Իլհամ Ալիև

Ռուսաստանի հետ երկկողմ հարաբերություններում բոլոր հարցերը լուծվել են. Ալիև |1lurer.am|

1lurer.am: Ականատեսն ենք Հարավային Կովկասում պատմական փոփոխությունների՝ Շուշիի գլոբալ մեդիա ֆորումում հայտարարել է Ադրբեջանի նախագահը: Իլհամ Ալիևը նշել է, թե ավանդական դաշինքները թուլացել են, ի հայտ են եկել գործակցության նոր ձևաչափեր։ «Տարածաշրջանում աշխարհաքաղաքական փոփոխություններ են տեղի ունենում: Բավական է, որքան հակամարտություններ և առճակատումներ եղան»,- հավելել է նա: Ալիևն անդրադարձել է Բաքու-Մոսկվա հարաբերություններին, ընդգծել՝ արդեն տևական ժամանակ է՝ Ռուսաստանի հետ երկկողմ հարաբերություններում բոլոր հարցերը լուծվել են: «Նույնիսկ դաշնակցային համագործակցության մասին հռչակագրի ստորագրումից առաջ մենք բոլոր հարցերը կարգավորել էինք փոխըմբռնման, փոխադարձ հարգանքի հիման վրա՝ հաշվի առնելով փոխադարձ շահերը և մեր ժողովուրդների հարաբերությունների դարավոր պատմությունը»,- մանրամասնել է Ադրբեջանի նախագահը: Նա գոհունակություն է հայտնել, որ վերջին շրջանում ամենաբարձր մակարդակով հանդիպումներն ավելի ինտենսիվ են դարձել: Ալիևը տեղեկացրել է, որ շարունակելու են նույն ոգով, քանի որ ռուսական կողմի հետ քննարկելու շատ բան կա: Ադրբեջանի նախագահը նաև հայտարարել է, թե իր երկիրը անկախ արտաքին քաղաքականություն է վարում, զարգացնում հարաբերությունները գործընկերների, նաև տարածաշրջանի երկրների հետ՝ անտեսելով բամբասանքները, այդ թվում՝ Եվրախորհրդարանից կամ Եվրախորհրդից հնչող հայտարարությունները:

19:04 - 20 հուլիսի, 2024

«Հայաստանը պետք է համաձայնի Մինսկի խմբի լուծարմանը և փոխի Սահմանադրությունը». Իլհամ Ալիև |azatutyun.am|

azatutyun.am: «Հայաստանը պետք է [խաղաղության մասին] իր հայտարարությունները ամրագրի գործողություններով», - այսօր Շուշիում հայտարարել է Ադրբեջանի նախագահ Իլհամ Ալիևը։ Ադրբեջանի ղեկավարի խոսքով՝ այս փուլում Բաքուն Երևանից երկու քայլ է ակնկալում. - «Առաջինը՝ համատեղ դիմում ԵԱՀԿ-ին Մինսկի խմբի լուծարման առաջարկով։ Հայաստանը համաձայն չէ սրան։ Երկրորդը՝ Հայաստանի Սահմանադրության փոփոխություն»։ «Ցանկանում եմ հատուկ ընդգծել, որ մենք դա անում ենք, ոչ այն պատճառով, որ ցանկանում ենք միջամտել Հայաստանի ներքին գործերին։ Բանն այն է, որ Հայաստանի Սահմանադրության տեքստում հղում կա Անկախության հռչակագրին, որում հստակ տարածքային սպառնալիք կա Ադրբեջանի հասցեին։ Այնտեղ խոսվում է այսպես կոչված Լեռնային Ղարաբաղի և Հայաստանի վերամիավորման մասին։ Քանի դեռ այդ հոդվածը այնտեղ է՝ խաղաղության համաձայնագրի կնքումը անհնարին է։ Սահմանադրությունն ավելի բարձր է քան որևէ միջազգային պայմանագիր։ Մենք չենք ցանկանում հայտնվել մի իրավիճակում, երբ նրանք կմտափոխվեն և մենք ստիպված կլինենք անել այն, ինչ արդեն մեկ անգամ արել ենք՝ սեպտեմբերին», - հայտարարում էր Ալիևը։

18:53 - 20 հուլիսի, 2024

Ալիև․ «Երևանը պետք է հստակ պատասխան տա՝ ինչպես կարող են ադրբեջանցիները վերադառնալ իրենց պատմական հողեր» |azatutyun.am|

azatutyun.am: «Մենք Երևանից հստակ պատասխան ենք ակնկալում, թե ինչպես կարող են Հայաստանի ներկա տարածքից […] արտաքսված ադրբեջանցիները կամ նրանց ժառանգները վերադառնալ իրենց պատմական հողեր՝ այցելել այդ տարածքներ կամ բնակություն հաստատել այնտեղ», - այսօր Շուշիում մեկնարկած Գլոբալ Մեդիա համաժողովի ընթացքում հայտարարել է Ադրբեջանի նախագահ Իլհամ Ալիևը։ Ադրբեջանի ղեկավարն այսօր նաև նշել է, թե հատկապես որտեղ կարող են ապրել այդ ադրբեջանցիները։ «Մեր ունեցած բավական հավաստի տվյալների համաձայն այն գյուղերի 90 տոկոսը, որտեղ ապրում էին ադրբեջանցիները, այսօր դատարկ են», - պնդում էր Ալիևը՝ հատուկ ընդգծելով՝ «ես խորապես համոզված են, որ այդ օրը կգա»։

18:04 - 20 հուլիսի, 2024

«Անհրաժեշտ է, որ փոփոխվեն ՀՀ Սահմանադրության մեջ Ադրբեջանի տարածքային ամբողջականության նկատմամբ պահանջներ պարունակող դրույթները»․ Ալիևը ՝ Շոլցին |factor.am|

12:07 - 19 հուլիսի, 2024

Ֆինլանդիայի նախագահը Հայաստանի և Ադրբեջանի ղեկավարների հետ քննարկել է ԵԱՀԿ-ում ապագա ղեկավարումը |news.am|

news.am: Ֆինլանդիայի նախագահ Ալեքսանդր Ստուբը հայտարարել է, որ ինքը քննարկել է Ադրբեջանի և Հայաստանի առաջնորդներ Իլհամ Ալիևի և Նիկոլ Փաշինյանի, ինչպես նաև չճանաչված Կոսովոյի ղեկավար Վյոսա Օսմանիի հետ ԵԱՀԿ-ում Հելսինկյան առաջիկա նախագահության հարցը։ Ինչպես նա գրել է X-ում, հանդիպումները կայացել են Եվրոպական քաղաքական համայնքի գագաթնաժողովի շրջանակներում։ «Այլ թեմաների թվում մենք քննարկել ենք եվրոպական անվտանգությունը, Ուկրաինան, տարածաշրջանային խնդիրները և ԵԱՀԿ-ում Ֆինլանդիայի առաջիկա նախագահությունը»,- նշել է Ստուբը։ Ֆինլանդիան կնախագահի ԵԱՀԿ-ն կազմակերպության հոբելյանական տարում՝ 2025 թվականին։ ԵԱՀԿ անդամ պետությունը մեկ օրացուցային տարի կատարում է կառույցի գործող նախագահի լիազորությունները:

09:42 - 19 հուլիսի, 2024

ՀՀ ԱԳՆ-ն նշում է՝ ադրբեջանական կողմն է մերժել Փաշինյան-Ալիև հանդիպման առաջարկը

Հայկական կողմն առաջարկել է Հայաստանի վարչապետի և Ադրբեջանի նախագահի երկկողմ հանդիպում ունենալ ՄԹ֊ում ընթացող Եվրոպական քաղաքական համայնքի գագաթաժողովի շրջանակներում, սակայն ադրբեջանական կողմը մերժել է առաջարկը։ Այս մասին հայտնում է ՀՀ ԱԳՆ խոսնակը։ ԱԳՆ-ից նշել են, որ հայկական կողմի առաջարկն ուժի մեջ է: Հայկական կողմը նաև վերահաստատում է իր առաջարկը` ինտենսիվացնել բարձր և բարձրագույն մակարդակով բանակցությունները և մեկ ամսվա ընթացքում հասնել խաղաղության պայմանագրի ստորագրմանը։ Հիշեցնենք, որ Իլհամ Ալիևի օգնական Հիքմեթ Հաջիևը այսօր հայտարարել էր, թե բրիտանական կողմից առաջարկ է եղել հանդիպում անցկացնել Հայաստանի վարչապետի, Ադրբեջանի նախագահի և Մեծ Բրիտանիայի վարչապետի միջև, ապա շարունակել Հայաստան-Ադրբեջան ֆորմատով։ Հաջիևը նշել էր, թե հայկական կողմը մերժել է առաջարկը, ինչը Ադրբեջանը դիտարկում է որպես երկխոսությունից և խաղաղության օրակարգն առաջ մղելուց հետ կանգնելու մտադրության դրսևորում։

14:41 - 18 հուլիսի, 2024

Նիկոլ Փաշինյանը հրաժարվել է Լոնդոնում Իլհամ Ալիևի հետ հանդիպել․ Հիքմեթ Հաջիև

Նիկոլ Փաշինյանը հրաժարվել է Ալիևի հետ հանդիպել Եվրոպական քաղաքական համայնքի գագաթնաժողովում։ Այս մասին, ադրբեջանական ԶԼՄ-ների փոխանցմամբ, հայտարարել է Ադրբեջանի նախագահ Իլհամ Ալիևի օգնական Հիքմեթ Հաջիևը։ «Հայաստանի՝ այս հանդիպումից հրաժարվելը համարում ենք երկխոսությունից և խաղաղության օրակարգն առաջ մղելուց հետ կանգնելու մտադրության դրսևորում»,- ասել է նա։ Ըստ Հաջիևի՝ հանդիպում անցկացնելու առաջարկով հանդես է եկել Մեծ Բրիտանիան։ Համաձայն առաջարկի՝ պետք է նախ տեղի ունենար Հայաստանի վարչապետի, Ադրբեջանի նախագահի և Մեծ Բրիտանիայի վարչապետի հանդիպումը, ապա շարունակվեր Հայաստան-Ադրբեջան ֆորմատով։

13:53 - 18 հուլիսի, 2024

Ալիևը մեկնել է Լոնդոն՝ Եվրոպական քաղաքական համայնքի գագաթնաժողովին մասնակցելու |factor.am|

factor.am: Ադրբեջանի նախագահ Իլհամ Ալիևը մեկնել է Լոնդոն։ Ադրբեջանական լրատվամիջոցների հաղորդմամբ՝ նա մասնակցելու է հուլիսի 17-ից 20-ը նախանշված Եվրոպական քաղաքական համայնքի 4-րդ գագաթնաժողովին։ Հիշեցնենք՝ Ալիևը հրաժարվել էր մասնակցել Եվրոպական քաղաքական համայնքի նախորդ գագաթնաժողովին, որն անցկացվել էր 2023 թվականի հոկտեմբերին իսպանական Գրանադայում կայացած։ Հավելենք, որ ՀՀ վարչապետ Նիկոլ Փաշինյանը նույնպես աշխատանքային այցով մեկնել է Լոնդոն՝ գագաթնաժողովին մասնակցելու։ Հայտնի է նաև, որ Թուրքիայի նախագահ Ռեջեփ Թայիփ Էրդողանը չի մասնակցելու գագաթնաժողովին։

12:07 - 17 հուլիսի, 2024

Ալիևը վերստին խոսել է Հայաստանի Սահմանադրության փոփոխության անհրաժեշտության մասին |azatutyun.am|

azatutyun.am: Հուլիսի 13-ին Ադրբեջանի նախագահ Իլհամ Ալիևն իր նստավայրում ընդունել է ԵԱՀԿ գլխավոր քարտուղար Հելգա Մարիա Շմիդին։ Trend լրատվական գործակալության փոխանցմամբ, ԵԱՀԿ գլխավոր քարտուղարը, շնորհավորելով Ադրբեջանում COP29-ի միջոցառումն անցկացնելու նախաձեռնությունը՝ նշել է, որ ինքն անձամբ կմասնակցի հավաքին: Հելգա Մարիա Շմիդի խոսքով՝ ԵԱՀԿ-ն և Ադրբեջանը COP29-ի շրջանակներում ակտիվ համագործակցում են: Զրույցի ընթացքում մտքերի փոխանակություն է տեղի ունեցել տարածաշրջանային խաղաղության օրակարգի հարցերի շուրջ։ Ալիևը հավաստիացրել է, թե Ադրբեջանը հավատարիմ է խաղաղության օրակարգին և միաժամանակ հերթական անգամ նշել, որ խաղաղության պայմանագիր ստորագրելու համար կարևոր է Հայաստանի Սահմանադրության փոփոխությունը, քանի որ այդպես սահմանադրական հիմունքներով վերջ կդրվի Ադրբեջանի նկատմամբ տարածքային պահանջներին։Շարունակությունը՝ սկզբնաղբյուր կայքում։

18:49 - 13 հուլիսի, 2024

Ալիևը պետական այցով ժամանել է Պակիստան |factor.am|

factor.am: Ադրբեջանի նախագահ Իլհամ Ալիևը երկօրյա պետական այցով ժամանել է Պակիստանի Իսլամական Հանրապետություն։ Ադրբեջանական լրատվամիջոցների հաղորդմամբ՝ Պակիստանի ռազմաօդային ուժերի դիմավորել և ուղեկցել են Ալիևի ինքնաթիռը։ Այն վայրէջք է կատարել ռազմաօդային ուժերի «Նուր Խան» ավիաբազայում։ Նշվում է, որ Իլհամ Ալիևին դիմավորել է Պակիստանի վարչապետ Մոհամմադ Շահբազ Շարիֆը։

17:11 - 11 հուլիսի, 2024

Ադրբեջանի նախագահ Իլհամ Ալիևը հեռախոսազրույց է ունեցել Իրանի նորընտիր նախագահ Մասուդ Փեզեշքիանի հետ

Ադրբեջանի նախագահ Իլհամ Ալիևը հեռախոսազրույց է ունեցել Իրանի նորընտիր նախագահ Մասուդ Փեզեշքիանի հետ: Այս մասին հայտնում են ադրբեջանական լրատվամիջոցները։ Ալիևը շնորհավորել է Մասուդ Փեզեշյանին Իրանի Իսլամական Հանրապետության նախագահի պաշտոնում ընտրվելու կապակցությամբ և հաջողություններ մաղթել աշխատանքում։ Մասուդ Պեզեշյանն իր երախտագիտությունն է հայտնել նախագահ Իլհամ Ալիևին ուշադրության և շնորհավորանքների համար։ Իրանի նախագահն ասել է, որ ջանք չի խնայի ապագայում երկու երկրների հարաբերությունները բոլոր ոլորտներում զարգացնելու համար։ Զրույցի ընթացքում վստահություն է հայտնվել, որ Ադրբեջան-Իրան հարաբերությունները, որոնք հիմնված են ընդհանուր կրոնական և մշակութային արմատների, բարեկամության և եղբայրության վրա, կշարունակեն ընդլայնվել և տարբեր ոլորտներ ընդգրկող համագործակցությունը կզարգանա։ Պետությունների ղեկավարներն ընդգծել են երկու երկրների միջև ձեռք բերված պայմանավորվածությունների կատարման կարևորությունը։ Հեռախոսազրույցի ընթացքում Ադրբեջանի և Իրանի նախագահները քննարկել են երկկողմ հետաքրքրություն ներկայացնող հարցեր։ Ադրբեջանի նախագահ Իլհամ Ալիևը Իրանի նախագահ Մասուդ Փեզեշքյանին հրավիրել է այցելել Ադրբեջան։ Սիրով ընդունելով հրավերը՝ Իրանի նախագահն իր երախտագիտությունն է հայտնել Ադրբեջանի ղեկավարին և իր հերթին Ալիևին պաշտոնական այցով հրավիրել Իրանի Իսլամական Հանրապետություն։Փոխադարձաբար այս հրավերը նույնպես ընդունվել է։

21:43 - 09 հուլիսի, 2024

Ալիևը շնորհավորել է Իրանի նախագահի պաշտոնում ընտրված Մասուդ Փեզեշքիանին |azatutyun.am|

azatutyun.am: Ադրբեջանի նախագահ Իլհամ Ալիևը շնորհավորական ուղերձ է հղել հարևան Իրանի նախագահի պաշտոնում ընտրված Մասուդ Փեզեշքիանին, վստահություն հայտնելով, որ համատեղ ջանքերով էլ ավելի կամրապնդեն «ավանդական բարեկամական հարաբերությունները»:«Վստահ եմ, որ համատեղ ջանքերով մենք կհասնենք ավանդական բարեկամական հարաբերությունների հետագա ամրապնդմանը, Ադրբեջանի և Իրանի միջև փոխշահավետ համագործակցության ընդլայնմանը՝ ի շահ մեր ժողովուրդների և երկրների», - ասված է Ադրբեջանի նախագահի ուղերձում:Ալիևը Իրանի նորընտիր պաշտոնակցին հրավիրել է Ադրբեջան՝ «մտքեր փոխանակելու երկկողմ համագործակցության զարգացման հեռանկարների շուրջ»։

13:59 - 06 հուլիսի, 2024

Ալիևն ընդունել է Թուրքիայի արտգործնախարարին

Ադրբեջանի նախագահ Իլհամ Ալիևը Շուշիում ընդունել է Թուրքիայի արտաքին գործերի նախարար Հաքան Ֆիդանին: Այդ մասին հայտնել են Ադրբեջանի նախագահի աշխատակազմից: Հանդիպումից այլ մանրամասներ դեռևս հայտնի չեն:

19:43 - 05 հուլիսի, 2024

Ալիևը շնորհակալություն է հայտնել Տոկաևին՝ Ադրբեջանի և Հայաստանի բանակցություններին աջակցելու համար |tert.am|

tert.am: Աստանայում անցկացվող Շանհայի համագործակցության կազմակերպության գագաթնաժողովի շրջանակում կայացել է նաև Ադրբեջանի նախագահի հանդիպումը Ղազախստանի նախագահի հետ: Իլհամ Ալիևը շնորհակալություն է հայտնել Կասիմ-Ժոմարտ Տոկաևին Բաքվի և Երևանի միջև բանակցային գործընթացներին աջակցելու համար: Այս մասին հայտնել է Տոկաևի մամուլի ծառայությունը: Ըստ նույն աղբյուրի՝ կողմերը քննարկել են առևտրատնտեսական, մշակութային և հումանիտար համագործակցության հետագա խորացման հեռանկարները։ Տեղի է ունեցել մտքերի փոխանակում միջազգային կազմակերպությունների շրջանակներում հետագա փոխգործակցության հարցերի վերաբերյալ։

19:29 - 03 հուլիսի, 2024

Վաղը Պուտինը երկկողմ հանդիպումներ կունեննա Ալիևի և Էրդողանի հետ. ՌԴ նախագահի օգնական |tert.am|

tert.am: Հուլիսի 3-ին Աստանայում ՇՀԿ գագաթնաժողովի շրջանակներում ՌԴ նախագահ Վլադիմիր Պուտինը երկկողմ հանդիպումներ կունենա Չինաստանի ղեկավար Սի Ցզինպինի, Թուրքիայի նախագահ Ռեջեփ Էրդողանի, Մոնղոլիայի նախագահի, Ղազախստանի ղեկավար Կասիմ-Ժոմարտ Տոկաևի, Պակիստանի վարչապետ Շահբազ Շարիֆի հետ եւ Ադրբեջանի նախագահ Իլհամ Ալիեւի հետ: Այս մասին լրագրողներին հայտնել է ՌԴ նախագահի օգնական Յուրի Ուշակովը, փոխանցում է ՌԻԱ Նովոստին: «Հիմնականում երկկողմ բանակցությունները տեղի կունենան հուլիսի 3-ին, այսինքն՝ մինչև ՇՀԿ գագաթնաժողովի բացումը։ Սպասվում է, որ առաջին զրույցը տեղի կունենա Մոնղոլիայի նախագահի հետ, ապա՝ Ադրբեջանի նախագահ Ալիևի, դրանից հետո՝ Պակիստանի ղեկավար Շարիֆի հետ։ Դրանից հետո տեղի կունենա զրույց Էրդողանի հետ, ապա հանդիպում Չինաստանի նախագահ Սի Ցզինպինի հետ։ Իսկ մինչ գագաթնաժողովի մասնակիցների համար ոչ պաշտոնական ընթրիքը, մեր նախագահը կհանդիպի իր՝ այս գագաթնաժողովը հյուրընկալող պարոն Տոկաեւի հետ»,- ասել է Ուշակովը։ ՇՀԿ գագաթնաժողովը տեղի կունենա հուլիսի 3-4-ը Աստանայում։

18:51 - 02 հուլիսի, 2024

Կարող է տարբերակ լինել՝ համաձայնության գալ հիմնական սկզբունքների շուրջ, նախաստորագրել դրանք, ապա աշխատել տեքստի վրա․ Իլհամ Ալիևը՝ խաղաղության պայմանագրի մասին

«Կարծում եմ՝ խաղաղության համաձայնագրի տեքստի վրա աշխատանքը, թեկուզ դրա հիմնական սկզբունքներով, կարող ենք ավարտել մի քանի ամսից։ Տեղեկացնեմ, որ 2020-ի պատերազմից առաջ միջնորդների պլանն էր համաձայնության գալ հիմնական սկզբունքների շուրջ, որոնք կոչվում են Մադրիդյան սկզբունքներ։ Դրանք պետք է նախաստորագրվեին, իսկ հետո պետք էր տեքստը կազմել։ Մենք կարծում ենք, որ դա կարող է տարբերակ լինել՝ համաձայնության գալ հիմնական սկզբունքների շուրջ, նախաստորագրել դրանք, ապա աշխատել տեքստի վրա»։ Իլհամ Ալիևը նշել է, որ սա տեղի կունենա, եթե Հայաստանը բարեփոխի իր Սահմանադրությունը։

17:57 - 01 հուլիսի, 2024