Համազասպ Դանիելյան

Ծնվել է 1984 թ. նոյեմբերի 15-ին Երեւանում:

2006թ. ավարտել է Երեւանի պետական համալսարանի միջազգային հարաբերություններ ֆակուլտետի քաղաքագիտության բաժինը: Քաղաքական գիտությունների թեկնածու (2009թ.):

Վերապատրաստվել է Բերկլիի (UC Berkeley), Միչիգանի (University of Michigan, Ann Arbor), Կենտրոնական եվրոպական (Central European University) համալսարաններում, Միջազգային հարաբերությունների նորվեգական ինստիտուտում (NUPI): Մեկ տասնյակ գիտական հրապարակումների հեղինակ է:

2005-2006թթ. եղել է Ղ-Տելեկոմ (ՎիվաՍել) ընկերության զանգերի կենտրոնի հաճախորդների սպասարկման բաժնի համակարգող: 2006-2007թթ.՝ «Երիտասարդական նվաճումներ» հկ «Երիտասարդական խորհրդարան» ծրագրի ղեկավար: 2007-2012թթ.՝ «Այ.Էֆ.Ի.Էս» (IFES-International Foundation of Electoral Systems) կազմակերպության հայաստանյան մասնաճյուղի՝ ընտրողների ցուցակների բարելավման, ընտրողների կրթության եւ երիտասարդների ներգրավման հետ կապված նախաձեռնությունների համակարգող: 2009-2016թթ.՝ դասավանդել ԵՊՀ-ում, 2011-2012թթ. եւ 2014-2015թթ.՝ «Այբ» ավագ դպրոցում: 2012 -2015թթ.՝ ԱՄՆ ՄԶԳ «Աջակցություն ՀՀ Ազգային ժողովին» ծրագրի մոնիտորինգի եւ գնահատման մասնագետ, ապա խորհրդարանի վերահսկողական կարողությունների բարելավման բաղադրիչի ղեկավար: 2015-2017թթ.՝ «Սմիթսոնյան Ինսթիթյուշն»-ի (Smithsonian Institution) «Իմ Հայաստան» ծրագրի հետազոտական բաղադրիչի ղեկավար, մոնիտորինգի եւ գնահատման մասնագետ: 2016 -2018թթ.՝ «Գալուստ Կուլպէնկեան հիմնարկության» ներկայացուցիչը Հայաստանում: 2017-2018թթ.՝ «Երիտասարդ փորձագետների ծրագիր Հայաստան»-ի (YES Armenia) ղեկավար:

2011թ.՝ «Հայկական բարձրագույն կրթության նախաձեռնության» համահիմնադիր: 2014 թվականից Քաղաքագետների միջազգային ասոցիացիայի (International Political Science Association) անդամ է: 2019 թվականից՝ ԵՊՀ հոգաբարձուների խորհրդի անդամ:

2018թ. դեկտեմբերի 9-ին ԱԺ պատգամավոր է ընտրվել «Իմ քայլը» կուսակցությունների դաշինքի համապետական ընտրական ցուցակով:

Ռուսաստանն ամեն ինչ անում է, որ Մեղրիում միջանցք պոկի, Իրանի հետ սահմանի երկայնքով միջանք ստանա․ Դանիել Իոաննիսյանը՝ «Ո՛չ ՀԱՊԿ-ին, դուրս ՀԱՊԿ-ից» ակցիայի իր ելույթում

Ռուսաստանն ամեն ինչ անում է, որ Մեղրիում միջանցք պոկի, Իրանի հետ սահմանի երկայնքով միջանք ստանա․ Դանիել Իոաննիսյանը՝ «Ո՛չ ՀԱՊԿ-ին, դուրս ՀԱՊԿ-ից» ակցիայի իր ելույթում

Էն մարդիկ, որոնք հավաքվել կամ հավաքվում են կարծեմ «Դվին» հյուրանոցում, նույնիսկ չեն արձանագրում, որ Ադրբեջանը ներխուժել է ՀՀ տարածք։ Դրանք մարդիկ են, որոնք իրենք են ուզում Հայաստանից կտոր կոպել։ Այս մասին Ազատության հրապարակում «Ո՛չ ՀԱՊԿ-ին, դուրս ՀԱՊԿ-ից» խորագրով բողոքի ակցիայի ժամանակ ասաց «Իրազեկ քաղաքացիների միավորում» հ/կ-ի ծրագրերի համակարգող Դանիել Իոաննիսյանը։ «Արդեն գաղտնիք չի, որ Ռուսաստանն ուզում է ու ամեն ինչ անում է, որ Մեղրիում միջանցք պոկի, Իրանի հետ սահմանի երկայնքով միջանք ստանա։ Հայաստանի Հանրապետության ամեն քառակուսի մետր պետք է լինի ՀՀ ենթակայության, վերահսկողության տակ․ ոչ Ադրբեջանի, ոչ Ռուսաստանի, միայն ՀՀ-ի»,- նշեց Իոաննիսյանը։  Բողոքի ակցիայի ժամանակ ելույթ ունեցավ նաև ժուռնալիստների «Ասպարեզ» ակումբի նախագահ Լևոն Բարսեղյանը․ «Քանի անգամ մենք պիտի առնչվենք դրանց ուխտադրուժ վարքին ու դիրքին, որ համոզվենք, որ ՀԱՊԿ-ը Վալոդի (ՌԴ նախագահ Վլադիմիր Պուտինի-խմբ․) պրոյեկտն է՝ կայսրության վերականգնման, փլուզման ուշացման պրոյեկտը, հնարավոր ջանքերը միշտ ներդրել և ներդնում է, որ վերականգնի իր պատկերացրած փառահեղ կայսրությունը՝ Սովետի տեսքով։ Հիմա Հայաստանը դառնում է դրանց հանդիպումների տարածք․ հազար ու մի հնար կա այսպիսի հանդիպումները այստեղից քշելու հեռու։ Ես մինչև հիմա կարծում եմ, թե վարչապետը մտածում է, թե ՀԱՊԿ-ը կարելի է աշխատեցնել Հայաստանի օգտին, բա էդքան միամիտ լինու՞մ են»,- ասաց Բարսեղյանը։ 
16:03 - 23 նոյեմբերի, 2022
Պատգամավոր Համազասպ Դանիելյանը հրաժարականի դիմում է ներկայացրել

Պատգամավոր Համազասպ Դանիելյանը հրաժարականի դիմում է ներկայացրել

«Ազգային ժողովի կանոնակարգ» սահմանադրական օրենքի 155-րդ հոդվածի 1-ին մասի համաձայն` Հայաստանի Հանրապետության Ազգային ժողովի «Իմ քայլը» խմբակցության պատգամավոր Համազասպ Դանիելյանը հունիսի 9-ին հրաժարականի դիմում է ներկայացրել: «Ազգային ժողովի կանոնակարգ» սահմանադրական օրենքի 155-րդ հոդվածի 2-րդ մասի համաձայն` եթե հրաժարականի հրապարակումից հետո՝ մեկ շաբաթվա ընթացքում, պատգամավորը գրավոր դիմումով հետ է վերցնում հրաժարականի մասին իր դիմումը, ապա Ազգային ժողովի նախագահն այդ մասին հանդես է գալիս հայտարարությամբ, եթե հետ չի վերցնում հրաժարականի մասին իր դիմումը, ապա նրա լիազորությունների դադարման մասին կազմվում է արձանագրություն, որն ստորագրում և հրապարակում է Ազգային ժողովի նախագահը: Արձանագրության հրապարակման պահից հրաժարականը համարվում է ընդունված:
19:40 - 09 հունիսի, 2021
Վտանգի տակ էինք դնելու հունիսի 20-ի ընտրությունները, եթե նախագահը նույն վարքը դրսևորեր և չստորագրեր փաթեթը. պատգամավոր |1lurer.am|

Վտանգի տակ էինք դնելու հունիսի 20-ի ընտրությունները, եթե նախագահը նույն վարքը դրսևորեր և չստորագրեր փաթեթը. պատգամավոր |1lurer.am|

1lurer.am: Նախորդ շաբաթ խորհրդարանի ընդունած Ընտրական օրենսգրքի փաթեթը չի գործի հունիսի 20-ին նախատեսված արտահերթ ընտրությունների համար. հայտարարեց ԱԺ «Իմ քայլը» խմբակցության պատգամավոր Համազասպ Դանիելյանը խորհրդարանական ճեպազրույցների ժամանակ:  «Ինչո՞ւ է այդպես: Մենք սպասեցինք մինչև այդ օրենսդրության վերջին հնարավոր օրը այն հույսով, որ մինչ այդ հստակ կլինի դիրքորոշումը ՀՀ նախագահի կապված այդ փաթեթի հետ, որպեսզի այնտեղ ունենանք այնպիսի բովանդակություն, որ դրա ստորագրումը տեղի ունենար կարճ ժամանակամիջոցում, ինչը միակ հնարավորությունն էր, որ այդ խաղի կանոնները ուժի մեջ մտնեն, մի մասը առնվազն, հունիսի 20-ի համար: Ցավոք սրտի, դա տեղի չունեցավ: Եվ հաշվի առնելով, որ այդ մեծ փաթեթից մենք արդեն իսկ հենց այս ռիսկը հաշվի առնելով առանձնացրել էինք ամենակարևոր բաղադրիչը, որը կապված է ռեյտինգայինը վերացնելու և համամասնականն ընդունելու հետ, անգամ դա չստորագրվեց: Մենք պարզապես վտանգի տակ էինք դնելու հունիսի 20-ի ընտրությունները, եթե նախատեսեինք, որ այդ փոփոխությունների գոնե մի մասը ուժի մեջ էր մտնելու հրապարակման պահից, որովհետև դա նշանակելու էր, որ եթե նախագահը նույն վարքը դրսևորեր և չստորագրեր փաթեթը, ապա անցնելու էր 21 օր, դրանից հետո Սահմանադրությունն այլ սցենար չի նախատեսում, քան ԱԺ նախագահի կողմից ստորագրել: Այդ ժամանակ արդեն լինելու էր, որ ընտրությունների օրը նշանակած, քարոզարշավը մեկնարկած փուլում փոփոխություն է լինելու»,- նշեց Դանիելյանը:
12:17 - 10 մայիսի, 2021
Պատգամավորներն առաջարկներ չեն ներկայացրել ԸՕ-ում փոփոխությունների և լրացումների օրինագծի վերաբերյալ |armenpress.am|

Պատգամավորներն առաջարկներ չեն ներկայացրել ԸՕ-ում փոփոխությունների և լրացումների օրինագծի վերաբերյալ |armenpress.am|

armenpress.am: ՀՀ ազգային ժողովում առաջին ընթերցմամբ ընդունված «ՀՀ ընտրական օրենսգիրք» սահմանադրական օրենքում փոփոխություններ և լրացումներ կատարելու մասին» և կից ներկայացված օրենքների նախագծերի փաթեթի վերաբերյալ մինչև երկրորդ ընթերցումը առաջարկներ չեն ներկայացվել:  Այս մասին խորհրդարանի պետական-իրավական հարցերի մշտական հանձնաժողովի նիստում ասաց «Իմ քայլը» խմբակցության պատգամավոր Համազասպ Դանիելյանը: Օրենսդրական փաթեթով նախատեսվում է օրենքի ուժով ամրագրել Հանրային հեռուստաընկերությամբ նախընտրական բանավեճերի անցկացումը, ընդլայնել հիմնադրամներից կատարվող ծախսերի ցանկը, էապես նվազեցնել ԱԺ պատգամավորների թվի ավելացման հնարավորությունը: Նախագծով նախատեսվում է նաև իջեցնել կուսակցությունների համար նախատեսված շեմերը` 5-ից դարձնել 4%, իսկ դաշինքներինը` բարձրացնել: Մինչև 3 կուսակցությունների դեպքում շեմը դարձնել 8%, իսկ 4 և ավելի կուսակցություններից բաղկացած դաշինքների դեպքում` դարձնել 10 տոկոս:
10:30 - 07 մայիսի, 2021
Ընտրական օրենսգրքի նախագծով էապես նվազեցվելու է ԱԺ պատգամավորների թվի ավելացման հնարավորությունը |armenpress.am|

Ընտրական օրենսգրքի նախագծով էապես նվազեցվելու է ԱԺ պատգամավորների թվի ավելացման հնարավորությունը |armenpress.am|

armenpress.am: «ՀՀ ընտրական օրենսգիրք» սահմանադրական օրենքում փոփոխություններ և լրացումներ կատարելու մասին» և կից ներկայացված օրենքների նախագծերի փաթեթի ընդունման դեպքում, էապես նվազեցվելու է Ազգային ժողովի պատգամավորների թվի ավելացման հնարավորությունը: Այս մասին նախագծի ներկայացման ընթացքում ասաց «Իմ քայլը» խմբակցության անդամ Համազասպ Դանիելյանը: «Կարևոր մի դրույթ` էապես նվազեցվելու է ԱԺ պատգամավորների ավելացման հնարավորությունը: Սահմանադրությամբ նախատեսված է նվազագույն թիվ` 101 պատգամավոր + 4 պատգամավոր ազգային փոքրամասնություններից, հավանականությունը, որ այս խաղի կանոններով լրացուցիչ տեղեր կավելացվեն պատգամավորների, էապես նվազեցվում է, բայց դրանից չեն տուժում փոքրամասնության երաշխավորված տեղերը, խորհրդարանն էլ ավելի ներառական է դառնում»,- ասաց Դանիելյանը: «ՀՀ ընտրական օրենսգիրք» սահմանադրական օրենքում փոփոխություններ և լրացումներ կատարելու մասին» և կից ներկայացված օրենքների նախագծերի փաթեթը հեղինակել է «Իմ քայլը» խմբակցությունը: Այն ստացել է Վենետիկի հանձնաժողովի և ԵԱՀԿ/ԺՀՄԻԳ-ի դրական կարծիքը:
19:23 - 06 մայիսի, 2021
Նախագիծը ոչ միայն կրճատել են, այլև անգրագետավարի փնթիացրել․ Դանիել Իոաննիսյանը՝ ԱԺ նիստին քննարկվող նախագծերի մասին

Նախագիծը ոչ միայն կրճատել են, այլև անգրագետավարի փնթիացրել․ Դանիել Իոաննիսյանը՝ ԱԺ նիստին քննարկվող նախագծերի մասին

Դանիել Իոաննիսյանը ֆեյսբուքյան իր էջում գրում է. «ԱԺ-ում այսօր քննարկվելիք ընտրական հանցագործությունների փաթեթով քրեականացվում է՝ 1. Ընտրական տեղամասում բռնություն գործադրելը կամ դրա սպառնալիքը, 2. Աշխատողին (պետական կամ մասնավոր) պարտադրելը, որ մասնակցի որևէ հանրահավաքի, ինչպես նաև հանրահավաքին մասնակցելու համար փող տալը, 3. Բարձրաստիճան պաշտոնյայի կամ թեկնածույի կողմից օտարերկրյա քաղաքացիության փաստը թաքցնելը, 4. Չնույնականացվող աղբյուրներով թեկնածուներին վարկաբեկող սուտ հրապարակելը: Նախագծով նաև մի շարք հոդվածներով փոխվում են պատժաչափերը, որոշ հոդվածների դիսպոզիցիան փոխվում է՝ առավել հստակության համար: Զավեշտալին այն է, նախագծի ֆորմալ հեղինակը որևէ աղերս չունի դրա ոչ կազմման, ոչ էլ անգամ բովանդակության գեներացիայի հետ: Նշվածներից 1-ին, 3-րդ ու 4-րդ հոդվածների մտքի հեղինակը ես եմ, 2-րդինը՝ Վարդինեն (բնականաբար, բոլորը Համազասպի և այլոց հետ քննարկումներով): Դրանց իրավական ձևակերպումն էլ տվել են Հասմիկը, Վարդինեն, այլ մարդիկ ու ձեր խոնարհ ծառան: Բայց մեր ու Համազասպի կազմած նախագիծը ոչ միայն կրճատել են (հանելով քարոզարշավի ֆինանսավորման կարգի խախտման բոլոր հոդվածները), այլև անգրագետավարի փնթիացրել: Մասնավորապես, փաթեթից կորցրել են քրեական դատավարության օրենսգրքի նախագիծը, որով վերևում նշվածներից 4-րդ հոդվածով նախատեսված արարքը մասնավոր մեղադրանքի հոդված էր դառնում: Անվճար լեկցիա կկարդամ «Իմ քայլի» որոշ ներկայացուցիչներին, թե ինչու որևէ մեկի մասին սուտ տեղեկություն հրապարակելը տեխնիկապես ու բովանդակապես չի կարող լինել հանրային մեղադրանքի հոդված: Ի տարբերություն շատ տաղանդավոր պատգամավորների, ես այդ հարցը ամիսներ շարունակ ուսումնասիրել և քննարկել եմ իրավապահների հետ: Հ.Գ. Այո, կասկածի տակ եմ դնում մեծն ռեֆորմատոր ու ժողովրդավարության մերօրյա լավագույն մասնագետ Վահագն Հովակիմյանի կոմպիտենտությունը ու վերահաստատում եմ «Իմ քայլի»՝ նույնսիկ գրած-պատրաստ ռեֆորմները տապալելու բացառիկ կարողությունը»։
11:43 - 28 ապրիլի, 2021
ԸՕ փոփոխությունը չստորագրելու առնչությամբ նախագահի պարզաբանումները անհիմն են. Համազասպ Դանիելյան
 |1lurer.am|

ԸՕ փոփոխությունը չստորագրելու առնչությամբ նախագահի պարզաբանումները անհիմն են. Համազասպ Դանիելյան |1lurer.am|

1lurer.am: Նախագահ Արմեն Սարգսյանի՝ Ընտրական օրենսգրքի փոփոխությունը չստորագրելու առնչությամբ ներկայացրած պարզաբանումները անհիմն են և ոչ կառուցողական, պնդում է «Իմ քայլից» Ընտրական օրենսգրքի փոփոխությունները համարկարգող Համազասպ Դանիելյանը: Խորհրդարանի ընդունած փոփոխություններից ավելի քան երկու շաբաթ անց նախագահը հայտարարել է՝ չի ստորագրելու Ընտրական օրենսգրքի փոփոխությունները, բայց և չի դիմելու Սահմանադրական դատարան՝ Սահմանադրությանը դրա համապատասխանությունը որոշելու համար: Ըստ Սարգսյանի աշխատակազմի ուսումնասիրության՝ սահմանադրականության տեսանկյունից օրենքն առերևույթ խնդրահարույց չէ:Ապրիլի 1-ին Ազգային ժողովը առանց ընդդիմության աջակցության կողմ քվեարկեց Ընտրական օրենսգիրքը փոփոխելու նախագծին՝ հրաժարվելով մի շարք քաղաքական ուժերի գնահատմամբ խնդրահարույց համարվող ռեյտինգային ընտրակարգից: Այս մեկ դրույթի փոփոխությամբ հունիսի 20-ին ընտրությունը կանցկացվի պարզ համամասնական ընտրակարգով: հանրապետության նախագահը ներկայացրել է նախագիծը չստորագրելու հիմնավորումներ: Առաջինը, ըստ Սարգսյանի, այն է, որ օրենքն ընդունվել է Ազգային ժողովի միայն քաղաքական մեծամասնության քվեարկության արդյունքում: Դանիելյանը, սակայն, հակադարձում է՝ նախագծի համահեղինակ են նաև Արման Բաբաջանյանը և «Բարգավաճ Հայաստանից» դուրս եկած Սերգեյ Բագրատյանը: Որպես հիմնավորում, Սարգսյանը խոսել է նաև Վենետիկի հանձնաժողովի եզրակացության կարևորության մասին: ԱԺ-ից հակադարձում են՝ Վենետիկի հանձնաժողովն այս դրույթի վերաբերյալ դեռ նախկինում դրական դիրքորոշում է հայտնել, իսկ ԸՕ ամբողջ փաթեթի եզրակացությունն ակնկալում են ստանալ վաղը: Դրանից հետո միայն նախագիծը կդրվի ԱԺ-ում քննարկման: «Լուսավոր Հայաստանից» Գևորգ Գորգիսյանը հիշեցնում է՝ ապրիլի վերջին նախատեսված է վարչապետի հրաժարական, իսկ այդ ֆոնին Ընտրական օրենսգրքի քննարկումը, ըստ ընդդիմադիր պատգամավորի, աբսուրդ է: «Բարգավաճ Հայաստանը», ինչպես ռեյտինգային ընտրակարգը հանելու դեպքում, այնպես էլ այժմ շեշտում է՝ Ընտրական օրենսգրքի փոփոխության քննարկումներին չի մասնակցի՝ պատասխանատվությունը թողնելով իշխանության վրա:
20:30 - 19 ապրիլի, 2021
Օր առաջ պետք է ֆիքսել, որ հունիսի 20-ի ընտրություններին ռեյտինգային ընտրակարգ չի լինելու. պատգամավոր |1lurer.am|

Օր առաջ պետք է ֆիքսել, որ հունիսի 20-ի ընտրություններին ռեյտինգային ընտրակարգ չի լինելու. պատգամավոր |1lurer.am|

1lurer.am: Ցավոք, 2019 թ. ամռանը մեր ծրագրածները կարողացանք իրականացնել մասամբ՝ հայտարարեց ՀՀ ԱԺ «Իմ քայլը» խմբակցության պատգամավոր Համազասպ Դանիելյանը՝ Ընտրական օրենսգրքի փոփոխությունների նախագծի քննարկումների ժամանակ: «Ընդամենը 10 ամիս առաջ այս նույն դահլիճում Ընտրական օրենսգրքի փոփոխությունների մեծ փաթեթ ընդունվեց, բայց դա նվիրված էր ՏԻՄ ընտրություններին: Հայաստանի պատմության մեջ առաջին անգամ բոլոր խմբակցությունները համահեղինակեցին: Չեմ հիշում այն ժամանակ որևէ մեկին, որ հանդիմաներ, թե ռեյտինգային ընտրակարգն ինչու եք հանում: Մենք ծրագրել էինք՝ ռեյտինգայինը փոխվելու է 2020-ի աշնանը կամ 2021-ի գարնանը, որից հետո մենք արդեն համալիր փոփոխություններ կունենայինք: Ցավոք չեղավ: Հիմա գործում ենք հնարավորինս անելու տրամաբանության մեջ»,- նշեց Դանիելյանը: Նրա խոսքով՝ ԱԺ արտահերթ նիստում ներկայացված նախագծից բացի, ունենալու են Ընտրական օրենսգրքի խորքային, բովանդակային փոփոխությունների առանձին նախագիծ: «Մեր հաջորդ նիստերին գալու է այն նախագիծը, որն ուզում եմ մեր «Լուսավոր Հայաստանի» գործընկերներին հիշեցնել՝ շրջանառության մեջ է դրվել շատ ավելի վաղ, քան արտահերթ ընտրությունների պայմանավորվածությունը»,- ասաց պատգամավորը՝ նշելով, որ այս պահին անհրաժեշտություն է՝ օրենսդրությամբ օր առաջ ամրագրել, որ 2021 թվականի հունիսի 20-ի ընտրություններին չի լինելու ռեյտինգային ընտրակարգ:
13:13 - 01 ապրիլի, 2021
ԱԺ արտահերթ նիստում քննարկվում է Ընտրական օրենսգրքում փոփոխությունների նախագիծը. պատգամավորը կոչ արեց կողմ քվեարկել |armtimes.com|

ԱԺ արտահերթ նիստում քննարկվում է Ընտրական օրենսգրքում փոփոխությունների նախագիծը. պատգամավորը կոչ արեց կողմ քվեարկել |armtimes.com|

armtimes.com: Ազգային ժողովն այսօր պատգամավորներ Արման Բաբաջանյանի,  Սերգեյ Բագրատյանի, Վահագն Հովակիմյանի, Համազասպ Դանիելյանի նախաձեռնությամբ արտահերթ նիստ է հրավիրել: Օրակարգում «Հայաստանի Հանրապետության ընտրական օրենսգիրք» սահմանադրական օրենքում փոփոխություններ եւ լրացումներ կատարելու մասին որոշման նախագիծն է: Նախագծի հեղինակներից Վահագն Հովակիմյանը նշեց, որ նախագծի քննարկման հրատապության պատճառն այն է, որ մի քանի օրից ԿԸՀ-ն սկսելու է ընտրական հանձնաժողովներում անդամների լիցենզավորման դասընթացների և լիզենզավորման գործընթացը. «Փոփոխությունները շատ կարևոր են, որպեսզի մինչ այդ գործընթացի սկսվելը, հանձնաժողովների ապագա անդամները դասընթացների ընթացքում այդ փոփոխությունները իրացրած լինեն»: Հովակիմյանն անդրադառնալով նախագծով առաջարկվող փոփոխություններին, մասնավորապես խոսեց ռեյտինգային ընտրակարգի մասին, նշելով, որ այն միշտ քննադատության է արժանացել.«Այս համակարգի ներդրման պահից կա հանրային պահանջ, որ այն պետք է փոխվի: Մյուս կողմից ԱԺ արտահերթ ընտրությունները, տեղի են ունենում մի պայմաններում, որի նպատակն է հաղթահարել քաղաքական ճգնաժամը, որը մենք ունենք: Գործընթացը պետք է կազմակերպվի այնպես, որ շահագրգիռ բոլոր կողմերի համար ընդունելի լինի: Ցանկանում եմ ընգծել, որ ԱԺ ընտրությունները համամասնական ընտրակարգով անցկացնելու շուրջ քաղաքական ուժերի շրջանում ի սկզբանե առկա է եղել լայն համախոհություն»: «Իմ քայլ»-ի պատգամավորը հիշեցրեց՝  ռեյտինգային ընտրակարգի վերացումը եղել է 2018 թվականի ընտրություններին, որպես նախընտրական խոստում ներկայիս խորհրդարանաի 3 ուժերի նախընտրական ծրագրերում. «Ուժերը 2018 թվականի հոկտեմբերի 22-ին և 29-ին կողմ են քվեարկել ընտրական ԸՕ-ի այն փոփոխություններին, որով նախատեսվում էր հրաժարվել ռեյտինգային ցուցակներից: Հովակիմյանը հավալեց, որ կան փոփոխություններում կետեր, որոնք վերաբերում են կորոնավիրուսային փաստով ստեղված իրավիճակին. «Աշխարհի շատ երկրներ վերանայում են ընտրությունների կազմակերպման իրենց մոտեցումները: Ըստ այդմ, այս փոփոխություններով առաջրկվում է սահմանել իրավական հիմքներ, կարանտինի պայմանների համահունչ ընտրական գործըթնացները կազմակերպելու համար»: Պատգամավորը շեշտեց, որ իրենք պատրաստ են քննարկել բոլոր առարկությունները: Նա առաջարկեց ԸՕ նախագծի քննարկումը երկրորդ ընթերցմամբ կազմակերպել առաջին ընթերցմամբ ընդունելուց 24 ժամվա ընթացքում: Առաջին ընթերցմամբ ընդունված նախագծերի փաթեթի վերաբերյալ գրավոր առաջարկների, ինչպես նաև գլխադասային հանձնաժողովի եզրակացությունը ներկայացնելու համար կսահմանվի 3-ական ժամ:
11:53 - 01 ապրիլի, 2021
Ընտրական օրենսգրքի բարեփոխումների իմքայլական եռամյա քրոնիկոնը

Ընտրական օրենսգրքի բարեփոխումների իմքայլական եռամյա քրոնիկոնը

2018 թվականի ապրիլ-մայիսյան իրադարձությունների ժամանակ, ի թիվս այլնի բարեփոխումների, օրակարգ բերվեց նաեւ Ընտրական օրենսգրքի փոփոխությունների անհրաժեշտությունը։ Փողոցային պայքարից եւ նոր կառավարության ու խորհրդարանի ձեւավորումից անցել է մոտ 3 տարի, ոչ հեռու ապագայում նախատեսվում են խորհրդարանական արտահերթ ընտրություններ, սակայն Ընտրական օրենսգրքի բարեփոխումները դեռ քննարկման փուլում են։ Փոփոխությունների նախագիծն այժմ Ազգային ժողովում է, սակայն բանը բուն քննարկմանը դեռեւս չի հասել։ Infocom-ը ներկայացնում է Ընտրական օրենսգրքի փոփոխությունների ճանապարհը՝ Նիկոլ Փաշինյանի ու նրա քաղաքական թիմի ներկայացուցիչների մեկնաբանություններով։ 2018 թվականի ապրիլի 21․ Սերժ Սարգսյանի հրաժարականից՝ 2 եւ Նիկոլ Փաշինյանի՝ վարչապետ ընտրվելուց 17 օր առաջ Հանրապետության հրապարակում Փաշինյանը ներկայացրեց քայլերի հաջորդականություն, որտեղ ներառված էր նաեւ Ընտրական օրենսգրքի փոփոխությունը: «․․․Կետ առաջին․ Սերժ Սարգսյանը հրաժարական է տալիս վարչապետի պաշտոնից, ԱԺ-ն վարչապետ է ընտրում ժողովրդի թեկնածուին, ում ժողովուրդը կընտրի այս հրապարակում, երրրոդ՝ ձեւավորվում է ժամանակավոր կառավարություն, մաքսիմալ արագ օրենսդրական փոփոխություններով, Ընտրական օրենսգրքի, Կուսակցությունների մասին օրենքի փոփոխություններով ստեղծվում են օրենսդրական երաշխիքներ, որ առաջիկայում կարող են տեղի ուենալ ազատ, արդար, թափանցիկ խորհրդարանական արտահերթ ընտրություններ․․․»։ Սերժ Սարգսյանի հրաժարականից մի քանի օր անց՝ ապրիլի 29-ին՝ Ազգային ժողովում լրագրողների հետ զրույցում, Փաշինյանը կրկին անդրադարձավ խորհրդարանական արտահերթ ընտրություններին՝ ի պատասխան լրագրողի հարցի ասելով, որ «․․․մինչեւ ազատ, արդար ընտրությունների անցկացումն անհրաժեշտ է լրջագույն փոփոխությունների ենթարկել Ընտրական օրենսգիրքը, եւ ընդհանրապես օրենսդրական դաշտում փոփոխություններ պետք է անել այնպես, որ հապճեպ, ոտի վրա արված փոփոխություններ չլինեն․․․»։ Վարչապետ ընտրվելուց հետո՝ մայիսի 21-ին, Նիկոլ Փաշինյանը դարձյալ լրագրողների հետ ճեպազրույցի ժամանակ նշեց, որ մինչեւ հունիսի վերջն Ընտրական օրենսգրքի փոփոխությունների առնվազն նախագիծ կլինի։  2018 թվականի հունիսի 1-ին հրապարակվեց Փաշինյանի ղեկավարած կառավարության ծրագիրը, որտեղ եւս արձանագրված էր, որ իրենք կարեւորում են այնպիսի խորհրդարանական արտահերթ ընտրությունների անցկացումը, որոնք կլինեն իրապես ազատ, արդար, թափանցիկ, ժողովրդավարական։ Այդպիսի ընտրություններ անցկացնելու նպատակով, գործադիրի համոզմամբ, անհրաժեշտ էր իրականացնել Ընտրական օրենսգրքի եւ ընտրական համակարգի էական բարեփոխումներ:  Հունիսի 8-ին Նիկոլ Փաշինյանն Ազգային ժողովում կառավարության ծրագիրը ներկայացնելիս վերահաստատեց ծրագրում արձանագրված իրենց նպատակները՝ շեշտելով, որ, իրենց կարծիքով, արտահերթ ընտրությունները պետք է անցկացվեն մեկ տարվա ընթացքում։ Նա ընդգծեց, որ գործող կառավարությունն առաջիկա ժամանակը մտադիր է օգտագործել Ընտրական օրենսգիրքը լրջագույն փոփոխությունների ենթարկելու համար, եւ այդ փոփոխությունները կլինեն ՀՀ քաղաքացիների ազատ կամարտահայտությունը, ընտրությունների օրինականությունն ու թափանցիկությունը երաշխավորելու տրամաբանությամբ։ Փոփոխությունների շրջանակը քննարկելու համար 2018թ․-ի հունիսի 19-ին ստեղծվեց վարչապետին կից Ընտրական օրենսգրքի բարեփոխումների հատուկ հանձնաժողով, իսկ աշնանը ԸՕ փոփոխությունների նախագիծը պատրաստ էր։  Հոկտեմբերին 2-ին՝ լրագրողների հետ զրույցում, Նիկոլ Փաշինյանը հայտարարեց, որ վերջին զարգացումներից հետո 2018-ի դեկտեմբերին կանցկացվեն խորհրդարանական արահերթ ընտրություններ։ Հոկտեմբերի 16-ին՝ լրագրողների հետ զրույցում, այն ժամանակ առաջին փոխվարչապետ Արարատ Միրզոյանը չհամաձայնեց այն պնդմանը, թե իրենք այնքան էլ տրամարդված չեն Ընտրական օրենսգրքի փոփոխությունները կյանքի կոչելու․ «Գործադիրը նպատակ ունի գնալ ընտրությունների ավելի լավ, ավելի առաջադիմական օրենսգրքով, ավելի առաջադիմական խաղի կանոններով։․․․ մեր անկեղծ ցանկությունն է, որ այս օրենսգիրքը, նաեւ գործընկերների առաջարկությունները հաշվի առնելով, կարողանանք կյանքի կոչել»։ Հոկտեմբերի 22-ին Հանրապետական մեծամասնություն ունեցող Ազգային ժողովն առաջին ընթերցմամբ չընդունեց օրենսգրքի փոփոխությունների նախագիծը։ Նույն օրը Նիկոլ Փաշինյանն ուղիղ եթերով սաբոտաժ որակեց նախագիծը չընդունելը։ ԱԺ դեռեւս «Ելք» խմբակցության պատգամավոր Ալեն Սիմոնյանն էլ իր հերթին նույնպիսի որակում արեց լրագրողների հետ զրույցում՝ շեշտելով, որ ՀՀԿ-ն վատություն արեց քաղաքական դաշտին՝ չընդունելով նախագիծը։ Հաջորդ օրն Ալեն Սիմոնյանը հայտարարեց՝ իրենք ամեն ինչ անելու են, որ ԸՕ-ն փոխվի։ Դեկտեմբերին նախանշվել էին արտահերթ ընտրություններ։ Դրա համար անհրաժեշտ էր, որ վեցերորդ գումարման խորհրդանը ցրվի, իսկ դրա համար պետք էր, որ ԱԺ-ն երկու անգամ չընտրի վարչապետ։ Խորհրդարանում հոկտեմբերի 24-ին վարչապետի առաջին ընտրության հարցի քննարկման ժամանակ Նիկոլ Փաշինյանն իր ելույթում դարձյալ անդրադարձավ Ընտրական օրենսգրքի փոփոխությունների հարցին՝ խոսելով փաստաթղթի փոփոխության անհրաժեշտության մասին։  Հոկտեմբերի 29-ին Ազգային ժողովում երկրորդ անգամ տապալվեց Ընտրական օրենսգրքի փոփոխությունների նախագծի ընդունումը։ Նույն օրը ԱԺ պատգամավոր Ալեն Սիմոնյանն ասաց, որ ԸՕ-ի փոփոխությունների՝ երկրորդ անգամ տապալումից հետո անիմաստ է համարում նախագիծը դարձյալ օրակարգ բերելը՝ ընդգծելով, որ ռեյտինգային ընտրակարգն իրենց թիմի համար ընդունելի տարբերակ է, իրենք այդ ընտրակարգով էլ կարող են հաջողություն ունենալ, իսկ առաջարկվող փոփոխություններն ավելի ներկայացուցչական եւ քաղաքական ընտրություններ ունենալու համար էին։ 2020-ի նոյեմբերի 20-ի ասուլիսի ընթացքում, պատասխանելով լրագրողներից մեկի հարցին, թե ինչու չի իրականացվել իրենց հայտարարած օրակարգի կարեւոր կետերից մեկը՝ Ընտրական օրենսգրքի փոփոխությունը, Փաշինյանը, հակասելով ինքն իրեն, հայտարարեց, թե իրենց պարտավորությունը վերաբերել է խորհրդարանական արտահերթ ընտրություններ անցկացնելուն, եւ ոչ թե Օրենսգրքի որեւէ տարբերակով ընտրություններ կազմակերպելուն․ «Հանրապետության հրապարակում մենք չենք քննարկել՝ Ընտրական օրենսգրքի ինչ տարբերակով դա պետք է տեղի ունենա, եւ եթե նույնիսկ քննարկած լինեինք, խորհրդարանական ուժերի քվեարկության արդյունքում պետք է որեւէ օրենք անցնի կամ չանցնի, եւ ամեն ինչ տեղի է ունեցել ձեր աչքի առաջ, եւ կառավարությունն իրենից կախված ամեն ինչ արել է թույլատրելիի սահմանում, որպեսզի այդ օրենսգիրքն ընդունվի․․․»։ (Հանրապետության հրապարակում ԸՕ փոփոխություններից հետո արտահերթ ընտրություններ անցկացնելու վերաբերյալ Փաշինյանի հայտարարությունը՝ տե՛ս առաջին ակտիվ հղմամբ)։ Ի վերջո 2018-ի դեկտեմբերի խորհրդարանական արտահերթ ընտրություններն անցկացվեցին Ընտրական հին օրենսգրքով։ 2019-ի մարտին 7-րդ գումարման Ազգային ժողովի նախագահ Արարատ Միրզոյանը խորհրդարանի ամբիոնից քաղաքական ուժերին հրավիրեց միասնական ջանքերով ընտրական բարեփոխումներ մշակելու։ «Ուզում եմ միանգամից հայտարարել, որ մենք չունենք սահմանափակումներ ու խոչընդոտներ՝ այդ թվում՝ սահմանադրական, այսինքն՝ կարող ենք ավելի արմատական փոփոխություններ մշակել եւ իրականացնել»,- իր ելույթում ասաց Միրզոյանը։ 2019 թվականի սեպտեմբերի 24-ին ԱԺ «Իմ քայլը» խմբակցության պատգամավոր, ԸՕ փոփոխությունների աշխատանքային խմբի համակարգող Համազասպ Դանիելյանն Infocom-ի հետ զրույցում հայտնեց, որ 1-1,5 տարուց պատրաստ կլինի օրենսդրական բարեփոխումների փաթեթը։  2020-ի հունիսին Ընտրական օրենսգրքում կատարվեցին որոշակի փոփոխություններ, 4000-ից ավելի բնակիչ ունեցող եւ բազմաբնակավայր համայնքներում ավագանու ընտրությունների ընտրակարգը դարձավ համամասնական։ 2020-ի դեկտեմբերին Կուսակցությունների մասին օրենքի հետ որոշ փոփոխություններ կատարվեցին նաեւ Ընտրական օրենսգրքում, սակայն դրանք չէին վերաբերում ռեյտինգային խնդրահարույց համակարգի վերացմանը, ընտրական շեմերին ու մնացյալ հիմնական հարցերին։ 2020-ի սեպտեմբերին ընտրական բարեփոխումների թեման դարձյալ հանրային քննարկման օրակարգում էր։ Ընտրական բարեփոխումների հանձնաժողովը աշխատանքներ էր կատարում նախագծի շուրջ, իսկ աշխատանքները համակարգում էր «Իմ քայլը» խմբակցության պատգամավոր Համազասպ Դանիելյանը։ Արցախա-ադրբեջանական 44-օրյա պատերազմից հետո հայաստանյան ներքաղաքական իրավիճակն, ի վերջո, հանգեցրեց մի դրության, երբ արտահերթ ընտրություններն անխուսափելի են։ Ընտրությունների օր հաստատվեց այս տարվա հունիսի 20-ը։  2021 թվականի մարտի 19-ին ԱԺ փոխնախագահ Ալեն Սիմոնյանը հայտարարեց, որ քաղաքական ուժերի հետ քննարկումներ են ընթանում Ընտրական օրենսգրքի փոփոխությունների շուրջ։ Օրեր անց՝ մարտի 22-ին, Արդարադատության գործող նախարար Ռուստամ Բադասյանը կարծիք հայտնեց, որ ԸՕ փոփոխությունները հնարավոր է ընդունել շատ արագ։ Ընտրական օրենսգրքի փոփոխությունների նախագիծն արդեն Ազգային ժողովում է, սակայն դեռեւս քննարկման չի ներկայացվել։ Ու թեեւ դեռեւս համընդհանուր կոնսենսուս չկա փոփոխություններ անելու վերաբերյալ, իսկ «Իմ քայլը» խմբակցության ղեկավար Լիլիթ Մակունցը չմեկնաբանեց լրագրողների այն հարցը, թե արդյոք «Իմ քայլը» միանձնյա կորոշի՞ ընդունել Ընտրական օրենսգրքի փոփոխությունների նախագիծը, այդուհանդերձ խորհրդարանական մեծամասնության պատգամավոր Համազասպ Դանիելյանը հայտարարեց՝ Ընտրական օրենսգիրքը պետք է ընդունվի, եթե անգամ չլինի ընդդիմադիր երկու խմբակցությունների աջակցությունը: Իսկ արդեն երեկ՝ մարտի 24-ին, խորհրդարանի փոխխոսնակ, «Իմ քայլը» խմբակցության պատգամավոր Լենա Նազարյանն արտահերթ ընտրությունների վերաբերյալ հարցազրույցում ընդգծեց՝ իրենք խմբակցությունում կայացրել են որոշում՝ առաջարկել խորհրդարանին՝ ընտրությունների գնալ համամասնական ընտրակարգով։ Նրա համոզմամբ՝ սա ամենակարեւոր հեղափոխական, նախընտրական խոստումն է, որ իրենք ստանձնել են․ «Ինչ վերաբերում է ԸՕ ամբողջական փոփոխություններին՝ չեմ կարող ասել՝ արդյոք կհասցնե՞նք մանրամասն, լիարժեք քննարկել, որպեսզի խոչընդոտներ չառաջանան փոփոխությունների հետեւանքով, բայց ընտրակարգի հետ կապված ունենք հստակ որոշում»,- ասաց Նազարյանը՝ հավելելով, որ դա էլ դեռ պետք է քննարկվի ու քվերարկվի Ազգային ժողովում։ Այսպիսով, մոտ երեք տարի առաջ Հանրապետության հրապարակում Նիկոլ Փաշինյանը հայտարարեց Սերժ Սարգսյանի հրաժարականից հետո առաջնահերթ քայլերի մասին, որոնցում կիզակետային նշանակություն ուներ արտահերթ ընտրություններից առաջ ընտրական օրենսդրության փոփոխությունը։ Ինչո՞ւ, քանի որ տարիներ շարունակ տարբեր հարթակներից քաղհասարակության ներկայացուցիչներն ու նախկին ընդդիմադիրները հայտարարել են, որ գործող Ընտրական օրենսգիրքը լայն հնարավորություններ է տալիս ընտրակեղծիքների ու անարդարությունների համար։  Սերժ Սարգսյանի հրաժարականից հետո նախանշվեցին արտահերթ ընտրություններ, Նիկոլ Փաշինյանի ղեկավարած կառավարությունն ու պատգամավորները սկսեցին ընտրական օրենսդրության փոփոխությունների նախագծի շուրջ աշխատանքները։ Նախագիծը ներկայացվեց, սակայն երկու անգամ տապալվեց խորհրդարանում, քանի որ այդ ժամանակ պառլամենտական մեծամասնությունը դեռեւս Հանրապետական կուսակցությունն էր։ Քննարկումների այդ ողջ ընթացքում Փաշինյանն ու իր թիմի ներկայացուցիչներն արդեն նախկին իշխանավորներին համոզում էին, որ Ընտրական օրենսգրքի փոփոխությունները ձեռնտու են հենց նրանց եւ կարեւոր են ընդհանուր քաղաքական դաշտի առողջացման համար, այլ ոչ թե անձամբ իրենց, քանի որ, իրենց համոզմամբ, այդ պահին ունեցած լեգիտիմության ու հանրային վստահության պարագայում իրենք ցանկացած համակարգով կարող են գնալ ընտրությունների ու հաղթել։ Տարբեր առիթներով «Իմ քայլի» ներկայացուցիչները վստահեցրել են, որ ազատ, արդար ու թափանցիկ ընտրություններ կազմակերպելու համար նախ եւ առաջ պետք է քաղաքական կամք, ինչն, իրենց վստահեցմամբ, իրենք ունեն։  2018-ի խորհրդարանական ընտրություններն անցկացվեցին Ընտրական հին օրենսգրքով, ձեւավորվեց 7-րդ գումարման Ազգային ժողովը, որտեղ մինչ օրս քննարկվում է Ընտրական օրենսգրքի փոփոխության հարցը։ Փոփոխությունների նախագիծը վերջապես ուղարկվել է խորհրդարան, սակայն դեռեւս չի դրվել քննարկման։ Մինչեւ հունիսյան ընտրությունները կփոխվի՞ օրենսգիրքը, թե ոչ՝ այս պահին հստակ չէ՝ չնայած «Իմ քայլն» ունի սահմանադրական մեծամասնություն եւ այդպիսով հնարավորություն՝ միայնակ անցկացնելու փոփոխությունները։ Արտախորհրդարանական մի շարք ուժեր եւս կարեւորում են բարեփոխված օրենսգրքով ընտրությունների անցկացումը, ոմանք նույնիսկ անընդունելի են համարում հակառակ պարագան՝ ի տարբերություն ընդդիմադիր «Լուսավոր Հայաստանի», որը 2018-ին աջակցում էր փոփոխությունների օրակարգին, իսկ այսօր կարծում է, որ խաղից առաջ դրա կանոնները փոխելը ճիշտ չէ։ Ինչ վերաբերում է «Բարգավաճ Հայաստան» խմբակցությանը, վերջինս չեզոք դիրքորոշում ունի այս հարցում, իրենք միեւնույն է՝ մասնակցելու են ընտրություններին՝ անկախ օրենսգրքի փոխվել-չփոխվելուց։  Այսուհանդերձ, ԱԺ-կառավարություն վերջին հարցուպատասխանի ժամանակ վարչապետ Նիկոլ Փաշինյանը հայտարարեց, որ հանդիպումների ժամանակ խորհրդարանական խմբակցությունները դեմ չեն եղել ընտրակարգի փոփոխությանը, ուստի «Իմ քայլը» որոշել է, որ կգնան ԸՕ-ի պարզ փոփոխությունների, եւ ընտրություններն կիրականացվեն համամասնական ընտրակարգով, այսինքն՝ առանց վարկանիշային ընտրացուցակի։ Հայարփի Բաղդասարյան, Աննա Սահակյան
15:11 - 26 մարտի, 2021
Ընտրական օրենսգիրքը պետք է ընդունվի, եթե անգամ չլինի ընդդիմադիր 2 խմբակցության աջակցությունը․ «Իմ քայլի» պատգամավոր |hetq.am|

Ընտրական օրենսգիրքը պետք է ընդունվի, եթե անգամ չլինի ընդդիմադիր 2 խմբակցության աջակցությունը․ «Իմ քայլի» պատգամավոր |hetq.am|

hetq.am: «Ընտրական օրենսգիրքը պետք է ընդունվի, եթե անգամ չլինի ընդդիմադիր երկու խմբակցությունների աջակցությունը: Ենթադրում եմ, որ առնվազն անկախ պատգամավորների մի կարևոր մաս պետք է աջակցի այս նախաձեռնությանը»,- այս մասին ասյօր՝ մարտի 22-ին, Ընտրական նոր օրենսգրքի վերաբերյալ տեղի ունեցած քննարկման ժամանակ հայտնեց ԱԺ «Իմ քայլը» խմբակցության պատգամավոր Համազասպ Դանիելյանը: Ըստ պատգամավորի՝ ցանկացած երկրում ընտրություններից անմիջապես առաջ խաղի կանոնները փոխելն՝ առանց ընդդիմադիր շրջանակների աջակցության, կարող է մեկնաբանվել և ներկայացվել որպես իշխանության քայլ՝ միտված իր հնարավորություններն ավելացնելուն: Համազասպ Դանիելյանը նշեց՝ երբ նախագիծը կդրվի քվեարկության Ազգային ժողովում, քննարկման մաս պետք է լինի ինչպես խորհրդարանական, այնպես էլ արտախորհրդարանական ընդդիմությունը: «Դա վերաբերելու է առնվազն տասնյակ կուսակցություններին, որոնք արդեն իսկ հայտարարել են, որ մասնակցելու են ընտրություններին: Այս տեսակի կարևորագույն ռեֆորմները պետք է անել՝ հնարավորինս մեծ կոնսենսուս ապահովելով: Լիահույս եմ, որ երբ հասնենք բովանդակային քննարկումների, կոնսեսուսն ապահովելու հնարավորություն, այդուհանդերձ, կլինի»,- ասաց նա: «Իմ քայլի» պատգամավորի խոսքով՝ այն պարագայում, երբ ընդդիմադիր խմբակցությունները որոշեն դեմ քվեարկել նախագծին, իրենք իրենց անհարմար վիճակի մեջ են դնելու հենց այն պատճառով, որ ցանկացած փաստարկ, որ այսօր բերվում է այս նախագծի դեմ, գոյություն է ունեցել 2018-ի աշնանը, և 2 խմբակցությունների ներկայացուցիչներն էլ 2018-ին կողմ են եղել Ընտրական օրենսգրքի փոփոխություններին: «Հետևաբար, այս դիրքորոշումը, որն ընդդիմությունը որդեգրել է, կարծում եմ, որ նախ հակասում է 2018-ի իրենց դիրքորոշմանը, հակասում է հանրային շահին, որովհետև հանրությունը նույնպես ակնկալում է խաղի կանոնների փոփոխություն»: Անդրադառնալով արտահերթ խորհրդարանական ընտրությունների վերաբերյալ «Հայ Ազգային Կոնգրես»-ի հայտարարությանը՝ ՀԱԿ անդամ Սուրեն Աբրահամյանը նշեց, որ իրենք չեն հայտարարել, որ չեն մասնակցելու ընտրություններին, այլ տվել են Ընտրական օրենսգրքի շուրջ ստեղծված իրավիճակի իրենց գնահատականը: Նրա խոսքով՝ կուսակցության գլխավոր մտահոգությունը համակարգային կոռուպցիայի դեմ պայքարն է: «Քաղաքական կոռուպցիայի միջոցով ձևավորվել էր իշխանություն, և քաղաքական կոռուպցիայի գլխավոր գործիքը, որը կիրառվել է, ռեյտինգային համակարգն էր: Այլ բան, քան կոռուպցիոն սիստեմ, դա իրենից չի ներկայացնում: Այդ իսկ պատճառով արմատական խնդիր էր դրված, որ եթե մենք ուզում ենք պետությունը ձերբազատել կոռուպցիայից ընդհանրապես, նախևառաջ պետք է վերացնել քաղաքական կոռուպցիան: Հետևաբար, ռեյտինգային համակարգի, նաև ընտրությունների ընթացքում ապօրինի տարբեր ֆինանսական լծակների կիրառման հնարավորությունների վերացումը, պետք է դառնա գերխնդիր այս օրենքի ընդունման ժամանակ»,- հայտնեց ՀԱԿ անդամը: Ըստ Աբրահամյանի՝ եթե խորհրդարանական քաղաքական ուժերը գնան ռեյտինգային ընթացակարգով ընտրությունների, ապա իրենց համոզմամբ, ոչ միայն չի հաղթահարվի քաղաքական ճգնաժամը, այլև կստեղծվեն նախադրյալներ մի նոր ճգնաժամի ձևավորման համար. «Այս ճանապարհով ընտրված խորհրդարանը, ինչպիսի քվեարկություններ էլ որ լինեն, շատ արագ կորցնելու է իր լեգիտիմությունը: Դա նշանակում է, որ հեռանալուց առաջ այս խորհրդարանը մի նոր ական է դնում ամբողջ պետական համակարգի հիմքում, ստեղծում է ապագա ճգնաժամերի հիմքեր և հեռանում: Սա կլինի շատ անփառունակ հրաժեշտ»: Սուրեն Աբրահամյանի կարծիքով՝ իրական կոնսենսուս ձևավորված է շատ վաղուց: Բացառությամբ «Հանրապետական» կուսակցության՝ Հայաստանի բոլոր քաղաքական մյուս ուժերը, այդ թվում՝ խորհրդարանում ներկայացված «Բարգավաճ Հայաստան» և «Լուսավոր Հայաստան» կուսակցությունները, քաղաքացիական հասարակության կառույցները, կողմ են նոր օրենսգրքի ընդունմանը: «Ստացվում է մի զավեշտալի իրավիճակ: Բոլորը կողմ են ինչ-որ բանի, բայց ստացվում է, որ կա մի տեխնիկական պատճառ, որը խոչընդոտում է բոլորի կամքի իրականացմանը: Եթե դա տեղի է ունենում, նշանակում է, որ այդ համաձայնությունը, որ տվել են կուսակցությունները, իրականում կեղծ է, նրանք չեն ցանկանում այդ փոփոխությունները: Կարծում եմ, որ չեն ցանկանում գլխավորապես այն պատճառով, որ տիրապետում են ֆինանսական, վարչական ռեսուրսների, որոնք նրանց տալիս են շատ մեծ առավելություն այդ ընտրություններում»,- ասաց ՀԱԿ ներկայացուցիչը: Նրա պնդմամբ՝ Հայաստանում աղքատության աստիճանը շատ բարձր է, այդ պայմաններում ֆինանսական ցանկացած լծակ ազդելու է ընտրողի վրա: ՀԱԿ-ը կարծում է, որ 2018 թվականին բոլոր 3 խմբակցությունների միջև եղել է «կուլիսային» պայմանավորվածություն: Դա հերքելու միակ ճանապարհը օրենսգրքի ընդունումն է: Ավելին՝ hetq.am-ում
13:25 - 22 մարտի, 2021
Ընտրական օրենսգրքի փոփոխությունները գրեթե պատրաստ են, կուղարկվեն Վենետիկի հանձնաժողով |armtimes.com|

Ընտրական օրենսգրքի փոփոխությունները գրեթե պատրաստ են, կուղարկվեն Վենետիկի հանձնաժողով |armtimes.com|

armtimes.com: Իսկ թե ինչ է փոխվելու գործող Ընտրական օրենսգրքում՝ այդ ամենի վերաբերյալ վերջնական տվյալները մեր զրույցում ներկայացրել է օրենսգրքի փոփոխությունների աշխատանքային խմբի համակարգող, «Իմ քայլը» խմբակցության պատգամավոր Համազասպ Դանիելյանը: - Պարոն Դանիելյան, արդեն բավական երկար ժամանակ է՝ քննարկվում են ԸՕ բարեփոխումները: Մեր տեղեկություններով քննարկումները վերջնական փուլի են հասել: Ե՞րբ եք պատրաստվում նախագիծն ուղարկել Վենետիկի հանձնաժողով: - Ես լիահույս եմ, որ ընթացիկ շաբաթվա ընթացքում ոչ միայն կուղարկվեն Վենետիկի հանձնաժողով, այլ նաեւ կհրապարակվեն: Որովհետեւ կարեւոր է, որ այդ նախագիծը նաեւ Հայաստանում հնարավորինս մանրամասն քննարկման փուլ անցնի: Հիմա տեխնիկական աշխատանքներ են տարվում վերջնականացնելու փաթեթի բովանդակությունը, եւ միաժամանակ թե՛ կհրապարակվի, ե՛ւ թե կուղարկենք Վենետիկի հանձնաժողով՝ կարծիքի: - Կարո՞ղ եք ասել, թե երբ կբերվի Ազգային ժողով՝ առաջին ընթերցմամբ քննարկման: - Գիտեք, մենք ուզում ենք, որ ոչ թե միանգամից դնենք շրջանառության մեջ, այլ առնվազն 2 շաբաթ հանրային քննարկման փուլ նախատեսենք, որից հետո կլինեն նաեւ խորհրդարանական լսումներ եւ մի շարք այլ ֆորմատով այլ հանդիպումներ եւ քննարկումներ: Հետեւաբար ես կարծում եմ, որ փետրվարի վերջին կդրվի շրջանառության մեջ եւ մարտի վերջին, ապրիլի սկզբին կունենանք առաջին ընթերցումը: - Քանի որ նախագծի նախապատրաստման վերջնական փուլին ենք հասել, կարո՞ղ եք ասել այն հիմնական փոփոխությունները, որոնք կլինեն այդ փոփոխությունների արդյունքում: - Ձեւավորվում է ընտրողների ցուցակների կազմման որոշակի նոր ընթացակարգ, որը հնրավորություն կտա ձերբազատվել ցուցակներում եղած այն անձանցից, որոնք Հայաստանում չեն բնակվում եւ ընտրելու իրավունք չունեն: Կան քարոզարշավի հետ կապված փոփոխություններ, այդ թվում քարոզարշավի ընթացքում ֆինանսական ծախսերի կարգավորումների հետ կապված: Ամենաշատը երեւի ուշադրության արժանի է ԱԺ ընտրակարգի հետ կապված փոփոխությունը: Որոշակի կարգավորումներ կան անցողիկ արգելապատնեշի հետ կապված. մենք առաջարկում ենք կուսակցությունների համար արգելապատնեշը մեկ տոկոսով նվազեցնել՝ 5-ից դարձնելով 4, իսկ դաշինքների համար մեկ տոկոսով բարձրացնել՝ այդպիսով դարձնելով 8: Որոշակի փոփոխություններ իրականացվել են ԱԺ-ում մանդատների բաշխման հետ կապված. Բոնուսների ազդեցությունը փորձում ենք հնարավորինս չեզոքացնել: Կոալիցիայի ձեւավորման հետ կապված սահմանափակումներն են վերանայվելու՝ ազատականացնելով եւ հնարավորություն տալով, որ մեծամասնություն չունենալու դեպքում քաղաքական ուժերը ավելի երկար ժամանակահատվածում բանակցեն իրար հետ եւ արդյունքում կարողանան ձեւավորել կոալիցիա: - Լուսավոր Հայաստան խմբակցությունը առաջարկ էր արել՝ ռեյտինգայինից հրաժարվելուց հետո անցնել ոչ թե փակ համամասնականի, այլ կիսաբացի: (Փակ համամասնականի դեպքում քաղաքացին չի կարող փոփոխություն անել կուսակցության ցուցակում: Ստացած ձայները բաշխվում են համամասնական ցուցակի հերթականությամբ: Կիսաբացի դեպքում որոշ չափով քաղաքացու ձայնի արդյունքում է որոշվում, թե այդ ցուցակից ով անցնի խորհրդարան): Ընդունվե՞լ է այդ առաջարկը: - Տեսեք, ԼՀԿ-ն իրապես կոնցեպտուալ այլ լուծում է առաջարկում որպես ռեյտինգայինին այլընտրանք: Ինչ-որ առումով այն կարելի է համարել նորից ռեյտինգային, բայց համապետական մասշտաբով: Այս դեպքում ոչ թե 13 տարածքային ցուցակներ են լինում, այլ ամբողջ երկրում բաց ցուցակներ: Գաղափարին ծանոթ ենք, դեռ առիթ ունենալու ենք թե մեր եւ իրենց խմբակցությունով քննարկելու եւ թե արտախորհրդարանական ուժերի հետ: - Այսինքն մերժված չէ: - Չէ, մերժված չէ: Դեռ վաղ է վերջնական կարծիք հայտնել դրա հետ կապված, որովհետեւ իրապես պետք է շատ մանրամասն դիտարկել էդ առաջարկի բովանդակությունը եւ ակնհայտ դրական կողմերի հետ միասին նաեւ փորձել վերհանել եւ գնահատել, թե ինչ բացասական կողմեր կան եւ ինչ ռիսկեր կան: - Համենայնդեպս նախագծում չկա նրանց առաջարկը: - Նախագծում մենք այս փուլում որոշել ենք կանգնել համամասնական ընտրակարգի վրա՝ ֆիքսված ցուցակներով, որոնք երբեմն նաեւ կոչում են փակ ցուցակներ, բայց դա շփոթմունք է առաջացնում, որովհետեւ փակ ցուցակ ասելով նկատի չունեն, որ ցուցակի անունները գաղտնի են, այլ այն, որ այդ ցուցակի անունները նախապես կուսակցության կողմից ֆիքսված են: Շարունակությունը կարդացեք Armtimes.com-ում։
21:07 - 15 փետրվարի, 2021
Ընտրական օրենսգիրք, սահմանադրական փոփոխություն, ԱԺ-ի լուծարման հնարավորություն. ինչ է քննարկել «Իմ քայլը» |armenpress.am|

Ընտրական օրենսգիրք, սահմանադրական փոփոխություն, ԱԺ-ի լուծարման հնարավորություն. ինչ է քննարկել «Իմ քայլը» |armenpress.am|

armenpress.am: Հայաստանում փետրվարին հանրային քննարկման կդրվի Ընտրական օրենսգրքի փոփոխությունների նախագիծը: «Իմ քայլը» խմբակցության նիստից հետո լրագրողների հետ զրույցում այս մասին ասաց պատգամավոր  Համազասպ Դանիելյանը՝ նշելով, որ խոսել են Սահմանադրական հնարավոր փոփոխությունների, ԱԺ-ի ինքնալուծարման հնարավորության ու այլ տարբերակների մասին: «Փետրվար ամսվա ընթացքում մենք նախ հանրային քննարկման, ապա շրջանառության մեջ ենք դնելու Ընտրական օրենսգիրքը, այսինքն՝ օրենսգրքի այն հատվածը, որը վերաբերում է ընտրակարգին և մնացած հատվածներին: Երբ դեռ 1.5 տարի առաջ ծրագրում էինք ընտրական բարեփոխումները, գաղափար կար, որ հիմնական մասին կանդրադառնանք սահմանադրական փոփոխություններից հետո, որովհետև ընտրակարգում կան դրույթներ, որոնք կարգավորված են Սահմանադրությամբ»,-ասաց Դանիելյանը: Պատգամավորը նշեց՝ այսպիսով սահմանադրական փոփոխություններ դեռևս տեղի չեն ունեցել, բայց Ընտրական օրենսգրքի փաթեթը, մեծ հաշվով, պատրաստ է: Եվ իրենք խմբակցությունում քննարկել են ԱԺ-ում որոշակի սահմանադրական փոփոխություններ կատարելու հնարավորությունը: Նա շեշտեց, որ այդ փոփոխությունները բնականաբար պետք է լինեն ԱԺ-ի լիազորություններում: «Մի քանի տարբերակ ենք քննարկել, դեռ քննարկումները շարունակվում են»,-ասաց Դանիելյանը: Անդրադառնալով հարցին, թե արդյոք քննարկվել է իրենց խմբակցության պատգամավոր Վահագն Հովակիմյանի՝ ԱԺ-ին ինքնալուծարման հնարավորություն տալու գաղափարը՝ նա ասաց, որ նաև այդ մասին են խոսել: «Տարբեր գաղափարներ են, մեկ կետ չէ, բազմաթիվ կետեր են՝ արտահերթ ընտրությունների ժամկետների հետ կապված և այլն»,-նշեց նա: Դանիելյանը, սակայն, նշեց, որ ԱԺ-ում սահմանադրական փոփոխություններ անելը միայն «Իմ քայլը»-ի որոշելիքը չէ: «Նման փոփոխությունը պահանջում է առնվազն 88 ձայն, հետևաբար նաև ընդդիմությունը պետք է իր տեսակետը հայտնի: Հետևաբար` մենք դեռ շատ վաղ փուլում ենք, որ կարողանամ որևէ հստակ տեղեկատվություն հայտնել: Քննարկմանը հստակ որևէ որոշում չի եղել»,-ասաց նա ու հավելեց, որ խմբակցության այս քննարկումը նախնական է, շատ վաղ է դիրքորոշում հայտնել: Ըստ Դանիելյանի՝ եթե առնվազն ընդդիմադիր մեկ խմբակցություն ևս հետաքրքրված կլինի, համաձայնության կգա մեծամասնություն կազմող խմբակցության հետ, կխոսեն այդ մասին:
16:27 - 26 հունվարի, 2021
Ընտրական օրենսգրքի փոփոխությունների նախագծի քննարկումները կսկսվեն հաջորդ տարեսկզբից. «Իմ քայլի» պատգամավոր |1lurer.am|

Ընտրական օրենսգրքի փոփոխությունների նախագծի քննարկումները կսկսվեն հաջորդ տարեսկզբից. «Իմ քայլի» պատգամավոր |1lurer.am|

1lurer.am: ԱԺ «Իմ քայլը» խմբակցության պատգամավոր Համազասպ Դանիելյանը խորհրդարանում ճեպազրույցների ժամանակ անդրադարձավ Ընտրական օրենսգրքի փոփոխության մասին հարցին՝ նշելով, որ Ընտրական օրենսգրքի փոփոխություն ՀՀ-ում արդեն տեղի ունեցել է, բայց դա վերաբերում է միայն տեղական ինքնակառավարման մարմիններին: «Երբ որ Ընտրական օրենսգրքի վրա աշխատող աշխատանքային խումբը ձևավորվեց, մենք համատեղ մեր բոլոր գործընկերների հետ նստել, ժամանակացույց ենք հաստատել, թե ինչ հերթականությամբ ենք անելու փոփոխությունները: Տեղական ինքնակառավարումն ավելի հրատապ էր, որովհետև ինքնակառավարման ընտրություններն ավելի վաղ էին լինելու: Հաջորդիվ լինելու էր Ընտրական օրենսգրքի քննարկումները»,- նշեց Դանիելյանը: Սեպտեմբերին այդ գործընթացը սառեցվել է, իսկ հիմա այդ աշխատանքների ամփոփման փուլն է: Փորձելու ենք ունենալ նախագիծ առաջիկա մեկ ամսվա ընթացքում, իսկ հետո այն կդրվի քննարկման՝ համապատասխան ընթացակարգով: «Ակնկալեք տարվա սկզբին նախագիծ, իսկ հաջորդող երկու ամիսների ընթացքում նախագծի քննարկում և ընդունում»,- նշեց պատգամավորը:
11:59 - 11 դեկտեմբերի, 2020