ՌԴ ԱԳՆ

Լավրովն ու Արաղչին քննարկելու են իրավիճակը Հարավային Կովկասում. ՌԴ ԱԳՆ |tert.am|

tert.am: ՌԴ ԱԳ նախարար Սերգեյ Լավրովն ու Իրանի ԱԳ նախարար Սեյյեդ Աբբաս Արաղչին ապրիլի 17-18-ին, ի թիվս այլնի, քննարկելու են իրավիճակը Հարավային Կովկասում. այս մասին, ՏԱՍՍ-ի փոխանցմամբ, ճեպազրույցում ասել է ՌԴ ԱԳՆ-ն պաշտոնական ներկայացուցիչ Մարիա Զախարովան: «Ապրիլի 17-18-ն Իրանի արտգործնախարարության ղեկավարն աշխատանքային այցով կլինի Մոսկվայում, նա բանակցություններ կվարի իր ռուս գործընկերոջ հետ: Նրանք կշարունակեն կարծիքների մանրակրկիտ փոխանակումն արդի միջազգային և տարածաշրջանային հարցերի շուրջ, ներառյալ Իրանի միջուկային ծրագրի վերաբերյալ Գործողությունների համատեղ համապարփակ ծրագրի շուրջ ստեղծված իրավիճակը, Սիրիայում, Հրավային Կովկասում և Կասպից ծովում իրադրությունը»,- ասել է դիվանագետը։Հիշեցնենք, որ Իրանի արտաքին գործերի նախարար Սեյյեդ Աբբաս Արաղչին ժամանել է Մոսկվա, որտեղ նախատեսված են նրա բանակցությունները ռուս գործընկեր Սերգեյ Լավրովի հետ։ Ավելի վաղ Արաղչին ասել էր, որ իր այցի հիմնական նպատակը Իրանի գերագույն առաջնորդ այաթոլլահ Ալի Խամենեիի գրավոր ուղերձը ՌԴ նախագահ Վլադիմիր Պուտինին փոխանցելն է։

14:51 - 17 ապրիլի, 2025

ՌԴ-ն ակնկալում է, որ մինչև մայիս հստակություն կլինի Կապանում գլխավոր հյուպատոսություն բացելու հարցում |armenpress.am|

armenpress.am: Մոսկվան ակնկալում է, որ մինչև մայիս ամիս հստակություն կլինի Հայաստանի Սյունիքի մարզի Կապան քաղաքում Ռուսաստանի գլխավոր հյուպատոսություն բացելու հարցում։ Այդ մասին ամենշաբաթյա մամուլի ասուլիսի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։ Նա հավելել է, որ ռուսական ներկայության հետևողական ընդլայնումը ՀՀ համար ռազմավարական կարևոր տարածքում համապատասխանում է թե՛ Հայաստանի, թե՛ Ռուսաստանի, թե՛ տարածաշրջանի երկարաժամկետ շահերին։ «Ավանդական խնդիրները հաշվի առնելով, որոնք լուծում են ՌԴ հյուպատոսարաններն արտերկրում, տվյալ քայլը կարող է էական լիցք հաղորդել առևտրաներդրումային, գիտակրթական, մշակութային և հումանիտար համագործակցությանը, այդ տարածքի և Ռուսաստանի երկրամասերի միջեւ փոխշահավետ կապերի կարգավորմանը, տնտեսական օրակարգի առաջմղմանը մեր երկրների միջև։ Սյունիքը ձեռք է բերում կարեւոր նշանակություն նաեւ ԵԱՏՄ ֆորմատում` պայմանավորված Իրանի հետ ազատ առևտրի գոտի ստեղծելու պայմանագրով»,- նշել է Զախարովան։ 2023 թվականի նոյեմբերին Ռուսաստանի կառավարությունը հավանություն էր տվել ՀՀ Սյունիքի մարզի Կապան համայնքում հյուպատոսություն բացելու վերաբերյալ ՌԴ ԱԳՆ-ի առաջարկին։ 2024 թվականի նոյեմբերին ՌԴ ԱԳՆ պաշտոնական ներկայացուցիչ Մարիա Զախարովան հայտարարել էր, որ այդ հարցը Հայաստանի հետ սկզբունքորեն համաձայնեցված է՝ շեշտելով, որ սպասում են հայկական կողմի վերջնական հաստատմանը։

15:28 - 09 ապրիլի, 2025

ՌԴ-ն պատրաստ է օգնել Հայաստանին և Ադրբեջանին տարաձայնությունները հաղթահարելու հարցում |armenpress.am|

armenpress.am: Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան հայտարարել է, որ Մոսկվան հետևում է հայ-ադրբեջանական սահմանային իրավիճակին և կողմերին զսպվածության, խնդիրները խաղաղ ճանապարհով լուծելու կոչ է անում։ Մոսկվայում «Արմենպրես»-ի թղթակցի փոխանցմամբ՝ այս մասին ամենշաբաթյա մամուլի ասուլիսի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան և ընդգծել, որ հաստատում են Բաքվին ու Երևանին ուղղված կոչը` զսպվածություն ցուցաբերել, քայլեր ձեռնարկել դեէսկալացիայի ուղղությամբ, խուսափել ցանկացած գործողությունից, որ կտանի իրավիճակի սրման։ «Բոլոր ծագող հարցերը պետք է լուծել բացառապես խաղաղ, քաղաքական ճանապարհով։ Մեր հերթին պատրաստ ենք ջանքեր գործադրել` գործընկերներին օգնելու հաղթահարել ծագած տարաձայնությունները խաղաղության պայմանագիրը ստորագրելու համար, ինչպես նաև տրանսպորտային, տնտեսական կոմունիկացիաների ապաշրջափակման, սահմանազատման, հումանիտար հարցերի լուծման ուղղությամբ` Ռուսաստանի, Ադրբեջանի և Հայաստանի առաջնորդների միջև եռակողմ պայմանավորվածությունների շրջանակում»,- ասել է Մարիա Զախարովան։ Ադրբեջանը վերջին շրջանում պարբերաբար կեղծ լուրեր է տարածում, թե հայկական զինված ուժերը իբր սահմանի տարբեր հատվածներում կրակում են ադրբեջանական դիրքերի ուղղությամբ։ Հայաստանի պաշտպանության նախարարությունը հերքել է Բաքվի բոլոր մեղադրանքները։ Ադրբեջանը նման գործելաոճ է որդեգրել այն բանից հետո, երբ կողմերը հայտարարեցին միմյանց միջև խաղաղության համաձայնագրի նախագծի տեքստի շուրջ համաձայնության հասնելու մասին։ Հայաստանը դրանից անմիջապես հետո Ադրբեջանին առաջարկեց քննարկումներ սկսել համաձայնագրի ստորագրման տեղի ու ժամկետների վերաբերյալ, սակայն Ադրբեջանը համաձայնագրի ստորագրման համար նոր նախապայմաններ է առաջ քաշում։

15:08 - 09 ապրիլի, 2025

Լավրովը Հայաստանի և այլ երկրների դեսպանների հետ քննարկել է Հարավային Կովկասում ապակայունացման ռիսկերը |hy.armradio.am|

hy.armradio.am: ՌԴ ԱԳ նախարար Սերգեյ Լավրովը երկուշաբթի եվրասիական մի շարք երկրների դեսպանների հետ հանդիպմանը քննարկել է ռուս-ամերիկյան երկխոսության հարցերը և ուկրաինական կարգավորման հարցը, հայտնում է ռուսական դիվանագիտական գործակալության կայքը։ «Քննարկման ընթացքում արծարծվել են նաև միջազգային օրակարգի այլ հարցեր, այդ թվում՝ ռուս-ամերիկյան երկխոսության և ուկրաինական ճգնաժամի կարգավորման խնդիրները»,- ասվում է գերատեսչության կայքում։ Ինչպես նշել են գերատեսչությունում, Լավրովը հիմնարար գնահատականներ է տվել Եվրասիայի տարբեր հատվածներում անվտանգության իրավիճակին։ «Նա նշել է Եվրատլանտյան անվտանգության հայեցակարգի ճգնաժամը, ուշադրություն հրավիրել ՆԱՏՕ-ի երկրների վտանգավոր գործողությունների վրա՝ ուղղված Ասիական-խաղաղօվկիանոսյան տարածաշրջանում իրավիճակի ապակայունացմանը, պայթյունավտանգ իրավիճակին Մերձավոր Արևելքում, Հարավային Կովկասի և Կենտրոնական Ասիայի կայունությանը սպառնացող ռիսկերին»,-ընդգծել է ՌԴ ԱԳՆ-ն։ Հանդիպման մասնակիցները մտքեր են փոխանակել մայրցամաքի բոլոր պետությունների և նրանց ասոցիացիաների մասնակցությամբ Եվրասիայում անվտանգության նոր ճարտարապետություն ստեղծելու Ռուսաստանի նախագահ Վլադիմիր Պուտինի կողմից առաջադրված նախաձեռնության իրականացմանն առնչվող հարցերի շուրջ, հայտնում է գերատեսչությունը։ «Քննարկման ընթացքում ընդգծվել է եվրասիական տարածքում կայունության ապահովման, անվտանգության անբաժանելիության սկզբունքի գործնական կիրառման և եվրասիական խնդիրների լուծման համար եվրասիական պետությունների առաջնային պատասխանատվության ապահովման անհրաժեշտությունը»,- ասված է հաղորդագրության մեջ։ Հանդիպմանը մասնակցել է նաև Ռուսաստանում ՀՀ դեսպան Գուրգեն Արսենյանը։

09:41 - 08 ապրիլի, 2025

Կարևոր է շարունակել մեր գործընկերային փոխգործակցությունը. Միրզոյանի ուղերձը՝ ՀՀ և ՌԴ ԱԳՆ-ների միջև դիվանագիտական հարաբերությունների հաստատման 33-ամյակի կապակցությամբ

Հայաստանի արտաքին գործերի նախարար Արարատ Միրզոյանը ուղերձ է հղել Հայաստանի Հանրապետության և Ռուսաստանի Դաշնության միջև դիվանագիտական հարաբերությունների հաստատման 33-ամյակի կապակցությամբ; ՀՀ ԱԳ նախարարի՝ ՌԴ գործընկերոջը հասցեագրված ուղերձում նշված է. «Հարգելի՛ Սերգեյ Վիկտորի, Սրտանց շնորհավորում եմ Ձեզ Հայաստանի Հանրապետության և Ռուսաստանի Դաշնության միջև դիվանագիտական հարաբերությունների հաստատման 33-ամյակի կապակցությամբ: Այս՝ համեմատաբար կարճ պատմական ժամանակահատվածում, շնորհիվ համատեղ կառուցողական և արդյունավետ աշխատանքի, Հայաստանի և Ռուսաստանի միջպետական հարաբերություններն ամրապնդվել և ընդլայնվել են՝ հիմնվելով մեր ժողովուրդների դարավոր բարեկամության վրա: Միջազգային հարաբերությունների փոփոխվող ճարտարապետության ժամանակակից պայմաններում կարևոր է շարունակել մեր գործընկերային փոխգործակցությունը՝ հիմնվելով մեր պետությունների շահերի վրա և ի բարօրություն մեր երկրների ու ժողովուրդների։ Մենք որպես ուղենիշ ունենք քաղաքական, սոցիալ-տնտեսական, մարդասիրական և այլ ոլորտներում երկարաժամկետ փոխշահավետ համագործակցությունը և նպատակ ունենք շարունակել ու ընդլայնել բովանդակալից, մեր երկրների շահերին ամբողջությամբ համապատասխանող երկխոսությունը։ Ցանկանում եմ Ձեզ և Ռուսաստանի Դաշնության ԱԳՆ բոլոր աշխատակիցներին ամուր առողջություն, անսպառ էներգիա և հետագա հաջողություններ, իսկ Ռուսաստանի եղբայրական ժողովրդին՝ խաղաղություն և բարգավաճում»։

14:36 - 03 ապրիլի, 2025

Չնայած խարխլելու փորձերին՝ մեզ հաջողվում է պահպանել քաղաքական երկխոսության բարձր մակարդակ. Լավրովը՝ Միրզոյանին |news.am|

news.am: Հայաստանի Հանրապետության և Ռուսաստանի Դաշնության միջև դիվանագիտական հարաբերությունների հաստատման 33-ամյակի կապակցությամբ՝ Հայաստանի և Ռուսաստանի ԱԳ նախարարներ Արարատ Միրզոյանը և Սերգեյ Լավրովը փոխանակվել են ուղերձներով: Ստորև ներկայացնում ենք ՌԴ արտաքին գործերի նախարար Սերգեյ Լավրովի ուղերձը. «Հարգելի՛ Արարատ Սամվելովի, Ընդունեք անկեղծ շնորհավորանքներ Ռուսաստանի Դաշնության և Հայաստանի Հանրապետության միջև դիվանագիտական հարաբերությունների հաստատման 33-րդ տարեդարձի կապակցությամբ։ Այս իրադարձությունը նշանավորել է Մոսկվայի և Երևանի երկկողմ հարաբերությունների ժամանակակից փուլի սկիզբը։ Հիմնվելով հոգևոր և բարոյական արժեքների ընդհանրության, միջոլորտային և հումանիտար շփումների ավանդական ամրության վրա՝ Ռուսաստանը և Հայաստանը մշակել են ամուր իրավական դաշտ և կառուցել բազմակողմ, հավասար, փոխշահավետ հարաբերություններ։ Չնայած ռուս-հայկական դաշինքը խարխլելու արտաքին փորձերին՝ մեզ հաջողվում է պահպանել քաղաքական երկխոսության և արտաքին քաղաքականության համակարգման բարձր մակարդակ և մեծացնել առևտրատնտեսական համագործակցությունը ինչպես երկկողմ, այնպես էլ միասնական ինտեգրացիոն տարածության ձևաչափով։ Մենք պատրաստ ենք շարունակել համատեղ աշխատանքը՝ ավելի խորացնելու և բարելավելու գործընկերության արդյունավետությունը՝ ի շահ մեր երկրների քաղաքացիների, ի շահ Հարավային Կովկասում խաղաղության և անվտանգության ամրապնդման»։ Ձեզ և Հայաստանի արտգործնախարարության բոլոր աշխատակիցներին մաղթում եմ քաջառողջություն, բարօրություն և հաջողություններ մասնագիտական գործունեության մեջ, իսկ եղբայրական հայ ժողովրդին՝ բարգավաճում։

14:21 - 03 ապրիլի, 2025

Քաղաքական խորհրդակցություններ՝ ՀՀ և ՌԴ ԱԳՆ-ների միջև

Մարտի 20-ին Մոսկվայում Հայաստանի Հանրապետության և Ռուսաստանի Դաշնության արտաքին գործերի նախարարությունների միջև կայացել են քաղաքական խորհրդակցություններ ՀՀ ԱԳ նախարարի տեղակալ Մնացական Սաֆարյանի և ՌԴ ԱԳ նախարարի տեղակալ Միխայիլ Գալուզինի գլխավորությամբ։ Այս մասին տեղեկացնում են ՀՀ ԱԳՆ-ից։ Խորհրդակցությունների շրջանակներում կողմերը քննարկել են երկկողմ հարաբերությունների օրակարգի հարցերի լայն շրջանակ: Հայաստանի Հանրապետության և Ռուսաստանի Դաշնության միջև հարաբերությունների զարգացման համատեքստում կարևորվել է բոլոր մակարդակներում, այդ թվում՝ արտաքին գործերի նախարարությունների գծով քաղաքական երկխոսությունը, ինչպես նաև տարբեր ոլորտներում փոխշահավետ համագործակցության շարունակականությունը։ Մտքեր են փոխանակվել Հայաստանի և Ռուսաստանի միջև առևտրատնտեսական փոխգործակցության զարգացման, ինչպես նաև մշակութային և հումանիտար ուղղություններով առաջիկայում իրականացվելիք համատեղ միջոցառումների և ծրագրերի վերաբերյալ: Նախարարի տեղակալը ՌԴ գործընկերոջը տեղեկացրել է ՀՀ արտաքին քաղաքականության հիմնական ուղղությունների և տեսլականի, ինչպես նաև Ադրբեջանի հետ երկկողմ ձևաչափում սահմանազատման ուղղությամբ արձանագրված առաջընթացի, խաղաղության համաձայնագրի համաձայնեցման, ՀՀ կողմից «Խաղաղության խաչմերուկ» ծրագրի շրջանակներում ապաշրջափակման ուղղությամբ տարվող աշխատանքների վերաբերյալ:Քննարկվել են նաև տարածաշրջանի զարգացումներին առնչվող մի շարք հարցեր:

22:01 - 20 մարտի, 2025

Ռուսաստանը ողջունում է Հայաստանի և Ադրբեջանի միջև խաղաղության համաձայնագրի բանակցությունների ավարտը. ՌԴ ԱԳՆ |armenpress.am|

armenpress.am: Ռուսաստանի ԱԳՆ պաշտոնական ներկայացուցիչ Մարիա Զախարովան հայտարարել է, որ Մոսկվան ողջունում է Հայաստանի և Ադրբեջանի միջև խաղաղության համաձայնագրի նախագծի շուրջ բանակցությունների ավարտը։ «Աջակցում ենք այս կարևոր քայլին՝ հայ-ադրբեջանական հարաբերությունների համապարփակ կարգավորման ճանապարհին, ինչպես նախատեսված է Ռուսաստանի, Ադրբեջանի և Հայաստանի ղեկավարների 2020-2022 թթ. եռակողմ պայմանավորվածություններով»,- «Արմենպրես»-ի հաղորդմամբ՝ Զախարովայի խոսքերը մեջբերել է ՏԱՍՍ-ը։ ՌԴ ԱԳՆ ներկայացուցիչը նշել է, որ Մոսկվան պատրաստ է հարթակ տրամադրել Ադրբեջանի և Հայաստանի ներկայացուցիչների շփումների համար, ինչը կնպաստի երկկողմ հարաբերությունների կարգավորմանը և խաղաղության պայմանագրի ստորագրմանը։ «Վերահաստատում ենք մեր առաջարկը՝ ռուսական հարթակ տրամադրել Ադրբեջանի եւ Հայաստանի ներկայացուցիչների շփումների համար՝ խաղաղության համաձայնագրի ստորագրման և հայ-ադրբեջանական կարգավորման հարցերի ողջ շրջանակում»,-հավելել է դիվանագետը։ Զախարովան ընդգծել է, որ Մոսկվան նպատակ ունի նպաստել Բաքվի և Երևանի միջև խաղաղության համաձայնագրի ստորագրմանը և տարածաշրջանում տրանսպորտային հաղորդակցությունների ապաշրջափակմանը։

20:53 - 14 մարտի, 2025

Եթե ՀՀ-ն մինչև 2025թ․ վերջը չվճարի ՀԱՊԿ անդամակցության գումարը, անդամ երկրները կարող են դիտարկել տարբեր սցենարներ․ ՌԴ ԱԳ փոխնախարար |factor.am|

factor.am: Եթե Հայաստանը մինչև 2025 թվականի վերջը չվճարի ՀԱՊԿ անդամակցության գումարը, ապա կազմակերպության անդամ երկրները «կարող են դիտարկել տարբեր սցենարներ», բայց, հավանաբար, ոչ մեկին չեն վտարի։ Այս մասին ՌԻԱ Նովոստիին ասել է ՌԴ ԱԳ փոխնախարար Ալեքսանդր Պանկինը։ «Մինչև հունվարի 1-ը (2026 թվականի) կարող է իրավիճակ ստեղծվել, որ երկու տարվա չվճարումների դեպքում երկրները կարող են դիտարկել տարբեր սցենարներ»,- ասել է Պանկինը՝ չմանրամասնելով, թե ինչ սցենարների մասին է խոսքը։ Նա հավելել է, որ եղել են դեպքեր, երբ այլ երկրներ պարտքեր են ունեցել տեխնիկակակն, ֆինանսական և այլ պատճառներով։ Ըստ նրա՝ Հայաստանի հետ չի լինի՝ «իրենք կհեռանան կամ կվռնդեն» իրավիճակը, այլ երկրները կարող են դիտարկել հետագա համագործակցության ուղիները։ «Ոչ ոք, հավանաբար, ոչ մեկին չի վռնդի, ոչ ոք ինքնաբերաբար չի հեռանա: Բայց, հավանաբար, հնարավոր կլինի դիտարկել երկրների միջև հետագա փոխգործակցության եղանակների հարցը: Սա չպետք է ընկալվի որպես «իրենք կգնան կամ կվռնդեն», ոչ մի դեպքում»,- ասել է ՌԴ ԱԳ փոխնախարարը։ Հիշեցնենք, որ Հայաստանը սառեցրել է իր անդամակցությունը ՀԱՊԿ-ին։

11:24 - 07 մարտի, 2025

Մակրոնի միջուկային հռետորաբանությունը սպառնալիք է Մոսկվայի համար․ Լավրով |azatutyun.am|

azatutyun.am: Ֆրանսիայի նախագահ Էմանուել Մակրոնի միջուկային հռետորաբանությունը սպառնալիք է Ռուսաստանի համար, այսօր հայտարարել է Ռուսաստանի արտաքին գործերի նախարար Սերգեյ Լավրովը։ «Եթե նա մեզ համարում է սպառնալիք, Եվրոպական երկրների, Մեծ Բրիտանիայի առաջանորդների նիստ է հրավիրում, ասում է, որ անհրաժեշտ է միջուկային զենք կիրառել, պատրաստվում է միջուկային զենք կիրառել Ռուսաստանի դեմ, դա, իհարկե, սպառնալիք է», - ասել է Լավրովը: Մակրոնը չորեքշաբթի երեկոյան հեռուստաուղերձի ժամանակ հայտարարեց, որ Ռուսաստանից բխող սպառնալիքի և ԱՄՆ-ի քաղաքականության հնարավոր փոփոխությունների պատճառով նախաձեռնելու է քննարկում, որպեսզի Ֆրանսիան, որպես միջուկային տերություն, երաշխավորի Եվրամիության մյուս երկրների անվտանգությունը։ Մակրոնը նաև շեշտել է, որ միջուկային զենք կիրառելու որոշումը կմնա բացառապես Ֆրանսիայի նախագահի իրավասությունների շրջանակում։

15:33 - 06 մարտի, 2025

Մոսկվան ակնկալում է, որ Բաքվի հետ համատեղ ջանքերով կողմերը կգան փոխադարձ ընդունելի լուծման. Զախարովա|1lurer.am|

1lurer.am: Ռուսաստանը կապի մեջ է Ադրբեջանի հետ՝ այդ երկրում России сегодня միջազգային մեդիախմբի մաս կազմող Sputnik գործակալության ներկայացուցչությունը փակելու հարցով: Այդ մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան: «Ադրբեջանցի գործընկերներին տեղեկացրել ենք մեր դիրքորոշումը մեզ համար կարևոր այս հարցի վերաբերյալ։ Կարծում եմ՝ այն պակաս կարևոր չէ նաև Բաքվի համար։ Սպասում ենք կառուցողական արձագանքի»,- հինգշաբթի ճեպազրույցի ժամանակ ասել է Զախարովան։ Նրա խոսքով՝ Մոսկվան ակնկալում է, որ Բաքվի հետ համատեղ ջանքերով կողմերը կգան փոխադարձ ընդունելի լուծման։ «Հիմք ենք ընդունում այն, որ մեր գործընկերներն իրենց հետագա քայլերում կառաջնորդվեն Ռուսաստանի և Ադրբեջանի միջև հարաբերությունների դաշնակցային բնույթով և զերծ կմնան մեր երկրների ու ժողովուրդների միջև երկկողմ և բազմակողմ հարաբերություններին վնաս պատճառելուց»,- նշել է ՌԴ ԱԳՆ պաշտոնական ներկայացուցիչը։

19:09 - 27 փետրվարի, 2025

ՌԴ ԱԳՆ-ն Գյումրիում նոր գլխավոր հյուպատոս է նշանակել |factor.am|

factor.am: Իգոր Տիտովը Գյումրիում Ռուսաստանի նոր գլխավոր հյուպատոս է նշանակվել։ Գյումրիում։ Այս մասին հաղորդել է ՌԴ ԱԳՆ-ն։ «ՌԴ ԱԳՆ հրամանով՝ Իգոր Տիտովը նշանակվել է Հայաստանի Հանրապետության Գյումրի քաղաքում Ռուսաստանի Դաշնության գլխավոր հյուպատոս»,- ասվում է հաղորդագրությունում։ 2019-2023 թվականներին Տիտովը եղել է Ճապոնիայում «Ռոսսոտրուդնիչեստվո»-ի ներկայացուցչության ղեկավարը, 2023-2024 թվականներին՝ «Ռուս-ճապոնական հասարակություն» համառուսաստանյան հասարակական կազմակերպության փոխնախագահը։ 2024-2025 թվականներին զբաղեցրել է Հայաստանի Կապան քաղաքում ՌԴ գլխավոր հյուպատոսության բացման թիմի ղեկավարի պաշտոնը։

16:32 - 27 փետրվարի, 2025

Ստամբուլում վաղը կհանդիպեն ՌԴ-ԱՄՆ դիվանագետները․ Լավրով |azatutyun.am|

azatutyun.am: Վաղը Ստամբուլում կհանդիպեն Ռուսաստանի ու Միացյալ Նահանգների դիվանագետները՝ երկու երկրների դիվանագիտական ներկայացուցչությունների գործունեությանը խոչընդոտող հարցերը քննարկելու համար, հայտարարել է Ռուսաստանի արտգործնախարար Սերգեյ Լավրովը։ Էր-Ռիյադում փետրվարի 18-ին տեղի ունեցած ռուս-ամերիկյան բանակցություններից հետո կողմերը հայտարարեցին, որ պայմանավորվել են ջանքեր գործադրել՝ վերականգնելու դեսպանատների լիարժեք գործունեությունը։ Այս շաբաթասկզբին Լավրովը տեղեկացրեց, որ Ռուսաստանն ու ԱՄՆ-ն այս շաբաթ բանակցությունների ամբողջական փուլ կանցկացնեն՝ երկու երկրների դիվանագիտական առաքելությունների գործունեության հետ կապված խնդիրները լուծելու համար՝ նշելով, որ անցյալ շաբաթ այդ թեմայով տեխնիկական շփումներ են տեղի ունեցել։ «Այս շաբաթ տեղի կունենան լիարժեք խորհրդակցություններ, որոնք, հուսով եմ, կվերացնեն վերջին տարիներին կուտակված արհեստական խոչընդոտները»,- ասել էր Լավրովը։

15:54 - 26 փետրվարի, 2025

Լավրովն այսօր կմեկնի Իրան, որտեղ Արաղչիի հետ, ի թիվս այլնի, կքննարկի իրավիճակը Հարավային Կովկասում |tert.am|

tert.am: Ռուսաստանի արտաքին գործերի նախարար Սերգեյ Լավրովը փետրվարի 25-ին աշխատանքային այցով կմեկնի Իրան, որտեղ կհանդիպի իր իրանցի գործընկեր Աբբաս Արաղչիի հետ, երեքշաբթի հայտնել են ՌԴ ԱԳՆ-ից։«Փետրվարի 25-ին Ռուսաստանի Դաշնության արտաքին գործերի նախարար Սերգեյ Լավրովն Իրանի Իսլամական Հանրապետության արտաքին գործերի նախարար Աբբաս Արաղչիի հրավերով աշխատանքային այցով կմեկնի Թեհրան։Արտաքին հարաբերությունների գերատեսչությունների ղեկավարները առարկայորեն կքննարկեն ռուս-իրանական հարաբերությունների երկկողմ օրակարգը»,- ասվում է նախարարության կայքում։ Բանակցությունների ընթացքում նախատեսվում է հատուկ շեշտադրում դնել փոխշահավետ առևտրատնտեսական համագործակցության հետագա զարգացման վրա՝ էներգետիկայի և տրանսպորտի ոլորտներում առանցքային համատեղ նախագծերի իրականացման համատեքստում, նշել են ՌԴ ԱԳՆ-ում։ Նախատեսվում է մտքերի փոխանակում մի շարք հրատապ միջազգային հարցերի շուրջ, այդ թվում՝ իրավիճակը Սիրիայում, Անդրկովկասում, Աֆղանստանում, Եմենում, Պարսից ծոցի գոտում, Մերձավոր Արևելքում։

13:27 - 25 փետրվարի, 2025

ՌԴ նախագահի օգնականը պարզաբանել է Սաուդյան Արաբիայում ԱՄՆ-ի ներկայացուցիչների հետ բանակցությունների օրակարգը |armenpress.am|

armenpress.am: Ռուսաստանի և ԱՄՆ-ի ներկայացուցիչների հանդիպումներում խոսքը գնում է Ուկրաինայի հարցով բանակցություններ սկսելու համաձայնության մասին։ Ինչպես փոխանցում է ՌԻԱ Նովոստին, այս մասին ասել է ՌԴ նախագահի օգնական Յուրի Ուշակովը։ «Ներկայում հարցն այն է, որպեսզի պայմանավորվենք, թե ինչպես սկսել բանակցությունները Ուկրաինայի հարցով»,- ասել է նա։ Ուշակովի խոսքով՝ Մոսկվան ամերիկյան կողմի հետ հանդիպումը համաձայնեցրել է հեռախոսով։ Նրա տեղեկատվությամբ՝ երկկողմ բանակցությունները տեղի կունենան երեքշաբթի օրը։ Ռուսաստանի նախագահի օգնականն ընդգծել է, որ հանդիպումից առաջ ռուսական պատվիրակությունը գործնական է տրամադրված, միաժամանակ՝ ԱՄՆ-ն դեռ չի նշանակել Ուկրաինայի հարցով իր բանակցողին։ Ռուսական կողմը բանակցություններում կներկայացնեն նախագահի օգնականը, Արտաքին գործերի նախարարը, իսկ տնտեսական հարցերով՝ նաև Ռուսաստանի ուղիղ ներդրումների հիմնադրամի ղեկավարը Կիրիլ Դմիտրևը։ Ռուս-ամերիկյան բանակցությունները, որոնք տեղի կունենան փետրվարի 18-ին Էր Ռիադում, կանցկացվեն առանց երրորդ երկրների մասնակցության։ «Առայժմ, այս համատեքստում, մենք խոսում ենք երկկողմ բանակցությունների մասին: Մենք, ըստ էության, այդ նպատակով թռչում ենք Էր Ռիադ»,- ասել է Ուշակովն Առաջին ալիքի եթերում՝ պատասխանելով ուկրաինական կարգավորման հնարավոր բանակցությունների կոնֆիգուրացիայի մասին հարցին։

21:51 - 17 փետրվարի, 2025

ՌԴ ԱԳՆ-ն տարակուսանք է հայտնել ադրբեջանական ԶԼՄ-ներում հակառուսական հրապարակումների վերաբերյալ |1lurer.am|

1lurer.am: Ռուսաստանի արտաքին գործերի նախարարի տեղակալ Միխայիլ Գալուզինը արտգործնախարարությունում ընդունել է Ադրբեջանի արտակարգ և լիազոր դեսպան Ռահման Մուստաֆաևին: «Ռուսական կողմն ընդգծել է 2022 թվականի փետրվարի 22-ին բարձր մակարդակով ստորագրված հռչակագրի հիման վրա Ռուսաստանի և Ադրբեջանի միջև ռազմավարական գործընկերության և դաշնակցային ոգով հարաբերությունների կառուցման անվերապահ կարևորությունը՝ ի շահ երկու պետությունների ազգային շահերի։ Այս կապակցությամբ տարակուսանք է հայտնվել ադրբեջանական ԶԼՄ-ներում հակառուսական ուղղվածության վերջին հրապարակումների շարքի, ինչպես նաև Բաքվում «Ռուսական տան» դեմ ապատեղեկատվական արշավի կապակցությամբ: Նշվել է հնչած մեղադրանքների բացարձակ անհիմն լինելը»,- ասված է ՌԴ ԱԳՆ հաղորդագրության մեջ։ Քննարկվել է նաև 2024 թվականի դեկտեմբերի 25-ին Ղազախստանի Ակտաու քաղաքի մոտակայքում «Ադրբեջանական ավիաուղիների» ինքնաթիռի վթարի թեման: Ընդգծվել է պաշտոնական հետաքննությունն ավարտելու և դրա արդյունքների հրապարակման անհրաժեշտությունը:

12:27 - 28 հունվարի, 2025