Իսրայել

Իսրայելի պետությունը ստեղծվել է 1948 թվականի մայիսի 14-ին՝ ՄԱԿ-ի Գլխավոր ասամբլեայի 1947 թվականի նոյեմբերի 29-ի որոշմամբ, ըստ որի Մեծ Բրիտանիայի ենթամանդատային Պաղեստինը հռչակվում էր անկախ եւ նրա տարածքում ստեղծվում էին երկու ինքնուրույն՝ արաբական եւ հրեական պետություններ։

Հրեական պետությանը՝ Իսրայելին, հատկացվում էր 14 հզ. կմ2 (Պաղեստինի տարածքի 56%) տարածություն՝ խառը բնակչությամբ։ Երուսաղեմը հանձնվում էր ՄԱԿ-ի կառավարմանը։ 1948 թվականի մայիսին Իսրայելում ստեղծվեց ժամանակավոր կառավարություն, որը կազմված էր բացառապես սիոնիստական կուսակցությունների ներկայացուցիչներից։ Կառավարության առաջին իսկ՝ «Անկախության դեկլարացիայով» սիոնիզմը հռչակվեց Իսրայելի պաշտոնական գաղափարախոսություն եւ քաղաքականություն։

Արաբա-իսրայելական պատերազմներից հետո` 1974 թվականի հունվարին եւ 1975 թվականի սեպտեմբերին Եգիպտոսի, իսկ 1974 թվականի մայիսին Սիրիայի հետ Իսրայելը կնքեց զորքերի տարանջատման եւ նրանց միջեւ բուֆերային գոտիներ ստեղծելու համաձայնագրեր։ 1979 թվականին Եգիպտոսը՝ առաջին արաբական երկիրն էր, որը խաղաղության դաշինք կնքեց Իսրայելի հետ։ Արդյունքում, Իսրայելը Սինայի թերակղզին Եգիպտոսին հետ վերադարձրեց։ Հորդանանը եւ Իսրայելը խաղաղության դաշինք կննքեցին 1994 թվականին։ Իսկ 2005 թվականին Իսրայելը իր բանակը դուրս բերեց Գազայի շրջանից։

Գազայի հատվածում դպրոցի վրա իսրայելական օդային հարվածի հետևանքով զոհվել է առնվազն 17 մարդ |hy.armradio.am|

hy.armradio.am: Գազայում տեղահանվածներին ապաստանած դպրոցի վրա իսրայելական օդային հարվածի հետևանքով զոհվել է առնվազն 17 մարդ՝ գրեթե բոլորը կանայք և երեխաներ։ Եվս 42 մարդ վիրավորվել է խիտ բնակեցված ճամբարի հրթիռակոծման հետևանքով, հայտնել է Ավդա հիվանդանոցը, որը ընդունել է տուժածներին: Ըստ հիվանդանոցի տվյալների՝ մահացածների թվում 13 երեխա և երեք կին կա։ Իսրայելական զինվորականները հայտարարել են, որ իրենց թիրախում դպրոցի շենքում թաքնված ՀԱՄԱՍ-ի զինյալներն են եղել, սակայն ապացույցներ չեն ներկայացրել: Հարվածն իրականացվել է այն ժամանակ, երբ ԱՄՆ պետքարտուղար Անտոնի Բլինկենը հայտարարել է, որ Իսրայելը հասել է ՀԱՄԱՍ-ի արդյունավետ ապամոնտաժման իր նպատակին, և որ հրադադարի շուրջ բանակցությունները կվերսկսվեն առաջիկա օրերին: Քաթարում լրագրողների հետ զրույցում Բլինկենն ասել է, որ երկու կողմերի բանակցողները կվերադառնան Դոհա՝ բանակցությունները վերսկսելու համար: «Մեզ մնում է իսկապես պարզել, թե արդյոք ՀԱՄԱՍ-ը պատրաստ է մասնակցել», — ասել է Բլինկենը պատերազմի սկզբից ի վեր տարածաշրջան կատարած իր 11-րդ այցի ժամանակ: ՀԱՄԱՍ-ի քաղաքական ներկայացուցիչները մինչ այժմ չեն հայտարարել իրենց ավելի մեղմ դիրքորոշման մասին։

09:28 - 25 հոկտեմբերի, 2024

Իսրայելական օդուժը կրկին հարվածել է Բեյրութին |azatutyun.am|

azatutyun.am: Իսրայելը հերթական օդային հարվածն է հասցրել Բեյրութի ուղղությամբ։ Հրթիռներից մեկն ընկել է Իրանի դեսպանատան մոտ: Ուժեղ պայթյուններ են լսվել։ Լրատվական գործակալությունները հրապարակել են ուժգին հրդեհի կադրեր։Լիբանանյան Al-Mayadeen հեռուստաընկերությունն իր հերթին հաղորդել է, որ հարված է հասցվել այն գրասենյակին, որտեղ տեղակայված էր Al-Mayadeen-ի խմբագրությունը։ Հեռուստաալիքը հարձակումն անվանել է բարբարոսություն՝ տեղեկացնելով, որ Իսրայելի կողմից Լիբանանի կանոնավոր ռմբակոծությունների ֆոնին խմբագրության բոլոր աշխատակիցներն ավելի վաղ տարհանվել էին այլ վայր՝ աշխատանքը շարունակելու համար։Իսրայելի պաշտպանության բանակը դեռևս չի մեկնաբանել Բեյրութի հրթիռակոծումը։ Իսրայելական լրատվամիջոցները գրում են, որ հարձակումից առաջ Իսրայելի պաշտպանության բանակը լիբանանցիներին կոչ է արել լքել ծրագրված հարձակման շրջանը։Իսրայելական զինվորականները նաև հայտնել են, որ հոկտեմբերի 24-ին Լիբանանից Իսրայելի ուղղությամբ արձակվել է մոտ 135 հրթիռ, մեծ մասը դեպի երկրի հյուսիս։Իսրայելական բանակը սեպտեմբերի վերջին սկսել է կանոնավոր հարվածել Լիբանանի տարածքին, ներառյալ մայրաքաղաք Բեյրութին։ Իսրայելը որպես հարձակումների թիրախ նշում է «Հեզբոլա» խմբավորման ենթակառուցվածքները։ «Հեզբոլա»-ն ահաբեկչական խմբավորում է ճանաչվել ԱՄՆ-ում, իսկ Եվրամիությունն ահաբեկչական է ճանաչել խմբավորման ռազմական թևը, բայց ոչ քաղաքական կուսակցությունը։

12:53 - 24 հոկտեմբերի, 2024

Իսրայելը թիրախավորել է Բեյրութի արվարձանում «Հեզբոլլահ»-ի զենքի արտադրամասերն ու պահեստները |armenpress.am|

armenpress.am: Իսրայելի պաշտպանության բանակը հայտարարել է Բեյրութի արվարձանում «Հեզբոլլահ»-ի զենքի արտադրական օբյեկտներին և պահեստներին հարվածներ հասցնելու մասին։ «Գիշերն Իսրայելի ռազմաօդային ուժերը հետախուզական տվյալների հիման վրա հարվածներ են հասցրել «Հեզբոլլահ»-ի զինապահեստներին, արտադրական օբյեկտներին և հրամանատարական կենտրոններին, որոնք տեղակայված են Դահիյայի շրջանի քաղաքացիական ենթակառուցվածքի տարածքում։ Հարվածներից առաջ քայլեր են ձեռնարկվել քաղաքացիական անձանց վնաս պատճառելու վտանգը նվազեցնելու համար՝ ներառյալ այդ շրջանում բնակչությանը նախօրոք զգուշացնելը», - ասված է Իսրայելի պաշտպանության բանակի մամուլի ծառայության հայտարարության մեջ:

15:59 - 23 հոկտեմբերի, 2024

Գազայի տնտեսության վերականգնման համար հարյուրավոր տարիներ պետք կգան․ ՄԱԿ-ի զեկույց |azatutyun.am|

azatutyun.am: «Շարունակվող պատերազմի ավարտից հետո, 2022 թվականի տնտեսական մակարդակին վերադառնալու համար, Գազային ոչ թե տասնամյակներ, այլ հարյուրավոր տարիներ պետք կգան», - փաստում է ՄԱԿ-ի զեկույցը։ Ըստ նոր զեկույցի, եթե պատերազմը վաղն ավարտվի և Գազան վերադառնա 2023-ի հոկտեմբերի 7-ին «Համաս»-ի՝ Իսրայելի վրա հարձակմանը նախորդած ստատուս քվոյին, 350 տարի կպահանջվի տնտեսությունը նախապատերազմական վիճակին վերադարձնելու համար։ Նշվում է, որ ավելի քան մեկ տարվա ընթացքում բնակավայրեր են հիմնովին ոնչացվել, ճանապարհների ու տարբեր ենթակառուցվածնքերի փոխարեն այժմ ավերակներ են։

14:25 - 23 հոկտեմբերի, 2024

Իսրայելը հայտնել է Նասրալլայի «հետնորդին» սպանելու մասին |hy.armradio.am|

hy.armradio.am: Իսրայելի ՊԲ-ն հայտնել է «Հեզբոլլահ»-ի հանգուցյալ առաջնորդ Հասան Նասրալլային փոխարինել պատրաստվող հոգևորականին չեզոքացնելու մասին: Նասրալան սպանվել էր մոտ երեք շաբաթ առաջ իսրայելական ավիահարվածի ժամանակ: Իսրայելի պաշտպանության բանակի տվյալներով՝ Հաշեմ Սաֆիեդդինը մահացել է Լիբանանի մայրաքաղաք Բեյրութի հարավային արվարձաններին հասցված ավիահարվածների հետևանքով։ Իսրսյելի դեմ պայքարող լիբանանյան շիա մահմեդական հզոր կազմակերպությունը` «Հեզբոլլահ»-ը, Սաֆիեդինի մահը չի հաստատել: Կազմակերպության նախորդ առաջնորդ Նասրալլան սպանվել է սեպտեմբերի 27-ին Բեյրութի վրա իսրայելական ավիահարվածի հետևանքով:

09:49 - 23 հոկտեմբերի, 2024

Իսրայելը հարվածել է Բեյրութին «Հըզբոլլահ»-ի մամլո ասուլիսի մեկնարկին |factor.am|

factor.am: Իսրայելական ինքնաթիռները մի քանի հարված են հասցրել Լիբանանի մայրաքաղաք Բեյրութի հարավային արվարձաններին «Հըզբոլլահ»-ի մամուլի ծառայության ղեկավար Մոհամմադ Աֆիֆի մամուլի ասուլիսի մեկնարկի պահին, հայտնում է լիբանանյան NNA գործակալությունը, փոխանցում է ՌԻԱ Նովոստին։ «Մի քանի րոպե առաջ հակառակորդի ինքնաթիռները հարվածներ են հասցրել հարավային արվարձանում գտնվող Ղբեյրի շրջանում, այն պահին, երբ «Հըզբոլլահ»-ի մամուլի հետ կապերի ղեկավար Մոհամմադ Աֆիֆն ասուլիս էր անցկացնում»,- հաղորդում է գործակալությունը:

18:26 - 22 հոկտեմբերի, 2024

Գրեթե մեկ ամսում Բեյրութ-Երևան չվերթով Հայաստան է ժամանել 870 մարդ․ Սինանյան |arm.sputniknews.ru|

arm.sputniknews.ru:Սեպտեմբերի 28-ից մինչև հոկտեմբերի 20-ը Բեյրութ-Երևան չվերթով Հայաստան է ժամանել 870 մարդ, Հայաստանից մեկնել՝ 470-ը։ Տեղեկությունը Sputnik Արմենիայի հետ զրույցում հայտնեց ՀՀ վարչապետին առընթեր սփյուռքի գործերի գլխավոր հանձնակատար Զարեհ Սինանյանը՝ անդրադառնալով Իսրայել-Լիբանան առճակատմանը։ Նրա խոսքով՝ հակամարտության սրացման առաջին օրից իրենք հետևում են զարգացումներին և փորձում հասկանալ լիբանանահայ համայնքում առկա տրամադրվածությունները։ «Վերջին զարգացումներն իհարկե լարվածություն են առաջացրել համայնքում, բայց չի հասել այն մակարդակին, որ մարդիկ տրամադրվեն հապճեպ երկիրը լքելու։ Բեյրութը լքելու, Հայաստան գալու մտադրություններ համայնքում դեռ չկան։ Մարդիկ ապրում են իրենց ռեժիմով, որն ի սկզբանե լավը չի եղել՝ անկայուն էլեկտրամատակարարում, ջրամատակարարում, տնտեսական խորագույն ճգնաժամ, բայց նաև այն հույսով, որ լավ կլինի»,-ասաց Սինյանյանը։ Նա նշեց, որ չկա հստակ տեղեկություն, թե Հայաստան ժամանած, այնուհետև այստեղից դուրս եկած քաղաքացիները վերադարձել են Լիբանա՞ն, թե՞ մեկնել այլ երկրներ, քանի որ չեն կարող անհատապես հետևել մարդկանց տեղաշարժին։ «Հստակ է, որ Հայաստան ժամանածների թիվը 2 անգամ շատ է, քան մեկնողներինը։ Մենք կապ ենք պահում Լիբանանի հայ համայնքի տարբեր կազմակերպությունների և անհատների հետ, որպեսզի հնարավորինս իրատեսական պատկեր ունենանք, թե տեղում ինչ է կատարվում»,-ասաց նա։ Սինանյանի խոսքով՝ Հայաստան ժամանած լիբանանահայերի մի մեծ մասն ունի ՀՀ քաղաքացիություն, մի մասն էլ դիմել է քաղաքացիություն ստանալու համար։ Ինչ վերաբերում է հրետակոծությունների հետևանքով մահացած, տուժած քաղաքացիներին, ապա այդ թվում հայեր չկան, քանի որ ռազմական գործողություններն ընթանում են հայաբնակ թաղամասերից հեռու։ Հարցին, թե արդյոք Հայաստանը պատրաստ է ընդունել լիբանանահայերին, եթե դրա կարիքը լինի, Զարեհ Սինանյանը հստակ չպատասխանեց, նշելով, որ իր կարծիքը շատ սուբյեկտիվ կլինի։ Միաժամանակ պաշտոնյան նշեց, որ Հայաստանն այսօր շատ ավելի մեծ հնարավորություններ ունի լիբանանահայերին ընդունելու, քան կարող էր ընդունել 2011-12 թվականին՝ սիրիահայերին։Հիշեցնենք` Իսրայելը հոկտեմբերի 1-ից Լիբանանի հարավում ցամաքային գործողություն է իրականացնում «Հեզբոլլահի» ուժերի դեմ և շարունակում հրթիռակոծել հարևան երկիրը, որտեղ արդեն ավելի քան 2 հազար մարդ է զոհվել, ավելի քան մեկ միլիոն անձ փախստական է դարձել: Չնայած կորուստներին (այդ թվում՝ հրամանատարական կազմում)` «Հեզբոլլահը» ցամաքային մարտեր է մղում և չի դադարեցնում Իսրայելի տարածքի հրթիռակոծումը:

09:11 - 22 հոկտեմբերի, 2024

Իսրայելը Իրանի օգտին լրտեսության մեղադրանքով 7 ադրբեջանցու է ձերբակալել, 2-ը՝ դեռահաս |azatutyun.am|

azatutyun.am: Իսրայելը ձերբակալել է երկրի յոթ քաղաքացիների, այդ թվում՝ երկու անչափահասների, Իրանի օգտին լրտեսության մեղադրանքով։ Ըստ տեղական լրատվամիջոցների՝ կասկածյալներն Իսրայել են գաղթել Ադրբեջանից։ Նախաքննության տվյալներով, նրանց խնդիրն է եղել տեղեկատվություն հավաքագրել Իսրայելի Պաշտպանության բանակի ու էներգետիկ ենթակառուցվածքների մասին, նկարահանել ռազմական օբյեկտները, այդ թվում՝ Գոլանիի ռազմակայանը, որը վերջերս էր հարձակման ենթարկվել։ Քննությունն ընթացել է ավելի քան երկու տարի, ըստ իրավապահների, մեղադրյալներն Իրանի հետախուզական կառույցների հրահանգով մոտ 600 խնդիր են իրականացրել՝ ստանալով հարյուր հազարավոր դոլարներ, հաճախ՝ կրիպտոարժույթով։

09:08 - 22 հոկտեմբերի, 2024

Մակրոնն ազդարարել է Ֆրանսիայում Լիբանանի հարցով միջազգային կոնֆերանսի անցկացման մասին |hetq.am|

hetq.am: Ֆրանսիան իր տարածքում հոկտեմբերի 24-ին կանցկացնի Լիբանանին նվիրված միջազգային համաժողով: Այդ մասին հայտարարել է Ֆրանսիայի նախագահ Էմանուել Մակրոնը։ «Ֆրանսիան հոկտեմբերի 24-ին Լիբանանին նվիրված միջազգային համաժողով կանցկացնի»,- նշել է Ֆրանսիայի առաջնորդը։ Նրա պնդմամբ՝ խոսքը բացառապես հումանիտար բնույթի միջոցառման մասին է։Մակրոնի խոսքով՝ խոսքը հարյուր հազարավոր մարդկանց մարդասիրական օգնություն տրամադրելու մասին է, որոնք ստիպված են եղել լքել իրենց տները իսրայելական գործողությունների պատճառով: Ֆրանսիայի նախագահն անդրադարձել է նաև Իսրայելի վարչապետ Բենյամին Նեթանյահուի հետ տարաձայնություններին: Մակրոնի խոսքով՝ Ֆրանսիան աջակցում է Հրեական պետությանը, «սակայն այդ հանգամանքն իրեն չի զրկում Իսրայելի կառավարության ղեկավարի հետ չհամաձայնելու իրավունքից»:Շարունակությունը՝ սկզբնաղբյուր կայքում։

13:45 - 19 հոկտեմբերի, 2024

Անօդաչու թռչող սարք է արձակվել Իսրայելի վարչապետի տան ուղղությամբ

Հոկտեմբերի 19-ին անօդաչու թռչող սարք է արձակվել Իսրայելի Կեսարիա քաղաքում գտնվող վարչապետ Բենիամին Նեթանյահուի տան ուղղությամբ, ինչպես հաղորդում է Reuters լրատվական գործակալությունը՝ ասել է նրա խոսնակը՝ հավելելով, որ վարչապետը մոտակայքում չի եղել և զոհեր չկան։ Ավելի վաղ իսրայելցի զինվորականները հայտնել էին, որ անօդաչու թռչող սարք է արձակվել Լիբանանից և հարվածել շենքի, սակայն չէր հստակեցվել, թե ինչ շենք է եղել այն։

12:20 - 19 հոկտեմբերի, 2024

«Հեզբոլլա»-ն Սինվարի սպանության ֆոնին «Իսրայելի հետ առճակատման նոր և սրվող փուլի» մասին է զգուշացրել |azatutyun.am|

azatutyun.am: Գազայում «Համաս»-ի առաջնորդ Յահյա Սինվարի սպանությունից հետո Լիբանանի «Հեզբոլա» խմբավորումն այսօր հայտարարել է Իսրայելի դեմ պատերազմի նոր փուլի մասին, հաղորդում է Reuters-ը։ Արևմտյան առաջնորդները հույս են հայտնել, որ Սինվարի մահը հնարավորություն է տվել վերջ դնել հակամարտությանը: ԱՄՆ-ը ցանկանում է բանակցություններ սկսել հրադադարի առաջարկի և պատանդների ազատ արձակման շուրջ, հայտարարել է ԱՄՆ պետդեպարտամենտի խոսնակ Մեթյու Միլլերը՝ Սինվարին անվանելով պատերազմի ավարտի «հիմնական խոչընդոտը»: ԱՄՆ նախագահ Ջո Բայդենն Իսրայելի վարչապետ Նեթանյահուի հետ հեռախոսազրույցում նույնպես հույս է հայտնել, որ Սինվարի մահը հնարավորություն կտա վերջնականապես ավարտել Գազայում հակամարտությունը, սակայն Նեթանյահուն պնդել է, որ պատերազմը կշարունակվի այնքան ժամանակ, քանի դեռ «Համաս»-ի զինյալների կողմից պատանդ վերցվածները չեն վերադարձվել: Իրանն, իր հերթին, մատնանշել է, որ շարժմանն աջակցությունը չի մարի: «Դիմադրության ոգին կամրապնդվի», ըստ Reauters-ի, հայտարարել է ՄԱԿ-ում Իրանի առաքելությունը: «Հեզբոլա»-ն էլ «Իսրայելի հետ առճակատման նոր և սրվող փուլի» մասին է զգուշացրել։ Սինվարին, ով համարվում է 2023-ի հոկտեմբերի 7-ին Իսրայելի վրա հարձակման գլխավոր կազմակերպիչներից մեկը, սպանվել է հոկտեմբերի 17-ին Գազայի հատվածում ռազմական «գործողությունների» ժամանակ: Սինվարիի մահը մեկ տարի շարունակվող հակամարտության կարևոր իրադարձություններից մեկն է, որը բազմաթիվ խաղաքարտեր կարող է խառնել:

12:32 - 18 հոկտեմբերի, 2024

Իրանում հայտարարել են, որ ՀԱՄԱՍ-ի առաջնորդի մահը կամրապնդի պաղեստինյան դիմադրության ոգին |armenpress.am|

armenpress.am: ՄԱԿ-ում Իրանի ներկայացուցչությունը հայտարարել է, որ պաղեստինյան ՀԱՄԱՍ արմատական շարժման առաջնորդ Յահյա Սինվարի զոհվելու հանգամանքները կամրապնդեն «դիմադրության ոգին»: Այդ մասին տեղեկանում ենք «Ինտերֆաքս» գործակալությունից: «Նա օրինակ կդառնա երիտասարդության և երեխաների համար, որոնք կշարունակեն նրա ուղին դեպի Պաղեստինի ազատագրում: Քանի դեռ գոյություն ունի օկուպացիա և ագրեսիա, դիմադրությունը կշարունակվի», - ասվում է ՄԱԿ-ում Իրանի մշտական ներկայացուցչության հայտարարության մեջ: Իրանի կարծիքով՝ մուսուլմանները կհիանան «նահատակ Սինվարով…., որը ռազմի դաշտում կանգնած է թշնամուն դեմ հանդիման», և «դիմադրության ոգին կամրապնդվի»։ Ավելի վաղ Իսրայելի պաշտպանության բանակը հաստատել էր, որ Գազայի հատվածին հասցված հարվածի ժամանակ սպանել է ՀԱՄԱՍ շարժման քաղբյուրոյի ղեկավար Յահյա Սինվարին։ ԱՄՆ-ում և Իսրայելում համարում են, որ ՀԱՄԱՍ-ի առաջնորդի մահը հնարավորություն է ստեղծում վերսկսելու շարժման մոտ պահվող 101 պատանդների ազատ արձակման և Գազայի հատվածում հրադադարի հաստատման վերաբերյալ համաձայնագիր կնքելու բանակցությունները։ Իր հերթին Յահյա Սինվարի սպանությունից հետո լիբանանյան «Հեզբոլլահ» խմբավորումը հայտարարել է, որ սկսում է Իսրայելի դեմ պատերազմի նոր փուլ։

11:18 - 18 հոկտեմբերի, 2024

Իսրայելի բանակը հաստատում է, որ ՀԱՄԱՍ-ի առաջնորդը սպանվել է |arm.sputniknews.ru|

arm.sputniknews.ru: Իսրայելի պաշտպանության բանակը (ՑԱԽԱԼ) պաշտոնապես հաստատել է Գազայի հատվածում պաղեստինյան ՀԱՄԱՍ շարժման ղեկավար Յահյա Սինվարի սպանության լուրը։ Այս մասին գրում է ՌԻԱ Նովոստին։ Ավելի վաղ Իսրայելի պաշտպանության բանակը հայտնել էր, որ ստուգում է տեղեկատվությունը, թե արդյոք ՀԱՄԱՍ-ի քաղբյուրոյի ղեկավար Յահյա Սինվարը Գազայի հատվածում վերջին գործողություններից մեկի ժամանակ եղել է պաղեստինյան արմատական խմբավորումների ոչնչացված անդամների շարքում։ «Իսրայելի պաշտպանության բանակն ու Անվտանգության ընդհանուր ծառայությունը հաստատում են, որ մեկ տարվա հետապնդումից հետո երեկ՝ 2024 թվականի հոկտեմբերի 16-ին, Իսրայելի հարավային հրամանատարության զինվորները վերացրել են ՀԱՄԱՍ ահաբեկչական կազմակերպության առաջնորդ Յահյա Սինվարին։ Դա տեղի է ունեցել Գազայի հատվածի հարավում իրականացրած գործողությունների ընթացքում։ Յահյա Սինվարը հոկտեմբերի 7-ին ծրագրել և իրականացրել էր ջարդ, քարոզում էր իր մահաբեր գաղափարախոսությունը և՛ պատերազմից առաջ, և՛ դրա ընթացքում, ինչպես նաև պատասխանատու է եղել բազմաթիվ իսրայելցիների սպանության և առևանգման համար, – ասվում է հաղորդագրության մեջ: Իսրայելը 2023 թվականի հոկտեմբերի 7-ին Գազայի հատվածից աննախադեպ մասշտաբային հրթիռային հարձակման է ենթարկվել։ Դրանից հետո ՀԱՄԱՍ պաղեստինյան շարժման մարտիկները ներթափանցել են սահմանամերձ շրջաններ` կրակ բացելով զինվորականների և քաղաքացիական անձանց ուղղությամբ և պատանդ վերցնելով ավելի քան 200 հոգու։ Իսրայելի պաշտպանության բանակը Գազայի հատվածում սկսեց «Երկաթե թրեր» գործողությունը, որը ներառում է նաև հարվածներ քաղաքացիական օբյեկտների ուղղությամբ: Իսրայելը հայտարարեց անկլավի ամբողջական շրջափակման մասին՝ դադարեցվեցին ջրի, էլեկտրաէներգիայի, վառելիքի, սննդի և դեղորայքի մատակարարումները։

10:18 - 18 հոկտեմբերի, 2024

Լիբանանում 1 օրում Իսրայելի հարվածներից զոհվել է 45 մարդ. «Հեզբոլլահ»-ը կրկին հրթիռակոծել է Իսրայելի տարածքը |tert.am|

tert.am: Լիբանանի առողջապահության նախարարությունը հայտնում է, որ մեկ օրվա ընթացքում ամբողջ երկրի տարածքում Իսրայելի հարձակումների հետևանքով զոհվել է 45 և վիրավորվել 179 մարդ, հայտնում է Аl Jazeera-ն։ Ընդհանուր առմամբ, Լիբանանում զոհվածների թիվը հասել է 2,412-ի, վիրավորներինը՝ 11,267-ի. այս ամենը տեղի է ունենում լիբանանյան «Հեզբոլլահ» շիական շարժման և Իսրայելի միջև շարունակվող մարտերի հետևանքով: Մինչդեռ Times of Israel-ը հայտնում է, որ Լիբանանի տարածքից 15 հրթիռ է արձակվել հյուսիսային Իսրայելի ուղղությամբ: Հրթիռներից մի քանիսը որսացել են ՀՕՊ համակարգերը, մի քանիսն ընկել են Իսրայելի տարածքում։ Հրթիռակոծության հետևանքով տուժածների կամ ավերածությունների մասին տեղեկություններ չկան։ Նախօրեին Իսրայելի ԱԳ նախարար Իսրայել Կացը հայտարարել է, որ Լիբանանի հարավում իր երկրի ներխուժմամբ սկսված ռազմական գործողությունը, որի թիրախում լիբանանյան «Հեզբոլլահ» շարժումն է, կտևի ևս մի քանի շաբաթ: Սեպտեմբերի 23-ին Իսրայելը հայտարարել է Լիբանանում «Հյուսիսի նետեր» գործողության մեկնարկի մասին։ Հոկտեմբերի 1-ին Իսրայելի պաշտպանության բանակը հարձակողական գործողություն է սկսել երկրի հարավում։ Գործողության նպատակն է վերացնել «Հեզբոլլահ»-ի սպառնալիքը՝ 60,000 տարհանված իսրայելցիներին հյուսիսի սահմանային բնակավայրեր անվտանգ վերադարձնելու համար։

09:41 - 18 հոկտեմբերի, 2024

Իսրայելի բանակը հայտնել է ՀԱՄԱՍ-ի առաջնորդի հավանական սպանության մասին |armenpress.am|

armenpress.am: Իսրայելի բանակը հայտարարել է ՀԱՄԱՍ-ի առաջնորդ Յահյա Սինվարի հավանական սպանության մասին։ «Արմենպրես»-ի հաղորդմամբ՝ պաշտպանական գերատեսչությունից հայտնել են, որ Գազայի հատվածում Իսրայելի պաշտպանության բանակի գործողությունների ընթացքում երեք անձ է սպանվել։ Նշվում է, որ Իսրայելի պաշտպանության բանակը և Իսրայելի անվտանգության գործակալությունը ստուգում են հավանականությունը, որ սպանվածներից մեկը Յահյա Սինվարն է: Սոցցանցերում տարածվում են ՀԱՄԱՍ-ի 61-ամյա առաջնորդ Յահյա Սինվարին նման այլանդակված դիի կադրերը։ Իսրայելական ԶԼՄ-ները, հղում անելով իրենց աղբյուրներին, հայտնում են, որ այսօր նա սպանվել է ՑԱԽԱԼ-ի պարեկի կողմից Գազայի հատվածի տներից մեկում: Իսրայելական 12-րդ ալիքը հայտնում է, որ Սինվարի ենթադրյալ մարմնի ԴՆԹ-փորձաքննության համար մի քանի ժամ կպահանջվի։ Sky News Arabia-ի աղբյուրը հաստատել է Գազայի հատվածում ՀԱՄԱՍ-ի քաղբյուրոյի ղեկավար Յահյա Սինվարի մահը:

18:48 - 17 հոկտեմբերի, 2024

Իրանը նախազգուշացրել է՝ «ցավալի» հարված կհասցվի Իսրայելին, եթե հարձակում իրականացվի իրանական օբյեկտների վրա |factor.am|

factor.am: Իրանի Իսլամական հեղափոխության պահապանների կորպուսի (ԻՀՊԿ) ղեկավար Հոսեյն Սալամին նախազգուշացրել է Իսրայելի դեմ հետագա պատասխան միջոցների մասին, եթե նա հարձակվի իրանական օբյեկտների վրա, ինչն Իսրայելը խոստացել է անել հոկտեմբերի 1-ին Իրանի հրթիռային հարձակումից հետո։ Այս մասին գրում է Al Arabiya-ն՝ վկայակոչելով AFP-ին։ «Եթե դուք սխալվեք և հարձակվեք մեր թիրախների վրա՝ լինի դա տարածաշրջանում, թե Իրանում, մենք կրկին ցավոտ հարված կհասցնենք ձեզ»,- ասել է Սալամին անցյալ ամիս Լիբանանում «Հըզբոլլահի» ղեկավար Հասան Նասրալլայի հետ սպանված Իսլամական հեղափոխության պահապանների կորպուսի գեներալի հուղարկավորության ժամանակ: Իսլամական հեղափոխության պահապանների կորպուսի «Քուդս» ուժերի արտաքին օպերացիաների ստորաբաժանման բարձրագույն հրամանատար Աբբաս Նիլֆորուշանը սպանվել էր սեպտեմբերի 27-ին «Հըզբոլլահի» ղեկավար Հասան Նասրալլայի հետ՝ Բեյրութի հարավում իսրայելական հարվածի ժամանակ: Սալամին «անվստահելի» է անվանել THAAD հրթիռային պաշտպանության մարտկոցը, որը, ըստ Պենտագոնի, Իսրայել է ուղարկվել շուրջ 100 ամերիկացի զինվորականների հետ միասին։ «Մի վստահեք այս համակարգերին: Դուք չեք կարող ոչնչացնել մահմեդական ազգերին և մնալ անվտանգ։ Մենք գիտենք ձեր թույլ կողմերը»,- հայտարարել է իրանցի բարձրաստիճան զինվորականը։

17:12 - 17 հոկտեմբերի, 2024