Հյուսիսային Կորեա

ՌԴ արտաքին հետախուզության ղեկավարն այցելել է Հյուսիսային Կորեա |armenpress.am|

armenpress.am: Ռուսաստանի Դաշնության արտաքին հետախուզական ծառայության տնօրեն Սերգեյ Նարիշկինը մարտի 25-ից 27-ն այցելել է Հյուսիսային Կորեա: Փհենյանում հանգամանալից բանակցություններ են տեղի ունեցել ԿԺԴՀ պետական անվտանգության նախարար Լի Չհան Դեի հետ: Այս մասին տեղեկանում է «ՌԻԱ Նովոստի» գործակալությունից: «Քննարկվել են միջազգային իրադրության զարգացման, տարածաշրջանային անվտանգության ապահովման, ռուս-հյուսիսկորեական փոխգործակցության խորացման հրատապ հարցերը՝ արտաքին ուժերի ճնշումն ուժեղացնելու փորձերի պայմաններում», - հայտնել է Ռուսաստանի արտաքին հետախուզական ծառայության մամուլի բյուրոն։ Հստակեցվում է, որ բանակցությունների մասնակիցները դրսևորել են մոտեցումների միասնականություն քննարկված խնդիրների նկատմամբ։

14:29 - 28 մարտի, 2024

Հյուսիսային Կորեան 3 բալիստիկ հրթիռ է արձակել դեպի Ճապոնական ծով |tert.am|

tert.am: Հյուսիսային Կորեան երեք բալիստիկ հրթիռ է արձակել դեպի Ճապոնական ծով, դրանք ընկել են Ճապոնիայի բացառիկ գոտու սահմաններից այն կողմ, հայտնում է Kyodo լրատվական գործակալությունը՝ հղում անելով Ճապոնիայի պաշտպանության նախարարությանը և առափնյա պահպանությանը։ Հրթիռներն անցել են 350 կմ՝ 50 մ բարձրության վրա։ Դրանք արձակվել են մոտավորապես 30 րոպե տարբերությամբ, հայտնել է Ճապոնիայի առափնյա պահպանությունը: Հրթիռներից յուրաքանչյուրի թռիչքը տևել է մոտ յոթ րոպե։ Ճապոնիայի վարչապետ Ֆումիո Կիսիդան լրագրողներին ասել է, որ Հյուսիսային Կորեայի կողմից հրթիռների արձակումն անընդունելի է, հայտնում է Reuters-ը։

10:04 - 18 մարտի, 2024

ԱՄՆ-ն չի բացառում զինված հակամարտությունը Հարավային Կորեայի և ԿԺԴՀ-ի միջև․ New York Times |factor.am|

factor.am: Հյուսիսային Կորեան առաջիկա ամիսներին կարող է ռազմական գործողություններ ձեռնարկել Հարավային Կորեայի դեմ, հայտնում է The New York Times-ը (NYT)՝ հղում անելով ԱՄՆ վարչակազմի պաշտոնյաներին։ Նրանց կարծիքով՝ ԿԺԴՀ-ի առաջնորդ Կիմ Չեն Ընի հայտարարությունները վերջերս «ավելի ագրեսիվ» են դարձել և դրանց պետք է լուրջ վերաբերվել։ Ամերիկացի պաշտոնյաները նշում են, որ իրենք թեև Կորեական թերակղզում լայնամասշտաբ պատերազմի անմիջական վտանգ չեն տեսնում, սակայն Փհենյանը «կարող է հարվածներ հասցնել այնպես, որ խուսափի արագ էսկալացիայից»։ Որպես օրինակ նրանք մատնանշել են 2010 թվականին հարավկորեական Յոնպյոնդո կղզու հետ կապված միջադեպը, երբ ԿԺԴՀ-ն և Հարավային Կորեան փոխանակվեցին հրետանային կրակով։ Երկու կողմից զոհվեց մի քանի զինվորական և քաղաքացիական անձ, սակայն հրետակոծությունը չվերաճեց ավելի մեծ բախման։ ԱՄՆ պաշտոնյաները կարծում են, որ Կիմ Չեն Ընը «հավանաբար քաջալերված է Ռուսաստանի հետ իր գործընկերության ընդլայնմամբ»: Այդուհանդերձ, ամերիկյան գերատեսչությունները դեռ չեն արձանագրել կոնկրետ նշաններ, որ Հյուսիսային Կորեան պատրաստվում է ռազմական գործողությունների կամ մեծ պատերազմի։

13:07 - 26 հունվարի, 2024

Հարավային Կորեան հայտարարել է Դեղին ծովի ուղղությամբ հյուսիսկորեական հրթիռների արձակման մասին |shantnews.am|

shantnews.am: Հյուսիսային Կորեան մի քանի թեւավոր հրթիռ է արձակել Դեղին ծովի ուղղությամբ, հայտնել է Հարավային Կորեայի շտաբների պետերի միացյալ ծառայությունը։ «Չորեքշաբթի օրը՝ հունվարի 24-ին, ԿԺԴՀ-ի կողմից մի քանի թեւավոր հրթիռների արձակում են հայտնաբերել Դեղին ծովի ուղղությամբ»,- ասվում է զինվորականների հայտարարության մեջ: Նշվում է, որ մանրամասները վերլուծվում են Հարավային Կորեայի և ԱՄՆ հետախուզական գործակալությունների կողմից: Զինվորականները հայտարարել են, որ ուժեղացրել են հսկողությունն ու պատրաստվածությունը և սերտորեն համագործակցում են ամերիկյան կողմի հետ՝ Հյուսիսային Կորեայի հետագա գործունեությանը վերահսկելու համար:

09:55 - 24 հունվարի, 2024

Հյուսիսային Կորեան փորձարկել է ստորջրյա միջուկային զենքի համակարգ |armenpress.am|

armenpress.am: ԿԺԴՀ-ն ստորջրյա միջուկային զենքի համակարգի փորձարկում է անցկացրել՝ ի պատասխան ԱՄՆ-ի, Ճապոնիայի և Հարավային Կորեայի զորավարժությունների: Այս մասին հաղորդում է «Ինտերֆաքս»-ը՝ վկայակոչելով Կորեայի կենտրոնական լրատվական գործակալությունը։ «ԿԺԴՀ ազգային պաշտպանության ակադեմիային առընթեր ստորջրյա սպառազինությունների համակարգերի ինստիտուտը Ճապոնական ծովի ջրատարածքում անցկացրել է մշակման փուլում գտնվող «Հեիլ-5-23» ստորջրյա միջուկային զենքի համակարգի կարևոր փորձարկում», - հայտնել են երկրի Պաշտպանության նախարարությունից։ Դրա հետ մեկտեղ չի հստակեցվում, թե կոնկրետ երբ է անցկացվել փորձարկումը, սակայն նշվում է, որ այն դարձել է ԱՄՆ-ի, Հարավային Կորեայի և Ճապոնիայի «սադրիչ զորավարժությունների» պատասխանը, որոնք հունվարի 15-ից ծովում անցկացվում են հարավկորեական Ջեջու կղզու շուրջը։ «Ներկայիս զորավարժությունները... տարածաշրջանում իրադրության հետագա ապակայունացման պատճառ են դարձել և ակցիաներ են, որոնք լրջորեն սպառնում են մեր պետության անվտանգությանը», - հայտարարել են ԿԺԴՀ-ում։ Փհենյանը նախազգուշացրել է, որ կշարունակի պատասխան քայլեր ձեռնարկել «ԱՄՆ ռազմածովային ուժերի ու նրա դաշնակիցների թշնամական ռազմական գործողությունները զսպելու համար», և սպառնացել է «աղետալի հետևանքներով»:

13:12 - 19 հունվարի, 2024

Հյուսիսային Կորեան պինդ վառելիքով գերձայնային բալիստիկ հրթիռ է արձակել |armenpress.am|

armenpress.am: Հյուսիսային Կորեան հայտարարել է պինդ վառելիքով գերձայնային բալիստիկ հրթիռի հաջող արձակման մասին։ Միջմայրցամաքային բալիստիկ հրթիռը, որը կրել է կառավարվող գերձայնային մարտագլխիկ, արձակվել է հունվարի 14-ին։ Այս մասին հաղորդում է Yonhap գործակալությունը։ Ըստ Կորեայի կենտրոնական լրատվական գործակալության՝ արձակումն իրականացվել է՝ ստուգելու սպառազինության հզոր համակարգեր մշակելու՝ երկրի գործունեությունը։ Փհենյանը շեշտել է, որ փորձնական արձակումը «չի ազդել հարևան երկրներից որևէ մեկի անվտանգության վրա և որևէ առնչություն չունի տարածաշրջանային իրավիճակի հետ»։ Ըստ Հարավային Կորեայի ռազմական գերատեսչության՝ հրթիռն արձակվել է Փհենյանի շրջակայքից՝ տեղի ժամանակով ժամը 14։55-ին, անցել մոտավորապես 1000 կմ, այնուհետև ընկել ծովը։ Սեուլում կարծում են, որ ԿԺԴՀ-ի կողմից մշակվող պինդ վառելիքով միջմայրցամաքային բալիստիկ հրթիռն ունակ է թիրախավորել Ճապոնիայում և Գուամում գտնվող ամերիկյան ռազմաբազաները։ Միջմայրցամաքային բալիստիկ հրթիռներն ունեն 3000-5500 կմ հեռահարություն։ Նախորդ անգամ Հյուսիսային Կորեան պինդ վառելիքով միջմայրցամաքային բալիստիկ հրթիռ էր արձակել դեկտեմբերի 18-ին։ Հարավային Կորեայի պաշտպանության նախարարը հրթիռի արձակումն անվանել է «ակնհայտ սադրանք», որը խախտում է ՄԱԿ-ի անվտանգության խորհրդի բանաձևերը, որոնցով ԿԺԴՀ-ին արգելվում է բալիստիկ հրթիռի տեխնոլոգիա օգտագործել։

10:33 - 15 հունվարի, 2024

Մոսկվան բալիստիկ հրթիռներ է ձեռք բերել Փհենյանից. Սպիտակ տուն |azatutyun.am|

azatutyun.am: Միացյալ Նահանգների հետախուզության պաշտոնյաները պարզել են, որ Ռուսաստանը Ուկրաինայում պատերազմում օգտագործելու համար բալիստիկ հրիթռներ է ձեռք բերել Հյուսիսային Կորեայից և ցանկանում է փոքր հեռահարության հրթիռներ ստանալ Իրանից, հայտարարել է Սպիտակ տունը: Ինչպես հայտնել է Սպիտակ տան Ազգային անվտանգության խորհրդի խոսնակ Ջոն Քիրբին, վերջերս գաղտնազերծված հետախուզական տվյալները վկայում են, որ Հյուսիսային Կորեան Ռուսաստանին մատակարարել է մի քանի բալիստիկ հրթիռ և դրանք արձակելու կայանքներ: Ռուսական զորքերն առնվազն մեկ այդպիսի հրթիռ են արձակել Ուկրաինայի վրա դեկտեմբերի 30-ին, ասել է Քիրբին: Նրա խոսքով՝ բալիստիկ հրթիռների վերաբերյալ Ռուսաստան-Իրան գործարքն էլ «ակտիվորեն առաջ է գնում», թեև դեռ ամբողջականացված չէ։

13:01 - 05 հունվարի, 2024

Հյուսիսային Կորեան մոտ 200 արկ է արձակել հարավկորեական կղզիների ուղղությամբ, հայտարարվել է բնակչության տարհանում |armenpress.am|

armenpress.am: Հյուսիսային Կորեան ավելի քան 200 արկ է արձակել Հարավային Կորեայի կղզիների ուղղությամբ, որոնք գտնվում են Դեղին ծովում: Այդ մասին հայտնում է Yonhap գործակալությունը։ Ըստ Կորեայի Հանրապետության զինված ուժերի շտաբների պետերի միացյալ կոմիտեի՝ արձակումը տեղի է ունեցել հունվարի 5-ի առավոտյան, տեղի ժամանակով ժամը 9։00-ից մինչև 11։00-ն ընկած ժամանակահատվածում։ Գործակալության տվյալներով` հարավկորեացի խաղաղ բնակիչների և զինվորականների շրջանում տուժածներ չկան։ Արկերն ընկել են Դեղին ծովի բուֆերային գոտում, որը սահմանվել է 2018 թ․ միջկորեական ռազմական համաձայնագրի շրջանակներում, որից դուրս գալու մասին Հյուսիսային Կորեան հայտարարել է 2023 թ․ նոյեմբերին։ Տեղի ժամանակով կեսօրից հետո Հարավային Կորեայի զինվորականները երկրի արևմտյան սահմանին գտնվող Յոփյոնդո և Պենյոնդո կղզիների բոլոր բնակիչներին հրահանգել են տարհանվել։ Հարավային Կորեայի ռազմական գերատեսչությունը Հյուսիսային Կորեայի կողմից արկերի արձակումն անվանել է «սադրիչ գործողություն» և նախազգուշացրել, որ համապատասխան քայլեր կձեռնարկի։ Ի պատասխան արկերի արձակման՝ Սեուլը նախատեսում է զորավարժություններ անցկացնել հյուսիս-արևմտյան սահմանային կղզիներում։ 2018 թ․միջկորեական համաձայնագրից Սեուլը մասնակիորեն դուրս էր եկել նոյեմբերին՝ ի նշան բողոքի Հյուսիսային Կորեայի կողմից ռազմական հետախուզական արբանյակի արձակման դեմ։ Դրանից հետո Հյուսիսային Կորեան միակողմանիորեն չեղարկեց համաձայնագիրը։

11:44 - 05 հունվարի, 2024

Հյուսիսային Կորեայի բանակը պետք է շարունակաբար պատրաստվի նվաճելու Հարավային Կորեայի ողջ տարածքը. Կիմ Չեն Ըն |armtimes.com|

armtimes.com: Հյուսիսային Կորեայի առաջնորդ Կիմ Չեն Ընը հայտարարել է, որ երկրի բանակը պետք է շարունակաբար պատրաստվի նվաճելու Հարավային Կորեայի ողջ տարածքը կողմերի միջև միջուկային հակամարտության դեպքում և պատրաստ լինի մոբիլիզացնելու բոլոր միջոցները, այդ թվում՝ միջուկային։ Այս մասին նա հայտարարել է երկրի Աշխատավորական կուսակցության կենտրոնական կոմիտեի դեկտեմբերի 26-ից 30-ը տեղի ունեցած լիագումար նիստում՝ հանդես գալով «2024 թվականի համար պայքարի ուղղությունների մասին» եզրափակիչ ելույթով։ Կիմ Չեն Ընը շեշտել է, որ երկրի բանակը պետք է աչալուրջ վերահսկի Կորեական թերակղզում անընդհատ փոփոխվող անվտանգության իրավիճակը: «Միջուկային ճգնաժամի դեպքում Կորեայի ժողովրդական բանակը պետք է շարունակական խթան տա Հարավային Կորեայի ողջ տարածքը նվաճելու խոշոր իրադարձության նախապատրաստմանը` անհապաղ արձագանքելով և մոբիլիզացնելով բոլոր ֆիզիկական միջոցներն ու ուժերը, ներառյալ միջուկային զինված ուժերը»,- նշել է Կիմը։

17:28 - 31 դեկտեմբերի, 2023

Հայաստանը դիվանագիտական ներկայացուցչություններ կբացի Սեուլում և Լյուքսեմբուգում |armenpress.am|

armenpress.am: Հայաստանը նախատեսում է մի շարք երկրներում դիվանագիտական ներկայացուցչություններ բացել։ Այս մասին ՀՀ Ազգային ժողովի արտաքին հարաբերությունների ու ֆինանսավարկային և բյուջետային հարցերի մշտական հանձնաժողովների համատեղ նիստում 2024 թ. պետական բյուջեի նախագծի նախնական քննարկումների ժամանակ տեղեկացրել է Արտաքին գործերի նախարար Արարատ Միրզոյանը։ «Վերջերս Կորեայի Հանրապետությունը պաշտոնական նոտայով մեզ տեղեկացրել է, որ մտադիր է հաջորդ տարվա առաջին կիսամյակում ռեզիդենտ դեսպանություն հիմնել Երևանում՝ Հայաստանի Հանրապետությունում։ Անշուշտ, մենք էլ ցանկություն ունենք Կորեայում՝ Սեուլում բացել ռեզիդենտ դիվանագիտական ներկայացուցչություն։ Կարծում ենք, որ մեծ ներուժ կա Հայաստան-Կորեա հարաբերություններում և փոխադարձաբար դեսպանության բացումը երկու մայրաքաղաքներում կնպաստի, որ այդ ներուժն ավելի լավ իրացվի»,-մանրամասնել է Միրզոյանը։ Նրա խոսքով՝ Հայաստանը դիվանագիտական ներկայացուցչություն կբացի նաև Լյուքսեմբուրգում, որի հետ, նախարարի բնորոշմամբ, վաղուց ի վեր հրաշալի հարաբերություններ են ձևավորվել։

12:16 - 03 նոյեմբերի, 2023

Հյուսիսային Կորեան առնվազն 10 երկրում կփակի իր դիվանագիտական ներկայացուցչությունները |hetq.am|

hetq.am: Հյուսիսային Կորեան պատրաստվում է փակել իր առնվազն 10 դեսպանատները, այդ թվում՝ Իսպանիայում, Հոնկոնգում, ինչպես նաև Աֆրիկայի որոշ երկրներում։ Այդ մասին հայտնում է Reuters գործակալությունը։ Այդպիսով, այդ երկիրը փաստացի կհրաժարվի իր դիվանագիտական բոլոր ներկայացուցչությունների շուրջ 25 %-ից։ Հոկտեմբերի 30-ին KCNA պետական լրատվական գործակալությունը հայտնել էր, որ ԿԺԴՀ դեսպանները «հրաժեշտի հանդիպումներ» են ունեցել Անգոլայի և Ուգանդայի առաջնորդների հետ: Դեսպանատների փակման փաստը հաստատել են նաև աֆրիկյան այս երկու երկրներում, որոնք Հյուսիսային Կորեայի հետ դիվանագիտական հարաբերություններ էին հաստատել 1970-ական թվականներին: Այդ երկրները Հյուսիսային Կորեայի հետ համագործակցում էին ռազմական ոլորտում։ Բացի այդ, Ուգանդան և Անգոլան արտարժույթի աղբյուր էին ծառայում Հյուսիսային Կորեայի համար։ Հարավային Կորեայում գործող Միավորման նախարարության կարծիքով՝ դա նշան է այն բանի, որ Հյուսիսային Կորեան, որը գտնվում է պատժամիջոցների տակ, փորձում է միջոցներ խնայել: Հենց սահմանափակումները, ինչպես նաև տնտեսական բարդ իրավիճակը թույլ չեն տալիս Փհենյանին շարունակել շահույթ ստանալ վերը նշված երկրներում իրենց ընկերություններից։ Ավելի վաղ, Associated Press-ը, հղում անելով Հարավային Կորեայի պաշտոնյաներին, գրել էր, որ ՀԱՄԱՍ արմատական շարժման գրոհայինները հոկտեմբերի 7-ին Իսրայելի վրա հարձակման ժամանակ կիրառել էին հյուսիսկորեական սպառազինություն, այդ թվում F-7 ձեռքի հակատանկային նռնականետեր։

22:30 - 01 նոյեմբերի, 2023

ՀՀ ԱԺ նախագահը Կորեայի Հանրապետության առևտրի նախարարին ներկայացրել է «Խաղաղության խաչմերուկի» գաղափարը

ՀՀ Ազգային ժողովի նախագահ Ալեն Սիմոնյանը հոկտեմբերի 24-ին հանդիպել է Կորեայի Հանրապետության առևտրի նախարար Ան Դոկգունին: հանդիպմանը քննարկվել է օրենսդիր-գործադիր փոխգործակցության արդյունքում իրականացվող օրենսդրական բարեփոխումների ուղիղ ազդեցությունը մի շարք ոլորտների վրա: Կորեացի նախարարը նշել է, որ Հայաստանում է՝ կիսելու առևտրի, արդյունաբերության, արտադրության ոլորտների՝ իր երկրի լավագույն և հաջողված փորձը: Նա ՀՀ ԱԺ նախագահին է ներկայացրել Երևանում իր ունեցած հանդիպումների մանրամասները՝ նշելով, որ ակնկալում է ակտիվ փոխգործակցություն հայաստանյան իշխանության տարբեր ճյուղերի հետ: Ինչպես տեղեկացնում են ՀՀ Ազգային ժողովից, զրուցակիցները փոխադարձ կարևորել են երկու երկրների միջև հարաբերությունների համակողմանի զարգացումը: «Մենք հավատում ենք, որ դեռևս կա հսկայական չօգտագործված ներուժ քաղաքական, տնտեսական, գիտական, կրթական, ինչպես նաև նորարարության և բարձր տեխնոլոգիաների ոլորտներում»,- նշել է Ալեն Սիմոնյանը: Ըստ աղբյուրի՝ ՀՀ ԱԺ նախագահը ներկայացրել է Հայաստանում գտնվող ԼՂ հայրենակիցների հումանիտար խնդիրներին առնչվող իրավիճակը՝ նշելով, որ այդ խնդիրների լուծումն այսօր ամենահրատապն է մեր երկրի համար: Նշվում է, որ Ալեն Սիմոնյանը ներկայացրել է Հայաստանի կողմից առաջ քաշվող «Խաղաղության խաչմերուկի» գաղափարը՝ շեշտելով տարածաշրջանի խաղաղության համար ճանապարհային քարտեզի կարևորությունը:

20:32 - 24 հոկտեմբերի, 2023

Ռուսաստանի և Հյուսիսային Կորեայի հարաբերությունները հասել են ռազմավարական մակարդակի. Լավրով |tert.am|

tert.am: Ռուսաստանի և Հյուսիսային Կորեայի հարաբերությունները երկու երկրների ղեկավարների սեպտեմբերյան հանդիպումից հետո հասել են որակապես նոր, ռազմավարական մակարդակի, հայտարարել է ՌԴ ԱԳ նախարար Սերգեյ Լավրովը Հյուսիսային Կորեայի իր գործընկեր Չոյ Սոնգ Հիի հետ Կիմսուսանի կառավարական նստավայրում հանդիպման սկզբում։ «Սեպտեմբերի 13-ին «Վոստոչնի» տիեզերակայանում նախագահ Պուտինի և Պետական գործերի նախագահ Կիմ Չեն Ընի պատմական գագաթնաժողովից հետո մենք կարող ենք վստահորեն ասել, որ այդ հարաբերությունները հասել են որակապես նոր, ռազմավարական մակարդակի»,- ասել է ՌԴ ԱԳՆ ղեկավարը: Լավրովը նշել է, որ Մոսկվայի և Փհենյանի միջև շփումները տարբեր, այդ թվում՝ բարձր և ամենաբարձր մակարդակով, կշարունակվեն։

12:33 - 19 հոկտեմբերի, 2023

Լավրովը ժամանել է Հյուսիսային Կորեա |armenpress.am|

armenpress.am: Ռուսաստանի արտաքին գործերի նախարար Սերգեյ Լավրովը ժամանել է Փհենյան: Երկօրյա այցի ընթացքում Լավրովը հանդիպում կունենա հյուսիսկորեացի իր պաշտոնակցի հետ։ ՏԱՍՍ գործակալությունը հիշեցնում է, որ օրերս Ռուսաստանի ԱԳՆ ղեկավարն ուղեկցել է երկրի նախագահ Վլադիմիր Պուտինին Պեկին կատարած այցի ժամանակ և հանդիպումներ անցկացրել իր չինացի պաշտոնակից Վան Իի հետ: Ռուսաստանի ղեկավարը նույնպես պաշտոնական հրավեր ունի ԿԺԴՀ այցելելու։ Սակայն ըստ ՌԴ նախագահի մամուլի քարտուղար Դմիտրի Պեսկովի՝ հնարավոր այցի ժամկետները պետք է նախապես համաձայնեցվեն «դիվանագիտական ուղիներով»։ Պեսկովը չի բացառել, որ հարցը պարզ կդառնա Լավրովի աշխատանքային ուղևորության ընթացքում։ Մեկ ամիս առաջ Հյուսիսային Կորեայի առաջնորդ Կիմ Չեն Ընը պաշտոնական այցով ժամանել էր Ռուսաստան և «Վոստոչնի» տիեզերակայանում հանդիպել Վլադիմիր Պուտինի հետ։ Ռուսաստանը դարձել էր առաջին պետությունը, ուր Կիմ Չեն Ընն այցելել էր համավարակի սկզբից ի վեր:

15:35 - 18 հոկտեմբերի, 2023

Ավարտվել է Հյուսիսային Կորեայի ղեկավարի այցը Ռուսաստան |tert.am|

tert.am: Ավարտվել է Հյուսիսային Կորեայի ղեկավար Կիմ Չոն Ունի վեցօրյա աշխատանքային այցը Ռուսաստան։ «Կիմի զրահապատ գնացքն այսօր առավոտյան հատել է Ռուսաստանի հետ սահմանը՝ Արտյոմ-Պրիմորսկի 1 կայարանի մերձակայքում», - հաղորդում են մոսկովյան լրատվամիջոցները։ Այցի վերջին օրը Կին Չոն Ունը ևս մեկ անգամ հանդիպել է Ռուսաստանի պաշտպանության նախարար Սերգեյ Շոյգուի հետ, այցելել է Վլադիվոստոկում գտնվող Հեռավորարևելյան դաշնային համալսարան։ Սա Կիմ Չոն Ունի առաջին արտեկրյա այցն էր վերջին 4 տարիների ընթացքում։ 2019 թվականին նա կրկին այցելել էր Ռուսաստան։

15:02 - 17 սեպտեմբերի, 2023

ՌԴ-ում տեղի է ունեցել Պուտինի և Կիմ Չեն Ընի հանդիպումը՝ Հյուսիսային Կորեայի կողմից նոր հրթիռային արձակումից ժամեր անց |armenpress.am|

armenpress.am: Հյուսիսային Կորեայի կողմից 2 բալիստիկ հրթիռի արձակումից ժամեր անց ՌԴ նախագահ Վլադիմիր Պուտինը և Հյուսիսային Կորեայի ղեկավար Կիմ Չեն Ընը հանդիպում են անցկացրել Ամուրի մարզի «Վոստոչնի» (Արևելյան) տիեզերակայանում։ Այս մասին հաղորդում է ТАСС-ը։ «Շնորհակալ եմ, որ չնայած Ձեր զբաղվածությանը, հրավիրել եք մեզ և ջերմ ընդունելություն ցույց տվել», - ասել է Կիմ Չեն Ընը Վլադիմիր Պուտինի հետ հանդիպմանը։ Ողջույնի խոսքից հետո կողմերը սկսել են բանակցությունները։ Վլադիմիր Պուտինը տիեզերակայանում շրջայց է անցկացրել իր հյուսիսկորեացի գործընկերոջ համար և հայտնել, որ նրա հետ քննարկելու է «բոլոր թեմաները»։ ՌԴ նախագահի մամուլի քարտուղար Դմիտրի Պեսկովը հայտնել էր, որ կողմերը քննարկելու են երկկողմ համագործակցության հարցերը, իրավիճակը տարածաշրջանում և, ընդհանրապես, աշխարհում։ ԱՄՆ-ում կարծում են, որ երկու երկրների ղեկավարները նախատեսում են քննարկել ռուսական բանակին հյուսիսկորեական զենքերի մատակարարումների հարցը։ Կիմ Չեն Ընը պաշտոնական այցով Ռուսաստան է ժամանել սեպտեմբերի 12-ին։ Նրանց նախորդ հանդիպումը կայացել էր Վլադիվոստոկում՝ 2019 թ․-ին։ Սեպտեմբերի 13-ի առավոտյան, մինչ Կիմ Չեն Ընը Ռուսաստանում է, ԿԺԴՀ-ն փոքր հեռահարության 2 բալիստիկ հրթիռ է արձակել, որոնք, ըստ Հարավային Կորեայի պաշտպանական գերատեսչության, թռել են 650 կմ և ընկել Ճապոնական ծովում։

10:10 - 13 սեպտեմբերի, 2023