Հայկ Կոնջորյան

8-րդ գումարման ԱԺ պատգամավոր՝ «Քաղաքացիական պայմանագիր» խմբակցությունից։

Ծնվել է 1987թ. մայիսի 30-ին Չարենցավանում:

2008թ. ավարտել է ԵՊՀ պատմության ֆակուլտետը: 2010թ.՝ ԵՊՀ պատմության ֆակուլտետի մագիստրատուրան: 2013թ.՝ ԵՊՀ ասպիրանտուրան: Պատմաբան:

2013-2014թթ. դասավանդել է ԵՊՀ պատմության ֆակուլտետում: 2014-2016թթ. եղել է «lragir.am» կայքի քաղաքական վերլուծաբան, «Ագօրա» եւ «Մի քանի հարց» հրապարակախոսական-քաղաքական համացանցային հաղորդաշարերի հեղինակ եւ վարող: 2017-2018թթ.՝ «Para.tv» համացանցային հեռուստաընկերության «Մի խոսքով» հաղորդաշարի հեղինակ եւ վարող: 2017-2018թթ.՝ ՀՀ ԱԺ «Ելք» խմբակցության փորձագետ:

2011-2015թթ. եղել է ՀՀ Ազգային ժողովին կից Երիտասարդական խորհրդարանի անդամ:

2018-2019թթ.՝ ԱԺ պատգամավոր («Ելք» կուսակցությունների դաշինք): 25.05.2018-19.09.2018թթ.՝ ԱԺ արտաքին հարաբերությունների, 19.09.2018-28.09.2018թթ.՝ ԱԺ ֆինանսավարկային եւ բյուջետային հարցերի մշտական հանձնաժողովների անդամ, 28.09.2018-14.01.2019թթ.՝ ԱԺ ֆինանսավարկային եւ բյուջետային հարցերի մշտական հանձնաժողովի նախագահի տեղակալ: «Ելք» խմբակցության անդամ:

2019-2021թթ.՝ ԱԺ պատգամավոր («Իմ քայլը» կուսակցությունների դաշինք, թիվ 1 ընտրատարածքի տարածքային ընտրական ցուցակ): 06.02.2019-12.01.2021թթ.՝ ԱԺ եվրոպական ինտեգրման հարցերի մշտական հանձնաժողովի անդամ, 12.01.2021-02.08.2021թթ.՝ ԱԺ պաշտպանության եւ անվտանգության հարցերի մշտական հանձնաժողովի անդամ: «Իմ քայլը» խմբակցության անդամ:

2021թ. հունիսի 20-ին ԱԺ պատգամավոր է ընտրվել «Քաղաքացիական պայմանագիր» կուսակցության համապետական ընտրական ցուցակով:

Հայաստանը միշտ եղել է եվրոպական երկիր, և ՀՀ ապագան Եվրոպայում է. Բունդեսթագի ԵՄ հարցերով հանձնաժողովի նախագահ

««Հայաստանը միշտ եղել է եվրոպական երկիր և Հայաստանի ապագան Եվրոպայում է»,- ՀՀ ԱԺ «Քաղաքացիական պայմանագիր» խմբակցության ղեկավար Հայկ Կոնջորյանի փոխանցմամբ՝ ասել է Գերմանիայի Բունդեսթագի ԵՄ հարցերով հանձնաժողովի նախագահ Անտոն Հոֆրայթերը այսօր տեղի ունեցած հանդիպման ժամանակ: «Բեռլինում այսօր հանդիպեցինք Բունդեսթագի ԵՄ հարցերով հանձնաժողովի նախագահին և անդամներին: Քննարկեցինք ՀՀ-ԵՄ հարաբերությունների խորացման հեռանկարները: Երկուստեք արձանագրեցինք, որ Հայաստանի ժողովրդավարական զարգացումը պետք է մեծացնի Հայաստանի դիմադրողականությունը և անվտանգությունը: Խոսեցինք ՀՀ-ԵՄ տնտեսական և էներգետիկ համագործակցության խորացման և առաջիկա ծրագրերի մասին»,- գրել է Կոնջորյանը:

18:50 - 27 հունիսի, 2024

Իրավապահ մարմինները երեկ բոլոր օրինական միջոցներով կանխել են Հայաստանում երկրորդ պետության գլխատումը. Հայկ Կոնջորյան |1lurer.am|

1lurer.am: ԱԺ «Քաղաքացիական պայմանագիր» խմբակցության ղեկավար Հայկ Կոնջորյանը իշխող խմբակցության անունից ելույթում անդրադարձավ «Հայաստան» խմբակցության քարտուղար Արծվիկ Մինասյանի մեղադրանքներին: «Իհարկե, տհաճ է, որ ընդդիմությունը, իր կանոնների համաձայն, խրոխտ խոսեց և գնաց, և չնայած ասված է՝ հեռացածների հետևից կա՛մ լավը, կա՛մ ոչինչ, ամեն դեպքում, ավելի կարևոր է ասել ճշմարտությունը, քան լավի կամ ոչնչի հետևից ընկնել: Նախ՝ ցանկանում եմ արձանագրել՝ երեկ «Պատիվ ունեմ» խմբակցությունը, բայց մասնավորապես «Հայաստան» խմբակցությունը, հանդես էր գալիս Տրոյական ձիու կարգավիճակով: Բանն այն է, որ իրենց կողմից իրենց շարժման առաջնորդ հռչակված՝ վեղարով Նեռի ներկայացուցիչը, ով երեկ այդ դեպքերից մի քանի ժամ առաջ Բաղրամյան պողոտայում խոսում էր ներքին թշնամիների մասին՝ մատնացույց անելով և նկատի ունենալով մեզ, ապա հայտարարում էր, որ իրենք պիտի մտնեն Ազգային ժողով և դրանից հետո «Հայաստան» դաշինքի և «Պատիվ ունեմ» դաշինքի ներկայացուցիչ-պատգամավորները, ովքեր դրսում միտումնավոր և նպատակաուղղված սադրում էին իրավիճակը, հրմշտում էին ոստիկաններին, բռնություն էին գործադրում ոստիկանների նկատմամբ և հարձակում էին գործադրում իրենց օրինական գործառույթներն իրականացնող ոստիկանության, իրավապահ մարմինների նկատմամբ, և փորձում էին ժողովրդի հետ ներխուժել Ազգային ժողով, ոչ ոքի համար անակնկալ, չէ, թե ինչ էին ուզում նրանք անել: Այնուհետև դեպքերի զարգացման արդյունքում պարզ դարձավ, հայտարարվեց իրենց վեղարով առաջնորդի կողմից, որ փնտրում են նաև վարչապետին՝ հաշվեհարդար տեսնելու համար: Սա, ըստ էության, ահաբեկչության փորձի հստակ դրսևորում էր»,- հայտարարեց Հայկ Կոնջորյանը: Նրա խոսքով՝ Արծվիկ Մինասյանը դահլիճում խոսում է Մարտի 1 անելու ինչ-որ տարօրինակ մղումների մասին՝ այդկերպ փորձելով կոծկել երեկ Հայաստանում երկրորդ Նոյեմբերի 9-ը իրականացնելու իրենց այլանդակ ծրագիրը: Կոնջորյանն ընդգծեց՝ նույն բանը նույն խոսույթով, նույն ղեկավար կազմի միջոցով երեկ էր տեղի ունենում, և նույն մարդկանց կատարմամբ փորձ էր արվում իրագործել երկրորդ Նոյեմբերի 9, իսկ հաջողության պարագայում՝ նաև երկրորդ Հոկտեմբերի 27: «Եվ ահա «Հայաստան» դաշինքը նոր Նաիրի Հունանյանի Տրոյական ձին էր՝ այստեղ նստած: Եվ իրենք նպատակաուղղված կերպով իրենց պատգամավորներին ուղարկել էին դուրս, որպեսզի այնտեղ իրավիճակը սադրեն: Առաջին սադրանքն իրագործել են, ըստ էության, «Հայաստան» խմբակցության պատգամավորները՝ Գառնիկ Դանիելյան, Իշխան Սաղաթելյան, Արթուր Սարգսյան, «Պատիվ ունեմ» խմբակցության պատգամավորները՝ Տիգրան Աբրահամյան, Աննա Մկրտչյան, Ասպրամ Կրպեյան, որոնք բռնությամբ և ագրեսիայով փորձում էին տաքացնել ժողովրդին և հարձակում գործել խորհրդարանի վրա: Սա ոչ այլ ինչ է, քան ահաբեկչության փորձ, և այս դեպքերին հաջորդող՝ վեղարով առաջնորդի հայտարարությունը վարչապետին գտնելու և հաշվեհարդար տեսնելու վերաբերյալ, ապացուցում են, որ նրանք հստակ պլանավորված ահաբեկչական գործողություն էին ծրագրել ՀՀ-ի դեմ: Սա էր իրականությունը»,- հայտարարեց «Քաղաքացիական պայմանագիր» խմբակցության ղեկավարը: Կոնջորյանն ընդգծեց՝ ՀՀ իրավապահ մարմինները երեկ բոլոր օրինական միջոցներով կանխել են Հայաստանում երկրորդ Հոկտեմբերի 27-ը, կանխել Հայաստանում երկրորդ պետության գլխատումը, կանխել են Հայաստանը գուբերնիա դարձնելու նպատակաուղղված ծրագիրը: Բոլոր նրանք, ովքեր փորձում են իրողություններին հաղորդել այլ շղարշ, ըստ պատգամավորի՝ պիտի ժամանակ տրամադրեն և դեպքերի հաջորդականությունը շղթայով միացնեն իրար:

12:09 - 13 հունիսի, 2024

ԱԺ խորհուրդը մերժեց ընդդիմության միջնորդությունը․ արտահերթ նիստը տեղի կունենա հունիսի 17-ին

ԱԺ խորհուրդը մերժեց ընդդիմության միջնորդությունը․ արտահերթ նիստը տեղի կունենա հունիսի 17-ին։ «Քաղաքացիական պայմանագիր» խմբակցության ղեկավար Հայկ Կոնջորյանը, պատասխանելով հարցին, թե մասնակցելո՞ւ են արտահերթ նիստին, ասաց, որ իրենք նման նման օրակարգ չունեն, հետևաբար այդ օրակարգն իրենց համար քննարկելի չէ։ Հիշեցնենք, որ խորհրդարանի ընդդիմադիր «Հայաստան» և « Պատիվ ունեմ» խմբակացություններն այսօր միջնորդություն էին ներկայացրել Ազգային ժողովի խորհրդին՝ վաղը կամ մինչև հունիսի 17-ն արտահերթ նիստ գումարելու պահանջով՝ Ազգային ժողովի ուղերձը կառավարության հրաժարականի և նոր կառավարության ձևավորման մասին օրակարգով։

16:48 - 10 հունիսի, 2024

Հայաստանի բարձրագույն ղեկավարությունն այցելել է Սարդարապատի հուշահամալիր

Հանրապետության տոնի առթիվ Հայաստանի բարձրագույն ղեկավարությունն այցելել է Սարդարապատի հուշահամալիր: ԱԺ «Քաղաքացիական պայմանագիր» խմբակցության ղեկավար Հայկ Կոնջորյանը Ֆեյսբուքի իր էջում լուսանկարներ է հրապարակել Սարդարապատից և կից գրառում արել. «Կեցցե՛ Հայաստանի Հանրապետությունը: Կեցցե՛ ժողովուրդը: Կեցցե՛ ժողովրդի իշխանությունը, որը պատկանում է միայն և միայն ինքնիշխանին՝ ժողովրդի՛ն»:

16:50 - 28 մայիսի, 2024

Մենք իրագործելի նպատակների ու անիրագործելի երազանքների արանքում մնացած քաղաքական բանավեճի մեջ ենք. Կոնջորյան |1lurer.am|

1lurer.am: ader> Շատ տրամաբանական է, որ այս օրերին, բացի ՍԴ դատարանի դատավորի ընտրության բուն հարցից, քննարկում ենք քաղաքական կարևորության և նշանակության հարցեր, որոնք ուղղակիորեն կամ անուղղակիորեն կապված են Սահմանադրական դատարանի հետ, որովհետև այս օրերին Հայաստանում ընթացող գործընթացները խոր աղերսներ ունեն նաև ՍԴ-ի հետ: Որովհետև ի՞նչ է տեղի ունենում: Տեղի է ունենում այն, որ այսօր Հայաստանում կան կոնկրետ քաղաքական ուժեր, խմբեր և նաև մեր խորհրդարանական ընդդիմությունը, որոնք այդ թվում՝ Հայաստանից դուրս ուժերի հետ ուս ուսի տված խնդիր են դրել կազմալուծել Հայաստանի պետականությունը, իսկ ՍԴ-ն Հայաստանի պետականության պահպանման կարևորագույն ինստիտուտ է: Այս մասին խորհրդարանում Ազգային ժողովի «Քաղաքացիական պայմանագիր» պատգամավորական խմբակցության անունից ելույթում հայտարարեց խմբակցության ղեկավար Հայկ Կոնջորյանը: Նրա խոսքով՝ այն, ինչին երեկ ԱԺ-ում ականատես եղանք ՍԴ դատարանի դատավորի թեկնածուի վարկաբեկմանն ուղղված հարցադրումներին, այդ քաղաքականության տրամաբանական շարունակությունն է: Խոսքը, մասնավորապես, թեկնածուի աշխատավայրին էր վերաբերում: «Ձեր տրամաբանությունը ձեր դեմ է աշխատում, հարգելի՛ գործընկերներ: Եթե դուք թեկնածուին հարցնում եք իր աշխատավայրով պայմանավորված՝ ինքը կարող է դիտվել որպես օտարերկրյա գործակալ, նայեք ձեր շուրջբոլորը: Ձեր կողքը նստած են, ձեր իսկ բնորոշմամբ, օտարերկրյա ազդեցության գործակալներ, որոնք ձեզ ի՞նչ երաշխիք են տվել: Բայց իրականում այդ հարցը նպատակ ունի դելեգիտիմացնել թեկնածուին և ՍԴ-ն: Մեկ անգամ չէ, որ մենք, հատկապես պատերազմից հետո, ականատես ենք եղել, թե ինչպես եք դուք փորձել դատական համակարգը օգտագործել որպես Հայաստանի ժողովրդի վրեժ լուծելու միջոց»,- ասաց Կոնջորյանը: Ըստ բանախոսի՝ մենք ներկայումս իրագործելի նպատակների ու անիրագործելի երազանքների արանքում մնացած քաղաքական բանավեճի և երկփեղկվածության մեջ ենք: Նրա խոսքով՝ վարչապետի առաջ քաշած՝ իրական և պատմական Հայաստանը հենց դրա մասին է՝ իրագործելի նպատակների և անիրագործելի երազանքների բանավեճի: «Եվ սահմանազատումը հենց դրա մասին է»,- հավելեց պատգամավորը: Անդրադառնալով «Հայաստան» խմբակցության պատգամավոր Արթուր Խաչատրյանի՝ լեգիտիմության մասին հայտարարություններին, Կոնջորյանը ընդդիմությանը մեղադրեց «քաղաքականապես հայդուկ, մտածողությամբ լեռներում» լինելու և «քաղաքական ջեբկիրությամբ» զբաղվելու համար: Նրա խոսքով՝ ընդդիմությունը քաղաքական ջեբկիրությամբ գրպանել է ոչ թե «մանր-մունր բաներ», այլ մի ամբողջ պետություն, պետական հարստություն: «Հետո ձեր գրպաններից հանել եք ու «Գույք՝ պարտքի դիմաց»-ով տվել եք այստեղ-այնտեղ, գրպանել եք ժողովրդի իշխանությունը, հիմա այսօր փորձում եք վերադառնալ տարբեր կերպարանքներով: Նորից եմ կրկնում՝ Հայաստանում քաղաքական հեթանոսությունը հեռանկար չունի, որովհետև Հայաստանում հաստատվել է նոր կարգ, քաղաքական նոր հավատամք, Հայաստանում հաստատվել է ժողովրդավարություն: Դուք դրան չեք հավատում, մենք դա գիտենք: Դուք փորձում եք վերադարձնել գողապետությունը, որովհետև դուք չեք կարողանում առանց գրպանելու: Դուք Հայաստանում հիմնադրել եք մարդկային վշտի արդյունաբերություն, արդյունաբերական ռելսերի վրա դրել մարդկանց վիշտը ու տառապանքը,- նշեց պատգամավորը՝ հավելելով,- սա իսկապես մաստեր կլաս է, ուղղակի խնդիրն այն է, որ դուք չեք հաշվարկել, որ սա 21-րդ դարն է, կան տեսախցիկներ, ուղիղ եթերներ: Սա միջնադար չէ, միջնադարի ինկվիզիցիոն հարաբերություններ չեն, և ինչ-որ մի կղերական չի կարող սեփական միջնադարը պարտադրի լուսավորյալ, 21-րդ դարի հայ ժողովրդին: ՀՀ-ում ժողովրդի իշխանությունն անշրջելի է, ՍԴ-ն ժողովրդավարության պահպանման գործում ֆունդամենտալ նշանակություն ունի»,- ընդգծեց ՔՊ խմբակցության ղեկավարը:

12:20 - 22 մայիսի, 2024

Տավուշի, Սյունիքի, Վայոց ձորի, Գեղարքունիքի, Արարատի մարզերում տեղակայված ռուս սահմանապահները դուրս կգան այդ վայրերից

«Համաձայն ձեռք բերված պայմանավորվածության՝ 44-օրյա պատերազմի ընթացքում և դրանից հետո Տավուշի, Սյունիքի, Վայոց ձորի, Գեղարքունիքի, Արարատի մարզերում տեղակայված ռուս սահմանապահ և զինվորական կետերը կդադարեցնեն իրենց տեղակայումը և դուրս կգան այդ կետերից»,- Ֆեյսբուքում գրել է ԱԺ ՔՊ խմբակցության ղեկավար Հայկ Կոնջորյանը: «Բարձրագույն մակարդակում հաստատվել է նաև «Զվարթնոց» օդանավակայանում ՌԴ սահմանապահների գործունեությունը դադարեցնելու որոշումը»,- հավելել է պատգամավորը:

11:43 - 09 մայիսի, 2024

Միացյալ Նահանգները Հայաստանի կողքին է՝ իր ժողովրդավարական զարգացման և ինքնիշխանության ամրապնդման գործում. Մայքլ Քարփենթերը՝ ՀՀ ԱԺ պատգամավորներին

ՀՀ ԱԺ Հայաստան-ԱՄՆ բարեկամական խմբի անդամները` բարեկամական խմբի ղեկավար, ԱԺ «Քաղաքացիական պայմանագիր» խմբակցության ղեկավար Հայկ Կոնջորյանը, ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանը, Եվրոպական ինտեգրման հարցերի մշտական հանձնաժողովի նախագահ Արման Եղոյանը, Ֆինանսավարկային և բյուջետային հարցերի մշտական հանձնաժողովի նախագահ Ծովինար Վարդանյանը, ԱԺ պատգամավոր Արսեն Թորոսյանը և ԱՄՆ-ում ՀՀ արտակարգ և լիազոր դեսպան Լիլիթ Մակունցը Վաշինգտոնում հանդիպել են ԱՄՆ նախագահ Ջո Բայդենի հատուկ հարցերով օգնական, Ազգային անվտանգության խորհրդի՝ Եվրոպայի հարցերով ավագ տնօրեն Մայքլ Քարփենթերի հետ: Այս մասին հայտնում է ՔՊ խմբակցության ղեկավար Հայկ Կոնջորյանը: Քարփենթերը վերահաստատել է Միացյալ Նահանգների աջակցությունը Հայաստանի տարածքային ամբողջականությանը և ինքնիշխանությանը և ողջունել է Հայաստանի և Ադրբեջանի միջև սահմանազատման գործընթացը` հիմնված Ալմա-Աթայի հռչակագրի վրա: Հայ պատգամավորները կարևորել են ապրիլի 5-ին Բրյուսելում կայացած ՀՀ-ԱՄՆ-ԵՄ բարձր մակարդակի հանդիպումը` ողջունելով ԱՄՆ-ի և Եվրոպական Միության ակտիվ ներգրավվածությունը Հայաստանի դիմակայունության ամրապնդման և տնտեսական դիվերսիկացիայի հարցում: Քննարկվել է «Խաղաղության խաչմերուկ» նախագիծը, որը կարող է դառնալ ինչպես տարածաշրջանային, այնպես էլ ավելի լայն տնտեսական համագործակցության կարևոր բաղկացուցիչ` նպաստելով տարածաշրջանային խաղաղությանն ու բարգավաճմանը: Քարփենթերը ողջունել է Հայաստանում ժողովրդավարության ամրապնդմանն ուղված քայլերը` արձանագրելով, որ Միացյալ Նահանգները Հայաստանի կողքին է` իր ժողովրդավարական զարգացման և ինքնիշխանության ամրապնդման գործում:

10:17 - 03 մայիսի, 2024

ԱՄՆ կոնգրեսականները հայ խորհրդարանականներից հետաքրքրվել են Հայաստանի և Ադրբեջանի միջև խաղաղության օրակարգի և տարածաշրջանային զարգացումների մասին

Հայաստանի Հանրապետության Ազգային ժողովի մի խումբ պատգամավորներ մայիսի 1-ին Վաշինգտոնում հանդիպել են ԱՄՆ Կոնգրեսի Հայկական հարցերով հանձնախմբի համանախագահ Ֆրենկ Փալոնի եւ հանձնախմբի անդամ Ջիմ Կոստայի հետ:Այս մասին տեղեկացրել է ՀՀ ԱԺ պատգամավոր Հայկ Կոնջորյանը՝ «Ֆեյսբուք» սոցիալական ցանցի իր էջում կատարած գրառման միջոցով: «Կոնգրեսականները հետաքրքրվել են Հայաստանի և Ադրբեջանի միջև խաղաղության օրակարգի և տարածաշրջանային զարգացումների մասին: Կարևորել ենք ԱՄՆ աջակցությունը Հայաստանի ինքնիշխանությանն ու տարածքային ամբողջականությանը: Քննարկվել է Հայաստանի տնտեսական դիմակայունության ամրապնդման և ժողովրդավարական բարեփոխումների ընթացքը»,- գրել է պատգամավորը: Հանդիպմանը մասնակից հայ խորհրդարանականներն են եղել Արման Եղոյանը, Արսեն Թորոսյանը, Ծովինար Վարդանյանը, Հայկ Կոնջորյանը, Սարգիս Խանդանյանը: Ներկա է եղել նաև ԱՄՆ-ում ՀՀ-ի դեսպան Լիլիթ Մակունցը։

11:48 - 02 մայիսի, 2024

Սամվել Շահրամանյանի հայտարարությունները կարող են ընկալվել որպես սահմանադրական կարգի տապալման փորձ․ Հայկ Կոնջորյան |factor.am|

factor.am: Հայաստանում որևէ երկրորդ այլ կառավարություն չի կարող լինել, դա հակասահմանադրական է, Factor TV-ի հետ զրույցում նման պնդում արեց ԱԺ «Քաղաքացիական պայմանագիր» խմբակցության ղեկավար Հայկ Կոնջորյանը։ Նրա դիտարկմամբ՝ Սամվել Շահրամանյանի՝ ՀՀ-ում Արցախի վտարանդի կառավարություն ունենալու հայտարարությունը կարող է ընկալվել որպես սահմանադրական կարգի տապալման փորձ։ «Հայաստանում վտարանդի կառավարություն ունենալու հայտարարություն անող շրջանակները պետք է հայտնվեն իրավապահների ուշադրության կենտրոնում»,- ընդգծեց նա։ Կոնջորյանի խոսքով՝ իրենք թույլ չենք տալու, որ ինչ- որ մեկը փորձի Հայաստանի պետականության համար ռիսկեր ստեղծել։ Հիշեցնենք, որ Արցախի վերջին նախագահ Սամվել Շահրամանյանը «Ֆիգարո»-ին տված հարցազրույցում անդրադարձել էր Արցախի պետական մարմինների գործունեությանը։ «Այն շենքում, որտեղ ես ընդունում եմ Ձեզ Երևանում, տեղակայված են նախագահական և Արցախի դատական և օրենսդիր կառույցների գրասենյակները։ Խորհրդարանականները կարող են հանդիպել այստեղ՝ քվեարկելու համար: Ես հոկտեմբերին հրամանագիր եմ ստորագրել, ըստ որի՝ կառավարության բոլոր նախարարները պահպանվում են իրենց պաշտոններում՝ կամավոր հիմունքներով»,- ասել էր Շահրամանյանը։ Ավելի մանրամասն՝ սկզբնաղբյուրում։

19:25 - 28 մարտի, 2024

ՔՊ-ն ԱԺ-ում հանդիպել է ՀՀ փոխվարչապետ Տիգրան Խաչատրյանի հետ

ՀՀ ԱԺ «Քաղաքացիական պայմանագիր» խմբակցությունը մարտի 21-ին Ազգային ժողովում հանդիպել է ՀՀ փոխվարչապետ Տիգրան Խաչատրյանի հետ: Այս մասին տեղեկացնում է Հայկ Կոնջորյանը։ Հանդիպմանը ներկա են եղել նաեւ Տարածքային կառավարման եւ ենթակառուցվածքների նախարար Գնել Սանոսյանը, Աշխատանքի եւ սոցիալական հարցերի փոխնախարարներ Աննա Ժամակոչյանը եւ Դավիթ Խաչատրյանը, ՀՀ միգրացիայի եւ քաղաքացիության ծառայության պետ Արմեն Ղազարյանը։ Հանդիպման ընթացքում քննարկվել են Լեռնային Ղարաբաղից բռնի տեղահանված մեր հայրենակիցներին Կառավարության կողմից տրվող սոցիալական աջակցության ծրագրերը:

09:30 - 22 մարտի, 2024

Փաշինյանը հանդիպել է «ՔՊ» խմբակցության հետ. քննարկվել են ՀՀ-ի տնտեսական զարգացմանը առնչվող հարցեր

Փաշինյանը հանդիպել է «ՔՊ» խմբակցության հետ. քննարկվել են Հայաստանի տնտեսական զարգացմանը առնչվող հարցեր։ Այս մասին ֆեյսբուքյան էջում գրել է ՔՊ խմբակցության ղեկավար Հայկ Կոնջորյանը։ «Մարտի 7-ին, Ազգային ժողովում, Վարչապետ Նիկոլ Փաշինյանը հանդիպել է ԱԺ «Քաղաքացիական պայմանագիր» խմբակցության հետ: Հանդիպմանը ներկա են եղել նաև կառավարության անդամներ: Քննարկվել են Հայաստանի տնտեսական զարգացմանը առնչվող հարցեր»,- գրել է նա:

22:49 - 07 մարտի, 2024

Կոնստանտինոս Կոմբոսը վերահաստատել է Կիպրոսի դիրքորոշումը ՀՀ տարածքային ամբողջականության և ինքնիշխանության հարցում

ՀՀ Ազգային ժողովի և Կիպրոսի Հանրապետության Ներկայացուցիչների պալատի միջև համագործակցության միջխորհրդարանական հանձնաժողովի նախագահ Հայկ Կոնջորյանը և հանձնաժողովի անդամները մարտի 7-ին հանդիպել են Կիպրոսի արտաքին գործերի նախարար Կոնստանտինոս Կոմբոսի գլխավորած պատվիրակությանը: Կողմերը երկուստեք բարձր են գնահատել բարեկամ երկրների միջև և՛ օրենսդիր, և՛ գործադիր մակարդակում առկա գերազանց համագործակցությունը, ընդգծել, որ երկու պետությունները պատմականորեն ունեն նույնատիպ մարտահրավերներ ու խնդիրներ: Հայկ Կոնջորյանը երախտագիտություն է հայտնել կիպրական կողմին հայ ժողովրդին պատուհասած բազմաթիվ փորձությունների ժամանակ մշտապես մեր կողքին լինելու և հասցեական հայտարարություններ ու դիրքորոշում հնչեցնելու համար: «Քաղաքացիական պայմանագիր» խմբակցության ղեկավարը կարևորել է երկկողմ արդյունավետ հարաբերությունները նաև միջազգային հարթակներում, հույս հայտնել, որ դրական դինամիկան շարունակական կլինի: Կարևորվել է Հայաստան-Հունաստան-Կիպրոս եռակողմ ձևաչափում համագործակցության առկա ներուժի լիարժեք իրացումը: Կոնստանտինոս Կոմբոսը վերահաստատել է Կիպրոսի դիրքորոշումը ՀՀ տարածքային ամբողջականության և ինքնիշխանության հարցում: «Կիպրոսը դեմ է այն ամենին, ինչը չի համապատասխանում միջազգային իրավունքին»,- փաստել է Կիպրոսի ԱԳ նախարարը: Հանձնաժողովի անդամները կարևորել են պատվիրակության այցը Հայաստան տարածաշրջանային անվտանգային մարտահրավերների համատեքստում, ընդգծել Լեռնային Ղարաբաղում տեղի ունեցածի վերաբերյալ միջազգային հանրության հասցեական արձագանքի անհրաժեշտությունը: Նրանք խոսել են նաև Ադրբեջանի կողմից իրականացվող էթնիկ զտումների քաղաքականության, այդ երկրում գտնվող հայ ռազմագերիների և պահվող այլ անձանց վերադարձի, հայկական պատմամշակութային ժառանգության պահպանության մասին: Նշվել է, որ Ադրբեջանը հետևողականորեն վերացնում է հայկական հետքը Լեռնային Ղարաբաղում: Երկկողմ տեսանելի արդյունքներ գրանցելու հարցում արժևորվել է տարբեր ոլորտներում համագործակցության հնարավորությունների ընդլայնումը, այդ համատեքստում ընդգծվել Կիպրոսի հայ համայնքի առանցքային դերակատարությունը: Անդրադարձ է եղել երկու երկրներում դեսպանատներ բացելու անհրաժեշտությանը, խորհրդարանական մակարդակով փոխայցերի ակտիվացմանը:

13:51 - 07 մարտի, 2024

Փաշինյանն ԱԺ-ում հանդիպել է ՔՊ-ականների և կառավարության անդամների հետ

Մարտի 1-ին, Ազգային ժողովում, Վարչապետ Նիկոլ Փաշինյանը հանդիպել է ԱԺ «Քաղաքացիական պայմանագիր» խմբակցության հետ: Այս մասին տեղեկացնում է «Քաղաքացիական պայմանագիր» խմբակցության ղեկավար Հայկ Կոնջորյանը։ Հանդիպմանը ներկա են եղել նաև կառավարության անդամներ: Քննարկվել են արտաքին քաղաքական զարգացումներին վերաբերող հարցեր:

22:58 - 01 մարտի, 2024

Եկեք խմբակցությունների փակ նիստ անենք առաջիկա օրերին. Հայկ Կոնջորյանի առաջարկը ընդդիմադիրներին |1lurer.am|

1lurer.am: Պարոն Մինասյանը («Հայաստան» խմբակցության քարտուղար Արծվիկ Մինասյան-խմբ.) իր ելույթում մի բան ասաց, որ պատրաստ են ամեն ինչով օժանդակել, որ սխալները չկրկնվեն... Ես ուզում եմ հավատալ, որ պատրաստ են օժանդակել մեր պետության առջև ծառացած մարտահրավերների լուծմանը: Այս մասին խորհրդարանում հայտարարեց «Քաղաքացիական պայմանագիր» խմբակցության ղեկավար Հայկ Կոնջորյանը: «Ես միանգամից առաջարկ եմ անում. պարոն Մինասյան, պարոն Օհանյան և հարգելի գործընկերներ, եկեք խմբակցությունների համատեղ փակ նիստ անենք առաջիկա օրերին այստեղ, առանց տեսախցիկների, հասկանանք՝ դուք ինչ պնդումներ, պահանջներ ունեք, ինչ մտահոգություններ: Տեսախցիկները կանջատենք, որ ավելի անկաշկանդ խոսեք: Ուզում եմ հավատալ, որ ցանկանում եք օգտակար լինել»,- հայտարարեց Հայկ Կոնջորյանը՝ նշելով, որ կսպասի Սեյրան Օհանյանի կողմից արձագանքին: Հիշեցնենք՝ Մինասյանն իր ելույթի ժամանակ հայտարարել էր՝ կարևորում է մեր պետականության առջև ծառացած մարտահրավերների մասին խոսելը և առաջարկներ ներկայացնելը, որոնք չափազանց կարևոր են ներկա ժամանակահատվածում:

14:43 - 08 փետրվարի, 2024

Քաղաքական անգրագիտության դրսևորում է ասել, թե ճնշում ենք գործադրում Հայկուհի Հարությունյանի նկատմամբ. Կոնջորյան |armenpress.am|

armenpress.am: Ազգային ժողովի ընդդիմադիր «Հայաստան» խմբակցությունը իշխանական «Քաղաքացիական պայմանագիր» խմբակցությանը մեղադրում է Կոռուպցիայի կանխարգելման հանձնաժողովի անդամի թեկնածու, հանձնաժողովի նախկին նախագահ Հայկուհի Հարությունյանի նկատմամբ կանխամտածված ու հատուկ վերաբերմունք ցուցաբերելու մեջ, ՔՊ-ից հակադարձում են՝ ընդամենը ցանկանում են հասկանալ, թե իրենց ընտրած թեկնածուն ինչպես է աշխատել, քանի որ կրում են քաղաքական պատասխանատվություն: Հայկուհի Հարությունյանի թեկնածության քննարկմանը «Հայաստան» խմբակցության քարտուղար Արծվիկ Մինասյանը նշեց, որ հանձնաժողովը որոշումներ է կայացրել իշխանական որոշ նախկին ու ներկա պատգամավորների վերաբերյալ՝ վարույթ է հարուցել: Ըստ ընդդիմադիր պատգամավորի՝ հանձնաժողովի աշխատանքը օբյեկտիվ է եղել, և իշխանական պատգամավորները կանխամտածված ու հատուկ վերաբերմունք են ցույց տալիս թեկնածու Հայկուհի Հարությունյանի նկատմամբ: Ընդդիմադիր պատգամավորն այն կարծիքին է, որ իշխանությունը ցանկանում է «զավթել» այդ պաշտոնը: «Ձեր կոկորդին է մնում Հայկուհի Հարությունյանի օբյեկտիվ աշխատանքը»,-տեսակետ հայտնեց Մինասյանը՝ դիմելով իշխանական պատգամավորներին: «Քաղաքացիական պայմանագիր» խմբակցության ղեկավար Հայկ Կոնջորյանն էլ հիշեցրեց՝ Կոռուպցիայի կանխարգելման հանձնաժողովը ձևավորել են իրենք: «Հայկուհի Հարությունյանին ընտրել ենք մենք, օրինակ՝ ես, մեր խմբակցության պատգամավորների մեծ մասը: Հիմա ցանկացած ընտրական գործընթացի տրամաբանությամբ մենք ուզում ենք հասկանալ՝ ում որ ընտրել ենք, ոնց է աշխատել, որ իմանանք՝ ընտրե՞նք, թե՞ ոչ: Մենք դրա համար քաղաքական պատասխանատվություն ենք կրում: Ընտրող մարմինը պետք է ընտրվող պաշտոնյային հարցեր տա, մանավանդ, երբ վերընտրության հարց է քննարկվում: Եվ ասել, թե սա քաղաքական ճնշում է, քաղաքական անգրագիտության շռնդալից դրսևորում է: Ո՞նց կարելի է նման բան խոսել»,-ասաց Հայկ Կոնջորյանը: «Քաղաքացիական պայմանագիր» խմբակցության ղեկավարը վստահեցրեց՝ կոռուպցիայի դեմ պայքարն իրենց քաղաքական ուժի քաղաքական հենասյուներից մեկն է, իրենց քաղաքական գործունեությունը կառուցում են դրա վրա: Նա հիշեցրեց, որ Կոռուպցիայի դեմ պայքարի հանձնաժողովի ձևավորումից ի վեր հանձնաժողովի ֆինանսավորումը ավելացել է շուրջ 400 տոկոսով: «Չափազանց շատ ենք գնահատում այս մարմինը: Եվ այս քննարկումն էլ մեր սրտացավության դրսևորումն է: Այստեղ մենք քննարկում ենք նաև մեր ընտրությունը, նաև ինքներս մեզ: Եթե քննադատում ենք, քննադատում ենք նաև ինքներս մեզ: Դա է ժողովրդավարության դրսևորումը»,-շեշտեց նա՝ աբսուրդ որակելով տեսակետը, թե իշխանական պատգամավորներն իրենց հարցերով փորձում են ճնշել հանձնաժողովի անդամի թեկնածուին: Կոնջորյանը շեշտեց, որ իշխանությունը՝ վարչապետի գլխավորությամբ, կոռուպցիայի դեմ պայքարի քաղաքական պատասխանատվություն կրող գլխավոր սուբյեկտն է: Թեկնածու Հայկուհի Հարությունյանն էլ, դիմելով իշխանականներին, ասաց. «Կոռուպցիայի կանխարգելման ինստիտուտը Հայաստանի Հանրապետությունում ներդրվել է, այն կայացել է: Եվ դա այն անշրջելի իրողությունն է, որը հետդարձի ճանապարհ չունի: Անկախ ձեր գնահատականներից և ձեր վերաբերմունքից՝ իմ աշխատանքը գնահատվել է: Եվ այդ աշխատանքը ևս խեղաթյուրելու և շրջելի դարձնելու հնարավորություն չկա»: Հայկուհի Հարությունյանը 2019 թվականին նոյեմբերին ԱԺ-ի կողմից ընտրվել էր Կոռուպցիայի կանխարգելման հանձնաժողովի անդամի պաշտոնում, որից հետո հանձնաժողովի կողմից ընտրվել էր հանձնաժողովի նախագահի պաշտոնում, որը զբաղեցրել է մինչև պաշտոնավարման ժամկետի ավարտը՝ այս տարվա նոյեմբերի 19-ը:

15:12 - 07 դեկտեմբերի, 2023

«Հայաստան» խմբակցությունը դեմ է քվեարկելու 2024 թվականի պետական բյուջեի նախագծին

ԱԺ խմբակցություններն այսօր՝ նոյեմբերի 16-ին, իրենց դիրքորոշումներն են հայտնել Հայաստանի 2024 թվականի պետական բյուջեի նախագծի վերաբերյալ։ Ստորեւ՝ ԱԺ հաղորդագրությունը այդ մասին։ «Հայաստան» խմբակցության տեսակետը ներկայացրել է Արթուր Խաչատրյանը: Անդրադառնալով «Խաղաղության խաչմերուկ» ծրագրին՝ նա նշել է, որ տնտեսական նպատակահարմարության որեւէ հաշվարկ ծրագրի հետեւում չկա։ Արթուր Խաչատրյանի հավաստմամբ, «Հայաստան» դաշինքը մանրակրկիտ ուսումնասիրել է Կառավարության կողմից ներկայացված 2024 թվականի նախագիծը: «Առաջարկվող բյուջեն Հայաստանի Հանրապետության առջեւ ծառացած խնդիրների լուծման համարժեք քայլեր եւ միջոցներ չի նախատեսում: Առաջին հերթին դա վերաբերում է անվտանգային մարտահրավերներին: Լեռնային Ղարաբաղի բռնակցման, բնակչության էթնիկ զտման, ՀՀ ինքնիշխան տարածքի շուրջ 250 քառ. կմ տարածքի բռնազավթման պայմաններում, պաշտպանության բյուջեի ընդամենը 7 տոկոս աճը բավարար չէ, մանավանդ հաշվի առնելով 44-օրյա պատերազմի հետեւանքով մեր ռազմական միջոցների նվազումը, թշնամու շարունակական զինումը, զորավարժությունների անցկացումը եւ ագրեսիվ հռետորաբանությունը»,- նշել է պատգամավորը: Նրա խոսքով, անընդունելի է նաեւ «Ռազմարդյունաբերական համալիրի զարգացում» ծրագրի ֆինանսավորման 2023 թվականի համեմատ 1 միլիարդ դրամից ավելի նվազեցումը: Անդրադարձ է եղել նաեւ Կառավարության բարեփոխումների ծրագրին: Ըստ Արթուր Խաչատրյանի՝ որեւէ էական բարեփոխում չի առաջարկվում: Պատգամավորը տեղեկացրել է, որ «Հայաստան» խմբակցությունը դեմ է քվեարկելու 2024 թվականի պետական բյուջեի նախագծին: ՀՀ ԱԺ «Քաղաքացիական պայմանագիր» խմբակցության ղեկավար Հայկ Կոնջորյանն իր ելույթում որոշ քաղաքական հանգամանքների է անդրադարձել, խոսել ընդդիմության որոշ դիտարկումների վերաբերյալ: Խմբակցության ղեկավարի գնահատմամբ, Հայաստանի Հանրապետության եւ հայ ժողովրդի երկարաժամկետ բարեկեցության գրավականն ազատության եւ խաղաղության միաժամանակյա գոյությունն է: Պատմությունը վկայակոչելով՝ նա փաստել է, որ այս տարածքում, այս հողակտորի վրա Հայաստանը, հայ ժողովուրդը երբեք միաժամանակ չեն ունեցել ազատություն եւ խաղաղություն: «Մենք ստացել ենք ազատություն եւ գնում ենք խաղաղության ճանապարհով: Հենց այդ երկուսն ունենանք, այդ ժամանակ փլվելու է այն հայեցակարգը, այն նարատիվը, որի վրա, ցավոք, կառուցված է նաեւ մեր ընդդիմության գաղափարաբանությունը»,- նման կարծիք է հայտնել Հայկ Կոնջորյանը ու խոսել «Խաղաղության խաչմերուկ» նախագծի վերաբերյալ ընդդիմության քննադատությունների մասին։ «Ի՞նչ է ստացվել. տասնամյակներ շարունակ քաղաքական ուժերը զոհաբերել են ազատությունը, որ ստանան անվտանգություն եւ արդյունքում զրկվել են ե՛ւ ազատությունից, ե՛ւ անվտանգությունից: Ազատություն եւ խաղաղություն. երբ կարողանանք այս երկուսը համադրել, այդ ժամանակ գոհ կլինենք, կհամարենք, որ մենք ինքնիշխան պետություն ենք, եւ մենք ենք մեր ճակատագրի, մեր տարածաշրջանի, մեր աշխարհագրական դիրքի նկատմամբ բովանդակություն ձեւավորողն ու մեր աշխարհագրության գերին չենք: Երկար ժամանակ դա է եղել նարատիվը, որ մենք չունենք ծով, ունենք լեռներ, ունենք անբարենպաստ հարեւաններ, դրա համար մենք դատապարտված ենք փրկվելու, իսկ փրկիչներ միշտ պատրաստակամ են եղել հայտնվելու»,- ընդգծել է խմբակցության ղեկավարը: Ըստ նրա՝ այդ հայեցակարգն ու փրկչի նարատիվը փլվում է: Հայկ Կոնջորյանի գնահատմամբ չկա տնտեսական զարգացում առանց տնտեսական ազատությունների եւ չկան տնտեսական ազատություններ առանց քաղաքական ազատությունների: Սա հիմնաքարային աքսիոմա է: Նա տեղեկացրել է, որ բյուջեի նախագիծն արտահայտում է իրենց քաղաքական առաջնահերթությունները, ուստի «Քաղաքացիական պայմանագիր» խմբակցությունը կողմ է փաստաթղթին:

16:21 - 16 նոյեմբերի, 2023