Վլադիմիր Պուտին

Ռուսաստանի Դաշնության գործող նախագահ։ Ծնվել է 1952թ. հոկտեմբերի 7-ին։ 1975-1991թթ․ ծառայել է ՊԱԿ-ում (КГБ), զբաղեցրել հետախուզական պաշտոններ։ 1991թ. ըստ պաշտոնական տեղեկատվության սեփական զեկուցագրով զորացրվել է ՊԱԿ-ից։ 1990-1995թթ. զբաղեցրել է Լենինգրադի քաղաքային իշխանության տարբեր պաշտոններ։ 1996-1998թթ․ արագ վերելք է գրանցել Կրեմլի տարբեր պաշտոններում՝ ի վերջո ստանձնելով Նախագահի աշխատակազմի ղեկավարի տեղակալի պաշտոնը։ 1998-ին նշանակվում է ԱԴԾ (ФСБ) տնօրեն։

1999-ի օգոստոսին ընդունելով նախագահ Ելցինի առաջարկը ստանձնել է ՌԴ վարչապետի պաշտոնը։ 1999-ի դեկտեմբերի 31-ին հրաժարական տվեց Ելցինը եւ Պուտինը դարձավ նախագահի պաշտոնակատար։ 2000թ․ մարտին ընտրվեց նախագահ եւ պաշտոնավարեց առավելագույն երկու ժամկետով։ 2008-ին՝ վարչապետ Մեդվեդեւի նախագահ ընտրվելուց հետո Պուտինը ստանձնեց Վարչապետի պաշտոնը։ Այս դրվագը հանրային լայն շրջանակներում ընկալվեց որպես «փոխատեղում»։ 2012-ից ի վեր Պուտինը նորից նախագահի պաշտոնում է։

Էրդողանը հույս է հայտնել, որ Պուտինի հետ բանակցություններից հետո սիրիական Իդլիբում հնարավոր կլինի խաղաղության հասնել |tert.am|

tert.am: Թուրքիայի նախագահ Ռեջեփ Թայիփ Էրդողանը հայտարարել է` հույս ունի, որ մարտի 5-ին իր ռուս գործընկեր Վլադիմիր Պուտինի հետ բանակցություններից հետո սիրիական Իդլիբում հնարավոր կլինի հաշտության հասնել, հայտնում է «ՌԻԱ Նովոստի» գործակալությունը:«Հինգշաբթի օրը Պուտինի հետ կքննարկենք Իդլիբում տեղի ունեցող իրադարձությունները: Հույս ունեմ, որ մեր զրույցի արդյունքներով հնարավոր կլինի խաղաղության հասնել»,- նշել է Էրդողանը Անկարայում ունեցած ելույթի ժամանակ:Սիրիայում իրավիճակը սրվել է փետրվարի 27-ին, երբ թուրքական բանակը սկսել է ցամաքային և օդային հարվածներ հասցնել սիրիական բանակի դիրքերի ուղղությամբ: Իրավիճակն Իդլիբում շարունակում է ծայրահեղ լարված մնալ:

18:14 - 02 մարտի, 2020

Էրդողանն ու Պուտինը կհանդիպեն մարտի սկզբին. Իդլիբում արդեն 16 թուրք զինվոր է զոհվել |azatutyun.am|

azatutyun.am: Թուրքիայի նախագահը երեկ հայտարարել է, թե մարտի 5-ին հանդիպելու է Ռուսաստանի առաջնորդ Վլադիմիր Պուտինին` քննարկելու Իդլիբում ստեղծված իրավիճակը, ուր այժմ երկու երկրների զինված ուժերը փաստացի միմյանց դեմ են դուրս եկել` պաշտպանելով հակադիր ճամբարների: Սիրիայի կառավարական բանակը` ռուսների աջակցությամբ, տարեսկզբից պայքարում է Իդլիբը գրավելու համար, որը ընդդիմության վերահսկողության տակ մնացած վերջին խոշոր բնակավայրն է: Թուրքիան, իր հերթին, աջակցում է Ասադի ընդդիմադիրներին: Երեկ, երբ Ասադի զորքերը` ռուսների օգնությամբ, փորձել են առաջ տանել դիրքերը, թուրքական բանակը ևս մեկ զինվոր է կորցրել: Ընդհանուր առմամբ, տարեսկզբից Իդլիբի շուրջ շարունակվող մարտերում թուրքական բանակի 16 զինվոր է զոհվել, ավելի քան մեկ տասնյակը` վիրավորվել: Էրդողանն ավելի վաղ պնդել էր, թե վրեժխնդիր են լինելու կորուստների համար, երեկ էլ պնդել է` Պուտինի հետ հեռախոսազրույցում կրկնել է իր դիրքորոշումը: Մարտին նախատեսված հանդիպմանը ներկա կլինեն նաև Ֆրանսիայի ու Գերմանիայի առաջնորդները:

16:13 - 23 փետրվարի, 2020

Պուտինն ու Էրդողանը համաձայնության չեն եկել |azatutyun.am|

azatutyun.am: Ռուսաստանի և Թուրքիայի նախագահները երեկվա հեռախոսազրույցում համաձայնության չեն եկել սիրիական Իդլիբի շուրջ, որտեղ նախօրեին փաստացի միմյանց դեմ էին դուրս եկել՝ պաշտպանելով հակադիր ճամբարների: Անկարան աջակցում է ընդդիմադիրներին, Մոսկվան՝ Սիրիայի նախագահ Ասադին, ով մի քանի շաբաթ է՝ կատաղի մարտեր է մղում ընդդիմության վերահսկողության տակ մնացած վերջին խոշոր բնակավայրը՝ Իդլիբը գրավելու համար: Ըստ պաշտոնական հաղորդագրությունների, Ռեջեփ Էրդողանը երեկ կրկին հորդորել է Պուտինին «զսպել Ասադի առաջխաղացումը», Պուտինն իր հերթին պնդել է՝ թիրախում ահաբեկչական խմբավորումներն են, ինչպես նաև ընդգծել «Սիրիայի տարածքային ամբողջականությունն ու ինքնիշխանությունը հարգելու անհրաժեշտությունը»: Երեկվա մարտերում թուրքական բանակը երկու զինվոր է կորցրել, ևս հինգը վիրավոր են: Ավելի վաղ նախագահ Էրդողանը սպառնացել էր վրեժխնդիր լինել սեփական զինվորների ու դաշնակիցների համար, անկախ այն հանգամանքից՝ ով կլինի հարձակման հեղինակը:

15:51 - 22 փետրվարի, 2020

«Մենք շատ մտերմիկ հարաբերություններ ունենք». Պուտինը պատմել է, որ Մեդվեդևի հետ նախապես քննարկել է կառավարության հրաժարականը |tert.am|

tert.am: Ռուսաստանի նախագահ Վլադիմիր Պուտինը պատմել է, որ ՌԴ վարչապետ Դմիտրի Մեդվեդևի հետ նախապես քննարկել է իր կառավարության հրաժարականը: «Մենք Դմիտրի Անատոլևիչի հետ շատ մտերմիկ ու ընկերական հարաբերություններ ունենք. միմյանցից գաղտնիքներ չունենք: Այդ է պատճառը, որ այդ հարցը քննարկեցինք նրա հետ»,- հայտարարել է ՌԴ նախագահը՝ «20 հարց Վլադիմիր Պուտինին» նախագծի համար «ՏԱՍՍ»-ին տված հարցազրույցում: «Նախապես քննարկել ենք, և Մեդվեդևը տեղյակ էր՝ ինչ է կատարվում»,- ընդգծել է Պուտինը: Նախագահը չի համաձայնել այն ձևակերպման հետ, որ կառավարության հրաժարականը աննախադեպ գործողություն էր, հրաժարվել է նաև հստակեցնել, թե բացի իրենից և Մեդվեդևից, ով է տեղյակ եղել իրենց ծրագրերի մասին և երբ է ընդունվել համապատասխան որոշումը: Մեկնաբանելով իր զրուցակից, ՏԱՍՍ-ի լրագրողի խոսքերն առ այն, որ հունվարյան փոփոխությունները կառավարությունում շտապողականության զգացողություն են առաջացնում, Պուտինը հարցրել է. «Ի՞նչ իմաստ կա նման հարցեր տալու, դրանից ի՞նչ կփոխվի»: «Լավ կլինե՞ր, եթե կառավարությունը հրաժարական տար, իսկ հետո կես տարի ձևավորվեր: Պատկերացնո՞ւմ եք, ինչ կկատարվեր երկրում»,- հավելել է նախագահը: Նրա խոսքով՝ «Ռուսաստանը Բելգիան չէ, որ կարողանա մի ամբողջ տարի առանց կառավարության մնալ»:

09:53 - 20 փետրվարի, 2020

Պուտինն ու Էրդողանն այսօր հեռախոսազրույց են ունեցել |azatutyun.am|

azatutyun.am: Ռուսաստանի և Թուրքիայի նախագահներ Վլադիմիր Պուտինն ու Ռեջեփ Էրդողանն այսօր հեռախոսազրույց են ունեցել՝ քննարկելով Սիրիայի Իդլիբ նահանգի իրավիճակը: Այս մասին հայտնել է Կրեմլի մամուլի ծառայությունը: Թուրքիայի նախագահը հեռախոսազրույցի մասին ասել է, թե ռուս-թուրքական պատվիրակությունների հանդիպումների պայմանավորվածություն է ձեռք բերվել: Երկու կողմի զինվորականների պատվիրակությունները կհանդիպեն Թուրքիայում, իսկ դիվանագետների, պաշտպանության և հետախուզության ոլորտների ներկայացուցիչների պատվիրակությունը բանակցություններ կվարի Մոսկվայում: Սիրիայի Իդլիբ նահանգում Բաշար ալ-Ասադի կառավարական զորքերի և զինված ընդդիմության միջև մարտերը շարունակվում են: Մոսկվան ու Անկարան աջակցում են հակադիր կողմերին:

17:36 - 12 փետրվարի, 2020

Ռուսաստանի նախագահը Սահմանադրության փոփոխություններ է առաջարկում |azatutyun.am|

azatutyun.am: Ռուսաստանի նախագահ Վլադիմիր Պուտինը Դաշնային ժողովին ուղղված իր ամենամյա ուղերձում առաջարկել է փոփոխություններ կատարել Սահմանադրությունում, մասնավորապես՝ վերացնել նախագահության երկու ժամկետի մասին ձևակերպումը: ՌԴ Սահմանադրությամբ բացառվում է երկրի նախագահի պաշտոնում նույն անձի՝ անընդմեջ երրորդ անգամ առաջադրվելու հնարավորությունը: Վլադիմիր Պուտինը Ռուսաստանի նախագահի պաշտոնը առաջին անգամ ստանձնել է 2000 թվականին, երկու ժամկետ պաշտոնավարելուց հետո նա անցել է կառավարություն՝ ստանձնելով վարչապետի պաշտոնը, ապա Դմիտրի Մեդվեդևի նախագահության ժամկետը լրանալուց հետո ՝ 2012 թվականին կրկին դարձել է նախագահ: Կրեմլի ղեկավարի արդեն 4-րդ պաշտոնավարման ժամկետը կսպառվի 2024 թվականին։

11:04 - 15 հունվարի, 2020

Պուտինը ցավակցել է Զելենսկուն և Ռոհանիին՝ Boeing 737-ի վթարի կապակցությամբ |aysor.am|

aysor.am։ Ռուսաստանի նախագահ Վլադիմիր Պուտինը ցավակցական հեռագրեր է հղել Ուկրաինայի նախագահ Վլադիմիր Զելենսկուն և Իրանի նախագահ Հասան Ռոհանիին՝ Թեհրանի մերձակայքում ուկրաինական ուղևորատար ինքնաթիռի վթարի կապակցությամբ, հայտնում է Կրեմլի մամուլի ծառայությունը: Ավելի վաղ հարորդվել էր, որ ուկրաինական ինքնաթիռը, որում 167 ուղևոր է եղել, կործանվել է Թեհրանի «Իմամ Հոմեյնիի» անվան միջազգային օդանավակայանի մոտ թռիչքից անմիջապես հետո։ Ինչպես փոխանցում է «Tasnim» գործակալությունը՝ Boeing 737-ը կործանվել է «տեխնիկական խնդիրների» պատճառով։

10:43 - 08 հունվարի, 2020

Պուտինը շնորհակալություն է հայտնել Թրամփին` ՌԴ-ում ահաբեկչական գործողությունը կանխելու հարցում ԱՄՆ-ի տրամադրած օգնության համար |tert.am|

tert.am: ՌԴ նախագահ Վլադիմիր Պուտինը հեռախոսազրույց է ունեցել ԱՄՆ նախագահ Դոնալդ Թրամփի հետ, հայտնում է «ՌԻԱ Նովոստի» գործակալությունը` հղում տալով Կրեմլի տարածած հայտարարությանը: Հեռախոսազրույցը տեղի է ունեցել Մոսկվայի նախաձեռնությամբ: Պետության ղեկավարը շնորհակալություն է հայտնել զրուցակցին հատուկ ծառայությունների միջոցով փոխանցված տեղեկատվության համար, որի օգնությամբ հնարավոր է եղել Ռուսաստանում ահաբեկչական հարձակումներ կանխել: Բացի այդ, համաշխարհային առաջնորդները քննարկել են փոխադարձ հետաքրքրություն ներկայացնող մի շարք հարցեր, ինչպես նաև պայմանավորվել են շարունակել համագործակցությունն ահաբեկչության դեմ պայքարում: Ուրբաթ Ռուսաստանի Դաշնության Անվտանգության դաշնային ծառայությունը ձերբակալել է երկու ռուսաստանցու, որոնք մտադիր են եղել Սանկտ Պետերբուրգում Նոր տարվա ընթացքում մարդաշատ վայրերում ահաբեկչություն իրականացնել:

07:37 - 30 դեկտեմբերի, 2019

Վլադիմիր Պուտինը շնորհավորական ուղերձ է հղել Նիկոլ Փաշինյանին՝ Ամանորի և Սուրբ Ծնունդի առթիվ

Ռուսաստանի Դաշնության նախագահ Վլադիմիր Պուտինը շնորհավորական ուղերձ է հղել վարչապետ Նիկոլ Փաշինյանին՝ գալիք Ամանորի և Սուրբ Ծննդյան տոների կապակցությամբ: Ուղերձում, մասնավորապես, ասված է. «Հարգելի Նիկոլ Վլադիմիրի Սրտանց շնորհավորում եմ Ձեզ Ամանորի և Սուրբ Ծննդյան տոների կապակցությամբ: Մենք բարձր ենք գնահատում Հայաստանի հետ հարաբերությունները, որոնք հիմնված են բարեկամության և հոգևոր մտերմության դարավոր ավանդույթների վրա: Ակնկալում եմ, որ հաջորդ տարի մենք կշարունակենք համատեղ աշխատանքը ռուս-հայկական դաշնակցային կապերի և ամենատարբեր ոլորտներում կառուցողական համագործակցության, ինչպես նաև եվրասիական ինտեգրացիոն գործընթացների շրջանակում փոխգործակցության զարգացման ուղղությամբ: Դա, իհարկե, համապատասխանում է մեր եղբայրական ժողովուրդների հիմնարար շահերին: Մաղթում եմ Ձեզ, Ձեր ընտանիքին և մերձավորներին քաջառողջություն, երջանկություն և հաջողություն, իսկ Հայաստանի բոլոր քաղաքացիներին՝ խաղաղություն և բարգավաճում»:

07:01 - 28 դեկտեմբերի, 2019

Վլադիմիր Պուտինը բացել Է Կերչի նեղուցով Ղրիմի կամրջի երկաթուղային մասի երթեւեկությունը |armenpress.am|

armenpress.am: ՌԴ-ի նախագահ Վլադիմիր Պուտինը բացել Է Կերչի նեղուցով Ղրիմի կամրջի երկաթուղային մասի երթեւեկությունը: Հայտնել Է ՌԻԱ Նովոստին: Թամանում կայացած հանդիսավոր արարողությանը պետության ղեկավարը մեկնումի հրաման տվեց, եւ Ղրիմ ուղեւորվող առաջին գնացքը Սանկտ Պետերբուրգի Մոսկովսկի կայարանից շարժվեց Սեւաստոպոլ: «Տավրիա» անվանումը կրող շարժակազմը մեկնեց դեկտեմբերի 23-ին ժամը 14:00-ին եւ թերակղզի կժամանի դեկտեմբերի 25-ի ժամը 09:25-ին: Այսպիսով, գնացքը ճանապարհին կգտնվի 43 ժամ 25 րոպե: Կերչի նեղուցով կամրջի երկարությունը 19 կիլոմետր Է, այն դարձել Է ամենաերկար կամուրջը Ռուսաստանում: Կամուրջը կառուցվել Է դաշնային բյուջեի հաշվին, դրա ընդհանուր արժեքը կազմել Է գրեթե 228 միլիարդ ռուբլի: Կամրջի ավտոմոբիլային մասը բացվել Է 2018 թվականի մայիսի 15-ին, մարդատար ավտոմեքենաների եւ ավտոբուսների երթեւեկությունը գործարկվել Է հաջորդ օրը:

12:55 - 23 դեկտեմբերի, 2019

Պուտինը WADA-ի որոշումը արբիտրաժային դատարանում բողոքարկելու հիմք է տեսնում |azatutyun.am|

azatutyun.am: Փարիզում «Նորմանդյան ձևաչափով» բանակցություններին հաջորդած ասուլիսի ընթացքում Ռուսաստանի նախագահ Վլադիմիր Պուտինը մեկնաբանել է Համաշխարհային հակադոպինգային գործակալության (WADA) գործադիր կոմիտեի որոշումը, որով Ռուսաստանը չորս տարով զրկվել է միջազգային մրցումներին մասնակցելու իրավունքից: Պուտինը այդ որոշումն անվանել է օլիմպիական կանոնադրությանը հակասող, քանի որ WADA-ի գործադիր կոմիտեի կողմից կիրառված պատիժը «կոլեկտիվ բնույթ» ունի, իսկ դա արգելվում է կանոնադրությամբ: Ըստ այդմ, Ռուսաստանի նախագահը հիմք է տեսնում WADA-ի որոշումը բողոքարկելու Սպորտի արբիտրաժային դատարանում:

07:30 - 10 դեկտեմբերի, 2019

Վլադիմիր Պուտինը հրաման է ստորագրել, որով թույլատրվում է անկախ լրագրողներին ճանաչել որպես օտարերկրյա գործակալներ |aliq.ge|

11:21 - 03 դեկտեմբերի, 2019

Հունվարին պլանավորվում Է Պուտինը այցը Թուրքիա՝ գործարկելու «Թուրքական հոսքը» |armenpress.am|

armenpress.am: Ռուսաստանի նախագահ Վլադիմիր Պուտինը 2020 թվականի հունվարի առաջին տասնօրյակում կարող Է այցելել Թուրքիա: Այդ մասին, ինչպես հաղորդել Է ՏԱՍՍ-ը, հայտարարել Է ռուսական պետության ղեկավարի մամուլի քարտուղար Դմիտրի Պեսկովը:«Վերջերս կայացած հեռախոսազրույցներից մեկի ընթացքում Պուտինը եւ Էրդողանը պայմանավորվել են, որ 2020 թվականի հունվարի առաջին տասնօրյակում Թուրքիայում պատրաստ կլինի «Թուրքական հոսքի» ցամաքային մասը, եւ խոսվել Է այն մասին, որ, հնարավոր Է, կայանա նախագահ Պուտինի այցը Թուրքիա: Այդ ուղեւորությունը նախապատրաստվում Է»,-ասել Է նա:Կրեմլի ներկայացուցիչը չի նշել այցի կոնկրետ ամսաթիվը՝ խոստանալով ժամանակին տրամադրել այդ տեղեկատվությունը:«Թուրքական հոսք» գազամուղի թողունակությունը կկազմի տարեկան 31,54 մլրդ խորանարդ մետր գազ: Էներգիայի այդ ծավալը բավարար Է 15 մլն միջին տնատիրությունների կենցաղային պահանջմունքներն ապահովելու համար:930 կիլոմետր երկարությամբ խողովակաշարը Ռուսաստանի տարածքից Սեւ ծովի հատակով ձգվում Է մինչեւ Թուրքիայի ծովափ: Այնուհետեւ կկառուցվի գազատարի ցամաքային տարանցիկ ճյուղը մինչեւ հարեւան երկրների հետ Թուրքիայի սահմանը:Յուրաքանչյուր ճյուղի հզորությունը տարեկան 15,75 մլրդ խորանարդ մետր Է: Գազի առաջին մատակարարումները պլանավորված են 2019 թվականի վերջին:

12:09 - 25 նոյեմբերի, 2019

Պուտինը 99%-ով 2024 թվականին կհեռանա նախագահի պաշտոնից. Պուտինի խորհրդական |lragir.am|

lragir.am։ Ռուսաստանի նախագահ Վլադիմիր Պուտինի խորհրդական Վալենտին Յումաշևը վստահություն է հայտնել, որ 2024 թվականին Պուտինը կլքի նախագահի պաշտոնը: Այս մասին նա ասել է Վլադիմիր Պոզներին տված հարցազրույցում: «Կարծում եմ, որ եթե Վլադիմիր Վլադիմիրովիչին հարցնեք այսօր, 99%-ով վստահ եմ՝ կասի, որ 2024 թվականին հեռանում է», – ասել է Յումաշևը: Վալենտին Յումաշևը 1997-1998 թվականներին եղել է Բորիս Ելցինի աշխատակազմի ղեկավարը: Ներկայում նա Պուտինի խորհրդականն է հասարակական հիմունքներով:

10:57 - 23 նոյեմբերի, 2019

Պուտինը Մեհրիբան Ալիևային պարգևատրել է Բարեկամության շքանշանով |tert.am|

tert.am: ՌԴ նախագահ Վլադիմիր Պուտինն Ադրբեջանի առաջին տիկին Մեհրիբան Ալիևային Բարեկամության շքանշան է հանձնել՝ ռուս-ադրբեջանական հարաբերությունների զարգացման և ամրապնդման գործում ունեցած վաստակի համար: Այս մասին գրում է ria.ru-ն։ «Ես ուզում եմ ձեր ուշադրությունը հրավիրել այն հանգամանքին, որ սա գիտակցված որոշում է և հանձնման պատճառը միայն այն չէ, որ Դուք այստեղ եք և, որ Ադրբեջանի բարձրաստիճան պաշտոնյաներից մեկն եք։ Ամենևին, սա կապված է ձեր աշխատանքի հետ, ձեր գործունեության, միջպետական կապերն այնպիսի բարձր մակարդակի վրա պահելու հետ, ինչպիսին դրանք այսօր են, և մենք դա շատ բարձր ենք գնահատում»,- ասել է Պուտինը։ Պուտինի խոսքով՝ շքանշանի անվանումն արտացոլում է այն, ինչ անում է Մեհրիբան Ալիևան՝ ռուս-ադրբեջանական կապերի ամրապնդման ուղղությամբ։

06:13 - 23 նոյեմբերի, 2019

ԵՄ-ը «նորմանդական քառյակի»-ի հանդիպմանը Պուտինից «նշանակալի քայլեր» է ակնկալում |shantnews.am|

shantnews.am: ԵՄ-ը Փարիզում «նորմանդական քառյակի»-ի գագաթնաժողովում Ռուսաստանից ակնկալում է «նշանակալի քայլեր»: Այս մասին հայտարարել է ԵՄ արտաքին քաղաքականության ծառայության Արևելյան գործընկերության երկրների հետ հարաբերությունների բաժնի վարիչ Ռիչարդ Թիբելսը Բրյուսելում Եվրախորհրդարանի պատվիրակության Ուկրաինայի հետ կապված նիստի ժամանակ, հայտնում է Deutsche Welle-ն: Ըստ Թիբելսի՝ Բրյուսելում տեսնում են, որ Դոնբասում հրադադարի ռեժիմի խախտումները շարունակվում են: Միևնույն ժամանակ, ԵՄ-ը մատնանշում է «հուսադրող» ազդանշանները. սեպտեմբերին գերեվարվածների փոխանակում, մի շարք բնակավայրերից ուժերի դուրսբերում, ականազերծում, և նոյեմբերի 20-ին ավարտին է հասցվել Սևերսկի Դոնեց գետի վրայի կամուրջի շինարարությունը: «Սրանք համարձակ քայլեր էին Ուկրաինայի կողմից»,- նշել է ԵՄ արտաքին ծառայության պաշտոնյան: Նա կրկին ընդգծել է, որ այժմ Բրյուսելն ակնկալում է Ռուսաստանից «ոչ պակաս նշանակալի քայլեր Մինսկի գործընթացն առաջ տանելու համար», Մոսկվան կարող է դրանք իրականացնել դեկտեմբերի 9-ին Փարիզում նախատեսված «նորմանդական քառյակի» գագաթնաժողովում: Միևնույն ժամանակ, ԵՄ-ն ուկրաինական իշխանություններից նոր քայլեր է ակնկալում Դոնեցկի և Լուգանսկի տարածքում Ուկրաինայի քաղաքացիների նկատմամբ «ներառական» մոտեցման համատեքստում, ինչի մասին հայտարարել է երկրի նախագահ Վլադիմիր Զելենսկին: «Մենք կարծում ենք, որ դեռ կան բաներ, որոնք Ուկրաինան կարող է անել: Մասնավորապես, ուժեղացնել մարդկանց աջակցությունը սոցիալական հարցերում, ինչպիսիք են կառավարության կողմից չվերահսկվող տարածքներում քաղաքացիների կենսաթոշակների վճարումը և ներքին տեղահանվածների ընտրական իրավունքը»,- ասել է Թիբելսը: Նրա խոսքերով ՝ վերջերս Ուկրաինան ԵՄ-ին խոստացել է մինչև տարեվերջ օրենք ընդունել այդպիսի անձանց ընտրական իրավունքի վերաբերյալ:

09:33 - 22 նոյեմբերի, 2019