«Քաղաքացիական պայմանագիր» կուսակցություն - ՔՊ

2021 թվականի հունիսին տեղի ունեցած խորհրդարանական արտահերթ ընտրությունների արդյունքում ՀՀ-ում կառավարություն ձեւավորած եւ խորհրդարանական մեծամասնություն դարձած քաղաքական կուսակցություն է։ 8-րդ գումարման խորհրդարանում՝ «Քաղաքացիական պայմանագիր» խմբակցություն։

Որպես միավոր՝ ձեւավորվել է 2013 թվականին։ Կուսակցությունը պաշտոնապես ստեղծվել է 2015 թվականին։

Կուսակցությունը «Իմ քայլը» դաշինքի կազմով բացարձակ մեծամասնություն է եղել նաեւ ՀՀ 7-րդ գումարման Ազգային ժողովում։

Իսկ 2017 թվականի խորհրդարանական ընտրություններին կուսակցությունը դաշինքով էր հանդես եկել «Հանրապետություն» եւ «Լուսավոր Հայաստան» կուսակցութունների հետ, ԱԺ-ում «Ելք» խմբակցություն ձեւավորել՝ 9 պատգամավորով։ Նույն դաշինքով կուսակցությունը մասնակցել էր նաեւ 2017թ․ Երեւանի քաղաքապետի եւ ավագանու ընտրություններին՝ ունենալով 14 հոգանոց խմբակցություն։

2018 թվականին Երեւանի քաղաքապետի ու ավագանու արտահերթ ընտրությունների ժամանակ կուսակցությունը մասնակցել էր «Առաքելություն» կուսակցության հետ՝ «Իմ քայլը» դաշինքով․ դաշինքի ցուցակը գլխավորող Հայկ Մարությանը դարձավ Երեւանի քաղաքապետ` ստանալով 80%-ից ավել քվե։

ՔՊ նիստում քննարկվել են արտաքին քաղաքական և անվտանգային հարցեր

Մայիսի 11-ին տեղի է ունեցել «Քաղաքացիական պայմանագիր» կուսակցության նախաձեռնող խմբի նիստ։ Քննարկվել են արտաքին քաղաքական և անվտանգային հարցեր։ Վարչության նախագահ, ՀՀ վարչապետ Նիկոլ Փաշինյանը և ՀՀ արտաքին գործերի նախարար Արարատ Միրզոյանը պատասխանել են նիստի մասնակիցների հարցերին։

22:37 - 11 մայիսի, 2023

Եթե նախապայմաններ չլինեին, հայ-թուրքական սահմանը շուտվանից բացված կլիներ. Թունյան |armenpress.am|

armenpress.am: Հայաստան-Թուրքիա հարաբերությունների կարգավորման համատեքստում հայկական կողմի թեզն այն է, որ Թուրքիան չպետք է կախվածության մեջ մտնի երրորդ երկրների հետ Հայաստանի հարաբերություններից: Այս մասին ասուլիսում ասաց ՀՀ ազգային ժողովի «Քաղաքացիական պայմանագիր» խմբակցության պատգամավոր Բաբկեն Թունյանն՝ անդրադառնալով հարցին, թե արդյոք Թուրքիան Ադրբեջանի գործոնը որպես նախապայման չի՞ դիտվում հայ-թուրքական հարաբերություններում: «Մենք խոսում ենք առանց նախապայմանների հարաբերությունների կարգավորման մասին: Բնականաբար, եթե նախապայմաններ չլինեին, այդ սահմանը շուտվանից բացված կլիներ: Հիմա, եթե մեր առաջ նախապայմաններ են քաշում, մենք էլ ասում ենք, որ ունենք մեր կարմիր գծերը և տեսլականը: Իսկ դա այն է, որ երկրներն իրար հետ պետք է ունենան նորմալ հարաբերություններ: Երկու երկիր իրար հետ հարաբերությունները կարգավորելու ժամանակ չպետք է կախվածության մեջ մտնեն երրորդ երկրների հետ մեր հարաբերություններից»,-ասաց պատգամավորը: Սա է հայկական կողմի թեզը: Թունյանի կարծիքով՝ այդ թեզը հասկանալի է նաև միջազգային հանրության համար: Հայաստանը և Թուրքիան ավելի վաղպայմանավորվածություն էին ձեռք բերելհայ-թուրքական սահմանը ամռան սկզբին բացել՝ երրորդ երկրների քաղաքացիների և դիվանագիտական անձնագիր ունեցող անձանց համար։

13:44 - 10 մայիսի, 2023

Իշխող խմբակցության պատգամավորը կարծում է, որ հայ-թուրքական սահմանի բացումը ձեռնտու կլինի Հայաստանի համար |armenpress.am|

armenpress.am: Հայաստանի խորհրդարանի իշխող «Քաղաքացիական պայմանագիր» խմբակցության պատգամավոր Գևորգ Պապոյանը համաձայն չէ հնչող կարծիքների հետ, թե հայ-թուրքական սահմանի բացումը ձեռնտու է լինելու միայն Թուրքիայի համար, իսկ Հայաստանի համար կունենա աղետալի հետևանքներ։ Պատգամավորն ընդգծում է, եթե սահմանի բացումը ձեռնտու լինի միայն Թուրքիային, ապա այդ երկիրը շատ արագ կբացի սահմանը, քանի որ հենց Թուրքիան էլ ժամանակին փակել է սահմանը՝ Հայաստանին տնտեսապես ճնշելու համար։ Պատգամավորն այս մասին ասաց ԱԺ-ում կայացած մամուլի ասուլիսի ընթացքում։ «Մեր հանրային կյանքում շատ է քննարկվում՝ արդյոք Հայաստանին ձեռնտու է, որ բացվի հայ-թուրքական սահմանը, թե՞ ոչ: Եթե Հայաստանին ձեռնտու չլինի հայ-թուրքական սահմանի բացումը, Թուրքիան սահմանը կբացի 5 վայրկյանում, որովհետև Հայաստանը չի փակել Հայաստան-Թուրքիա սահմանը, այն փակել է Թուրքիան, քանի որ դրանով Հայաստանին տնտեսապես ճնշում է: Դա նրանք երբեք չեն թաքցրել, դրանով նրանք աջակցում են Ադրբեջանին: Դա ցույց է տալիս, որ այն նարատիվը, թե հայ-թուրքական սահմանի բացումը Հայաստանի համար ինչ-որ ապոկալիպտիկ հետևանքներ է ունենալու, պարզապես ծիծաղելի է և որևէ առնչություն չունի իրականության հետ»,-ասաց Պապոյանը: Ըստ պատգամավորի՝ հայ-թուրքական սահմանի բացումը բերելու է Հայաստանի տնտեսական զարգացման, աշխատատեղերի ստեղծման, բիզնեսների զարգացման, հարկերի ավելացման, մարդկանց սոցիալական վիճակի էական լավացման: «Թուրքիան, որպեսզի Լեռնային Ղարաբաղի հարցում աջակցի Ադրբեջանին, երկար տարիներ փակ է պահել հայ-թուրքական սահմանը: Եվ դա իրենք չեն թաքցրել: Սա իրենց գնահատականն է: Այսօր էլ, ես կարծում եմ, իրենք հասկանում են, որ դա մեզ ձեռք է տալիս, և փորձում են ամեն գնով, գուցե, ինչ-որ պահանջներ ներկայացնել, առիթ փնտրել: Առանց նախապայմանների հայ-թուրքական հարաբերությունների կարգավորումը մեր օրակարգային հարցն է, մենք դրանից չենք շեղվում, դա Հայաստանի արտաքին քաղաքականության հիմնադրույթն է»,-եզրափակեց պատգամավորը: Հայաստանը և Թուրքիան ավելի վաղ պայմանավորվել էին մինչև ամռան սկիզբ բացել սահմանը երրորդ երկրների քաղաքացիների համար: Գևորգ Պապոյանը նշեց, որ Թուրքիայի կողմից այդ պայմանավորվածությունը չեղարկելու վերաբերյալ պաշտոնական տեղեկատվություն չկա։ Պատգամավորը հարցին անդրադարձավ վերջին իրադարձությունների կոնտեքստում, երբ Թուրքիան փակել է օդային տարածքը Հայաստանից երրորդ երկրներ թռիչքների համար՝ որպես պատասխան քայլ Երևանում «Նեմեսիս» հուշարձանի տեղադրմանը։

12:16 - 10 մայիսի, 2023

Թեև Ադրբեջանն ընդունել է ՀՀ տարածքային ամբողջականությունը, բայց գործուն, պրակտիկ քայլերով դա չի երևում. Արմեն Խաչատրյան |news.am|

news.am: Հայաստանն ընդունում է Ադրբեջանի տարածքային ամբողջականությունը այնպես, ինչպես Ադրբեջանն է ընդունում Հայաստանի տարածքային ամբողջականությունը: Այս մասին, այսօր՝ մայիսի 8-ին, «Եռաբլուր» պանթեոնում լրագրողների հետ զրույցում նշեց ԱԺ ՔՊ խմբակցության պատգամավոր Արմեն Խաչատրյանը «Թեեւ Ադրբեջանը դա ընդունել է, բայց գործուն, պրակտիկ քայլերով դա չի երեւում է Ադրբեջանի գործողություններից: Լեռնային Ղարաբաղի հարցը լրիվ այլ հարց է, լրիվ այլ ֆորմատի մեջ է: ԼՂ բնակչության անվտանգության, ապրելու երաշխիքների խնդիրը այլ հարց է: Սա միջազգային հարթակներում պետք է քննարկվի եւ քննարկվում է: Պետք է անել ամեն ինչ, որպեսզի ԼՂ-ն լինի անվտանգ եւ այնտեղի բնակչության անվտանգության հետ կապված որեւէ խնդիր չլինի: Այս բոլոր հարցերը բանակցություններում երկարատեւ տարիների քննարկումների խնդիրն եր են: Դա կապված է Հայաստանի դիմադրողականության հետ, մի շարք աշխարհաքաղաքական փոփոխությունների հետ, բայց ամեն դեպքում ամեն ինչ արվել եւ արվելու է, որպեսզի ԼՂ բնակչության անվտանգության մակարդակն ապահովվի, ինչը այսօր այդպես չէ: Բոլորդ գիտեք, որ շրջափակման մեջ են, Ադրբեջանը փորձում է ամեն կերպ փորձում է սադրել, էթնիկ զտումների ծրագրեր է իրականացնում»,-ասաց նա։

13:15 - 08 մայիսի, 2023

Ամեն րոպե պետք է պատրաստ լինենք Ադրբեջանի կողմից ցանկացած սադրանքի․ ՔՊ խմբակցության պատգամավոր |aysor.am|

aysor.am: ԱԺ ՔՊ խմբակցության պատգամավոր Արմեն Խաչատրյան տեղյակ չէ Հայաստանի վարչապետ Նիկոլ Փաշինյանի՝ Մոսկվա կատարելիք այցից։ «Իրոք, տեղեկություն չունեմ։ Վարչապետը Մոսկվա պարբերաբար գնում է, երևի գնացել է, տեղյակ չեմ», - ասաց նա՝ լրագրողների հարցին ի պատասխան։ ՔՊ-կան պատգամավորից հետաքրքրվեցին նաև «խաղաղության պայմանագրի» շուրջ վաշինգտոնյան բանակցություններից։ «Ամերիկյան բանակցությունների վերաբերյալ դեռևս ամփոփիչ տեղեկատվություն չունեմ, հետևաբար, որևէ բան չեմ կարող ասել»,- ասաց Խաչատրյանը։ Ըստ նրա՝ բանակցությունների շուրջ ցանկացած քննարկում դրական երևույթ է։ «Եթե քննարկում են բանակցությունները, դա արդեն դրական է։ Հարցն այն է, թե արդյունքներն ինչպիսին են։ Շատ լավ կլինի, եթե մեր սպասելիքներն իրականացված լինեն, բայց, ինչպես տեսնում ենք, բավականին դժվար պրոցես է, և սպասելիքների առումով երկար ճանապարհ դեռևս երևի պիտի անցնենք»,- ասաց նա։ Անդրադառնալով վարչապետ Նիկոլ Փաշինյանի այն ձևակերպմանը, որ «խաղաղության պայմանագրի» պարամետրերը հայ ժողովրդի համար կարող են ընդունելի չլինել՝ ՔՊ-ական պատգամավորը նշեց․ «Կարող է այնպիսի պայմաններ առաջադրեն, որոնք մեզ համար «կարմիր գծեր» են և ընդունելի չեն։ Շատ պարզ է։ Ադրբեջանը փորձելու է ամեն ինչ անել, որ իր շահերի համար ավելի բարենպաստ իրավիճակ ստեղծի, ինչը շատ դեպքերում մեզ համար ընդունելի չէ»։ Արմեն Խաչատրյանը նաև վստահություն հայտնեց, որ Ադրբեջանի կողմից սադրանքներ միշտ էլ լինելու են։ «Միշտ էլ լինելու են սադրանքներ, ուղղակի հարցն այն է, թե սադրանքներն ինչ մակարդակի վրա են լինելու։ Որ սահմանում մեկ-երկու անգամ կրակում են մեր դիրքերի ուղղությամբ, դա ևս սադրանք է, և մենք ամեն րոպե պետք է պատրաստ լինենք ցանկացած սադրանքի», - ասաց նա։

12:32 - 08 մայիսի, 2023

Բաբկեն Թունյանն ընտրվել է ՍԾՏՀ խորհրդարանական վեհաժողովի փոխնախագահ

«Քաղաքացիական պայմանագիր» խմբակցության անդամ Բաբկեն Թունյանն Անկարայում ընթացող Սևծովյան տնտեսական համագործակցության գլխավոր վեհաժողովի 61-րդ լիագումար նիստի ընթացքում ընտրվել է Կազմակերպության փոխնախագահի պաշտոնում։ Այդ մասին նա հայտնել է ֆեյսբուքյան իր էջում: «Դեռ շարունակվող այս նիստի մասին, որը ըստ որոշ ընդդիմադիր գործընկերի՝ «փուչիկներով շոու» է, իսկ իրականում այս կազմակերպության ամենալարված նիստերից մեկը, առաջիկա օրերին ավելի հանգամանալից կխոսեմ»,- գրել է նա:

09:44 - 05 մայիսի, 2023

«Ո՛Չ Արցախի էթնիկ զտման» շարժումը դիմել է ՀՀ Ազգային ժողովի խմբակցություններին՝ կոչ անելով միանալ պահանջագրին

«Ո՛Չ Արցախի էթնիկ զտմանը» պահանջագրի և ստորագրահավաքի նախաձեռնող խումբը նամակներ է ուղարկել ՀՀ Ազգային ժողովի «Քաղաքացիական պայմանագիր», «Պատիվ ունեմ» և «Հայաստան» խմբակցությունների ղեկավարներին և բոլոր պատգամավորներին՝ կոչ անելով միանալ change.org հարթակում՝ հրապարակված պահանջագրին: Այս մասին տեղեկացնում է «Ո՛Չ Արցախի էթնիկ զտմանը» խումբը։ «Արցախցի մի խումբ երիտասարդների նախաձեռնած պահանջագրով միջազգային հանրությանը պահանջ է ներկայացվում գործուն քայլեր ձեռնարկել Արցախում Ադրբեջանի էթնիկ զտման ու ցեղասպանական քաղաքականությունը դադարեցնելու և 2020թ. նոյեմբերի 9-ի եռակողմ հայտարարության դրույթների, ինչպես նաև ՄԱԿ-ի Արդարադատության միջազգային դատարանի 2021թ-ի դեկտեմբերի 7-ի, 2023թ-ի փետրվարի 22-ի և Մարդու իրավունքների եվրոպական դատարանի 2020-2022թթ. որոշումների կատարումն ապահովելու ուղղությամբ: «Համոզված ենք, որ որպես ՀՀ օրենսդիր մարմնի ներկայացուցիչներ՝ ձեր կողմից ևս կարևորվում է այս պահանջների կատարումը, ուստի կոչ ենք անում ձեզ՝ միանալ ստորագրահավաքին և ձեր համակիրներին ևս հորդորել միանալ նախաձեռնությանը՝ կանխելու համար արցախահայերի հայրենազրկումը»,- նշվում է նախաձեռնողների՝ խմբակցություններին ուղղված նամակում: Պահանջագիրն առցանց հարթակում արդեն մոտ 15 հազար ստորագրություն է հավաքել: Նախաձեռնող խմբի կողմից ստորագրահավաք է կազմակերպվել նաև Ստեփանակերտում և Արցախի բոլոր շրջաններում: Երեկվա դրությամբ պահանջագրին միացած ստորագրությունների ընդհանուր թիվը գերազանցում է 40 հազարը: Նախաձեռնության աջակիցների կողմից այսօր Երևանում ևս տեղադրվել են կետեր՝ ստորագրահավաքին մասնակցելու համար: Արցախում Ադրբեջանի էթնիկ զտման ու ցեղասպանական քաղաքականությունը դադարեցնելու պահանջագիրը հնարավոր է ֆիզիկապես ստորագրել Երևանում՝ Բաղրամյան 6, Սարյան 26 և Խորենացի 47/7 հասցեներում: «Մոսկվա» կինոթատրոնի հրապարակում ստորագրահավաք է նախաձեռնել նաև ԱԺ պատգամավոր, Մարդու իրավունքների պաշտպանության և հանրային հարցերի մշտական հանձնաժողովի նախագահ Թագուհի Թովմասյանը: Ստորագրահավաքին առցանց հնարավոր է միանալ change.org հարթակում՝ այս հղումով»,-նշված է հաղոդագրությունում։

16:38 - 04 մայիսի, 2023

Նիկոլ Փաշինյանի գլխավորությամբ տեղի է ունեցել ՔՊ վարչության նիստ. քննարկվել են ընթացիկ քաղաքական հարցեր

Մայիսի 2-ին տեղի է ունեցել «Քաղաքացիական պայմանագիր» կուսակցության Վարչության նիստ, որը վարել է Վարչության նախագահ, ՀՀ վարչապետ Նիկոլ Փաշինյանը: Այս մասին տեղեկանում ենք կուսակցության ֆեյսբուքյան էջից։ Հաստատվել է «Քաղաքացիական պայմանագիր» կուսակցության Երիտասարդական կառույց ստեղծելու մասին որոշումը։ Հաստատվել են Կուսակցությանն անդամակցելու հայտ ներկայացրած և հարցազրույցի արդյունքներով դրական եզրակացության արժանացած քաղաքացիների դիմումները։ Քննարկվել են ընթացիկ քաղաքական հարցեր։

21:49 - 02 մայիսի, 2023

Հայաստանի և Ադրբեջանի ԱԳ նախարարների հանդիպում նախատեսված է նաև Մոսկվայում․ մեկը մյուսին չի խանգարում. Արման Եղոյան |news.am|

news.am: Այո, նախնական պայմանավորվածություն կա եւ ըստ այդ պայմանավորվածության ԱԳ նախարարների հանդիպում պետք է լինի նաեւ Մոսկվայում: Այս մասին այսօր՝ մայիսի 2-ին, Աժ-ում լրագրողների հետ զրույցում նշեց ԱԺ ՔՊ խմբակցության պատգամավոր Արման Եղոյանը՝ նշելով, որ դա չի խանգարում, որ հանդիպում է տեղի ունենում նաեւ ԱՄՆ-ում: Դիտարկմանը՝ պարզվեց, որ Վաշինգտոնում ԱԳ նախարարների հանդիպումները օրեր են տեւելու, նա ասաց. «Դա կախված է բանակցության բովանդակությունից: Հայկական կողմը այդ բանակցություններից հնարավոր առավելագույն սպասելիքներ ունի: Եթե ուզում եք, որ բովանդակությունից, տեքստի մեջբերումներ անեմ, դժվար թե դա հիմա հնարավոր լինի»: Ավելի վաղ ՌԴ ԱԳՆ պաշտոնական ներկայացուցիչ Մարիա Զախարովան հայտնել էր, որ Հայաստանի և Ադրբեջանի ԱԳ նախարարների հանդիպման պայմանավորվածություն է ձեռք բերվել, որը կկայանա Մոսկվայում: Մոսկվայում սպասվող հանդիպման ժամկետների վերաբերյալ հստակություն դեռ չկա։

13:10 - 02 մայիսի, 2023

Ամեն ինչ անում ենք, որ կայանա Բաքու-Ստեփանակերտ երկխոսությունը, այսինքն՝ Ստեփանակերտը հանդես գա բանակցություններում որպես սուբյեկտ. ՔՊ-ական պատգամավոր |armenpress.am|

armenpress.am: Հայաստանը Վաշինգտոնում Ադրբեջանի հետ ընթացող բանակցություններից հնարավոր առավելագույնի ակնկալիքներ ունի։ Այս մասին լրագրողների հետ զրույցում ասաց ՀՀ ազգային ժողովի «Քաղաքացիական պայմանագիր» խմբակցության պատգամավոր Արման Եղոյանը: Խոսելով Վաշինգտոնում Հայաստանի և Ադրբեջանի ԱԳ նախարարների միջև ընթացող բանակցությունների մասին՝ Եղոյանն ասաց, որ հայկական կողմն այդ բանակցություններից հնարավոր առավելագույնի սպասելիքներ ունի: «Բանակցություններն անդրադառնում են հայ-ադրբեջանական հարաբերությունների ամբողջ սպեկտորին, չլուծված բոլոր հարցերին: Եվ, բնականաբար, այդ բոլոր հարցերով արվելու է ամեն ինչ՝ համաձայնության հասնելու համար »,-ասաց Եղոյանը՝ նշելով, որ հայկական կողմը իր համար շահավետ լուծում է ցանկանում ստանալ, ադրբեջանական կողմը՝ իր համար շահավետ լուծում: Անդրադառնալով Արցախի հարցով հայկակական կողմի ջանքերին՝ պատգամավորն ասաց. «Մենք հիմա անում ենք ամեն ինչ, որ կայանա Բաքու-Ստեփանակերտ երկխոսությունը, այսինքն՝ Ստեփանակերտը բանակցություններով հանդես գա որպես սուբյեկտ»: Եղոյանը նաև հավելեց, որ այն փաստաթուղթը, որը Հայաստանն ու Ադրբեջանը իրենց առաջարկներով պարբերաբար միմյանց են փոխանցել, ունի «Հարաբերությունների կարգավորման համաձայնություն» անվանումը: Եղոյանը փաստաթղթի բովանդակային մանրամասները չբացեց: Անդրադառնալով հարցին՝ խաղաղության պայմանագրի փոխարեն այդ անվանումն է ընտրվե՞լ՝ Եղոյանն ասաց. «Գոյություն ունի խոսակցական լեզու, որով մարդիկ մատնանշում են որոշակի երևույթներ: Եվ գոյություն ունի իրավական լեզու, որոնք ստանում են իրավական ձևակերպում իրավական փաստաթղթերում: Եվ հաճախ այդ լեզուները տարբեր են լինում»:

12:54 - 02 մայիսի, 2023

Այս հարցերը չէին տա մեր ընդդիմադիր գործընկերները, եթե բանակցություններն ընթանային Մոսկվայում․ Վահագն Ալեքսանյան |aravot.am|

11:37 - 02 մայիսի, 2023

Եթե այս բանակցությունները նույն բովանդակությամբ տեղի ունենային Մոսկվայում, նույն հարցը կբարձրացնեի՞ք․ ՔՊ-ական պատգամավորը՝ Գեղամ Մանուկյանին |tert.am|

tert.am: Եթե այս բանակցությունները նույն բովանդակությամբ ու նույն տեքստով մամլո հաղորդագրությամբ տեղի ունենային Մոսկվայում, դուք նույն հարցը կբարձրացնեի՞ք։ Այս մասին այսօր ԱԺ ամբիոնից ունեցած ելույթում ասաց «Քաղաքացիական պայմանագիր» խմբակցության պատգամավոր Արման Եղոյանը՝ անդրադառնալով «Հայաստան» խմբակցության անդամ Գեղամ Մանուկյանի՝ ավելի վաղ արված հայտարարությանն այն մասին, որ ժողովրդի թիկունքում, ստվերային, գաղտագողի տարբեր գործընթացներ են տեղի ունենում։ «Պարո՛ն Մանուկյան, դուք ասում եք, որ Վաշինգտոնում ամբողջ աշխարհի աչքի առաջ գաղտագողի բանակցություններ են տեղի ունենում Հայաստանի ու Ադրբեջանի միջև։ Ես մի հարց ունեմ, խնդրում եմ շատ անկեղծ պատասխանել։ Եթե այս բանակցությունները տեղի ունենային Մոսկվայում, այսօր, նույն ձևով, նույն քանակի լրատվությամբ, նույն տեքստով մամլո հաղորդագրությամբ, նույն բովանդակությամբ, իսկ բովանդակությունները գրեթե նույնն են․ անկյունաքարային հարցերի շուրջ թե՛ Մոսկվայում տեղի ունեցող բանակցությունների, թե՛ Վաշինգտոնում տեղի ունեցող բանակցությունների բովանդակությունն Արցախի հարցի վերաբերյալ նույնն է, եթե նույն բովանդակությամբ այս բանակցությունները լինեին կամ լինեն՝ միգուցե վաղը, մեկ շաբաթից, մեկ ամսից, դուք էլի այս նույն հարցն այստեղ կբարձրացնեիք», - ասաց պատգամավորը՝ շեշտելով, որ անկնալում է հստակ պատասխան, քանի որ հաջորդիվ ելույթ է ունենալու Գեղամ Մանուկյանը։ Ավելի վաղ ԱԺ նիստում «Հայաստան» խմբակցության անդամ Գեղամ Մանուկյանը հայտարարել էր, որ հայ ժողովրդի թիկունքում, ստվերային, գաղտագողի տեղի են ունենում գործընթացներ, տարբեր ձևաչափով հանդիպումներ, որոնք վտանգում են ՀՀ և Արցախի Հանրապետության անվտանգությունը, հարվածի տակ են դնում մեր ժողովրդին, պետականությունը և ազգային անվտանգությունը։

10:53 - 02 մայիսի, 2023