#armVote

2021 թվականի հունիսի 20-ին Հայաստանում կանխատեսվում են խորհրդարանական արտահերթ ընտրություններ: 

2021 թվականի մարտի 18-ին ՀՀ վարչապետ Նիկոլ Փաշինյանը հայտարարեց, որ այս որոշումը կայացվել է ՀՀ նախագահի, «Իմ քայլը» խմբակցության, «Լուսավոր Հայաստան» խմբակցության ղեկավար Էդմոն Մարուքյանի ու «Բարգավաճ Հայաստան» խմբակցության ղեկավար Գագիկ Ծառուկյանի հետ քննարկումներից հետո։

ՀՀ Սահմանադրությունը սահմանում է, որ խորհրդարանական արտահերթ ընտրություններ անցկացնելու համար Ազգային ժողովը պետք է արձակվի, դրա համար վարչապետը պետք է հրաժարական ներկայացնի, որից հետո 2 շաբաթում 2 անգամ անընդմեջ չընտրվի նոր վարչապետ, այնուհետեւ ոչ շուտ, քան 30 եւ ոչ ուշ, քան 45 օր հետո նշանակվեն նոր ընտրություններ։

Այս գործընթացի համար վարչապետը հրաժարական է ներկայացրել 2021 թվականի ապրիլի 25-ին, եւ արդեն մեկ անգամ չի ընտրվել։ Վարչապետի ընտրության հարցով հաջորդ նիստը կգումարվի մայիսի 10-ին։

Քաղաքական մի շարք ուժեր կարեւորում են նախքան ընտրությունները Ընտրական օրենսգրքի փոփոխությունների ընդունումը։ Խորհրդարանական մեծամասնությունը հայտարարել էր, որ Օրենսգրքում փոփոխություններ անելու որոշում ունեն, դրանցից որոշներն արդեն ընդունվել են, մասնավորապես, ռեյտինգային ընտրակարգը վերացվել է։ ԸՕ փոփոխությունների մեծ փաթեթը դեռեւս ընդունված չէ։

Կարող եք կատարել նվիրատվություն հետևյալ հղումով՝

Նվիրաբերել
Փաստեր են ստացվել Բերդ համայնքում ՏԻՄ ընտրություններին քարոզչություն կատարելուն հարկադրելու դեպքի առթիվ

Փաստեր են ստացվել Բերդ համայնքում ՏԻՄ ընտրություններին քարոզչություն կատարելուն հարկադրելու դեպքի առթիվ

Քննչական կոմիտեն տեղեկացնում է, որ ՏԻՄ ընտրություններին քարոզչություն կատարելուն հարկադրելու դեպքի առթիվ նախաձեռնված քրեական վարույթով ստացվել են ապացուցողական նշանակություն ունեցող փաստական հանգամանքներ։  «Տավուշի մարզային քննչական վարչությունում շարունակվում է 2022 թվականի սեպտեմբերի 25-ին Բերդ համայնքում տեղական ինքնակառավարման մարմինների ընտրություններին քարոզչություն կատարելուն հարկադրելու դեպքի առթիվ ՀՀ ազգային անվտանգության ծառայության քննչական դեպարտամենտում նախաձեռնված քրեական վարույթի նախաքննությունը: Բացի քրեական վարույթի շրջանակներում տուժող ճանաչված «Ներքին Կարմիաղբյուրի մանկապարտեզ» համայնքային ոչ առևտրային կազմակերպության տնօրենի պաշտոնակատարի կողմից իրավապահներին հայտնած տեղեկություններից, քննչական գործողությունների ճանապարհով տվյալներ են ձեռք բերվել ինչպես վերջինիս՝ ընտրություններին քարոզչություն կատարելուն հարկադրելու, այնպես էլ՝ քրեական վարույթով ապացուցողական նշանակություն ունեցող այլ փաստական հանգամանքներ ևս։ Մասնավորապես, օրենքով սահմանված կարգով Բերդի համայնքապետարանի վարչական շենքում՝ համայնքապետի, համայնքապետի տեղակալի, աշխատակազմի քարտուղարի աշխատասենյակներում, կատարվել են խուզարկություններ, որոնց արդյունքում հայտնաբերվել են 80 անձանց տվյալներ պարունակող ձեռագիր գրառումներով ցուցակներ՝ հիշյալ անձանց ստորագրություններով, ինչպես նաև՝ Բերդ համայնքի համայնքապետարանի ենթակայության տակ գտնվող կազմակերպությունների ղեկավարների՝ համայնքապետի տեղակալին հասցեագրված աշխատանքից ազատվելու վերաբերյալ դիմումներ, որոնց ընթացք չի տրվել: Բացի այդ, օրենքով սահմանված կարգով կատարվել է նաև աշխատակազմի քարտուղարի կողմից օգտագործվող բջջային հեռախոսահամարի՝ «Հեռախոսային հաղորդակցության վերահսկում» օպերտիվ-հետախուզական միջոցառումը, որի արդյունքում պարզվել է, որ Բերդի համայնքապետարանի աշխատակազմի քարտուղարը և նույն համայնքի Ներքին Կարմիրաղբյուր բնակավայրի վարչական ղեկավարը, ընտրություններին նախորդող ժամանակահատվածում, հեռախոսազրույց են վարել՝ ՀՈԱ կազմակերպության տնօրենի ժամանակավոր պաշտոնակատարի նկատմամբ ազդեցություն գործադրելու և այդ կերպ նրան «Զորավոր համայնք» դաշինքի օգտին նախընտրական քարոզչություն կատարելուն հարկադրելու մասին։ Ավելի վաղ տեղեկացրել էինք, որ ձեռք բերված բավարար ապացույցների համակցությամբ՝ Բերդ համայնքի ղեկավարի տեղակալին, Բերդի համայնքապետարանի աշխատակազմի քարտուղարին և նույն համայնքի Ներքին Կարմիրաղբյուր բնակավայրի վարչական ղեկավարին մեղադրանքներ են առաջադրվել՝ ՀՀ քրեական օրենսգրքի 211-րդ հոդվածի 2-րդ մասի 3-րդ և 5-րդ կետերով: Որպես խափանման միջոց նրանց նկատմամբ ընտրվել էր կալանավորումը»: Նախաքննությունը շարունակվում է:
18:51 - 01 հոկտեմբերի, 2022
19 ընտրատեղամասում վերահաշվարկի, 6-ում՝ քվեարկության արդյունքներն անվավեր ճանաչելու մասին դիմումներ են ստացվել

19 ընտրատեղամասում վերահաշվարկի, 6-ում՝ քվեարկության արդյունքներն անվավեր ճանաչելու մասին դիմումներ են ստացվել

Թիվ 24 ընտրատարածքային ընտրական հանձնաժողովում ստացվել է 1 դիմում՝ թվով 6 տեղամասերում քվեարկության արդյունքներն անվավեր ճանաչելու մասին: Նշված հանձնաժողովներում վերահաշվարկների աշխատանքներըբոլոր ընտրատարածքային ընտրական հանձնաժողովներում կմեկնարկեն այսօր՝ 2022 թվականի սեպտեմբերի 27-ին, ժամը 14:00-ից: Այս մասին տեղեկացնում է Կենտրոնական ընտրական հանձնաժողովը։ 2022 թվականի սեպտեմբերի 25-ին կայացած տեղական ինքնակառավարման մարմինների ընտրությունների քվեարկության արդյունքների վերահաշվարկի կամ տեղամասում քվեարկության արդյունքներն անվավեր ճանաչելու մասին դիմումներ համապատասխան ընտրատարածքային ընտրական հանձնաժողով կարող էին ներկայացվել մինչև սեպտեմբերի 27-ը` ժամը 11.00-ն: Սահմանված ժամկետում ընտրական տեղամասում քվեարկության արդյունքների վերահաշվարկի մասին ընդհանուր թվով 19 դիմումներ են ստացվել թվով 2 ընտրատարածքային ընտրական հանձնաժողովներում: Նշված դիմումներով պահանջվում է վերահաշվարկ իրականացնել 19 տեղամասերում: Հիշեցնենք, սեպտեմբերի 25-ին, տեղական ինքնակառավարման մարմինների համամասնական ընտրակարգով հերթական ընտրություններ են անցկացվել Արագածոտնի, Գեղարքունիքի, Լոռու, Կոտայքի, Շիրակի, Սյունիքի, Վայոց ձորի և Տավուշի մարզերի 17 համայնքում, իսկ Արագածոտնի մարզի Ալագյազ համայնքում՝ մեծամասնական ընտրակարգով հերթական ընտրությունները:
12:51 - 27 սեպտեմբերի, 2022
ՔՊ-ն առաջատար է 9 համայնքներում․ ՏԻՄ ընտրությունների նախնական արդյունքները

ՔՊ-ն առաջատար է 9 համայնքներում․ ՏԻՄ ընտրությունների նախնական արդյունքները

Երեկ Հայաստանի 8 մարզերի 18 համայնքներում տեղի են ունեցել տեղական ինքնակառավարման մարմինների ընտրություններ։ Գեղարքունիքի, Տավուշի, Լոռու, Վայոց Ձորի, Կոտայքի, Շիրակի, Արագածոտնի, Սյունիքի 17 համայնքներում ընտրությունները անցկացվել են համամասնական ընտրակարգով։ Infocom-ը ներկայացնում է ընտրությունների՝ ԿԸՀ հրապարակած նախնական արդյունքները։ Այսպես․ Արագածոտնի Ծաղկահովիտ համայնքում հաղթել է «Քաղաքացիական պայմանագիր» կուսակցությունը՝ հավաքելով  2299 ձայն․ համայնքում առաջադրված «Հզոր համայնք» դաշինքը հավաքել է 1327 ձայն, «Հանրապետություն» կուսակցությունը՝ 539 ձայն, «Լուսավոր Հայաստան» կուսակցությունը՝ 181 ձայն։ Արագածոտնի Թալին համայնքում առաջադրված 5 կուսակցություններից առաջատարը դարձյալ «Քաղաքացիական պայմանագիր» կուսակցությունն է՝ 7990 ձայնով։ «Արդար Հայաստան» կուսակցությունը այստեղ հավաքել է 2323 ձայն, «Հայ հեղափոխական դաշնակցությունը»՝ 1193 ձայն, «Կայունություն» կուսակցությունը՝ 879 ձայն, «Ապրելու երկիր»-ը՝ 913 ձայն։ Գեղարքունիքի մարզի Ճամբարակ համայնքում ընտրություններին մասնակցել է միայն «Դեմոկրատական այլընտրանք» կուսակցությունը՝ հավաքելով 5257 ձայն։ Լոռու մարզի Գյուլագարակ համայնքում «Քաղաքացիական պայմանագիր»-ն է առաջատար՝ 1779 ձայնով։ Բացի ՔՊ-ից՝ այստեղ ընտրություններին մասնակցել է նաև «Ապրելու երկիր» կուսակցությունը՝ հավաքելով 1731 ձայն։ Լոռու մարզի Ալավերդի համայնքում պայքարն ընթացել է 4 ուժերի մեջ․ նախնական արդյունքներով այստեղ առաջատար է «Ապրելու երկիր» կուսակցությունը՝ 6791 ձայնով։ «Քաղաքացիական պայմանագիր» կուսակցությունը հավաքել է 6557 ձայն, «Հայ ազգային կոնգրես»-ը՝ 340 ձայն, «Հայ Յեղափոխական Դաշնակցությունը»՝ 316 ձայն։ Լոռի Բերդում առաջատար է ՔՊ-ն՝ 1254 ձայնով։ «Ապրելու երկիր» կուսակցությունը այստեղ հավաքել է 619 ձայն, «Հանրապետություն» կուսակցությունը՝ 338 ձայն։ Տաշիրում առաջատար է «Միասնական համայնք» դաշինքը՝ 5904 ձայնով։ Այստեղ առաջադրվել էր նաև «Քաղաքացիական պայմանագիր»-ը՝ հավաքելով 2376 ձայն։ Կոտայքի մարզի Չարենցավան համայնքում նույնպես առաջատար Է «Միասնական համայնք» դաշինքը՝ 6812 ձայնով։ «Քաղաքացիական պայմանագիր» կուսակցությունն այստեղ հավաքել է 5571 ձայն, «Ապրելու երկիր»-ը՝ 879: Ակունք համայնքում նախնական արդյունքներով հաղթել է «Քաղաքացիական պայմանագիր» կուսակցությունը՝ 2708 ձայնով։ Մյուս մրցակիցը՝ «Համախմբում» դաշինքը հավաքել է 2098 ձայն։ Բյուրեղավանում 4 քաղաքական ուժ է մասնակցել ընտրություններին, իսկ առաջատարը դարձել է «Միասնություն» դաշինքը՝ 2079 ձայնով։ ՔՊ-ն այստեղ հավաքել է 1247, «Արդար Հայաստան» կուսակցությունը՝ 1157, «Հայ Յեղափոխական Դաշնակցությունը»՝ 166 ձայն։ Ջրվեժում առաջադրվել է միայն «Քաղաքացիական պայմանագիր» կուսակցությունը և ստացել է 2084 ձայն։ Շիրակի մարզի Անի համայնքում հաղթել է «Ազգ-համայնք» դաշինքը՝ ստանալով 3763 ձայն։ «Քաղաքացիական պայմանագիր» կուսակցությունը այստեղ հավաքել է 3032 ձայն, «Հայկական երազանք» կուսակցությունը՝ 1037 ձայն։ Սյունիքի Սիսիան համայնքում ընտրություններին մասնակցել է 7 քաղաքական ուժ, առաջատարը ՔՊ-ն է՝ 4093 ձայնով։ «Աշխատանք և արդարություն» դաշինքը այստեղ ստացել է 2693 ձայն, «Ապրելու երկիր» կուսակցությունը՝ 2307 ձայն, «Մեկ Հայաստան» կուսակցությունը՝ 979 ձայն, «Հանուն Հանրապետության ժողովրդավարության պաշտպանների դաշինք» կուսակցությունը՝ 794 ձայն, «Զարգացող համայնք» դաշինքը՝ 570 ձայն, «Հայ Յեղափոխական Դաշնակցությունը»՝ 403 ձայն։ Քաջարան համայնքում առաջատարը «Դեպի միասնություն» դաշինքն է` 3127 ձայնով։ ՔՊ-ն այստեղ հավաքել է 1118 ձայն, «Հանրապետություն» կուսակցությունը՝ 482 ձայն։ Վայոց ձորի մարզի Արենի համայնքում հաղթել է «Քաղաքացիական պայմանագիր» կուսակցությունը՝ 3281 ձայնով։ «Հանրապետություն» կուսակցությունը այստեղ հավաքել է 388 ձայն։ Եղեգիս համայնքում նույնպես առաջատարը ՔՊ-ն է՝ 1593 ձայնով։ Ազատական կուսակցությունը այստեղ հավաքել է 1162 ձայն, «Վերելք» կուսակցությունը՝ 45 ձայն։ Տավուշի Բերդ համայնքում առաջադրված 3 ուժերից հաղթել է «Զորավոր համայնք» դաշինքը՝ 5685 ձայնով։ «Քաղաքացիական պայմանագիր» կուսակցությունը այստեղ ստացել է 4298 ձայն, «Արժանապատիվ սերունդ» դաշինքը՝ 1097 ձայն։ Արագածոտնի Ալագյազ համայնքում ընտրությունները տեղի են ունեցել մեծամասնական ընտրակարգով։ Այստեղ համայնքի ղեկավար է ընտրվել է Մախմուդով Ջասմը՝ 773 ձայնով։ Մյուս թեկնածուն՝ Ուռուսյանը Անզորը այստեղ հավաքել է 444 ձայն։
11:23 - 26 սեպտեմբերի, 2022
Ժամը 20։00-ին փակվել են 8 համայնքների 314 ընտրատեղամասերը

Ժամը 20։00-ին փակվել են 8 համայնքների 314 ընտրատեղամասերը

Ժամը 20։00-ին փակվել են հանրապետության 8 համայնքների 314 ընտրատեղամասերը։ Կենտրոնական ընտրական հանձնաժողովը նախնական տվյալներ է հայտնել ՏԻՄ ընտրություններին քվեարկության մասնակիցների վերաբերյալ։ Ըստ 20։00-ի տվյալների՝ ամենաակտիվ մասնակցությունը գրանցվել է Քաջարանում՝ 77,77%, իսկ ամենապասիվն ընտրություններին մասնակցել են Ջրվեժի ընտրողները՝ 27,20%: Հիշեցնենք, որ այսօր տեղական ինքնակառավարման մարմինների համամասնական ընտրակարգով հերթական ընտրություններ են անցկացվել Արագածոտնի, Գեղարքունիքի, Լոռու, Կոտայքի, Շիրակի, Սյունիքի, Վայոց ձորի և Տավուշի մարզերի 17 համայնքում, իսկ Արագածոտնի մարզի Ալագյազ համայնքում անցկացվել են մեծամասնական ընտրակարգով հերթական ընտրություններ: Նշված համայնքում ընթացել են համայնքի ղեկավարի և ավագանու անդամների ընտրություններ: Առավոտյան՝ ժամը 08:00-ին, ՀՀ ընտրական օրենսգրքով սահմանված կարգով բացվել են ընտրությունների համար ձևավորված բոլոր 314 ընտրական տեղամասերը և ընդունել առաջին ընտրողներին: ՏԻՄ ընտրությունների ժամանակ ընտրողների էլեկտրոնային գրանցման նպատակով օգտագործվել է 497 տեխնիկական սարքավորում: Ընտրություններին դիտորդական առաքելություն իրականացնելու համար հավատարմագրվել են 4 տեղական հասարակական կազմակերպություններ (դիտոդների ընդհանուր թիվը 210): Ընտրությունների և քվեարկության վերաբերյալ լուսաբանում իրականացնելու համար հավատարմագրվել են 17 զանգվածային լրատվության միջոցների ընդհանուր թվով 182 ներկայացուցիչներ:
20:58 - 25 սեպտեմբերի, 2022
«Անկախ դիտորդի» հաղորդագրությունը՝ ՏԻՄ ընտրություններում 19:00-ի դրությամբ դիտարկման արդյունքների վերաբերյալ

«Անկախ դիտորդի» հաղորդագրությունը՝ ՏԻՄ ընտրություններում 19:00-ի դրությամբ դիտարկման արդյունքների վերաբերյալ

«Անկախ դիտորդ» դիտորդական առաքելությունը 2022 թ. սեպտեմբերի 25-ի առավոտյան 07:00-ից սկսած դիտարկում է Արագածոտնի, Գեղարքունիքի, Լոռու, Կոտայքի, Շիրակի, Վայոց Ձորի, Տավուշի և Սյունիքի մարզերի 18 համայնքներում համամասնական ընտրակարգով (բացառությամբ Ալագյազ համայնքի) անցկացվող տեղական ինքնակառավարման մարմինների ընտրությունները։  Ընտրությունների ընթացքին հետևում են առաքելության շուրջ 100 շրջիկ դիտորդներ։ Շրջիկ խմբերը դիտարկում են բոլոր տեղամասերը, որոնք ներառված են այս ընտրություններում։   19.00-ի դրությամբ առաքելության շրջիկ խմբերն այցելել են 234 տեղամասեր, որոնցից 70-ում արձանագրվել են խախտումներ։ Խախտում Քանակ Ընթացակարգի խախտում 28 Քվեասենյակում գտնվելու իրավունք չունեցող անձանց տևական ներկայություն 26 Կուտակում 24 Ընտրողների ուղղորդում 16 Դիտորդի/ԶԼՄ ներկայացուցիչների իրավունքների խախտում 9 Բաց քվեարկություն/գաղտնիության բացահայտում 8 Իրավասու մարմինների անգործություն 6 Վիճաբանություն և/կամ ծեծկռտուք 5 Քվեասենյակում գտնվելու իրավունք ունեցող անձի՝ մուտքի խոչընդոտում/հեռացում 4 Ընտրողների կազմակերպված տեղափոխություն 3 Քվեաթերթիկների բազմակի խոտան կամ քվեարկության նյութերի բացակայություն/վնասում կամ հափշտակում 2 Այլ անձի փոխարեն կամ բազմակի քվեարկություն/քվեարկության փորձ կամ լցոնում/լցոնման փորձ 1 Ընտրողների շարժ կուսակցության շտաբի և ՏԿ-ի միջև 1 Քվեաթերթիկների դուրս բերում/«կառուսել» 1 «Անկախ դիտորդը» շարունակում է հետևել ընտրությունների ընթացքին տեղամասերում շրջիկ դիտորդական խմբերի միջոցով:
20:20 - 25 սեպտեմբերի, 2022
17:00-ի դրությամբ քվեարկել է ընտրողների 40.36 տոկոսը. ԿԸՀ–ն տվյալներ է հայտնում ՏԻՄ ընտրություններից |tert.am|

17:00-ի դրությամբ քվեարկել է ընտրողների 40.36 տոկոսը. ԿԸՀ–ն տվյալներ է հայտնում ՏԻՄ ընտրություններից |tert.am|

tert.am: Կենտրոնական ընտրական հանձնաժողովը հրապարակել է քվեարկության մասնակցության արդյունքները 17:00-ի դրությամբ. Ծաղկահովիտ գյուղում համայնքում 7020-ից մասնակցել է 3696-ը կամ՝ 52.65 տոկոսը: Ալագյազ համայնքում 2689-ից 1154-ը կամ 42.92 տոկոս: Թալինում 26775 ընտրողից քվեարկել է 10135-ը կամ 37.85 տոկոս: Ճամբարակում 10833 ընտրողից մասնակցել է 4295 կամ 39.65 տոկոս: Գյուլագարակում 6208 ընտրողից քվեարկել է 2739 կամ 44.12 տոկոս: Ալավերդիում 30 547 ընտրողից քվեարկել է 11086-ը կամ՝ 36.29 տոկոսը: Լոռի Բերդում 4009-ից 1727-ը կամ՝43.08 տոկոս: Տաշիրում 18382 ընտրողից՝ քվեարկել է 7339-ը կամ 39.92 տոկոսը: Չարենցավանում՝ 26870 ընտրողից մասնակցել է 10457-ը կամ՝ 38.92 տոկոս: Ակունքում՝ 6855 ընտրողից 3922-ը կամ 57.21 տոկոսը: Բյուրեղավանում՝ 8278 ընտրողից քվեարկել է 3700-ը կամ 44.70 տոկոս: Ջրվեժում՝ 8003 ընտրողից՝ 1532-ը կամ 19.14 տոկոս: Անի համայնքում քվեարկել է 15901 ընտրողից 3768-ը կամ 23.70 տոկոս: Սիսիանում 22942 ընտրողից քվեարկել է 9568-ը կամ 41.71 տոկոսը:  Քաջարանում 6099 ընտրողից քվերակել է 4280 -ը կամ 70.18 տոկոս: Արենիում՝ 8196 ընտրողից քվեարկել է 2578–ը կամ 31.45 տոկոս: Եղեգիսում՝ 4632 ընտրողից մասնակցել է 2223 -ը կամ 47.99 տոկոսը: Բերդում՝ 22485 ընտրողից՝ 8905 -ը կամ 39.60 տոկոս: Ընդհանուր առմամբ բոլոր համայնքներում 236724 ընտրողից մասնակցել է 95545-ը կամ 40.36 տոկոսը:
19:05 - 25 սեպտեմբերի, 2022
«Անկախ դիտորդի» հաղորդագրությունը` ՏԻՄ ընտրություններում 15:00-ի դրությամբ դիտարկման արդյունքների վերաբերյալ

«Անկախ դիտորդի» հաղորդագրությունը` ՏԻՄ ընտրություններում 15:00-ի դրությամբ դիտարկման արդյունքների վերաբերյալ

«Անկախ դիտորդ» դիտորդական առաքելությունը 2022 թ. սեպտեմբերի 25-ի առավոտյան 7:00-ից սկսած դիտարկում է Արագածոտնի, Գեղարքունիքի, Լոռու, Կոտայքի, Շիրակի, Վայոց Ձորի, Տավուշի և Սյունիքի մարզերի 18 համայնքներում համամասնական ընտրակարգով (բացառությամբ Ալագյազ համայնքի) անցկացվող տեղական ինքնակառավարման մարմինների ընտրությունները։   Ընտրությունների ընթացքին հետևում են առաքելության շուրջ 100 շրջիկ դիտորդներ։ Շրջիկ խմբերը դիտարկում են բոլոր տեղամասերը, որոնք ներառված են այս ընտրություններում։   Ստորև ներկայացնում ենք 71 տեղամասերում հանձնաժողովների նիստի դիտարկման ժամանակահատվածի վիճակագրական արդյունքները և մինչև ժամը 15:00-ն առաքելության իրավաբանների և շրջիկ խմբերի կողմից արձանագրված միջադեպերը:   Այսպես, հանձնաժողովի նիստի ընթացքում դիտարկված 71 տեղամասային կենտրոններից 14-ում ՏԸՀ նիստը նախատեսված 7։00-ի փոխարեն մեկնարկել է 15-30 րոպե ուշացումով՝ հանձնաժողովի անդամների ուշացման և տեխնիկական խնդիրների պատճառով։ Տեղամասային կենտրոններից 12-ը գնահատվել են որպես բացարձակապես ոչ մատչելի, աստիճաններով մուտքի դեպքում չեն ունեցել թեքահարթակ և լայն մուտք, իսկ քվեարկության սենյակում և քվեախցիկում հնարավոր չի եղել ազատորեն տեղաշարժվել:   Տեսողության խնդիրներ ունեցող անձանց ինքնուրույն քվեարկության համար նախատեսված որևէ հատուկ միջոց առկա չէ դիտարկված տեղամասերից 43-ում։  12 Տեղամասային կենտրոններում տեղակայված են եղել մեկից ավելի տեղամասեր։ Մեկ տեղամասային կենտրոնում տեղակայված տեղամասերը խոչընդոտում են միմյանց աշխատանքը։ Դիտարկված տեղամասերից 64-ում հանձնաժողովի գործառույթները վիճակահանությամբ պատշաճ բաշխվել են, չորս տեղամասերում գործառույթների բաշխումը կատարվել է մասամբ, երեք տեղամասային կենտրոններում գործառույթների վիճակահանությամբ բաշխում տեղի չի ունեցել։ Դիտարկված 71 տեղամասային կենտրոններից 19-ում առավոտյան նիստին եղել են բացակա անդամներ։ Դիտարկված տեղամասերից 7-ում հանձնաժողովի նախագահը մասամբ է իրականացնում գործառույթները։ 2-ում հանձնաժողովի նախագահի գործառույթները փաստացի իրականացնում է այլ անձ։ Դիտարկված տեղամասային կենտրոններից երկուսում, քվեախցիկի դիրքի պատճառով կարող է խախտվել ընտրողների գաղտնիության իրավունքը։ Հանձնաժողովի նիստի ընթացակարգերը մասամբ են պահպանվել դիտարկված տեղամասերից 10-ում և չեն պահպանվել 2-ում։ Դիտարկված տեղամասային կենտրոններից 5-ում դիտորդներն անբավարար են գնահատել քվեասենյակի լուսավորությունը, ևս 7-ում անբավարար է գնահատվել քվեարկության սենյակի տարածքը։  2 տեղամասերում արձանագրվել է քվեասենյակում ներկա գտնվելու իրավունք չունեցող ոստիկանի ներկայություն․ 1 տեղամասում գրանցվել են միևնույն կուսակցության մեկից ավելի վստահված անձինք:   Դիտարկված տեղամասերից միայն 22-ում ներկայացված չեն եղել առաջադրվող ուժերից որևէ մեկի վստահված անձինք: Դիտարկված տեղամասերից 23-ը գնահատվել են ոչ բավարար մատչելի՝ հաշմանդամություն ունեցող անձանց համար։ «Անկախ դիտորդը» շարունակում է հետևել ընտրությունների ընթացքին տեղամասերում շրջիկ դիտորդական խմբերի միջոցով:
15:18 - 25 սեպտեմբերի, 2022
Եղեգիսում ժամը 14։00-ի դրությամբ ընտրությանը մասնակցել է 1351 քաղաքացի |1lurer.am|

Եղեգիսում ժամը 14։00-ի դրությամբ ընտրությանը մասնակցել է 1351 քաղաքացի |1lurer.am|

1lurer.am: Վայոց ձորի Եղեգիս խոշորացված համայնքում ժամը 14։00-ի դրությամբ քվեարկության իրավունք ունեցող 4632 քաղաքացուց ընտրությանը մասնակցել է 1351-ը կամ 29.17 տոկոսը: Արենի խոշորացված համայնքում քվեարկության իրավունք ունեցող 8196 քաղաքացուց ընտրությանը մասնակցել է 1436-ը կամ 17.52 տոկոսը: Արենի համայնքում ակտիվ են Արենի, Ռինդ, Ագարակաձոր բնակավայրերը (բացարձակ թվերով)։ Եղեգիս համայնքում ակտիվ են Արտաբույնք, Շատին և Քարագլուխ բնակավայրերը (բացարձակ թվերով)։ Եղեգիս համայնքում տոկոսային հարաբերակցությամբ ակտիվ է Հորս բնակավայրը։ Արենի համայնքում տոկոսային հարաբերակցությամբ ակտիվ է Գնիշիկ բնակավայրը։ Տեղեկությունը հայտնեց Ընտրատարածքային ընտրական հանձնաժողովի նախագահ Աղվան Հարությունյանը։ Իսկ Սյունիքի մարզի Քաջարան համայնքում ժամը 14։00-ի դրությամբ քվեարկության իրավունք ունեցող 6112 քաղաքացուց ընտրությանը մասնակցել է 3059-ը: Տեղեկությունը հայտնեց ընտրատարածքային ընտրական հանձնաժողովի նախագահ Սերգեյ Սարգսյանը:
14:59 - 25 սեպտեմբերի, 2022
Մի քանի քաղաքացի փորձել է նաև քվեաթերթիկներ դուրս բերել ընտրատեղամասից․ «Անկախ դիտորդը» նոր խախտումներ է արձանագրել

Մի քանի քաղաքացի փորձել է նաև քվեաթերթիկներ դուրս բերել ընտրատեղամասից․ «Անկախ դիտորդը» նոր խախտումներ է արձանագրել

«Անկախ դիտորդը» նոր խախտումներ է արձանագրել այսօր ընթացքող ՏԻՄ ընտրությունների ընթացքում։  Արձանագրված խախտումները ներկայացնում ենք ստորև․ Բյուրեղավանի 28/11 ընտրատեղամասում դիտորդները նկատել են դեպքեր, երբ ընտրություններին մասնակցող քաղաքացիները հատուկ կերպով ծալել են քվեաթերթիկների ծրարները՝ միաժամանակ «աչքով անելով» «Արդար Հայաստան» կուսակցության վստահված անձին: Ընտրությունները բավական «ակտիվ» են անցնում Ջրվեժում, որտեղ առաջադրված է միայն «Քաղաքացիական պայմանագիր» կուսակցությունը:Չնայած նման «միանձնյա ընտրապայքարին», առաքելության դիտորդները մասնավորապես 29/03 և 29/04 ընտրատեղամասերի մոտ նկատել են մարդկանց կուտակումներ, ընտրողների՝ դեպի ընտրատեղամաս տեղափոխման և ուղղորդման դեպքեր: Տաշիր խոշորացված համայնքի Սվերդլով բնակավայրի 25/09 ընտրատեղամասում արձանագրվել է քվեարկության գաղտնիության խախտման դեպք․ տարեց կինը, նախքան քվեատուփի մեջ գցելը, ծրարից հանել և իր քվեաթերթիկը ցույց է տվել քվեասենյակում գտնվող երկու անձանց: Տաշիրի 25/34 ընտրատեղամասում «Քաղաքացիական պայմանագիր» կուսակցության վստահված անձը պարբերաբար մոտենում և ցուցումներ է տալիս ընտրողներին ընտրության կարգի վերաբերյալ: Չարենցավան խոշորացված համայնքի Ալափարս բնակավայրի 27/13 ընտրատեղամասում նկատվել են մի շարք խախտումներ:  Նախ, տեղամասում միաժամանակ ներկա են գտնվել «Քաղաքացիական պայմանագիր» կուսակցության երկու վստահված անձինք (թույլատրելի է մեկը): Ընտրողներից շատերը ընտրելուց հետո մոտենում էին այս անձանց։ Գրանցվել են բաց քվեարկության դեպքեր:Մի քանի քաղաքացիներ փորձել են նաև քվեաթերթիկներ դուրս բերել ընտրատեղամասից:
13:26 - 25 սեպտեմբերի, 2022
Սիսիանի 34/06 ընտրատեղամասում ներկա են վկայականներ չկրող անձինք. ինչ խախտումներ է արձանագրել Անկախ դիտորդը

Սիսիանի 34/06 ընտրատեղամասում ներկա են վկայականներ չկրող անձինք. ինչ խախտումներ է արձանագրել Անկախ դիտորդը

«Անկախ դիտորդը» վաղ առավոտվանից 49 խմբերով (մոտ 100 դիտորդ) դիտարկում է տարբեր մարզերում ընթացող ՏԻՄ ընտրությունները։ Ներկայացնում են դիտորդների այս պահի դրությամբ ահազանգերը՝ Սիսիանի 34/06 ընտրատեղամասում հանձնաժողովի նախագահը դիտորդներին չի թույլատրում ուսումնասիրել գրանցամատյանը, բոլոր հորդորներին պատասխանում է «ձեր գործը չի», «դուրս եկեք տարածքից» արտահայտություններով: Բացի դա, ընտրատեղամասում են գտնվում վկայականներ չկրող անձինք: Քաջարանի 35/01 ընտրատեղամասում դիտորդներին թույլ չեն տվել մուտք գործել ընտրատեղամաս: Հանձնաժողովի նախագահը պատճառաբանել է, թե չի թույլատրվում նույն առաքելությունից երկու դիտորդների ներկայությունը ընտրատեղամասում: Խնդիրը հանգուցալուծվել է միայն իրավաբանի միջամտությունից հետո: Ալավերդիի 24/15 ընտրատեղամասում ոստիկանը ներկա է գտնվել հանձնաժողովի առավոտյան նիստին, ինչի իրավունքը չուներ: Սիսիանի 34/02 ընտրատեղամասում ոստիկանը հրաժարվել է արձագանքել տարածքում մարդկանց կուտակումների վերաբերյալ դիտորդների ահազանգին՝ պատճառաբանելով, թե ընտրատեղամասի մոտ թույլատրվում է մինչև 15 հոգու ներկա գտնվելը: Ակունքի 28/1 ընտրատեղամասում նկատվում են մարդկանց ու մեքենաների կուտակումներ «Քաղաքացիական պայմանագիր» կուսակցության և «Համախմբում» դաշինքի (ԲՀԿ) վստահված անձանց գլխավորությամբ, որոնք, ըստ ամենայնի, ուղղորդում են ընտրողներին: Տեղում են նաև շուրջ 10 ոստիկաններ: Կուտակումների մասին դիտորդների ահազանգից հետո ոստիկանները փորձել են ինչ-ինչ գործողություններ ձեռնարկել, բայց կուտակումները շարունակվում են: Ճամբարակի 20/15 ընտրատեղամասում քվեախցիկներում չեն եղել ավելորդ քվեաթերթիկներ, ինչը պարտադիր է քվեարկության գաղտնիության ապահովման համար: Ըստ հանձնաժողովի նախագահի՝ դրա կարիքը չի եղել: Առաքելության դիտորդների միջամտությունից հետո հանձնաժողովի նախագահը, այդուհանդերձ, ավելացրել է քվեաթերթիկներ: Ալավերդիի 24/19 ընտրատեղամասում խնդիրներ կան քվեարկության գաղտնիության հետ կապված, քանի որ հանձնաժողովի նախագահի աշխատասեղանը գտնվում է քվեախցիկներին շատ մոտ: Ալավերդիի 24/17 ընտրատեղամասում (Սանահին) հանձնաժողովի անդամները փորձել են խոչընդոտել դիտորդի աշխատանքը այն բանից հետո, երբ վերջինս բարձրաձայնել է վստահված անձանցից մեկի կողմից վկայական չկրելու մասին: Բյուրեղավանի 28/11 ընտրատեղամասում դիտորդները նկատել են դեպքեր, երբ ընտրություններին մասնակցող քաղաքացիները հատուկ կերպով ծալել են քվեաթերթիկների ծրարները՝ միաժամանակ «աչքով անելով» «Արդար Հայաստան» կուսակցության վստահված անձին:
12:30 - 25 սեպտեմբերի, 2022
Բերդ համայնքում ՏԻՄ ընտրությունների համար քարոզչություն կատարելուն հարկադրելու համար 2 անձի նկատմամբ հարուցվել է քրեական հետապնդում

Բերդ համայնքում ՏԻՄ ընտրությունների համար քարոզչություն կատարելուն հարկադրելու համար 2 անձի նկատմամբ հարուցվել է քրեական հետապնդում

ՀՀ ազգային անվտանգության ծառայության քննչական դեպարտամենտում նախաձեռնված, ՀՀ քննչական կոմիտեի Տավուշի մարզային քննչական վարչությունում քննվող քրեական վարույթի շրջանակներում իրականացված քննչական և վարութային գործողությունների արդյունքում պարզվել են ՀՀ Տավուշի մարզի Բերդի համայնքապետարանի աշխատակազմի քարտուղարի և նույն համայնքի Ներքին Կարմիրաղբյուր բնակավայրի վարչական ղեկավարի կողմից 2022 թվականի սեպտեմբերի 25-ին Բերդ համայնքում կայանալիք տեղական ինքնակառավարման մարմինների ընտրություններին քարոզչություն կատարելուն հարկադրելու դեպքի մի շարք հանգամանքներ: Այս մասին տեղեկացնում է Քննչական կոնիտեն: Քննությամբ պարզվել է, որ վերոնշյալ անձինք, 2022 թվականի սեպտեմբերի 25-ին Բերդ համայնքում կայանալիք տեղական ինքնակառավարման մարմինների ընտրություններին սատարելով «Զորավոր համայնք» դաշինքին, օգտագործելով իրենց տրված իշխանական լիազորությունները և դրանցով պայմանավորված ազդեցությունը, Բերդ համայնքի ղեկավարի և «Ներքին Կարմիաղբյուրի մանկապարտեզ» ՀՈԱԿ-ի տնօրենի ժամանակավոր պաշտոնակատարի միջև կնքված աշխատանքային պայմանագիրը լուծելու և պայմանագրի ժամկետը դադարեցնելու սպառնալիքով, 2022 թվականի օգոստոսին վերջինիս հարկադրել են ընդգրկվել հիշյալ դաշինքում և նույն դաշինքի օգտին կատարել քարոզչություն՝ այդ կերպ հարկադրելով նրան հրաժարվել իր նախընտրած կուսակցության օգտին նախընտրկան քարոզչություն կատարելուց: Ձեռք բերված բավարար ապացույցների համակցությամբ՝ ՀՀ Տավուշի մարզի Բերդի համայնքապետարանի աշխատակազմի քարտուղարի և նույն համայնքի Ներքին Կարմիրաղբյուր բնակավայրի վարչական ղեկավարի նկատմամբ ՀՀ քրեական օրենսգրքի 211-րդ հոդվածի 2-րդ մասի 3-րդ և 5-րդ կետերով նախատեսված առերևույթ հանցանքի հատկանիշներով հարուցվել է հանրային քրեական հետապնդում: Նախաքննության ընթացքում որոշում է կայացվել ազատության մեջ գտնվող մեղադրյալներին ձերբակալելու մասին, որի կատարումը հանձնարարվել է ՀՀ ոստիկանության Տավուշի մարզային վարչության համապատասխան ծառայողներին: Նախաքննությունը շարունակվում է : Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ,քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
10:46 - 25 սեպտեմբերի, 2022
Որքան էլ անպատեհ թվա, պետք է գնանք ընտրության. Մանվել Փարամազյան

Որքան էլ անպատեհ թվա, պետք է գնանք ընտրության. Մանվել Փարամազյան

Քաջարանի համայնքապետ Մանվել Փարամազյանը սեպտեմբերի 25-ին Քաջարանում ՏԻՄ ընտրություններին ընդառաջ հանդես է եկել հայտարարությամբ: Հայտարարությունում ասվում է. «Սիրելի հայրենակիցներ, Քաջարան համայնքի հերոսական ժողովուրդ, սեպտեմբերի 13-ին նենգ թշնամին կրկին ներխուժեց մեր երկիր՝ պատճառելով մեզ մեծ կորուստներ: Խորին ցավակցությունս՝ հանուն հայրենիքի իրենց կյանքը չխնայած մեր հայորդիների ընտանիքներին, խոնարհումս հերոսածին հայ մայրերին: Ես կրկին պատերազմի ընթացքում ականատես եղա մեր զինվորների անօրինակ հերոսականությանը: Բառերով անհնար է փոխանցել տեսածս, ապրածս ու զգացածս: Մենք գիտենք, թե որքան թվացյալ ու  փխրուն էր ժամանակավոր խաղաղությունը: Արտաքին ու ներքին բազմաթիվ  գործոններով պայմանավորված՝ մեր գլխին դամոկլյան սրի պես կախված է բնաջնջման, հայրենիքը կորցնելու վտանգը: Ծայրահեղ հոռետեսությունն ու չափազանցված լավատեսությունը մեզ չեն օգնի: Ի՞նչ կարող ենք անել մենք այս իրավիճակում և ի՞նչ պետք է անենք: Գերտերությունների ծավալապաշտական նկրտումներին , մինչև ատամները զինված ոսոխին կարո՞ղ է  փոքրաթիվ, հալածված մի ժողովուրդ դեմ կանգնել: Հավատացե'ք, պատմությունը վկա', կարող է: Իսկ ինչպե՞ս. միմիայն միասնության, համախմբման ճանապարհով. մեր ազգի գոյատևման կոդը, փրկությունը միասնության մեջ է: Սահմանին, թե' թիկունքում, պատերազմի ժամանակ, թե' խաղաղ օրերին, ընտրությունների կապակցությամբ, թե' համայնքաշինության գործընթացում ես չեմ դադարի քարոզել, համոզել, աղերսել, իմ ժողովուրդ, միասնություն, միասնություն, միասնություն: Երբ մենք ազգովի դարձի գանք, հրաժարվենք արատավոր, ազգակործան բարքերից, կտեսնենք Աստծո հովանավորությունը մեր ազգին: Հավատացեք, մեզ պատուհասած  այս աղետալի վիճակից փրկության ելքեր կան, բայց պայմանը մեկն է՝ համախմբումը: Իսկ եթե համախմբվենք, արատավոր երևույթները ինքնին կվերանան մեր միջից, որովհետև համախմբվել` նշանակում է քո եսը խառնել համընդհանուր մենքին, համախմբվել նշանակում է քո անձը ուրանալ ու բարոյապես վեր բարձրանալ, համախմբվել նշանակում է քո շահը ստորադասել համընդհանուր շահին, համախմբվել նշանակում է քո տեսակետը ձուլել ազգային գաղափարախոսությանը, համախմբվել նշանակում է գիտակցել, որ  եթե հայրենիքդ կորցնես, կադաստրով ձեռք բերված տունդ էլ կկորցնես, համախմբվել նշանակում է հանուն հայրենիքի դուրս գալ սեփական հարմարավետության գոտուց և պատրաստ լինել նվիրաբերել հայրենիքին ամենաթանկը` տղամարդիկ զենքով հայրենիքի պաշտպանությանը մասնակցեն` բարեգործությունը, թիկունքային աշխատանքները վերապահեն կանանց ու երեխաներին: Սիրելի ժողովուրդ, ոչ մի ազգ չի գա մեզ համար, մեր փոխարեն կռվելու, և հիշեք, եթե պատերազմ չեք ուզում, ուրեմն միշտ պետք է պատրաստ լինեք պատերազմի: Ուժեղի վրա չեն հարձակվում: Քանդեք ձեր մտքի կապանքները, ձեր շահի ցանկապատերը, վանեք վախի, անմիաբանության ոգին, մերժեք ապազգային քարոզը, սիրեք իրար, ներեք ձեր անձնական թշնամիներին, ատեք ազգի թշնամիներին: Սեպտեմբերի 25-ին Քաջարան համայնքում ՏԻՄ և ավագանու ընտրություններ են, որքան էլ անպատեհ թվա, պետք է գնանք ընտրության: Մենք կընտրենք ոչ թե պարզապես համայնքի ղեկավար և ավագանի` այլ կորոշենք, թե ով ենք մենք, որտեղից ենք գալիս և ուր ենք գնում:  Ինչպե՞ս, ի՞նչ թիմով, ի՞նչ գաղափարախոսությամբ: Սեպտեմբերի 25-ին Քաջարանը կտա այս ուղենշային հարցերի պատասխանները: Մենք ենք անցյալը, ներկան և ապագան, և մեր կամքը մեր լեռների պես ամուր է: Դեպի միասնություն` հանուն Քաջարանի, հանուն մեր արժեքների, հանուն մեր լինելիության:
11:07 - 23 սեպտեմբերի, 2022