Ռումինիա

Հայաստանը կմիանա «Սևծովյան ավազանի Interreg NEXT» ծրագրին |armenpress.am|

12:51 - 13 փետրվարի, 2025

Ռումինիայի նախագահը հայտարարել է պաշտոնը լքելու որոշման մասին |azatutyun.am|

azatutyun.am: Ռումինիայի նախագահ Կլաուս Յոհանիսը հայտարարել է պաշտոնը լքելու որոշման մասին։ Ընդդիմադիր կուսակցություններն այսօր նախատեսում էին քվեարկության դնել նրա իմփիչմենթի հարցը։ Յոհանիսի պաշտոնավարման ժամկետն ավարտվել էր դեկտեմբերի 21-ին, սակայն ընտրությունների առաջին փուլի արդյունքների չեղարկման պատճառով նրան փոխարինող չկար։ «Հրաժարական եմ տալիս երկրին զերծ պահելու հնարավոր բացասական հետևանքներից»,- հայտարարել է հեռացող նախագահը, որն անցած շաբաթներին պնդում էր, թե հրաժարականի հիմքեր չի տեսնում, քանի որ սահմանադրական նորմեր չի խախտել։ Յոհանիսը մտադիր էր պաշտոնավարումն ավարտել նախագահական նոր ընտրություններից հետո։ Ռումինիայի Սահմանադրության համաձայն՝ պետության ղեկավարի հրաժարականի դեպքում նոր նախագահի ընտրությունները պետք է տեղի ունենան երեք ամսվա ընթացքում։

17:47 - 10 փետրվարի, 2025

Ռումինիայի ՍԴ-ը չեղյալ է հայտարարում նախագահական ընտրությունները |azatutyun.am|

azatutyun.am: Ռումինիայի Սահմանադրական դատարանը այսօր հայտարարեց, որ չեղյալ է հայտարարում նախագահական ընտրությունները, որի երկրորդ փուլը դեռ պետք է կայանար կիրակի օրը։ «Սահմանադրական դատարանը որոշել է «չեղյալ համարել Ռումինիայի նախագահի ընտրության ողջ ընտրական գործընթացը դրա կոռեկտությունն ու օրինականությունն ապահովելու համար», - ասվում է որոշման մեջ։ Սահմանադրական դատարանի աննախադեպ որոշումը, որը վերջնական է, կայացվեց այն բանից հետո, երբ չորեքշաբթի օրը նախագահ Կլաուս Յոհանիսը գաղտնազերծեց հետախուզության տվյալները, որոնց համաձայն Ռուսաստանը լայնածավալ քարոզարշավ է իրականացրել, TikTok- և Telegram ալիքների հազարավոր մեդիահաշիվներով գովազդելով ծայրահեղ աջ թեկնածու Կալին Ջորջեսկուին, ով արդյունքում նախագահական ընտրությունների երկրորդ փուլ անցավ։ Ռումինիայի վարչապետ Մարսել Չիոլակուն հայտարարել է, որ նախագահական ընտրությունների առաջին փուլի արդյունքները չեղյալ համարելու բարձրագույն դատարանի որոշումը «միակ ճիշտ որոշումն է» այն բանից հետո, երբ գաղտնազերծված փաստաթղթերը ցույց են տվել ռուսական միջամտությունը։ Այժմ պետք է նշանակվի նախագահական ընտրությունների առաջին փուլը կրկնելու նոր ամսաթիվ:

21:13 - 06 դեկտեմբերի, 2024

Ռումինիայում մեկնարկել են խորհրդարանական ընտրությունները

Ռումինիայում սկսվել է խորհրդարանական ընտրությունների քվեարկությունը: Քվեարկությունը տեղի է ունենում վիճահարույց նախագահական ընտրություններից մեկ շաբաթ անց, որտեղ առաջատար էր պոպուլիստ թեկնածու Կալին Ջորջեսկուն հավաքած ձայների 23%-ով:Ընտրություններին մասնակցում են, ընդհանուր առմամբ, 50 դաշինք ու կուսակցություններ: Պատգամավորների և սենատորների պաշտոնների համար հավակնում է մոտ 10 հազար թեկնածու, սակայն խորհրդարան կանցնի միայն 456-ը։ Կիրակի օրը կայանալիք խորհրդարանական ընտրությունները Ռումինիայի ամենակարևոր քվեարկությունն է, քանի որ այն որոշում է նոր կառավարությանը և վարչապետին: Այնուամենայնիվ, կան մտավախություններ, որ այն կարող է ստվերվել անցյալ շաբաթվա նախագահական քվեարկությունից հետո ծագած քաոսով: Մինչ նախագահը Ռումինիայում որոշումներ կայացնելու զգալի լիազորություններ ունի, հատկապես այնպիսի ոլորտներում, ինչպիսիք են ազգային անվտանգությունը և արտաքին քաղաքականությունը, կառավարությունը գլխավորում է վարչապետը: Նախագահի թեկնածու Կալին Ջորջեսկուն, որը առաջատար էր առաջին փուլի նախագահական ընտրություններում, վարել է անսովոր քարոզարշավ՝ գրեթե ամբողջությամբ առաջ մղելով իր թեկնածությունը TikTok սոցիալական մեդիայի հարթակում: Նա հայտնել է զրոյական նախընտրական ծախսերի մասին, սակայն նրա ժողովրդականության հանկարծակի աճը ահազանգեր է առաջացրել: Կալին Ջորջեսկուն բացահայտ հիացմունք էր արտահայտել Ռուսաստանի նախագահ Վլադիմիր Պուտինի նկատմամբ: Հինգշաբթի օրը Ռումինիայի Սահմանադրական դատարանը երկրի կենտրոնական ընտրական հանձնաժողովին խնդրել է վերահաշվարկել և ստուգել նախագահական առաջին փուլի քվեաթերթիկները: Վերջին հարցումները ցույց են տալիս, որ դեկտեմբերի 1-ին կայանալիք ընտրություններում առաջին երեք կուսակցությունները կլինեն Սոցիալ-դեմոկրատական կուսակցությունը (PSD), ծայրահեղ աջ Ռումինացիների միասնության դաշինքը (AUR) և Ազգային լիբերալ կուսակցությունը (PNL):

12:44 - 01 դեկտեմբերի, 2024

Ռումինիայի նախագահական ընտրություններում անակնկալ արդյունքներ է գրանցել ծայրահեղ աջ թեկնածուն |armenpress.am|

armenpress.am: Ռումինիայում նոյեմբերի 24-ին կայացած նախագահական ընտրությունների առաջին փուլում ծայրահեղ աջ Կալին Ջորջեսկուն և վարչապետ Մարչել Չոլակուն գրեթե հավասար ձայներ են հավաքել։ Ամենայն հավանականությամբ, հենց այս երկու թեկնածուները կպայքարեն ընտրությունների երկրորդ փուլում, որը պետք է անցկացվի դեկտեմբերի 8-ին։ Այս մասին հաղորդում է BBC-ն։ Ըստ Կենտրոնական ընտրական բյուրոյի՝ ձայների 96%-ի հաշվարկի արդյունքներով Ջորջեսկուն ստանում է ձայների 22%-ը, իսկ Չոլակուն՝ 20%-ը։ Պարբերականը նշում է, որ Ջորջեսկուի ցուցաբերած արդյունքները բավական մեծ անակնկալի են բերել բոլորին. նա որևէ կուսակցության չի պատկանում և իր ընտրարշավը հիմնականում անցկացրել է TikTok սոցիալական հարթակում։ Վարչապետ Մարչել Չոլակուն Ռումինիայի Սոցիալ-դեմոկրատական կուսակցությունից է և հայտարարել է, որ երկիրը կշարունակի իր արևմտամետ ուղին։ Մինչդեռ Կալին Ջորջեսկուն հայտարարել է, որ վերջ կդնի, իր բնութագրմամբ, Եվրամիությանը և ՆԱՏՕ-ին ստորադասվելուն, հատկապես՝ Ուկրաինային աջակցության հարցում։ Նոյեմբերի 24-ին էքզիթ փոլերը ցույց էին տալիս, որ առաջատարը Մարչել Չոլակուն է, իսկ նրան հաջորդում է աջ կենտրոնամետ թեկնածու Էլենա Լասկոնին։ Սակայն ըստ վերջին տվյալների՝ Լասկոնին գրավում է երրորդ հորիզոնականը՝ ձայների 18%-ով, իսկ մյուս թեկնածու Ջորջ Սիմիոնը՝ չորրորդ հորիզոնականը։ Ռումինիայում նախագահը հիմնականում խորհրդանշական դեր ունի, բայց զգալի ազդեցություն ունի արտաքին քաղաքականության հարցում և վերահսկում է երկրի պաշտպանական ծախսերը։

10:27 - 25 նոյեմբերի, 2024

Ռումինիայում նախագահական ընտրություններ են |factor.am|

factor.am: Ռումինիայում մեկնարկել են նախագահական ընտրությունները։ Ժամը 7:00-ին ամբողջ երկրում բացվել է շուրջ 19,000 ընտրատեղամաս, հայտնում է ՌԻԱ Նովոստին։ Պետության ղեկավարն ընտրվում է հինգ տարով։ Մասնակցության շեմ չկա, ընտրությունները կայացած կհամարվեն մասնակիցների ցանկացած քանակի դեպքում։ Նախագահի պաշտոնին հավակնում է 13 թեկնածու: Հաղթող կճանաչվի այն թեկնածուն, որը կհավաքի ձայների կեսից ավելին։ Եթե ոչ ոք չհավաքի անհրաժեշտ թվով ձայներ, երկու շաբաթից կկայանա երկրորդ փուլ, որտեղ հաղթելու համար պետք է հավաքել պարզ մեծամասնություն։

13:48 - 24 նոյեմբերի, 2024

Ռումինիայում վտանգի ամենաբարձր մակարդակ է սահմանվել ջրհեղեղի պատճառով |azatutyun.am|

azatutyun.am: Ռումինիայի իշխանությունները երկու արևելյան շրջաններում հայտարարել են ջրհեղեղի վտանգի ամենաբարձր մակարդակ և տարհանելու հորդոր են արել։ Երկրի մյուս հատվածներում ուժեղացվել է զգոնությունը սեպտեմբերի 29-ին հորդառատ անձրևների և քամիների մոտենալուն զուգընթաց: Պաշտոնյաները նախազգուշացրել են, որ ռիսկերն աճել են արգելափակված ջրային ուղիների և այս ամսվա սկզբին տեղի ունեցած ջրհեղեղների այլ վնասների պատճառով: Հիդրոլոգիայի և ջրային տնտեսության ազգային ինստիտուտի նախազգուշացումները կգործեն մինչև հոկտեմբերի 1-ի առավոտ։ Կարգադրվել է ռիսկային գոտիներից դուրս գտնվող դպրոցներին և այլ շենքերին պատրաստ լինել տարհանվածներին ընդունելու համար: «Իրավիճակն ավելի վատ է, քան նախորդ անգամ», - ասել է Գալաթի շրջանի խորհրդի նախագահ Կոստել Ֆոտեան: Օդերևութաբանների կանխատեսմամբ՝ ամենաառատ տեղումները սպասվում են այսօր՝ սեպտեմբերի 29-ին։Շարունակությունը՝ սկզբնաղբյուր կայքում։Լուսանկարը՝ Դանիել Միհայլեսկու/AFP

17:50 - 29 սեպտեմբերի, 2024

Նիկոլ Փաշինյանը Ռումինիայի նախագահին ներկայացրել է Ադրբեջանի հետ խաղաղության պայմանագրի կնքման ուղղությամբ վերջին զարգացումները

ՄԱԿ-ի Գլխավոր վեհաժողովի 79-րդ նստաշրջանի շրջանակում կայացել է վարչապետ Նիկոլ Փաշինյանի և Ռումինիայի նախագահ Կլաուս Յոհաննիսի հանդիպումը: Այս մասին հայտնում են ՀՀ կառավարությունից։ Զրուցակիցներն ընդգծել են Հայաստան-Ռումինիա հարաբերությունների հետագա զարգացման կարևորությունը: Անդրադարձ է կատարվել Հայաստան-Եվրոպական միություն փոխգործակցությանը: Ռումինիայի նախագահը հայտնել է իր երկրի աջակցությունը մեր երկրի և ԵՄ-ի միջև կապերի ընդլայնման ու ամրապնդման գործում: Նիկոլ Փաշինյանը և Կլաուս Յոհաննիսը մտքեր են փոխանակել անվտանգային հարցերի շուրջ: Այս համատեքստում վարչապետը ներկայացրել է Ադրբեջանի հետ խաղաղության պայմանագրի կնքման ուղղությամբ վերջին զարգացումները, ինչպես նաև տարածաշրջանային կապուղիների ապաշրջափակմանն ուղղված ՀՀ Կառավարության «Խաղաղության խաչմերուկ» նախագիծը։

22:59 - 25 սեպտեմբերի, 2024

Ջրհեղեղ Կենտրոնական և Արևելյան Եվրոպայում, կան զոհեր ու անհետ կորածներ |azatutyun.am|

azatutyun.am: Կենտրոնական և Արևելյան Եվրոպայում իշխանությունները և կամավորները շարունակում են ջանքերը՝ հաղթահարելու հորդառատ անձրևների և դրա հետևանքով ջրհեղեղների հետևանքները: Ռումինիայում առնվազն հինգ մարդ է զոհվել, ևս երկուսը համարվում են անհետ կորած։ Չեխիայում չորս անհետ կորած կա, Լեհաստանում մեկ մարդ է խեղդվել։ Արտակարգ իրավիճակների ծառայություններն ուժեղացրել են միջոցառումները Ավստրիայի, Չեխիայի, Լեհաստանի և Ռումինիայի ցածրադիր վայրերում: Լեհաստանում ջրամբարի վարարման հետ կապված կրիտիկական իրավիճակի պատճառով տարհանվել են երկրի հարավ-արևմուտքում գտնվող Մեժիգորզե գյուղի բնակիչները։ Հաղորդվում է տարբեր վայրերում կամուրջների փլուզման մասին, վնասվել են հազարավոր տներ։Լուսանկարում՝ Չեխիայի Լիպովա-Լազնե գյուղում Ստարիկ գետի վարարման տեսարանն է՝ տեղացած հորդառատ անձրևից հետո/EPA-EFE

17:38 - 15 սեպտեմբերի, 2024

Ադրբեջանը, Վրաստանը, Ռումինիան և Հունգարիան համաձայնագիր են ստորագրել «Սևծովյան էներգետիկ մալուխ» նախագծի վերաբերյալ |factor.am|

factor.am: Ադրբեջանը, Վրաստանը, Ռումինիան և Հունգարիան Բուխարեստում համաձայնագիր են ստորագրել համատեղ ձեռնարկություն ստեղծելու համար՝ «Սևծովյան էներգետիկ մալուխ» նախագծի իրականացման նկատակով։ Այս մասին հայտնում է Ադրբեջանի էներգետիկայի նախարարությունը, գրում են տեղական լրատվամիջոցները։ Նշվում է, որ «Կանաչ էներգետիկ միջանցք» համատեղ ձեռնարկության ստեղծման բաժնետերերի համաձայնագիրը ստորագրել են Ադրբեջանի, Վրաստանի, Ռումինիայի և Հունգարիայի համակարգերի օպերատորները՝ Azerenergy, Georgia State Electric System, Transelectrica և MVM: «Համատեղ ձեռնարկությանը և աշխատանքային խմբին հանձնարարված է արագացնել համատեղ գործընթացները խորհրդատվական ընկերության հետ՝ սահմանված ժամկետում ավարտելու ծրագրի տեխնիկատնտեսական հիմնավորումը, նախապատրաստելու համատեղ ձեռնարկության գործողությունների պլանը մինչև նախարարների հաջորդ հանդիպումը, ինչպես նաև սկսել խորհրդակցությունները նախագծի բիզնես մոդելների հետ կապված։ «Կանաչ էներգետիկ միջանցք»-ը կֆինանսավորի ծրագրի տեխնիկատնտեսական հիմնավորումը և պատասխանատու կլինի դրա պատրաստման ու իրականացման մոնիթորինգի համար»,- ասվում է հաղորդագրության մեջ։

21:55 - 03 սեպտեմբերի, 2024

ՀՀ–ում ԵՄ դիտորդներն ու Ռումինիայի դեսպանն այցելել են Կապանի օդանավակայան, Մեղրի և Ագարակ համայնքներ |tert.am|

tert.am: ՀՀ–ում ԵՄ դիտորդներն ու Ռումինիայի դեսպանն այցելել են Կապանի օդանավակայան, Մեղրի և Ագարակ համայնքներ։ «Պատիվ է հյուրընկալել ՀՀ-ում Ռումինիայի դեսպան, նորին գերազանցություն Կոռնել Իոնեսկուին Սյունիքի օդանավակայանում, Մեղրիի և Ագարակի տարածաշրջաններում»,-նշված է ՀՀ-ում ԵՄ առաքելության` X-ի միկրոբլոգում արած գրառման մեջ։

19:17 - 28 մայիսի, 2024

Հայաստանն աշխատում է Սևծովյան էլեկտրական մալուխին միանալու ուղղությամբ. մանրամասներ |armeniasputnik.am|

armeniasputnik.am:Հայաստանն աշխատանք է տանում Սև ծովի հատակով «Վրաստան–Ռումինիա» էլեկտրական մալուխի անցկացման նախագծին միանալու ուղղությամբ։ Այս մասին Sputnik Արմենիայի գրավոր հարցմանն ի պատասխան հայտնեցին ՀՀ տարածքային կառավարման և ենթակառուցվածքների նախարարությունից։ Ավելի վաղ` 2024 թվականի հունվարին, Թբիլիսիում նախագծին միանալու պատրաստակամության մասին հայտարարել էր ՀՀ վարչապետ Նիկոլ Փաշինյանը։ Վրաստանի այն ժամանակվա նախարարների կաբինետի ղեկավար Իրակլի Ղարիբաշվիլիի հետ համատեղ մամուլի ասուլիսի ժամանակ Փաշինյանն ընդգծել էր, որ հայկական կողմը մեծ հետաքրքրություն է դրսևորում Սևծովյան էլեկտրական մալուխի նախագծի նկատմամբ։ Վարչապետի դիրքորոշումը հաստատեցին նաև գերատեսչությունում։ «Կարևորելով էներգետիկայի բնագավառում տարածաշրջանային համագործակցության զարգացումը` հայկական կողմը հետաքրքրություն է արտահայտել միանալ Վրաստան–Ռումինիա Անդրսևծովյան էլեկտրական մալուխի կառուցման ծրագրին», – ասվում է պատասխանում։ Այդ համատեքստում Հայաստանը տարբեր մակարդակներում անհրաժեշտ աշխատանքներ է իրականացնում նախագծի մասնակից երկրների, մասնավորապես` Վրաստանի հետ։ Միաժամանակ Հայաստանը զարգացնում է էներգետիկ ենթակառուցվածքները, որոնք տեխնիկական առումով կմեծացնեն նախագծին մասնակցություն ունենալու հնարավորությունները։ Նախարարությունում նշել են նաև, որ համագործակցության ձևաչափն ու պայմանները կքննարկվեն մասնակից երկրների համաձայնությունը ստանալուց հետո։ Հայաստանում ազատականացված էլեկտրաէներգետիկական շուկան խթանում է միջսահմանային առևտուրը Վրաստանի հետ, իսկ երկու երկրների միջև էլեկտրաէներգետիկայի բնագավառում ծավալվող փոխգործակցությունը հնարավորություն կտա կանաչ էներգիա արտահանել դեպի երրորդ երկրներ Վրաստանի միջոցով։ «Էներգետիկ անվտանգության, ինչպես նաև սպառողների հուսալի և անխափան էներգամատակարարման ապահովման համար շարունակվում են իրականացվել աշխատանքներ վերականգնվող էներգետիկ նոր հզորությունների ստեղծման, էներգետիկ ենթակառուցվածքների կառուցման և վերակառուցման, վերազինման և արդիականացման ուղղությամբ», – պարզաբանել են գերատեսչությունում։

16:22 - 10 փետրվարի, 2024

ՀՀ դեսպան Տիգրան Գալստյանն իր հավատարմագրերն է հանձնել Ռումինիայի նախագահ Կլաուս Յոհաննիսին

Հունվարի 22-ին Ռումինիայում Հայաստանի Հանրապետության դեսպան Տիգրան Գալստյանն իր հավատարմագրերն է հանձնել Ռումինիայի նախագահ Կլաուս Յոհաննիսին։ ՀՀ ԱԳՆ-ից հայտնում են, որ պաշտոնական արարողությանը հաջորդած առանձնազրույցի ընթացքում Ռումինիայի նախագահը շնորհավորել է Հայաստանի նորանշանակ դեսպանին պաշտոնի ստանձնման կապակցությամբ՝ վստահություն հայտնելով, որ հայ֊ռումինական հարաբերությունների զարգացման վերընթաց դինամիկան հետայսու ևս կպահպանվի՝ ներգրավելով երկկողմ հետաքրքրություն ներկայացնող նոր ոլորտներ։ Հանդիպման ընթացքում մտքեր են փոխանակվել տարածաշրջանային անվտանգային իրավիճակի, տնտեսական համագործակցությանն առնչվող հարցերի շուրջ։ Անդրադարձ է կատարվել ՀՀ֊ԵՄ հարաբերությունների ընդլայնման հեռանկարներին։

23:02 - 24 հունվարի, 2024

Դեսպան Գալստյանն ու Ռումինիայի ԱԳ նախարարը քննարկել են ԵՄ-ի հետ Հայաստանի գործընկերության շրջանակներում բազմակողմ համագործակցությանն առնչվող հարցեր

Հունվարի 19-ին Ռումինիայում Հայաստանի Հանրապետության դեսպան Տիգրան Գալստյանը հանդիպում է ունեցել Ռումինիայի արտաքին գործերի նախարար Լյումինիցա Օդոբեսկուի հետ՝ հավատարմագրերի պատճենի հանձնման կապակցությամբ: Այս մասին տեղեկացրին Ռումինիայում ՀՀ դեսպանությունից: Շնորհավորելով պաշտոնի ստանձնման առթիվ՝ Ռումինիայի ԱԳ նախարարը դեսպանին մաղթել է հաջողություն իր առաքելության մեջ և վստահություն հայտնել, որ նրա պաշտոնավարումը կնպաստի Հայաստանի և Ռումինիայի բարեկամական հարաբերությունների էլ ավելի ամրապնդմանը։ Հանդիպման ընթացքում քննարկվել են երկկողմ փոխգործակցության խորացման և ընդլայնման ներուժին, ինչպես նաև Եվրոպական միության հետ Հայաստանի գործընկերության շրջանակներում բազմակողմ համագործակցությանն առնչվող հարցեր։

17:46 - 19 հունվարի, 2024

Ռումինիան և Բուլղարիան ընդունվել են շենգենյան գոտի |tert.am|

tert.am: Ռումինիան և Բուլղարիան ընդունվել են շենգենյան գոտի։ Ինչպես հայտնում է Եվրահանձնաժողովի կայքը, այս մասին որոշումը միաձայն ընդունել է Եվրամիության խորհուրդը։ 2024 թվականի մարտին կվերացվի օդային և ծովային սահմանային հսկողությունը, իսկ ցամաքային անցակետերում հսկողությունն առայժմ կգործի։ Վերգետնյա անցակետերում հսկիչ սարքերի բարձրացման ժամկետները կքննարկվեն ավելի ուշ: Եվրահանձնաժողովը կարծում է, որ Ռումինիայի և Բուլղարիայի մուտքը շենգենյան գոտի «կնպաստի ճանապարհորդության, առևտրի և զբոսաշրջության զարգացմանը, ինչպես նաև ներքին շուկայի հետագա ամրապնդմանը»։

16:26 - 31 դեկտեմբերի, 2023

Արթուր Պողոսյանի գլխավորած պատվիրակությունը Բուխարեստում մասնակցում է կիբեռհանցագործության դեմ պայքարին նվիրված կոնֆերանսին

Գլխավոր դատախազի տեղակալ Արթուր Պողոսյանի գլխավորած՝ Հայաստանի Հանրապետության պատվիրակությունը դեկտեմբերի 13-15-ը Ռումինիայի մայրաքաղաք Բուխարեստում մասնակցում է Կիբեռհանցագործության դեմ պայքարում համագործակցությանը նվիրված «Օկտոպուս» համաժողովին: Միջոցառման շրջանակում ՀՀ պատվիրակությունն այսօր մասնակցել է նաև Եվրոպական միության և Եվրոպայի խորհրդի կողմից համատեղ իրականացվող CyberEast նախագծի փակման միջոցառմանը: Համաժողովի միջոցառումներից է Կիբեռհանցագործության ռազմավարությունների վերաբերյալ տարածաշրջանային բարձրաստիճան հանդիպումը՝ նվիրված Արևելյան գործընկերության տարածաշրջանում կիբեռհանցագործությունների դեմ պայքարի առաջնահերթություններին: Միջոցառման ընթացքում ստորագրվելու է կիբեռհանցագործությունների դեմ պայքարում ռազմավարական առաջնահերթությունների վերաբերյալ երկրորդ հռչակագիրը:

15:37 - 14 դեկտեմբերի, 2023