավոր էր հանրությունը, գեներալները: Ուզում եմ հասկանալ` Դուք Ձեր մեղքի բաժինը չեք տեսնում պատերազմում, տեղի ունեցածում: Ի՞նչ է նշանակում գեներալները որոշում էին, ես մոդեռացիա էի անում, դուք բազմիցս հայտարարում էիք` Դուք եք գլխավոր հրամանատարը, և հիմա փաստորեն գեներալներն էին որոշել: Դուք մոդեռատոր էիք, թե՞ վարչապետ ու գլխավոր հրամանատար»,- ասաց նա` դիմելով Փաշինյանին: Նիկոլ Փաշինյանն արձագանքեց` դեռ առաջին օրից հայտարարել է, որ ինքն է թիվ մեկ պատասխանատուն: «Եւ այո, ես ունեմ մեղավորության իմ բաժինը, եթե ուզում եք ամենամեծ բաժինը: Ես ասում եմ` էս պարտությունն իմն է, հաղթանակը` մնացած բոլորին, պարտությունը` ինձ, բայց դա չի նշանակում, որ ոմանք պետք է առիթավորվեն, ասեն ինչ կա` լցնենք իր վրա: Ինչ վերաբերում է մոդեռացիային, այո հրամանատարի գործառույթն է նաև լսել կարծիքներ, ես ինձ իրավունք չեմ վերապահել մտնել ռազմական գործի նրբություների մեջ, որովհետև համարել եմ, որ որպես երկրի ղեկավար պետք է հենվեմ հնչած կարծիքների վրա»,- ասաց Փաշինյանը: Ըստ նրա` այդ օպերացիան չի եղել Լելե-Թեփե սարը գրավելու վերաբերյալ, այլ` իններորդ պաշտպանական շրջանի հարավային հատվածում առաջացած ճեղքման սեկտորը փակելու վերաբերյալ: Փաշինյանի խոսքով` անիմաստ են այն շահարկումները, թե այդ օպերացիան քաղաքական դիվիդենտ շահելու նպատակ է հետապնդել: «Ձեր պահվածքից, հռետորաբանությունից որևէ կերպ չի զգացվում, որ մեղավոր եք Ձեզ զգում: Դուք փորձում եք արդարանալ, և էդ ճանապարհին անընդհատ վնաս եք հասցնում Հայաստանին»,- հակադարձեց Գորգիսյանը:

13:32 - 14 ապրիլի, 2021

Զինվորական ծառայության տարիքային շեմը կբարձրացվի. օրինագիծը ստացավ դրական եզրակացություն

««Զինվորական ծառայության եւ զինծառայողի կարգավիճակի մասին» ՀՀ օրենքում փոփոխություններ կատարելու մասին» օրենքի նախագիծը, որը հեղինակել է ԱԺ «Լուսավոր Հայաստան» խմբակցությունը, երկրորդ ընթերցմամբ քննարկվեց ԱԺ պաշտպանության եւ անվտանգության հարցերի մշտական հանձնաժողովի ապրիլի 9-ի նիստում: ԱԺ ընդդիմադիր խմբակցությունն առաջարկում է բարձրացնել զինվորական ծառայության տարիքային շեմը՝ սահմանելով պայմանագրայինների համար մինչեւ 63 տարեկանը, իսկ բարձրագույն սպայական կազմի «գեներալ-գնդապետ» եւ «բանակի գեներալ» զինվորական կոչումներ ունեցող զինծառայողների համար՝ մինչեւ 65 տարեկանը: Կառավարությունն առաջարկել է սպայական եւ շարքային կոչումների համար սահմանել տարբեր տարիքային շեմեր: Ըստ այդմ՝ գործող օրենքում ամրագրված 40 տարեկանն առաջարկվում է դարձնել 45, 45 տարեկանը՝ 50: Կրտսեր սպայական կազմի համար առաջարկվում է 48-ը 52 տարեկան դարձնել, ավագ սպայական կազմի համար՝ 50-ը 58: Ավելի բարձր կոչումների համար տարիքային շեմը թողնվել է անփոփոխ: Կառավությունն առաջարկել է համաչափորեն բարձրացնել նաեւ պահեստազորայինների տարիքային շեմը՝ դարձնելով 48-ից 53, 50-ից 55, 55-ից 58 եւ 58-ից 60 տարեկան: Ըստ հիմնական զեկուցող Գեւորգ Գորգիսյանի՝ գործադրի ներկայացրած առաջարկների վերաբերյալ առարկություններ չունեն: Պատգամավորը նշեց, որ կան քաղաքացիներ, որ անհամբեր սպասում են օրենքի ընդունմանը: Հարակից զեկուցող Արմեն Խաչատրյանը նշեց, որ նախագիծը շատ կարեւոր ու հրատապ է եւ պաշտպանության առումով լուրջ խնդիր է լուծում: Նա հորդորեց դրական եզրակացություն տալ օրինագծին: Պատգամավորի հորդորն ընդունվեց, եւ օրենքի նախագիծն արժանացավ հանձնաժողովի հավանությանը:

15:24 - 09 ապրիլի, 2021

Ապրիլյան հանձնաժողովի ուսումնասիրության շրջանակներում կա բավարար նյութ, որ Արտակ Դավթյանի դեմ քրգործ հարուցվի և նա ստիպված լինի պարզաբանումներ տալ. Գևորգ Գորգիսյան |tert.am|

tert.am: Այն, որ Ապրիլյան քառօրյա պատերազմի հանգամանքներն ուսումնասիրող քննիչ հանձնաժողովի ամփոփիչ զեկույցը չի հրապարակվել, իշխող խմբակցության նախաձեռնությունն է՝ քաղաքական նպատակահարմարությունից ելնելով, որովհետև այդտեղ կային խնդիրներ, որոնք բացահայտվել էին 2016 թվականին և չէին շտկվել մինչև 2020 թվականի պատերազմը. այսօր լրագրողների հետ զրույցում ասաց «Լուսավոր Հայաստան» խմբակցության անդամ Գևորգ Գորգիսյանը:«Իրենց ձախողումները և կորուստները վերջին պատերազմում անհամեմատելի են 2016 թվականի պատերազմի հետ, որտեղ մենք կարողացանք կասեցնել հակառակորդի գրոհները, իսկ այս անգամ փաստացի չկարողացանք: Այն քաղաքական արդյունքը, որ իրենք ուզում էին ստանալ, դա Սերժ Սարգսյանի պարտված, ձախողված առաջնորդ կերպարի ստեղծումն էր, փաստորեն չեն կարողանալու, որովհետև իրենք շատ ավելի ձախողված են այդ ֆոնին դուրս գալիս և, հետևաբար, զեկույցը չի հրապարակվում քաղաքական նկատառումներից ելնելով»,- նշեց նա: Գևորգ Գորգիսյանը նշեց, որ իրենց խմբակցությունն առաջարկել է, որ զեկույցը բաղկացած լինի մի քանի մասից՝ ուղղված Պաշտպանության նախարարությանը, իրավապահ մարմիններին, ԱԱԾ-ին և ԱԺ-ին, իսկ մի մասը՝ հանրությանը, որպեսզի փարատի բոլոր այն կասկածները և թունավոր նյութերը, որոնք ժամանակին սփռվեցին դաշտ՝ բարոյազրկելու և արժեզրկելու մեր բանակը:Հարցին, թե իշխող ուժից քննադատում էին ԳՇ պետ Արտակ Դավթյանին, Ձեր կարծիքով, ինչո՞ւ նրան վերանշանակեցին այդ պաշտոնում, Գորգիսյանն ասաց․ «Ապրիլյան հանձնաժողովի շրջանակներում, կարծում եմ, կա բավարար նյութ, որ նրա դեմ քրեական գործ հարուցվի և նա ստիպված լինի պարզաբանումներ տալ, ինչո՞ւ է ինքը մեղավոր, նույնը կա նաև վերջին պատերազմի ընթացում: Մերժեցին, մեր առաջարկած պարիտետային հանձնաժողովի ստեղծումը, որովհետև բազմաթիվ էին հիմքերը, որ նույն Արտակ Դավթյանը պետք է դատվի՝ պետական ռեսուրսները ոչ արդյունավետ օգտագործելու համար: Երբ նա ԳՇ պետ էր, այդ շրջանում մենք գնել ենք զենքեր, որ մենք որևէ կերպ չէինք կարողանալու օգտագործել և շարքից հանել ենք զենքեր, որոնք մենք կարող էինք օգտագործել և մեզ պետք էին լինելու»: Շարունակությունը՝ tert.am-ում

16:25 - 08 ապրիլի, 2021

«Լուսավոր Հայաստանն» արտահերթ ընտրություններին մասնակցելու է ցանկացած ընտրակարգով. Գորգիսյան |1lurer.am|

1lurer.am: 2016-ից «Լուսավոր Հայաստան» կուսակցությունն առաջարկել է ընտրություններն անցկացնել բաց համամասնական ցուցակով. 2018-ին, երբ քննարկվում էր Ընտրական օրենսգիրքը, էլի առաջարկել ենք ընտրության գնալ նույն ընտրակարգով: Այս մասին ԱԺ ճեպազրույցների ժամանակ ասաց «Լուսավոր Հայաստան» խմբակցության քարտուղար Գևորգ Գորգիսյանը՝ նշելով, որ իշխանությունն առաջարկում է ընտրություն փակ համամասնական ընտրակարգով: «Խաղի կանոնները պրոցեսի ընթացքում փոխել չի կարելի, ինչքան էլ ընտրակարգի փոփոխությամբ գործընթացը պարզեցվի կամ հեշտացվի: Նախագիծը, որը դրված է շրջանառության մեջ, վերջնական չէ, և մենք պատրաստվում ենք գրավոր առաջարկներ ներկայացնել»,- ասաց Գորգիսյանը: Նա նշեց, որ ԼՀԿ-ի համար կարևոր է ընտրությունները չհետաձգելը, կարևոր է դրանց լեգիտիմությունը, կարևոր է երկրում լարվածության թոթափումը: «Ինչ էլ որոշի իշխանությունը, միևնույն է՝ ԼՀԿ-ն մասնակցելու է ընտրություններին և հաղթելու է ցանկացած ընտրակագով»,- ընդգծեց պատգամավորը: Գորգիսյանը հայտնեց, որ վարչապետի հետ պայմանավորվածություն ԸՕ-ի փոփոխության մասով չի եղել, ԼՀԿ-ն, ըստ նրա, պայմանավորվել է միայն արտահերթ ընտրությունների անցկացման շուրջ:

12:52 - 26 մարտի, 2021

Գևորգ Գորգիսյանը մանրամասներ հայտնեց ԱԱԾ հրավիրվելու առնչությամբ |armenpress.am|

armenpress.am: ՀՀ ազգային ժողովի «Լուսավոր Հայաստան» խմբակցության պատգամավոր Գևորգ Գորգիսյանն Ազգային անվտանգության ծառայություն է հրավիրվել՝ որպես վկա: Այս մասին Գորգիսյանն ասաց ԱԺ-ում լրագրողների հետ զրույցում՝ մանրամասներ ներկայացնելով նախորդ օրը «Ֆեյսբուք»-ի իր էջում կատարած գրառումից: «Ինչպես հասկացա ԱԱԾ-ից ստացված նամակից, նոյեմբերի 9-10-ի օրերին ԱԺ քաղաքացիների մուտք գործելու հետ կապված գործի ուսումնասիրության շրջանակներում ինձ հրավիրել են որպես վկա: Դեռ չեմ գնացել, մոտ ապագայում կայցելեմ»,-ասաց Գորգիսյանն ու հավելեց, որ չգիտի, թե ինչ են ուզում հարցնել իրենից: Պատգամավորը կապի մեջ է քննիչի հետ, քառօրյա նիստից հետո կպայմանավորվի, կգնա:

12:50 - 23 մարտի, 2021

Հիմա Ընտրական օրենսգիրք փոխելը հղի է խնդիրներով. ԼՀԿ-ական պատգամավոր |1lurer.am|

1lurer.am: Ընտրական օրենսգրքի մասով որևէ պայմանավորվածություն ձեռք չի բերվել, բայց ենթադրվել է, որ գործող խաղի կանոններով ենք գնում առաջ՝ հայտարարեց ԱԺ «Լուսավոր Հայաստան» խմբակցության պատգամավոր Գևորգ Գորգիսյանը լրագրողների հետ ճեպազրույցում: «Երկու տարի ժամանակ կար Ընտրական օրենսգիրքը փոխելու: 2019 թվականի գարնանը ստեղծվել է հանձնաժողով, որում նաև ես եմ ներգրավված եղել: Բազմաթիվ առաջարկներ ենք ներկայացրել, մի մասն ընդունվել է, մի մասը՝ չէ: Հիմա Ընտրական օրենսգիրք փոխելը հղի է լրջագույն խնդիրներով և, առաջին հերթին, հարցականի տակ է դնելու ընտրությունների լեգիտիմությունը: Ցանկացած կուսակցություն, ով հաջողության չհասավ ընտրություններով, կարող է որպես պատճառ բռնել Ընտրական օրենսգրքի փոփոխությունը, և տոտալ պրոցեսը կդելիգիտիմացնի»,- ասաց պատգամավորը: Նա անդրադարձավ քննադատություններին, թե ռեյտինգային ընտրակարգի պահպանման դեպքում խորհրդարանում կարող են հայտնվել քրեական տարրեր: «Ռեյտինգային համակարգն առաջին անգամ կիրառվեց 2017 թ., ՀՀԿ-ն հաղթեց: Դրանից մեկ ամիս հետո Երևանի ավագանու ընտրություններն անցկացվեցին փակ համամասնական ընտրակարգով, ՀՀԿ-ն հավաքեց ավելի շատ ձայն, բաժանվեց նույնքան փող, ընտրություններին նույնկերպ ներգրավված էին գումար բաժանողներ, թաղային հեղինակություններ, օլիգարխներ: Սա գալիս է ցույց տալու, որ ամեն ինչ կախված է ընտրությունները կազմակերպողներից: Եթե ընտրությունները կազմակերպողները թույլ են տալիս, որ կիրառվի վարչական ռեսուրս, բաժանվի ընտրակաշառք, ներգրավվեն թաղային հեղինակություններ, քրեական տարրեր, ինչ ընտրական կարգով ուզում եք արեք՝ դա լինելու է»,- ասաց նա:

12:37 - 23 մարտի, 2021

Գևորգ Գորգիսյանը հրավիրվել է ԱԱԾ

ՀՀ Ազգային ժողովի «Լուսավոր Հայաստան» խմբակցության պատգամավոր Գևորգ Գորգիսյանը հրավիրվել է Ազգային անվտանգության ծառայություն: Այս մասին Գորգիսյանը գրել է «Ֆեյսբուք»-ի իր էջում: «Վերջը ինձ էլ հերթը հասավ: Հրավիրել են զրուցելու նոյեմբերի 10-ին ԱԺ շենքի գրավման մասին»,- հայտնել է պատգամավորը:

17:33 - 22 մարտի, 2021

Ավինյանը վստահեցնում է՝ կառավարությունը վերացնելու է ծանր տարվա հետևանքները |armenpress.am|

armenpress.am: ՀՀ փոխվարչապետ Տիգրան Ավինյանը վստահեցնում է, որ գործող կառավարությունը միանշանակ վերացնելու է 2020-ի՝ ծանրագույն տարվա հետևանքները: Ավինյանն այս մասին ասաց ԱԺ-ում կառավարության անդամների հետ հարց ու պատասխանի ժամանակ՝ պատասխանելով ԼՀԿ-ից Գևորգ Գորգիսյանի հարցին: Գորգիսյանը մատնանշեց առկա մի շարք խնդիրներ, այդ թվում՝ անհետ կորածների, գերեվարվածների հարցերը: «Այո, դժվար են այն հարցերը և խնդիրները, որ երկրի առջև ծառացած են: Այո, միանշանակ ծանրագույն տարի ենք ունեցել 2020-ին: Բայց ես ձեզ վստահեցնում եմ, միանշանակ եմ ձեզ վստահեցնում, որ հետևանքները միանշանակ վերացվելու են, և մենք նորից վերադառնալու ենք դրական ճանապարհի վրա»,-ասաց Ավինյանն ու հավելեց, որ ինքը համոզված է դրանում: Նրա խոսքով՝ հենց այս կառավարությունն այդ սկիզբը դնելու է: Անդրադառնալով իշխանափոխությանը՝ Ավինյանը նշեց, որ եթե ինչ-որ քաղաքական խմբեր պատկերացնում են, թե սենյակներում պայմանավորվածությունների արդյունքում պետք է ձևավորվի նոր իշխանություն, այդպիսի բան չի լինելու: «Եկեք վերջնականապես արձանագրենք, որ նման բան թույլ չենք տալու մենք: Եթե այս երկրում պետք է ձևավորվի իշխանություն, դա ձևավորվելու է ընտրությունների միջոցով»,-ասաց փոխվարչապետը:

20:00 - 10 փետրվարի, 2021