ԱԺ «Լուսավոր Հայաստան» խմբակցության ղեկավար Էդմոն Մարուքյանը ֆեյսբուքյան ր էջում գրում է․

«Ինչպես մենք, այնպես էլ «Իմ քայլը» խմբակցության պատգամավորները պաշտոնն ստանձնելիս երդվել են անել ամեն ինչ քաղաքացիական համերաշխության պահպանման համար։

Մենք մեր ուժերի ներածին չափով ամեն բան արել և անում ենք՝ քաղաքացիական համերաշխության խաթարում թույլ չտալու համար։

Սակայն այս օրերին, խուսափելով ներկայանալ Ազգային ժողով և չկատարելով պատգամավորական մանդատի շրջանակներում ստանձնված պարտականությունները, «Իմ քայլի» պատգամավորները դրժում են տրված երդումը՝ խորացնելով և լարելով երկրում տիրող առանց այդ էլ չափազանց լարված իրադրությունը, քանի որ պրոցեսներն այսպիսով գնում են ոչ թե իրավաքաղաքական, այլ քաղաքացիական անհնազանդությունների միջոցով։

Հարգելի՛ գործընկերներ,

Մեկ անգամ ևս կոչ ենք անում ձեզ ներկայանալ աշխատանքի և դուրս գալ երկխոսության մյուս քաղաքական ուժերի հետ, հաշվի նստել ժողովրդի կամքի հետ։

Հիշեցնում եմ ձեր իսկ տված պատգամավորական երդումը՝

Հանուն համազգային նպատակների իրականացման և հայրենիքի հզորացման ու բարգավաճման՝ երդվում եմ բարեխղճորեն կատարել ժողովրդի առջև ունեցած պարտավորություններս, պահպանել Հայաստանի Հանրապետության Սահմանադրությունը և օրենքները, նպաստել Հայաստանի Հանրապետության ինքնիշխանության և շահերի պահպանմանը, անել ամեն ինչ քաղաքացիական համերաշխության, ազգային ու համամարդկային արժեքների պահպանման համար»:

Հիշեցնենք, որ երեկ ՀՀ ԱԺ «Իմ քայլը» իշխող կուսակցությունը երեկ հայտարարություն է տարածել Հայաստանի ներքաղաքական իրավիճակի վերաբերյալ՝ նշելով, որ իրենք չեն պատրաստվում մասնակցել Հայաստանում կայունության խաթարման նպատակ ունեցող որևէ նիստի և վտանգել ռազմաճակատն ու այն պահող մարդկանց կյանքը։