«Հայաստան» դաշինք

Խելացի գործողությունների դեպքում մենք կարող ենք վերականգնել մեր բանակը եւ պայքարել մեր ինքնության համար․ Սեյրան Օհանյան |news.am|

news.am: Մեր նպատակը պետք է լինի Հայաստանի տարածքային ամբողջականության վերականգնումը, ադրբեջանիցներին մեր տարածքներից դուրս շպրտելը եւ Արցախի ազատագրումն ու ինքնորոշման գաղափարը։ Այս մասին այսօր՝ մայիսի 9-ին, «Եռաբլուր» զինվորական պանթեոնում, լրագրողների հետ զրույցում ասաց «Հայաստան» խմբակցության ղեկավար Սեյրան Օհանյանը։ «Այդ նպատակն իրականացնելու համար պետք է կերտենք մեր պետության ռազմական հզորության կետերը՝ տարածք, բնակչություն, տնտեսություն։ Մեր ժողովուրդն ունի այդ ներուժը Մենք Շուշի ազատագրման օրն այսօր այլ իրավիճակում ենք տոնում։ Շուշին չկա, Արցախի մի մասն օկուպացրել են ադրբեջանիցները։ Այսօրը մեզ համար պատասխանատվության օր պետք է լինի»,- ասաց Օհանյանը։ Սեյրան Օհանյանի կարծիքով՝ խելացի գործողությունների դեպքում մենք կարող ենք վերականգնել մեր բանակը եւ պայքարել մեր ինքնության համար։ «Այս իշխանությունները ասում են, որ մենք թույլ ենք, որովհետեւ չեն կարողանում ճիշտ գնահատել ստեղծված ռազմաքաղաքական իրավիճակը, ներքին եւ արտաքին սպառնալիքները։ Այս իշխանությունը բարոյազրկում է պետականությունը, ինքնշխանությունը, բանակը, եկեղեցին, հաղթանակները եւ դրանք կերտածները։ Այս պատերազմի պարտության հիմնական պատճառը բանակցային գործընթացի տապալում է եղել, պատերազմի ընթացքում էլ ոչինչ չարվեց բանակը գծերի մեջ դնելու եւ ապահովելու համար»,- ընդգծեց Օհանյանը։

12:44 - 09 մայիսի, 2023

«Ո՛Չ Արցախի էթնիկ զտման» շարժումը դիմել է ՀՀ Ազգային ժողովի խմբակցություններին՝ կոչ անելով միանալ պահանջագրին

«Ո՛Չ Արցախի էթնիկ զտմանը» պահանջագրի և ստորագրահավաքի նախաձեռնող խումբը նամակներ է ուղարկել ՀՀ Ազգային ժողովի «Քաղաքացիական պայմանագիր», «Պատիվ ունեմ» և «Հայաստան» խմբակցությունների ղեկավարներին և բոլոր պատգամավորներին՝ կոչ անելով միանալ change.org հարթակում՝ հրապարակված պահանջագրին: Այս մասին տեղեկացնում է «Ո՛Չ Արցախի էթնիկ զտմանը» խումբը։ «Արցախցի մի խումբ երիտասարդների նախաձեռնած պահանջագրով միջազգային հանրությանը պահանջ է ներկայացվում գործուն քայլեր ձեռնարկել Արցախում Ադրբեջանի էթնիկ զտման ու ցեղասպանական քաղաքականությունը դադարեցնելու և 2020թ. նոյեմբերի 9-ի եռակողմ հայտարարության դրույթների, ինչպես նաև ՄԱԿ-ի Արդարադատության միջազգային դատարանի 2021թ-ի դեկտեմբերի 7-ի, 2023թ-ի փետրվարի 22-ի և Մարդու իրավունքների եվրոպական դատարանի 2020-2022թթ. որոշումների կատարումն ապահովելու ուղղությամբ: «Համոզված ենք, որ որպես ՀՀ օրենսդիր մարմնի ներկայացուցիչներ՝ ձեր կողմից ևս կարևորվում է այս պահանջների կատարումը, ուստի կոչ ենք անում ձեզ՝ միանալ ստորագրահավաքին և ձեր համակիրներին ևս հորդորել միանալ նախաձեռնությանը՝ կանխելու համար արցախահայերի հայրենազրկումը»,- նշվում է նախաձեռնողների՝ խմբակցություններին ուղղված նամակում: Պահանջագիրն առցանց հարթակում արդեն մոտ 15 հազար ստորագրություն է հավաքել: Նախաձեռնող խմբի կողմից ստորագրահավաք է կազմակերպվել նաև Ստեփանակերտում և Արցախի բոլոր շրջաններում: Երեկվա դրությամբ պահանջագրին միացած ստորագրությունների ընդհանուր թիվը գերազանցում է 40 հազարը: Նախաձեռնության աջակիցների կողմից այսօր Երևանում ևս տեղադրվել են կետեր՝ ստորագրահավաքին մասնակցելու համար: Արցախում Ադրբեջանի էթնիկ զտման ու ցեղասպանական քաղաքականությունը դադարեցնելու պահանջագիրը հնարավոր է ֆիզիկապես ստորագրել Երևանում՝ Բաղրամյան 6, Սարյան 26 և Խորենացի 47/7 հասցեներում: «Մոսկվա» կինոթատրոնի հրապարակում ստորագրահավաք է նախաձեռնել նաև ԱԺ պատգամավոր, Մարդու իրավունքների պաշտպանության և հանրային հարցերի մշտական հանձնաժողովի նախագահ Թագուհի Թովմասյանը: Ստորագրահավաքին առցանց հնարավոր է միանալ change.org հարթակում՝ այս հղումով»,-նշված է հաղոդագրությունում։

16:38 - 04 մայիսի, 2023

Ունենք լուրջ մտահոգություն, որ իշխանությունները փաթեթային կապիտուլյացիայի փաստաթուղթ են ստորագրելու. Արթուր Խաչատրյան |tert.am|

tert.am: Այս իշխանությունների առաջարկած փաթեթային լուծումը փաթեթային կապիտուլյացիա է՝ ամեն ինչից հրաժարում, ամեն ինչ ուրանալ, ձախողումների բոլոր մեղքերը նախկինների վրա բարդել և ստեղծել ինչ-որ մի պետություն, որի ապագան նույնիսկ իրենք չեն պատկերացնում։ ԱԺ-ում ճեպազրույցի ժամանակ հայտարարեց «Հայաստան» խմբակցության անդամ Արթուր Խաչատրյանը։ «Առավոտյան լուրերն ասում էին, թե կա առաջընթաց կամ ըմբռնում հայ-ադրբեջանական բանակցություններում. ինչքան այս իշխանությունները բանակցություններում առաջընթացից են խոսում, այնքան մենք ողբերգական հետընթաց ենք ապրում»,-նշեց Խաչատրյանը:

12:11 - 04 մայիսի, 2023

Դատախազությունը և իրավապահ ողջ համակարգը ծառայում են օրվա քաղաքական իշխանության նույնիսկ ապօրինի վարքագիծն օրինականացնելուն. Արծվիկ Մինասյան |aysor.am|

aysor.am: Դատախազությունը, որպես այսօրվա իշխանության ամենաարտահայտված կառույց, հստակ որդեգրել է երկակի ստանդարտ, և այդտեղ մշտապես տուժում է այն հատվածը, որը չի կիսում այս իշխանությունների տեսակերը, ԱԺ-ում լրագրողների հետ զրույցում հայտարարեց «Հայաստան» խմբակցության քարտուղար Արծվիկ Մինասյանը՝ անդրադառնալով ՀՀ գլխավորի դատախազի ներկայացրած տարեկան հաղորդմանը։ «Դատախազությունը և իրավապահ ողջ համակարգը ծառայում են օրվա քաղաքական իշխանության նույնիսկ ապօրինի վարքագիծն օրինականացնելուն», - ասաց Արծվիկ Մինասյանը։

12:09 - 04 մայիսի, 2023

Նիկոլ Փաշինյանը մանրամասներ հայտնեց Վաշինգտոնում ընթացող բանակցությունների մասին |tert.am|

tert.am: Վաշինգտոնում քննարկվում է այն, ինչ ես այս ամբիոնից ներկայացրել եմ։ Այո՛, սեղանին կա փաստաթուղթ և այն փաստաթուղթն է, որին ես տիկին Խամոյանին իր բարձրացրած հարցից հետո առաջարկել եմ գալ ու ծանոթանալ։ Այս մասին այսօր Ազգային Ժողովում կառավարության հետ հարցուպատասխանի ժամանակ ասաց վարչապետ Նիկոլ Փաշինյանը՝ պատասխանելով «Հայաստան» խմբակցության պատգամավոր Գեղամ Մանուկյանի հարցին՝ թե ինչ են քննարկում վաշինգտոնյան բանակցությունների ընթացքում։ Նրա խոսքով՝ պատգամավոր Ագնեսա Խամոյանի դիտարկումից հետո ինքն առաջարկել է՝ գալ ու ծանոթանալ, սակայն ընդդիմադիր պատգամավորը չի ցանկացել։ «Ես հանձնարել եմ ԱԳՆ-ին, որ ձեզ հրավիրեն ու ծանոթացնեն, ինքն էլ ասաց՝ պետք չի։ Բայց ես դա առիթ չեմ օգտագործում ասելու՝ լավ, չեք ուզում, ուրեմն պետք չէ։ Կարող եք ծանոթանալ։ Այդ փաստաթղթի մեջ ոչ մի նորություն չեք գտնի, որովհետև այս փաստաթղթի մասին ասել եմ հրապարակային այս ամբիոնից։ Այսինքն՝ թեզերի մասով ես ասել եմ՝ մանրամասների, տեքստային տարբերակների մասով կարող եք և՛ Ադրբեջանի ներկայացրածին ծանոթանալ և մեր ռեակցիաներին ծանոթանալ»,-ասաց Փաշինյանը։ Գեղամ Մանուկյանի մյուս հարցին, թե արդյոք հնարավոր է Վաշինգտոնում բանակցությունների արդյունքում մոտ ապագայում ինչ-որ փաստաթուղթ ստորագրվի, օրինակ՝ հունիսի 1-ին Քիշնևում, վարչապետը պատասխանեց, որ շատ ուրախ կլինի, որ դա տեղի ունենա։ «Եթե պարզվի, որ թուղթ կա սեղանին և վերջին մտածումներն են՝ ստորագրել, թե չէ, դա վատ նորություն չԷ, լավ նորություն է», - ասաց Փաշինյանը՝ հավելելով, որ այս պահին ցանկացած լավ կամ վատ մեկնաբանություն ազդելու է բանակցությունների ընթացքի վրա, ուստի այլևս ոչինչ հավելել պետք չէ։ Նա նաև մանրամասնեց, թե ինչ հանձնարարականներ է տվել Վաշինգտոնում բանակցող իր թիմին։ «Հաշվի առնելով, թե որքան մեծ ճնշման տակ են նրանք՝ ես ասել եմ, որ այն թուղթը, որի շուրջ բանակցում եք, հիշեք՝ ես եմ ստորագրելու։ Բանակցեք ազատ՝ մեր քաղաքական ուղեգծի և մեր հրապարակային արտահայտված կարծիքների շրջանակներում։ Իհարկե, այստեղ էլ թակարդ կա, քանի որ բանակցություններում միշտ էլ կարող է նոր առաջարկ ի հայտ գալ։ Բանակցային գործընթացը կենդանի պրոցես է։ Ընթացքում կարող են նոր գաղափարներ ծնվել, որոնք նախկինում մեր մտքով չէին անցել»,- նշեց վարչապետը։

20:13 - 03 մայիսի, 2023

Նիկոլ Փաշինյան-Արայիկ Հարությունյան դավաճանական տանդեմը օրինականացրեց ադրբեջանական մաքսակետը․ Գեղամ Մանուկյան |tert.am|

tert.am: ԱԺ-ն իր հերթական քառօրյան է է սկսում և քննարկում հետևյալ նախագծերը՝ գիտական, գիտատեխնիկական գործունեության, սնանկության և այլ հարցերի շուրջ, այնինչ արբեջանական ագրեսիան Արցախի դեմ նոր սահմաններ է անցել, այնինչ Հակարիի կամրջի վրա Ադրբեջանը դրել է ամբողջական հենակետ։ Այս մասին ԱԺ ամբիոնից հայտարարեց «Հայաստան» խմբակցության պատգամավոր Գեղամ Մանուկյանը։ «Բազմաթիվ մեր հայրենակիցներ այս օրերին ցավով, կսկիծով ու զայրույթով ականատես էին լինում ՀՀ իշխանությունների լռության պայմաններում, թե ինչպես է շարունակում ադրբեջանական կլանումը և օկուպացիան։ Գաղտագողին այն է, երբ որ բանակցությունների հանդիպումից հետո մեկ էլ ԱՄՆ պետդեպարտամենտը ասում է քննարկման կետերից մեկը երկու երկրների էթնիկ փոքրամասնությունների իրավունքների հարցն է։ Գաղտագողին՝ Արցախի Հանրապետության արցախահայությունը Ադրբեջանում էթնիկ փոքրամասնություն անվանելու հարցն է, գաղտագողին այն է, որ Արայիկ Հարությունյան-Նիկոլ Փաշինյան դավաճանական տանդեմով օրինականացրեցին ադրբեջանական մաքսակետը՝ արցախահայերին այդ մաքսակետով տանել-բերելով ու ամբողջ աշխարհին հայտարարելով, որ սահմանները կարող ենք նորմալացնել»,- ասաց պատգամավորը։ Շարունակությունը՝ սկզբնաղբյուր կայքում

11:27 - 02 մայիսի, 2023

Եթե այս բանակցությունները նույն բովանդակությամբ տեղի ունենային Մոսկվայում, նույն հարցը կբարձրացնեի՞ք․ ՔՊ-ական պատգամավորը՝ Գեղամ Մանուկյանին |tert.am|

tert.am: Եթե այս բանակցությունները նույն բովանդակությամբ ու նույն տեքստով մամլո հաղորդագրությամբ տեղի ունենային Մոսկվայում, դուք նույն հարցը կբարձրացնեի՞ք։ Այս մասին այսօր ԱԺ ամբիոնից ունեցած ելույթում ասաց «Քաղաքացիական պայմանագիր» խմբակցության պատգամավոր Արման Եղոյանը՝ անդրադառնալով «Հայաստան» խմբակցության անդամ Գեղամ Մանուկյանի՝ ավելի վաղ արված հայտարարությանն այն մասին, որ ժողովրդի թիկունքում, ստվերային, գաղտագողի տարբեր գործընթացներ են տեղի ունենում։ «Պարո՛ն Մանուկյան, դուք ասում եք, որ Վաշինգտոնում ամբողջ աշխարհի աչքի առաջ գաղտագողի բանակցություններ են տեղի ունենում Հայաստանի ու Ադրբեջանի միջև։ Ես մի հարց ունեմ, խնդրում եմ շատ անկեղծ պատասխանել։ Եթե այս բանակցությունները տեղի ունենային Մոսկվայում, այսօր, նույն ձևով, նույն քանակի լրատվությամբ, նույն տեքստով մամլո հաղորդագրությամբ, նույն բովանդակությամբ, իսկ բովանդակությունները գրեթե նույնն են․ անկյունաքարային հարցերի շուրջ թե՛ Մոսկվայում տեղի ունեցող բանակցությունների, թե՛ Վաշինգտոնում տեղի ունեցող բանակցությունների բովանդակությունն Արցախի հարցի վերաբերյալ նույնն է, եթե նույն բովանդակությամբ այս բանակցությունները լինեին կամ լինեն՝ միգուցե վաղը, մեկ շաբաթից, մեկ ամսից, դուք էլի այս նույն հարցն այստեղ կբարձրացնեիք», - ասաց պատգամավորը՝ շեշտելով, որ անկնալում է հստակ պատասխան, քանի որ հաջորդիվ ելույթ է ունենալու Գեղամ Մանուկյանը։ Ավելի վաղ ԱԺ նիստում «Հայաստան» խմբակցության անդամ Գեղամ Մանուկյանը հայտարարել էր, որ հայ ժողովրդի թիկունքում, ստվերային, գաղտագողի տեղի են ունենում գործընթացներ, տարբեր ձևաչափով հանդիպումներ, որոնք վտանգում են ՀՀ և Արցախի Հանրապետության անվտանգությունը, հարվածի տակ են դնում մեր ժողովրդին, պետականությունը և ազգային անվտանգությունը։

10:53 - 02 մայիսի, 2023