Վահագն Հովակիմյան

8-րդ գումարման ԱԺ պատգամավոր՝ «Քաղաքացիական պայմանագիր» խմբակցությունից։

Ծնվել է 1974թ. հունիսի 30-ին Երեւանում:

1993-1995թթ. ծառայել է ՀՀ զինված ուժերում:

1991-1993թթ. սովորել է ԵՊՀ ռադիոֆիզիկայի ֆակուլտետում: 1996-2000թթ.՝ ԵՊՀ փիլիոսոփայության, սոցիոլոգիայի, հոգեբանության եւ քաղաքագիտության ֆակուլտետում:

1998-1999թթ. եղել է «Օրագիր» օրաթերթի լրագրող: 1999-2012թթ.՝ «Հայկական ժամանակ» օրաթերթի լրագրող: 2012-2013թթ.՝ «Դարեսկիզբ» ՍՊԸ տնօրեն:

2012-2013թթ.՝ «Մեր տպարանը» ՍՊԸ փոխտնօրեն: 2012-2015թթ.՝ ՀՀ ԱԺ պատգամավոր Նիկոլ Փաշինյանի օգնական: 2013-2014թթ.` «Panorama.am» կայքի քաղաքական մեկնաբան: 2014-2016թթ.` «Ժողովուրդ» օրաթերթի փոխխմբագիր: 2017-2019թթ.՝ ՀՀ ԱԺ «Ելք» խմբակցության փորձագետ:

2016 թվականից Քաղաքացիական պայմանագիր կուսակցության վարչության անդամ է: 2018թ. սեպտեմբերի 23-ին ընտրվել է Երեւանի ավագանու անդամ, 2018թ. հոկտեմբերի 17-ին հրաժարվել է մանդատից:

2019-2021թթ.՝ ԱԺ պատգամավոր («Իմ քայլը» կուսակցությունների դաշինք, թիվ 2 ընտրատարածքի տարածքային ընտրական ցուցակ): ԱԺ պետական-իրավական հարցերի մշտական հանձնաժողովի անդամ: «Իմ քայլը» խմբակցության անդամ:

2021թ. հունիսի 20-ին ԱԺ պատգամավոր է ընտրվել «Քաղաքացիական պայմանագիր» կուսակցության համապետական ընտրական ցուցակով:

475 ընտրատեղամաս լիովին պատրաստ է Երևանի ավագանու ընտրություններին. ԿԸՀ նախագահը ներկայացրել է նախապատրաստական աշխատանքները |armenpress.am|

armenpress.am: Երևանի ավագանու գալիք ընտրությունները 2022 թվականին ձևավորված ԿԸՀ ներկայիս կազմի համար մեծությամբ առաջինն են: Հետևաբար, կարևորելով այդ հանգամանքը՝ կառույցն ընտրությունների նախապատրաստական աշխատանքները սկսել է ավելի վաղ, քան դրանք նշանակվել են օրենքով։ Ադ մասին հայտնեց ԿԸՀ նախագահ Վահագն Հովակիմյանը՝ ՀՀ-ում հավատարմագրված դիվանագետներին, Հայաստան ժամանած դիտորդներին, տարբեր երկրների ԿԸՀ ներկայացուցիչներին և լրագրողներին ներկայացնելով Երևանի ավագանու ընտրություններին ընդառաջ իրականացված աշխատանքները։ ԿԸՀ-ն ավագանու ընտրությունների նախապատրաստական աշխատանքները սկսել է դեռ տարեսկզբից։ Հովակիմյանը հիշեցրեց, որ ընտրությունների ավտոմատացված համակարգը Հայաստանում գործարկվում է 2007 թվականից։ Ընտրական օրենսգրքով ամրագրված ընտրական գործիքների բոլոր փուլերի լիակատար թափանցիկությունն ու հանրային վերահսկողությունն ապահովելու նպատակով կիրառվող էլեկտրոնային համակարգերը տարեցտարի ավելացել են։ Ըստ այդմ՝ կարևոր գործիքներից են մասնագիտացված դասընթացներին մասնակցելու հայտերի առցանց ընդունման, դասընթացների կազմակերպման, անցկացման և ամփոփման համակարգը, դասընթացներին մասնակցելու դիմումներին առցանց հետևելու համակարգը, տեղամասային ընտրական հանձնաժողովների անդամների հայտերի առցանց ներկայացման և նշանակման համակարգը, տեղական ԶԼՄ-ների ներկայացուցիչների և տեղական դիտորդների հայտերի առցանց ընդունման և վկայականների տրամադրման համակարգը, կուսակցությունների և դաշինքների կողմից ընտրական ցուցակների, արտաքին գովազդային վահանակների համար հայտերի, գույքի և եկամուտի հայտարարագրերի առցանց ներկայացման համակարգը, ընտրողների գրանցումն իրականացնող տեխնիկական սարքավորումների մասնագետների ռեեստրի վարման համակարգը, ընտրողների կենտրոնական տեղեկատվական համակարգը, քվեարկության օրը ընտրատեղամասերում քվեարկողների նույնականացման էլեկտրոնային համակարգը։ «Քվեարկության ամբողջ ընթացքի և քվեարկության արդյունքների ամփոփման գործընթացը հեռարձակվելու է առցանց Երևանի բոլոր՝ 45 տեղամասային կենտրոններից՝ իրական ժամանակում, որին յուրաքանչյուր ոք կարող է հետևել նույնիսկ բջջային հեռախոսի հավելվածի միջոցով: Իսկ 20։00-ից հետո կարելի է հետևել քվեարկության արդյունքներն ամփոփելու գործընթացին։ Այսօրվանից արդեն իսկ առցանց հեռարձակվում է ընտրատեղամասերի կահավորման գործընթացը, և բոլոր ցանկացողները կարող են հետևել այդ պրոցեսին։ Հայաստանում կուսակցությունները, դաշինքները համամասնական ցուցակները ներկայացնելիս հնարավորություն են ստանում դա անել առցանց, այսինքն՝ անձը հաստատող փաստաթղթի տվյալը մուտքագրելուց հետո համակարգը մնացած անձնական տվյալները տեղադրում է ավտոմատ»,- տեղեկացրեց ԿԸՀ նախագահը։ Հովակիմյանի հավաստմամբ՝ էլեկտրոնային համակարգի ներդրման շնորհիվ հնարավոր է ԿԸՀ պաշտոնական կայքում մեկ րոպե պարբերականությամբ հրապարակել քվեարկության արդյունքների մուտքագրման տվյալները։ Նշված համակարգի միջոցով մոտավորապես 22։00-ից կամ 23։00-ից սկսած, երբ արդյունքները տեղամասերից կհասնեն ընտրատարածքային ընտրական հանձնաժողովներին, հնարավոր կլինի առցանց հետևել արդյունքների ամփոփման գործընթացին։ Հովակիմյանը շեշտեց, որ ընտրական գործընթացներում մատչելիության ապահովումն ամրագրված է Ընտրական օրենսգրքով, ուստի ԿԸՀ-ն իր լիազորությունների շրջանակում երաշխավորում է օրենքի կիրառումը՝ ապահովելով քվեարկությանը մասնակցելու դժվարություն ունեցող ընտրողների ընտրական իրավունքը։ Երևանի ավագանու ընտրություններին ընդառաջ՝ ԿԸՀ կայքում մատչելիության գործիքակազմն ամբողջությամբ գործարկվել է։ Նիստերի հեռարձակումը կատարվել է ժեստերի լեզվի թարգմանությամբ, իրականացվել է էլեկտրոնային ուսուցում հաշմանդամություն ունեցող մարդկանց համար, պատրաստվել և տարածվել են հաշմանդամություն ունեցող անձանց ընտրական իրավունքին վերաբերող սոցիալական գովազդներ ու անիմացիոն ֆիլմեր։ Ընտրությունների կազմակերպման նպատակով Երևանում կազմավորվել է 475 ընտրատեղամաս։ ԿԸՀ-ն և ընտրատարածքային ընտրական հանձնաժողովները դեռևս տարեսկզբից Երևանի քաղաքապետարանի վարչական շրջանների աշխատակազմերի հետ համագործակցությամբ գույքագրել և ուսումնասիրել են պոտենցիալ տեղամասային կենտրոնների տարածքները՝ իրականացնելով դրանց մատչելիության գնահատում և ընտրելով առավել մատչելիները, որոնց ցանկը հրապարակված է ԿԸՀ կայքում։ «Տեղաշարժման դժվարություններ ունեցող ընտրողները, համաձայն Ընտրական օրենսգրքի կարգավորումների, իրավունք ունեն իրենց հիմնական տեղամասը փոխել և ընտրել իրենց համար նախընտրելի տեղամաս։ ԿԸՀ կայքում տեղադրված է նաև համապատասխան ընտրատեղամասերի ինտերակտիվ քարտեզը։ Տեսողական խնդիրներ ունեցող ընտրողների համար տպագրվել են առանձին ձեռնարկներ՝ թույլ տեսողություն ունեցողների համար խոշոր տառաչափով, իսկ կույրերի համար՝ բրայլյան տպագրությամբ։ Նման ընտրողների ինքնուրույն քվեարկելու համար պատրաստվել և բոլոր ընտրատեղամասերին հատկացվել են բրայլյան ստվարաթղթե հատուկ կաղապարներ»,- ասաց Հովակիմյանը։ Շարունակությունը՝ armenpress.am-ում։

15:45 - 16 սեպտեմբերի, 2023

Ընդդիմությունը դեռ քննարկում է ԿԸՀ նախագահ Վահագն Հովակիմյանի ընտրությունը վիճարկելու հարցը

«Քաղաքացիական պայմանագիր» խմբակցության նախկին պատգամավոր Վահագն Հովակիմյանի՝ ՀՀ կենտրոնական ընտրական հանձնաժողովի նախագահ ընտրվելուց ավելի քան երեք ամիս անց Ազգային ժողովի ընդդիմադիր «Պատիվ ունեմ» եւ «Հայաստան» խմբակցությունները դեռ քննարկում են նրա ընտրությունը իրավական ճանապարհներով վիճարկելու հարցը։ Հովակիմյանը, հիշեցնենք, այդ պաշտոնին ընտրվել էր 2022 թ․ հոկտեմբերի 7-ին Ազգային ժողովի փակ, գաղտնի քվեարկությամբ։ Նրա թեկնածությունն ու ընտրությունը բուռն քննարկման եւ քննադատության առիթ էին դարձել՝ ի թիվս այլնի, պայմանավորված նաեւ այն հանգամանքով, որ նա մասնակցել էր իր իսկ թեկնածության քվեարկությանը՝ այդպիսով խախտելով «ՀՀ ազգային ժողովի պատգամավորի գործունեության երաշխիքների մասին» ՀՀ օրենքի 4-րդ հոդվածի պահանջները։ Ընդ որում, նրա քվեն վճռորոշ էր եղել ընտրության արդյունքների հարցում, քանի որ նա ստացել էր անհրաժեշտ նվազագույն՝ 65 ձայն։ Ընտրությունից հետո մենք գրավոր հարցմամբ դիմել էինք ԱԺ բոլոր խմբակցություններին՝ խնդրելով հայտնել, թե ինչ դիրքորոշում ունեն Հովակիմյանի սեփական քվեարկությանը մասնակցելու վերաբերյալ եւ արդյոք պատրաստվում են իրավական գործընթաց սկսել։ Հաշվի առնելով, որ նշանակումից հետո մի շարք հասարակական կազմակերպություններ հայտարարությամբ էին հանդես եկել՝ ի թիվս այլնի, խմբակցություններին հորդորելով ԱԺ պատգամավորական էթիկայի հարցերով ժամանակավոր հանձնաժողով ստեղծելու վերաբերյալ նախագիծ ներկայացնել՝ հարցրել էինք նաեւ՝ արդյո՞ք պատրաստվում են նման նախագիծ ներկայացնել։ «Քաղաքացիական պայմանագիր» խմբակցությունը անպատասխան էր թողել մեր գրավոր հարցումը, իսկ ընդդիմադիր խմբակցությունների ներկայացուցիչները նշել էին, որ քննարկում են իրավական գործընթաց սկսելու հարցը։ Մասնավորապես, «Պատիվ ունեմ» խմբակցության պատգամավոր Թագուհի Թովմասյանը, մեր հարցմանն ի պատասխան, տեղեկացրել էր, որ ԿԸՀ-ի նախագահի ընտրության օրինականության հարցը պետք է վիճարկվի ՀՀ բարձր` Սահմանադրական դատարանում, ուստի իրենք աշխատանքներ են տանում համապատասխան դիմումը կազմելու ուղղությամբ, իսկ «Հայաստան» խմբակցության քարտուղար Արծվիկ Մինասյանը հայտնել էր, որ իրավական գործընթաց նախաձեռնելու եւ համանման հարցերը գտնվում են քննարկման փուլում, արդյունավետ լուծման հանգելու պարագայում լրացուցիչ կտեղեկացնեն։ Հաշվի առնելով, որ այս պատասխաններից երկու ամիս անց ընդդիմադիր խմբակցությունները լրացուցիչ հայտարարություններով հանդես չէին եկել՝ նախորդ տարեվերջին՝ դեկտեմբերի 23-ին, մենք կրկին գրավոր հարցում ենք ուղարկել։ Մասնավորապես, «Պատիվ ունեմ» խմբակցության պատգամավոր Թագուհի Թովմասյանին խնդրել էինք հայտնել, թե երկու ամիս անց ինչ փուլում են հիշյալ դիմումի նախապատրաստական աշխատանքները, իսկ եթե խմբակցության դիրքորոշումը փոփոխվել է ՍԴ դիմելու հարցում, խնդրել ենք մանրամասնել այդ փոփոխության պատճառները։ «Հայաստան» խմբակցության քարտուղար Արծվիկ Մինասյանին խնդրել ենք հայտնել, թե ինչ վերջնարդյունքի հանգեցին իրենց քննարկումները․ եթե խմբակցությունն ընտրել է իրավական գործընթաց նախաձեռնելու տարբերակը, ապա ինչ գործընթացի մասին է խոսքը, եւ այս ընթացքում ինչ է արվել այդ ուղղությամբ, իսկ եթե որոշել է որեւէ գործընթաց չիրականացնել, ապա՝ ինչ պատճառաբանությամբ։ Խմբակցությունները մեր հարցմանը պատասխանել են օրենքով սահմանված ժամկետների խախտմամբ՝ համապատասխանաբար այս տարվա հունվարի 10-ին և հունվարի 18-ին։ Թագուհի Թովմասյանը հայտնել է, որ նշած հարցով ԱԺ «Պատիվ ունեմ» խմբակցությունում քննարկումները մեր նշած ժամանակահատվածում շարունակվել են, կազմվել է համապատասխան դիմումի նախագիծ․ «Քանի որ համապատասխան որոշումը կոլեգիալ մարմնի՝ խմբակցության տիրույթում է, խնդրում եմ ընդունել ի գիտություն, որ ըստ անհրաժեշտության՝ խմբակցությունը հրապարակայնորեն կանդրադառնա Ձեր բարձրացրած հարցի ուղղությամբ համապատասխան գործընթացի նախաձեռնման հարցին»,- ասված է պատասխանում։ Արծվիկ Մինասյանն էլ նշել է, որ Վահագն Հովակիմյանի թեկնածության առաջադրման եւ «ընտրության» վերաբերյալ «Հայաստան» խմբակցության կողմից տրված գնահատականներն անփոփոխ են․ «Այս ընթացքում անցկացվել են մի շարք քննարկումներ (այդ թվում երկու ընդդիմադիր խմբակցությունների միջև): Բացի մեր կողմից հրապարակայնորեն հնչեցված իրավաքաղաքական գնահատականներից, քննարկվում են նաև դատական կարգով բողոքարկման հնարավորությունները: Դիտարկվում են մի քանի տարբերակներ, մասնավորապես, բողոքը պետք է ներկայացվի վարչակա՞ն թե՞ Սահմանադրական դատարան, այն անհատակա՞ն թե՞ նորմատիվ ակտի վիճարկմանը պետք է վերաբարի և համանման այլ հարցերի շուրջ: Քննարկումները շարունակվում են: Այս պահին չկա վերջնական ընտրված լուծում»,- նշել է Մինասյանը՝ հավելելով, որ արդյունքների մասին լրացուցիչ կտեղեկացնեն։ Միլենա Խաչիկյան

19:51 - 19 հունվարի, 2023