Ատոմ Ջանջուղազյան

ՀՀ ֆինանսների նախկին նախարար։ Ծնվել է 1971թ․ մարտի 22-ին։

1987-1992 թթ. սովորել է Երեւանի պոլիտեխնիկական ինստիտուտը։ 1993-1995 թթ.՝ ՀՊՃՀ ասպիրանտական դպրոցի մագիստրատուրան։ 1995-1997թթ․՝ նույն համալսարանի ասպիրանտուրան։ 1991-1993թթ. աշխատել է ՀՀ Էկոնոմիկայի նախարարության Պլանավորման եւ կառավարման ավտոմատացված համակարգերի հայկական գիտահետազոտական ինստիտուտում։

1993-1995 թթ. ՀՀ էկոնոմիկայի նախարարության ինֆորմացիոն համակարգերի բաժնի առաջին կարգի մասնագետ, առաջատար մասնագետ, ապա՝ գլխավոր մասնագետ։ 1995-1996 թթ. ՀՀ ֆինանսների նախարարության համակարգչային վերլուծության բաժնի գլխավոր մասնագետ, ապա դրամարկղային կառավարման վարչության հանրապետական բյուջեի դրամարկղային կառավարման բաժնի պետ։
1996-1999 թթ. եղել է ՀՀ ֆինանսների նախարարության հաշվապահության վարչության պետ, ապա նախարարության տնտեսական ծրագրերի գլխավոր վարչության պետ։ 1999 թ. հուլիսի 9-ին նշանակվել է ՀՀ ֆինանսների նախարարի տեղակալ-գլխավոր գանձապետ։

2000 թ. նշանակվել է ՀՀ ֆինանսների եւ էկոնոմիկայի նախարարի տեղակալ-գլխավոր գանձապետ։ 2008 թ. մայիսի 19-ին նշանակվել է ՀՀ ֆինանսների նախարարի տեղակալ-գլխավոր գանձապետ։

2018 թվականի մայիսի 12-ին ՀՀ վարչապետ Նիկոլ Փաշինյանի առաջարկով ՀՀ նախագահ Արմեն Սարգսյանը Ատոմ Ջանջուղազյանին նշանակել է ֆինանսների նախարար։

Հաշվեքննիչ պալատը պետբյուջեի կատարման հաշվետվության ֆինանսական ցուցանիշներում էական խեղաթյուրումներ չի արձանագրել |armenpress.am|

armenpress.am: 2022 թվականի պետական բյուջեի կատարման տարեկան հաշվետվության ֆինանսական ցուցանիշներում էական խեղաթյուրումներ չեն արձանագրվել։ Ազգային ժողովում այս մասին ասաց Հաշվեքննիչ պալատի նախագահ Ատոմ Ջանջուղազյանը։ «Հաշվեքննության արդյունքներով հաշվեքննիչ պալատը հանգել է դրական կարծիքի, որովհետև ստացել է բավարար համապատասխան տեղեկատվություն հաշվեքննության ենթարկված մարմիններից և ֆինանսական հաշվետվությունները բոլոր առումներով զերծ են էական խեղաթյուրումներից։ Հաշվեքննիչ պալատը փաստում է, որ 2022 թվականին պետական բյուջեի կատարման հաշվետվությունը բոլոր առումներով ճշմարիտ է ներկայացնում 2022 թվականի բյուջետային գործառնությունների արդյունքները»,- նշեց Ջանջուղազյանը։ Հաշվեքննիչ պալատի նախագահի խոսքով՝ 10 պետական մարմիններում իրականացված հաշվեքննությունների արդյունքներով արձանագրված են 113 անհամապատասխանություններ, որոնք ոչ բոլորն են, որ հանգեցրել են ֆինանսական հաշվետվություններում խեղաթյուրումների առկայության։ «Դրանցից 5 պետական մարմիններում 18 խեղաթյուրումներ են արձանագրվել ընթացիկ հաշվեքննությունների արդյունքներով։ Պարզապես այս խեղաթյուրումների հանրագումարային ֆինանսական արտահայտությունը կազմել է ծախսերի 0,11 տոկոսը, ինչը չի գնահատվել որպես էական և չի ազդել կարծիքի վրա»,- եզրափակեց Ջանջուղազյանը։

12:14 - 15 հունիսի, 2023

Ատոմ Ջանջուղազյանն ընտրվեց Հաշվեքննիչ պալատի նախագահ |civilnet.am|

civilnet.am: Մարտի 2-ի նիստում Ազգային ժողովը Հաշվեքննիչ պալատի նախագահ ընտրեց ֆինանսների նախկին նախարար Ատոմ Ջանջուղազյանին։ 107 պատգամավորից ընտրությանը մասնակցել է 70-ը։ Բոլորն էլ կողմ են քվեարկել Ջանջուղազյանի թեկնածությանը։ Ատոմ Ջանջուղազյանը սովորել է Երեւանի պետական ճարտարագիտական համալսարանում, տեխնիկական գիտությունների թեկնածու է: 2018-2021 թթ․ Ատոմ Ջանջուղազյանը զբաղեցրել է ֆինանսների նախարարի պաշտոնը։Հաշվեքննիչ պալատի նախկին նախագահ Լևոն Յոլյանը 2022-ի հունվարի 19-ին հրաժարականի դիմում էր ներկայացրել։

15:31 - 02 մարտի, 2022

ԱԺ-ն մարտի 1-ի հերթական նիստի ավարտից հետո կանցկացնի լրացուցիչ նիստ |armenpress.am|

armenpress.am: ՀՀ ազգային ժողովը մարտի 1-ին ժամը 18:30-ից մինչև 20:00-ն կանցկացնի լրացուցիչ նիստ: Մարտի 1-ի հերթական նիստում «Քաղաքացիական պայմանագիր» խմբակցության ղեկավար Հայկ Կոնջորյանն ԱԺ կանոնակարգ օրենքի համաձայն առաջարկեց մարտի 1-ին ժամը 18:30-20:00-ն ավելացնել ևս մեկ նիստ: Նա խնդրեց առաջարկը դնել քվեարկության: Մարտի 1-ի չորրորդ հերթական նիստից հետո մեկ լրացուցիչ նիստ անցկացնելու վերաբերյալ ԱԺ որոշման նախագիծը քվեարկությամբ ստացավ 59 կողմ, 10 դեմ, 1 ձեռնպահ ձայներ: Խորհրդարանն այժմ քննարկում է Հաշվեքննիչ պալատի հանձնաժողովի նախագահի պաշտոնում Ատոմ Ջանջուղազյանի թեկնածության հարցը: Ժամը 16:30-ից մինչև 18:00-ն ԱԺ-ում հայտարարությունների ժամ է:

16:12 - 01 մարտի, 2022

ԱԺ հանձնաժողովը դրական եզրակացություն տվեց Հաշվեքննիչ պալատի նախագահի պաշտոնում Ջանջուղազյանի թեկնածությանը |1lurer.am|

1lurer.am: ՀՀ ազգային ժողովի ֆինանսավարկային և բյուջետային հարցերի մշտական հանձնաժողովն արտահերթ նիստում հավանություն տվեց Հաշվեքննիչ պալատի նախագահի պաշտոնում Ատոմ Ջանջուղազյանի թեկնածությանը: «Համոզված եմ, որ համատեղ աշխատանքի ընթացքում մեզ կհաջողվի մեր բոլոր պետական ինստիտուտներին բարձրացնել այլ կայացման աստիճանի և փոխել մեր պետության դիրքը համաշխարհային իրականության մեջ»,- ասաց Ատոմ Ջանջուղազյանը: Ջանջուղազյանի թեկնածության հարցը կքննարկվի ԱԺ լիագումար նիստում:

13:49 - 14 փետրվարի, 2022

Հաշվեքննիչ պալատի նախագահի թափուր պաշտոնի համար ներկայացվել է Ատոմ Ջանջուղազյանի թեկնածությունը |1lurer.am|

1lurer.am: Հաշվեքննիչ պալատի նախագահի թափուր պաշտոնի համար ԱԺ «Քաղաքացիական պայմանագիր» խմբակցությունը ներկայացրել է ֆինանսների նախկին նախարար Ատոմ Ջանջուղազյանի թեկնածությունը: Ջանջուղազյանի թեկնածության հարցը քննարկվում է ԱԺ ֆինանսավարկային և բյուջետային հարցերի մշտական հանձնաժողովի արտահերթ նիստի ընթացքում: Ջանջուղազյանն իր խոսքում խոսեց հաշվեքննիչ մարմինների գործառույթների և առաքելության մասին: «Հանրային հարստության, ունեցվածքի կառավարման գործընթացի նկատմամբ պահանջարկը ծագել է այն ժամանակ, երբ հանրությունը հայտարարել է իր մտադրությունը՝ ինքնիշխան ու ժողովրդավարական հիմքով ունենալ պետություն, այդ թվում նաև Հայաստանը բացառություն չէ: Բարձրագույն հաշվեքննիչ մարմինները ձևավորվել են հենց այս տրամաբանությամբ, եկել են բավարարելու այս պահանջարկը»,- ասաց Ջանջուղազյանը: Նրա խոսքով՝ Հաշվեքննիչ պալատում ներքին հսկողության համակարգ պետք է գործի՝ հակակշիռների և զսպումների մեխանիզմ: «Այն դեպքում, երբ պետական ծառայողը, մասնավորապես Հաշվեքննիչ պալատի աշխատակիցը կունենա այնպիսի գիտակցություն, որ բացառիկ շահը հանրային պետական շահն է, կունենա բավարար կարողություն և ցանկություն՝ ծառայելու այդ շահին, վստահաբար կունենանք հաջողություն»,- ասաց Ջանջուղազյանը:

12:56 - 14 փետրվարի, 2022

ՔՊ–ն Հաշվեքննիչ պալատի նախագահի պաշտոնում առաջադրել է Ատոմ Ջանջուղազյանի թեկնածությունը

Հունվարի 31-ին կայացել է «Քաղաքացիական պայմանագիր» խմբակցության նիստ, որի ընթացքում որոշում է կայացվել Հաշվեքննիչ պալատի նախագահի պաշտոնում առաջադրել Ատոմ Ջանջուղազյանի թեկնածությունը։ Այս մասին տեղեկացնում է «Քաղաքացիական պայմանագիր» խմբակցության ֆեյսբուքյան էջը։

19:07 - 31 հունվարի, 2022

Կառավարությունն Արցախի բնակչությանը հատկացնում է ևս 8,8 մլրդ դրամ. ընդհանուր հատկացումները հասնում են 83 մլրդ դրամի |armenpress.am|

armenpress.am: Կառավարությունն Արցախի բնակչությանը հերթական աջակցությունը հատկացնելու որոշում ընդունեց: Ֆինանսների նախարարի պաշտոնակատար Ատոմ Ջանջուղազյանը նշեց, որ այս որոշման նպատակն Արցախի բնակչության 2021թ. հուլիս ամսվա Էլեկտրաէներգիայի, գազամատակարարման և կապի ծառայությունների ծախսերի, ինչպես նաև Արցախի Հանրապետության 2021 թ. պետական բյուջեով նախատեսված հուլիս ամսվա աշխատավարձերի, նպաստների, կենսաթոշակների, առողջապահության ծախսերի ֆինանսավորման համար ֆինանսավորում տրամադրելն է։ «Նախատեսվում է հատկացնել 8,8 մլրդ դրամ, որից 1,2 մլրդ դրամը կօգտագործվի բնակիչների կողմից կոմունալ վճարների վճարմանը, իսկ մնացածը՝ միջպետական վարկի տրամադրման շրջանակում կհատկացվի Արցախի Հանրապետությանը: Այս տարվա Արցախին հատկացվող միջպետական վարկն ունեցել է նույն տրամաբանությունը, ինչ մինչ պատերազմը, և այն գրեթե ամբողջությամբ սպառվել է առաջին կիսամյակում, քանի որ սեփական տնտեսությունը նոր եկամուտներ հնարավորություն չի ունեցել գեներացնել: Դրանով պայմանավորված լրացուցիչ պետական վարկի տրամադրելու անհրաժեշտություն է առաջացել»,- ասաց Ջանջուղազյանը: Վարչապետի պաշտոնակատար Նիկոլ Փաշինյանն իր հերթին նշեց, որ այս որոշմամբ Արցախին հատկացվում է ևս 8,7 մլրդ դրամի միջպետական վարկ: «Նոյեմբերից հետո իրականացվել է 14 ծրագիր: Ընդհանուր առմամբ այս պահին ծախսվել է 53 մլրդ դրամ»: Նա թվարկեց, թե ինչ աջակցության ծրագրեր են իրականացվել Արցախում պատերազմից հետո՝ նշելով, որ, ընդհանուր առմամբ շուրջ 74 մլրդ դրամի աջակցման ծրագրեր են կյանքի կոչվել: «Դրան գումարվում է նաև այս 8,8 մլրդ դրամը, և կարող ենք արձանագրել, որ Արցախին մեր աջակցության փաթեթը կազմում է արդեն 83 մլրդ դրամ, որից 52 մլրդ դրամն արդեն ծախսվել է: Այդ ծրագրերը պետք է վերանայման ենթարկվեն, որպեսզի վերականգնման ծրագրերը փոխարինվեն զարգացման ծրագրերով, որպեսզի Արցախի տնտեսությունը սկսի աշխատել, գումարներ գեներացվեն, իսկ մեր աջակցությունը ծախսվի զարգացման ծրագրերի վրա»,- ասաց Նիկոլ Փաշինյանը:

14:36 - 01 հուլիսի, 2021

ԱԺ-ն քննարկեց 2020-ի պետբյուջեի կատարման տարեկան հաշվետվությունը |armenpress.am|

armenpress.am: Կառավարությունը կարծում է, որ առաջիկա 5 տարում տնտեսական ծրագրերը հնարավորություն կտան տնտեսական աճի պոտենցիալը մեծացնել այն չափով, որ պարտքի բեռը նվազի և պարտք-ՀՆԱ հարաբերակցությունը վերադառնա 60 տոկոսից ցածր միջակայք: Այս մասին ասաց ՀՀ ֆինանսների նախարարի պաշտոնակատար Ատոմ Ջանջուղազյանն ԱԺ արտահերթ նիստում Հայաստանի Հանրապետության 2020 թվականի պետական բյուջեի կատարման տարեկան հաշվետվությունը հաստատելու մասին նախագծի քննարկմանը: Ջանջուղազյանը հիշեցրեց, որ 2020-ին պետբյուջեն հաստատվել էր՝ հիմք ընդունելով 2019-ի լավատեսական արձանագրումները, սակայն համավարակը և պատերազմը փոխել են տնտեսական զարգացումների նկատմամբ սպասումները: Տարվա ընթացքում ինչպես աշխարհի բոլոր պետությունները, այնպես էլ Հայաստանը վերանայել են հարկաբյուջետային քաղաքականությունը՝ այն համապատասխանեցնելով տնտեսական անկման ժամանակահատվածին: Մոտ 215 մլրդ դրամ գումարի չափով հակաճգնաժամային միջոցառումների բյուջե է նախանշվել: Սակայն ամբողջը չի օգտագործվել: «Հարկ է նկատել, որ մենք այդուհանդերձ չենք շեղվել ոլորտային քաղաքականությունների՝ կառավարության ծրագրից բխող տրամաբանությունից»,-ասաց նախարարի պաշտոնակատարը: Տնտեսական անկման մեծությունը ներկայացված փաստաթղթով եղել է 7.6 տոկոս, որից հետո վիճակագրության վերանայմամբ պայմանավորված՝ թարմացված տեղեկության համաձայն այն կազմել է 7.4 տոկոս: Ջանջուղազյանը հիշեցրեց՝ անցյալ տարի բյուջեն վերանայելիս տեսակետներ էին հնչում, որ երկնիշ անկումն անխուսափելի է: «Սա ընդամենը հիշեցում էր, որ մեր երկրում այդ պայմաններում անկումը եղել է 7.4 տոկոս»,-ասաց նա: Միջին գնաճը գտնվել է կառավարելի միջակայքում, կազմել 1.2 տոկոս: Անդրադառնալով ծրագրային ցուցանիշներին՝ նա ասաց, որ եկամուտների մակարդակը փոփոխությունների արդյունքում ճշտվել է շուրջ 141 մլրդ դրամով՝ կազմելով 1 տրլն 563 մլրդ դրամ՝ ի սկզբանե ծրագրված 1 տրլն 695 մլրդ դրամի փոխարեն: Ծախսերը ոչ միայն չեն նվազել, այլ նաև աճել են՝ 1 տրլն 989 մլրդ դրամ, դեֆիցիտը նույնպես աճել է: «Մենք փաստացի արձանագրել ենք 1 տրլն 561 մլրդ դրամ եկամուտներ, 1 տրլն 895 մլրդ դրամ ծախսեր և 334 մլրդ դրամ դեֆիցիտ»,-ասաց Ջանջուղազյանը: Պետական պարտքը կազմել է շուրջ 7 մլրդ 969 մլն դոլար, որի շրջանակում կառավարության պարտքը եղել է 7 մլրդ 509 մլն դոլար: «Պարտքը իր հավանական մեծությամբ, հարաբերական մեծությամբ հատել է այն շեմը, որը գնահատվում է որպես կառավարելի միջակայք: Այդուհանդերձ մենք շատ չենք խորացրել խնդիրները պարտքի բնագավառում և կարծում ենք, որ առաջիկա 5 տարում մեր տնտեսական ծրագրերը հնարավորություն կտան տնտեսական աճի պոտենցիալը մեծացնել այն չափով, որ մեր պարտքի բեռը նվազի և պարտք-ՀՆԱ հարաբերակցությունը վերադառնա 60 տոկոսից ցածր միջակայք»,-ասաց նախարարի պաշտոնակատարը: Կառավարության պարտքի մեջ արտաքին պարտքը ունի նշանակալի կշիռ՝ 5 մլրդ 593 մլն դոլար:

18:51 - 30 հունիսի, 2021

ԱԳՆ-ի ծախսերի հիմնական կշիռը 2020-ին եղել է այլ երկրներում ՀՀ դիվանագիտական ծառայության կազմակերպումը |armenpress.am|

armenpress.am: ՀՀ արտաքին գործերի նախարարության կողմից 2020 թվականին սկզբնական ծրագրով ենթակա էր օգտագործման 15.5 մլրդ դրամ հատկացում: Նախատեսվում էր, որ այս միջոցները կօգտագործվեն 6 ծրագրերի, 18 միջոցառումների ֆինանսավորման համար: Տարվա ընթացքում արդեն ճշտված ծրագիրը կառավարության լիազորությունների շրջանակում կազմել է 17.1 մլրդ դրամ: Փաստացի օգտագործումը կազմել է 98.5 տոկոս կամ 16.85 մլրդ դրամ: Այս մասին Ազգային ժողովում բյուջետային քննարկումների ժամանակ նշեց ՀՀ ֆինանսների նախարարի պաշտոնակատար Ատոմ Ջանջուղազյանը: «Բոլոր միջոցառումներին չեմ անդրադառնա, սակայն կնշեմ, որ ծախսերի մեջ հիմնական կշիռը եղել է օտարերկրյա պետություններում Հայաստանի դիվանագիտական ծառայության գործունեության կազմակերպումը: Հաջորդն իր մեծությամբ միջազգային կազմակերպությունների հետ համագործակցության ծրագիրն է եղել: Կուզենայի այստեղ նաև անդրադառնալ այն հարցին, որ 2020 թվականի բյուջեում, բացի ԱԳՆ-ից, անդամակցության համար պատասխանատու են եղել նաև այլ մարմիններ: Հետևաբար` միջազգային կազմակերպություններին անդամակցելու համար, ընդհանուր առմամբ, տարեկան ճշտված ծրագիրը կազմել է 3 մլրդ 396 մլն դրամ, որի փաստացի օգտագործումը կազմել է 3 մլրդ 324 մլն դրամ»,-ասաց Ատոմ Ջանջուղազյանը: Նախարարի պաշտոնակատարը նշեց, որ, ընդհանուր առմամբ, հատկացված միջոցներով հնարավոր է եղել կազմակերպել ԱԳՆ-ին վերապահված գործառույթների իրականացումը:

16:57 - 03 հունիսի, 2021

Հարկային եկամուտների կառուցվածքում ամենամեծ կշիռն ունեցել է ԱԱՀ-ն |armenpress.am|

armenpress.am: Պետբյուջեի հարկային եկամուտների կառուցվածքում 2020-ին ամենամեծ կշիռն ունեցել է ավելացված արժեքի հարկը՝ շուրջ 472 մլրդ դրամ: այս մասին ասաց ՀՀ ֆինանսների նախարարի պաշտոնակատար Ատոմ Ջանջուղազյանը ԱԺ մշտական հանձնաժողովների համատեղ նիստում «ՀՀ 2020 թվականի պետական բյուջեի կատարման մասին» տարեկան հաշվետվության քննարկմանը: «Մեր եկամուտների կառուցվածքում ամենամեծ կշիռը, ինչպես նախկինում, այնպես էլ 2020-ին ունեցել է ավելացված արժեքի հարկը: ԱԱՀ-ի գծով մուտքերը 2020-ին կազմել են մոտ 472 մլրդ դրամ: Հարկային եկամուտների տեսակետից հաջորդն իր նշանակալիությամբ եկամտային հարկն է, որի մասով պետբյուջեն համալրվել է շուրջ 412 մլրդ դրամով՝ հարկային եկամուտների գրեթե 30 տոկոսը»,- ասաց Ջանջուղազյանը: Շուրջ 149 մլրդ դրամ են կազմել շահութահարկի գծով մուտքերը: Ջանջուղազյանը նշեց, որ տվյալ դեպքում պետբյուջեի հարկային եկամուտների շուրջ 11 տոկոսի չափով համալրումը շահութահարկի հաշվին, ըստ էության, հետևանք է 2019-ի տնտեսության շահութաբերության համեմատաբար բարձր մակարդակի, ինչն իր արտացոլումն էր գտել տնտեսության իրական աճի ցուցանիշում: Ակցիզային հարկից ստացված մուտքերը ընդհանուր հարկային եկամուտների շուրջ 8.9 տոկոսն են կազմել կամ գերեթե 124 մլրդ դրամ:

11:27 - 02 հունիսի, 2021

Ջանջուղազյանը վստահեցնում է՝ նախորդ տարի հաջողվել է ապահովել մակրոտնտեսական կայունությունը |armenpress.am|

armenpress.am: Հայաստանում 2020-ին, չնայած համավարակի և պատերազմի առաջացրած դժվարություններին, հաջողվել է ապահովել մակրոտնտեսական կայունությունը, թեև պետությունը վճարել է գին՝ պարտքի ավելացում: Այս մասին ասաց ՀՀ ֆինանսների նախարարի պաշտոնակատար Ատոմ Ջանջուղազյանը՝ ԱԺ հանձնաժողովների համատեղ նիստում՝ «ՀՀ 2020թ. պետական բյուջեի կատարման մասին» տարեկան հաշվետվության նախնական քննարկումներում: Նա հիշեցրեց, որ ինչպես աշխարհի շատ երկրներ, այնպես էլ Հայաստանը տարվա ընթացքում վերանայել է հարկաբյուջետային քաղաքականությունը՝ այն համապատասխանեցնելով տնտեսական անկման ժամանակահատվածին: Ջանջուղազյանը խոսեց իրականացված հակաճգնաժամային միջոցառումների մասին: «Պետք է նկատել, որ այս ամենը չէր կարող գին չունենալ, որը պետք է վճարվի: Գինը, ըստ էության, պետական պարտքի փոփոխությունն էր»,- ասաց Ջանջուղազյանն ու առաջարկեց օբյեկտիվ գնահատել իրավիճակը: Կառավարության պատկերացմամբ՝ հաջողվել է վճարել համեմատաբար համարժեք գին՝ նախանշված արդյունքներին հասնելու համար: «Կառավարության պարտք-ՀՆԱ հարաբերակցությունը կազմել է 63.5 տոկոս, պետական բյուջեի դեֆիցիտը եղել է շուրջ 5 տոկոս, որը տրամաբանական է հարկաբյուջետային վերանայված քաղաքական համատեքստում»,- ասաց նախարարի պաշտոնակատարը: Ըստ նրա՝ այսպիսի հարկաբյուջետային քաղաքականություն իրականացնելու համար կանխատեսվածից ավելի պարտքի ներգրավմանն այլընտրանք պարզապես չկա: «Իրականացվել են հավասարակշռված վերանայումներ, հակաճգնաժամային միջոցառումներ, ինչի արդյունքում հաջողվել է ապահվել և բացասական ազդեցության հնարավորինս մեղմում և մարկրոտնտեսական կայունությունը, որն այլընտրանք չունի հետագա զարգացման տեսակետից»,- ասաց նա: Ջանջուղազյանը հիշեցրեց, որ 2020-ին արձանագրվել է 7.6 տոկոս տնտեսական անկում: Նրա վստահեցմամբ՝ պետական բյուջեի պակասուրդը և կառավարության պարտքը Հաաստանի համար չի ունեցել բացառիկ զարգացում, աշխարհի բոլոր երկրները գործնականում ունեցել են համանման իրավիճակ, զարգացող երկրների հետ համադրելի դրսևորումներ են եղել:

12:51 - 01 հունիսի, 2021

Փոփոխություններ «Հարկային օրենսգրքում». անշարք գույքն օտարելիս հարկման բազայի համար հիմք կընդունվի մոտարկված արժեքի 80 տոկոսը |1lurer.am|

1lurer.am: Կառավարությունը հավանության արժանացրեց «Հարկային օրենսգրքում» փոփոխությունների նախագիծը: Անշարժ գույքի իրացման օտարման գործարքների մասով ԱԱՀ-ով և շահութահարկով հարկման նպատակով, որպես հարկման բազա, հիմք կընդունվի ոչ թե անշարժ գույքի մոտարկված շուկայական արժեքը, այլ դրա 80 տոկոսը: Ֆինանսների նախարարի պաշտոնակատար Ատոմ Ջանջուղազյանը նշեց, որ նախագծով առաջարկվում է լուծել այն խնդիրները, որոնք ծագել են կառուցապատող տնտեսվարողների շրջանում՝ կապված անշարժ գույքի հարկման համակարգը կադաստրային շուկայականին մոտարկված արժեքների կիրառման հետ: Ըստ նրա՝ այդ խնդիրները երկու բնույթի են: «Առաջինը գործարքի գնի չափի որոշմանն է վերաբերում, և երկրորդը՝ գործարքի պահի ճանաչմանը: Առաջին դեպքում, քանի որ կիրառվում է անշարժ գույքի հարկման նպատակով կադաստրային շուկայականին մոտարկված արժեքը՝ ըստ գնահատականի այն արդեն իսկ իր մեջ պարունակում է ավելացված արժեքի հարկեր: Ավելացված արժեքի հարկի և շահութահարկի բազայի ձևավորման տեսակետից կստացվի, որ երկու անգամ է հաշվարկվում այս մեծությունը: Առաջարկվում է, որ կիրառվի կադաստրային մոտարկված արժեքի 80 տոկոսը հարկման բազայի հաշվարկման նպատակով, իսկ երկրորդ դեպքում առաջարկվում է հաշվի առնել, որ շատ հաճախ անշարժ գույքը օտարվում է ոչ թե պատրաստ լինելու ժամանակ, այլ գնման իրավունքի օտարմամբ է սկսվում գույքի օտարման գործընթացը: Առաջարկվում է, որ գործարքի կատարման պահ ճանաչվի գնման իրավունքի գրանցման օրը, և դրանով պայմանավորված՝ նաև այդ ժամանակ գնահատվի կադաստրային մոտարկված արժեքը, որը հետագայում ՊԵԿ-ին հնարավորություն կտա ներկայացված հաշվետվությունները համադրել տվյալների այն բազայի հետ, որը կադաստրում առկա կլինի, և դրանով պայմանավորված՝ նաև որոշել, թե որքանով է հաշվետվությունը համապատասխանում սահմանված կարգավորումներին»,- ասաց Ջանջուղազյանը: Օրինագիծը ճանաչվեց անհետաձգելի:

12:31 - 20 մայիսի, 2021

Ատոմ Ջանջուղազյանն ընդունել է Հայաստանում Ճապոնիայի նորանշանակ դեսպանին

Այսօր՝ մայիսի 19-ին ՀՀ ֆինանսների նախարարի պաշտոնակատար Ատոմ Ջանջուղազյանն ընդունել է Հայաստանում Ճապոնիայի նորանշանակ արտակարգ և լիազոր դեսպան Ն.Գ. Ֆուկուսիմա Մասանորիի գլխավորած պատվիրակությանը: Նախարարը շնորհավորել է դեսպանին պաշտոնը ստանձնելու կապակցությամբ: Նախարարությունը տեղեկացնում է, որ հանդիպման ընթացքում կողմերը անդրադարձ են կատարել ընթացիկ և ապագա համագործակցության հարցերին` պատրաստակամություն հայտնելով երկկողմ ձևաչափով շարունակել ակտիվ փոխգործակցությունը:

22:30 - 19 մայիսի, 2021

Կառավարությունը մինչեւ մայիսի 1-ը խորհրդարան կներկայացնի 2020 թ. բյուջեի կատարման տարեկան հաշվետվությունը

ԱԺ ֆինանսավարկային եւ բյուջետային հարցերի մշտական հանձնաժողովի ապրիլի 27-ի նիստում ՀՀ ֆինանսների նախարար Ատոմ Ջանջուղազյանը քննարկման ներկայացրեց 2020 թվականի պետական բյուջեի ինն ամիսների կատարման ընթացքի վերաբերյալ տեղեկանքը: Նախարարը տեղեկացրեց, որ Կառավարությունն օրենքով սահմանված կարգով մինչեւ մայիսի 1-ը խորհրդարան պետք է ներկայացնի բյուջեի կատարման տարեկան հաշվետվությունը: Ջանջուղազյանը խոսեց 2020-ի առանձնահատկություններից, անդրադարձավ տնտեսության վրա համավարակի ունեցած բացասական հետեւանքներին: «Նախորդ ճգնաժամերի պարագայում մի դեպքում առաջարկի ցնցում էր, մյուս դեպքում` պահանջարկի: 2020-ի համար եւ առաջարկի, եւ պահանջարկի շոկ կար»,-ընդգծեց նախարարը: Նրա խոսքով` եթե մինչեւ 2020-ը լավատեսական կանխատեսումներ կային, ապա արդեն տարվա սկզբին միջազգային հեղինակավոր ֆինանսական կազմակերպությունները փոխեցին իրենց կանխատեսումները: Եթե հունվարին հրապարակված կանխատեսումներով դեռեւս շարունակվում էր 2019-ի լավատեսության իներցիան, Արժույթի միջազգային հիմնադրամի հրապարակած տեղեկության համաձայն` 3.3 տոկոսով տնտեսության աճ էր գնահատվում, ապա արդեն ապրիլին համաշխարհային տնտեսության համար կանխատեսումները կազմում էին բացասական 3 տոկոս: Հունիսին արդեն 4.9 տոկոս անկում էր կանխատեսվում: Ատոմ Ջանջուղազյանն անդրադարձավ նաեւ Ադրբեջանի սանձազերծած պատերազմի հետեւանքներին: Նշվեց, որ այդ ժամանակահատվածին բնորոշ անորոշության աստիճանը հաշվի առնելով` ներկայացվել է տնտեսական 2 տոկոս անկման սցենարին համապատասխան բյուջեի շրջանակի վերանայում նախատեսող նախագիծ: Հարկաբյուջետային քաղաքականության փոփոխության տրամաբանության նպատակը դրան համարժեք քաղաքականություն ունենալն է եղել: «Տնտեսական վերելքի ժամանակ ենթադրվում է, որ այն պետք է լինի զսպող կամ չեզոք ազդեցություն ունեցող քաղաքականություն, իսկ այդ ժամանակահատվածում կուտակած պաշարները պետք է օգտագործվեն սպասվող ճգնաժամի ժամանակ` մեղմելու ճգնաժամի բացասական ազդեցությունը»,-փաստեց նախարարը: Նա հավելեց, որ ծախսերին առնչվող որեւէ պարտավորություն չի նվազեցվել, հակառակը` առաջարկվել է նոր պարտավորությունների իրականացում: Ինն ամսվա ծրագրով եկամուտների համար նախատեսված ցուցանիշը կատարվել է 98.8 տոկոսով: Հատկանշական է, որ ներքին ռեսուրսներից ակնկալվող ցուցանիշը կատարվել է 100.3 տոկոսով: Հարկային եկամուտները ծրագրայինի համեմատ ունեցել են 100.6 տոկոս կատարողական: Ծախսերի գծով 84.4 տոկոս կատարողական է արձանագրվել: Ինն ամսվա արդյունքներով համեմատաբար ցածր է եղել արտաքին աջակցությամբ իրականացվող նպատակային ծրագրերի կատարողականը` կազմելով 27.5 տոկոս:

12:20 - 27 ապրիլի, 2021

Հարկային ընդհանուր եկամուտներն այս տարվա առաջին եռամսյակին, նախորդ տարվա եռամսյակի համեմատ, պակաս է 16,1 միլիարդ դրամով․ Էդվարդ Հովհաննիսյան |tert.am|

tert.am: ՀՀ ԱԺ ֆինանսավարկային և բյուջետային հարցերի մշտական հանձնաժողովում այսօր «Լուսավոր Հայաստան» խմբակցության պատգամավոր Արկադի Խաչատրյանը ֆինանսների նախարար Ատոմ Ջանջուղազյանից հետաքրքրվեց պետական պարտքի աճից։ «Կառավարության պարտքը, որը շեշտակի ավելացում ունի և տարվա արդյունքներով, ըստ էության կմոտենա ՀՆԱ–ի 70 տոկոսին»,–ասաց նա։ Պատգամավորը նկատեց, որ օրենսդրությամբ կառավարությունը պարտավորություն ունի՝ պետական պարտքի 60 տոկոսն անցնելու դեպքում ներկայացնի հստակ հետագիծ։ «Արդյոք հստակեցվե՞լ է հետագիծը կառավարության կողմից, ինչպիսի՞ փոփոխություններ են նախատեսվում, որ կառավարության պարտքը նվազեցվի»,–ասաց նա։ Ատոմ Ջանջուղազյանը նշեց, որ ըստ 2026 թվականի իրենց կանխատեսումների՝ պետք է իրականացնեն հարկաբյուջետային համախմբում այն տրամաբանությամբ, որ հնարավոր լինի պետական պարտքի բաղադրիչը ՀՆԱ հարաբերակցությամբ նվազեցնել 60 տոկոսից։ Պետական եկամուտներ կոմիտեի նախագահ էդվարդ Հովհաննիսյանը հայտնեց, որ առաջին եռամսյակի կատարողականը, նախորդ տարվա՝ 2020 թվականի եռամսյակի համեմատությամբ, պակաս է հարկային ընդհանուր եկամուտները 16,1 միլիարդ դրամով, որից 10 միլիարդ դամը վերաբերում է շահութահարկին։

11:50 - 27 ապրիլի, 2021

Արտաքին պարտքը կառավարելի է. ՀՀ-ում 2020-ի ճգնաժամային իրավիճակը թվերի մասով համադրելի է զարգացող երկրների հետ |armenpress.am|

armenpress.am: Հայաստանում 2020 թվականի բյուջեն եկամուտների գծով կազմել է 1 տրիլիոն 560 մլրդ 655 մլն 340.8 հազար դրամ, ծախսերի գծով` 1 տրիլիոն 894 մլն 647,093.4 հազար դրամ, բյուջեի դեֆիցիտը` 333 մլրդ 991 մլն 752.6 հազար դրամ: Այդ մասին կառավարության նիստում նշեց ՀՀ ֆինանսների նախարար Ատոմ Ջանջուղազյանը՝ ՀՀ 2020 թվականի պետական բյուջեի կատարման տարեկան հաշվետվությունը ներկայացնելիս: Ջանջուղազյանը նշեց, որ 2019-ին համաշխարհային տնտեսության 2,9 տոկոս աճի դեպքում Հայաստանում գրանցվել է 7,6 տոկոսի աճ, ինչը հնարավորություն է տվել վերանայել բյուջեի ծախսային միջոցները: Մասնավորապես, ԿԳՄՍՆ ոլորտում 2019-ին հատկացումներն աճել են շուրջ 11 տոկոսով, առողջապահության ոլորտում՝ 22 տոկոսով, կապիտալ ծախսերը՝ 30 տոկոսով: «Կառավարության պարտք/ՀՆԱ հարաբերակցությունը 2019-ի վերջին կազմում էր 50 տոկոսից ցածր, ինչը թույլ տվեց 2020-ին նոր պարտք ներգրավելու ճանապարհով պահել հարկաբյուջետային քաղաքականության տրամաբանությունը ճգնաժամի ժամանակ: Արդյունքում ունեցանք ավելի մեծ դեֆիցիտ, քան ծրագրավորված էր: Սկզբում ունեինք բյուջեի 2,3 տոկոսի չափով սպասվող դեֆիցիտի մեծություն, փաստացի ունեցանք մոտ ՀՆԱ-ի 5,5 տոկոսի դեֆիցիտ: Սա այն գինն է, որ մենք վճարել ենք, որ մեղմենք տնտեսական անկման ազդեցությունը: Պարտքի մակարդակը 2020-ի արդյունքներով կազմել է ՀՆԱ-ի 63,5 տոկոսը: Այս պայմաններում պետք է 5 տարում այդ ցուցանիշը նվազեցնել մինչեւ 60 տոկոսի: Սա այն շեմն է, որը աշխարհում համարվում է ռիսկի տեսակետից կառավարելի»,- ընդգծեց Ջանջուղազյանը՝ ավելացնելով, որ զարգացող երկրների համեմատությամբ Հայաստանում 2020 թվականի ճգնաժամային իրավիճակը թվերի մասով համադրելի է:

13:59 - 22 ապրիլի, 2021