Թուրքիա

Ալիևն ընդունել է Թուրքիայի արտգործնախարարին

Ադրբեջանի նախագահ Իլհամ Ալիևը Շուշիում ընդունել է Թուրքիայի արտաքին գործերի նախարար Հաքան Ֆիդանին: Այդ մասին հայտնել են Ադրբեջանի նախագահի աշխատակազմից: Հանդիպումից այլ մանրամասներ դեռևս հայտնի չեն:

19:43 - 05 հուլիսի, 2024

ՈՒԵՖԱ-ն երկու խաղով որակազրկել է Թուրքիայի հավաքականի ֆուտբոլիստ Մերիհ Դեմիրալին

ՈՒԵՖԱ-ն այսօր՝ Թուրքիայի՝ Նիդեռլանդների դեմ քառորդ եզրափակչի խաղից մեկ օր առաջ, հայտարարել է Թուրքիայի հավաքականի ֆուտբոլիստ Մերիհ Դեմիրալին երկու խաղով որակազրկելու մասին։ Այս մասին հայտնում է CNN-ը։ Թուրքիայի ֆուտբոլի ֆեդերացիայից նշել են, որ իրենց իրավաբանական բաժինն աշխատում է այս որոշման բողոքարկման ուղղությամբ։ Հիշեցնենք, որ ֆուտբոլի Թուրքիայի ազգային հավաքականի պաշտպան Մերիհ Դեմիրալը Եվրոպայի առաջնության շրջանակներում Ավստրիայի հետ հանդիպմանը «Գորշ գայլերի» ժեստն էր ցույց տվել։ Այս դեպքի առնչությամբ Թուրքիայի դեսպանը կանչվել էր Գերմանիայի ԱԳՆ։

17:33 - 05 հուլիսի, 2024

Հելսինկյան հանձնաժողովի նախագահն Ադրբեջանին հորդորում է ՀՀ–ի հետ խաղաղության գործընթացը հնարավորինս արագ ամփոփել |armenpress.am|

armenpress.am: Հելսինկյան հանձնաժողովի նախագահ, ԱՄՆ Ներկայացուցիչների պալատի անդամ Ջո Ուիլսոնը հորդորում է Ադրբեջանին Հայաստանի հետ խաղաղության գործընթացը հնարավորինս արագ ամփոփել, իսկ Թուրքիային՝ Հայաստանի հետ հարաբերությունների կարգավորման ուղղությամբ քայլեր ձեռնարկել: Ջո Ուիլսոնն այս մասին ասաց ԱՄՆ սենատոր Ռոջեր Ուիքերի գլխավորած կոնգրեսական պատվիրակության կազմում Հայաստան այցի շրջանակում հրավիրված ասուլիսում: Նա նկատեց՝ Թուրքիան ՆԱՏՕ–ի անդամ է, Ադրբեջանն օգտվում է իր նավթային և գազային ռեսուրսներից: ԱՄՆ պատվիրակությունը Հայաստանում է, որովհետև գիտակցում է այն առաջընթացը, որ Հայաստանն ունեցել է որպես ժողովրդավարական պետություն: Հայաստանը Միացյալ Նահանգների համար կարևոր գործընկեր է: «Ես հորդորում եմ Ադրբեջանի մեր գործընկերներին խաղաղության գործընթացը հնարավորինս արագ ամփոփել: Դա շահեկան կլինի բոլորի համար: Եվ մենք ուզում ենք նաև հորդորել, որ Թուրքիան ևս հարաբերությունների կարգավորման ուղղությամբ քայլեր ձեռնարկի»,–ասաց Ուիլսոնը: Նա հավելեց, որ պատրաստ են աջակցել Հայաստանին՝ տնտեսական, մարդասիրական աջակցության հարցերով, օգնել, որ ձևավորվի ամուր, ժողովրդավարական և բարեկեցիկ հասարակություն կայուն, ապահով տարածաշրջանում:

14:25 - 05 հուլիսի, 2024

Էրդողանն Աստանայում հանդիպել է Սի Ցզինպինի հետ |factor.am|

factor.am: Թուրքիայի նախագահ Ռեջեփ Թայիփ Էրդողանը այսօր Աստանայում հանդիպել է Չինաստանի նախագահ Սի Ցզինպինի հետ, գրում են թուրքական լրատվամիջոցները։ Նշվում է, որ բանակցությունները կայացել են Ղազախստանի մայրաքաղաքում Շանհայի համագործակցության կազմակերպության (ՇՀԿ) պետությունների ղեկավարների 24-րդ գագաթնաժողովի շրջանակներում։ Հանդիպումը տեղի է ունեցել Անկախության պալատում, որտեղ ընթանում է ՇՀԿ գագաթնաժողովը։ Այն փակ է եղել մամուլի համար։ Հանդիպմանը մասնակցել են Թուրքիայի ԱԳ նախարար Հաքան Ֆիդանը, էներգետիկայի և բնական պաշարների նախարար Ալփարսլան Բայրաքթարը և ֆինանսների նախարար Մեհմեդ Շիմշեքը։ Հավելենք, որ վերջին շրջանում Անկարան փորձում է հարաբերությունները զարգացնել Պեկինի հետ։ Այդ նպատակով էլ հունիսի սկզբին Չինաստան էր այցելել ԱԳ նախարար Հաքան Ֆիդանը։

22:29 - 04 հուլիսի, 2024

Թուրքիայի դեսպանը կանչվել է Գերմանիայի ԱԳՆ՝ Դեմիրալի կողմից «Գորշ գայլերի» ժեստը ցույց տալու միջադեպի հետքերով |azatutyun.am|

azatutyun.am: Գերմանիայի արտաքին գերատեսչությունը ԱԳՆ է կանչել Թուրքիայի դեսպանին՝ ֆուտբոլի Թուրքիայի ազգային հավաքականի պաշտպան Մերիհ Դեմիրալի կողմից Եվրոպայի առաջնության շրջանակներում Ավստրիայի հետ հանդիպմանը «Գորշ գայլերի» ժեստը ցույց տալու հետքերով: Այս մասին է հայտնում Reuters-ը՝ Գերմանիայի ԱԳՆ-ին վկայակոչելով: ՈւԵՖԱ-ն հետաքննություն է սկսել Դեմիրալի նկատմամբ: Երբ այն կավարտվի, հայտնի չէ: Թուրք ֆուտբոլիստի աղմկահարույց ժեստը դատապարտել են Գերմանիայի ներքին գործերի նախարար Նենսի Ֆեյզերը, իրավապաշտպան կազմակերպություններ։ Ֆեյզերը, մասնավորապես, զգուշացրել է, որ «թուրքական աջ ծայրահեղականների խորհրդանիշները տեղ չունեն մարզադաշտերում», և ասել, որ «Եվրոպայի ֆուտբոլի առաջնությունը որպես ռասիզմի հարթակ օգտագործելը լիովին անընդունելի է»։ Ֆեյզերի հայտարարությունից հետո Թուրքիայում Գերմանիայի դեսպանն էր երկրի ԱԳՆ կանչվել:

16:59 - 04 հուլիսի, 2024

Թուրքիայի, Ադրբեջանի և Պակիստանի ղեկավարները ռազմարդյունաբերության ոլորտում համատեղ արտադրություն կազմակերպելու հարցեր են քննարկել |factor.am|

factor.am: Աստանայում Ադրբեջանի նախագահ Իլհամ Ալիևի, Թուրքիայի նախագահ Ռեջեփ Թայիփ Էրդողանի և Պակիստանի վարչապետ Մուհամմադ Շահբազ Շարիֆի եռակողմ հանդիպմանը քննարկվել են պաշտպանական և ռազմական արդյունաբերության ոլորտում համագործակցության հարցեր։ Ընդգծվել է 2021 թվականին երեք երկրների հատուկ նշանակության ստորաբաժանումների մասնակցությամբ «Երեք եղբայրներ» կարգախոսով անցկացվող զորավարժությունների կարևորությունը, առաջարկվել է ապագայում էլ պարբերաբար համատեղ զորավարժություններ անցկացնել երերք երկրների զինված ուժերի մասնակցությամբ, հաղորդում են ադրբեջանական լրատվամիջոցները։ Ընդգծվել է ռազմական արդյունաբերության ոլորտում երեք երկրների համատեղ արտադրություն կազմակերպելու կարևորությունը։ Հանդիպմանը նշվել է, որ երկրների ղեկավարների մակարդակով եռակողմ ձևաչափով գագաթնաժողովն առաջին անգամ է անցկացվում, շեշտվել է դրա պատմական նշանակությունը և առաջարկվել է այսուհետ այդ հանդիպումները պարբերական դարձնել։ «Մեկ անգամ ևս ընդգծվել է Ադրբեջանի տարածքային ամբողջականության և ինքնիշխանության լիարժեք ապահովումը։ Մտահոգտություն է արտահայտվել արտատարածաշրջանային պետությունների կողմից Հարավային Կովկասի ռազմականացման քաղաքականության վերաբերյալ»,- ասվում է հաղորդագրության մեջ։ Բացի այդ, ընդգծվել է Արցախի դեմ Ադրբեջանի սանձազերծած 44-օրյա պատերազմի ընթացքում Թուրքիայի և Պակիստանի՝ Բաքվին ցուցաբերած քաղաքական և բարոյական աջակցությունը։ Մտքերի փոխանակում է տեղի ունեցել եռակողմ ձևաչափով առևտրատնտեսական կապերի զարգացման հեռանկարների շուրջ՝ նորարարության, էներգետիկայի, գյուղատնտեսության, հումանիտար և այլ ոլորտներում։

12:27 - 04 հուլիսի, 2024

Աստանայում ՇՀԿ-ի գագաթնաժողովի շրջանակներում հանդիպել են ՌԴ և Թուրքիայի նախագահները |armenpress.am|

armenpress.am: Ղազախստանի Աստանա քաղաքում հանդիպում են ունեցել ՌԴ նախագահ Վլադիմիր Պուտինը և Թուրքիայի նախագահ Ռեջեփ Թայիփ Էրդողանը: Այս մասին հայտնում են թուրքական ԶԼՄ-ները: Նախագահները քննարկել են հիմնականում տնտեսական ուղղվածություն ունեցող հարցեր: Ղազախստանի նախագահ Կասիմ-Ժոմարտ Տոկաևի հրավերով ՌԴ նախագահ Վլադիմիր Պուտինը և Թուրքիայի նախագահ Էրդողանը ժամանել են Աստանա՝ մասնակցելու Շանհայի համագործակցության կազմակերպության (ՇՀԿ) գագաթնաժողովին։ Շանհայի համագործակցության կազմակերպության (ՇՀԿ) գագաթնաժողովին մասնակցելու են 16 երկրների պետությունների և կառավարությունների ղեկավարներ։ Գագաթնաժողովի ավարտին Ղազախստանը նախագահության ժամկետը կփոխանցի Չինաստանին։

17:24 - 03 հուլիսի, 2024

Մենք առողջ երկխոսություն ունենք Թուրքիայի հետ․ Միրզոյան |civilnet.am|

civilnet.am: Հայաստանի և Թուրքիայի միջև առողջ երկխոսություն կա, հայտարարել է արտգործնախարար Արարատ Միրզոյանը։ «Ինչպես նախկինում, Հայաստանը շահագրգռված է և գործնական ջանքեր է գործադրում հարևանների հետ հարաբերությունների կարգավորման ուղղությամբ։ Մենք միանգամայն պատրաստ ենք Թուրքիայի հետ մեր հարաբերությունների ամբողջական կարգավորմանը, դիվանագիտական հարաբերությունների հաստատմանը, Հայաստան-Թուրքիա սահմանի բացմանը։ Պատրաստ ենք արդեն իսկ ձեռք բերված պայմանավորվածությունների իրականացմանը։ Մենք առողջ երկխոսություն ունենք Թուրքիայի հետ»,- իր վրացի գործընկերոջ հետ համատեղ ասուլիսին հայտարարել է Միրզոյանը։ Նրա կարծիքով՝ ժամանակն է, որ պայմանավորվածությունները գետնի վրա իրականություն դառնան։ Հայ-թուրքական հարաբերությունների կարգավորման գործընթացը մեկնարկել է 2022-ի սկզբին։ Հայաստանի և Թուրքիայի հատուկ ներկայացուցիչներ Ռուբեն Ռուբինյանի և Սերդար Քըլըչի առաջին հանդիպումը կայացել է հունվարի 14-ին՝ Մոսկվայում։ Դրանից հետո բանագնացները ևս երեք հանդիպում են անցկացրել Վիեննայում։ 2022-ի հուլիսի 1-ին Ռուբինյանը և Քըլըչը Վիեննայում հանդիպման ընթացքում պայմանավորվել էին հնարավոր ամենասեղմ ժամկետներում Հայաստան-Թուրքիա ցամաքային սահմանը հատելու հնարավորություն ապահովել, համապատասխանաբար, Հայաստան և Թուրքիա այցելող երրորդ երկրների քաղաքացիների համար։

16:42 - 03 հուլիսի, 2024

Թուրքիայում սիրիացի փախստականների դեմ զանգվածային ցույցեր են |tert.am|

tert.am: Թուրքիայում շարունակվում են սիրիացի փախստականների դեմ ցույցերը. Ստամբուլում, Կայսերիում, Ռեյհանլիում, Կոնիայում, Գազիանթեփում, Բուրսայում, Անթալիայում մարդիկ դուրս են եկել փողոցներ և վանկարկել՝ «Չենք ուզում՝ փախստականներ լինեն մեր երկրում»։ Այս մասին գրում են թուրքական լրատվամիջոցները: Անկարգությունները սկսվել են նրանից, որ Կայսերիում սիրիացի փախստականը 5 տարեկան երեխայի է բռնաբարել:Անկարգությունների մասնակիցներն այրել են սիրիացիներին պատկանող մթերային խանութը, մի խումբ թուրքեր հավաքվել են Սիրիայի հետ սահմանին գտնվող «Օնչուպինար» անցակետի դիմաց, Անթալիայում թուրքերը դուրս են եկել փողոց, ծեծի են ենթարկել սիրիացիներին և ջարդուփշուր արել նրանց օբյեկտները:Թուրքիայի նախագահ Ռեջեփ Թայիփ Էրդողանը դատապարտել է սիրիացիների վրա հարձակումները.«Ոչինչի հնարավոր չէ հասնել հասարակության մեջ միգրանտների նկատմամբ այլատյացություն և ատելություն հրահրելով: Երեկ Կայսերիում փոքր խմբի կողմից իրականացված դժբախտ դեպքերի պատճառներից մեկը ընդդիմության թունավոր հռետորաբանությունն է»։

10:09 - 02 հուլիսի, 2024

Թուրքիան 4 տարի անց վերսկսել է նավթի ներկրումն Իրանից |news.am|

news.am: Թուրքիան Իրանից նավթի ներկրումը վերսկսեց այս տարվա մարտին՝ գրեթե չորս տարի անց, երբ Թեհրանի նկատմամբ ԱՄՆ պատժամիջոցների համապատասխան դադարեցրեց մատակարարումները: Դրա մասին հայտնել է Eurostat-ը (Եվրամիության վիճակագրական գործակալությունը): Ինչպես պարզաբանում է ԻՐՆԱ գործակալությունը, Թուրքիան մարտին Իրանից ներկրել է 576 մետրիկ տոննա նավթ, իսկ ապրիլին՝ ևս 485 տոննա։ Իրանից Թուրքիա նավթի վերջին մատակարարումը գրանցվել է 2020 թվականի օգոստոսին, երբ երկիրը տեղի է տվել ԱՄՆ ճնշմանն ու դադարեցրել ներմուծումը, գրում է irantoday-ը։ Այս ցուցանիշները ևս մեկ նշան են, որ ավելի ու ավելի շատ երկրներ դադարել են կատարել Իրանի դեմ ԱՄՆ պատժամիջոցները և նավթ են մատակարարում այդ երկրից։ Իրանից այս տարի նավթ են ներկրել նաև Բուլղարիան, Լեհաստանը և Վրաստանը։ Ներկայում, երբ Թեհրանը ասիական շուկաներին ռեկորդային ծավալներով նավթ է վաճառում, ավելի շատ եվրոպական երկրներ պատրաստ են անտեսել Իրանի դեմ ԱՄՆ պատժամիջոցներն ու նավթ ներկրել այդ երկրից: Իրանական նավթի արտահանումը այս տարվա մի քանի ամիսների և 2023 թվականին հասել է օրական ավելի քան 1,6 միլիոն բարելի՝ 2019 թվականին գրանցված 0,3 միլիոն բարելի օրական ռեկորդային նվազագույնի համեմատ, երբ ԱՄՆ-ը խստացրեց Թեհրանի դեմ պատժամիջոցները:

10:08 - 02 հուլիսի, 2024

Հայաստանի և Թուրքիայի հատուկ ներկայացուցիչների հանդիպման ժամկետի վերաբերյալ պայմանավորվածություն ձեռք բերելուց հետո հանրությունը կիրազեկվի․ ԱԳՆ

Տեղեկատվություն է տարածվում, թե հուլիսի 2-ին նախատեսվում է Հայաստանի և Թուրքիայի ներկայացուցիչների հանդիպում Մարգարայում: ՀՀ ԱԳՆ-ից հայտնում են, որ Հայաստանի և Թուրքիայի միջև հարաբերությունների կարգավորման հարցերով հատուկ ներկայացուցիչների հանդիպման ժամկետի վերաբերյալ պայմանավորվածություն ձեռք բերելուց հետո հանրությունը պատշաճ ժամկետում կիրազեկվի:

16:29 - 01 հուլիսի, 2024

Թուրքիայում անտառային հրդեհներ են |azatutyun.am|

azatutyun.am: Թուրքիայում անտառային հրդեհներ են։ Ըստ «Անադոլու» գործակալության՝ դրանք հիմնականում տարածվում են Իզմիրում, ինչպես նաև Չանաքկալեում։ Նշվում է, որ ընդհանուր առմամբ Իզմիրում բռնկվել է 16 հրդեհ, 8-ը՝ անտառներում, 8-ը՝ գյուղական բնակավայրերում, որից 11-ը հաջողվել է վերահսկողության տակ առնել։ Որոշ շրջաններում տեղացիները, նաև զբոսաշրջիկները տարհանվել են։

13:41 - 30 հունիսի, 2024

Միրզոյանը վերահաստատում է՝ Հայաստանը պատրաստ է մեկ ամսում խաղաղության պայմանագիր կնքել |civilnet.am|

civilnet.am: Արտաքին գործերի նախարար Արարատ Միրզոյանը Էստոնիայում իր գործընկերոջ հետ համատեղ ասուլիսին խոսել հայ-ադրբեջանական և հայ-թուրքական հարաբերությունների մասին։ «Ադրբեջանի հետ գրեթե վերջնականացրել ենք խաղաղության համաձայնագրի սևագրի տեքստը։ Հայաստանը պատրաստ է մեկ ամսում ամբողջությամբ ավարտին հասցնել այն և խաղաղության պայմանագիր ստորագրել Ադրբեջանի հետ։ Ես չեմ կարող ասել, որ մենք տեսնում ենք դրական արձագանք Ադրբեջանից այս առաջարկին՝ ստորագրել խաղաղության համաձայնագիրը մեկ ամսում»,- ասել է նա։ Միրզոյանի համոզմամբ՝ Հարավային Կովկասում կոնֆլիկտի էջը փակելու և խաղաղություն հաստատելու իրական հնարավորություն կա։ Ըստ նրա՝ խաղաղությունը օգտակար կլինի տարածաշրջանի բոլոր երկրների ու ժողովուրդների համար։ Ինչ վերաբերում է Թուրքիայի հետ հարաբերությունների կարգավորմանը, ԱԳՆ ղեկավարը կարծում է, որ ժամանակն է կյանքի կոչելու երրորդ երկրների և դիվանագիտական անձնագիր ունեցող քաղաքացիների համար սահմանը բացելու պայմանավորվածությունները։ «Թուրքիայի հետ Հայաստանը պատրաստ է ամբողջովին վերականգնել դիվանագիտական հարաբերությունները, բացել սահմանները։ Մենք արդեն կոնկրետ համաձայնություններ ունենք՝ բացելու Հայաստան-Թուրքիա սահմանը երրորդ երկրների քաղաքացիների և դիվանագիտական անձնագրերով քաղաքացիների համար։ Կարծում եմ՝ ժամանակն է կյանքի կոչելու այդ համաձայնությունները»,- նշել է Միրզոյանը։

14:24 - 27 հունիսի, 2024

«Ողջունում ենք Հայաստանի կողմից Պաղեստինի ճանաչումը»․ Էրդողան |azatutyun.am|

azatutyun.am: «Ողջունելի է, որ վարչապետ Փաշինյանի գլխավորությամբ Հայաստանը ճանաչեց Պաղեստին պետությունը», - այսօր Անկարայում, իշխող «Արդարություն և Զարգացում» խորհրդարանական խմբակցության հետ հանդիպման ժամանակ հայտարարել է Թուրքիայի նախագահ Ռեջեփ Թայիփ Էրդողանը։ Թուրքիայի ղեկավարը նաև Անկարայի միանշանակ աջակցությունն է հայտնել Լիբանանին՝ պնդելով, թե Իսրայելը կարող է պատերազմ սկսել այդ երկրի դեմ։ «Թուրքիան աջակցում է Լիբանանին և մյուս տարածաշրջանային դերակատարներին ևս կոչ է անում սատարել Բեյրութին», - հայտարարել է Էրդողանը։ Հունիսի 21-ին Երևանը հայտնեց, որ ճանաչում է Պաղեստինի պետությունը։ Պաղեստինը շնորհակալությամբ, Իսրայելը կոշտ քննադատությամբ է արձագանքել Հայաստանի այս որոշմանը:

15:12 - 26 հունիսի, 2024

ՀՀ–ն Ադրբեջանի և Թուրքիայի հետ գործընթացները չի կապում միմյանց․ Արմեն Գրիգորյան |armenpress.am|

armenpress.am: Հայաստան-Ադրբեջան և Հայաստան-Թուրքիա գործընթացները ՀՀ-ն դիտարկում է որպես միմյանցից առանձին ու տարբեր ուղղություններ: Այս մասին «Կառուցելով ապագան» խորագրով «ԱՊՐԻ ֆորում 2024»-ի ընթացքում ասաց Հայաստանի անվտանգության խորհրդի քարտուղար Արմեն Գրիգորյանը՝ անդրադառնալով հնչող տեսակետին, թե Թուրքիան չի կարգավորի Հայաստանի հետ հարաբերությունները, քանի դեռ Հայաստանն ու Ադրբեջանը համաձայնության չեն եկել: «Մենք երկու գործընթացները տեսնում ենք տարբեր ուղիներով: Կան Հայաստան-Ադրբեջան հարաբերություններ և Հայաստան-Թուրքիա հարաբերություններ: Մենք սրանց ուղղությամբ տարբեր կերպ ենք աշխատում: Այո, կարող է լինել որոշակի փոխկապակցվածություն: Բայց մեր մոտեցումը հեևյալն է․ եթե լուծելու երկու բարդ բանաձևեր կան, ու դուք այդ բարդ բանաձևերը միացնում եք, ապա լուծումն ավելի դժվար կլինի: Այսպիսով, դրանք պետք է բաժանել: Մեր ըմբռնումն ու մոտեցումն այն է, որ մենք ունենք երկու տարբեր ուղղություն»,- ասաց Գրիգորյանը: Անվտանգության խորհրդի քարտուղարը նշեց՝ Հայաստանն ակնկալում է, որ դիվանագիտական անձնագրեր ունեցողների և երրորդ երկրների քաղաքացիների համար ցամաքային սահմանը բացելու վերաբերյալ ձեռք բերված պայմանավորվածությունը կյանքի կկոչվեն: Նա նկատեց, որ Հայաստանը Թուրքիայից սպասում է գործողությունների՝ առաջ շարժվելու համար: ԱԽ քարտուղարի խոսքով՝ այս գործընթացում ժամկետ սահմանված չէ:

15:06 - 26 հունիսի, 2024

Բաքուն ու Անկարան Ադրբեջանում զինտեխնիկայի կամ մասերի համատեղ արտադրություն կհիմնեն․ Հասանով |azatutyun.am|

azatutyun.am: Շուշիի հռչակագրով՝ Ադրբեջանն ու Թուրքիան դաշնակիցներ են, երկու բանակների ինտեգրումը բարձր մակարդակի վրա է, ադրբեջանական «Ազերթաջ» պետական լրատվական գործակալությանն ու АзТВ-ին տված հարցազրույցում հայտարարել է Ադրբեջանի պաշտպանության նախարար Զաքիր Հասանովը։ Նա շեշտել է, որ երկու երկրների կառավարման կետերը կապված են միմյանց հետ, համատեղ գործունեություն են ծավալում՝ մեջբերելով նաև Ադրբեջանի նախագահ Իլհամ Ալիևի խոսքերը՝ «Մեկ ազգ, երկու պետություն և մեկ բռունցք»։ Մեծ աշխատանք է տարվում ռազմարդյունաբերության ոլորտում, հայտարարել է Ադրբեջանի պաշտպանության նախարարը՝ տեղեկացնելով, որ շուտով Ադրբեջանում ժամանակակից զինտեխնիկայի կամ դրանց մասերի համատեղ արտադրություն կկազմակերպվի։ Ընդգծելով, որ Թուրքիայի ռազմարդյունաբերությունը սրընթաց զարգացում է ապրել, և խոսքը ոչ միայն «Բայրաքթարի» մասին է՝ Հասանովը շեշտել է, որ Ադրբեջանը նույնպես օգտվում է դրանից և այդ ուղղությամբ աշխատանքներն իրականացվում են բարձր տեմպերով։ 2021-ի հունիսին Ադրբեջանն ու Թուրքիան Շուշիում փաստաթուղթ ստորագրեցին։ Ադրբեջանի նախագահ Իլհամ Ալիևը հայտարարեց, որ այն բարձրագույն մակարդակի է հասցնում Ադրբեջանի և Թուրքիայի համագործակցությունը: Հռչակագիրը ենթադրում է փոխադարձ ռազմական օգնություն և սերտ համագործակցություն ռազմարդյունաբերության ոլորտում:

11:32 - 26 հունիսի, 2024