Բողոքի ակցիաներ Երեւանում 2023-ի աշնանը

2023թ․ սեպտեմբերի 19-ին Ադրբեջանը հարձակվել է Արցախի վրա։ Հաջորդ օրը Արցախի իշխանություններն ընդունել են ռուսական խաղաղապահ զորակազմի հրամանատարության առաջարկությունը կրակի դադարեցման վերաբերյալ՝ համաձայնելով ադրբեջանական կողմի պահանջներին։

Ադրբեջանական ագրեսիայի առաջին օրվանից Երեւանում սկսվել են բողոքի ակցիաներ։ Օրեր շարունակ ցուցարարների տարբեր խմբեր փակում են Երեւանի տարբեր փողոցներ, հանրահավաք-քննարկումներ են տեղի ունենում հանրային վայրերում։ Ձեւավորվել են մի քանի շարժումներ՝ Անդրանիկ Թեւանյանի, Վազգեն Մանուկյանի եւ ընդդիմադիր այլ գործիչների նախաձեռնությամբ՝ «Ազգային կոմիտե», Սուրեն Սահակյանի, Միքայել Նահապետյանի եւ այլ քաղաքացիների նախաձեռնությամբ՝ «Արժանապատվության շարժում», «Ազատազէն» ՌՀԿ նախաձեռնությամբ՝ «Հայաստանի սուվերենության շարժում»։ Քաղաքի տարբեր կետերում ակցիաներ են իրականացնում «Ժողովրդավարական համախմբում», «Ազգային ժողովրդավարական բեւեռ» կուսակցությունները, քաղաքացիների տարբեր խմբեր հավաքվում են պետական ու կառավարական շենքերի, այդ թվում ՌԴ դեսպանատան մոտ, ուսանողները դասադուլներ են իրականացնում։

Տարբեր ժամերի ու տարբեր հատվածներում իրավիճակը պարբերաբար լարվել է, ՀՀ ՆԳՆ ոստիկանությունը բերման է ենթարկել ակցիաների ու հանրահավքների հարյուրավոր մասնակիցների։ Կառավարության շենքը հանրահավքների ժամանակ շրջապատել են վահաններով զինված մեծաթիվ ոստիկաններ։ Նրանց ու ցուցարարների միջեւ երբեմն բախումներ են եղել, որոշ անձինք տարբեր առարկաներ են նետել ոստիկանության ծառայողների ուղղությամբ։ Ոստիկանությունն էլ իր հերթին որոշ դեպքերում ուժ է կիրառել, Հանրապետության հրապարակում բազմամարդ ու լարված բողոքի ակցիայի ժամանակ սեպտեմբերի 19-ին իրավապահները նաեւ հատուկ միջոցներ են կիրառել, որի հետեւանքով ակցիայի մասնակից անձինք են վիրավորվել։

100.000 հայը հրապարակում կարող է ստիպել, որ ՀՀ-ն նորից տեր կանգնի արցախցուն. մեկնարկել են ի պաշտպանություն արցախահայերի ակցիաները |aravot.am|

aravot.am: «Արցա՜խ, Արցա՜խ» վանկարկելով՝ քիչ առաջ Երեւանի կենտրոնից քաղաքացիները սկսեցին համախմբման ակցիաներն՝ ի պաշտպանություն արցախահայերի: Այսօր ակցիաներն ավելի տեղեկատվական բնույթ ունեն, երիտասարդները քաղաքացիներին տեղեկացնում են Արցախում ստեղծված իրավիճակի ու դրան չարձագանքելու կամ անտարբեր մնալու հետեւանքների մասին: «Արցախում հայ ժողովրդի պատասխանատուն եղել է ՀՀ-ն ու հայկական բանակը, բայց այս իշխանությունների ձեռամբ, նրանց շարունակական դավաճանության հետեւանքով այսօր ՀՀ-ն հրաժարվել է Արցախից ու հայ ժողովրդին դեմ է տվել ցեղասպանության ու հրաժարվում է արցախցուց: Հիմա մտածում եք՝ ինչ կարող եք փոխել: 100.000 հայը հրապարակում կարող է ստիպել, որ ՀՀ-ն նորից տեր կանգնի արցախցուն, Արցախին, ոչ թե ամեն օր թշնամու՝ Էրդողանի ու Ալիեւի նոր պայմանների առաջ գլուխ ծռի: Դուրս եկեք պայքարի, ցեղասպանության դիտորդ մի՛ եղեք: Արցախը հանձնողը Երեւանն էլ է հանձնելու, Սյունիքն ու Տավուշն էլ է հանձնելու: Կա՛մ այսօր կմիավորվեք, կկարողանանք մի փոքր գործ անել, բան փոխել, կա՛մ մեր ամբողջ կյանքում ցեղասպանությունը հանդուրժած ազգի խարանով կապրենք: Թշնամին ամեն օր բացահայտ այս իշխանության գլուխն է շոյում, շնորհակալություն հայտնում, Ալիեւն ու Էրդողանն ամեն օր Նիկոլին շնորհակալություն են հայտնում, ասում են՝ կեցցես, որ մեր շահն ես սպասարկում: Թշնամու շահը սպասարկողը չի կարող ինչ-որ պահի փոխվել ու հայկական շահ սպասարկել: Արցախում ծնված հային Երեւանում, Գյումրիում ծնված հայից տարբերողը չի կարող հայկական պետության ղեկավար լինել: Արցախում իրավիճակ փոխելու մի տարբերակ կա՝ ՀՀ իշխանությունը նորից պետք է վեր լինի հայ ժողովրդի իրավունքներից, ինչպես 30 տարի Արցախի ինքնիշխանության համար ՀՀ-ն է երաշխավոր եղել, արցախցու անվտանգության համար ՀՀ-ն է երաշխավոր եղել, նորից պետք է լինի: Ո՛չ ռուսն է մեզ փրկելու, ո՛չ ֆրանսիացին, ո՛չ էլ պարտավոր են փրկել, եթե անտարբեր նայում ենք, ոնց են մեր քույրերին ու եղբայրներին սպանում Մարտակերտում, Ստեփանակերտում ու Ասկերանում»,- քաղաքացիներին տեղեկացնում էին ակցիայի մասնակիցները: Լուսանկարը՝ 22․09․2023/Երևան

13:50 - 23 սեպտեմբերի, 2023

Բողոքի ակցիաների ընթացքում ոստիկանների գործողությունների կապակցությամբ ծառայողական քննություններ են նշանակվել |factor.am|

factor.am: Վերջին օրերին Երևանում տեղի ունեցած բողոքի ակցիաների ընթացքում ոստիկանության գործողությունների առնչությամբ կան նշանակված ծառայողական քննություններ: Այս մասին Factor.am-ի հարցին ի պատախսան հայտնեցին ՆԳՆ ոստիկանության լրատվական ծառայությունից` հավելելով, որ կան նաև ծառայողական ուսումնասիրություններ, որոնց վերաբերյալ տեղեկատվություն կտրամադրվի ավելի ուշ: Հիշեցնենք, որ սեպտեմբերի 20-ից Երևանում մեկնարկել են բողոքի գործողություններ` կապված Արցախում ստեղծված իրավիճակի հետ: Քաղաքացիները, որոնք առավոտյան ժամերին փակում են մայրաքաղաքի փողոցներն իսկ երեկոյան` հավաքվում Հանրապետության հրապարակում, պահանջում են Նիկոլ Փաշինյանին հրաժարականը, ապահովել Արցախում գտնվող անձանց անվտանգությունը: Այս բողոքի գործողությունների ընթացքում բազմաթիվ քաղաքացիներ են բերման ենթարկվել: Համացանցում առկա են ոստիկանների կողմից նրանց նկատմամբ բռնություն գործադրելու տեսանյութեր:

13:46 - 23 սեպտեմբերի, 2023

Զանգվածային ակցիաների մեկ մասնակից ձերբակալվել է՝ համակարգչային ակումբի գույքը վնասելու և ոստիկանի օրինական ծառայողական գործունեությանը միջամտելու կասկածանքով

2023 թվականի սեպտեմբերի 22-ին քաղաքացուց Ոստիկանություն հաղորդում է ստացվել այն մասին, որ Երևան քաղաքի Ամիրյան-Զաքյան փողոցների խաչմերուկի հատվածում մի քանի անձինք, խանութների տեսախցիկների լույսերը վնասելով, գնում են։ Ահազանգի հիման վրա դեպքի վայր են մեկնել ոստիկանության ծառայողները: Նկատելով նրանց՝ թվով 5 անձինք դիմել են փախուստի, որի ժամանակ նրանցից մեկը շրջվել և մեկ անգամ հարվածել է ոստիկանության ծառայողի դեմքին։ Փախուստի դիմող անձանցից մեկը նույնպես մոտեցել և կրկին հարվածել է ոստիկանության ծառայողին՝ պատճառելով ֆիզիկական ցավ և դիմել փախուստի: Ոստիկանին հաջողվել է բռնել նրանցից մեկին, ով տեղափոխվել է Ոստիկանություն։ Դեպքի առթիվ ՀՀ քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական առաջին բաժնում նախաձեռնվել են քրեական վարույթներ՝ ՀՀ քրեական օրենսգրքի 452-րդ հոդվածի 3-րդ մասով և 264-րդ հոդվածի 2-րդ մասի 5-րդ կետով, որոնք, վարույթն իրականացնող մարմնի որոշմամբ, միացվել են մեկ վարույթում: Ձեռնարկված միջոցառումների արդյունքում պարզվել է ենթադրյալ հանցագործությունը կատարած անձանցից մեկի ինքնությունը, ով Երևանի բնակիչ է: Վերջինս ձերբակալվել է՝ անմիջականորեն ծագած հիմնավոր կասկածի հիմքով և տվել խոստովանական ցուցմունք՝ հայտնելով, որ մասնակցել է Հանրապետության հրապարակում կազմակերպված զանգվածային հավաքին և, 5 անձանց հետ գնալով Ամիրյան-Զաքյան փողոցների խաչմերուկի հատված, ձեռքով պոկել է այնտեղ գործող համակարգչային ակումբի արտաքին պատին ամրացված թվով 2 տեսանկարահանող սարքի օբյեկտիվների էլեկտրական սնուցման լարերը: Կատարվում են անհրաժեշտ քննչական և վարութային այլ գործողություններ՝ դեպքի բոլոր հանգամանքները պարզելու ուղղությամբ։ Նշանակվել են դատաբժշկական և դատաապրանքագիտական փորձաքննություններ։ Ձեռնարկվում են միջոցառումներ՝ ենթադրյալ հանցագործությունը կատարած մյուս անձանց հայտնաբերելու և վարույթն իրականացնող մարմին ներկայացնելու ուղղությամբ: Նախաքննությունը շարունակվում է: Ծանուցում. Հանցանքի համար մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

13:42 - 23 սեպտեմբերի, 2023