«Քաղաքացիական պայմանագիր» կուսակցություն - ՔՊ

2021 թվականի հունիսին տեղի ունեցած խորհրդարանական արտահերթ ընտրությունների արդյունքում ՀՀ-ում կառավարություն ձեւավորած եւ խորհրդարանական մեծամասնություն դարձած քաղաքական կուսակցություն է։ 8-րդ գումարման խորհրդարանում՝ «Քաղաքացիական պայմանագիր» խմբակցություն։

Որպես միավոր՝ ձեւավորվել է 2013 թվականին։ Կուսակցությունը պաշտոնապես ստեղծվել է 2015 թվականին։

Կուսակցությունը «Իմ քայլը» դաշինքի կազմով բացարձակ մեծամասնություն է եղել նաեւ ՀՀ 7-րդ գումարման Ազգային ժողովում։

Իսկ 2017 թվականի խորհրդարանական ընտրություններին կուսակցությունը դաշինքով էր հանդես եկել «Հանրապետություն» եւ «Լուսավոր Հայաստան» կուսակցութունների հետ, ԱԺ-ում «Ելք» խմբակցություն ձեւավորել՝ 9 պատգամավորով։ Նույն դաշինքով կուսակցությունը մասնակցել էր նաեւ 2017թ․ Երեւանի քաղաքապետի եւ ավագանու ընտրություններին՝ ունենալով 14 հոգանոց խմբակցություն։

2018 թվականին Երեւանի քաղաքապետի ու ավագանու արտահերթ ընտրությունների ժամանակ կուսակցությունը մասնակցել էր «Առաքելություն» կուսակցության հետ՝ «Իմ քայլը» դաշինքով․ դաշինքի ցուցակը գլխավորող Հայկ Մարությանը դարձավ Երեւանի քաղաքապետ` ստանալով 80%-ից ավել քվե։

«Ես լավ տղա եմ, ինձ ընտրեք». ԱԺ-ն ընտրում է Վճռաբեկ դատարանի վարչական պալատի դատավոր |hetq.am|

hetq.am: Ազգային ժողովը քննարկում է Վճռաբեկ դատարանի վարչական պալատի դատավորի թափուր տեղի համար առաջադրված թեկնածուների ընտրությունը: Առաջարկվել են Վերաքննիչ վարչական դատարանի դատավոր Արման Թովմասյանի, Շիրակի մարզի առաջին ատյանի ընդհանուր իրավասության դատարանի դատավոր Վահագն Թորոսյանի և Վարչական դատարանի դատավոր Արգիշտի Ղազարյանի թեկնածությունները: «Հայաստան» խմբակցության պատգամավոր Արծվիկ Մինասյանն ասաց, որ չեն մասնակցի իշխող խմբակցության առաջադրած թեկնածուների քվեարկությանը: Փաստացի, Ազգային ժողովը Վճռաբեկ դատարանի դատավորների ընտրության հարցը քննարկեց առանց ընդդիմության: Թեկնածուներին Ազգային ժողովում ներկայացրեց Բարձրագույն դատական խորհրդի նախագահ Կարեն Անդրեասյանը: Թեկնածու Արման Թովմասյանը խոսեց դատարանների ծանրաբեռնվածության մասին՝ շեշտելով, որ երբեմն պետական մարմիններն, անհարկի բողոքարկելով դատական ակտերը, լրացուցիչ ծանրաբեռնում են վարչական դատարանը: Բացի այդ, պարտվելով կրում են նաև դատական ծախսերի բեռը: Թեկնածուին հարց ուղղեց միայն «Քաղաքացիական պայանագիր» խմբակցության պատգամավոր Արմեն Խաչատրյանը: Նրան հետաքրքրում էր՝ արդյոք հնարավոր չէ ծանուցումներն ապահովել բացառապես էլեկտրոնային եղանակով: Արման Թորոսյանը նշեց, որ ծանուցման այսօրվա գործող կարգավորումներով ամբողջովին կարողանում են ապահովել պատշաճ ծանուցումները: Նրա խոսքերով, եթե ամբողջությամբ անցում կատարվի էլեկտրոնային ծանուցմանը, ապա դժվարություններ կառաջանան, օրինակ՝ մարզաբնակների դեպքում: Վահագն Թորոսյանը ԱԺ ամբիոնից հայտարարեց, որ պատիվ է հանդես գալ օրենսդիր մարմնում և ներկայացնել իր մոտեցումները: Թեկնածուն կարևորեց Վճռաբեկ դատարանի վարչական պալատի ստեղծումը: Նշեց, որ պալատը մեծ անելիք ունի արդարադատություն իրականացնելու միասնական դատական պրակտիկայի ձևավորման հարցում: Նշեց, որ ոլորտում կան բազմաթիվ խնդիրներ, որոնք արմատական լուծման կարիք ունեն: Մասնավորապես, գործերի քննության ձգձգումները, որը և՛ գործերի թվի հետ է կապված, և՛ անհարկի բողոքարկումների հետևանք է: Դատավորի թեկնածուն ասաց, որ ոչ մի կերպ արդարացված չէ վարչական մարմինների բողոքարկումներն այն դեպքում, երբ հստակ գիտեն դատական պրակտիկան ինչպես է ձևավորվել, հետևաբար պարտվելու են: «Խիղճը հանդիսանում է մարդու ամենաթանկ զարդը»,- ասաց Վահագն Թորոսյանը՝ հավելելով, որ իր գործունեության ընթացքում իր խղճին դեմ չի գնացել, ինչը կարևոր հանգամանք է դատավոր աշխատելու համար: Պատգամավոր Գուրգեն Արսենյանն ասաց, որ վարչական մարմինների կողմից «տրադիցիոն» բողոքարկումները ծանրաբեռնում են դատարանին: Հետաքրքրվեց՝ արդյոք հնարավոր չէ՞ հետազոտություն ներկայացնել, թե ինչպիսին է դատական պրակտիկան, որ եթե 80% դեպքերում դատարանը չի բավարարում, այլևս չբողոքարկեն: Վահագն Թորոսյանը նշեց, որ հաճախ բողոքները «քոփի» են անում: Առաջին ատյանի դատարանում վարչական մարմնի պատասխանը վերադաս ատյանում ներկայացվում է որպես բողոք: Թեկնածուն նշեց, որ երբեմն բողոքները ներկայացվում են զուտ ինչ-որ բան ապացուցելու համար, գուցե՝ վերադասին: Թորոսյանն ասաց, որ այստեղ քննարկվում է երևույթը, որ վարչական մարմնի համար օրենսդրական պարտադիր պահանջ դառնա՝ հաշվի առնել Վճռաբեկ դատարանի նախադեպային դիրքորոշումները: Դրանով կբարձրանա մատուցվող արդարադատության որակը, ինչից շահելու են բոլորը: Պատգամավոր Հերիքնազ Տիգրանյանը գոհունակություն հայտնեց, որ թեկնածուն ներկայացրեց իր տեսակետը, այդ թվում՝ խմբակցության պատգամավորների հետ հանդիպման ժամանակ: Ապա հետաքրքրվեց հաշտարարության ինստիտուտի մասին: Վահագն Թորոսյանի կարծիքով անհրաժեշտ է, որ ընտանեկան վեճերով զույգերն անցնեն հաշտարարության փուլը, քանի որ այստեղ գործ ունենք ընտանիքի, երեխաների հետ: Արգիշտի Ղազարյանն իր ելույթում ասաց, որ «ծավալուն ելույթի միտում չունի», համաձայն է գործընկերների դիրքորոշումների հետ: Հերիքնազ Տիգրանյանը հետաքրքրվեց, արդյոք թեկնածուի համար անհարմարություն է ԱԺ-ի առջև ներկայացնելու իր մոտեցումները՝ Վճռաբեկ դատարանի դատավոր ընտրվելու համար: Պատգամավորը մատնացույց արեց, որ ընդդիմադիրներին կարծես թե չի հետաքրքրում հարցը և ստացվում է, որ միայն իշխող խմբակցության կողմից է թեկնածուն ընտրվում: Արգիշտի Ղազարյանն ասաց, որ ԱԺ-ի կողմից ընտրվելը, անկախության սեգմենտ պարունակում է: Ըստ նրա՝ դժվար է կառուցել խոսքը, գտնել մեխանիզմ պատգամավորի, քաղաքական ուժի բարեհաճությունը կորզելու համար: Սակայն, նշեց, որ կաշկանդված չէ ելույթ ունենալու համար: «Ես լավ տղա եմ, ինձ ընտրեք, մեխանիզմը տանում է դրան»,- ասաց Ա. Ղազարյանը: Թեկնածուն ակնհայտ դժգոհ էր, որ Վճռաբեկ դատարանի դատավորին ընտրում է Ազգային ժողովը: Նա իր ելույթից հետո դուրս եկավ դահլիճից, ինչն անհարգալից վերաբերմունք դիտարկեց «Քաղաքացիական պայմանագիր» խմբակցության ղեկավար Հայկ Կոնջորյանը: Վերջինս նշեց, որ թեկնածուն դեռ պետք է եզրափակիչ ելույթ ունենար ԱԺ ամբիոնից: Շարունակությունը` hetq.am-ում

16:48 - 20 դեկտեմբերի, 2022

Դատարան ուղարկելուց մեկ տարի անց Խաչատուր Սուքիասյանի եղբոր՝ Ռոբերտ Սուքիասյանի գործով միայն նյութեր են հետազոտվել |factor.am|

factor.am: Ազգային ժողովի «Քաղաքացիական պայմանագիր» խմբակցության պատգամավոր Խաչատուր Սուքիասյանի եղբայրը՝ Ռոբերտ Սուքիասյանը, դատարանում ընդունել է, որ կատարել է իրեն վերագրվող գործողությունները, բայց իր արարքի քրեաիրավական որակման հետ համաձայն չէ, պնդում է, որ խուլիգանություն չի կատարել։ Այս մասին ասաց Ռոբերտ Սուքիասյանի պաշտպան Գոռ Միքայելյանը։ Հիշեցնենք, որ 2021 թվականի հուլիսի 18-ին, Երևանի կենտրոնում՝ Ամիրյան 18 հասցեում, մի քանի մարդ վիճաբանել, հարվածներ էին հասցրել իրար, նաև կրակոցներ էին հնչել։ Դեպքի առթիվ քրեական գործ էր հարուցվել, որով մեղադրյալի կարգավիճակ էր ստացել նաև Ռոբերտ Սուքիասյանը։ Ամիսներ անց 2021 թվականի նոյեմբերի 8-ին գործն ուղարկվել էր դատարան, սակայն ավելի քան մեկ տարվա քննության ընթացքում դատարանը՝ նախագահությամբ դատավոր Կարեն Ֆարխոյանի, դեռևս գործի նյութերն է հետազոտում, վկաներ, տուժող կամ մեղադրյալ չի հարցաքննվել։ «Դատալեքս» դատական-տեղեկատվական համակարգում Սուքիասյանի խափանման միջոցի հարցի քննության վերաբերյալ դատական ակտերից մեկում որոշ մանրամասներ են ներկայացված, որոնք, ըստ գործի, տեղի են ունեցել Ամիրյան փողոցում։ Ըստ մեղադրանքի՝ Ռոբերտ Սուքիասյանը 2021 թվականի հուլիսի 18-ին մի խումբ անձանց հետ, զենքի գործադրմամբ, հասարակության նկատմամբ բացահայտ անհարգալից վերաբերմունք դրսևորելով, խուլիգանական մղումներով, հասարակության և բարոյականության նորմերի նկատմամբ անթաքույց արհամարհանքի հողի վրա, հասարակական վայրում ուղղակի դիտավորությամբ կատարել է խուլիգանություն: Մասնավորապես՝ ըստ քրեական գործի՝ Նարեկ Կարապետյանն Արման Ապիյանի կնոջը՝ Ալինա Ապիյանին ավտոմեքենաների երթևեկի ընթացքում ձայնային ազդանշան է տվել և վիրավորել, որի շուրջ պարզաբանումներ ստանալու նպատակով, Արման Ապիյանն իր մտերիմների՝ Վարազդատ Գասպարյանի, Սարգիս Աբգարյանի, Սուրեն Հակոբյանի և Գասպարյանի վարորդ Հայկ Ասատրյանի հետ, 2021 թ.-ի հուլիսի 18-ին, ժամը 19:23-ի սահմաններում, Նար-Դոս փողոցից ժամանել են Ամիրյան փողոց, որտեղ, պարզելով կնոջ հետ վիճաբանած Նարեկ Կարապետյանի հեռախոսահամարը և հեռախոսազրույց ունենալով նրա հետ՝ րոպեներ անց շենքի դիմաց հանդիպել են վերջինիս և նրա քրոջ ամուսնուն՝ Հարութ Հաբգարյանին: Ալինա Ապիյանին վիրավորելու վերաբերյալ վերջիններիս միջև ծավալված խոսակցությունը հետաձգելու և հետագայում հանդիպելու Նարեկ Կարապետյանի առաջարկը Սարգիս Աբգարյանը մերժել է, որից անմիջապես հետո զրույցը վերածվել է վիճաբանության, ապա ծեծկռտուքի, որին քիչ անց՝ ժամը 19:30-ին, միացել է նաև Արման Ապիյանի մտերիմ Ռոբերտ Սուքիասյանը: Մասնավորապես՝ Ռոբերտ Սուքիասյանը, տեսնելով Արման Ապիյանի և Սարգիս Աբգարյանի խուլիգանական գործողությունները, դրանք շարունակելու և փոխլրացնելու դիտավորությամբ, իր անձի առավելությունն ընդգծելու մոլուցքով տարված, մոտեցել է Նարեկ Կարապետյանին, նախ գլխով, ապա՝ բռունցքով, հարվածել վերջինիս դեմքին, որից հետո սեփական անձը վեր դասելով հասարակության մեջ ընդունված և համընդհանուր ճանաչում ստացած բարոյական և իրավական նորմերից, դրանց նկատմամբ ցուցաբերելով անթաքույց արհամարհանք՝ հանել ու ցուցադրաբար լիցքավորել է գոտկատեղի հատվածում կրած, օրինական հիմունքներով իրեն պատկանող մարտական ատրճանակը, որից հետո նշված ատրճանակից 2 կրակոց է արձակել Նարեկ Կարապետյանի ոտքերի ուղղությամբ՝ գետնին, որի հետևանքով շրջակայքում գտնվող անձանց մոտ առաջացրել է վախի մթնոլորտ և իրենց իրավունքների պաշտպանության հետ կապված սպառնալիքի վիճակ։ Այնուհետև, ըստ մեղադրանքի, Ռոբերտ Սուքիասյանը իր մոտ եղած ատրճանակով կրակոց է արձակել Հարութ Հաբգարյանի ուղղությամբ՝ պատճառելով աջ սրունքի շրջանի հրազենային, գնդակային, միջանցիկ վիրավորման ձևով վնասվածք, որը վերջինիս առողջությանը պատճառել է միջին ծանրության վնաս՝ առողջության տևական քայքայումով: Գործում նշվում է, որ Ռոբերտ Սուքիասյանի՝ նկարագրված արարքն ականատեսների մոտ առաջացրել է զայրույթ, վրդովմունք, խուճապ, ինչպես նաև լուրջ վախի զգացում իրենց առողջության և գույքի պահպանության կապակցությամբ, էականորեն խաթարվել է նաև տվյալ տարածքում գործող օբյեկտների աշխատանքը՝ անհարմարություն և լուրջ անհանգստություն պատճառելով հարակից շենքերի բնակիչներին և պատահական անցորդներին: Շարունակությունը՝ factor.am-ում

16:42 - 08 դեկտեմբերի, 2022