Վլադիմիր Պուտին

Ռուսաստանի Դաշնության գործող նախագահ։ Ծնվել է 1952թ. հոկտեմբերի 7-ին։ 1975-1991թթ․ ծառայել է ՊԱԿ-ում (КГБ), զբաղեցրել հետախուզական պաշտոններ։ 1991թ. ըստ պաշտոնական տեղեկատվության սեփական զեկուցագրով զորացրվել է ՊԱԿ-ից։ 1990-1995թթ. զբաղեցրել է Լենինգրադի քաղաքային իշխանության տարբեր պաշտոններ։ 1996-1998թթ․ արագ վերելք է գրանցել Կրեմլի տարբեր պաշտոններում՝ ի վերջո ստանձնելով Նախագահի աշխատակազմի ղեկավարի տեղակալի պաշտոնը։ 1998-ին նշանակվում է ԱԴԾ (ФСБ) տնօրեն։

1999-ի օգոստոսին ընդունելով նախագահ Ելցինի առաջարկը ստանձնել է ՌԴ վարչապետի պաշտոնը։ 1999-ի դեկտեմբերի 31-ին հրաժարական տվեց Ելցինը եւ Պուտինը դարձավ նախագահի պաշտոնակատար։ 2000թ․ մարտին ընտրվեց նախագահ եւ պաշտոնավարեց առավելագույն երկու ժամկետով։ 2008-ին՝ վարչապետ Մեդվեդեւի նախագահ ընտրվելուց հետո Պուտինը ստանձնեց Վարչապետի պաշտոնը։ Այս դրվագը հանրային լայն շրջանակներում ընկալվեց որպես «փոխատեղում»։ 2012-ից ի վեր Պուտինը նորից նախագահի պաշտոնում է։

Զելենսկին Պուտինին առաջարկել է բանակցություններ սկսել ռազմական գործողությունները դադարեցնելու շուրջ

Ուկրաինայի նախագահ Վլադիմիր Զելենսկին Ռուսաստանի նախագահ Վլադիմիր Պուտինին առաջարկել է բանակցություններ սկսել ռազմական գործողությունների դադարեցման շուրջ: Ուկրաինայի ղեկավարի ուղերձը հրապարակվել է «Տելեգրամ»-ի պաշտոնական ալիքում: «Եվս մեկ անգամ ուզում եմ դիմել ՌԴ նախագահին. Ուկրաինայի ողջ տարածքում մարտեր են ընթանում, եկեք նստենք բանակցությունների սեղանի շուրջ, որպեսզի դադարեցնենք մարդկանց մահերը»,- ասել է Զելենսկին:

15:55 - 25 փետրվարի, 2022

Սիրիայի նախագահն իր վճռական աջակցությունն է հայտնել Ռուսաստանի «հատուկ գործողությանը»

ՌԴ նախագահ Վլադիմիր Պուտինը զրուցել է Սիրիայի նախագահ Բաշար Ասադի հետ, որը վճռական աջակցություն է հայտնել Ռուսաստանի՝ Դոնբասի պաշտպանության համար իրականացվող հատուկ օպերացիային, հայտնում է Կրեմլի մամուլի ծառայությունը, փոխանցում է ria.ru-ն։ «Սիրիական կողմի նախաձեռնությամբ ՌԴ նախագահ Վլադիմիր Պուտինը հեռախոսազրույց է ունեցել Սիրիայի Արաբական Հանրապետության նախագահ Բաշար Ասադի հետ։ Սիրիայի նախագահն արտահայտել է իր վճռական աջակցությունը Ռուսաստանի հատուկ գործողությանը՝ պաշտպանելու Դոնբասի Հանրապետության խաղաղ բնակչությանը։ Նա քննադատել է ԱՄՆ-ի եւ ՆԱՏՕ-ի ապակայունացնող քաղաքականությունը, որն իր ժամանակին հանգեցրել է լրջագույն դեգրադացիայի նաեւ Մերձավոր Արեւելքում»,- ասված է հաղորդագրության մեջ։

15:21 - 25 փետրվարի, 2022

Պուտինն ու Մակրոնը քննարկել են Ուկրաինայի շուրջ ստեղծված իրավիճակի վերաբերյալ

Ֆրանսիական կողմի նախաձեռնությամբ հեռախոսազրույց է տեղի ունեցել ՌԴ նախագահ Վլադիմիր Պուտինի և Ֆրանսիայի նախագահ Էմանուել Մակրոնի միջև։ Այս մասին հայտնում են Կրեմլի մամուլի ծառակությունից։ «Հեռախոսազրույցի ընթացքում Վլադիմիր Պուտինը և Էմանուել Մակրոնը լուրջ և անկեղծ մտքեր են փոխանակել Ուկրաինայի շուրջ ստեղծված իրավիճակի վերաբերյալ։ Վլադիմիր Պուտինը սպառիչ բացատրություն է տվել հատուկ ռազմական գործողության անցկացման որոշման պատճառների ու հանգամանքների վերաբերյալ։ Կողմերը որոշել են մնալ շարունակական կապի մեջ»,-ասված է հաղորդագրության մեջ։

01:04 - 25 փետրվարի, 2022

Իրանի նախագահը Պուտինի հետ զրույցում ըմբռնումով է մոտեցել Ռուսաստանի մտահոգություններին՝ ԱՄՆ-ի և ՆԱՏՕ-ի ապակայունացնող գործողությունների վերաբերյալ

ՌԴ նախագահ Վլադիմիր Պուտինը հեռախոսազրույց է ունեցել Իրանի նախագահ Սեյյեդ Էբրահիմ Ռաիսիի հետ, իրանական կողմի նախաձեռնությամբ: «Ռիա Նովոստի»-ի փոխանցմամբ՝ այս մասին հայտնում է Կրեմլը։ «Վլադիմիր Պուտինը տեղեկացրել է Ուկրաինայի շուրջ իրավիճակի զարգացումների մասին։ Ինչպես նաև Դոնբասի հանրապետությունների խաղաղ բնակչության պաշտպանության համար հատուկ ռազմական գործողություն իրականացնելու որոշման համատեքստում՝ միջազգային իրավունքին և ԴԺՀ-ի ու ԼԺՀ-ի հետ բարեկամության և փոխօգնության պայմանագրերով ստանձնած պարտավորություններին մասին։Իր հերթին Իրանի նախագահը ըմբռնումով է մոտեցել Ռուսաստանի մտահոգություններին ԱՄՆ-ի և ՆԱՏՕ-ի ապակայունացնող գործողությունների վերաբերյալ»,-ասված է հաղորդագրության մեջ։

22:39 - 24 փետրվարի, 2022

Կրեմլից հայտնել են, թե ինչի շուրջ են պատրաստ բանակցել Ուկրաինայի իշխանությունների հետ |factor.am|

factor.am: Մոսկվան պատրաստ է Ուկրաինայի ղեկավարության հետ բանակցել այդ երկրի չեզոք կարգավիճակի և իր տարածքում զենք տեղակայելուց հրաժարվելու շուրջ։ Լրագրողներին այս մասին ասել է Վլադիմիր Պուտինի մամուլի քարտուղար Դմիտրի Պեսկովը, գրում է Ինտերֆաքսը։ «Նախագահ Պուտինը ձևակերպեց իր տեսլականը, թե ինչ ենք մենք ակնկալում Ուկրաինայից, որպեսզի լուծվեն հայեցակարգային «կարմիր գծային» խնդիրները: Դա չեզոք կարգավիճակն է, սա զենքի տեղակայման մերժում է։ Այստեղ հարցն այն է՝ արդյո՞ք Ուկրաինայի ղեկավարությունը պատրաստ է դրան»,- պարզաբանել է նա։ Հստակեցնող հարցին՝ արդյո՞ք այժմ Ռուսաստանը պատրաստ է շփվել Ուկրաինայի ղեկավարության հետ այս հարցի շուրջ, Պեսկովը պատասխանել է․ «Եթե Ուկրաինայի ղեկավարությունը պատրաստ է այդ մասին խոսել»։ Հիշեցնենք՝ ՌԴ նախագահը Վլադիմիր Պուտինը հայտարարել է Ուկրաինայում ռազմական գործողության մեկնարկի մասին։ Ուկրաինայի նախագահ Վլադիմիր Զելենսկին իր հերթին հայտարարել է Ռուսաստանի հետ դիվանագիտական հարաբերությունները խզելու մասին։

19:28 - 24 փետրվարի, 2022

Էրդողանը հեռախոսազրույց է ունեցել Պուտինի և Զելենսկու հետ |1lurer.am|

1lurer.am: Անկարան չի ճանաչում «Ուկրաինայի ինքնիշխանությանն ու տարածքային ամբողջականությանը հակասող քայլերը»։ Այդ մասին Ռուսաստանի նախագահ Վլադիմիր Պուտինի հետ հեռախոսազրույցի ժամանակ նշել է Թուրքիայի նախագահ Ռեջեփ Թայիփ Էրդողանը: Նա կոչ է արել խնդիրը լուծել դիվանագիտական ճանապարհով՝ ընդգծելով, որ «Թուրքիան ՆԱՏՕ-ի ներսում էլ կառուցողական դիրքորոշում է որդեգրել»: Էրդողանը հիշեցրել է, որ թուրքական կողմն ամենակարճ ժամանակահատվածում սպասում է Պուտինի այցին: Էրդողանը հեռախոսազրույց է ունեցել նաև Ուկրաինայի նախագահ Վոլոդիմիր Զելենսկու հետ և կոչ արել կարգավորել իրավիճակը՝ Մինսկի պայմանավորվածությունների հիման վրա։ «Թուրքիան աջակցում է Ուկրաինայի՝ իր տարածքային ամբողջականությունը պաշտպանելուն ուղղված գործողություններին»,- շեշտել է Էրդողանը։

18:01 - 24 փետրվարի, 2022

Գերմանիայի կանցլերը ՌԴ իշխանություններին մեղադրում է միջազգային իրավունքը խախտելու մեջ |factor.am|

factor.am: Գերմանիայի իշխանությունները դատապարտել են Ուկրաինային պատերազմ հայտարարելու՝ Ռուսաստանի նախագահ Վլադիմիր Պուտինի որոշումը, որը նա անվանել է «հատուկ ռազմական գործողություն Դոնբասում»։ Մոսկվայի որոշումը «միջազգային իրավունքի կոպտագույն խախտում է», փետրվարի 24-ին հայտարարել է Գերմանիայի կանցլեր Օլաֆ Շոլցը, գրում է DW-ի ռուսական ծառայությունը։ «Ոչինչ չի կարող դա արդարացնել»,- հավելել է Շոլցը՝ Ռուսաստանի իշխանություններին կոչ անելով անհապաղ դադարեցնել ռազմական գործողությունը։ Գերմանիան առաջիկա ժամերին կհամակարգի իր հետագա գործողությունները ԵՄ-ի, ՆԱՏՕ-ի և G7 երկրների շրջանակում, հավելել է կանցլերը։ «Սա սարսափելի օր է Ուկրաինայի համար և սև օր՝ Եվրոպայի համար»,- ընդգծել է Գերմանիայի կառավարության ղեկավարը։ Մինչդեռ Գերմանիայի փոխկանցլեր Ռոբերտ Հաբեկը Մոսկվայի պահվածքն անվանել է «անամոթ»: «Եվրոպայում ցամաքային պատերազմ է, որի մասին մենք կարծում էինք, որ կարելի է կարդալ միայն պատմության գրքերում»,- ասել է նա: Վերջին մի քանի ամիսների ընթացքում Գերմանիան ամեն ինչ անում է՝ դիվանագիտական ուղիով Ռուսաստանում այս ճգնաժամի խաղաղ լուծումը գտնելու համար, ասել է Գերմանիայի արտգործնախարարը՝ նշելով, որ Մոսկվան չի արձագանքել բանակցությունների առաջարկներին։

16:55 - 24 փետրվարի, 2022

Բաքուն շահագրգռված է Մոսկվայի և Անկարայի հետ համագործակցության եռակողմ ձևաչափի ստեղծմամբ

Ադրբեջանի նախագահ Իլհամ Ալիևը հայտարարել Է Ադրբեջան-Ռուսաստան-Թուրքիա եռակողմ համագործակցության ձևաչափի ստեղծման հնարավորության մասին։ «Այն, ինչ ստորագրվել է երեկ (փետրվարի 22 - խմբ.), ըստ էության եթե դիրակենք մեր տեսանկյունից, պատմական ձեռքբերում է (Ռուսաստանի հետ դաշնակցային փոխգործակցության մասին հռչակագրի ստորագրումը - խմբ.), որովհետև երկու հզոր երկրների, երկու հարևանների հետ Ադրբեջանը դաշնակցային հարաբերություններ ունի։ Ես կարծում եմ, որ ոչ մի այլ երկիր չի կարող սրանով պարծենալ։ Էլ չեմ ասում այն մասին, որ մեկը ՆԱՏՕ-ի անդամ պետություն է, մյուս՝ ՀԱՊԿ-ի փաստացի ղեկավար։ Սա, ըստ էության, ձեռքբերում է։ Եվ ոչ մեկի համար գաղտնիք չէ, որ արդեն փաստացի ձևավորվում է համագործակցության եռակողմ ձևաչափ», - ասել է Ալիևը ռուսական առաջատար լրատվամիջոցների ղեկավարների հետ հանդիպմանը։ Նախագահը նշել է, որ Ադրբեջան-Ռուսաստան-Թուրքիա եռակողմ համագործակցության ձևաչափը դեռևս ձևակերպված չէ, դեռևս արտգործնախարարների և նախագահների մակարդակով հանդիպումներ չեն անցկացվել, բայց ձևավորման գործընթացի մեջ է: «Ձևավորվում է համագործակցության եռակողմ ձևաչափ ստեղծելու գործընթաց՝ ընդհանուր շահերի, պրագմատիզմի և կառավարման համակարգերի նմանության հիման վրա, որոնց մենք հավատարիմ ենք։ Եվ մեզ համար շատ հաճելի է, որ նախագահներ Էրդողանի և Պուտինի միջև շատ վստահելի հարաբերություններ կան, երկուսն էլ այդ մասին հրապարակավ խոսում են։ Այնպես որ, ես կարծում եմ, որ հեռու չէ այն օրը, երբ մենք պետք է ձեւականացնել այդ հարաբերությունները. Քանի որ Ադրբեջանը Ռուսաստանի և Թուրքիայի դաշնակիցն է, ապա հաջորդ քայլը կլինի։ Մենք մեր կողմից միշտ աշխատել ենք երկու երկրների շահերի մերձեցման ուղղությամբ», - ընդգծել է Ադրբեջանի նախագահը: Ձևավորվում է եռակողմ համագործակցության ձևաչափ ստեղծելու գործընթաց՝ ընդհանուր շահերի, պրագմատիզմի և կառավարման համակարգերի նմանության հիման վրա, որոնց մենք հավատարիմ ենք։ Մեզ համար շատ հաճելի է, որ նախագահներ Էրդողանի և Պուտինի միջև շատ վստահելի հարաբերություններ կան, երկուսն էլ այդ մասին հրապարակավ խոսում են։ Այնպես որ, ես կարծում եմ, որ հեռու չէ այն օրը, երբ մենք պետք է ձևակերպենք այդ հարաբերությունները։ Քանի որ Ադրբեջանը Ռուսաստանի և Թուրքիայի դաշնակիցն է, ապա հաջորդ քայլը տրամաբանական է։ Բայց դա արդեն մեր գործը չէ, մենք մեր կողմից միշտ աշխատել ենք երկու երկրների շահերի մերձեցման համար», - ընդգծել է նախագահը: 2021 թվականի հունիսի 15-ին Ադրբեջանը հռչակագիր է ստորագրել Թուրքիայի հետ դաշնակցային հարաբերությունների մասին։

14:32 - 24 փետրվարի, 2022

Զելենսկին համաշխարհային առաջնորդներին կոչ է արել հակապուտինյան կոալիցիա կազմել

Այսօր Ռուսաստանը լայնածավալ հարձակում է սկսել Ուկրաինայի դեմ։ Ուկրաինայի նախագահ Վլադիմիր Զելենսկին կոչ է արել համաշխարհային առաջնորդներին ստեղծել հակապուտինյան կոալիցիա՝ մեր պետության վրա լայնամասշտաբ հարձակում սկսելու համար: Այս մասին նա հայտնել է թվիթերում։ ԱՄՆ-ի, Գերմանիայի, Մեծ Բրիտանիայի, Լեհաստանի և ԵՄ-ի ղեկավարներին ուղղված ուղերձում Ուկրաինայի նախագահը կոչ է արել անհապաղ կանգնեցնել Պուտինին: «Կոչ եմ անում անհապաղ կանգնեցնել Պուտինին, պատերազմը Ուկրաինայի և աշխարհի դեմ։ Ստեղծում ենք հակապուտինյան կոալիցիա։ Անհապաղ պատժամիջոցներ, Ուկրաինային պաշտպանական և ֆինանսական աջակցություն: Օդային տարածքի փակում: Աշխարհը պետք է խաղաղության պարտադրի Ռուսաստանին», - գրել է Զելենսկին։ ՈՒՆԻԱՆ-ի (Ուկրաինական անկախ լրատվական գործակալության) հաղորդմամբ Ռուսաստանի նախագահ Վլադիմիր Պուտինը ներխուժում է սկսել Ուկրաինա, մի շարք քաղաքներում պայթյուններ են հնչել: Ինչի հետևանքով Ուկրաինայի նախագահ Վլադիմիր Զելենսկին դիմել է ուկրաինացիներին և հայտարարել ռազմական դրություն մտցնելու մասին։ Ավելի վաղ Ռուսաստանի նախագահ Վլադիմիր Պուտինը հրամանագրեր էր ստորագրել այսպես կոչված «ԼԺՀ»- ի և «ԴԺՀ»- ի անկախության մասին: ՌԴ-ն նաև որոշել է իր «խաղաղապահներին» մտցնել փսեվդոհանրապետություններ։ Ռուսական կողմի նման որոշումների մասին հայտնի է դարձել փետրվարի 21-ին։ Փետրվարի 23-ին՝ ուշ երեկոյան, տեղեկություն է ստացվեց, որ «ԴԺՀ»-ի և «ԼԺՀ»- ի առաջնորդներ Դենիս Պուշիլինը և Լեոնիդ Պասեչնիկը Ռուսաստանին խնդրել են «հանրապետություններին» ռազմական օգնություն ցուցաբերել:

12:17 - 24 փետրվարի, 2022

Զելենսկին Ուկրաինայի տարածքում ռազմական դրություն է հայտարարել |armenpress.am|

armenpress.am: Ուկրաինայի նախագահ Վլադիմիր Զելենսկին ռազմական դրություն է հայտարարել երկրի ողջ տարածքում: Այս մասին նա հայտնել է «Տելեգրամ»-ի իր ալիքում տեղադրված տեղանյութում: «Մենք ռազմական դրություն ենք մտցնում երկրի ողջ տարածքում»,- հայտարարել է նա: Զելենսկին հայտնել է, որ Ուկրաինայի անվտանգության ու պաշտպանական համակարգերը աշխատում են: «Խուճապի մի մատնվեք, մենք ուժեղ ենք, մենք կհաղթենք»,- դիմելով քաղաքացիներին՝ ասել է Զելենսկին: Նա տեղեկացրել է, որ արդեն խոսել է ԱՄՆ նախագահ Ջո Բայդենի հետ և ամերիկյան կողմն արդեն միջազգային օգնություն է նախապատրաստում Ուկրաինայի համար: Փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հանդես էր եկել նոր ուղերձով՝ հայտնելով՝ Դոնբասում հատուկ ռազմական օպերացիա սկսելու որոշման մասին։ «Հանգամանքները մեզնից պահանջում են վճռական ու անյհապաղ գործողություններ: Դոնբասի ժողովրդական հանրապետությունները խնդրանքով դիմել են Ռուսաստանին: Դրա հետ կապված որոշում եմ ընդունել հատուկ ռազմական գործողություն իրականացնել»,- հայտարարել է Պուտինը ՌԴ քաղաքացիներին ուղղված հեռուստաուղերձում: Նա հավելել է, որ Ռուսաստանի պլանների մեջ չի մտնում Ուկրաինայի օկուպացումը, սակայն Ռուսաստանը կձգտի հասնել Ուկրաինայի ապառազմականացմանը։

09:12 - 24 փետրվարի, 2022

Պուտինը Դոնբասում հատուկ ռազմական օպերացիա անցկացնելու որոշում է ընդունել |armenpress.am|

armenpress.am: ՌԴ նախագահ Վլադիմիր Պուտինը հայտարարել է Դոնբասում հատուկ ռազմական օպերացիա սկսելու որոշման մասին։ Այս մասին հայտնում է «ՌԻԱ նովոստի»-ն։ Նա հայտնել է, որ Դոնբասի ազգային հանրապետությունները օգնության խնդրանքով դիմել են։ Դրա հետ կապված՝ ես որոշում եմ ընդունել հատուկ ռազմական օպերացիա անցկացնելու մասին»,- ասել է Պուտինը։ Նա հավելել է, որ Ռուսաստանի պլանների մեջ չի մտնում Ուկրաինայի օկուպացումը, սակայն Ռուսաստանը կձգտի հասնել Ուկրաինայի ապառազմականացմանը։

08:37 - 24 փետրվարի, 2022

Էրդողանը Պուտինին հայտնել է, որ չի ընդունում Ռուսաստանի կողմից Դոնեցկի և Լուգանսկի ճանաչումը |armenpress.am|

armenpress.am: Ռուսաստանի Դաշնության նախագահ Վլադիմիր Պուտինը և Թուրքիայի նախագահ Ռեջեփ Թայիփ Էրդողանը հեռախոսազրույց են ունեցել՝ քննարկելով Ուկրաինայի շուրջ ստեղծված իրավիճակը: Կրեմլից հայտնել են, որ կողմերը փոխանակվել են Ռուսաստանի կողմից Դոնեցկի և Լուգանսկի Ժողովրդական Հանրապետությունների ճանաչմամբ պայմանավորված իրավիճակի շուրջ գնահատականներով: «Վլադիմիր Պուտինն ընդգծել է նման որոշում կայացնելու օբյեկտիվ անհրաժեշտությունը՝ Դոնբասում ուկրաինական իշխանությունների ագրեսիայի և Մինսկի համաձայնագրի պայմանները կատարելուց հրաժարվելու պայմաններում»,- ասվում է Կրեմլի տարածած հաղորդագրության մեջ: Թուրքիայի նախագահականից հայտնել են, որ հեռախոսազրույցի ընթացքում Էրդողանը Պուտինին հայտնել է, որ Անկարան չի ճանաչում Ռուսաստանի որոշումը՝ ճանաչելու երկու հանրապետությունները: «Նախագահ Էրդողանը նշել է, որ Թուրքիան չի ճանաչում քայլերը, որոնք հակասում են Ուկրաինայի ինքնիշխանությանն ու տարածքային ամբողջականությանը: Նա ընդգծել է, որ դա սկզբունքային դիրքորոշում է, իսկ արդյունքների պետք է հասնել Մինսկի համաձայնագրերի հիման վրա: Նախագահ Էրդողանն ընդգծել է, որ իրադրության լարումը, մասնավորապես ռազմական հակամարտությունը ոչ մեկին օգուտ չի տա»,- հայտնել են Թուրքիայի նախագահի լրատվական ծառայությունից: Էրդողանը տեղեկացրել է, որ առաջիկայում ակնկալում է Պուտինի այցը Թուրքիա: Կողմերը պայմանավորվել են շարունակելու շփումները տարբեր ձևաչափերով:

20:20 - 23 փետրվարի, 2022

ՌԴ Պետդումայի 351 պատգամավոր կենթարկվի ԵՄ պատժամիջոցների |armenpress.am|

armenpress.am: Եվրամիությունը պատժամիջոցներ կսահմանի Ռուսաստանի Դաշնության Պետական դումայի 351 պատգամավորի և ևս 27 ֆիզիկական ու իրավաբանական անձանց դեմ՝ Ուկրաինայից անջատված Դոնեցկի և Լուգանսկի անկախությունը ճանաչելու համար, hայտնել է Եվրամիության արտաքին գործերի և անվտանգության քաղաքականության բարձր հանձնակատար Ժոզեպ Բորելը: Ռուսաստանի նախագահն, ըստ Բորելի, ընդգրկված չէ այդ անձանց ցուցակում: «ՌԻԱ Նովոստի»-ն գրում է, որ մինչ այդ Ֆրանսիայի արտգործնախարարն էր հայտարարել, որ Եվրամիության երկրները համաձայնության են եկել Ռուսաստանի դեմ պատժամիջոցների փաթեթի վերաբերյալ: Ռուսաստանի Դաշնության նախագահ Վլադիմիր Պուտինը փետրվարի 21-ին ռուսաստանցիներին հասցեագրված իր հեռուստաուղերձում հայտարարել էր, որ որոշում է ընդունել Դոնեցկի և Լուգանսկի ժողովրդական հանրապետությունների անկախությունը ճանաչելու մասին: Ելույթից հետո Ռուսաստանի նախագահը ստորագրեց համապատասխան հրամանագրեր ԴԺՀ-ն և ԼԺՀ-ն ճանաչելու մասին, ինչպես նաև բարեկամության, փոխգործակցության և փոխօգնության մասին պայմանագրեր ստորագրեց Դոնեցկի ղեկավար Դենիսի Պուշիլինի և Լուգանսկի ղեկավար Լեոնիդ Պասեչնիկի հետ:

22:11 - 22 փետրվարի, 2022

Պուտինը հայտարարել է, որ մինսկյան համաձայնություններն այլևս գոյություն չունեն |armenpress.am|

armenpress.am: Դոնբասում իրավիճակի կարգավորման վերաբերյալ մինսկյան համաձայնություններն այլևս գոյություն չունեն: Այս մասին լրագրողներին հայտարարել է Ռուսաստանի նախագահ Վլադիմիր Պուտինը՝ հավելելով, որ մինսկյան համաձայնագրերը «սպանվել են» Դոնեցկի ու Լուգանսկի անկախության ճանաչումից շատ ավելի վաղ: «Ուզում եմ ընդգծել, որ մենք հետաքրքրված էինք միջոցառումների այդ փաթեթի իրականացմամբ, բայց Կիևը բոլոր ջանքերն այդ ուղղությամբ զրոյի հավասարեցրեց, մինսկյան համաձայնությունները սպանվել են Ուկրաինայի ղեկավարության կողմից Դոնբասի ժողովրդական հանրապետությունների երեկվա ճանաչումից շատ ավելի վաղ», - ասել է Վլադիմիր Պուտինը:

21:48 - 22 փետրվարի, 2022

Ալիևը հայկական կողմից ակնկալում է Ղարաբաղից հայկական զորքերի դուրսբերում |azatutyun.am|

azatutyun.am: Ալիևը հայկական կողմից ակնկալում է Ղարաբաղի տարածքից զորքերի դուրս բերում, ինչպես նաև Ադրբեջանի հիմնական տարածքի և Նախիջևանի միջև հաղորդակցությունների բացում: Այս մասին Ադրբեջանի նախագահ Իլհամ Ալիևը հայտարարել է Մոսկվայում Ռուսաստանի նախագահի հետ համատեղ ասուլիսի ընթացքում։ Ասուլիսը հաջորդել է Ադրբեջանի և Ռուսաստանի միջև դաշնակցային համագործակցության մասին հռչակագրի ստորագրմանը։ «Մենք ակնկալում ենք, որ հայկական կողմը ամբողջովին կիրականացնի 2020 թվականի նոյեմբերի 9-ին, 10-ին ստորագրված արձանագրությունների բոլոր կետերը, որոնք վերաբերվում են հայկական զորքերի դուրսբերմանը Ղարաբաղի տարածքից, ինչպես նաև Ադրբեջանի հիմնական տարածքի և Նախիջևանի միջև բոլոր հաղորդակցությունների բացմանը, ինչը հայկական կողմի իրավական պարտավորություններից է», - պնդել է Ադրբեջանի նախագահը՝ նշելով, որ այդ ուղղությամբ աշխատանքները դանդաղ են ընթանում։

21:27 - 22 փետրվարի, 2022

Պուտինն ու Ալիևը ստորագրել են 43 կետից բաղկացած դաշնակցային համագործակցության հռչակագիր

Ռուսաստանի և Ադրբեջանի նախագահներ Վլադիմիր Պուտինն ու Իլհամ Ալիևն ավարտել են բանակցությունները, որոնք տևել են ավելի քան 4 ժամ։ Այս մասին հայտնում է ՌԻԱ Նովոստին։ Նշվում է, որ նրանք քննարկել են Լեռնային Ղարաբաղը, Ուկրաինայի շուրջ ստեղծված իրավիճակը։ Բանակցություններից հետո երկու երկրների նախագահները ստորագրել են դաշնակցային համագործակցության հռչակագիրը, որում 43 կետ կա։ Հռչակագիրը հրապարակվել է Ադրբեջանի արտգործնախարարության պաշտոնական կայքէջում։ Հռչակագրի առաջին կետի համաձայն՝ Ռուսաստանը և Ադրբեջանն իրենց հարաբերությունները կառուցում են սահմանների անքակտելիության, ինքնիշխանության և տարածքային ամբողջականության փոխադարձ հարգանքի վրա: Կետերից, մասնավորապես, մեկում ասվում է․ «Ռուսաստանի Դաշնությունը և Ադրբեջանի Հանրապետությունն այսուհետ ևս աջակցություն կցուցաբերեն Ադրբեջանի Հանրապետության նախագահի, Հայաստանի Հանրապետության վարչապետի եւ Ռուսաստանի Դաշնության նախագահի 2020 թվականի նոյեմբերի 9/10-ի, 2021 թվականի հունվարի 11-ի և 2021 թվականի նոյեմբերի 26-ի հայտարարությունների դրույթների իրականացմանն ուղղված ջանքերին, որոնք հիմք են ծառայել տարածաշրջանում կայունության և անվտանգության ամրապնդման, տնտեսական և տրանսպորտային բոլոր կապերի ապաշրջափակման և Ադրբեջանի Հանրապետության ու Հայաստանի Հանրապետության միջև հարաբերությունների կայունացման համար»։ Մեկ այլ կետով երկրները կարող են քննարկել միմյանց ռազմական օգնություն տրամադրելու հնարավորությունը։ «Անվտանգության ապահովման, խաղաղության և կայունության պահպանման նպատակով Ռուսաստանի Դաշնությունը և Ադրբեջանի Հանրապետությունը կարող են քննարկել միմյանց ռազմական օգնություն տրամադրելու հնարավորությունը ՄԱԿ-ի կանոնադրության, առանձին միջազգային պայմանագրերի հիման վրա և հաշվի առնելով կողմերից յուրաքանչյուրի առկա միջազգային-իրավական պարտավորությունները»: Կետերից մեկում ասվում է․ «Ռուսաստանի Դաշնությունը և Ադրբեջանի Հանրապետությունը պատրաստակամություն են հայտնում հրատապ խորհրդակցություններ անցկացնել այնպիսի իրավիճակների դեպքում, երբ կողմերից մեկի կարծիքով, կարող է վտանգ ներկայացնել խաղաղությանը, խաթարել խաղաղությունը կամ ազդել կողմերից մեկի անվտանգային շահերի վրա, ինչպես նաև այն դեպքում, եթե առաջացել է նման վտանգ։ Խորհրդակցությունների նպատակն է լինելու իրավիճակի կարգավորումը»։ Իսկ մեկ այլ կետով ամրագրվում է․ «Կողմերը ձեռնպահ են մնում միմյանց դեմ ուղղված ցանկացած գործողություններից, այդ թվում՝ երրորդ պետությունների միջոցով իրականացվող»։

20:50 - 22 փետրվարի, 2022