Յենս Ստոլտենբերգ

Ստոլտենբերգը հայտնել է, որ Ադրբեջանն ու ՆԱՏՕ-ն համագործակցության նոր շրջանակային փաստաթուղթ են պատրաստում |factor.am|

factor.am: Ադրբեջանն ու ՆԱՏՕ-ն աշխատում են համագործակցության նոր շրջանակային փաստաթղթի համաձայնեցման շուրջ։ Այս մասին ադրբեջանական պետական «Ազերթաջ» լրատվական գործակալության հետ զրույցում հայտարարել է ՆԱՏՕ-ի գլխավոր քարտուղար Յենս Ստոլտենբերգը։ «Մենք աշխատում ենք ՆԱՏՕ-ի և Ադրբեջանի միջև համագործակցության նոր շրջանակային փաստաթղթի համաձայնեցման շուրջ։ Այս փաստաթուղթը հիմնված է լինելու փոխգործակցության խնդիրների վրա, և այստեղ հիմնական նպատակը համատեղ աշխատանքն է՝ Ադրբեջանի Զինված ուժերը ՆԱՏՕ-ի չափանիշներին հարմարացնելու ուղղությամբ, որպեսզի դրանք գործառնականորեն լիովին համատեղելի լինեն ՆԱՏՕ-ի ուժերի հետ»,- ասել է Ստոլտենբերգը։ Նա նշել է, որ Ադրբեջանը և ՆԱՏՕ-ն մեծ նշանակություն են տալիս ռազմական կրթության հարցերին, ինչը կնպաստի կողմերի միջև փոխգործակցության զարգացմանը։ «Միևնույն ժամանակ, մենք դիտարկում ենք այլ ոլորտներ, որտեղ կարող ենք զարգացնել մեր համագործակցությունն ապագայում: Այս ամենը կմերձեցնի Ադրբեջանի և ՆԱՏՕ-ի ուժերը, և ես կարծում եմ, որ դա ձեռնտու կլինի երկու կողմերին»,- ընդգծել է ՆԱՏՕ-ի գլխավոր քարտուղարը։ Նա հավելել է, որ ՆԱՏՕ-ն, ընդհանուր առմամբ, շահագրգռված է ապագայում էլ Հարավային Կովկասի երկրների հետ համագործակցության զարգացմամբ։ Շարունակությունը՝ սկզբնաղբյուր կայքում

12:33 - 19 մարտի, 2024

ՆԱՏՕ-ի գլխավոր քարտուղարը ժամանեց Երևան |armenpress.am|

armenpress.am: ՆԱՏՕ-ի գլխավոր քարտուղար Յենս Ստոլտենբերգը ժամանեց Երևան։ Ինչպես հաղորդում է «Արմենպրես»-ի թղթակիցը, Երևանի «Զվարթնոց» օդանավակայանում ՆԱՏՕ-ի գլխավոր քարտուղարին դիմավորեցին Հայաստանի պաշտպանության նախարարի տեղակալ Հրաչյա Սարգսյանը և արտաքին գործերի նախարարի տեղակալ Վահան Կոստանյանը։ ՆԱՏՕ-ի գլխավոր քարտուղարը Երևանում հանդիպումներ կունենա Հայաստանի վարչապետ Նիկոլ Փաշինյանի և նախագահ Վահագն Խաչատուրյանի հետ։

12:06 - 19 մարտի, 2024

Վրաստանը ՆԱՏՕ-ի ամենամոտ գործընկերներից է․ Ստոլտենբերգն ու Կոբախիձեն բանակցություններ են անցկացրել |factor.am|

factor.am: Վրաստանի վարչապետ Իրակլի Կոբախիձեն ընդունել է Թբիլիսի ժամանած ՆԱՏՕ-ի գլխավոր քարտուղար Յենս Ստոլտենբերգին։ Վրաստանի «Առաջին ալիքի» հաղորդմամբ՝ հանդիպմանն անդրադարձ է եղել Վրաստանի եվրատլանտյան ինտեգրմանը, ՆԱՏՕ-Թբիլիսի հարաբերությունների օրակարգին և հետագա համագործակցության հեռանկարներին։ Նշվել է, որ ՆԱՏՕ-ին ինտեգրումը Վրաստանի արտաքին քաղաքականության առաջնահերթությունն է, ինչն ամրագրված է երկրի Սահմանադրության մեջ։ Ուշադրություն է դարձվել Սև ծովի անվտանգության խնդիրներին և ընդհանուր եվրատլանտյան անվտանգության ապահովման գործում Սևծովյան տարածաշրջանի կայունության կարևորությանը։ Հանդիպմանը հետևել է մամուլի համար համատեղ հայտարարությունը։ «Սա ցույց է տալիս, թե որքան արժեքավոր է մեզ համար Վրաստան-ՆԱՏՕ գործընկերությունը, մենք ողջունում ենք նաև այն փաստը, որ դուք Բրյուսելում էիք մի քանի շաբաթ առաջ։ Հիմա ես այստեղ եմ, այս ամենը վկայում է այն մասին, որ մեր միջև կա ակտիվ քաղաքական երկխոսություն գործընկերության շրջանակում։ Վրաստանը ՆԱՏՕ-ի ամենամոտ գործընկերներից է, և մենք բարձր ենք գնահատում Վրաստանի ներդրումը ՆԱՏՕ-ի առաքելություններում և գործողություններում: Մենք լիովին աջակցում ենք Վրաստանի տարածքային ամբողջականությանը. Աբխազիան և Հարավային Օսիան Վրաստանի մաս են կազմում։ ՆԱՏՕ-ն շարունակում է կոչ անել Ռուսաստանին չեղարկել վրացական տարածքների՝ որպես անկախ պետությունների ճանաչումը։ Վրաստանի և Ուկրաինայի օկուպացված տարածքներում Ռուսաստանի կողմից կազմակերպված ընտրությունների անցկացումը լիովին անօրինական է, և ՌԴ նախագահական ընտրություններն ակնհայտորեն ո՛չ ազատ են եղել, ո՛չ թափանցիկ»,- հայտարարել է Ստոլտենբերգը։

17:43 - 18 մարտի, 2024

Խաղաղությունը կարևոր է նաև սևծովյան տարածաշրջանի և հյուսիսատլանտյան անվտանգության համար․ Ստոլտենբերգ |azatutyun.am|

azatutyun.am: «Այսօր մենք Հայաստանի հետ խաղաղ բանակցությունների ակտիվ փուլում ենք», - ՆԱՏՕ-ի գլխավոր քարտուղար Յենս Ստոլտենբերգի հետ հանդիպմանը հաջորդած համատեղ մամուլի ասուլիսում հայտարարել է Ադրբեջանի նախագահ Իլհամ Ալիևը։ Ընդգծելով, որ մինչ օրս Հայաստանի հետ խաղաղ համաձայնագրի նախագծի վերաբերյալ մեկնաբանությունների փոխանակման յոթ փուլ են անցկացրել՝ Ալիևն ասել է, որ արտգործնախարարների վերջին հանդիպումը, ինչպես նաև սահմանների սահմանազատման հարցով փոխվարչապետերի հանդիպումը վկայում են, որ կարգավորման լավ հնարավորություն կա։ Ադրբեջանի նախագահը վերահաստատել է իր ավելի վաղ արած հայտարարությունը՝ շեշտելով․ - «Այժմ ավելի մոտ ենք խաղաղությանը, քան երբևէ»: «Օկուպացիայի ընթացքում, ցավոք, բանակցությունները ոչ մի արդյունք չտվեցին։ Փաստորեն, ԵԱՀԿ Մինսկի խմբի գործունեությունը 28 տարի ոչ մի արդյունք չտվեց։ Բայց հիմա, Ադրբեջանի տարածքային ամբողջականության վերականգնման արդյունքում, կարծում եմ և հուսով եմ, որ մենք շատ մոտ ենք բեկումնային փուլին։ Սա շատ լուրջ աշխարհաքաղաքական փոփոխություն կլինի Կովկասում։ Սա կնշանակի, որ խաղաղությունը, երկար սպասված խաղաղությունը կգա Կովկաս», - ասել է Ալիևը։ Խաղաղությունը չափազանց կարևոր է տարածաշրջանի մարդկանց և երկրների համար, բայց այն կարևոր է նաև սևծովյան տարածաշրջանի և հյուսիսատլանտյան անվտանգության համար, հայտարարել է ՆԱՏՕ-ի գլխավոր քարտուղարը՝ շեշտելով՝ խաղաղությունն ու կայունությունը կարևոր են ոչ միայն այստեղ, այլև անվտանգային ավելի լայն համատեքստում։ «Հայաստանն ու Ադրբեջանը երկար տարիների հակամարտությունից հետո այսօր հնարավորություն ունեն հասնելու կայուն խաղաղության։ Դուք առավել քան երբևէ մոտ եք խաղաղության համաձայնագրի կնքմանը։ Եվ ես կարող եմ միայն հորդորել Ձեզ օգտվել այս հնարավորությունից՝ Հայաստանի հետ կայուն խաղաղության համաձայնագրի հասնելու համար», - ասել է Ստոլտենբերգը՝ նաև նույնաբովանդակ գրառում կատարել X-ի իր էջում։

10:41 - 18 մարտի, 2024

ՆԱՏՕ-ն չի պլանավորում միջուկային զենքեր տեղակայել նոր անդամ երկրներում․ Ստոլտենբերգ |armenpress.am|

armenpress.am: ՆԱՏՕ-ն չի նախատեսում Շվեդիայի հաշվին ընդլայնել դաշինքի այն անդամների թիվը, որտեղ միջուկային զենք է տեղակայված: Այդ մասին հայտարարել է ՆԱՏՕ-ի գլխավոր քարտուղար Յենս Ստոլտենբերգը Շվեդիայի վարչապետի հետ համատեղ մամուլի ասուլիսում։ «Մենք միջուկային զենք ունեցող ՆԱՏՕ-ի երկրների թիվն ընդլայնելու պլաններ չունենք: Մենք նաև մշտապես գնահատում ենք մեր ուժերի կարողությունը, և ներկայում պլաններ չունենք Շվեդիայում նոր մարտական խմբերի առնչությամբ», - ասել է նա: Ըստ Ստոլտենբերգի, եթե մի օր նման անհրաժեշտություն առաջանա, ապա Շվեդիան ինքը պետք է որոշում կայացնի։ «Շվեդիան անկախ երկիր է, որն ինքն է որոշումներ կայացնում։ ՆԱՏՕ-ին անդամակցությունը ոչ մի կերպ չի փոխի Շվեդիայի իրավունքը և ունակությունը՝ ասելու «ոչ» միջուկային զենքի տեղակայմանը», - ասել է ՆԱՏՕ-ի ղեկավարը։ Շվեդիան մարտի 7-ին պաշտոնապես դարձավ ՆԱՏՕ-ի 32-րդ անդամը։ Շվեդիայի դրոշի բարձրացման արարողությունը ՆԱՏՕ-ի կենտրոնակայանում տեղի է ունեցել մարտի 11-ին։

16:47 - 11 մարտի, 2024

ՆԱՏՕ-ի գլխավոր քարտուղարը դեմ է արտահայտվել համաեվրոպական միջուկային զենքի գաղափարին |tert.am|

tert.am: ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ Եվրոպայի համար միջուկային կարողությունների ստեղծումը, երբ ՆԱՏՕ-ում արդեն իսկ կա միջուկային զսպման համակարգ, ոչ մի օգուտ չի բերի։ Այդ մասին հայտնում է ՌԻԱ Նովոստի-ն։ «ՆԱՏՕ-ի որոշ անդամների միջև միջուկային զսպման զուգահեռ համակարգերի ստեղծման գաղափարը, առանց ԱՄՆ-ի կամ Մեծ Բրիտանիայի ներառման, օգտակար չի լինի և միայն կխաթարի ընդհանուր միջուկային զսպումը, որը երկար տարիներ լավ է աշխատել շատերի համար»,- ասել է Ստոլտենբերգը Մյունխենի անվտանգության համաժողովում: Նա նաև նշել է, որ ցանկացած քննարկում, որը կասկածի տակ է դնում ներկայիս միջուկային զսպման համակարգը, միայն կխարխլի դաշինքը։

16:32 - 17 փետրվարի, 2024

Ստոլտենբերգն Իրանին մեղադրել է տարածաշրջանի ապակայունացման մեջ |shantnews.am|

shantnews.am: ՆԱՏՕ-ի գլխավոր քարտուղար Յենս Ստոլտենբերգը, մեկնաբանելով Հորդանանի և Սիրիայի հետ սահմանին ամերիկյան ռազմաբազայի վրա հարձակումը, ասել է, որ Իրանը «կապակայունացնի տարածաշրջանը»։ «Իրանը շարունակում է ապակայունացնել տարածաշրջանը, պատասխանատու է Կարմիր ծովում նավերի վրա հարձակվող ահաբեկիչներին աջակցելու համար: Իրանի վարքագիծը ցույց է տալիս, թե ինչպիսին է աշխարհն առանց կանոնների. անկանխատեսելի և վտանգավոր»,- ասել է նա: ԱՄՆ կենտրոնական հրամանատարությունը կիրակի երեկոյան հայտնել է, որ կիրակի օրը Սիրիա-Հորդանան սահմանին գտնվող ամերիկյան ռազմաբազայի վրա անօդաչու թռչող սարքի հարձակման հետևանքով զոհվել է երեք ամերիկացի զինվոր և վիրավորվել 25-ը: Ազգային անվտանգության խորհրդի Ռազմավարական հաղորդակցությունների համակարգող Ջոն Քիրբին ասել է, որ Միացյալ Նահանգները, անշուշտ, կպատասխանի Մերձավոր Արևելքում իր բանակի դեմ հարձակմանը և կընտրի դրա ժամանակն ու մեթոդը: The Wall Street Journal-ը, վկայակոչելով ամերիկացի պաշտոնյաներին, հայտնում է, որ ԱՄՆ զինվորականները չեն կարողացել կանխել հարձակումը Մերձավոր Արևելքում գտնվող բազայի վրա, քանի որ շփոթել են թշնամու անօդաչու թռչող սարքը սեփական անօդաչու թռչող սարքի հետ: Հրատարակության տվյալներով՝ հակառակորդի անօդաչու թռչող սարքը մոտենում էր բազային ամերիկյան անօդաչու թռչող սարքի վերադարձի հետ միաժամանակ։ Հրատարակությունը գրում է, որ միջադեպի լույսի ներքո ԱՄՆ-ը դիտարկում է Իրաքում, Սիրիայում և Իրանում «գրոհայիններին» հարվածելու հնարավորությունը, թեև պաշտոնյաները խոստովանում են, որ Իրանի տարածքի վրա հարձակումները քիչ հավանական են թվում։ Պաղեստինա-իսրայելական հակամարտության սրման սկզբից ի վեր Իրաքում միջազգային կոալիցիան ղեկավարող ԱՄՆ բազաները, ինչպես նաև Սիրիայում ամերիկյան զորքերը պարբերաբար ենթարկվում են հարձակումների, ինչի պատասխանատվությունը ստանձնում են Իրաքում գործող զինված շիա խմբավորումները։

09:26 - 30 հունվարի, 2024

Ստոլտենբերգն ակնկալում է, որ հաջորդ ամիս Հունգարիան կվավերացնի Շվեդիայի անդամակցությունը ՆԱՏՕ-ին |azatutyun.am|

azatutyun.am: ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ Հունգարիայի խորհրդարանը փետրվարին կվավերացնի Շվեդիայի անդամակցությունը դաշինքին, հաղորդում է Reuters-ը։ Ստոլտենբերգի խոսքով՝ Հունգարիայի վարչապետ Վիկտոր Օրբանն անցած օրերին հեռախոսազրույցի ընթացքում իրեն վստահեցրել է, որ լիովին կաջակցի դաշինքին Շվեդիայի անդամակցությանը։ «Շվեդիայի անդամակցությունը ՆԱՏՕ-ին կուժեղացնի դաշինքը և կամրապնդի մեր ընդհանուր անվտանգությունը։ Ես միանգամայն վստահ եմ, որ Հունգարիան կվավերացնի Շվեդիայի անդամակցությունը», - ասել է ՆԱՏՕ-ի գլխավոր քարտուղարը։ Հունգարիան հյուսիսատլանտյան դաշինքի վերջին երկիրն է, որը դեռևս հավանություն չի տվել Շվեդիայի անդամակցության հայտնին։ Թուրքիայի խորհրդարանը Ստոկհոլմի դիմումը վավերացրել է մի քանի օր առաջ:

16:18 - 26 հունվարի, 2024

Շվեդիայի անդամակցությունը ՆԱՏՕ-ին ավելի ուժեղ է դարձնում․ Ստոլտենբերգ |hy.armradio.am|

hy.armradio.am: ՆԱՏՕ-ի գլխավոր քարտուղար Յենս Ստոլտենբերգը ողջունել է Թուրքիայի խորհրդարանի որոշումը՝ վավերացնել Հյուսիսատլանտյան դաշինքին միանալու Շվեդիայի հայտը և կոչ է արել Հունգարիային հետևել Թուրքիայի օրինակին։ Այս մասին հայտնում է Agence France-Presse-ը։ «Ես ողջունում եմ Թուրքիայի Ազգային մեծ ժողովի քվեարկությունը ՆԱՏՕ-ին Շվեդիայի անդամակցությունը վավերացնելու վերաբերյալ: Ես նաև ակնկալում եմ, որ Հունգարիան հնարավորինս շուտ կավարտի վավերացումը», - ասել է գլխավոր քարտուղարը: Նա հավելել է, որ «Շվեդիայի անդամակցությունը ՆԱՏՕ-ին ավելի ուժեղ է դարձնում»։ Թուրք պատգամավորները հունվարի 23-ին հաստատել են դաշինքին Շվեդիայի միանալու մասին արձանագրությունը վավերացնող օրինագիծը։ Այժմ Հունգարիան մնում է ՆԱՏՕ-ի միակ երկիրը, որի խորհրդարանը դեռ չի վավերացրել Շվեդիայի անդամակցության դիմումը։ Ֆինլանդիան և Շվեդիան դաշինքին միանալու իրենց դիմումները ներկայացրել են 2022 թվականի մայիսի 18-ին՝ ցույց տալով, որ Ուկրաինայում տեղի ունեցող իրադարձությունները իրենց դրդել են նման քայլի։ Ֆինլանդիան պաշտոնապես անդամակցություն է ստացել 2023 թվականի ապրիլի 4-ին։

09:56 - 24 հունվարի, 2024

Ստոլտենբերգ. կարևոր է, որ «Համաս»-ի և Իսրայելի միջև հակամարտությունը չվերաճի ավելի մեծ՝ տարածաշրջանային հակամարտության |azatutyun.am|

azatutyun.am: Կարևոր է, որ «Համաս»-ի և Իսրայելի միջև հակամարտությունը չվերաճի ավելի մեծ՝ տարածաշրջանային հակամարտության, հայտարարել է ՆԱՏՕ-ի գլխավոր քարտուղար Յենս Ստոլտենբերգը նոյեմբերի 28-ին դաշինքի արտաքին գործերի նախարարների հանդիպմանը հաջորդած մամուլի ասուլիսում: Ողջունելով «Համաս»-ի և Իսրայելի միջև հրադադարը և գերիների փոխանակումը՝ ՆԱՏՕ-ի գլխավոր քարտուղարը նշել է, որ դաշինքը ակտիվ դեր չի խաղում այս պատերազմում: «Բայց ՆԱՏՕ-ն որպես կազմակերպություն անմիջականորեն ներգրավված չէ: Մենք ներկա ենք ավելի լայն Մերձավոր Արևելքի տարածաշրջանում։ Մենք սերտ գործընկերություն ունենք Պարսից ծոցի, Հյուսիսային Աֆրիկայի և Մերձավոր Արևելքի արաբական շատ պետությունների հետ, ներառյալ շատ սերտ գործընկերություն Հորդանանի հետ, որտեղ մենք իրականացնում ենք պաշտպանական կարողությունների զարգացման որոշ գործողություններ: Հորդանանի թագավորը հենց նոր այցելեց ՆԱՏՕ. Եվ ես նաև, ըստ էության, մոտ ապագայում կայցելեմ նաև Ծոցի տարածաշրջան՝ այնտեղ հանդիպելու ՆԱՏՕ-ի գործընկերների հետ»։ Յենս Ստոլտոնբերգն անդրադարձել նաև Իրանին՝ նշելով՝ «նրանք չպետք է օգտագործեն հակամարտությունը, և պետք է սանձեն «Համաս»-ին և «Հեզբոլլահ»-ին»: «Համաս»-ը Միացյալ Նահանգներում և Եվրամիությունում ճանաչվել է ահաբեկչական կառույց:

10:44 - 29 նոյեմբերի, 2023

Զելենսկին Ստոլտենբերգին կոչ է արել շտապ Ուկրաինա-ՆԱՏՕ խորհուրդ գումարել |tert.am|

tert.am: Ուկրաինայի նախագահ Վլադիմիր Զելենսկին ՆԱՏՕ-ի գլխավոր քարտուղար Յենս Ստոլտենբերգի հետ հեռախոսազրույցի ժամանակ կոչ է արել շտապ Ուկրաինա-ՆԱՏՕ խորհուրդ գումարել։ Կառույցը ստեղծվել է հուլիսին Հյուսիսատլանտյան դաշինքի գագաթնաժողովի շրջանակում։ «Ես դիմել եմ Յենսին՝ առաջարկելով անհապաղ գումարել այս խորհուրդը՝ ճգնաժամի վերաբերյալ համապատասխան խորհրդակցությունների համար։ Այդ հանդիպումը տեղի կունենա մոտ օրերս։ Մենք կարող ենք հաղթահարել անվտանգության ճգնաժամը Սև ծովում»,- ասել է Զելենսկին տեսաուղերձում։ Զելենսկին ավելի վաղ հայտնել էր, որ Ստոլտենբերգի հետ քննարկել է սևծովյան հացահատիկային միջանցքի ապաշրջափակման համար անհրաժեշտ միջոցները։ Նրանք նաև գնահատել են Սև ծովում տիրող իրավիճակը և այն ռիսկերը, որոնք այն պարունակում է համաշխարհային պարենային անվտանգության համար։ Հուլիսի 12-ին ՆԱՏՕ-ի գագաթնաժողովում ստեղծվել է Ուկրաինա-ՆԱՏՕ խորհուրդը։ Նախկինում նման մարմին կար միայն Ռուսաստանի հետ, մինչդեռ Ուկրաինայի հետ ՆԱՏՕ-ն ուներ միայն համատեղ հանձնաժողով։ Հանձնաժողովի նիստ գումարելը կարող է արգելափակվել դաշինքի ցանկացած պետության կողմից։ Խորհրդի գումարումը չի կարող արգելափակվել։

11:55 - 23 հուլիսի, 2023

ԵՄ-ն բացառել է մինչև 2024 թվականի վերջը Թուրքիային միություն ընդունելու հնարավորությունը |1lurer.am|

1lurer.am: Եվրամիությունը չի կարող 2024 թվականին ընդունել Թուրքիային, քանի որ ԵՄ-ին միանալու գործընթացը ժամանակ է պահանջում, ասել է Եվրամիության արտաքին ծառայության խոսնակ Պետեր Ստանոն։ «ԵՄ-ին անդամակցելու գործընթացը տարիներ է տևում, ոչ թե ժամեր»,- ասել է նա և հավելել, որ ԵՄ-ն դեռ պատրաստ չէ Թուրքիային տրամադրելու նույնիսկ առանց վիզայի ռեժիմ։ «Վիզային ռեժիմի ազատականացման որոշումը կայացնում են անդամ երկրներն այն բանից հետո, երբ տվյալ պետությունը բավարարում է բոլոր անհրաժեշտ չափանիշները, ներառյալ՝ մարդու իրավունքներն ու քաղաքական ազատությունները»,- ասել է Ստանոն։ Հուլիսի 10-ին Թուրքիայի նախագահ Թայիփ Էրդողանը հայտարարել էր, որ Անկարան կհաստատի ՆԱՏՕ-ին անդամակցելու Շվեդիայի հայտը, պայմանով, որ «Եվրամիությունը բացի դռները Թուրքիայի առջև»։ Նա հավելել է, որ այս մասին տեղեկացրել է ԱՄՆ նախագահ Ջո Բայդենին։ Դաշինքի գլխավոր քարտուղար Ենս Ստոլտենբերգն էլ ասել էր, որ Շվեդիան խոստացել է «ակտիվորեն աջակցել Եվրամիություն մտնելու Անկարայի ջանքերին»։ Մեկնաբանելով Էրդողանի հայտարարած պայմանները՝ Եվրահանձնաժողովի պաշտոնական ներկայացուցիչ Դանա Սպինանտը նշել է, որ ՆԱՏՕ-ի և Եվրամիության ընդլայնումը «տարբեր առանձին գործընթացներ են»։ Թուրքիան ԵՄ անդամակցության թեկնածու է 1999 թվականից։ Անկարայի՝ Եվրամիություն մտնելու հարցով բանակցությունները սկսվել են 2005 թվականին, սակայն շուտով փակուղի են մտել։

13:58 - 19 հուլիսի, 2023

Թուրքիան կհաստատի Շվեդիայի անդամակցությունը ՆԱՏՕ-ին․ Ստոլտենբերգ |armenpress.am|

armenpress.am: ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ Թուրքիան համաձայնել է հաստատել Շվեդիայի անդամակցությունը Հյուսիսատլանտյան դաշինքին։ Այս մասին գրում է CNN-ը՝ նշելով, որ սա լուրջ զարգացում է ՆԱՏՕ-ի գագաթնաժողովի նախաշեմին։ Այս հայտարարությունը շրջադարձային քայլ է Թուրքիայի նախագահ Ռեջեփ Թայիփ Էրդողանի համար, որն ավելի վաղ հայտարարել էր, որ Շվեդիան կարող է դաշինքին միանալ միայն այն բանից հետո, երբ իր երկիրը միանա Եվրոպական Միությանը։ Հուլիսի 10-ին Ռեջեփ Թայիփ Էրդողանի և Շվեդիայի վարչապետ Ուլֆ Քրիստերսոնի հետ հանդիպումից հետո Վիլնյուսում մամուլի ասուլիսի ժամանակ Ստոլտենբերգը հայտարարել է, որ Թուրքիայի նախագահը համաձայնել է Շվեդիայի անդամակցության արձանագրությունը հնարավորինս շուտ Ազգային ժողով ներկայացնել և աշխատել խորհրդարանի հետ՝ արձանագրության հաստատումն ապահովելու համար։ Ստոլտենբերգը, սակայն, չի հայտնել, թե երբ Էրդողանը փաստաթուղթը կներկայացնի խորհրդարան։ Հունգարիան ևս առայժմ չի հաստատել Շվեդիայի անդամակցության հայտը, սակայն ՆԱՏՕ-ի գլխավոր քարտուղարը հայտնել է, որ Հունգարիան այն կհաստատի ամենավերջինը։ Թուրքիան ամիսներ շարունակ չէր հաստատում Շվեդիայի հայտը՝ հայտարարելով, որ Ստոկհոլմը Թուրքիայում ահաբեկչական ճանաչված «Քրդական բանվորական կուսակցության» անդամներին թույլ է տալիս գործել իր տարածքում։ Անկարան նաև դատապարտում էր Ստոկհոլմին իսլամաֆոբ ցույցերի համար, այդ թվում՝ Ղուրանի այրման։ Մամուլի ասուլիսի ժամանակ Ստոլտենբերգը նաև հայտնել է, որ Թուրքիան և Շվեդիան աշխատել են անվտանգության շուրջ Անկարայի «օրինական մտահոգությունները լուծելու ուղղությամբ»։

10:39 - 11 հուլիսի, 2023

Ստոլտենբերգը պաշտոնապես մնում է ՆԱՏՕ-ի գլխավոր քարտուղար ևս մեկ տարի |shantnews.am|

shantnews.am: ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ Դաշինքի ղեկավարության իր լիազորությունները երկարաձգվել են ևս մեկ տարով։ Ըստ «European Truth»-ի՝ այս մասին նա գրել է Twitter-ում։ Նա ասել է, որ իր համար մեծ պատիվ է, որ Դաշինքի անդամները որոշել են երկարաձգել իր պաշտոնավարումը գլխավոր քարտուղարի պաշտոնում մինչև 2024 թվականի հոկտեմբերի 1-ը։ «Եվրոպայի և Հյուսիսային Ամերիկայի միջև անդրատլանտյան կապը գրեթե 75 տարի ապահովել է մեր ազատությունն ու անվտանգությունը, և ավելի վտանգավոր աշխարհում մեր դաշինքն ավելի կարևոր է, քան երբևէ»,- ասել է Ստոլտենբերգը։ Դաշինքի անդամ երկրները նախորդ շաբաթ պայմանավորվել են երկարաձգել Ստոլտենբերգի մանդատը։ Ստոլտենբերգի պոտենցիալ իրավահաջորդներից ոչ մեկը, ինչպիսիք են Դանիայի վարչապետ Մետե Ֆրեդերիկսենը, Մեծ Բրիտանիայի պաշտպանության նախարար Բեն Ուոլեսը կամ Իսպանիայի վարչապետ Պեդրո Սանչեսը, չեն կարողացել ստանալ ՆԱՏՕ-ի անդամ 31 երկրների աջակցությունը: Նորվեգիայի նախկին վարչապետ 64-ամյա Ստոլտենբերգը պետք է ավարտեր ՆԱՏՕ-ի գլխավոր քարտուղարի պաշտոնը 2023 թվականի սեպտեմբերի վերջին։ Նա փետրվարին հայտարարեց, որ չի խնդրելու մանդատի երկարաձգում։ Սակայն ՆԱՏՕ-ի անդամները նրան խնդրեցին համաձայնել դրան այն բանից հետո, երբ չկարողացան համաձայնության գալ իրավահաջորդի հարցում:

13:54 - 04 հուլիսի, 2023

ՆԱՏՕ-ն հետեւում է ՌԴ-ում տեղի ունեցող իրադարձություններին, բայց դրանք համարում է նրա ներքին գործը․ Ստոլտենբերգ |news.am|

news.am: ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ դաշինքը հետեւում է Ռուսաստանում տեղի ունեցող իրադարձություններին եւ դրանք համարում է նրա ներքին գործը։ «Մենք հետեւում ենք Ռուսաստանում իրավիճակին։ Հանգստյան օրերին տեղի ունեցած իրադարձությունները Ռուսաստանի ներքին գործն են։ Բայց դա նաեւ նախագահ Պուտինի կողմից թույլ տրված մեծ ռազմավարական սխալի եւս մեկ ցուցադրություն է»,- Լիտվա կատարած այցի ժամանակ, ասել է նա։ Հունիսի 23-ի երեկոյան «Վագներ» մասնավոր ռազմական ընկերության հիմնադիր Եվգենի Պրիգոժինը Telegram-ի իր ալիքում հայտարարել էր, որ իր ստորաբաժանումներն, իբր, հարձակման են ենթարկվել, և դրա համար մեղադրել էր Ռուսաստանի Դաշնության ռազմական ղեկավարությանը։ ՌԴ ՊՆ-ն այս տեղեկությունը որակել էր կեղծ։ «Վագներ»-ի ստորաբաժանումները, որոնք աջակցում էին Պրիգոժինին, շարժվել էին Դոնի Ռոստով և դեպի Մոսկվա: ՌԴ Անվտանգության դաշնային ծառայությունը քրեական գործ է հարուցել զինված ապստամբության հրահրման փաստով, ՌԴ նախագահ Վլադիմիր Պուտինը հեռուստաուղերձում «Վագներ»-ի գործողությունները դավաճանություն է անվանել։ Ավելի ուշ Վլադիմիր Պուտինի համաձայնությամբ Բելառուսի նախագահ Ալեքսանդր Լուկաշենկոն բանակցություններ էր վարել Պրիգոժինի հետ, որի արդյունքում մասնավոր ռազմական ընկերությունը հանել էր շարասյուները և վերադարձել դաշտային ճամբարներ։ Ավելի ուշ ՌԴ նախագահի մամուլի քարտուղար Դմիտրի Պեսկովը պարզաբանեց, որ Պրիգոժինի, ինչպես նաև ապստամբության մասնակիցների նկատմամբ քրեական գործը, հաշվի առնելով առաջնագծում նրանց վաստակը, կարճվելու է։ Ինքը՝ Պրիգոժինը, Պեսկովի խոսքով, կմեկնի Բելառուս։

14:17 - 26 հունիսի, 2023

Միշելի, Շոլցի և Ստոլտենբերգի արձագանքը Կախովկա ՀԷԿ-ի ամբարտակի պայթեցման վերաբերյալ |factor.am|

factor.am: Եվրոպական խորհրդի նախագահ Շառլ Միշելը թվիթերյան իր էջում գրել է, որ Ռուսաստանն է պատասխանատու Կախովկա հիդրոէլեկտրակայանի ավերման համար, փոխանցում է BBC-ի ռուսական ծառայությունը։ «Ցնցված եմ Կախովկա ՀԷԿ-ի ամբարտակի վրա աննախադեպ հարձակումից։ Քաղաքացիական ենթակառուցվածքների ոչնչացումն ակնհայտորեն ռազմական հանցագործություն է, և մենք պատասխանատվության կենթարկենք Ռուսաստանին և նրա խամաճիկներին»,- գրել է նա։ ՆԱՏՕ-ի գլխավոր քարտուղար Յենս Ստոլտենբերգը ևս անդրադարձել է ՀԷԿ-ի ավերմանը։ «Կախովկայում ամբարտակի ոչնչացումը վտանգի տակ է դնում հազարավոր խաղաղ բնակիչների և լուրջ վնաս է հասցնում շրջակա միջավայրին: Սա վրդովվեցնող գործողություն է, որը ևս մեկ անգամ ցույց է տալիս Ուկրաինայում Ռուսաստանի պատերազմի դաժանությունը»,- նշել է Ստոլտենբերգը։ Գերմանիայի կանցլեր Օլաֆ Շոլցն էլ նշել է, որ ամբարտակի ոչնչացումը դարձել է հակամարտության «նոր հարթություն», որը, սակայն, «համապատասխանում է Պուտինի՝ այս պատերազմը վարելու ձևին»։ «Սա բազմաթիվ հանցագործություններից մեկն է, որը մենք տեսել ենք Ուկրաինայում, և որոնք իրականացվել են ռուս զինվորականների կողմից։ Որպես պատերազմի վարման այս մեթոդի մի մաս՝ միշտ հարվածներ են հասցվել քաղաքացիական թիրախներին, քաղաքներին, գյուղերին, հիվանդանոցներին, դպրոցներին և ենթակառուցվածքներին: Եվ հիմա հայտնվել է նոր հարթություն, բայց այն համապատասխանում է նրա հետ, թե ինչպես է Պուտինը վարում այս պատերազմը»,- ասել է Շոլցը WDR հեռուստաընկերությանը տված հարցազրույցում։ Հիշեցնենք, որ Խերսոնի շրջանի Կախովսկայա ՀԷԿ-ում պայթյուն է տեղի ունեցել։ Ուկրաինան և Ռուսաստանը միմյանց են մեղադրում։

15:37 - 06 հունիսի, 2023