Հայ փրկարարները Թուրքիայից վերադարձել են․ նրանց Մարգարայի կամրջի մոտ դիմավորել են Վահե Ղազարյանն ու Կամո Ցուցուլյանը

Փետրվարի 16-ին հայկական քաղաքային որոնողափրկարարական թիմն ավարտեց Թուրքիայի Հանրապետության Ադըյաման քաղաքում ծավալած որոնողափրկարարական աշխատանքները։

Возможно, это изображение 5 человек

Փետրվարի 17-ին հայ փրկարարները վերադարձան Հայաստան: Նրանց հայ-թուրքական սահմանին՝ Մարգարայի կամրջի մոտ, դիմավորեցին ՀՀ ներքին գործերի նախարար Վահե Ղազարյանն ու Փրկարար ծառայության տնօրեն Կամո Ցուցուլյանը։

Վահե Ղազարյանը շնորհակալություն հայտնեց փրկարարներին՝ կատարած աշխատանքի համար:

Возможно, это изображение 4 человека, люди стоят и текст «USAR»

Աղետի գոտում շուրջ 8 օր տևած որոնողափրկարարական գործողությունների արդյունքում միջազգային որակավորում ունեցող հայկական քաղաքային որոնողափրկարարական թիմը՝ համագործակցելով տեղի աջակցող և միջազգային այլ թիմերի հետ, փրկարարական տարբեր միջոցների կիրառմամբ փլատակներից դուրս բերեց 3 տուժածի և 10 զոհերի մարմիններ, տեղում իրականացրեց լայնածավալ որոնողական աշխատանքներ՝ այդ թվում նաև կինոլոգիական խմբերով:

Թուրքիայի խորհրդարանի հայազգի պատգամավոր Կարո Փայլանը թվիթերյան իր միկրոբլոգում նույնպես լուսանկարներ է հրապարակել՝ կից գրելով․ « Հայաստանի փրկարարական ջոկատը ավարտեց Ադըյամանի իր աշխատանքները ու վերադարձավ երկիր։ Ջոկատը զօրուգիշեր աշխատելով՝ բազմաթիվ քաղաքացիներ փրկեց փլատակների տակից։ Շնորհակալութուն»։