Սյունիքի մարզ

Տեղ գյուղի ՔՊ-ական համայնքապետը ձերբակալվել, ապա ազատ է արձակվել |azatutyun.am|

azatutyun.am: Սյունիքի մարզի Տեղ գյուղի համայնքապետ, «Քաղաքացիական պայմանագիր» իշխող կուսակցության անդամ Դավիթ Ղուլունցն այսօր ձերբակալվել է: Ոստիկանությունից «Ազատության» հետ զրույցում հաստատեցին այդ տեղեկությունը: Ոստիկանությունից փոխանցեցին, որ Ղուլունցը ձերբակալվել է Վարչական իրավախախտումների վերաբերյալ օրենսգրքի 182-րդ հոդվածով նախատեսված արարք կատարելու համար՝ «Ոստիկանության զորքերի զինծառայողի կամ ոստիկանության ծառայողի օրինական պահանջը չկատարելը», այլ մանրամասներ չհայտնեցին: Ավելի ուշ Տեղի համայնքապետն ազատ է արձակվել: Վարչական իրավախախտումների վերաբերյալ օրենսգրքի հիշյալ հոդվածով նախատեսված արարքի համար սահմանված է տուգանք` նվազագույն աշխատավարձի հիսնապատիկի չափով:

17:20 - 05 հոկտեմբերի, 2024

Կառավարությունը 22 պիկապ կգնի Սյունիքի էկոպարեկների համար |civilnet.am|

civilnet.am:Շրջակա միջավայրի նախարարության էկոպարեկային ծառայության Սյունիքի մարզային վարչության համար կառավարությունը ձեռք կբերի 22 գործառնական նշանակության մեքենա։ Համապատասխան որոշումն ընդունվեց կառավարության հոկտոմբերի 3-ի նիստում։ Էկոպարեկային ծառայությունը ստեղծվել է՝ անտառների, անտառային հողերի, հատուկ պահպանվող տարածքների պահպանությունն ապահովելու, ապօրինի անտառահատումները կանխարգելելու նպատակով։ Կառավարության որոշմամբ՝ էկոպարեկային ծառայության Սյունիքի մարզային վարչության համար 22 պիկապ մեքենաների ձեռքբերման համար հատկացրեց մոտ 510 միլիոն դրամ։ Այդ մեքենաները հագեցված են լինելու mobile համակարգով ու հատուկ կահավորանքով։ Հատկացված միջոցները վերաբերում են միայն Սյունիքի մարզային վարչության համար մեքենաների գնմանը, սակայն նախատեսվում է, որ Լոռու մարզային վարչության համար ձեռք կբերվի 24 մեքենա, Վայոց ձորի և Արարատի մարզերի էկոպարեկայիններին համար՝ 18-ը, Շիրակի և Արագածոտնի մարզային վարչությունների համար՝ 14-ը, Տավուշի համար 36-ը, Կոտայքի ու Գեղարքունիքի էկոպարեկային ծառայությունների համար՝ 19-ը, Երևանի ու մարզային վարչությունների համար՝ 9-ը։ Ընդհանուր առմամբ էկոպարեկային ծառայությունն ունենալու է 142 տեխնիկապես հագեցված մեքենա։

12:47 - 03 հոկտեմբերի, 2024

Հայկական մեքենաներով արդեն հնարավոր կլինի մեկնել Իրան

Իրանը պարզեցրել է հայկական պետհամարանիշներով մեքենաների մուտքը, հայտնում են Սյունիքի մարզպետի աշխատակազմից։ Հայկական ավտոմեքենաների սեփականատերերն արդեն հնարավորություն ունեն ճամփորդելու Իրան սեփական տրանսպորտային միջոցներով։ «Օգոստոսին Հայաստանի և Իրանի միջև ստորագրված կարևոր համաձայնագրի շնորհիվ հայկական ավտոմեքենաների սեփականատերերն արդեն հնարավորություն ունեն ճամփորդել դեպի Իրան սեփական տրանսպորտային միջոցներով։ Նրանք կարող են ստանալ Carnet de Passage (CPD) փաստաթուղթը (մաքսային տարանցման փաստաթուղթ), որը կպարզեցնի մաքսային գործընթացները և հնարավորություն կտա նրանց ճամփորդել Իրան հայկական ավտոմեքենաներով»,- ասված է հայտարարությունում։ Շուտով Սյունիքում կգործի գրասենյակ, որտեղ ՀՀ քաղաքացիներն արդեն տեղում կարող են ստանալ Carnet de Passage (CPD) փաստաթուղթը։

13:36 - 30 սեպտեմբերի, 2024

Սյունիքում Ֆրանսիայի հյուպատոսության բացման հարցերի շուրջ Հայաստանի և Ֆրանսիայի միջև տարվում են անհրաժեշտ աշխատանքներ․ ԱԳՆ |factor.am|

factor.am: Հայաստանում Ֆրանսիայի հյուպատոսության բացման հարցերի շուրջ Հայաստանի և Ֆրանսիայի միջև շարունակվում են գործնական քննարկումներ և տարվում են անհրաժեշտ աշխատանքներ, այս մասին Factor.am-ի գրավոր հարցմանն ի պատասխան հայտնել են ՀՀ ԱԳՆ-ից։ Factor.am-ը փորձել էր արտգործնախարարությունից պարզել՝ արդյո՞ք ՀՀ-ն Ֆրանսիայից ստացել է դիմում Սյունիքում հյուպատոսություն բացելու մասին։ Հիշեցնենք, որ անցած տարի Ֆրանսիայի Ազգային ժողովի նիստում Ֆրանսիայի արտաքին գործերի նախարար Կատրին Կոլոննան` անդրադառնալով հարցին, թե ինչ է անում Ֆրանսիան հայերին պաշտպանելու համար հայտարարել էր, որ Ֆրանսիան նախատեսում է ՀՀ Սյունիքի մարզում հյուպատոսություն բացել։ ԱԺ «Քաղաքացիական պայմանագիր» խմբակցության Սյունիքի մարզից պատգամավոր ընտրված Մարինա Ղազարյանը Factor TV-ի հետ զրույցում հայտնել էր, թե արտգործնախարարությունից իրեն փոխանցել են, որ Ֆրանսիան Սյունիքում հյուպատոսություն է բացելու և այն տեղակայվելու է Գորիս քաղաքում։ Բացի Ֆրանսիայից, ռուսական կողմից ևս հայտարարել են Սյունիքում հյուպատոսություն բացելու մտադրության մասին։ Իսկ 2022 թվականին Սյունիքի մարզկենտրոն Կապանում բացվել էր Իրանի գլխավոր հյուպատոսությունը։

16:50 - 23 սեպտեմբերի, 2024

ՀՀ-ում ՌԴ դեսպանը այցելել է Սյունիքի մարզ

Հայաստանում Ռուսաստանի դեսպան Սերգեյ Կոպիրկինը սեպտեմբերի 17-18-ը այցելել է Սյունիքի մարզ։ Այս մասին հայտնում է ՌԴ դեսպանության «Տելեգրամ» ալիքը։ Նշվում է, որ Ռուսաստանի դիվանագիտական առաքելության ղեկավարի հետ հանդիպման ընթացքում համայնքների ղեկավարները տրամադրվածություն են հայտնել Ռուսաստանի քաղաքների հետ որպես քույր քաղաքներ կապեր զարգացնելու ուղղությամբ: «Իրենց հերթին բիզնեսի և հասարակական շրջանակների ներկայացուցիչները, այդ թվում՝ Սյունիքի երիտասարդական ակտիվը, մեծ հետաքրքրություն են ցուցաբերել ռուս գործընկերների հետ գործարար կապերի, հումանիտար շփումների և կրթական փոխանակումների ընդլայնման, ինչպես նաև ռուսաց լեզվի ուսուցման հնարավորությունների մեծացման նկատմամբ»,- նշված է հաղորդագրության մեջ։

18:41 - 20 սեպտեմբերի, 2024

Առուշ Առուշանյանը կազատազրկվի 1 տարի 8 ամիս ժամկետով. դատարանը հրապարակեց որոշումը |aravot.am|

aravot.am: Սյունիքի մարզի ընդհանուր իրավասության դատարանի դատավոր Վարսենիկ Մելքոնյանի որոշմամբ՝ Գորիս համայնքի ղեկավար Առուշ Առուշանյանը կազատազրկվի 1 տարի 8 ամիս 3 օր ժամկետով։ Որոշումը կարող է բողոքարկվել Վերաքննիչ դատարան։ Հիշեցնենք, որ երեք հանցագործությունների համար դատապարտված Առուշանյանի պատիժներից մեկն էլ 5 տարով համայնքային պաշտոն զբաղեցնելու սահմանափակումն է։ Գորիսի ավագանին մերժել էր պրոբացիայի դիմումը՝ անվստահություն չհայտնելով համայնքապետին։ Նախորդ նիստում՝ Առուշանյանի փաստաբանները ներկայացրին, որ պրոբացիայի բողոքը անհիմն է, ներպետական ու միջազգային օրենսդրությամբ չի կարող մարդու համար պատիժը վատթարանալ, ըստ որի՝ Առուշանյանին դատել են նախկին 2003թ․ ՀՀ քրեական օրենսգրքով, իսկ հիմա փորձում են վճիռ կայացնել նոր օրենսգրքով։ Միաժամանակ փաստաբանական խումբը գտնում է, որ ընտրովի պաշտոնների նկատմամբ, դատարանը չի կարող որոշում կայացնել՝ պաշտոնից զրկելու համար։ Հիշեցնենք, որ դատախազը՝ ՀՀ գլխավոր դատախազության պատիժների եւ հարկադրանքի այլ միջոցների կիրառման օրինականության նկատմամբ վերահսկողություն իրականացնող վարչության պետ Լեւոն Չարխիֆալակյանը միջնորդել էր բավարարել պրոբացիայի ծառայության որոշումը՝ փոխելով Առուշ Առուշանյանի նկատմամբ կիրառված պատիժը ու նրան ազատազրկել։

13:18 - 10 սեպտեմբերի, 2024

Դատախազը միջնորդեց բավարարել պրոբացիայի ծառայության որոշումը՝ փոխելով Առուշ Առուշանյանի նկատմամբ կիրառված պատիժը ու նրան ազատազրկել |aravot.am|

aravot.am: Սյունիքի մարզի ընդհանուր իրավասության դատարանում շարունակվում է Գորիսի համայնքապետ Առուշ Առուշանյանի դեմ պրոբացիայի ծառայության հայցը։ Հիշեցնենք, որ երեք հանցագործությունների համար դատապարտված Առուշանյանի պատիժներից մեկն էլ 5 տարով համայնքային պաշտոն զբաղեցնելու սահմանափակումն է։ Գորիսի ավագանին մերժել էր պրոբացիայի դիմումը՝ անվստահություն չհայտնելով համայնքապետին։ Նախորդ նիստում Առուշանյանի փաստաբանները ներկայացրին, որ պրոբացիայի բողոքը անհիմն է, ներպետական ու միջազգային օրենսդրությամբ չի կարող մարդու համար պատիժը վատթարանալ, ըստ որի՝ Առուշանյանին դատել են նախկին 2003թ․ ՀՀ քրեական օրենսգրքով, իսկ հիմա փորձում են վճիռ կայացնել նոր օրենսգրքով։ Միաժամանակ փաստաբանական խումբը գտնում է, որ ընտրովի պաշտոնների նկատմամբ, դատարանը չի կարող որոշում կայացնել՝ պաշտոնից զրկելու համար։ Սեպտեմբերի 10-ի նիստում ՀՀ գլխավոր դատախազության պատիժների եւ հարկադրանքի այլ միջոցների կիրառման օրինականության նկատմամբ վերահսկողություն իրականացնող վարչության պետ Լեւոն Չարխիֆալակյանը միջնորդեց դատարանին ներկայացնելու իր հակափաստարկները փաստաբանների տեսակետին, ինչին Առուշանյանի փաստաբաններն առարկեցին՝ նշելով, որ ինքը իրավունք չունի հակափաստարկներ ներկայացնելու։ Դատախազն առարկեց՝ նշելով, որ ինքը չի հակադարձում, այլ տեսակետ է ներկայացնում։ Դատավոր Վարսենիկ Մելքոնյանը ի վերջո թույլատրեց դատախազին ելույթ ունենալ, որից հետո եթե Առուշանյանի պաշտպաններին ելույթի հնարավորություն կտա։ Դատախազը միջնորդեց բավարարել պրոբացիայի ծառայության որոշումը՝ փոխելով Առուշ Առուշանյանի նկատմամբ կիրառված պատիժը ու նրան ազատազրկել։ Այս պահին դատախազի ելույթի դեմ փաստարկներ են ներկայացնում Գորիսի համայնքապետի պաշտպանները։

12:12 - 10 սեպտեմբերի, 2024

Ես հրաժարական չեմ տալու, իսկ Սյունիքի մարզպետն իմ ընկերն է. Առուշ Առուշանյան |news.am|

news.am: Ես հրաժարական չեմ տալու, ինձ ժողովուրդն է ընտրել. Ես եղել եմ կալանքում եւ ժողովուրդը մոտ 70 տոկոս վստահության քվե է տվել: Այս մասին, այսօր՝ սեպտռեմբերի 3-ին, լրագրողների հետ ճեպազրույցի ժամանակ ասել է Գորիսի համայնքապետ Առուշ Առուշանյանը՝ անդրադառնալով արդարադատության նախարար Գրիգոր Մինասյանի հայտարարությանը, թե Առուշ Առուշանյանը կա՛մ հրաժարական պետք է տա, կա՛մ ավագանին լիազորություն ունի այդ հիմքով անվստահություն հայտնելու նրան: «Ավագանին նման լիազորություն չունի, եթե օրենքի տեսակետից նայենք: Մնացածը դատարանը կորոշի: Ինչ վերաբերում է նրան, թե ես պատրաստ եմ կալանքի, ես ամեն ինչի էլ պատրաստ եմ»,-ասաց նա: Անդրադառնալով Սյունիքի մարզպետի հետ իր մտերմության մասին լուրերին, Գորիսի քաղաքապետն ասաց. «Սյունիքի մարզպետը մինչ մարզպետ լինելն էլ իմ ընկերն է եղել, հիմա էլ է իմ ընկերը, վաղն էլ է իմ ընկերը լինելու, և այս ողջ պրոցեսների մեջ մարզպետին կապելը ուղղակի կոռեկտ չէ: Սյունիքի մարզպետը կանգնած է թե՛ Սյունիքի, թե՛ իմ ու բոլորի կողքին»: Անդրադառնալով հարցին, թե վերջինս նախկինում ընդդիմադիր կեցվածքով է եղել, այժմ ասում են՝ մի բան փոխվել է՝ Գորիսի համայնքապետը պարզաբանել է․ «Մի քանի հարյուր հազար մարդիկ ընդդիմադիր հայացքներ ունեն, հիմա՝ ի՞նչ, բոլորին պետք է դատեն։ Ես կաշկանդվածություն չունեմ իմ գաղափարների մեջ արտահայտվելու։ Իշխանությունների կողմից համագործակցություն, եթե ուզում եք իմանալ, կա։ Եթե քաղաքական գործառույթ լիներ, կցանկանային որևիցե գումարային ներդրում չունենալ մեր տարածքում և դրանով փորձ անել, թե Գորիսում գործերը լավ չեն։ Ամեն դեպքում այսքան ժամանակ չի եղել նման բան, որ ես կոնկրետ ֆիքսեմ, որ Գորիսի հանդեպ ընդգծված վերաբերմունք կա բացասական առումով, ցանկացած մեր ծրագիր ողջունվել է, փորձել են օգնել»։ Նա նաև հերքել է խոսակցությունները, ըստ որոնց՝ վերջինս հնարավոր է որևէ փոխզիջման է գնացել իշխանության հետ․ «Դուք իմ աչքերին ենք նայում ու կարծում եք, որ ինձ տենց բան ասեն, ես դա կընդունեմ։ Հասկանում եմ, որ շատ մարդիկ ուզում են, որ ավելի ինտրիգային իրավիճակ լինի, բայց խնդիրը նրանում է, որ եթե մի բան գոյություն չունի, չի ասվել, պետք չէ այդ ֆորմատով նայել։ Հիմա, երբ մեկը գործի է լինում, սկսում է գովել, թոշակի տարիքը գալիս է, ազատվում է աշխատանքից, դառնում է ընդդիմադիր»։ Նշենք, որ Գորիսում ընթանում է Առուշ Առուշանյանի հետ կապված գործի քննությունը: Հիշեցնենք՝ Արդարադատության նախարարության Պրոբացիայի ծառայությունը միջնորդություն է ներկայացրել դատարան՝ Գորիսի համայնքապետ Առուշ Առուշանյանի նկատմամբ նշանակված պատիժը՝ տեղական ինքնակառավարման մարմիններում ղեկավար պաշտոն զբաղեցնելու իրավունքից զրկելը, ազատազրկմամբ փոխարինելու, ինչպես նաև ազատազրկման ձևով պատիժը պայմանականորեն չկիրառելու վերաբերյալ որոշումը վերացնելու և պատիժը կրելու ուղարկելու վերաբերյալ: Քրեական գործը, որի շրջանակներում մեղավոր է ճանաչվել Առուշանյանը, վերաբերում է «պաշտոնեական դիրքը չարաշահելուն, ինքնիրավչությանը, ինչպես նաև դիտավորությամբ այլ մարդու առողջությանը վնաս պատճառելուն»։ ՀՀ արդարադատության նախարար Գրիգոր Մինասյանն ասել է՝ Առուշ Առուշանյանը կա՛մ հրաժարական պետք է տա, կա՛մ ավագանին լիազորություն ունի այդ հիմքով անվստահություն հայտնելու նրան:

17:06 - 03 սեպտեմբերի, 2024

Ավելացել է Երևան-Կապան-Երևան կանոնավոր ավիաչվերթի հաճախականությունը

Ավելացել է Երևան-Կապան-Երևան կանոնավոր ավիաչվերթի հաճախականությունը։ Այս մասին տեղեկանում ենք Սյունիքի մարզպետ Ռոբերտ Ղուկասյանի ֆեյսբուքյան էջից․ «Ներկայում իրականացվող՝ երկուշաբթի և ուրբաթ օրերի չվերթներին ավելացել է ևս մեկը։ Այսուհետ կանոնավոր կերպով ևս մեկ չվերթ կիրականացվի չորեքշաբթի օրերին», - ասված է հայտարարությունում։

18:40 - 27 օգոստոսի, 2024

ՀՀ-ում Կանադայի դեսպանը Կապանում հանդիպել է ԵՄ դիտորդական առաքելության աշխատակիցներին |armenpress.am|

armenpress.am: Հայաստանի Հանրապետությունում Կանադայի արտակարգ և լիազոր դեսպան Էնդրյու Թըրները՝ Սյունիքի մարզ կատարած այցի շրջանակներում, Կապան քաղաքում հանդիպել է Եվրոպական միության դիտորդական առաքելության աշխատակիցներին։ Այս մասին նշված է ՀՀ-ում ԵՄ դիտորդական առաքելության X-ի միկրոբլոգում կատարված գրառման մեջ։ «ՀՀ-ում Կանադայի դեսպան Էնդրյու Թըրները Կապանում հանդիպեց ԵՄ դիտորդական առաքելության թիմին։ Վերջինս ՀՀ-ում Կանադայի դեսպանության հյուրերին հակիրճ ներկայացրեց ԵՄ առաքելության՝ տեղում իրականացվող աշխատանքը»,-նշված է գրառման մեջ:

10:55 - 16 օգոստոսի, 2024

ՀՀ Սյունիքի մարզում գլխավոր հյուպատոսություն բացելու ՌԴ ծրագիրը շարունակում է ուժի մեջ մնալ․ Զախարովա

Ռուսաստանի Դաշնության Արտաքին գործերի նախարարության պաշտոնական ներկայացուցիչ Մարիա Զախարովայի խոսքով՝ ՀՀ Սյունիքի մարզում գլխավոր հյուպատոսություն բացելու ՌԴ ծրագիրը շարունակում է ուժի մեջ մնալ։ Այս մասին Զախարովան հայտարարել է ամենշաբաթյա մամուլի ասուլիսի ժամանակ։ «Մեր հայ գործընկերների հետ համատեղ ջանքերով մեզ հաջողվել է բավական առաջ ընթանալ այդ ուղղությամբ։ Մենք սպասում ենք պաշտոնական Երեւանի հետագա քայլերին, այդ թվում՝ դիվանագիտական պրակտիկայում ընդունված հավասարության եւ փոխադարձության սկզբունքով»,- ասել է Զախարովան։

20:11 - 18 հուլիսի, 2024

Հավի մսում և հավի կոտլետում փորձաքննությամբ հայտնաբերվել են անհամապատասխանություններ. ՍԱՏՄ

Սյունիքի մարզի Գորիս քաղաքում հուլիսի 6-ին արձանագրված թունավորման դեպքին արագ արձագանքել է ՀՀ սննդամթերքի անվտանգության տեսչական մարմինը՝ իր իրավասությունների շրջանակում կատարելով անհրաժեշտ միջոցառումներ: Մասնավորապես՝ նույն օրը Գորիս քաղաքի խանութներից մեկից և Շինուհայր գյուղի խանութից կատարվել են նմուշառումներ այն մթերքներից, որոնք գնել և օգտագործել էին «սննդային թունավորում» նախնական ախտորոշմամբ հիվանդանոց տեղափոխված ընտանիքի անդամները: Ըստ այդմ՝ լաբորատոր հետազոտության են հանձնվել ռուսական արտադրության սառեցված հավի սրունք, հավի մսով կոտլետ, կրակովսկի տեսակի երշիկ և ռուսական արտադրության ցորենի ալյուր սննդատեսակները: Համաձայն փորձաքննության արդյունքների՝ բրոյլեր տեսակի սառեցված հավի սրունքի նմուշում հայտնաբերվել են ախտածին ա/թ սալմոնելաներ (արտադրող և մատակարար՝ «ՍՊԿ Կուրնիկով» ՍՊԸ, Սարատովի թռչնակոմբինատ, արտադրված 10.04.2024թ, պիտանիության ժամկետը՝ 10.01.2025թ.), իսկ «Հոմ ֆուդ» ապրանքանիշի հավի մսով կոտլետը ՄԱՖԱնՄՔ (մեզոֆիլ աէրոբ և ֆակուլտատիվ անաէրոբ մանրէներ) ցուցանիշով չի համապատասխանել ԵԱՏՄ տեխնիկական կանոնակարգի պահանջներին (արտադրող՝ Ա/Ձ Սամսոն Ավագյան, Սյունիքի մարզ, արտադրված 25.05.2024թ, պիտանիության ժամկետը 120 օր): Լաբորատոր փորձաքննության արդյունքները կտրամադրվեն նախաքննական մարմնին: Տեսչական մարմինը հետագծելիությամբ կիրականացնի վերահսկաողական միջոցառումներ: Արդյունքները կհրապարակվեն: Հիշեցնենք, որ Գորիսում ընտանիքի 7 անդամ թունավորման հետևանքով տեղափոխվել էր հիվանդանոց, 4-ամյա երեխան մահացել էր։

16:10 - 16 հուլիսի, 2024

Նախարար Անահիտ Ավանեսյանն աշխատանքային այցով Սյունիքի մարզում է

Նախարար Անահիտ Ավանեսյանն աշխատանքային այցով Սյունիքի մարզում է։ Այս մասին հայտնում են ՀՀ առողջապահության նախարարությունից։ Առաջին կանգառը եղել է Գորիսի բժշկական կենտրոնը, որտեղ նախարարին դիմավորել է ԲԿ-ի տնօրեն Դավիթ Մաշուրյանը։ Բուժհաստատությունն ունի վերանորոգված և վերազինված անհետաձգելի բուժօգնության բաժանմունք։ Նախարարին է ներկայացվել մատուցվող ծառայությունների ծավալը, հագեցվածությունը։ Կարևորելով արյան պաշարների մշտական համալրման ռազմավարական նշանակությունը և տեղակայումը` Գորիսում մեկնարկել են Արյան փոխներարկման կայանի շինաշխատանքները։ Նախարարը հետևել է աշխատանքների ընթացքին, դիտարկումներ արել և տվել հանձնարարականներ պատասխանատուներին։ Կապիտալ շինարարության ծրագրով Գորիսում նախատեսվում է պոլիկլինիկայի նոր շենքի կառուցումը։ Նախագծման փուլում է նաև Խնձորեսկի ամբուլատորիայի կառուցումը, որը կսպասարկի համայնքի 4000-ից ավելի բնակչությանը։ Նախարարն անդրադարձել է նաև 2024թ. առաջին կիսամյակում Գորիսի տարածաշրջանի բժշկական հաստատությունների ԱԱՊ բուժաշխատողների գործունեությանը և դրա դիմաց խրախուսական (բոնուսային) վարձատրության ցուցանիշներին: Տարածաշրջանի բոլոր թերապևտները, ընտանեկան բժիշկները, մանկաբույժները և բուժակ֊մանկաբարձական կետի բուժքույրերը ստացել են հավելավճարներ։ Անահիտ Ավանեսյանի այցը Գորիսում ավարտվել է «Ֆրանս֊հայկական սրտանոթային կենտրոնում» և այնտեղ գործող վերականգնողական կենտրոնում։

18:03 - 12 հուլիսի, 2024

ՀՀ-ում Բելգիայի դեսպանն այցելել է Սյունիքի մարզ |news.am|

news.am: Հայաստանի Հանրապետությունում Բելգիայի Թագավորության արտակարգ և լիազոր դեսպան Էրիկ Դե Մույնքը Եվրոպական միության դիտորդական առաքելության ուղեկցությամբ այցելել է Սյունիքի օդանավակայան, եղել մարզի մի քանի համայնքներում։ ՀՀ-ում ԵՄ դիտորդական առաքելության X-ի միկրոբլոգում կատարված գրառման մեջ։ «Պատիվ էր նախորդ շաբաթվա վերջում Կապանում հյուրընկալել Հայաստանում Բելգիայի դեսպան Էրիկ Դե Մույնքին։ Դեսպանն այցելել է Սյունիք օդանավակայան և սահմանամերձ մի քանի համայնքներ», - նշված է ԵՄ դիտորդական առաքելության գրառման մեջ։

11:32 - 11 հուլիսի, 2024

ՔԿ-ն՝ Շինուհայր բնակավայրում ընտանիքի 7 անդամների թունավորման մասին

ՔԿ նախագահի մամուլի քարտուղար Գոռ Աբրահամյանն անդրադարձել է Շինուայր բնակավայրում ընտանիքի 7 անդամների թունավորմանը: «2024 թ. հուլիսի 6-ին՝ ժամը 01:35-ին, ՀՀ ՆԳՆ ոստիկանության Գորիսի բաժնից ՀՀ ՔԿ Սյունիքի մարզային քննչական վարչության Գորիսի քննչական բաժնում ստացվել է հաղորդում, որի համաձայն՝ «Գորիսի բժշկական կենտրոն» ՓԲԸ-ից հայտնել են, որ «սուր էգզոգեն թունավորում» ախտորոշմամբ, ժամը 22.00-ից մինչև հուլիսի 7-ին՝ ժամը 05:00-ն ընկած ժամանակահատվածում, շտապօգնության մեքենայով Տաթև համայնքի Շինուհայր բնակավայրից իրենց մոտ են տեղափոխվել 7 անձ, որոնցից երկուսը՝ տղամարդ և կին՝ ամուսնիններ, համապատասխանաբար 34 և 31 տարեկան, 5-ը՝ մի քանի ամսականից մինչև 12 տարեկան երեխաներ։ Երեխաներից 2-ի վիճակը եղել է ծայրահեղ ծանր։ Ավելի ուշ նույն բուժկենտրոնից հայտնել են, որ իրենց մոտ ծայրահեղ ծանր վիճակում տեղափոխված երեխաներից մեկը՝ 4 տարեկան, մահացել է։ Կատարված ստուգումներով պարզվել է, որ ընտանիքի անդամների ինքնազզգացողությունը սկսել է վատանալ հուլիսի 5-ին՝ ժամը 20:00-ի սահմաններում, ընտանիքի բոլոր անդամներով ընթրելուց հետ: Հաղորդման առթիվ 2024 թ. հուլիսի 6-ին ՀՀ ՔԿ Սյունիքի մարզային քննչական վարչության Գորիսի քննչական բաժնում ՀՀ քրեական օրենսգրքի 412-րդ հոդվածի 2-րդ մասի 2-րդ կետի հատկանիշներով նախաձեռնվել է քրեական վարույթ, կատարվում է նախաքննություն: Ամուսինները հարցաքննվել են՝ տալով նույնաբովանդակ ցուցմունք։ Քննությամբ նախնական տվյալներ են ձեռք բերվել այն մասին, որ ընտանիքի անդամների ինքնազգացողությունը կտրուկ վատացել է Շինուհայր բնակավայրի և Գորիս քաղաքի խանութներից գնված և ընթրիքի համար պատրաստված մսեղենն ու երշիկեղենն ընտանիքի բոլոր անդամներով ուտելուց հետո, երեխաները նաև մրգեր ու հատապտուղներ են կերել: Կատարվել է դեպքի վայրի և համապատասխան խանութ սրահների զննություններ, փորձաքննության համար ստացվել են սննդի, ջրի և այլ անհրաժեշտ նմուշներ: Նշանակվել է դատասննդային փորձաքննություն, դատաբժշկական և դիակի դատաբժշկական փորձաքննություններ։ Ոստիկանության բաժնին տրվել է քննությանը հետաքրքրող տվյալների ձեռբերման նպատակով օպերատիվ-հետախուզական միջոցառումներ անցկացնելու հանձնարարություն: Ծնողները դուրս են գրվել հիվանդանոցից, 4 երեխաները դեռևս շարունակում են մնալ բուժհաստատությունում՝ բժիշկների հսկողության ներքո, նրանցից մեկը տեղափոխվել է Երևանի համապատասխան բժշկական կենտրոն»,- գրել է Աբրահամյանը։ Ծանուցում. Հանցանքի համար մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի օրինական ուժի մեջ մտած դատավճռով:

16:38 - 08 հուլիսի, 2024

Առնվազն մի շարք սահմանամերձ գյուղերում եռուզեռ է, ինչի համար ուրախ ենք. Փաշինյանը՝ բնակարանային մատչելիության ապահովման աջակցության ծրագրի մասին |1lurer.am|

1lurer.am: Ներկայացվող նախագծով առաջարկվում է փոփոխություններ և լրացումներ կատարել ՀՀ սահմանամերձ բնակավայրերում ընտանիքների բնակարանային մատչելիության ապահովման աջակցության 2022-2025 թվականների ծրագրում և կարգում: Ինչպես գիտենք, ծրագրի գործնական փուլ մտնելուց հետո մենք ունենք բավականին մեծ դիմելիություն, և այս պահի դրությամբ Միասնական սոցիալական ծառայության կողմից հաստատվել են ավելի քան 1330 շահառուների հայտեր, որոնցից միայն 1080-ը՝ 2024 թվականին, և սա այն դեպքում, երբ մենք կանխատեսել էինք, որ 2024-ին կունենանք շուրջ 550 հայտ: Տավուշի մարզում եղել է 809, Սյունիքում՝ 167, Վայոց ձորի մարզում՝ 167, Գեղարքունիքում՝ 85, Արարատի մարզում՝ 106 հայտ: 850-ի հետ արդեն կան հիփոթեքային վարկավորման պայմանագրեր, և տրամադրվել են վարկերը. մնացածը գտնվում են ամենատարբեր փուլերում: Այդ մասին Կառավարության նիստի ժամանակ ասաց ԱՍՀ նախարար Նարեկ Մկրտչյանը: «Ծրագրի նպատակայնությունը գնահատելու համար մենք պայմանավորվել էինք, որ հընթացս կիրականացնենք ուսումնասիրություն՝ հասկանալու համար, թե ինչ փոփոխությունների անհրաժեշտություն ծրագրում կարող է առաջանալ: 2024 թվականի ապրիլի 1-ի դրությամբ 603 ընտանիքների մասով ուսումնասիրություն է կատարվել, և արդյունքները ցույց են տալիս, որ, օրինակ՝ թվով 292 շահառու ամուսինների գումարային տարիքը գերազանցում է 80-ը, որոնցից 137-ը չունեն երեխա, շահառուներից 107-ը քաղաքաբնակ են, իսկ 496-ը՝ գյուղաբնակ, բայց դրանից՝ քաղաքաբնակներից 36-ն են հաշվառված Երևան քաղաքում: Սա նշանակում է, որ դեռևս ռիսկային չէ շահառուների հաշվառման վայրի նկատմամբ սահմանափակումներ չկիրառելը: Ելնելով այս ուսումնասիրություններից՝ մենք առաջարկում ենք ծրագրում կատարել փոփոխություններ, մասնավորապես՝ սահմանել ամուսինների գումարային տարիքի առավելագույն շեմը 75 տարի կամ տարիքային շեմը գերազանցելու դեպքում առնվազն 1 անչափահաս երեխայի առկայությունը դարձնել պարտադիր: ՀՀ քաղաքացի լինելու պայմանը կիրառել շահառու ընտանիքի բոլոր անդամների վրա: Շահառու համարել նաև ամուսնուն կորցրած՝ մահացած կամ զոհված, և առնվազն 1 անչափահաս երեխա ունեցող միայնակ ծնողին, և Տավուշի մարզի Բաղանիս, Բերքաբեր, Կիրանց և Ոսկեպար բնակավայրերում անհատական բնակելի տուն կառուցելու նպատակով տրամադրվող հիփոթեքային վարկերի դեպքում տալ 5 մլն հավելում, ինչը լրացուցիչ կխրախուսի նշված բնակավայրերում կառուցապատում իրականացնելը: Այդ բնակավայրերում արդեն վարկավորվածների համար առաջարկվում է մինչև 5 մլն դրամի վերանորոգման հիփոթեք: Այս պահի դրությամբ Բերքաբերում ունենք 39 հաստատված հայտ, Ոսկեպարում՝ 3, Կիրանցում՝ 18, և Բաղանիսում՝ 5»,- ասաց նախարարը: Նա տեղեկացրեց, որ նախագծով առաջարկվում է շահառուների նոր շրջանակին վերաբերող փոփոխություններն ուժի մեջ դնել սույն թվականի օգոստոսի 1-ից: Նաև առաջարկվում է մինչև 2000 հայտը բավարարելուց հետո մի փոքր դադար վերցնել, ուսումնասիրել խնդիրները, վերլուծություն կատարել, այնուհետև շարունակելու որոշում կայացնել: «Մեր հիմնական խնդիրը և նպատակը եղել է սահմանամերձ գյուղերում որոշակի աշխուժություն, եռուզեռ մտցնելը, և առնվազն մի շարք գյուղերում այդ եռուզեռն առկա է, ինչի համար մենք ուրախ ենք»,- ասաց ՀՀ վարչապետ Նիկոլ Փաշինյանը:

13:20 - 27 հունիսի, 2024