Ռումինիա

Ռումինիայի նախագահական ընտրություններում անակնկալ արդյունքներ է գրանցել ծայրահեղ աջ թեկնածուն |armenpress.am|

armenpress.am: Ռումինիայում նոյեմբերի 24-ին կայացած նախագահական ընտրությունների առաջին փուլում ծայրահեղ աջ Կալին Ջորջեսկուն և վարչապետ Մարչել Չոլակուն գրեթե հավասար ձայներ են հավաքել։ Ամենայն հավանականությամբ, հենց այս երկու թեկնածուները կպայքարեն ընտրությունների երկրորդ փուլում, որը պետք է անցկացվի դեկտեմբերի 8-ին։ Այս մասին հաղորդում է BBC-ն։ Ըստ Կենտրոնական ընտրական բյուրոյի՝ ձայների 96%-ի հաշվարկի արդյունքներով Ջորջեսկուն ստանում է ձայների 22%-ը, իսկ Չոլակուն՝ 20%-ը։ Պարբերականը նշում է, որ Ջորջեսկուի ցուցաբերած արդյունքները բավական մեծ անակնկալի են բերել բոլորին. նա որևէ կուսակցության չի պատկանում և իր ընտրարշավը հիմնականում անցկացրել է TikTok սոցիալական հարթակում։ Վարչապետ Մարչել Չոլակուն Ռումինիայի Սոցիալ-դեմոկրատական կուսակցությունից է և հայտարարել է, որ երկիրը կշարունակի իր արևմտամետ ուղին։ Մինչդեռ Կալին Ջորջեսկուն հայտարարել է, որ վերջ կդնի, իր բնութագրմամբ, Եվրամիությանը և ՆԱՏՕ-ին ստորադասվելուն, հատկապես՝ Ուկրաինային աջակցության հարցում։ Նոյեմբերի 24-ին էքզիթ փոլերը ցույց էին տալիս, որ առաջատարը Մարչել Չոլակուն է, իսկ նրան հաջորդում է աջ կենտրոնամետ թեկնածու Էլենա Լասկոնին։ Սակայն ըստ վերջին տվյալների՝ Լասկոնին գրավում է երրորդ հորիզոնականը՝ ձայների 18%-ով, իսկ մյուս թեկնածու Ջորջ Սիմիոնը՝ չորրորդ հորիզոնականը։ Ռումինիայում նախագահը հիմնականում խորհրդանշական դեր ունի, բայց զգալի ազդեցություն ունի արտաքին քաղաքականության հարցում և վերահսկում է երկրի պաշտպանական ծախսերը։

10:27 - 25 նոյեմբերի, 2024

Ռումինիայում նախագահական ընտրություններ են |factor.am|

factor.am: Ռումինիայում մեկնարկել են նախագահական ընտրությունները։ Ժամը 7:00-ին ամբողջ երկրում բացվել է շուրջ 19,000 ընտրատեղամաս, հայտնում է ՌԻԱ Նովոստին։ Պետության ղեկավարն ընտրվում է հինգ տարով։ Մասնակցության շեմ չկա, ընտրությունները կայացած կհամարվեն մասնակիցների ցանկացած քանակի դեպքում։ Նախագահի պաշտոնին հավակնում է 13 թեկնածու: Հաղթող կճանաչվի այն թեկնածուն, որը կհավաքի ձայների կեսից ավելին։ Եթե ոչ ոք չհավաքի անհրաժեշտ թվով ձայներ, երկու շաբաթից կկայանա երկրորդ փուլ, որտեղ հաղթելու համար պետք է հավաքել պարզ մեծամասնություն։

13:48 - 24 նոյեմբերի, 2024

Ռումինիայում վտանգի ամենաբարձր մակարդակ է սահմանվել ջրհեղեղի պատճառով |azatutyun.am|

azatutyun.am: Ռումինիայի իշխանությունները երկու արևելյան շրջաններում հայտարարել են ջրհեղեղի վտանգի ամենաբարձր մակարդակ և տարհանելու հորդոր են արել։ Երկրի մյուս հատվածներում ուժեղացվել է զգոնությունը սեպտեմբերի 29-ին հորդառատ անձրևների և քամիների մոտենալուն զուգընթաց: Պաշտոնյաները նախազգուշացրել են, որ ռիսկերն աճել են արգելափակված ջրային ուղիների և այս ամսվա սկզբին տեղի ունեցած ջրհեղեղների այլ վնասների պատճառով: Հիդրոլոգիայի և ջրային տնտեսության ազգային ինստիտուտի նախազգուշացումները կգործեն մինչև հոկտեմբերի 1-ի առավոտ։ Կարգադրվել է ռիսկային գոտիներից դուրս գտնվող դպրոցներին և այլ շենքերին պատրաստ լինել տարհանվածներին ընդունելու համար: «Իրավիճակն ավելի վատ է, քան նախորդ անգամ», - ասել է Գալաթի շրջանի խորհրդի նախագահ Կոստել Ֆոտեան: Օդերևութաբանների կանխատեսմամբ՝ ամենաառատ տեղումները սպասվում են այսօր՝ սեպտեմբերի 29-ին։Շարունակությունը՝ սկզբնաղբյուր կայքում։Լուսանկարը՝ Դանիել Միհայլեսկու/AFP

17:50 - 29 սեպտեմբերի, 2024

Նիկոլ Փաշինյանը Ռումինիայի նախագահին ներկայացրել է Ադրբեջանի հետ խաղաղության պայմանագրի կնքման ուղղությամբ վերջին զարգացումները

ՄԱԿ-ի Գլխավոր վեհաժողովի 79-րդ նստաշրջանի շրջանակում կայացել է վարչապետ Նիկոլ Փաշինյանի և Ռումինիայի նախագահ Կլաուս Յոհաննիսի հանդիպումը: Այս մասին հայտնում են ՀՀ կառավարությունից։ Զրուցակիցներն ընդգծել են Հայաստան-Ռումինիա հարաբերությունների հետագա զարգացման կարևորությունը: Անդրադարձ է կատարվել Հայաստան-Եվրոպական միություն փոխգործակցությանը: Ռումինիայի նախագահը հայտնել է իր երկրի աջակցությունը մեր երկրի և ԵՄ-ի միջև կապերի ընդլայնման ու ամրապնդման գործում: Նիկոլ Փաշինյանը և Կլաուս Յոհաննիսը մտքեր են փոխանակել անվտանգային հարցերի շուրջ: Այս համատեքստում վարչապետը ներկայացրել է Ադրբեջանի հետ խաղաղության պայմանագրի կնքման ուղղությամբ վերջին զարգացումները, ինչպես նաև տարածաշրջանային կապուղիների ապաշրջափակմանն ուղղված ՀՀ Կառավարության «Խաղաղության խաչմերուկ» նախագիծը։

22:59 - 25 սեպտեմբերի, 2024

Ջրհեղեղ Կենտրոնական և Արևելյան Եվրոպայում, կան զոհեր ու անհետ կորածներ |azatutyun.am|

azatutyun.am: Կենտրոնական և Արևելյան Եվրոպայում իշխանությունները և կամավորները շարունակում են ջանքերը՝ հաղթահարելու հորդառատ անձրևների և դրա հետևանքով ջրհեղեղների հետևանքները: Ռումինիայում առնվազն հինգ մարդ է զոհվել, ևս երկուսը համարվում են անհետ կորած։ Չեխիայում չորս անհետ կորած կա, Լեհաստանում մեկ մարդ է խեղդվել։ Արտակարգ իրավիճակների ծառայություններն ուժեղացրել են միջոցառումները Ավստրիայի, Չեխիայի, Լեհաստանի և Ռումինիայի ցածրադիր վայրերում: Լեհաստանում ջրամբարի վարարման հետ կապված կրիտիկական իրավիճակի պատճառով տարհանվել են երկրի հարավ-արևմուտքում գտնվող Մեժիգորզե գյուղի բնակիչները։ Հաղորդվում է տարբեր վայրերում կամուրջների փլուզման մասին, վնասվել են հազարավոր տներ։Լուսանկարում՝ Չեխիայի Լիպովա-Լազնե գյուղում Ստարիկ գետի վարարման տեսարանն է՝ տեղացած հորդառատ անձրևից հետո/EPA-EFE

17:38 - 15 սեպտեմբերի, 2024

Ադրբեջանը, Վրաստանը, Ռումինիան և Հունգարիան համաձայնագիր են ստորագրել «Սևծովյան էներգետիկ մալուխ» նախագծի վերաբերյալ |factor.am|

factor.am: Ադրբեջանը, Վրաստանը, Ռումինիան և Հունգարիան Բուխարեստում համաձայնագիր են ստորագրել համատեղ ձեռնարկություն ստեղծելու համար՝ «Սևծովյան էներգետիկ մալուխ» նախագծի իրականացման նկատակով։ Այս մասին հայտնում է Ադրբեջանի էներգետիկայի նախարարությունը, գրում են տեղական լրատվամիջոցները։ Նշվում է, որ «Կանաչ էներգետիկ միջանցք» համատեղ ձեռնարկության ստեղծման բաժնետերերի համաձայնագիրը ստորագրել են Ադրբեջանի, Վրաստանի, Ռումինիայի և Հունգարիայի համակարգերի օպերատորները՝ Azerenergy, Georgia State Electric System, Transelectrica և MVM: «Համատեղ ձեռնարկությանը և աշխատանքային խմբին հանձնարարված է արագացնել համատեղ գործընթացները խորհրդատվական ընկերության հետ՝ սահմանված ժամկետում ավարտելու ծրագրի տեխնիկատնտեսական հիմնավորումը, նախապատրաստելու համատեղ ձեռնարկության գործողությունների պլանը մինչև նախարարների հաջորդ հանդիպումը, ինչպես նաև սկսել խորհրդակցությունները նախագծի բիզնես մոդելների հետ կապված։ «Կանաչ էներգետիկ միջանցք»-ը կֆինանսավորի ծրագրի տեխնիկատնտեսական հիմնավորումը և պատասխանատու կլինի դրա պատրաստման ու իրականացման մոնիթորինգի համար»,- ասվում է հաղորդագրության մեջ։

21:55 - 03 սեպտեմբերի, 2024

ՀՀ–ում ԵՄ դիտորդներն ու Ռումինիայի դեսպանն այցելել են Կապանի օդանավակայան, Մեղրի և Ագարակ համայնքներ |tert.am|

tert.am: ՀՀ–ում ԵՄ դիտորդներն ու Ռումինիայի դեսպանն այցելել են Կապանի օդանավակայան, Մեղրի և Ագարակ համայնքներ։ «Պատիվ է հյուրընկալել ՀՀ-ում Ռումինիայի դեսպան, նորին գերազանցություն Կոռնել Իոնեսկուին Սյունիքի օդանավակայանում, Մեղրիի և Ագարակի տարածաշրջաններում»,-նշված է ՀՀ-ում ԵՄ առաքելության` X-ի միկրոբլոգում արած գրառման մեջ։

19:17 - 28 մայիսի, 2024

Հայաստանն աշխատում է Սևծովյան էլեկտրական մալուխին միանալու ուղղությամբ. մանրամասներ |armeniasputnik.am|

armeniasputnik.am:Հայաստանն աշխատանք է տանում Սև ծովի հատակով «Վրաստան–Ռումինիա» էլեկտրական մալուխի անցկացման նախագծին միանալու ուղղությամբ։ Այս մասին Sputnik Արմենիայի գրավոր հարցմանն ի պատասխան հայտնեցին ՀՀ տարածքային կառավարման և ենթակառուցվածքների նախարարությունից։ Ավելի վաղ` 2024 թվականի հունվարին, Թբիլիսիում նախագծին միանալու պատրաստակամության մասին հայտարարել էր ՀՀ վարչապետ Նիկոլ Փաշինյանը։ Վրաստանի այն ժամանակվա նախարարների կաբինետի ղեկավար Իրակլի Ղարիբաշվիլիի հետ համատեղ մամուլի ասուլիսի ժամանակ Փաշինյանն ընդգծել էր, որ հայկական կողմը մեծ հետաքրքրություն է դրսևորում Սևծովյան էլեկտրական մալուխի նախագծի նկատմամբ։ Վարչապետի դիրքորոշումը հաստատեցին նաև գերատեսչությունում։ «Կարևորելով էներգետիկայի բնագավառում տարածաշրջանային համագործակցության զարգացումը` հայկական կողմը հետաքրքրություն է արտահայտել միանալ Վրաստան–Ռումինիա Անդրսևծովյան էլեկտրական մալուխի կառուցման ծրագրին», – ասվում է պատասխանում։ Այդ համատեքստում Հայաստանը տարբեր մակարդակներում անհրաժեշտ աշխատանքներ է իրականացնում նախագծի մասնակից երկրների, մասնավորապես` Վրաստանի հետ։ Միաժամանակ Հայաստանը զարգացնում է էներգետիկ ենթակառուցվածքները, որոնք տեխնիկական առումով կմեծացնեն նախագծին մասնակցություն ունենալու հնարավորությունները։ Նախարարությունում նշել են նաև, որ համագործակցության ձևաչափն ու պայմանները կքննարկվեն մասնակից երկրների համաձայնությունը ստանալուց հետո։ Հայաստանում ազատականացված էլեկտրաէներգետիկական շուկան խթանում է միջսահմանային առևտուրը Վրաստանի հետ, իսկ երկու երկրների միջև էլեկտրաէներգետիկայի բնագավառում ծավալվող փոխգործակցությունը հնարավորություն կտա կանաչ էներգիա արտահանել դեպի երրորդ երկրներ Վրաստանի միջոցով։ «Էներգետիկ անվտանգության, ինչպես նաև սպառողների հուսալի և անխափան էներգամատակարարման ապահովման համար շարունակվում են իրականացվել աշխատանքներ վերականգնվող էներգետիկ նոր հզորությունների ստեղծման, էներգետիկ ենթակառուցվածքների կառուցման և վերակառուցման, վերազինման և արդիականացման ուղղությամբ», – պարզաբանել են գերատեսչությունում։

16:22 - 10 փետրվարի, 2024

ՀՀ դեսպան Տիգրան Գալստյանն իր հավատարմագրերն է հանձնել Ռումինիայի նախագահ Կլաուս Յոհաննիսին

Հունվարի 22-ին Ռումինիայում Հայաստանի Հանրապետության դեսպան Տիգրան Գալստյանն իր հավատարմագրերն է հանձնել Ռումինիայի նախագահ Կլաուս Յոհաննիսին։ ՀՀ ԱԳՆ-ից հայտնում են, որ պաշտոնական արարողությանը հաջորդած առանձնազրույցի ընթացքում Ռումինիայի նախագահը շնորհավորել է Հայաստանի նորանշանակ դեսպանին պաշտոնի ստանձնման կապակցությամբ՝ վստահություն հայտնելով, որ հայ֊ռումինական հարաբերությունների զարգացման վերընթաց դինամիկան հետայսու ևս կպահպանվի՝ ներգրավելով երկկողմ հետաքրքրություն ներկայացնող նոր ոլորտներ։ Հանդիպման ընթացքում մտքեր են փոխանակվել տարածաշրջանային անվտանգային իրավիճակի, տնտեսական համագործակցությանն առնչվող հարցերի շուրջ։ Անդրադարձ է կատարվել ՀՀ֊ԵՄ հարաբերությունների ընդլայնման հեռանկարներին։

23:02 - 24 հունվարի, 2024

Դեսպան Գալստյանն ու Ռումինիայի ԱԳ նախարարը քննարկել են ԵՄ-ի հետ Հայաստանի գործընկերության շրջանակներում բազմակողմ համագործակցությանն առնչվող հարցեր

Հունվարի 19-ին Ռումինիայում Հայաստանի Հանրապետության դեսպան Տիգրան Գալստյանը հանդիպում է ունեցել Ռումինիայի արտաքին գործերի նախարար Լյումինիցա Օդոբեսկուի հետ՝ հավատարմագրերի պատճենի հանձնման կապակցությամբ: Այս մասին տեղեկացրին Ռումինիայում ՀՀ դեսպանությունից: Շնորհավորելով պաշտոնի ստանձնման առթիվ՝ Ռումինիայի ԱԳ նախարարը դեսպանին մաղթել է հաջողություն իր առաքելության մեջ և վստահություն հայտնել, որ նրա պաշտոնավարումը կնպաստի Հայաստանի և Ռումինիայի բարեկամական հարաբերությունների էլ ավելի ամրապնդմանը։ Հանդիպման ընթացքում քննարկվել են երկկողմ փոխգործակցության խորացման և ընդլայնման ներուժին, ինչպես նաև Եվրոպական միության հետ Հայաստանի գործընկերության շրջանակներում բազմակողմ համագործակցությանն առնչվող հարցեր։

17:46 - 19 հունվարի, 2024

Ռումինիան և Բուլղարիան ընդունվել են շենգենյան գոտի |tert.am|

tert.am: Ռումինիան և Բուլղարիան ընդունվել են շենգենյան գոտի։ Ինչպես հայտնում է Եվրահանձնաժողովի կայքը, այս մասին որոշումը միաձայն ընդունել է Եվրամիության խորհուրդը։ 2024 թվականի մարտին կվերացվի օդային և ծովային սահմանային հսկողությունը, իսկ ցամաքային անցակետերում հսկողությունն առայժմ կգործի։ Վերգետնյա անցակետերում հսկիչ սարքերի բարձրացման ժամկետները կքննարկվեն ավելի ուշ: Եվրահանձնաժողովը կարծում է, որ Ռումինիայի և Բուլղարիայի մուտքը շենգենյան գոտի «կնպաստի ճանապարհորդության, առևտրի և զբոսաշրջության զարգացմանը, ինչպես նաև ներքին շուկայի հետագա ամրապնդմանը»։

16:26 - 31 դեկտեմբերի, 2023

Արթուր Պողոսյանի գլխավորած պատվիրակությունը Բուխարեստում մասնակցում է կիբեռհանցագործության դեմ պայքարին նվիրված կոնֆերանսին

Գլխավոր դատախազի տեղակալ Արթուր Պողոսյանի գլխավորած՝ Հայաստանի Հանրապետության պատվիրակությունը դեկտեմբերի 13-15-ը Ռումինիայի մայրաքաղաք Բուխարեստում մասնակցում է Կիբեռհանցագործության դեմ պայքարում համագործակցությանը նվիրված «Օկտոպուս» համաժողովին: Միջոցառման շրջանակում ՀՀ պատվիրակությունն այսօր մասնակցել է նաև Եվրոպական միության և Եվրոպայի խորհրդի կողմից համատեղ իրականացվող CyberEast նախագծի փակման միջոցառմանը: Համաժողովի միջոցառումներից է Կիբեռհանցագործության ռազմավարությունների վերաբերյալ տարածաշրջանային բարձրաստիճան հանդիպումը՝ նվիրված Արևելյան գործընկերության տարածաշրջանում կիբեռհանցագործությունների դեմ պայքարի առաջնահերթություններին: Միջոցառման ընթացքում ստորագրվելու է կիբեռհանցագործությունների դեմ պայքարում ռազմավարական առաջնահերթությունների վերաբերյալ երկրորդ հռչակագիրը:

15:37 - 14 դեկտեմբերի, 2023

Ռումինիան լիովին աջակցում է ԵՄ-ի հետ Հայաստանի համագործակցությանը. Ռումինիայի ԱԳ նախարար Օդոբեսկու |1lurer.am|

1lurer.am: ԵՄ արտաքին գործերի նախարարների խորհրդի նիստի շրջանակներում կայացել է նաև Ռումինիայի և Հայաստանի արտգործնախարարներ Լումինիտա Օդոբեսկուի և Արարատ Միրզոյանի հանդիպումը: «Հաճելի հանդիպում ունեցա Հայաստանի արտգործնախարար Արարատ Միրզոյանի հետ ԵՄ արտաքին գործերի նախարարների խորհրդի նիստից առաջ: Պատրաստ ենք աշխատել երկկողմ և ԵՄ մակարդակով: Ռումինիան լիովին աջակցում է ԵՄ-ի հետ Հայաստանի համագործակցությանը»,- արտգործնախարարը գրել է Իքսի իր միկրոբլոգում:

19:02 - 11 դեկտեմբերի, 2023

Ջեյմս Օ'Բրայենը կայցելի Ադրբեջան՝ աջակցելու Բաքվի և Երևանի միջև խաղաղությանը. Պետդեպ |tert.am|

tert.am: ԱՄՆ պետքարտուղարի՝ Եվրոպայի և Եվրասիայի հարցերով օգնական Ջեյմս Օ'Բրայենը դեկտեմբերի 6-ից 8-ը կայցելի Ադրբեջան և Ռումինիա։ Այս մասին ասվում է Պետդեպարտամենտի մամուլի ծառայության հայտարարության մեջ։Օ'Բրայենը Բաքվում կհանդիպի ադրբեջանցի պաշտոնյաների հետ՝ նպատակ ունենալով ամրապնդել երկկողմ հարաբերությունները և աջակցել Ադրբեջանի և Հայաստանի միջև խաղաղությանը։Մինչդեռ Ռումինիայում պետքարտուղարի օգնականը կմասնակցի հացահատիկի արտահանմանը նվիրված հանդիպմանը:

09:38 - 05 դեկտեմբերի, 2023

Բարձր եմ գնահատում Ռումինիայի դերակատարությունը Հայաստանում ԵՄ մշտադիտարկման առաքելության տեղակայման ապահովման գործում. Փաշինյան

Վարչապետ Նիկոլ Փաշինյանը շնորհավորական ուղերձ է հղել Ռումինիայի վարչապետ Յոն-Մարչել Չոլակուին ազգային տոնի՝ Մեծ միավորման օրվա առիթով: Ուղերձում ասված է. «Հայաստանի կառավարության և անձամբ իմ անունից ջերմորեն շնորհավորում եմ Ռումինիայի ազգային տոնի՝ Մեծ միավորման օրվա կապակցությամբ։ Գոհունակությամբ արձանագրելով հայ-ռումինական հարաբերություններում առկա դրական դինամիկան՝ համոզված եմ, որ համատեղ ջանքերի շնորհիվ կնպաստենք հայ-ռումինական հարաբերությունների հետագա զարգացմանը և ակտիվ երկխոսության խորացմանը երկկողմ հետաքրքրություն ներկայացնող բոլոր ոլորտներում։ Բարձր եմ գնահատում Ռումինիայի դերակատարությունը Հայաստանում ԵՄ քաղաքացիական մշտադիտարկման առաքելության տեղակայման և գործունեության ապահովման գործում: Օգտվելով առիթից՝ շնորհակալություն եմ հայտնում Լեռնային Ղարաբաղից բռնի տեղահանված մեր հայրենակիցներին Ռումինիայի տրամադրած հումանիտար աջակցության համար։ Մաղթում եմ Ձեզ քաջառողջություն և հաջողություններ, իսկ Ռումինիայի բարեկամ ժողովրդին՝ խաղաղություն և բարեկեցություն»։

11:34 - 01 դեկտեմբերի, 2023

Դեսպան Մինասյանը Բուխարեստում կլոր սեղան-քննարկմանը ներկայացրել է «Խաղաղության խաչմերուկ» ծրագրի դրույթները

Ռումինիայում Հայաստանի Հանրապետության դեսպան Սերգեյ Մինասյանը նոյեմբերի 22-ին Բուխարեստում մասնակցել է Սև ծովի հարցերով բարձր մակարդակի կլոր սեղան-քննարկմանը, որը կազմակերպվել էր Եվրոպական Միության արտաքին գործողությունների ծառայության (ԵԱԳԾ) և Ռումինիայի արտաքին գործերի նախարարության կողմից։ Այդ մասին հայտնում են Ռումինիայում ՀՀ դեսպանությունից: «Իր ելույթում դեսպան Մինասյանն ընդգծել է, որ սեպտեմբերի 19֊ին Ադրբեջանի կողմից Լեռնային Ղարաբաղում իրականացված էթնիկ զտումը հանգեցրել է լուրջ մարդասիրական ճգնաժամի, որի հաղթահարման գործում առանձնացվել է ԵՄ և ԵՄ անդամ երկրների, այդ թվում նաև Ռումինիայի` Հայաստանին տրամադրած մարդասիրական աջակցության դերը։ Դեսպան Մինասյանն ընդգծել է Լեռնային Ղարաբաղից բռնի տեղահանված հայերի՝ իրենց բնակավայրեր վերադառնալու իրավունքի իրացման անհրաժեշտությունն, ինչը հնարավոր կլինի միայն միջազգային հաստատակամ ներգրավվածության և երաշխիքների տրամադրման պարագայում։ Միաժամանակ, շեշտվել է Հարավային Կովկասում կայուն խաղաղության հաստատման գործում հայկական կողմի վճռականությունն` այս համատեքստում կարևորելով Եվրոպական Խորհրդի նախագահ Շառլ Միշելի ներդրած ջանքերը։ Դեսպան Մինասյանը ներկայացրել է նաև ՀՀ կառավարության «Խաղաղության խաչմերուկ» ծրագրի դրույթները` հիմնված տարածաշրջանային հաղորդակցության բոլոր ուղիների վերաբացման և տարածաշրջանի երկրների ինքնիշխանության լիակատար պահպանման սկզբունքների վրա։ Կարևորվել է նաև Հայաստանում ԵՄ քաղաքացիական դիտորդական առաքելության գործունեության ընդլայնման վերաբերյալ որոշման իրագործումը, Հայաստանում ընթացող ժողովրդավարական գործընթացներին ԵՄ շարունակական աջակցության ապահովումը, ինչպես նաև ՀՀ֊ԵՄ մուտքի արտոնագրային ռեժիմի ազատականացման գործընթացի առաջմղումը։ Միջոցառմանը մասնակցում էին բարձրաստիճան պաշտոնյաներ ԵՄ հանձնաժողովից, ԵՄ արտաքին գործողությունների ծառայությունից, Հայաստանից, Ռումինիայից, Բուլղարիայից, Հունաստանից, Վրաստանից, Թուրքիայից, Մոլդովայից և Ուկրաինայից»,- նշված է Ֆեյսբուքում արված գրառման մեջ։

16:18 - 23 նոյեմբերի, 2023