Հյուսիսային Կորեա

Հյուսիսային Կորեան յոթ բալիստիկ հրթիռ է արձակել |armenpress.am|

armenpress.am: Հյուսիսային Կորեան նոյեմբերի 5-ի առավոտյան արձակել է փոքր հեռահարության յոթ բալիստիկ հրթիռ։ Ինչպես տեղեկանում ենք ՏԱՍՍ-ից, այդ մասին թարմացված տվյալներ է ներկայացրել Ճապոնիայի պաշտպանության նախարար Գեն Նակատանին։ «Առնվազն յոթ հրթիռ թռել է 400-ական կմ՝ թռիչքի 100 կմ բարձրությամբ», - մեջբերել է նրա խոսքը FNN հեռուստաալիքը: Հրթիռների արձակման մասին ավելի վաղ հայտնել էր Ճապոնիայի առափնյա պահպանության ծառայությունը: Հրթիռներն ընկել են Ճապոնիայի բացառիկ տնտեսական գոտու սահմաններից դուրս։ Ճապոնիայի կառավարությունը դիվանագիտական ուղիներով բողոք է ներկայացրել Փհենյանին։ Հոկտեմբերի 31-ին Հյուսիսային Կորեան արձակել էր «Հվանսոն-19» նորագույն միջմայրցամաքային բալիստիկ հրթիռը։ ԱՄՆ պետքարտուղարությունից ՏԱՍՍ-ի թղթակցին հայտնել են, որ ըստ ԱՄՆ վարչակազմի՝ Հյուսիսային Կորեայի հրթիռային արձակումներն սպառնում են ոչ միայն տարածաշրջանի, այլև ամբողջ աշխարհի խաղաղությանը և կայունությանը։ «Միացյալ Նահանգները դատապարտում է ԿԺԴՀ-ի կողմից նոյեմբերի 4-ին (խմբ.՝ Վաշինգտոնի ժամանակով) մի քանի բալիստիկ հրթիռների արձակումները: Այս արձակումները, ինչպես անցյալ շաբաթ միջմայրցամաքային բալիստիկ հրթիռի արձակումը, ՄԱԿ-ի Անվտանգության խորհրդի բազմաթիվ բանաձևերի խախտում են: Դրանք սպառնալիք են ներկայացնում տարածաշրջանային և միջազգային խաղաղության և անվտանգության համար և խախտում են միջուկային զենքի չտարածման գլոբալ ռեժիմը», - ասել է ամերիկացի դիվանագետը՝ պատասխանելով Փհենյանի արձակումները մեկնաբանելու խնդրանքին:

11:04 - 05 նոյեմբերի, 2024

Փհենյանը պատրաստ է օգնություն ցուցաբերել Ռուսաստանին․ Հյուսիսային Կորեայի ԱԳ նախարար |tert.am|

tert.am: ՌԴ նախագահ Վլադիմիր Պուտինը Կրեմլում ընդունել է Հյուսիսային Կորեայի ԱԳ նախարար Չոյ Սոնգ Հիին, հայտնել է Պուտինի մամուլի խոսնակ Դմիտրի Պեսկովը: Նշվում է, որ Հյուսիսային Կորեայի արտգործնախարարը երկրի առաջնորդ Կիմ Չեն Ընի անունից հայտարարել է, որ Փհենյանը պատրաստ է աջակցություն և օգնություն ցուցաբերել Ռուսաստանին՝ ուկրաինական հակամարտությունում։

22:28 - 04 նոյեմբերի, 2024

ԱՄՆ-ն չի սահմանափակի Կիևին հյուսիսկորեական զորքերի դեմ զենքի կիրառման հարցում․ Պենտագոն |azatutyun.am|

azatutyun.am: Վաշինգտոնը չի սահմանափակի Կիևի զենքի կիրառումը Հյուսիսային Կորեայի ուժերի դեմ Ուկրաինայի հետ մարտերում, հայտարարել է Պենտագոնը։ Ըստ հաղորդման՝ մոտ 10 հազար հյուսիսկորեացի զինվորականներ են տեղակայվել Ռուսաստանի արևելյան հատվածում՝ վերապատրաստման համար: «Նրանց մի մասն արդեն տեղակայվել է Ուկրաինային շատ մոտ։ Մտահոգությունները գնալով մեծանում են, որ Ռուսաստանը մտադիր է նրանց օգտագործել Կուրսկի շրջանում ուկրաինական զորքերի դեմ մարտերում», - երկուշաբթի ասել է Պենտագոնի խոսնակ Սաբրինա Սինը։ Պենտագոնի խոսնակը տեղեկացրել է, որ պաշտպանության նախարար Լլոյդ Օսթինն ու պետքարտուղար Էնթոնի Բլինքենն այս շաբաթ կընդունեն Հարավային Կորեայի պաշտպանության և արտաքին գործերի նախարարներին։ Անցած շաբաթ Սեուլն արտգործնախարարություն էր կանչել երկրում Ռուսաստանի դեսպանին՝ պահանջելով անհապաղ դուրս բերել հյուսիսկորեացի զինվորներինՌուսաստանից ու դադարեցնել համագործակցությունը նրանց հետ։ Ավելի վաղ Հարավային Կորեայի հետախուզությունը հայտարարել էր, թե Փհենյանը պատրաստվում է 12 հազար զինվոր ուղարկել Մոսկվա, և որ նրանցից 1500-ն արդեն ժամանել են Ռուսաստան։ ՆԱՏՕ-ի գլխավոր քարտուղար Մարկ Ռյուտեն երկուշաբթի օրը հայտարարեց, որ ռազմական դաշինքը հաստատել է, որ Մոսկվան հյուսիսկորեական զորքեր է տեղակայել Ուկրաինային սահմանակից Ռուսաստանի Կուրսկի շրջանում: Ռյուտեն Մոսկվայի այդ քայլը որակել է «զգալի էսկալացիա» և պնդել՝ նման զարգացումը վկայում է Ռուսաստանի նախագահ Վլադիմիր Պուտինի «հուսահատության» մասին, որն Ուկրաինայի դեմ պատերազմում արդեն ավելի քան 600 հազար զինվոր է կորցրել։

12:29 - 29 հոկտեմբերի, 2024

ՆԱՏՕ-ի գլխավոր քարտուղար. Հյուսիսային Կորեայի զորքերը Ուկրաինա ուղարկելը կհանգեցնի էսկալացիայի |news.am|

news.am: Եթե Հյուսիսային Կորեան զորքեր ուղարկի Ուկրաինա՝ կռվելու Ռուսաստանի կողմից, դա զգալիորեն կսրի հակամարտությունը, հայտարարել է ՆԱՏՕ-ի գլխավոր քարտուղար Մարկ Ռյուտեն, փոխանցում է Reuters-ը։ Ռյուտեն ասել է, որ ինքը քննարկումներ է անցկացրել Հարավային Կորեայի նախագահ Յուն Սեոկ Յոլի հետ Սեուլի հետ դաշինքի սերտ գործընկերության վերաբերյալ՝ կենտրոնանալով պաշտպանական և արդյունաբերական համագործակցության և Եվրոատլանտյան և Հնդկ-Խաղաղօվկիանոսյան տարածաշրջանների փոխկապակցված անվտանգության վրա: Հիշեցնենք, որ գլխավոր հետախուզական վարչության տվյալներով՝ մոտ 11 հազար հյուսիսկորեացի հետևակայիններ պատրաստում են Ռուսաստանի արևելքում՝ Ուկրաինայի դեմ պատերազմի ուղարկելու նպատակով։ Նրանք պատերազմի մեջ կմտնեն արդեն նոյեմբերին:

10:30 - 23 հոկտեմբերի, 2024

Հս. Կորեան պայթեցրել է դեպի Հրվ. Կորեա տանող ճանապարհները |tert.am|

tert.am: Հյուսիսային Կորեան (ԿԺԴՀ) պայթեցրել է իր տարածքում միջկորեական ճանապարհների մի քանի հատվածներ։ Այս մասին հայտնում է Yonhap գործակալությունը` հղում անելով Միացյալ շտաբների պետերի հայտարարությանը։Պաշտոնական Փհենյանը նախազգուշացրել էր, որ մտադիր է «ամբողջովին անջատել» Հյուսիսային Կորեայի տարածքը Հարավային Կորեայից։ Երկրները միացված են ճանապարհներով և երկաթգծերով, որոնք նախկինում ըկալվում էին որպես դրանց միջև համագործակցության խորհրդանիշներ։Օրերս Հյուսիսային Կորեայի բանակը հայտարարել էր, որ կձեռնարկի «էական ռազմական քայլ»՝ ամբողջությամբ կտրելով երկրի տարածքը հարևան Հարավային Կորեայից: Հայտարարությունը հնչել էր այն բանից հետո, երբ Հյուսիսային Կորեայի առաջնորդ Կիմ Չեն Ընը պաշտոնապես չեղարկել է Հարավային Կորեայի հետ խաղաղ վերամիավորման ձգտող երկարամյա քաղաքականությունը: Հայտարարությունում ասվում էր, որ Հյուսիսային Կորեայի տարածքում գտնվող ճանապարհներն ու երկաթուղիները, որոնք կապված են հարավին, ամբողջությամբ կկտրվեն՝ փակելով մուտքը սահմանի երկայնքով: Ըստ հարավկորեական բանակի՝ հունվարից ի վեր Փհենյանն ուժեղացրել է իր սահմանային պաշտպանությունը՝ ականապատելով տարածքները, հակատանկային թակարդներ կառուցելով և ապամոնտաժելով երկաթուղային ենթակառուցվածքները:

12:30 - 15 հոկտեմբերի, 2024

Հս. Կորեան զենքից բացի մարդկային ուժ է տրամադրում ՌԴ-ին. Զելենսկի |tert.am|

tert.am: Ռուսաստանի և Հյուսիսային Կորեայի նման ռեժիմների միջև դաշինքը խորանում է: Խոսքն այլևս միայն զենքի տեղափոխման մասին չէ, այլ իրականում Հյուսիսային Կորեայից մարդկանց` օկուպացիոն ռազմական ուժերի (նկատի ունի ՌԴ զինուժը-Խմբ.) շարքեր տեղափոխման մասին է. այս մասին թելեգրամյան ալիքում գրել է Ուկրաինայի նախագահ Վլադիմիր Զելենսկին:«Ակնհայտ է, որ նման պայմաններում մեր հարաբերությունները գործընկերների հետ պետք է էլ ավելի զարգանան։ Առաջնագիծն ավելի մեծ աջակցության կարիք ունի», - ասել է Զելենսկին:Նրա պնդմամբ՝ պետք է մեծացնել ճնշումը ՌԴ-ի վրա:«Ճնշումը պետք է ավելի ուժեղ լինի, քան Ռուսաստանը կարող է դիմակայել: Եվ դա ավելի մեծ պատերազմ կանխելու մասին է: Իսկական խաղաղության կարելի է հասնել միայն ուժի միջոցով, և ամբողջ հաջորդ շաբաթը նվիրված կլինի մեր գործընկերների հետ աշխատելուն՝ հանուն այդպիսի ուժի, հանուն իսկական խաղաղության», - ասել է Զելենսկին:

10:49 - 14 հոկտեմբերի, 2024

Հս. Կորեան միջուկային զենք կկիրառի, եթե ինքնիշխանության նկատմամբ ոտնձգություն լինի. Կիմ Չեն Ըն |tert.am|

tert.am: Հյուսիսային Կորեայի առաջնորդ Կիմ Չեն Ընը հայտարարել է, որ իր երկիրը միջուկային զենքով կպատասխանի, եթե Հարավային Կորեան և ԱՄՆ-ն ուժ կիրառեն Փհենյանի նկատմամբ՝ ոտնձգություն կատարելով նրա ինքնիշխանության դեմ, հայտնում է Reuters-ը՝ հղում անելով Կորեայի կենտրոնական լրատվական գործակալությանը:Ինչպես ընդգծել է ԿԺԴՀ ղեկավարը, հարձակման դեպքում Փհենյանը «առանց վարանելու» կօգտագործի իրեն հասանելի բոլոր ուժերը, ներառյալ միջուկային զենքը։ Կիմ Չեն Ընը քննադատել է Հարավային Կորեայի նախագահ Յուն Սուկ Յոլին՝ երեքշաբթի ռազմական միջոցառման ժամանակ «Հյուսիսային Կորեայի ռեժիմին վերջ դնելու» սպառնալիքի համար՝ ասելով, որ այս սպառնալիքը հստակ ցույց է տալիս, թե որ կողմն է խաթարում տարածաշրջանային անվտանգությունն ու խաղաղությունը:

09:48 - 04 հոկտեմբերի, 2024

Սուրեն Պապիկյանը մասնակցել է «Պատասխանատու արհեստական բանականություն՝ ռազմական տիրույթում» գագաթնաժողովի բացման արարողությանը

Կորեայի Հանրապետություն կատարած աշխատանքային այցի շրջանակում ՀՀ պաշտպանության նախարար Սուրեն Պապիկյանը սեպտեմբերի 9-ին մասնակցել է «Պատասխանատու արհեստական բանականություն՝ ռազմական տիրույթում» գագաթնաժողովի բացման արարողությանը: Այս մասին հայտնում են ՀՀ ՊՆ-ից։ Միջոցառումը կազմակերպել են Կորեայի Հանրապետության, Նիդերլանդների, Միացյալ Թագավորության, Սինգապուրի և Քենիայի պաշտպանության ու արտաքին գործերի նախարարությունները, որոնց նպատակը միջազգային մեխանիզմների նախաձեռնումն է՝ վերահսկելու արհեստական բանականության կիրառումը ռազմական տեխնոլոգիաներում և մարտական գործողությունների վարման ընթացքում:

10:01 - 09 սեպտեմբերի, 2024

Սուրեն Պապիկյանի գլխավորած պատվիրակությունը մեկնել է Կորեայի Հանրապետություն

Սեպտեմբերի 8-ին ՀՀ պաշտպանության նախարար Սուրեն Պապիկյանի գլխավորած պատվիրակությունն աշխատանքային այցով մեկնել է Կորեայի Հանրապետություն: Այս մասին հայտնում է ՀՀ պաշտպանության նախարարությունը:

13:01 - 08 սեպտեմբերի, 2024

Հյուսիսային Կորեայում հեղեղների պատճառով Կիմ Չեն Ընն արտակարգ դրություն է հայտարարել |armenpress.am|

armenpress.am: Հյուսիսային Կորեայում հազարավոր մարդիկ տարհանվել են շաբաթ և կիրակի օրերին տեղացած ռեկորդային քանակությամբ անձրևների պատճառով։ Երկրի ղեկավար Կիմ Չեն Ընը որոշ շրջաններում արտակարգ դրություն է հայտարարել։ Այս մասին հաղորդում է BBC-ն։ Չինաստանի հետ սահմանամերձ մի քանի շրջաններում ցանքատարածությունները և տները հայտնվել են ջրի տակ։ Տեղի լրատվամիջոցները հայտնել են, որ մարդկանց մի մասին տարհանել են օդանավերով։ BBC-ն նշում է, որ Հյուսիսային Կորեան, որը հայտնի է երկրում տեղի ունեցող բացասական իրադարձությունները չլուսաբանելով, այս վերջին աղետի մասին համեմատաբար շատ տեղեկություններ է տարածում։ Պետական թերթը ստեղծված իրավիճակն անվանել է «ծանր ճգնաժամ»։ Տուժածների մասին տեղեկություններ չեն հաղորդվում, սակայն նշվում է, որ ավելի քան 4200 մարդ տարհանվել է 10 օդանավով, որոնք 20 անգամ թռիչք են կատարել տուժածներին ապահով վայր հասցնելու համար։ Տարածվել են նաև լուսանկարներ, թե ինչպես է Կիմ Չեն Ընը հեղեղաջրերի միջով անցնում մեքենայով՝ հետևելու աղետի հետևանքների վերացման գործընթացին։ Հյուսիսկորեացի ղեկավարը երեք շրջանների մի շարք հատվածներ հայտարարել է «աղետի հատուկ արտակարգ գոտիներ»։ Կան մտավախություններ, որ հեղեղները կարող են ազդել Հյուսիսային Կորեայի գյուղատնտեսական ոլորտի վրա, որն առանց այդ էլ խոշոր ծավալների չի հասնում լեռնային տեղանքի պատճառով։

13:23 - 29 հուլիսի, 2024

Հյուսիսային Կորեայից աղբ տեղափոխող օդապարիկը վայրէջք է կատարել Հարավային Կորեայի նախագահի գրասենյակի տարածքում |1lurer.am|

1lurer.am: ԿԺԴՀ-ի ուղարկած աղբով օդապարիկներից մեկը վայրէջք է կատարել Հարավային Կորեայի նախագահի գրասենյակի տարածքում, հայտնում է Yonhap-ը՝ հղում անելով նախագահի անվտանգության ծառայությանը։ «Քիմիական, կենսաբանական և ճառագայթային արձագանքման խմբի հետաքննությունը պարզել է, որ իրերը վտանգ չեն ներկայացնում»,- տեղեկացրել են ծառայությունից։ Հարավային Կորեայի զինված ուժերի շտաբների պետերի միացյալ կոմիտեն հայտնել է, որ մայիսի վերջից ԿԺԴՀ-ն ավելի քան 3 հազար աղբատար օդապարիկ է արձակել՝ ի նշան «հակափհենյանական» թռուցիկների դեմ բողոքի, որոնք հարավից ուղարկել են հյուսիսկորեացի դասալիքներն ու հարավկորեացի ակտիվիստները:

16:31 - 24 հուլիսի, 2024

Հյուսիսային Կորեան երկու բալիստիկ հրթիռ է արձակել Ճապոնական ծովի ուղղությամբ |armenpress.am|

armenpress.am: Հյուսիսային Կորեան երկու բալիստիկ հրթիռ է արձակել Ճապոնական ծովի ուղղությամբ։ Այդ մասին հայտնում են Կորեայի Հանրապետության ԶՈՒ շտաբների պետերի կոմիտեից: Նշվում է, որ արկերն իրենցից ներկայացնում են փոքր հեռահարության մեկ բալիստիկ հրթիռ և մեկ անհայտ բալիստիկ հրթիռ։ Նշվում է, որ առաջին հրթիռն արձակվել է տեղական ժամանակով 05:05-ի սահմանում (Երևանի ժամանակով 00:05-ին) և թռել է շուրջ 600 կմ, երկրորդը՝ տեղական ժամանակով 05:15-ի սահմանում (Երևանի ժամանակով 00:15-ին) և թռել է մոտավորապես 120 կմ: Ենթադրվում է, որ արձակումը տեղի է ունեցել Փհենյանի նախազգուշացումից հետո՝ ԱՄՆ-ի, Հարավային Կորեայի և Ճապոնիայի համատեղ զորավարժություններին ի պատասխան։

11:38 - 01 հուլիսի, 2024

ԱՄՆ-ն եւ Հարավային Կորեան սեփական անվտանգության սպառնալիք են անվանել ՌԴ-ի եւ Հյուսիսային Կորեայի պայմանագիրը |news.am|

news.am: Կորեայի Հանրապետության արտաքին գործերի նախարար Չո Թհե Յոլը եւ ԱՄՆ պետքարտուղար Էնթոնի Բլինքենը հայտնել են, որ համապարփակ ռազմավարական գործընկերության պայմանագիրը ՌԴ-ի եւ Հյուսիսային Կորեայի միջեւ սպառնալիք է ԱՄՆ-ի եւ Հարավային Կորեայի անվտանգությանը։ Այս մասին տեղեկացրել է Կորեայի Հանրապետության արտաքին գործերի նախարարությունը։ «Կողմերը կարծում են, որ Ռուսաստանի եւ Հյուսիսային Կորեայի ռազմական եւ տնտեսական համագործակցության ամրապնդումը լուրջ սպառնալիք է Կորեական թերակղզու կայունությանն ու խաղաղությանը եւ Կորեայի Հանրապետության եւ ԱՄՆ-ի անվտանգությանը»,- հայտնել են Սեուլում։ Չո Թհե Յոլը եւ Բլինքենը զրուցել են հունիսի 20-ին լրատվամիջոցների օգնությամբ։ Նրանք քննարկել են նաեւ պատասխան միջոցները։ Յոլը պատմել է նոր պատժամիջոցների եւ արտահանման վերահսկման ընդլայնման մասին, նա նշել է, որ ուղիղ կամ անուղղակի աջակցությունը Հյուսիսային Կորեայի ռազմական ուժի հզորացմանը հակասում է ՄԱԿ ԱԽ բանաձեւերին։ ԱՄՆ պետքարտուղարն ասել է, որ Վաշինգտոնում «ակտիվորեն դիտարկում են» արձագանքման տարբերակներ։ Հունիսի 19-ին Ռուսաստանը եւ Հյուսիսային Կորեան ստորագրել են պայմանագիր համապարփակ ռազմավարական գործընկերության մասին, որը ենթադրում է անհապաղ ռազմական օգնության տրամադրում պաշտպանական պատերազմի ժամանակ։

12:04 - 21 հունիսի, 2024

Մոսկվան ու Փհենյանը հայտարարում են հարաբերությունների նոր փուլի մասին |azatutyun.am|

azatutyun.am: Արևմտյան կոշտ պատժամիջոցների տակ գտնվող Ռուսաստանն ու Հյուսիսային Կորեան հայտարարում են հարաբերությունների նոր փուլի մասին։ Վլադիմիր Պուտինի երկօրյա այցի շրջանակում երկու առաջնորդները համապարփակ ռազմավարական գործընկերության համաձայնագիր են ստորագրել ագրեսիայի դեպքում փոխադարձ օգնության մասին։ Մամուլի ասուլիսում Պուտինը հայտարարել է, որ Ռուսաստանը «չի բացառում Հյուսիսային Կորեայի հետ ռազմատեխնիկական համագործակցությունը՝ համաձայն ստորագրված փաստաթղթի»։ «Այսօր ստորագրված համապարփակ գործընկերության համաձայնագիրը, ի թիվս այլ բաների, նախատեսում է փոխադարձ օգնության տրամադրում այս համաձայնագրի կողմերից մեկի դեմ ագրեսիայի դեպքում», - ասել է ՌԴ նախագահը: Հյուսիսային Կորեայի առաջնորդը փաստաթուղթը «գերազանց» բառով է բնութագրել։ Ընդհանրապես, Պուտինի այցն, ըստ Հյուսիսային Կորեայի առաջնորդի, նոր փուլ է երկու երկրների հարաբերություններում։ «Այս պայմանագրի շնորհիվ մեր հարաբերությունները զարգացման նոր հեռանկարներ ստացան, դարձան դաշնակցային», - հայտարարել է Կիմ Չեն Ընը: Պուտինի հետ բանակցությունների ժամանակ Կիմը շեշտել է, որ իր երկրի կառավարությունը «լիակատար աջակցություն և համերաշխություն է հայտնում Ռուսաստանի կառավարությանը, բանակին և ժողովրդին հատուկ ռազմական գործողություն իրականացնելու համար»։ Հյուսիսային Կորեայի ղեկավարի խոսքով՝ Ռուսաստանն այդ պատերազմը սկսել է և արդեն գրեթե երկուսուկես տարի շարունակում է «ինքնիշխանությունը, անվտանգության շահերը, ինչպես նաև տարածքային ամբողջականությունը պաշտպանելու համար»։ Կիմը նաև նշել է Ռուսաստանի դերը «աշխարհում ռազմավարական հավասարակշռության պահպանման գործում»։ Պուտինն, իր հերթին, քննադատել է ԱՄՆ-ին և կրկին գովել Փհենյանին Ուկրաինայի դեմ պատերազմում Ռուսաստանին աջակցելու համար։ Այս մասին Պուտինը գրել էր նաև հյուսիսկորեական թերթերից մեկում իր այցից առաջ հրապարակված հոդվածում։ Շարունակությունը՝ սկզբնաղբյուր կայքում

11:35 - 20 հունիսի, 2024

Փհենյանում մեկնարկել են Կիմ Չեն Ըն-Պուտին բանակցությունները. նախատեսվում է փաստաթղթի ստորագրում |tert.am|

tert.am: Փհենյանում մեկնարկել են ՌԴ նախագահ Վլադիմիր Պուտինի և Հյուսիսային Կորեայի առաջնորդ Կիմ Չեն Ընի բանակցությունները, որոնք ընթանում են պատվիրակությունների կազմով, հաղորդում է ՌԻԱ Նովոստին: Սա Պուտինի առաջին այցն է ԿԺԴՀ 2000 թվականից ի վեր։ Վաղ առավոտյան ՌԴ առաջնորդն իր հյուսիսկորեացի գործընկերոջ հետ ժամանել է Կիմ Իր Սենի հրապարակ, որտեղ տեղի է ունեցել դիմավորման հանդիսավոր արարողությունը, ինչից հետո Պուտինն ու Կիմ Չեն Ընը մեկնել են պետական նստավայր։ Ինչպես նշել է ՌԴ նախագահը հանդիպման մեկնարկին, բանակցությունների ընթացքում կստորագրվի «նոր հիմնարար փաստաթուղթ», որը կլինի ՌԴ-ի և ԿԺԴՀ-ի հարաբերությունների հիմքում: «Անցյալ տարի Ռուսաստան կատարած Ձեր այցի արդյունքում մենք զգալիորեն առաջ շարժվեցինք այսօրվա մեր միջպետական կապերի կառուցման գործում։ Այսօր պատրաստվել է նոր հիմնարար փաստաթուղթ, որը երկարաժամկետ հեռանկարում մեր հարաբերությունների հիմքը կհանդիսանա», - նշել է Պուտինը։ Ռուսաստանի ղեկավարը հիշեցրել է, որ անցած տարի երկրները նշել են դիվանագիտական հարաբերությունների հաստատման 75-ամյակը, իսկ ընթացիկ տարում ՝ առաջին միջպետական փաստաթղթի՝ տնտեսական և մշակութային համագործակցության մասին համաձայնագրի կնքման 75-ամյակը: «Ինչպես հայտնի է, այդ համաձայնագիրը ստորագրվել է ընկեր Կիմ Իր Սենի կողմից Մոսկվա կատարած նրա առաջին այցի ընթացքում»,- հիշեցրել է Ռուսաստանի ղեկավարը: Պուտինը հույս է հայտնել, որ Կիմ Չեն Ինի հետ հաջորդ հանդիպումը կկայանա Մոսկվայում:

09:46 - 19 հունիսի, 2024

Հյուսիսային Կորեան 10 բալիստիկ հրթիռ է արձակել |tert.am|

tert.am: Հյուսիսային Կորեան հրթիռներ է արձակել դեպի Ճապոնական ծով. Yonhap-ը սկզբում հայտնել էր մեկ բալիստիկ հրթիռի արձակման մասին: Հարավային Կորեայի շտաբների պետերի միացյալ կոմիտեն ավելի ուշ պարզաբանել է, որ արձակվել է մոտ 10 փոքր հեռահարության բալիստիկ հրթիռ։ «Հյուսիսային Կորեան շարունակում է բալիստիկ հրթիռներով սադրանքները փորձնական արձակման պատրվակով, բայց այդքան մեծ քանակությամբ արձակումն անսովոր է։ Զինվորականները վերլուծում են մանրամասն բնութագրերը, ներառյալ հրթիռի մոդելը և թռիչքի հեռահարությունը»,- ասվում է կոմիտեի հայտարարության մեջ: Ինչպես հայտնում է NHK հեռուստաալիքը՝ վկայակոչելով ճապոնական առափնյա պահպանությանը, հրթիռներն ընկել են ծովը՝ Ճապոնիայի բացառիկ տնտեսական գոտուց դուրս։ Մայիսի 27-ին Հյուսիսային Կորեան հաղորդել է ռազմական հետախուզական արբանյակ տեղափոխող նոր տիպի հրթիռի անհաջող արձակման մասին։ Հրթիռը պայթել է օդում։ Ավելի վաղ՝ մայիսին, Հյուսիսային Կորեան արդեն մի քանի փոքր հեռահարության բալիստիկ հրթիռներ էր արձակել, որոնք բոլորն ընկել էին Կորեական թերակղզու և Ճապոնիայի միջև ընկած ծովը։

09:35 - 30 մայիսի, 2024