azatutyun.am: Տեսակապի ձևաչափով անցկացվել է Իգդիր-Նախիջևան գազատարի բացման արարողությունը, որին մասնակցում էին Թուրքիայի ու Ադրբեջանի նախագահները։

«Այսօր Թուրքիան և Ադրբեջանը լայնածավալ նախագծեր են իրականացնում։ Թուրք-ադրբեջանական բարեկամության և եղբայրության պատմության մեջ այսօր կարևոր օր է»,- գազատարի բացման արարողության ժամանակ ունեցած իր ելույթում ասել է Անկարայում գտնվող Ադրբեջանի նախագահը։

Նա շեշտել է՝ նախագիծը, որը այսօր բացում են, կապահովի Նախիջևանի էներգետիկ անվտանգությունը։

«Մեր երկրների հարաբերությունները արագորեն զարգանում են: Այս համատեքստում էներգետիկ ոլորտն առաջնահերթություն է»,- Անկարայում տեսակոնֆերանսի ձևաչափով անցկացված գազատարի բացման արարողությանն ասել է Թուրքիայի նախագահ Ռեջեփ Թայիփ Էրդողանը։

Ադրբեջանի էներգետիկայի նախարար Փարվիզ Շահբազովն էլ հայտարարել է, որ «սա շատ նշանակալից իրադարձություն է»:

«Այս նախագիծը դիվերսիֆիկացնում է Նախիջևանի էներգամատակարարումը: Այն կնպաստի բնակչության բարեկեցությանը: Հետագայում դրա կարողությունների ընդլայնման հնարավորությունը կա: Դա մեծ նշանակություն ունի տարածաշրջանի համար», - ընդգծել է ադրբեջանցի նախարարը։

Իլհամ Ալիևը, իր հերթին, հավելել է, թե համատեղ իրականացվող էներգետիկ նախագծերը նաև ճանապարհ են հարթում տրանսպորտային խոշոր նախաձեռնությունների իրականացման համար։