Գեղամ Մանուկյան

Գեղամ Մանուկյանը 8-րդ գումարման Ազգային ժողովի «Հայաստան» խմբակցության պատգամավոր է, Հայ Յեղափոխական Դաշնակցություն կուսակցության անդամ, նախկին լրագրող։

Ծնվել է 1970թ. փետրվարի 9-ին Արմավիրում:

1988-1989թթ. ծառայել է խորհրդային բանակում:

1993թ. ավարտել է ԵՊՀ արեւելագիտության ֆակուլտետի թուրքագիտության բաժինը: Թուրքագետ:

1993-1995թթ. եղել է Հայկական փաստագրական կենտրոնի տնօրեն: 1993-1995թթ.՝ «Երկիր» օրաթերթի եւ «Ազատամարտ» շաբաթաթերթի թուրքական բաժնի ղեկավար: 2001-2004թթ.՝ «Երկիր» շաբաթաթերթի գլխավոր խմբագիր: 2004-2021թթ.՝ «Երկիր Մեդիա» հեռուստաընկերության լրատվական-քաղաքական ծրագրերի տնօրեն:

1990 թվականից ՀՅԴ անդամ է: 1990-1995թթ. եղել է ՀՅԴ «Նիկոլ Աղբալյան» ուսանողական միության վարչության անդամ: 1997-2005թթ.՝ ՀՅԴ Հայաստանի ԳՄ անդամ:

2006-2007թթ.՝ ԱԺ պատգամավոր (համամասնական ընտրակարգ, ՀՅԴ): ԱԺ պետական-իրավական հարցերի մշտական հանձնաժողովի անդամ, ՀՅԴ խմբակցության քարտուղար:

2021թ. հունիսի 20-ին ԱԺ պատգամավոր է ընտրվել «Հայաստան» կուսակցությունների դաշինքի համապետական ընտրական ցուցակով:

Ում հետ է բանակցում Փաշինյանը, եթե իր սահմանագծման, սահամանզատման հանձնաժողովը դրա մեջ չկա, ԱԳՆ-ն չկա․Գեղամ Մանուկյանը՝ սահմանագծումը Տավուշից սկսելու հայտարարությունների մասին

Այն, ինչ հնչեց ԱԺ այդ նիստի ընթացքում, որևէ գաղտնիք չկար։ Այս մասին հայտարարեց «Հայաստան» խմբակցության պատգամավոր Գեղամ Մանուկյանը՝ ԱԺ-ում փակ հանդիպումից հետո հայտարարությունների ժամին։ Մանուկյանի խոսքով՝ այն ավելի շատ հասարակությունից էր փակ, քան գաղտնի տեղեկություն էր։ «Մեզ համար շատ ավելի պարզվեց հետևյալ իրավիճակը․ ՀՀ-ն Ադրբեջանի հետ սահմանազատման, սահմանագծման գործընթացը իրականացնում է Մհեր Գրիգորյանի ղեկավարած պետական հանձնաժողովի միջոցով․ 7 հանդիպում են ունեցել արդեն, դեռ տեխնիկական, կազմակերպչական խնդիրներն են շատ։ Այսօր Մհեր Գրիգորյանն ասաց՝ սահմանագծումը Տավուշից իրականացնելու համաձայնություն Ադրբեջանի հետ չկա, Փաշինյանի հայտարարած 4 տարածքների վերադարձի հետ կապված համաձայնություն չկա։ ԱԳՆ-ն առանձին ա բանակցում Ադրբեջանի հետ․ 2 դրույթ կա․ Ադրբեջանը մինչև հիմա չի համաձայնում, թե որ քարտեզի շուրջ ա լինելու սահմանագծում, սահմանազատումը։ Ու մեկ էլ էստեղ Նիկոլ Փաշինյանը հայտնվում ա մի հատ քարտեզ ձեռքը առած ու սպառնում ա տավուշեցիներին, հայ ժողովրդին, արձանագրում ա, լեգիտիմացնում ա Ադրբեջանի պահանջները, տարածքային հավակնությունները։ Որտեղից առաջ եկավ էս հարցը, ում հետ ա բանակցում Նիկոլ Փաշինյանը, եթե իր սահմանագծման, սահամանզատման հանձնաժողովը դրա մեջ չկա, ԱԳՆ-ն չկա, թե՞ պարզապես Նիկոլ Փաշինյանը Ադրբեջանի սպառնալիքները Հայաստանում փոխանցող դեսպանն է, ոչ թե Հայաստանի վարչապետը։ Արդարանում են, ասում են՝ որ Տավուշում սահմանազատում լինի, սահմանապահներ կկանգնեն, սիրելի հայրենակիցներ, խաբում են, որովհետև ՀՀ սահմանապահ զորքերը, որմն ի դեպ, մի տարի ա՝ հրամանատար չունի, զինված ա թեթև զենքերով, իսկ Ադրբեջանի սահմանապահ զորքերը, ի դեպ Տավուշում արդեն տարիներ շարունակ սահմանապահ զորքերն են կանգնած, ծանր տեխնիկա, ավիացիա, հրետանի ամեն ինչով զինված ա, դե հիմա դրանից հետո, երբ ԱԲ նախարարն ասում ա՝ դե դպրոցից 50 մետր սահման ա, երեխեքն ապահով կապրեն, կարա՞ք պատկերացնեք, ապահով կապրե՞ն»,- ասաց Գեղամ Մանուկյանը։

18:13 - 09 ապրիլի, 2024

Ստոլտենբերգին էին բերել Հայաստան, թույլ էին տալիս, որ հակառուսական հայտարարություններ անի այստեղ. Գեղամ Մանուկյան |news.am|

news.am: Ստոլտենբերգին էին բերել Հայաստան, թույլ էին տալիս, որ հակառուսական հայտարարություններ անի Հայաստանում: Փոխարենը թող պահանջեին, որ զգուշացում աներ Ադրբեջանին, այլ երկրների՝ որեւէ ոտնձգություն Հայաստանի նկատմամբ կասեցնելու համար: Չարեց: Այս մասին, այսօր՝ մարտի 20-ին, ԱԺ-ում լրագրողների հետ զրույցում ասաց «Հայաստան» խմբակցության պատգամավոր Գեղամ Մանուկյանը։ «Մենք տեսել ենք ՆԱՏՕ-ի գլխավոր քարտուղարների այց տարբեր տարիներին, երբ ՀՀ ղեկավարը չէր խորշում նրա ներկայությամբ նույնիսկ ամենախիստ խոսքերը ասել, հիշեք Ռամիլ Սաֆարովի դեպքը: Հայաստանը վարում էր փոխլրացնող արտաքին քաղաքականություն, նաեւ ռազմական հարաբերություններ ուներ ՆԱՏՕ-ի հետ: Այն ժամանակ ՆԱՏՕ-ի հետ հարաբերությունները որեւէ կերպ թարս կամ խեթ չէին նայվում ոչ ՀԱՊԿ-ի, ոչ Ռուսաստանի կողմից: Դա էր հավասարակշիռ արտաքին հարաբերությունը, եւ ոչ թե միակողմանի, մի ռազմավարական գործընկերոջ, անվտանգային համակարգում կարեւոր դեր ունեցող գործընկերոջ հետ ամբողջությամբ փլուզել քո հարաբերությունները, փոխարենը երազային ինչ-որ բանի ակնկալիքով, որը դեռ նյութականացված չէ»,-ասաց նա: Ինչ անել հարցին էլ Գեղամ Մանուկյանն արձագանքեց. «Դիմադրել, համաժողովրդական դիմադրել, ամեն մի հայրենակցով դիմադրել, քաղաքական ուժերով, խորհրդարանական ընդդիմությունով դիմադրել»:

13:20 - 20 մարտի, 2024

Պետք չէ հանրությանը համոզել, որ խաղաղության պայմանագրի տեսքտում ինչ-որ ապոկալիպտիկ բաներ են գրված․ ԱԳ նախարար

ԱԳ նախարար Արարատ Միրզոյանը մեղադրեց ընդդիմությանը, որ բանակցային փաստաթղթերին՝ մասնավորապես Խաղաղության պայմանագրի տեսքստին ծանոթանալուց հետո ոչ ճիշտ տեղեկություն են հանրայնացնում։ Նշենք, որ Միրզոյանը ԱԺ արտաքին հարաբերությունների մշտական հանձնաժողովի նիստի ժամանակ ներկայացնում է ՀՀ կառավարության ծրագրի (2021-2026 թթ.) 2023 թվականի կատարման ընթացքի և արդյունքների մասին զեկույցը։ «Ակնկալիքն այն չէ, որ ծանոթացողները գնան, ասեն՝ ամեն ինչ պայծառ է։ Սկի մենք չենք մտածում, որ ամեն ինչ պայծառ է։ Բայց ակնկալիքն այն է, որ գոնե դադարեցվի հանրային մակարդակում մատուցումը բաների, որոնք իրականությանը չեն համապատասխանում»,- ասաց նա։ Միրզոյանը նշեց՝ որևէ կերպ ըմբռնելի չէ, գործընկերային չէ, ազնիվ էլ չէ գալ, տեսնել, որ նման բան գրված չկա, գնալ ու շարունակել նույն նարատիվը․ «Ընդ որում, քավ լիցի, քաղաքական ուժեր ունենք, դուք ձեր շահն ունեք, ձեր ձևով եք ասում, կարող եք նենց բաներ ասել, որոնք գոյություն չունեն։ Լավ, դա էլ քաղաքական վարքագծի կամ գործելաոճի ձև կարող է լինել (իմ համար ոչ ընդունելի, բայց կարող է լինել)։ Բայց հաշվի առնելով մեծ հոգեբանական սթրեսը, որում մեր հասարակությունը գտնվում է, հաշվի առնելով այս հարցերի զգայունությունը, տեսնել, որ տենց բան չկա, հետո վեր կենալ նորից ասել ինչ-որ X բան, որ գիտեք՝ նորից սթրեսի է ենթարկելու մեր հասարակությանը»,- նշեց նա։ ԱԳ նախարարը հայտնեց, որ կարելի է անհամաձայնություն հայտնել այն հարցերին, որոնք փաստաթղթում կան գրված․ «Հողմաղացների դեմ պայքարել պետք չէ, առավել ևս մեր հանրությանը համոզել, որ էդ թղթում ինչ-որ ապոկալիպտիկ բաներ են գրված, ընդհանրապես պետք չէ»։ Միրզոյանը հավելեց, որ ի վերջո, այդ թուղթը հանրային է դառնալու, և բոլորը տեսնելու են, թե ինչ է գրված։ Հիշեցնենք, որ Գեղամ Մանուկյանը հայտնել էր՝ ընդդիմությանն արգելվում է ծանոթանալ Ադրբեջանի հետ պայմանագրի տարբերակին․ «‎Փետրվարի 23-ին մենք դիմել էինք ԱԳՆ՝ առաջարկների հերթական փաթեթին ծանոթանալու նպատակով։ Այսօր ԱԳՆ-ի կողմից ստացվել է պաշտոնական գրություն, որտեղ նշվում է. «‎Բանակցային գործընթացը չխաթարելու, գործընթացի վրա անուղղակի բացասական ազդեցություններ, ինչպես նաև փաստաթղթի կամայական, սխալ հանրային մեկնաբանություններ բացառելու նկատառումով պայմանավորված՝ այս պահին նպատակահարմար չենք համարում հայցվող տեղեկատվության տրամադրումը»»։

12:58 - 15 մարտի, 2024

Ընդդիմադիր պատգամավորներին արգելվում է ծանոթանալ Ադրբեջանի հետ պայմանագրի տարբերակին. Գեղամ Մանուկյան

ԱԺ «Հայաստան» խմբակցության պատգամավոր Գեղամ Մանուկյանը գրում է. «Ընդդիմությանն արգելվում է ծանոթանալ Ադրբեջանի հետ պայմանագրի տարբերակին։ Փետրվարի 7-ին Նիկոլ Փաշինյանը հայտարարեց, որ ընդդիմադիր պատգամավորներին այլևս չի թույլատրելու ծանոթանալ Ադրբեջանի հետ քննարկվող պայմանագրի կետերին։ Փետրվարի 23-ին մենք դիմել էինք ԱԳՆ՝ առաջարկների հերթական փաթեթին ծանոթանալու նպատակով։ Այսօր ԱԳՆ-ի կողմից ստացվել է պաշտոնական գրություն, որտեղ նշվում է. «‎Բանակցային գործընթացը չխաթարելու, գործընթացի վրա անուղղակի բացասական ազդեցություններ, ինչպես նաև փաստաթղթի կամայական, սխալ հանրային մեկնաբանություններ բացառելու նկատառումով պայմանավորված՝ այս պահին նպատակահարմար չենք համարում հայցվող տեղեկատվության տրամադրումը»։ Հարկ ենք համարում շեշտել, որ գրության մեջ բացակայում է գործող օրենսդրության որևէ կետի` մեր կողմից խախտման վերաբերյալ հղում։ Կարևոր է նաև արձանագրել, որ յուրաքանչյուր հերթական տարբերակին ծանոթանալուց հետո մեր կողմից հնչեցրած հրապարակային մեկնաբանությունները հայտնվել էին նաև ադրբեջանական բարձրաստիճան շրջանակների ուշադրության կենտրոնում, որտեղից իշխող ուժի մակարդակով քննադատություն էր հնչում ընդդիմադիր պատգամավորներին պայմանագրի կետերին ծանոթանալ թույլ տալու առնչությամբ։ Ուստի, ԱԳՆ-ից ստացված այս գրությունը հաստատում է նախորդիվ մեր հնչեցրած հիմնավոր կասկածն առ այն, որ ընդդիմադիր պատգամավորների՝ բանակցային գործընթացին ծանոթանալու արգելքն ադրբեջանական հերթական պահանջն է, որը բավարարվում է Նիկոլ Փաշինյանի կողմից։ Գործ ունենք պատգամավորական գործունեությանը դիտավորյալ խոչընդոտելու հերթական կամայական քայլի հետ, որի նպատակը մեր կողմից հայ ժողովրդի համար կարևորագույն օրակարգի վերաբերյալ հանրային իրազեկման աշխատանքների խափանումը և հանրությանը միակողմանի տեղեկատվության տրամադրման միջոցով մոլորեցնելու դիտավորությունն է»։

10:58 - 15 մարտի, 2024

Ես մի երկրի վարչապետ եմ, որի ամենաբարձր գագաթը Արագածն է, ոչ ոք չի կարող դա հերքել. Փաշինյան |tert.am|

tert.am: Ազգային ժողովում կառավարության հետ հարցուպատասխանի ժամանակ ԱԺ «Հայաստան» խմբակցության պատգամավոր Գեղամ Մանուկյանը ՀՀ վարչապետ Նիկոլ Փաշինյանին հիշեցրեց հայրենիքի մասին իր իսկ գրած մի շարք քառատողեր։ «Ուզում եմ հիշեցնել 2020 թվականին ձեր կողմից գրված «Հայաստանն իմ օջախն է, ժողովուրդը` ընտանիքը» մտքի մասին, ինչպես նաև հետևյալ քառատողը`Տիգրանի քաղաքի լանջերին հորիզոն է ծփում անսահմանԴարեր անց մենք այստեղ ենք նորից,Մենք կանգնած ենք հեռվին հանդիման։ Ստեփանակերտում, երբ այս բանաստեղծությունը կարդում էիք, սեպտեմբերի 27–ին, որ հրապարակում էիք, Տիգրանի քաղաքի լանջերից պատկերացնո՞ւմ էիք, որ դա ձեր հայրենիքն է, թե՞ մտածում էիք, որ գալու է մի ժամանակ, որ հայրենիք ու պետություն հակադրելու եք իրար», հարցրեց պատգամավորը։ Հարցին ի պատասխան վարչապետ Նիկոլ Փաշինյանը հայտարարեց, որ այդ նշված բոլոր տողերն իրենց արդիականությունը չեն կորցրել։ «Ամենևին էլ հայրենիքը պետությանը չի հակադրվում. երբ հայրենիքը փորձում ենք հակադրել պետությանը, ոչ հայրենիք ենք ունենում, ոչ էլ պետություն։ Հայրենիք ունենում ենք այն ժամանակ, երբ հասկանում ենք, որ հայրենիքը պետությունն է։ Այնպես որ` Հայաստանն իմ օջախն է, ժողովուրդը` ընտանիքը», հայտարարեց Փաշինյանը։ Մանուկյանն արձագանքեց, որ օջախը ատամներով են պահում, որ անգամ 1 սմ չկորչի, իսկ ընտանիքի անդամների վրա ոստիկանական մահակներ չեն բարձրացնում։ «Ես չեմ ուզում վիրավորել ձեր դասղեկին կամ հայոց լեզվի ուսուցչին, սակայն եթե դպրոցում Շիրազի` «Ո՞րն է բաբո, մեր հայրենիքը» բանաստեղծությունը լավ սովորացրած լինեիք, հայրենիքն ու պետությունը չէիք հակադրի, Արարատն էլ Արագածի հետ չէիք հակադրի»,– նկատեց Մանուկյանը։ Փաշինյանն հակադարձեց, որ ինքը մի երկրի վարչապետն է, որի ամենաբարձր գագաթը Արագած լեռն է։

19:38 - 17 հունվարի, 2024

Ադրբեջանի և Հայաստանի հարաբերությունների կարգավորման պայմանագրի վերաբերյալ 2 երկրների առաջարկներին ծանոթանալը փաստեց դրա վտանգավորությունը․ Գեղամ Մանուկյան

ԱԺ ընդդիմադիր «Հայաստան» խմբակցության պատգամավոր Գեղամ Մանուկյանը գրել է, որ երկար պնդումներից ու հարցումներից հետո ինքն ու երկու գործընկերները՝ Աննա Գրիգորյանն ու Քրիստինե Վարդանյանը, երեկ ԱԳՆ շենքում ծանոթացել են Ադրբեջանի և Հայաստանի հարաբերությունների կարգավորման պայմանագրի վերաբերյալ երկու երկրների վերջին առաջարկներին․ «Այս պահին կարող ենք արձանագրել հետևյալը. թեև չենք կարող հրապարակել հույժ գաղտնի նշումով փաստաթղթի բոլոր կետերը, սակայն արձանագրենք, որ առաջարկներին ծանոթանալը միայն փաստեց դրա վտանգավորությունը եւ ամրապնդեց բոլոր այն մտավախությունները, որոնք մենք այս հարցի շուրջ արտահայտել ենք ավելի վաղ»,- գրել է Մանուկյանը:

10:29 - 09 դեկտեմբերի, 2023

Ճտերը դեկտեմբերի 24-ին կհաշվենք․ Սուրեն Պապիկյանը՝ Գեղամ Մանուկյանին |armeniasputnik.am|

armeniasputnik.am: Այս պահին ՀՀ պաշտպանության կապիտալ ծախսերն իրացվել են մոտ 65 տոկոսով։ Ազգային ժողովում կառավարության հետ հարցուպատասխանի ժամանակ ասաց ՀՀ պաշտպանության նախարար Սուրեն Պապիկյանը՝ պատասխանելով «Հայաստան» խմբակցության պատգամավոր Գեղամ Մանուկյանի դիտարկմանը, թե իրականում պաշտպանական ծախսերն ընդամենը 55 տոկոսով են իրացվել։ Մինչդեռ, ըստ Անդրանիկ Քոչարյանի` 2023 թ. ՀՀ պաշտպանության կապիտալ ծախսերն իրացվել են 90 տոկոսով։ «Ճտերը կհաշվենք դեկտեմբերի 24-ին, և վստահեցնում են` հաճելի անակնկալ կսպասվի Գեղամ Մանուկյանին։ Վստահ եմ, որ նա ցանկանում է՝ այդ ծախսերն իրացվեն և նպատակային իրացվեն»,- նշեց Պապիկյանը։ Անդրադառնալով «Քաղաքացիական պայմանագիր» խմբակցության պատգամավոր Արմեն Խաչատրյանի հարցին՝ ո՞ր փուլում է բանակի համար նոր համազգեստի ստեղծումը, Պապիկյանը նշեց՝ դեռ ընթացքի մեջ է։ Հայտարարված մրցույթին մասնակցել են հայկական մի շարք ընկերություններ, առաջին փուլն անցել են, սակայն երկրորդ փուլում միայն մի զորատեսակի համար են հայտ ներկայացրել։ «Հիմա աշխատում ենք մեր միջազգային գործընկերների հետ, առաջիկա օրերին կստանանք առաջարկներ, դրանք կադապտացնենք հայաստանյան իրականությանը, հայկական սիմվոլիկային, այսինքն՝ խոսքը նաև զինվորական այն համազգեստներին է վերաբերում, որոնք պաշտոնական են, տոնական են, դրա հիման վրա արդեն ձեռքբերման մրցույթ կհայտարարենք»,- ասաց Պապիկյանը։ Շեշտեց՝ սխալ է այս փուլում ասել, որ իրենք ձախողել են նոր համազգեստի հարցում։ Ավելին, վստահ է, որ հաջողելու են։ Նշեց, որ կարող էին նախկին փորձին հետևել և միայն գույնի փոփոխություն անել, սակայն համազգեստը միայն ձև չէ, այլև բովանդակություն, և հիմա հենց այդ ուղղությամբ են աշխատում։ Վստահ է, որ գալիք տարի արդեն կունենանք ձևով և բովանդակությամբ նոր համազգեստ։

18:49 - 15 նոյեմբերի, 2023

Բաքվում կալանավորված գեներալ Դավիթ Մանուկանը կապ է հաստատել հարազատների հետ |azatutyun.am|

azatutyun.am: Բաքվում կալանավորված գեներալ Դավիթ Մանուկանը Հակարիի կամրջից երկու շաբաթ առաջ առևանգվելուց հետո օրերս վերջապես կապ է հաստատել հարազատների հետ։ Սեպտեմբերի 27-ին ադրբեջանցիների կողմից ձերբակալված Արցախի Պաշտպանության բանակի հրամանատարի տեղակալ, գեներալ-մայոր Դավիթ Մանուկյանը երկու օր առաջ ընտանիքի անդամների հետ կարճատև զրույց է ունեցել։ Դավիթ Մանուկյանի եղբայրը՝ Հայաստանի Ազգային ժողովի պատգամավոր Գեղամ Մանուկանն «Ազատությանը» փոխանցեց, որ շփումը տեղի է ունեցել ռուսերենով։ Մանուկյանը ենթադրում է, որ այդկերպ ադրբեջանցիները փորձում են վերահսկել խոսակցությունը։ Գեներալ- մայորի հարազատները նաև տեղյակ են, որ Կարմիր Խաչից նրան առայսօր դեռ չեն այցելել։ Պատգամավորը պատմեց, որ եղբայրը Հակարիի կամուրջն անցնելիս եղել է իր մեքենայով, որի մեջ են այդ պահին գտնվել նաև գեներալ-մայորի կինը և Արցախի նախկին պետնախարար Ռուբեն Վարդանյանը։ Արդյո՞ք մինչև ադրբեջանական անցակետն անցնելը պամանավորվածություն ձեռք բերվել է, որ ադբեջանցիները չեն խոչընդոտելու բարձրաստիճան զինվորականի և Արցախի նախկին պետնախարարի տեղափոխմանը Հայաստան։ Դավիթ Մանուկանի հարազատները ոչինչ չգիտեն։ Արցախի Պաշտպանության բանակի նախկին հրամանատարի տեղակալը 2021-ից դադարեցրել էր զինվորական ծառայությունը՝ անցնելով թոշակի։ Առևանգումից երկու օր անց՝ սեպտեմբերի 29-ին Բաքուն նրան 4 ամսով կալանավորեց՝ Մանուկյանին մեղադրելով Ղարաբաղում ահաբեկչական գործողություն կատարելու մեջ։ Շարունակությունը՝ սկզբնաղբյուր կայքում

15:06 - 13 հոկտեմբերի, 2023

Գեղամ Մանուկյանին կառավարության շենքի մոտից շտապօգնության մեքենայով տեղափոխեցին հիվանդանոց |aysor.am|

aysor.am: Կառավարության շենքի մոտ բախումների հետևանքով տուժածների շարքում է նաև ՀՅԴ անդամ, ԱԺ «Հայաստան» խմբակցության պատգամավոր Գեղամ Մանուկյանը։ Նա վնասվածքներ է ստացել։ Գեղամ Մանուկյանին տեղում բուժօգնություն են ցուցաբերելուց հետո շտապօգնության մեքենայով տեղափոխել են հիվանդանոց։

00:47 - 20 սեպտեմբերի, 2023

Պաշտոնական Երևանից մինչև օրս Սամվել Շահրամանյանին շնորհավորական ուղերձ չի հղվել․ Գեղամ Մանուկյան |tert.am|

tert.am: Այսօր ՀՀ ԱԺ-ն թերևս կարող էր առաջին կետով քննարկեր ԱՀ նախագահ Սամվել Շահրամանյանի ընտրության հետ կապված շնորհավորանքի ուղերձ հղելու հարցը։ Այս մասին ԱԺ նիստում ասաց «Հայաստան» խմբակցության պատգամավոր Գեղամ Մանուկյանը։ Ընդդիմադիր պատգամավորը Հայաստանի ամենաբարձր ամբիոնից հայ ժողովրդի, իր կուսակիցների անունից ևս մեկ անգամ շնորհավորեց Սամվել Շահրամանյանին։ Ըստ Մանուկյանի՝ Արցախի ԱԺ-ն հանդես բերեց վճռականություն և միասնականություն։ Նա ասաց, որ Արցախում շատ պատասխանատու փուլում է նորընտիր նախագահն ստանձնում պաշտոնը, երբ ռազմաքաղաքական, հումանիտար և ներքին կյանքը լարված է։ «Արցախում ընտրված նախագահից հայ ժողովուրդն ակնալում է վճռականություն, որոշում կայացնելու ունակություն, հանրությանը համախմբելու կարողություն և մարտահրավերներին դիմակայելու ունակություն և կամք»,- նշեց պատգամավորը։ Գեղամ Մանուկյանը հայտարարեց, թե որքան էլ զարմանալի է, բայց պաշտոնական Երևանից մինչև օրս որևէ շնորհավորական ուղերձ Արցախ՝ Սամվել Շահրամանյանին չի հղվել։

10:33 - 11 սեպտեմբերի, 2023

ԱՄՆ քաղաքացի Արենի Մարկոսյանը չի կարողանում մուտք գործել Հայաստան, ՄԻՊ գրասենյակից ասել են՝ ընդգրկված է ՀՀ համար անցանկալի անձանց ցուցակում․ Քրիստինե Վարդանյան

Պատգամավոր Քրիստինե Վարդանյանը հայտնել էր, որ ԱՄՆ քաղաքացի Արենի Մարկոսյանը չի կարողանում մուտք գործել Հայաստան․ «նա շուրջ 24 ժամ է՝ գտնվում է Զվարթնոց օդանավակայանում, ստիպված գիշերել է այնտեղ»: «Երեկվանից նրան որևէ բացատրություն չէին տալիս, թե ինչու են իր մուտքն արգելում երկիր: Բազմաթիվ փորձերից, զանգերից հետո, շուրջ 24 ժամ անց րոպեներ առաջ միայն նրա հետ կապ են հաստատել ՄԻՊ գրասենյակից և ասել, որ ինքն ընդգրկված է ՀՀ համար անցանկալի անձանց ցուցակում», - այսօր գրել է «Հայաստան» խմբակցության պատգամավորը:

12:07 - 02 օգոստոսի, 2023

Դավիթ Տոնոյանը մասնակցում է ԱԺ քննիչ հանձնաժողովի փակ ձևաչափով նիստին․ ընդդիմությունը կրկին ներկա չէ

Այսօր շարունակվում է 44-օրյա պատերազմի հանգամանքներն ուսումնասիրող ԱԺ քննիչ հանձնաժողովի նիստը, բայց արդեն փակ ձևաչափով․ հանձնաժողովի անդամների հարցերին պատասխանում է Դավիթ Տոնոյանը։ Նիստին ներկա չէր զոհված զինծառայողի հրավիրյալ ծնողը, որի հարցերին ցանկանում էր պատասխանել Տոնոյանը, ուստի միանգամից մեկնարկեց նիստի փակ հատվածը։ Այսօր ևս ընդդիմադիրները նիստին ներկա չեն։ Հիշեցնենք, որ ՀՀ պաշտպանության նախկին նախարար Դավիթ Տոնոյանն երեկ Ազգային ժողովում էր՝ մասնակցելու 44-օրյա պատերազմի հանգամանքներն ուսումնասիրող քննիչ հանձնաժողովի նիստին։ Հանձնաժողովի հրապարակային աշխատանքներին մասնակցելու համար Տոնոյանը միջնորդություն էր ներկայացրել ՀՀ հակակոռուպցիոն դատարանի դատավոր Վ․Դոլմազյանին՝ խնդրելով թույլատրել ներկայանալ հանձնաժողովի աշխատանքների իրականացման վայր, միջնորդությունը բավարարվել էր: Տոնոյանը ցանկություն էր հայտնել մասնակցել նիստին՝ բաց ձեւաչափով, միաժամանակ այսօրվա նիստում նա նշեց, որ որոշ դրվագների անդրադառնալու համար փակ նիստի կարիք է լինելու։ Դավիթ Տոնոյանը քննիչ հանձնաժողովի նիստում հորդորել էր ընդդիմությանը գոնե հանձնաժողովի փակ նիստին ներկայանալ, ի պատասխան Գեղամ Մանուկյանը նշել էր՝ Դավիթ Տոնյանը չի կարող որոշել ինչ ձևաչափով գործի ընդդիմությունը և ինչ հարցերի շուրջ կարծիք արտահայտի։ Նա նշել էր, որ այս հանձնաժողվի աշխատանքները լոկ միտված են պատերազմի և պարտության հանգամանքները, ռազմաքաղաքական կառավարման ձախողումները կոծկելուն, ոչ թե դրանք քննելուն։

11:57 - 02 օգոստոսի, 2023

Դավիթ Տոնյանը չի կարող որոշել՝ ինչ ձևաչափով գործի ընդդիմությունը և ինչ հարցերի շուրջ կարծիք արտահայտի․ Գեղամ Մանուկյան

Դավիթ Տոնյանը չի կարող որոշել՝ ինչ ձեւաչափով գործի ընդդիմությունը և ինչ հարցերի շուրջ կարծիք արտահայտի։ Այս մասին իր ֆեյսբուքյան էջում գրել է ՀՀ ԱԺ «Հայաստան» խմբակցության պատգամավոր Գեղամ Մանուկյանը՝ պատասխանելով պաշտպանության նախկին նախարար Դավիթ Տոնոյանի հայտարարության ընդդիմության վերաբերյալ։ «ԱԺ Քննիչ հանձնաժողովի վերաբերյալ մեր դիրքորոշումն եղել է խորքային, համակարգային, եւ պայմանավորված չի եղել որեւէ անձով, որեւէ մեկի ցուցմունքով կամ տեղեկություն ստանալու անհրաժեշտությամբ, քանի որ ամեն դեպքում, այս հանձնաժողովը չունի հանրային լեգիտիմություն, եւ վերջնարդյունքը պարզ է ու հայտնի։ Այս հանձնաժողվի աշխատանքները լոկ միտված են պատերազմի և պարտության հանգամանքները, ռազմա-քաղաքական կառավարման ձախողումները կոծկելուն, ոչ թե դրանք քննելուն։ Դավիթ Տոնյանը չի կարող որոշել ինչ ձեւաչափով գործի ընդդիմությունը եւ ինչ հարցերի շուրջ կարծիք արտահայտի։ Առնվազն հրապարակային խոսքում Դավիթ Տոնյանը այդպես էլ չասաց, թե շարունակու՞մ է պնդել 2020 թվականի նոյեմբերի 10-ին Հանրային հեռուստաընկերության եթերում արտահայտած իր կարծիքը, երբ դեմ էր հանդես գալիս Նիկոլ Փաշինյանի հրաժարականի պահանջին ու քննադատում ընդդիմությանը։ Ու վերջապես, կրկին շեշտեմ՝ բոլորին հարցեր, ու շատ հարցեր տալու հերթը դեռ գալու է, երբ ձեւավորվի իրոք անկախ, հանրային վստահություն ունեցող ու բոլորը հարցերի պատասխանը ստանալ ցանկացող ԱԺ քննիչ հանձնաժողով։ Մինչ այդ շարունակում ենք պնդել, որ Նիկոլ Փաշինյանը և իր վարչախումբը չեն կարող անաչառորեն քննել իրենց իսկ արաքները։ Հ.Գ. Կմաղթեմ միայն, որ Դավիթ Տոնոյանը, ինչպես նաեւ իշխանության թիրախում հայտնված, պատանդի կարգավիճակում պահվող բոլոր զինվորականները հնարավորինս շուտ լինեն ազատության մեջ», - գրել է պատգամավորը։ ՀՀ պաշտպանության նախկին նախարար Դավիթ Տոնոյանն ԱԺ 44-օրյա պատերազմի հանգամանքները քննող հանձնաժողովի նիստի ժամանակ կոչ էր արել ԱԺ ընդդիմադիր պատգամավորներին ներկա գտնվել հանձնաժողովի նիստին, իսկ հակառակ դեպքում այլև հրապարակային հայտարարություններ չանեն իր գործունեության վերաբերյալ։ «Ես խնդրում եմ, որ գոնե փակ նիստի ժամանակ ընդդիմության մասնակցությունը լինի, առնվազն երկու ուժի մասնակցությունը՝ ՀՅԴ-ի և ՀՀԿ-ի: Հակառակ դեպքում ես կխնդրեի այդ կուսակցությունների ներկայացուցիչներին այլեւս հրապարկային չարտահայտվել առնվազն իմ գործունեության հետ կապված հարցերում»,- նշել է Տոնոյանը:

15:06 - 01 օգոստոսի, 2023

ՌԴ-ն ավելի կտրուկ գործողությունների պետք է դիմի. Գեղամ Մանուկյան |news.am|

news.am: «Նիկոլ Փաշինյանը, ԱԽՔ-ը եւ մնացած ախքերը հայ ժողովուրդ չեն եւ չեն արտահայտում հայ ժողովրդի կարծիքը, չունեն մանդատ, չունեն լեգիտիմ իրավունք հայ ժողովրդի անունից նման դավաճանական հայտարարություններ անել. այսօր տարբեր դեսպանությունների մոտ բարձրաձայնումը նաեւ դրա վկայությունն է, ինչպես նաեւ միջազգային հանրությանը իրական գործողությունների մղելուն»: Այս մասին այսօր՝ հունիսի 27-ին, Ռուսաստանի դեսպանատան մոտ նստացույցի ժամանակ լրագրողների հետ զրույցում նշեց ԱԺ «Հայաստան» խմբակցության պատգամավոր Գեղամ Մանուկյանը: «Տվյալ դեպքում ՌԴ-ն, որը նոյեմբերի 9-ի ստորագրող կողմն է եւ ունի պարտավորություններ, որի խաղաղապահ առաքելության ներկայությունն այսօր, ցավոք սրտի, միակ անվտանգային երաշխավորն է եւ առաջիկա տարիներին էլ ՌԴ զորքերի ներկայությունը Արցախում կենսական անհրաժեշտություն է ցեղասպանության վտանգի դիմագրավման համար, բայց Ադրբեջանը այնքան է լկտիացել, որ իր թշնամական գործողություններն իրականացնում է նաեւ ռուս խաղաղապահների նկատմամբ, ՌԴ-ն ավելի կտրուկ գործողությունների պետք է դիմի այսօրվա խուլ շրջափակումը վերացնելու, Արցախում հումանիտար աղետը կանխելու համար»,-ասաց նա: Անդրադառնալով Վաշինգտոնում Հայաստանի ու Ադրբեջանի ԱԳ նախարարների բանակցությունների մեկնարկի հետ, ընդդիմադիր պատգամավորն ասաց. «ԱՄՆ-ն փորձում է հապշտապ ինչ-որ պայմանական «խաղաղության պայմանագիր» անունով թուղթ ստորագրել, այնինչ Արցախը շարունակում է շրջափակված մնալ»: Նա վստահություն հայտնեց, որ հայ ժողովուրդն իր կամքով եւ կազմակերպվածությամբ թույլ չի տա նման պայմանագրի վավերացում: Գեղամ Մանուկյանն ասաց, որ հիմա իրենց ուղերձը փոխանցելու են ՌԴ դեսպանատուն, որը համապատասխանաբար, կհասնի Մոսկվա: Նշենք, որ ՀՅԴ Հայաստանի Գերագույն մարմինը այսօր՝ հունիսի 27-ին, նախաձեռնել է 24 ժամյա նստացույց՝ ՀՀ-ում ԱՄՆ-ի, Ռուսաստանի Դաշնության, Ֆրանսիայի Հանրապետության դեսպանատների և ԵՄ ներկայացուցչության դիմաց։ Ակցիայի մասնակիցների ձեռքին կան պստառներ. «Բացեք կյանքի ճանապարհը», «Գորշելու պահը հիմա է», «Արցախը դիմակայում է ֆաշիզմին», «Վերջ տվեք ապօրինի շրջափակմանը»: Նստացույցի նպատակն է ԵԱՀԿ Մինսկի խմբի համանախագահ երկրներից և ԵՄ-ից պահանջել չբավարարվել լոկ հայտարարություններով, այլ գործուն քայլեր ձեռնարկել Ադրբեջանի կողմից Արցախի շրջափակումն անհապաղ վերացնելու ուղղությամբ։ Նստացույցը կրում է «SOS Artsakh» խորագիրը։ Նստացույցը բոլոր վայրերում մեկնարկել է այսօր առավոտյան ժամը 08։30-ից և կավարտվի հունիսի 28-ին, ժամը 10։00-ին՝ ՀՀ-ում ՄԱԿ-ի գրասենյակի դիմաց։

10:03 - 27 հունիսի, 2023

«ԱԺ նախագահին թվում է, թե այդ աթոռը տնից է բերել ու այդ աթոռի վրա ինքը կարող է ամենախուլիգանական պահվածքն ունենա». Գեղամ Մանուկյան |aravot.am|

aravot.am: «Սրիկա՛»… «պապանձվի՛ր». Այսօր ԱԺ-ում այս բղավոցներից ու վիճաբանությունից հետո լրագրողների հետ ճեպազրույցում «Հայաստան» խմբակցության պատգամավոր Գեղամ Մանուկյանն ասաց. «Որեւէ քաղաքական, քաղաքակիրթ ձեւակերպում անհնար է տալ: Դա ԱԺ նախագահի ու ՔՊ խմբակցության ղեկավարի խուլիգանական դրսեւորումն էր, փորձեցին խանգարել ԱԺ բնականոն ընթացքը: Երկրի առջեւ ծառացած օրակարգերը փորձում են շեղել նման քայլերով եւ կեղծիքներով: Բարոյական, մարդկային որեւէ սահման չկա, շատ վաղուց բոլոր կարմիր գծերն անցել են»: Թե ինչն էր պատճառը վեճի՝ Գեղամ Մանուկյանն այսպես ներկայացրեց. «Որովհետեւ ԱԺ նախագահին թվում է, թե այդ աթոռը տնից է բերել ու այդ աթոռի վրա ինքը կարող է ամենախուլիգանական պահվածքն ունենա, այդ թվում՝ նրա արտահայտությունը Սեյրան Օհանյանին: Ամոթ էր ուղղակի, որ Սուրեն Պապիկյանն էր այնտեղ նստած: Գետինը պիտի մտներ, որ գեներալներ են Ալեն Սիմոնյանի մակարդակով քննադատվում: Ուղղակի խայտառակ ստեր են հայտարարում, թե այսքան միլիոնների զենքեր են գնել եւ Սեյրան Օհանյանը, պաշտպանելով զինվորականների, հակադարձեց, որից հետո Ալեն Սիմոնյանը թողեց հեռացավ դահլիճից՝ չցանկանալով որեւէ բացատրություն տալ իր խայտառակ հայտարարության համար»: Սեյրան Օհանյանը «սրիկա» էր անվանել Ալեն Սիմոնյանին: Գեղամ Մանուկյանը բացատրեց. «Որովհետեւ Ալեն Սիմոնյանն ասել էր՝ Սեյրան Օհանյանի եւ մյուս գեներալների պատճառով է, որ պարտություն ենք կրել»:

14:31 - 26 հունիսի, 2023

ՀՀ քաղաքացին գետինն է մտնում, երբ Էրդողանը ասում է՝ գիտեք Հայաստանը համաձայնվել է միջանցքին, բայց Պարսկաստանը թույլ չի տալիս․ Գեղամ Մանուկյան |tert.am|

tert.am: Ինձ հետաքրքիր է՝ Ֆինանսների նախարարությունը չէ՞ր կարող հատկացնել մի քանի հարյուր հազար դրամ ամսական աշխատավարձ, որ մի խելոք մարդ բերեին կառավարություն, նստեր Նիկոլ Փաշինյանի կողքը, ուղեկցեր տարբեր տեղեր, որ նրան ասեր՝ Նիկո՛լ Փաշինյան, Մուրադ Բարդակչեի հետ հանկարծ Անկարայում չնկարվես, այդ մարդը Թալեաթի օրագիրը տպելով՝ արդարացրել է Թալեաթի գործողությունները։ Այս մասին ԱԺ-ի ելույթի ժամանակ հայտարարեց «Հայաստան» խմբակցության պատգամավոր Գեղամ Մանուկյանը։ Վերջինս նշեց, որ 2022թ-ի բյուջեի կատարողականի զեկույցի ընթացքում հարց է ուղղել ՆԳ փոխնախարարին, թե կա վերլուծություն՝ որքա՞ն է ծախսվել ՀՀ տարածքում Նիկոլ Փաշինյանի տեղաշարժերի վրա, ինչին ի պատասխան փոխնարարաը հայտնել է, որ չի եղել նման ուսումնասիրություն։ «Նիկոլ Փաշինյանին շատ երկար եմ ճանաչում, դրա համար ուզում եմ պարզ ասեմ, իրականում ոստիկանության մեջ բազմամիլիարդանոց ծախսեր են արվում մենակ մի բանի համար, որ Նիկոլ Փաշինյանը անցնի Երևանի մի փողոցից մյուսը, ՀՀ-ի մի գյուղից մյուս գյուղը, բնակիչները արդեն գիտեն, որ եթե Սևանի մայրուղու վրա 2 մետրը մեկ ոստիկան է կանգնած, ուրեմն ճանապարհը փակվում է։ Աննախադեպ է դարձել Հայաստանի բյուջեից հազարավոր ոստիկաններով մեկ մարդու շրջագայությունը։ Ժամանակին, երբ Փաշինյանը վարչապետ էր ընտրվել, հիշում եմ, որ մեքենան բաց պատուհաններով էր, հիմա պատուհանները փակ են։ Դա ոչ թե անվտանգություն է, այլ վախն է, որի պատճառով հազարավոր ոստիկանններ իրենց գործը թողած՝ ժամերով կանգնում են, որ մեկ մարդ մի տեղից գնա մյուս տեղը։ Վախը պատճառ է այն գիտակցման, թե ինչ ավերի է բերել հասցրել երկիրը։ Մեր երկրում տասնյակ հազարավոր մարդիկ ունեն մի զգացում՝ ատելության, որը երբեք մեր երկրում չի եղել։ Քաղաքացիները գիտակցում են, որ երկիրդ ղեկավարում է մեկը, որի պատճառով Եվրամիության պաշտոնյան հայտարարում է, որ նա առաջին ղեկավարն է, որը Արցախը ճանաչել է Ադբեջանի մաս։ ՀՀ քաղաքացին գետինն է մտնում, որ Էրդողանը ասում է՝ գիտեք Հայաստանը համաձայնվել է միջանցիքն, բայց Պարսկաստանը թույլ չի տալիս, գետինն է մտնում, որ իր երկիրը ներկայացնողը ադրբեջանական թեզերով արդարացնում է, որ Արցախ Ադրբեջանի մաս է, արդարացնում է, որ Արարատը մերը չի»,- ասաց Գեղամ Մանուկյանը։ Հիշեցնենք, որ Թուրքիայի նախագահ Ռեջեփ Թայիփ Էրդողանը հայտարարել է, թե «Զանգեզուրի միջանցքը» Հայաստանի հետ կապված խնդիր չէ․ այն կապված է Իրանի հետ․ ««Զանգեզուրի միջանցքը» Հայաստանի հետ կապված խնդիր չէ․ այն կապված է Իրանի հետ։ Այսինքն՝ երկու երկրների, որոնց բնակչության մեծամասնությունը մուսուլման է։ Այն, որ Իրանը նման վերաբերմունք է ցուցաբերում, վրդովեցնում է և՛ Ադրբեջանին, և՛ մեզ։ Իրականում դա նրանց էլ պետք է վրդովեցնի: Բացի այդ, այստեղ մեկ վագոնի համար գանձվող վճարները, ցավոք, շատ բարձր են: Հուսով եմ, որ մենք շուտով կհաղթահարենք այս խնդիրը։ Եթե սրան դրական մոտենային, ապա այսօր Թուրքիա-Ադրբեջան-Իրան թե՛ ավտոմոբիլային, թե՛ երկաթուղային ճանապարհը ինտեգրված կլինեին և գուցե բացվեր նաև «Պեկին-Լոնդոն գիծը»,- ասել է Էրդողանը։

14:35 - 15 հունիսի, 2023