ԱԳՆ

ԱԳՆ-ն ՀՀ արտաքին քաղաքական գերատեսչությունն է։ Հիմնադրվել է 1918թ.-ին։ Նախարարությունը մշակում եւ իրականացնում է ՀՀ կառավարության արտաքին քաղաքականությունը: Նախարարության ստեղծումը, վերակազմակերպումը եւ գործունեության դադարեցումը կարգավորվում է օրենքով: Հայաստանի Հանրապետության արտաքին գործերի նախարարությունը գործում է ՀՀ Սահմանադրության, «Կառավարության կառուցվածքի եւ գործունեության մասին», «Դիվանագիտական ծառայության մասին» եւ այլ օրենքների հիման վրա: Արտաքին գործերի նախարարության աշխատանքներն ուղղված են Հայաստանի Հանրապետության արտաքին անվտանգության ամրապնդմանը, զարգացման արտաքին բարենպաստ պայմանների ապահովմանը, միջազգային կազմակերպություններում եւ միջազգային գործընթացներում ներգրավվածության խորացմանը, բարեկամ եւ գործընկեր երկրների հետ համագործակցության առավել ամրապնդմանը:

Արտաքին գործերի նախարարը Արա Այվազյանն է։ Տեղակալներն են Արմեն Ղեւոնդյանը, Արտակ Ապիտոնյանը, Գագիկ Ղալաչյանը, Ավետ Ադոնցը

ԱԳՆ գլխավոր քարտուղարը Ստոկհոլմի միջազգային խաղաղության հետազոտությունների ինստիտուտի տնօրենին ներկայացրել է Հարավային Կովկասում անվտանգային մարտահրավերները

Նոյեմբերի 11-ին Ստոկհոլմում ՀՀ ԱԳՆ գլխավոր քարտուղար Դավիթ Կարապետյանը հանդիպում է ունեցել Ստոկհոլմի միջազգային խաղաղության հետազոտությունների ինստիտուտի (SIPRI) տնօրեն Դեն Սմիթի հետ: Այդ մասին հայտնում են ՀՀ ԱԳՆ-ից: ՀՀ ԱԳՆ գլխավոր քարտուղարը, ներկայացնելով Հարավային Կովկասում անվտանգային մարտահրավերները, ընդգծել է տարածաշրջանային կայունության պահպանման և միջազգային համագործակցության խթանմանն ուղղված Հայաստանի հանձնառությունը: Հայաստանի՝ կայուն խաղաղությանը միտված նախաձեռնութունները ներկայացնելուն զուգահեռ, Դավիթ Կարապետյանը կարևորել է Ստոկհոլմի միջազգային խաղաղության հետազոտությունների ինստիտուտի հետ համագործակցությունը, մասնավորապես, անվտանգության դինամիկայի վերաբերյալ հետազոտությունների իրականացման և լարվածության աճին դիմակայելու ռազմավարությունների մշակման համատեքստում

14:49 - 12 նոյեմբերի, 2024

ՀՀ ԱԳՆ գլխավոր քարտուղարը և «Ֆոլկե Բերնադոտ» ակադեմիայի գլխավոր տնօրենն անդրադարձել են համագործակցության ընդլայնման հեռանկարներին

ՀՀ ԱԳՆ գլխավոր քարտուղար Դավիթ Կարապետյանը նոյեմբերի 11-ին Շվեդիայում հանդիպում է ունեցել «Ֆոլկե Բերնադոտ» ակադեմիայի գլխավոր տնօրեն Փեր Օլսոն Ֆրիդի հետ: Ինչպես տեղեկացնում են ՀՀ արտաքին գործերի նախարարությունից, Դավիթ Կարապետյանը վերահաստատել է ՀՀ կառավարության հանձնառությունը՝ ուղղված ժողովրդավարական բարեփոխումների իրականացմանը, ինստիտուցիոնալ կարողությունների զարգացմանը և Հայաստանի դիմակայունության բարձրացմանը: Ըստ աղբյուրի՝ ՀՀ ԱԳՆ գլխավոր քարտուղարն իր զրուցակցին է ներկայացրել սեպտեմբերին Հայաստանում առաջին անգամ տեղի ունեցած «Երևանյան երկխոսություն» միջազգային համաժողովը՝ ընդգծելով դրա շարունակականության ապահովման կարևորությունը միջազգային մարտահրավերների բարձրաձայնման և դրանց հասցեագրման հարցում: Հանդիպման ընթացքում անդրադարձ է կատարվել նաև «Ֆոլկե Բերնադոտ» ակադեմիայի հետ համագործակցության ընդլայնման հնարավոր հեռանկարներին: Այս համատեքստում Դավիթ Կարապետյանը բարձր է գնահատել Ակադեմիայի դերը հակամարտությունների կանխարգելման, խաղաղության հաստատման և կարողությունների զարգացման հարցում՝ ընդգծելով դրա ներգրավվածության կարևորությունը Հայաստանում ԵՄ դիտորդական առաքելության աշխատանքներում:

20:33 - 11 նոյեմբերի, 2024

Հայաստանի և Շվեդիայի ԱԳ նախարարները մտքեր են փոխանակել տարածաշրջանային անվտանգությանն առնչվող հարցերի շուրջ

20:02 - 11 նոյեմբերի, 2024

Մեկնարկել է Արարատ Միրզոյանի աշխատանքային այցը Շվեդիա

Մեկնարկել է ՀՀ ԱԳ նախարար Արարատ Միրզոյանի աշխատանքային այցը Շվեդիայի Թագավորություն, տեղեկացնում են ՀՀ ԱԳՆ-ից: Կայացել է Արարատ Միրզոյանի առանձնազրույցը Շվեդիայի ԱԳ նախարար Մարիա Սթեներգարդի հետ, որի ընթացքում քննարկվել է օրակարգային հարցերի լայն շրջանակ։

16:42 - 11 նոյեմբերի, 2024

Բաքվում COP29-ին մասնակցելու վերջնական որոշում չկա․ Կոստանյան |azatutyun.am|

azatutyun.am: Բաքվում այսօր մեկնարկած Կլիմայի փոփոխության մասին ՄԱԿ-ի շրջանակային կոնվենցիայի 29-րդ համաժողովին (COP29) մասնակցելու վերջնական որոշում չկա, այսօր խորհրդարանում հայտարարեց փոխարտգործնախարար Վահան Կոստանյանը։ «Ազատության» հարցին ի պատասխան Կոստանյանն ասաց, որ այդ որոշումը կախված է մի շարք հարցերից, այդ թվում՝ գերիների վերադարձի և խաղաղության պայմանագրի շուրջ քննարկումներից։ «Եթե դեռ չկա որոշում, տեսականորեն հնարավոր է և՛ գնալ, և՛ չգնալ: Դա կախված է ընթացիկ գործընթացներից», - ասաց փոխարտգործնախարարը՝ շարունակելով․ - «Կան մի շարք խնդիրներ, կարգավորման գործընթացի դինամիկայից է կախված, հստակ առանձին խնդիր չեմ կարող մատնանշել»: «Ազատության» հարցին՝ և՛ խաղաղության պայմանագրի, և՛ գերիների վերադարձի հարցը խնդիների մի՞ խումբ է, Կոստանյանը պատասխանեց․ - «Այո»։ Մինչև նոյեմբերի 24-ը շարունակվող COP29-ին Ադրբեջանը նաև Հայաստանին է հրավիրել։ Մամուլը գրել էր, որ արտգործնախարար Արարատ Միրզոյանը հնարավոր է Բաքու մեկնի՝ պայմանով, որ Ադրբեջանը Հայաստանին գերիներ վերադարձնի: Հայաստանի Ազգային ժողովի նախագահ Ալեն Սիմոնյանն էլ գերիներին չվերադարձնելու դեպքում COP29-ին մասնակցությունը ճիշտ չի համարել։ ՄԱԿ-ի միջոցառումը Բաքվում անցկացնելու որոշումը կայացվեց 2023-ի դեկտեմբերին՝ Լեռնային Ղարաբաղի վրա ադրբեջանական լայնածավալ հարձակումից և Արցախի հայաթափումից ընդամենը երեք ամիս անց։ Որոշումն ընդունվեց այդ թվում պաշտոնական Երևանի աջակցության շնորհիվ, ինչի դիմաց Բաքուն համաձայնեց ազատ արձակել 32 հայ ռազմագերիների։

12:26 - 11 նոյեմբերի, 2024

Նոյեմբերի 11-12-ը Արարատ Միրզոյանն աշխատանքային այցով կլինի Շվեդիայում |1lurer.am|

1lurer.am: Նոյեմբերի 11-12-ը ՀՀ ԱԳ նախարար Արարատ Միրզոյանն աշխատանքային այցով կլինի Շվեդիայում: Այդ մասին հայտնում է ՀՀ ԱԳՆ մամուլի խոսնակ Անի Բադալյանը։ Կայանալու է ԱԳ նախարար Միրզոյանի հանդիպումը Շվեդիայի ԱԳ նախարար Մարիա Մալմեր Ստեներգարդի հետ: Ծրագրված են նաև երկկողմ հանդիպումներ գործադիր և օրենսդիր շրջանակների այլ բարձրաստիճան պաշտոնյաների հետ: «Հայաստանը շահագրգռված է Շվեդիայի հետ քաղաքական երկխոսության և գործընկերության հետագա ընդլայնմամբ՝ թե՛ երկկողմ օրակարգով, թե՛ տարբեր ձևաչափերով՝ ներառյալ ԵՄ-ի շրջանակներում: Մենք ամուր հիմքեր ենք ստեղծել և տեսնում ենք փոխգործակցության նոր հնարավորություններ, այդ թվում՝ տնտեսական համագործակցության խթանման նպատակով։ Սպասում եմ Ստոկհոլմում քննարկումներին», - նշել է ՀՀ ԱԳ նախարար Արարատ Միրզոյանը։

19:01 - 10 նոյեմբերի, 2024

Միրզոյանը հունգարացի իր գործընկերոջն է ներկայացրել Հայաստան-Ադրբեջան հարաբերությունների կարգավորման գործընթացի վերջին զարգացումները

Նոյեմբերի 7-ին Բուդապեշտում աշխատանքային այցի շրջանակներում ՀՀ ԱԳ նախարար Արարատ Միրզոյանը մասնակցել է Հունգարիայի արտաքին գործերի և առևտրի նախարար Պետեր Սիյարտոյի կազմակերպած աշխատանքային նախաճաշին: Հանդիպումը տեղի է ունեցել Հունգարիայի մայրաքաղաքում անցկացվող Եվրոպական քաղաքական համայնքի հինգերորդ գագաթնաժողովի շրջանակներում: Հանդիպման ընթացքում ՀՀ ԱԳ նախարարն անդրադարձել է տարածաշրջանային հարցերի: Նա ներկայացրել է Հայաստանի և Ադրբեջանի միջև հարաբերությունների կարգավորման գործընթացում վերջին զարգացումները, այդ թվում՝ երկու երկրների միջև սահմանազատման գործընթացի առնչությամբ, ինչպես նաև խաղաղության պայմանագրի կնքման ուղղությամբ ջանքերը: Անդրադարձ է կատարվել տարածաշրջանային տնտեսական ու տրանսպորտային կապուղիների ապաշրջափակման հարցերի, այդ թվում՝ ՀՀ կառավարության կողմից մշակված «Խաղաղության խաչմերուկ» նախագծին՝ որպես տարածաշրջանային կայունության ապահովման կարևոր գործոն։

18:21 - 07 նոյեմբերի, 2024

Բաքվից խաղաղության պայմանագրի չհամաձայնեցված կետերն են գաղտնազերծել. Երևանն արձագանքում է |azatutyun.am|

azatutyun.am: Երևանը խաղաղության պայմանագրի 11-րդ խմբագրումը ստանալուց հետո հայտարարում է՝ մեկ-երկու հարց շարունակում է չհամաձայնեցված մնալ։ Փոխարտգործնախարար Վահան Կոստանյանը, սակայն, չի մանրամասնում՝ Բաքվի հետ այդ որ հարցերի շուրջ չի հաջողվում համաձայնության հասնել: «Կողմերը չունեն ընդհանուր դիրքորոշում տվյալ հարցերի շուրջ, և բնականաբար քննարկումները պաշտոնական Բաքվի հետ շարունակվելու են», - նշեց Կոստանյանը: Խաղաղության համաձայնագրի վիճահարույց երեք կետերը X-ի իր էջում գաղտնազերծել է Ալիևի կառավարության կողմից ֆինանսավորվող վերլուծական կենտրոնի ղեկավար Ֆարիդ Շաֆիևը։ Ըստ նրա՝ դրանցից մեկը Հայաստանի Սահմանադրության փոփոխության, մյուսը՝ Երևանի կողմից «իրավական և դիվանագիտական վեճերի» բացառման, վերջինն էլ Հայաստանի և Ադրբեջանի սահմանին օտար ուժերի բացակայության մասին է: Հայաստանի փոխարտգործնախարարն անդրադառնալով Ադրբեջանի իշխանություններին մոտ կանգնած այս փորձագետի պնդումներին՝ հայտարարեց՝ Սահմանադրությունը փոխելու պահանջ խաղաղության համաձայնագրի նախագծում չկա: Իսկ արդյոք մյուս երկու կետերը վերաբերո՞ւմ են իրավական վեճերի բացառմանը և սահմանին օտար ուժերի բացակայությանը: «Քանի որ այս պահին բանակցություններն ընթանում են, ես ճիշտ չեմ համարում ամբողջությամբ բացել, թե ինչի շուրջ են ընթանում քննարկումները, բայց՝ այո, ինչպես նշեցի կան չհամաձայնեցված կետեր և սրանց շուրջ պիտի շարունակվեն քննարկումները», - ասաց Վահան Կոստանյանը: «Ազատության» հարցին՝ Հայաստանի համար ընդունելի՞ է պայմանագրի կնքման դեպքում ԵՄ դիտորդների դուրս բերումը, փոխարտգործնախարարը պատասխանեց. - «Այս պահին Հայաստանի Հանրապետությունը, քանի դեռ մենք ունենք չդելիմիտացված սահման Ադրբեջանի Հանրապետության հետ, քանի դեռ առկա են խնդիրներ, գտնում է, որ Եվրամիության դիտորդների ներգրավումը Հայաստան-Ադրբեջան միջպետական սահմանին կարևոր անվտանգային ու կայունության նշանակություն ունի»: Անդրադառնալով դիվանագիտական վեճերի հետ կապված հարցին՝ նա արձագանքեց. - «Ընդհանուր գործընթացի ու ընդհանուր տրամաբանության մեջ պիտի նայել: Հայաստանի Հանրապետության համար կան նաև այս համաձայնագրից դուրս շատ կարևոր հարցեր, այդ թվում՝ հումանիտար հարցեր, որոնք հասցեագրման կարիք ունեն»:

15:55 - 07 նոյեմբերի, 2024

Հայաստանը COP-29-ին մասնակցելու հարցը կապում է Երևան-Բաքու բանակցությունների դինամիկայի հետ |armenpress.am|

armenpress.am: Հայաստանը Բաքվում կայանալիք COP-29 համաժողովին մասնակցել-չմասնակցելու վերաբերյալ որոշում դեռ չունի։ Հայաստանի արտաքին գործերի նախարարի տեղակալ Վահան Կոստանյանը լրագրողների հետ ճեպազրույցում հայտարարել է, որ այդ հարցով քննարկումներ են ընթանում՝ շեշտելով, որ դա պայմանավորված է բանակցային գործընթացի դինամիկայով։ «Այս պահի դրությամբ Հայաստանը COP-29-ին մասնակցել-չմասնակցելու վերաբերյալ որոշում դեռևս չունի, ընթանում են քննարկումներ: Դա պայմանավորված է բանակցային գործընթացի դինամիկայով»,-ասել է Կոստանյանը: Նա շեշտել է, որ Հայաստանը շահագրգռված է ինտենսիվացնել շփումներն ադրբեջանական կողմի հետ՝ հնարավորինս կարճ ժամկետում ավարտելու խաղաղության պայմանագրի տեքստի համաձայնեցումը: Փոխնախարարի խոսքով՝ այս պահին նախարարների մակարդակով կամ երկրների ղեկավարների մակարդակով հանդիպման մասին որևէ կոնկրետ պայմանավորվածություն չկա: «Սակայն հայկական կողմը շահագրգռված է հանդիպումներն ինտենսիվացնել, որ հնարավոր լինի հնարավորինս կարճ ժամկետում ավարտել համաձայնագրի տեքստի համաձայնեցումը»,-ասել է Կոստանյանը: Պայմանագրի նախագծի բոլոր դրույթների վերաբերյալ վերջնական համաձայնեցում այս պահին չկա: Կան հարցեր, որոնք դեռևս շարունակում են կողմերի միջև չհամաձայնեցված մնալ: Փոխնախարարի խոսքով՝ բանակցությունները երկու կողմերի միջև շարունակվելու են: Անդրադառնալով հարցին, թե արդյոք չհամաձայնեցված հարցերից է Ադրբեջանի կողմից Հայաստանի Սահմանադրության փոփոխության վերաբերյալ առաջ քաշվող հարցը՝ նա ասաց. «Հայաստանի Սահմանադրության հարցը չի հանդիսանում խաղաղության պայմանագրի մաս»:

15:06 - 07 նոյեմբերի, 2024

Սահմանադրության հարցը խաղաղության պայմանագրի մաս չէ. փոխարտգործնախարար |civilnet.am|

civilnet.am: Խաղաղության պայմանագրի բոլոր դրույթների վերաբերյալ վերջնական համաձայնություն այս պահին չկա, հայտարարել է փոխարտգործնախարար Վահան Կոստանյանը։ «Կան հարցեր, որոնք շարունակում են չհամաձայնեցված մնալ։ Բանակցությունները կողմերի միջև շարունակվելու են»,- նոյեմբերի 7-ին կառավարության նիստից հետո լրագրողների հետ զրույցում ասաց Կոստանյանը։ Նա վստահեցնում է, որ Հայաստանի Սահմանադրության փոփոխության հարցը խաղաղության պայմանագրի մաս չի հանդիսանում։ Կոստանյանը նաև տեղեկացրեց, որ այս պահին պայմանավորվածություններ չկան Հայաստանի և Ադրբեջանի ղեկավարների կամ արտգործնախարարների մակարդակով հնարավոր հանդիպման վերաբերյալ. «Բայց հայկական կողմը շահագրգռված է հանդիպումներն ինտենսիվացնել, որպեսզի հնարավոր լինի կարճ ժամկետում ավարտել պայմանագրի տեքստի համաձայնեցումը»։ Նրա խոսքով՝ Բաքվում կայանալիք COP29-ին մասնակցության մասով դեռևս որոշում կայացված չէ։ Հոկտեմբերի 31-ին Միրզոյանը հայտարարել էր, որ առաջիկայում հնարավոր կլինի համաձայնության գալ խաղաղության պայմանագրի «ևս մեկ-երկու ձևակերպումների շուրջ, որից հետո արդեն պայմանագիրը պատրաստ կլինի ստորագրման»։ Հայաստանի կառավարաթյան պնդմամբ՝ խաղաղության պայմանագրի նախագծի 16 հոդվածից 13-ն ամբողջությամբ համաձայնեցված են, 3-ը՝ մասնակի։ Բաքուն մի քանի անգամ մերժել է արդեն համաձայնեցված հոդվածներով պայմանագիրը ստորագրելու Երևանի առաջարկը։ Ադրբեջանական կողմն օրերս կառավարամերձ շրջանակաների միջոցով արտահոսք էր կազմակերպել չհամաձայնեցված 3 կետերի վերաբերյալ։ Ըստ դրանց՝ առաջինը վերաբերում է տարածքային հավակնությունների բացառմանը։ Բաքուն բազմիցս պնդել է, թե Հայաստանի Սահմանադրությունում տարածքային պահանջներ կան Ադրբեջանի նկատմամբ։ Մյուս չհամաձայնեցված դրույթը միջազգային դատական ատյաններից հայցերի հետկանչման, երրորդը՝ սահմանին երրորդ ուժերի ներկայության բացառման մասին է։

14:11 - 07 նոյեմբերի, 2024

Ստացվել են խաղաղության պայմանագրի նախագծի վերաբերյալ ադրբեջանական կողմի պատասխան առաջարկները․ ԱԳՆ խոսնակ |arm.sputniknews.ru|

arm.sputniknews.ru: Այսօր հայկական կողմը ստացել է խաղաղության պայմանագրի վերաբերյալ ադրբեջանական կողմի պատասխան առաջարկները։ Այս մասին Sputnik Արմենիային հայտնեց ՀՀ ԱԳՆ խոսնակ Անի Բադալյանը։ Նշենք, որ սա նախագծի 11-րդ խմբագրությունն ՝ :

18:20 - 05 նոյեմբերի, 2024

Երևանը խաղաղության պայմանագրի վերաբերյալ առաջարկներ է ուղարկել Բաքվին. փոխարտգործնախարար |civilnet.am|

civilnet.am: Հայկական կողմը խաղաղության պայմանագրի վերաբերյալ առաջարկներ է ուղարկել Ադրբեջանին։ Այդ մասին նոյեմբերի 5-ին ԱԺ-ում լրագրողների հետ զրույցում հայտարարել է արտաքին գործերի նախարարի տեղակալ Պարույր Հովհաննիսյանը։ Նրա խոսքով՝ խաղաղության պայմանագրի 1-2 ձևակերպումը համաձայնեցնելու գործընթացը, որի մասին խոսել էր արտգործնախարար Արարատ Միրզոյանը, նույն փուլում է. «Այժմ սպասում ենք ադրբեջանական կողմի արձագանքին»: Հոկտեմբերի 31-ին Միրզոյանը հայտարարել էր, որ առաջիկայում հնարավոր կլինի համաձայնության գալ խաղաղության պայմանագրի «ևս մեկ-երկու ձևակերպումների շուրջ, որից հետո արդեն պայմանագիրը պատրաստ կլինի ստորագրման»։ «Հիմա մենք ունենք ըմբռնում այն մասին, որ կա ևս մեկ-երկու ձևակերպում, որոնց շուրջ աշխատանքները կշարունակենք, սա էլ բանակցային նորմալ գործընթաց է։ Ինձ վերջերս ԱԺ-ում մեղադրեցին հաճախ զգուշավոր լավատեսություն հայտնելու մեջ։ Բայց չեմ կարող չօգտագործել այս բառերը։ Պետք է զգուշավոր լավատեսություն հայտնեմ այն մասին, որ մոտ ապագայում մեզ կհաջողվի համաձայնության գալ այդ մեկ-երկու ձևակերպումների շուրջ, որից հետո արդեն պայմանագիրը պատրաստ կլինի ստորագրման»,- ասել էր ԱԳՆ ղեկավարը։ Հայաստանի կառավարաթյան պնդմամբ՝ խաղաղության պայմանագրի նախագծի 16 հոդվածից 13-ն ամբողջությամբ համաձայնեցված են, 3-ը՝ մասնակի։ Բաքուն մի քանի անգամ մերժել է արդեն համաձայնեցված հոդվածներով պայմանագիրը ստորագրելու Երևանի առաջարկը։

11:58 - 05 նոյեմբերի, 2024

Վահագն Խաչատուրյանը հեռախոսազրույցներ է ունեցել Հակոբ Սիմիդյանի և Արարատ Միրզոյանի հետ

Կոլումբիայի Կալի քաղաքում անցկացվող Կենսաբազմազանության մասին կոնվենցիայի Կողմերի 16-րդ համաժողովի (COP16) եզրափակիչ լիագումար նիստի քվեարկության արդյունքներով քվեարկության մասնակից երկրների ձայների մեծամասնությամբ որոշում է կայացվել 2026 թվականին կայանալիք ամենամյա համաժողովն (COP17) անցկացնել Հայաստանի Հանրապետությունում: Այս կապակցությամբ Հանրապետության նախագահ Վահագն Խաչատուրյանը հեռախոսազրույցներ է ունեցել ՀՀ շրջակա միջավայրի նախարար Հակոբ Սիմիդյանի և ՀՀ արտաքին գործերի նախարար Արարատ Միրզոյանի հետ: Նախագահը շնորհավորել և շնորհակալություն է հայտնել նախարարներին բարձր մակարդակի միջազգային համաժողովը Հայաստանում անցկացնելու որոշման կայացման գործում երկու նախարարությունների թիմերի ցուցաբերած համակցված և արդյունավետ աշխատանքի համար: Նախագահ Վահագն Խաչատուրյանը նաև հաջողություններ է մաղթել հանձնառու գերատեսչություններին 2026 թվականին Կենսաբազմազանության մասին կոնվենցիայի Կողմերի 17-րդ համաժողովը բարձր մակարդակով կազմակերպելու և անցկացնելու գործում:

11:43 - 01 նոյեմբերի, 2024

Մեր մասնակցությունը COP-29-ին որևէ կերպ հաստատված չէ․ Արարատ Միրզոյան |armenpress.am|

armenpress.am: Հայաստանը դեռ չի արձագանքել Բաքվում կայանալիք COP-29-ի մասնակցության հրավերին։ Ազգային ժողովի մշտական հանձնաժողովների համատեղ նիստում «Հայաստանի Հանրապետության 2025 թվականի պետական բյուջեի մասին» ՀՀ օրենքի նախագծի քննարկման ժամանակ այս մասին ասաց ՀՀ արտաքին գործերի նախարար Արարատ Միրզոյանը։ «Մեր մասնակցությունը COP-29-ին որևէ կերպ հաստատված չէ։ Մենք որևէ պաշտոնական արձագանք և վերաբերմունք այս հարցում չենք դրսևորել։ Իհարկե, նաև չենք էլ բացառում, բայց պետք է հասկանանք, թե ինչի մասին է խոսքը»,- նշեց Միրզոյանը։ Ավելի վաղ Բաքվից հայտարարել էին, որ Հայաստանի արտաքին գործերի նախարարի անունով հրավեր են ուղարկել ՀՀ-ին՝ մասնակցելու Բաքվում կայանալիք COP-29 համաժողովին։ Դրանից հետո ՀՀ ԱԳ նախարարի տեղակալ Պարույր Հովհաննիսյանը հայտարարել էր, որ Հայաստանը մոտ ապագայում կկայացնի որոշում, թե ինչ մակարդակով է ներկայացված լինելու Բաքվում կայանալիք COP-29-ին։

12:16 - 31 հոկտեմբերի, 2024

Հայոց ցեղասպանության ճանաչման օրակարգը Հայաստանի արտգործնախարարության թիվ մեկ առաջնահերթությունը չէ․ ԱԳ նախարար

Հայոց ցեղասպանության ճանաչման օրակարգը Հայաստանի արտգործնախարարության թիվ մեկ առաջնահերթությունը չէ։ Այս մասին Ազգային ժողովի մշտական հանձնաժողովների համատեղ նիստում «Հայաստանի Հանրապետության 2025 թվականի պետական բյուջեի մասին» ՀՀ օրենքի նախագծի քննարկման ժամանակ ասաց ԱԳ նախարար Արարատ Միրզոյանը։ «Պատմության ողբերգական անցքերը ուսումնասիրելը կամ դա թիվ մեկ առաջնահերթություն դարձնելը, անշուշտ, ԱԳՆ օրակարգում չէ»,- ասաց Միրզոյանը։ Նրա խոսքով՝ ԱԳՆ թիվ մեկ առաջնահերթությունը Հայաստանի Հանրապետության շուրջ խաղաղության և կայունության ապահովումն է: Մենք սրա շրջանակներում թիվ մեկ քայլը, որ մենք դիտարկում ենք և որի ուղղությամբ մեր ջանքերը գործադրում ենք, Ադրբեջանի հետ հարաբերությունների կարգավորման գործընթացն է։

11:20 - 31 հոկտեմբերի, 2024

ԱԳ նախարարը որևէ խանգարող հանգամանք չի տեսնում Հայաստանի և Ադրբեջանի միջև սահմանազատման գործընթացում |armenpress.am|

armenpress.am: Հայաստանի և Ադրբեջանի միջև հարաբերությունների կարգավորման ուղղությամբ այս տարի շոշափելի արդյունք է գրանցվել։ Ազգային ժողովի մշտական հանձնաժողովների համատեղ նիստում «Հայաստանի Հանրապետության 2025 թվականի պետական բյուջեի մասին» ՀՀ օրենքի նախագծի քննարկման ժամանակ այս մասին ասաց ՀՀ արտաքին գործերի նախարար Արարատ Միրզոյանը։ Միրզոյանը նշեց, որ Արտաքին գործերի նախարարության ջանքերը նախ և առաջ ուղղված են և շարունակելու են ուղղված լինել Հայաստանի Հանրապետության շուրջ խաղաղ և կայուն միջավայրի ձևավորմանը։ «Սա առաջին հերթին նշանակում է մեր հարևանների հետ հարաբերությունների կարգավորում և զարգացում»,- ընդգծեց Միրզոյանը։ Խոսելով Ադրբեջանի հետ հարաբերությունների կարգավորման մասին՝ Արարատ Միրզոյանն ասաց, որ 2024 թվականին այդ ուղղությամբ եղել է շատ շոշափելի արդյունք՝ առաջին հերթին միջպետական սահմանի սահմանազատման ուղղությամբ։ «Մենք ապրիլին ստորագրել ենք փաստաթուղթ երկու երկրների սահմանազատման հարցով հանձնաժողովների նախագահների մակարդակով, ապա ստորագրվել է հանձնաժողովների համատեղ գործունեության կանոնակարգը, որը վավերացվել է Հայաստանում Ազգային ժողովի կողմից, Ադրբեջանի կողմից էլ՝ իրենց համապատասխան ընթացակարգերով։ Առաջիկայում կողմերը պաշտոնապես կծանուցեն միմյանց կանոնակարգի ուժի մեջ մտնելու մասին, որից հետո հույս ունեմ, որ սահմանազատման աշխատանքները կշարունակվեն։ Այս պահին դրան որևէ խանգարող բան չի երևում»,-եզրափակեց Միրզոյանը։

10:57 - 31 հոկտեմբերի, 2024