Իսրայել

Իսրայելի պետությունը ստեղծվել է 1948 թվականի մայիսի 14-ին՝ ՄԱԿ-ի Գլխավոր ասամբլեայի 1947 թվականի նոյեմբերի 29-ի որոշմամբ, ըստ որի Մեծ Բրիտանիայի ենթամանդատային Պաղեստինը հռչակվում էր անկախ եւ նրա տարածքում ստեղծվում էին երկու ինքնուրույն՝ արաբական եւ հրեական պետություններ։

Հրեական պետությանը՝ Իսրայելին, հատկացվում էր 14 հզ. կմ2 (Պաղեստինի տարածքի 56%) տարածություն՝ խառը բնակչությամբ։ Երուսաղեմը հանձնվում էր ՄԱԿ-ի կառավարմանը։ 1948 թվականի մայիսին Իսրայելում ստեղծվեց ժամանակավոր կառավարություն, որը կազմված էր բացառապես սիոնիստական կուսակցությունների ներկայացուցիչներից։ Կառավարության առաջին իսկ՝ «Անկախության դեկլարացիայով» սիոնիզմը հռչակվեց Իսրայելի պաշտոնական գաղափարախոսություն եւ քաղաքականություն։

Արաբա-իսրայելական պատերազմներից հետո` 1974 թվականի հունվարին եւ 1975 թվականի սեպտեմբերին Եգիպտոսի, իսկ 1974 թվականի մայիսին Սիրիայի հետ Իսրայելը կնքեց զորքերի տարանջատման եւ նրանց միջեւ բուֆերային գոտիներ ստեղծելու համաձայնագրեր։ 1979 թվականին Եգիպտոսը՝ առաջին արաբական երկիրն էր, որը խաղաղության դաշինք կնքեց Իսրայելի հետ։ Արդյունքում, Իսրայելը Սինայի թերակղզին Եգիպտոսին հետ վերադարձրեց։ Հորդանանը եւ Իսրայելը խաղաղության դաշինք կննքեցին 1994 թվականին։ Իսկ 2005 թվականին Իսրայելը իր բանակը դուրս բերեց Գազայի շրջանից։

Իրանը հակամարտության մեջ չի մտնի, եթե Իսրայելը չհարձակվի իր վրա․ ՄԱԿ-ում Իրանի ներկայացուցչություն |armenpress.am|

armenpress.am: Իրանը ռազմական հակամարտության մեջ չի մտնի Իսրայելի հետ Մերձավոր Արևելքում էսկալացիայի պատճառով, եթե հրեական պետությունը չհարձակվի Իսլամական Հանրապետության վրա։ Այդ մասին Reuters-ին հայտնել է ՄԱԿ-ում Իրանի մշտական ներկայացուցչությունը։ «Իրանի զինված ուժերը չեն մտնի մարտի մեջ՝ պայմանով, որ իսրայելական ապարտեիդի ռեժիմը չհամարձակվի հարձակվել Իրանի, նրա շահերի և քաղաքացիների վրա: Դիմադրության ճակատը կկարողանա պաշտպանել իրեն», - նշել են դիվանագետները։ Հոկտեմբերի 15-ին Իրանի արտաքին գործերի նախարար Հոսեյն Ամիր Աբդոլլահիանը Դոհայում Կատարի էմիր Շեյխ Թամիմ բեն Համադ Ալ Թանիի հետ հանդիպմանը հայտարարել է, որ եթե Իսրայելը շարունակի հարվածներ հասցնել Գազայի հատվածում քաղաքացիական բնակչությանը, ապա հակամարտության մասշտաբները կարող են ընդլայնվել: Ավելի ուշ Al Jazeera հեռուստաալիքին տված հարցազրույցում նա հայտնել է, որ Իսլամական Հանրապետությունը միջնորդների միջոցով հրեական պետությանը նախազգուշացրել է զերծ մնալ պաղեստինյան անկլավի հետագա գնդակոծումներից:

11:22 - 16 հոկտեմբերի, 2023

Իսրայելից 220 ՀՀ քաղաքացու Երևան տեղափոխելու համար հատուկ ինքնաթիռը մեկնել է «Զվարթնոցից» |armeniasputnik.am|

armeniasputnik.am:Իսրայելի Թել Ավիվ քաղաքից 220 ՀՀ քաղաքացու Երևան տեղափոխելու համար հատուկ չվերթի ինքնաթիռն արդեն մեկնել է «Զվարթնոց» միջազգային օդանավակայանից։ Տեղեկությունը Sputnik Արմենիային հայտնեցին ՀՀ քաղավիացիայի կոմիտեի մամուլի ծառայությունից։ «Չվերթն իրականացվելու է «Հայկական ավիաուղիներ» ընկերության կողմից։ Տեղական ժամանակով` 9։36 ինքնաթիռն ուղևորվել է Թել Ավիվ։ Նախնական տվյալներով՝ Երևանի ժամանակով 13:00-ին «Հայկական ավիաուղիների» օդանավը կմեկնի Հայաստանի մայրաքաղաք և կժամանի 15։30-ին»,– ասացին ՔԱԿ–ից:

11:16 - 16 հոկտեմբերի, 2023

Իսրայելի կողմից հաստատվել է հումանիտար հրադադար․ կբացվի Եգիպտոսի Ռաֆահ սահմանային անցակետը․ Reuters

Գազայի հատվածի հարավում տեղական ժամանակով ժամը 09:00-ից հաստատվել է հումանիտար հրադադար, որպեսզի բացվի Եգիպտոսի Ռաֆահ սահմանային անցակետը։ Reuters-ի աղբյուրների հաղորդմամբ անցակետը բաց կլինի կարճ ժամանակով՝ թույլ տալու հումանիտար օգնության մուտքը Գազայի հատված, ինչպես նաեւ օտարերկրացիների դուրս գալու համար։

10:21 - 16 հոկտեմբերի, 2023

Բայդենը վստահ է, որ ԱՄՆ-ն կարող է միաժամանակ աջակցել Իսրայելին և Ուկրաինային |news.am|

news.am: ԱՄՆ նախագահ Ջո Բայդենը նոր հարցազրույցում մերժել է այն միտքը, որ Միացյալ Նահանգները չի կարող միաժամանակ աջակցել Իսրայելին Համասի դեմ պատերազմում, իսկ Ուկրաինային՝ Ռուսաստանի դեմ պատերազմում։ «Մենք Ամերիկայի Միացյալ Նահանգներն ենք, ի սեր Աստծո, պատմության մեջ ամենահզոր ազգը, ոչ թե աշխարհում, այլ աշխարհի պատմության մեջ»,- ասել է Բայդենը CBS-ին տված հարցազրույցում։ «Մենք կարող ենք հոգ տանել այս երկու խնդիրների մասին և դեռ աջակցել մեր ընդհանուր միջազգային պաշտպանությանը»: Բայդենը պնդել է, որ երկու հակամարտությունները «ճնշող մեծամասնությամբ» վերաբերում են ամերիկացի ժողովրդի անվտանգությանը: «Ուկրաինայում իմ նպատակներից մեկն է թույլ չտալ [Ռուսաստանի նախագահ Վլադիմիր Պուտինին] գրավել անկախ երկիրը, որը սահմանակից է ՆԱՏՕ-ի դաշնակիցներին և գտնվում է Ռուսաստանի հետ սահմանին»,- ասել է Բայդենը։ «Պատկերացրեք, թե ինչ կլիներ, եթե նա կարողանար հաջողության հասնել։ Երբևէ լսե՞լ եք Եվրոպայում մեծ պատերազմի մասին, որին մենք ներգրավված չլինենք: Մենք չենք ցանկանում, որ դա տեղի ունենա»: «Մենք ցանկանում ենք համոզվել, որ այս ժողովրդավարությունները կայուն են: Եվ Ուկրաինան շատ կարևոր է, որպեսզի դա տեղի ունենա»,- հավելել է Բայդենը: Սպասվում է, որ առաջիկա օրերին Սպիտակ տունը կդիմի Կոնգրեսին ավելի շատ օգնություն Իսրայելին հատկացնելու խնդրանքով, իսկ պաշտոնյաները, հավանաբար, կփորձեն համատեղել դա Ուկրաինային ավելի շատ օգնություն տրամադրելու խնդրանքի հետ: Այնուամենայնիվ, Ներկայացուցիչների պալատը, որը ներկայումս առանց խոսնակի է, չի կարող ընդունել որևէ օրենք, քանի դեռ որևէ մեկը պաշտոնապես չի ընտրվել այդ պաշտոնում:

09:30 - 16 հոկտեմբերի, 2023

Իսրայելը հայտարարել է մեկ օրում Գազայում 250 ռազմական թիրախ խոցելու մասին |1lurer.am|

1lurer.am: Իսրայելի պաշտպանության բանակը (ՑԱԽԱԼ) հայտարարել է, որ մեկ օրում Գազայի հատվածում խոցել է 250 ռազմական թիրախ և ոչնչացրել ՀԱՄԱՍ-ի ազգային անվտանգության հարավային օկրուգի հրամանատար Մուաթազ Էիդին: «Մեկ օրում Իսրայելի պաշտպանության բանակը խոցել է շուրջ 250 ռազմական թիրախ, հիմնականում Գազայի հատվածի հյուսիսում: ՑԱԽԱԼ-ի և Իսրայելի անվտանգության ծառայության ճշգրիտ տվյալներով՝ սպանվել է ՀԱՄԱՍ-ի ազգային անվտանգության հարավային օկրուգի հրամանատար Մուաթազ Էիդը»,- ասված է Բանակի Telegram-ալիքում: Իսրայելի պաշտպանության բանակի տվյալներով՝ Իսրայելի ավիացիան օրվա ընթացքում հարվածներ է հասցրել դիտարկման կետերին, շտաբներին, հրթիռների գործարկման գոտիներին, որոնք պատկանում են ՀԱՄԱՍ-ին և «Իսլամական ջիհադին»:

09:14 - 16 հոկտեմբերի, 2023

Բայդենն առանձին հեռախոսազրույցներ է ունեցել Նեթանյահուի և Աբբասի հետ |tert.am|

tert.am: ԱՄՆ նախագահ Ջո Բայդենը շաբաթ օրը առանձին հեռախոսազրույցներ է ունեցել Իսրայելի վարչապետ Բենյամին Նեթանյահուի և Պաղեստինի ղեկավար Մահմուդ Աբբասի հետ ՝ քննարկելով պաղեստինա-իսրայելական հակամարտությունը: Այս մասին հաղորդում է Reuters գործակալությունը: Նեթանյահուն ԱՄՆ առաջնորդին հայտարարել Է Իսրայելի նպատակներին հասնելու համար «միասնության և վճռականության» անհրաժեշտության մասին, ինչպես նաև շնորհակալություն է հայտնել Բայդենին աջակցության համար: Աբասն իր հերթին Բայդենի հետ հեռախոսազրույցում ասել է Գազայի հատվածից պաղեստինցիների տեղաշարժի «լիակատար մերժման» մասին։

20:48 - 15 հոկտեմբերի, 2023

ԱՄՆ-ն անհանգստացած է Իսրայելի և «Համաս»-ի միջև բախմանը Իրանի անմիջական միջամտության սպառնալիքով |amerikayidzayn.com|

amerikayidzayn.com։ Պենտագոնի ղեկավարը հայտարարել է Միջերկրական ծովի արևելյան հատված երկրորդ ավիակիր ուղարկելու մասին։ «Էյզենհաուերը» և նրան ուղեկցող նավերը կմիանան «Ջերալդ Ֆորդ» ավիակիրին, որը տարածաշրջան է ուղարկվել հոկտեմբերի 7-ին: ԱՄՆ-ը մտահոգություն է հայտնել Իսրայելի և «Համասի» միջև հակամարտության սրման վտանգի և, մասնավորապես, ընդհարմանը Իրանի անմիջական միջամտության սպառնալիքի կապակցությամբ։ Ելույթ ունենալով CBS հեռուստաալիքի եթերում՝ նախագահի ազգային անվտանգության հարցերով խորհրդական Ջեյք Սալիվանը նշել է Իսրայելի և Լիբանանի սահմանին ռազմական գործողությունների նոր ճակատի առաջացման հավանականությունը։ «Մենք չենք կարող բացառել, որ Իրանը կնախընտրի այս կամ այն կերպ ուղիղ (ռազմական) հակադրման մեջ մտնել։ Մենք պետք է պատրաստվենք»,- բացատրել է Սալիվանը: Հիշենք, որ Թեհրանը երկար ժամանակ է, ինչ աջակցում է Լիբանանում «Համասին» և «Հեզբոլլահին»՝ նրանց տրամադրելով միջոցներ և զենք։ «Սա վտանգ է, և դա վտանգ է, որի մասին մենք տեղյակ ենք եղել ի սկզբանե»,- ասել է Սալիվանը՝ նկատի ունենալով պատերազմին Իրանի միջամտության հեռանկարը, որն առաջ է եկել Գազայի հատվածից Իսրայելի հարավային շրջանների վրա «Համասի» հարձակման հետևանքով։ «Այդ իսկ պատճառով նախագահը գործում է այդքան արագ և վճռական՝ ավիակիր ուղարկելով Միջերկրական ծովի արևելյան հատված, ինքնաթիռներ ուղարկելով Պարսից ծոց, քանի որ նա շատ հստակ ուղերձ հղեց ցանկացած ազգի կամ ցանկացած խաղացողի, որը կփորձի շահարկել այս իրավիճակը»,- ասել է Սալիվանը: Պաշտպանության նախարար Լլոյդ Օսթինը շաբաթ օրը հայտարարեց երկրորդ ավիակիրի տեղակայման մասին՝ զսպելու «Իսրայելի դեմ թշնամական գործողությունները կամ «Համասի» հարձակումից հետո այդ պատերազմն ընդլայնելու ցանկացած ջանքերը»: Միջերկրական ծովի արևելքում «Էյզենհաուեր» ավիակիրը և նրան ուղեկցող նավերը կմիանան «Ջերալդ Ֆորդ» ավիակիրին, որը տեղակայվել էր հոկտեմբերի 7-ին «Համասի» հարձակումից հետո:

20:42 - 15 հոկտեմբերի, 2023

Կա հավանականություն, որ այլ ճակատներ կբացվեն. Ռաիսին Մակրոնի հետ զրուցել է Գազայում տիրող իրավիճակի մասին |1lurer.am|

1lurer.am: Իրանի նախագահ Էբրահիմ Ռաիսին կիրակի հեռախոսազրույց է ունեցել իր ֆրանսիացի գործընկեր Էմանուել Մակրոնի հետ, որի ընթացքում կողմերը քննարկել են Գազայի հատվածում տիրող իրավիճակը։ Այս մասին հայտարարել է նախագահի աշխատակազմի քաղաքական հարցերով ղեկավարի տեղակալ Մոհամմադ Ջամշիդին։ «Բանակցությունների ընթացքում Իրանի նախագահն ընդգծել է, որ Իսրայելի կողմից պաղեստինցիների դեմ շարունակվող ագրեսիայի, ռազմական հանցագործությունների և սպանությունների, ինչպես նաև Գազայի շրջափակման լույսի ներքո կա հավանականություն, որ իրավիճակը կբարդանա, և այլ ճակատներ կբացվեն»,- ասել է Ջամշիդին։

19:58 - 15 հոկտեմբերի, 2023

Իսրայելը թույլ կտա հումանիտար միջանցք բացել Գազայի հատվածի հարավում |armenpress.am|

armenpress.am: Իսրայելը թույլ կտա հումանիտար միջանցք բացել Գազայի հատվածի հարավում հոկտեմբերի 15-ի ժամը 11.00-ից 14.00-ն, հայտարարել Է Իսրայելի պաշտպանության բանակը X սոցցանցում: «Գազա քաղաքի և Գազայի հատվածի հյուսիսային հատվածի բնակիչներ, անցած օրերին մենք կոչ էինք անում Ձեզ տեղափոխվել հարավային գոտի ձեր անվտանգության համար: Մենք ցանկանում ենք տեղեկացնել ձեզ, որ Իսրայելի Պաշտպանության բանակը ժամը 11.00-ից 14.00-ն (Երևանի ժամանակով - խմբ.) այս ճանապարհի երկայնքով որևէ գործողություն չի իրականացնի: Խնդրում ենք այդ ընթացքում օգտվել Գազայի հատվածի հյուսիսային մասից հարավ տեղափոխվելու հնարավորությունից»,- «Արմենպրես»-ի հաղորդմամբ՝ ասված Է հաղորդագրության մեջ, որը հրապարակվել է Իսրայելի պաշտպանության բանակի էջում:

12:41 - 15 հոկտեմբերի, 2023

Հալեպի միջազգային օդանավակայանն ամբողջությամբ շարքից դուրս է եկել Իսրայելի հարվածների հետևանքով |tert.am|

tert.am: Հալեպի միջազգային օդանավակայանն ամբողջությամբ շարքից դուրս է եկել Իսրայելի հարվածների հետևանքով։ Այս մասին, ինչպես գրում է ria.ru-ն, հոկտեմբերի 15-ին հայտնել է Սիրիայի պաշտպանության նախարարությունը։ «Հոկտեմբերի 14-ին՝ ժամը 23:35-ի սահմանում, թշնամական Իսրայելն օդային հարվածներ է հասցրել Հալեպի միջազգային օդանավակայանին՝ պատճառելով նյութական վնաս և անգործունակ դարձնելով օդանավակայանը»,- ասվում է հաղորդագրության մեջ։Ավելի վաղ՝ հոկտեմբերի 12-ին, SANA գործակալությունը ևս հայտնել էր Իսրայելի օդուժի կողմից Դամասկոսի ու Հալեպի օդանավակայաններին հարվածելու և դրանք աշխատանքը խափանվելու մասին:

11:13 - 15 հոկտեմբերի, 2023

Հորդանանը ԵՄ երկրների հետ կքննարկի Իսրայելում ռազմական գործողությունները դադարեցնելու հարցը |armenpress.am|

armenpress.am: Հորդանանի թագավոր Աբդալլահ Երկրորդը մեկնելու է եվրոպական շրջագայության՝ Գազայի հատվածում Իսրայելի ռազմական գործողությունները դադարեցնելու համար ԵՄ առաջնորդների աջակցությունը ստանալու։ Այդ մասին հայտնել է թագավորության արտաքին գործերի նախարար Այման աս-Սաֆադին: Միապետը դեէսկալացիայի մասին բանակցություններ է վարել ԱՄՆ-ի պետքարտուղար Էնթոնի Բլինքենի հետ տարածաշրջանային և արևմտյան առաջնորդների հետ ինտենսիվ շփումներից հետո՝ տարածաշրջանն ավելի լայն պատերազմի մեջ չներքաշելու ակնկալիքով: Աս-Սաֆադին ընդգծել է, որ պաղեստինցիներին նոր տեղահանումներ պարտադրելու իսրայելական ցանկացած գործողություն տարածաշրջանը կմղի դեպի ավելի լայն տարածաշրջանային հակամարտության անդունդ: «Ռազմական գործողությունները սպանում, նաև՝ ստիպում են պաղեստինցիներին լքել իրենց տները: Դա չի ապահովի անվտանգություն և չի հանգեցնի խաղաղության», - հավելել է Աս-Սաֆադին: Բացի այդ, Հորդանանի արտաքին գործերի նախարարության ղեկավարն ասել է, որ Իսրայելի կողմից Գազայի հատված մարդասիրական օգնության մատակարարումների արգելափակումը և ռազմական գործողությունների սրման պայմաններում դրա բնակիչներին սեփական տները լքելու պարտադրումն, ըստ էության, միջազգային իրավունքի կոպտագույն խախտում է:

18:15 - 14 հոկտեմբերի, 2023

Ֆիդանն ու Բերբոքը քննարկել են նաև իրավիճակը Իսրայելում, Ուկրաինայում և Լեռնային Ղարաբաղում |1lurer.am|

1lurer.am: Եգիպտոսում տեղի է ունեցել Գերմանիայի և Թուրքիայի արտգործնախարարների հանդիպումը: Հաքան Ֆիդանը և Աննալենա Բերբոքը քննարկել են Գազայի հատվածում և Իսրայելում զարգացումները, ՀԱՄԱՍ-ի գերեվարած գերմանացիների վերադարձի, տուժածներին հումանիտար աջակցության և տարհանման հեռանկարը: Թուրքական կողմի տվյալով՝ դիվանագետները քննարկել են նաև իրավիճակն Ուկրաինայում և Լեռնային Ղարաբաղում։ Ակնկալվում է, որ Ֆիդանին կընդունեն Եգիպտոսի նախագահը և արտգործնախարարը: Հանդիպումների ընթացքում կքննարկվի տարածաշրջանում առկա բարդ իրավիճակը:

17:16 - 14 հոկտեմբերի, 2023

Մեկ շաբաթ առաջ սկսված հակամարտության ընթացքում սպանվել է առնվազն 2215 պաղեստինցի |azatutyun.am|

azatutyun.am: Անցած շաբաթն օրը՝ հոկտեմբերի 7-ի վաղ առավոտյան մեկնարկած իսրայելա-պաղեստինյան հակամարտության ընթացքում հոկտեմբերի 14-ի առավոտյան դրությամբ պաղեստինցիների զոհերի թիվը հասել է 2215-ի: Այդ մասին հայտնել է Պաղեստինի առողջապահության նախարարությունը։ Ըստ գերատեսչության, վիրավորվել է 8714 մարդ։ Նույն ժամանակաշրջանում Հորդանան գետի արևմտյան ափին սպանվել է 54 պաղեստինցի, վիրավորվել ավելի քան 1100-ը։

14:24 - 14 հոկտեմբերի, 2023

ՅՈՒՆԻՍԵՖ-ը մարդասիրական աղետ է կանխատեսել Գազայի բնակչության տեղահանման պատճառով |tert.am|

tert.am: Գազայի հատվածի բնակչությանը մի մասից մյուսը տեղափոխվելու կոչերը չեն կարող իրականացվել առանց հումանիտար աղետալի հետևանքների, քանի որ խոսքը գնում է մեկ միլիոն մարդու մասին, ովքեր գնալու տեղ չունեն, գրում է ՌԻԱ Նովոստին՝ վկայակոչելով ՅՈՒՆԻՍԵՖ-ի Մերձավոր Արևելքի գրասենյակի ներկայացուցիչ Սալիմ Օվեյսին։ «Նման կոչերը, եթե իրականացվեն, կհանգեցնեն Գազայի հումանիտար իրավիճակի արտակարգ սրման, քանի որ խոսքը գնում է Գազայի հյուսիսում գտնվող՝ մոտավորապես մեկ միլիոն մարդու մասին, ովքեր գնալու տեղ չունեն, նրանց համար ապահով վայրեր չկան։ ՄԱԿ-ի մասնաճյուղերը կոչ են արել հրաժարվել այս որոշումից և թույլատրել մարդասիրական օգնության մուտքը Գազայի հատված՝ երեխաների, ընտանիքների և խաղաղ բնակիչների միջև բաշխման համար»,- նշել է Օվեյսը։ ՅՈՒՆԻՍԵՖ-ի ներկայացուցիչն ընդգծել է, որ հակամարտող բոլոր կողմերը, միջազգային իրավունքի համաձայն, պատասխանատու են խաղաղ բնակիչների պաշտպանության համար և պարտավոր են պահպանել երեխաների և քաղաքացիական անձանց կյանքն ու անվտանգությունը, որտեղ էլ նրանք լինեն։ Օվեյսն ասել է, որ ՅՈՒՆԻՍԵՖ-ի ներկայացուցիչները շարունակում են գտնվել Գազայի հատվածում, ինչպես եղել են մինչև հակամարտությունը։ Այս պահին նրանցից ոչ ոք չի տուժել, սակայն վնաս է հասցվել կազմակերպության ենթակառուցվածքին։ «Գազայի հատվածում հումանիտար իրավիճակը շատ բարդ է, մարդասիրական աշխատողների և կազմակերպությունների աշխատակիցների համար շատ դժվար է նույնիսկ տեղաշարժվելը, ուստի, մենք խնդրում ենք մարդասիրական զինադադար և անվտանգ միջանցքներ երեխաների և ընտանիքների համար, որպեսզի այդ մարդիկ հնարավորություն ունենան օգնության հասնել»,- հավելել է ՅՈՒՆԻՍԵՖ-ի ներկայացուցիչը։

13:48 - 14 հոկտեմբերի, 2023

ՑԱԽԱԼ-ը կոչ է արել Գազայի բնակիչներին հյուսիսից հարավ տեղափոխվել՝ օգտագործելով տարհանման միջանցքները |news.am|

news.am: Իսրայելի Պաշտպանության բանակը՝ ՑԱԽԱԼ-ը, արաբերենով Գազայի հատվածի հյուսիսային մասի բնակիչներին տեղեկացրել է, որ ժամը 10.00-ից մինչեւ 16.00-ն նրանք պետք է տեղափոխվեն Գազայի հարավային մաս՝ օգտագործելով տարհանման միջանցքները, տեղեկացրել է Times of Israel-ը։ «Եթե դուք մտածում եք ձեր եւ ձեր մերձավորների մասին, մեկնեք հարավ՝ հրահանգներին համապատասխան։ Վստահ եղեք, որ ՀԱՄԱՍ-ի ղեկավարները հոգացել են իրենց մասին եւ թաքնվում են տարածաշրջանում հարվածներից»,- նշված է իսրայելական բանակի հաղորդագրությունում։ Իսրայելի Պաշտպանության բանակը Միավորված Ազգերի Կազմակերպությանը տեղեկացրել է, որ Գազայի հյուսիսի (Վադի) պաղեստինցի ժողովուրդն ամբողջությամբ պետք է տեղափոխվի հատվածի հարավային մաս։ Հաղորդագրությունում նշվել է, որ ՑԱԽԱԼ-ը, գուցե, ի պատասխան անցած շաբաթ օրը ՀԱՄԱՍ-ի զանգվածային հարձակման իրականացրած մեկշաբաթյա օդային ռմբակոծություններից հետո պատրաստվում է սկսել ցամաքային ներխուժում։

11:03 - 14 հոկտեմբերի, 2023

ԱՄՆ պետքարտուղարը հանդիպել է Պաղեստինի նախագահի հետ |armenpress.am|

armenpress.am: ԱՄՆ պետքարտուղար Էնթոնի Բլինքենը Հորդանանում հանդիպում է ունեցել Պաղեստինի նախագահ Մահմուդ Աբբասի հետ։ Այս մասին տեղեկանում ենք BBC-ից։ Աբբասը, որի նստավայրը Հորդանան գետի արևմտյան ափին է, Գազայի հատվածում իշխող ՀԱՄԱՍ-ի քաղաքական հակառակորդն է։ Ամմանում Բլինքենը նաև կհանդիպի Հորդանանի թագավոր Աբդուլլահի հետ։ Հոկտեմբերի 12-ին Էնթոնի Բլինքենն Իսրայելում բանակցություններ է վարել երկրի վարչապետ Բենյամին Նեթանյահուի հետ՝ ԱՄՆ-ի լիակատար աջակցությունը հայտնելով Իսրայելին։ Հոկտեմբերի 13-ին Իսրայելում է գտնվում ԱՄՆ պաշտպանության նախարար Լլոյդ Օսթինը։ Հոկտեմբերի 7-ին ՀԱՄԱՍ-ի ավելի քան 1500 զինյալներ ճեղքել էին անվտանգության պատնեշը և Գազայի հատվածից ներխուժել Իսրայել։ Իսրայելում զոհերի թիվը հասել է 1300-ի։ 150 մարդ պատանդ է վերցվել։ Իսրայելը պատերազմ է հայտարարել ՀԱՄԱՍ-ին և հարվածներ է հասցնում հարյուրավոր թիրախների։ Գազայի հատվածում զոհերի թիվը հասել է 1400-ի։ Իսրայելը նաև Գազայի լիակատար պաշարում է սկսել՝ դադարեցնելով ջրի, էլեկտրաէներգիայի, վառելիքի, սննդի և այլ ապրանքների մուտքը։

15:54 - 13 հոկտեմբերի, 2023