Վահագն Ալեքսանյան

Վահագն Ալեքսանյանն 8-րդ գումարման խորհրդարանի «Քաղաքացիական պայմանագիր» խմբակցության պատգամավոր է։

Ծնվել է 1993-ին։ 2014-2016թթ. ծառայել է ՀՀ զինված ուժերում: 2019-ին ավարտել է ԵՊՀ արրելագիտության ֆակուլտետը, 2019-ին ընդունվել է Հայ-ռուսական համալսարանի «Սահմանադրական իրավունք, պետության եւ իրավունքի տեսություն» բաժնի մագիստրատուրան:

Մասնակցել է Հորդանանի պետական համալսարանի արաբերենի ուսուցման դասընթացին, «Արևելյան գործընկերություն. առկա իրավիճակ և հնարավոր հեռանկարներ» ամառային դպրոցի դասընթացին։

2019-2021թթ. եղել է «Քաղաքացիական պայմանագիր» կուսակցության հանրային կապերի համակարգող:

06.04.2021-02.08.2021թթ. եղել է ԱԺ «Իմ քայլը» խմբակցության պատգամավոր։

2021թ. հունիսի 20-ին ԱԺ պատգամավոր է ընտրվել «Քաղաքացիական պայմանագիր» կուսակցության համապետական ընտրական ցուցակով:

Հովիկ Աղազարյանի մասով կա հարուցված կարգապահական վարույթ, որը կունենա հետևանք. ՔՊ-ական պատգամավոր |tert.am|

tert.am: Դուք գիտեք, որ «Քաղաքացիական պայմանագիր» կուսակցության վարչությունում հարուցված կարգապահական վարույթ կա այս հարցի վերաբերյալ, որը դեռ ծագել էր խորհրդարանական լսումներից հետո, և այդ վարույթը պիտի քննարկվի, և քննարկման արդյունքում արդեն հետևանքների և որոշումների մասին պատշաճ կերպով կծանուցենք նաև ձեզ: Այս մասին խորհրդարանական ճեպազրույցների ժամին ասաց «Քաղաքացիական պայմանագիր» խմբակցության ղեկավար Հայկ Կոնջորյանը՝ անդրադառնալով ՔՊ-ական պատգամավոր Հովիկ Աղազարյանի՝ մանդատը վայր դնելու մասին լուրերին: Ճշտող հարցին՝ այսինքն չի՞ բացառվում, որ Հովիկ Աղազարյանն ու Նարեկ Զեյնալյանը դնեն իրենց մանդատները, ՔՊ-ական մեկ այլ պատգամավոր՝ Վահագն Ալեքսանյանը պատասխանեց, որ կա հարուցված կարգապահական վարույթ, որը, բնականաբար, կունենա հետևանքներ: «Կարգապահական վարույթի հարուցումն ինքնին նշանակում է, որ կա այդ վարույթը հարուցելու համար առնվազն բավարար հիմք, իսկ թե ինչ հետևանքներ կլինեն, դրա մասին արդեն լրացուցիչ կծանոթանաք»,- ասաց նա: Հիշեցնենք, որ մամուլում շրջանառվում էին լուրեր, որ Հովիկ Աղազարյանը պատրաստվում է վայր դնել պատգամավորական մանդատը։ Վերջինս, սակայն, հերքել էր։ Ըստ լուրերի՝ պատգամավորական մանդատը վայր կդնի նաև «Քաղաքացիական պայմանագիր» խմբակցության պատգամավոր Նարեկ Զեյնալյանը, որը դեռևս չի մեկնաբանել լուրը։ Նշենք, որ ՀՀ կառավարությունում կադրային լուրջ փոփոխություններ են տեղի ունենում։ Այսօր արդեն ազատման դիմում են ներկայացրել ԲԴԽ նախագահ Կարեն Անդրեասյանը և Հակակոռուպցիոն կոմիտեի ղեկավար Սասուն Խաչատրյանը, ՆԳ նախարար Վահե Ղազարյանը, Քննչական կոմիտեի նախագահ Արգիշտի Քյարամյանը։ Հրաժարականների դիմումներին անդրադարձել է վարչապետ Նիկոլ Փաշինյանը՝ նշելով, որ մի շարք բարձրաստիճան պաշտոնյաների խնդրել է թողնել իրենց զբաղեցրած պաշտոնները․ «Նման խնդրանքով դիմելու պատճառները անձնավորված չեն, այլ համակարգային, որոնց մասին հրապարակային խոսել եմ»,- գրել է վարչապետը։ Ընդդիմադիր «Պատիվ ունեմ» խմբակցության պատգամավոր Տիգրան Աբրահամյանըպաշտոնանկությունները դիտարկում է նախընտրական տրամաբանությունների ներքո, իսկ ԱԺ ՔՊ խմբակցության պատգամավորները նշում են, որ պաշտոնանկությունները ուղիղ կերպով վերաբերում են ՀՀ վարչապետի խոսքին և դժգոհություններին:

12:47 - 18 նոյեմբերի, 2024

ՔՊ խմբակցությունում խնդիր չեն տեսնում ԲԴԽ նախագահի հրաժարականի մեջ

ԱԺ «Քաղաքացիական պայմանագիր» խմբակցությունում խնդիր չեն տեսնում ԲԴԽ նախագահի հրաժարականի մեջ: Այդ մասին խորհրդարանական ճեպազրույցի ժամանակ հայտնեցին Հայկ Կոնջորյանն ու Վահագն Ալեքսանյանը: Ճեպազրույցի ժամանակ Factor.am-ի լրագրողի հարցին, թե խնդրահարույց չէ՞, արդյոք չի՞ նշանակում, որ օրենսդիրից ճնշում կա անկախ մարմնի վրա, որ «վարչապետի հայտարարությունից հետո անկախ մարմին համարվող ԲԴԽ նախագահն է ստատուս գրում, որ սկանդալներից հեռու մնալու համար հրաժարական է տալիս», Վահագն Ալեքսանյանը պատասխանեց. «Վարչապետի ելույթը հայեցակարգային էր իր բնույթով, և ես կարծում եմ՝ անկախ մարմինների ղեկավարները իրենք են հետևություններ արել այդ ելույթից՝ հաշվի առնելով այն հանգամանքը, որ այդ ելույթը առնվազն շատ ծանրակշիռ հիմքեր ուներ: Առնվազն նաև տեսանելի էր հանրության շատ լայն շերտերի համաձանությունը վարչապետի այդ ելույթի հետ, և շատ տրամաբանական էր, որ մի շարք պաշտոնյաների պիտի հենց իրենք հետևություն անեին այդ ելույթից»: Կոնջորյանն էլ կարծիք հայտնեց, որ որևէ ճնշման մասին խոսք չկա: «Վարչապետը հստակ և խիստ գնահատականներ է տալիս իրավապահ, դատաիրավական համակարգի վերաբերյալ, և շատ նբորմալ է, որ վարչապետի գնահատականներին պիտի լինեն արձագանքներ: Եվ այս դեպքում արձագանքներ են եղել նաև հրաժարականների տեսքով: Կարծում եմ՝ սա ևս շատ կարևոր գնահատական է»,- հավելեց նա: Հայկ Կոնջորյանի խոսքով ժողովրդավարական երկրներում հրապարակային քաղաքականության մեջ շատ նորմալ է, որ լինեն հայտարարություններ, դրանց լինեն արձագանքներ. «Եվ ես կարծում եմ՝ բոլորս արդեն համոզվել ենք, որ նման հարցերում ճնշումների կոմպոնենտ չկա: կա հակառակը երբեմն հավելյալ ոմանք ասում են չափից ավելի մեծ թափանցիկություն ու հաշվետվողականություն, բայց ես կարծում եմ, որ այն չափից շատ չի լինում: Ամեն ինչ տեղի է ունեցել ձեր աչքի առջև, և որևէ խնդիր չեմ տեսնում»,- եզրափակեց ՔՊ խմբակցության պատգամավորը: Նշենք, որ ՀՀ կառավարությունում կադրային լուրջ փոփոխություններ են տեղի ունենում։ Այսօր արդեն ազատման դիմում են ներկայացրել ԲԴԽ նախագահ Կարեն Անդրեասյանը և Հակակոռուպցիոն կոմիտեի ղեկավար Սասուն Խաչատրյանը, ՆԳ նախարար Վահե Ղազարյանը, Քննչական կոմիտեի նախագահ Արգիշտի Քյարամյանը։ Հրաժարականների դիմումներին անդրադարձել է վարչապետ Նիկոլ Փաշինյանը՝ նշելով, որ մի շարք բարձրաստիճան պաշտոնյաների խնդրել է թողնել իրենց զբաղեցրած պաշտոնները․ «Նման խնդրանքով դիմելու պատճառները անձնավորված չեն, այլ համակարգային, որոնց մասին հրապարակային խոսել եմ»,- գրել է վարչապետը։

12:30 - 18 նոյեմբերի, 2024

Ըստ ՔՊ խմբակցության պատգամավորների՝ պաշտոնանկությունները ուղիղ կերպով վերաբերում են ՀՀ վարչապետի խոսքին և դժգոհություններին

ԱԺ ՔՊ խմբակցության պատգամավորները նշում են, որ պաշտոնանկությունները ուղիղ կերպով վերաբերում են ՀՀ վարչապետի խոսքին և դժգոհություններին: «Այն, որ դուք դրա մասին իմասցել ու գրել եք գիշերը, չի նշանակում, որ պրոցեսները տեղի են ունեցել գիշերը: Վարչապետի ելույթը տեղի է ունեցել ուրբաթ Կառավարության նիստում, և այդ ելույթն ինքնին իրենից ենթադրում էր, որ պետք է ունենա հետևանքներ»,- խորհրդարանական ճեպազրույցի ժամանակ ասաց պատգամավոր Վահագն Ալեքսանյանը: ՔՊ խմբակցության ղեկավար Հայկ Կոնջորյանն էլ նշեց, որ ՀՀ-ում դատաիրավական համակարգի վերաբերյալ դիտարկումները թե՛ վարչապետի, թե՛ իշխող ուժի կողմից, նոր չեն: «Մարդիկ ունեն արդարության պահանջ, և մենք չափազանց կարևորում ենք, որ այդ պահանջը էմոցիոնալից դառնա իսնտիտուցիոնալ իրողություն: Այս իմաստով կան արված գործեր, բայց կան նաև բացթողումներ և չարված գործեր: Վարչապետը շատ հստակ այդ մասին խոսեց: Սա այդ պրոցեսի տրամաբանական շարունակությունն է: Սրան պետք է նայել համակարգային ու կադրային տեսանկյունից, այլ ոչ ներքաղաքական ու նախընտրական: Չկա նման բան»,- հայտնեց Հայկ Կոնջորյանը՝ մեկնաբանելով Տիգրան Աբրահամյանի հայտարարությունը: Վերջինս ճեպազրույցի ժամանակ հայտնել էր, որ պաշտոնանկությունները դիտարկում է նախընտրական տրամաբանությունների ներքո։ Նշենք, որ ՀՀ կառավարությունում կադրային լուրջ փոփոխություններ են տեղի ունենում։ Այսօր արդեն ազատման դիմում են ներկայացրել ԲԴԽ նախագահ Կարեն Անդրեասյանը և Հակակոռուպցիոն կոմիտեի ղեկավար Սասուն Խաչատրյանը, ՆԳ նախարար Վահե Ղազարյանը, Քննչական կոմիտեի նախագահ Արգիշտի Քյարամյանը։ Հրաժարականների դիմումներին անդրադարձել է վարչապետ Նիկոլ Փաշինյանը՝ նշելով, որ մի շարք բարձրաստիճան պաշտոնյաների խնդրել է թողնել իրենց զբաղեցրած պաշտոնները․ «Նման խնդրանքով դիմելու պատճառները անձնավորված չեն, այլ համակարգային, որոնց մասին հրապարակային խոսել եմ»,- գրել է վարչապետը։

12:11 - 18 նոյեմբերի, 2024

Վահագն Խաչատուրյանը դասախոսություն է կարդացել Վազգեն Սարգսյանի անվան ռազմական ակադեմիայի կուրսանտների համար

«Առաջնորդության դպրոց» հիմնադրամի տնօրեն Սամվել Մովսիսյանի, Վազգեն Սարգսյանի անվան ռազմական ակադեմիայի պետ Արսեն Մանգասարյանի և դասախոս Արկադիկ Թովմասյանի ուղեկցությամբ Ռազմական ակադեմիայի մի խումբ կուրսանտներ այցելել են նախագահական նստավայր և հանդիպել նախագահ Վահագն Խաչատուրյանի հետ: Հանրապետության նախագահը հանդիպման ընթացքում դասախոսություն է կարդացել կուրսանտների համար՝ հիմնադրամի և ակադեմիայի կողմից համատեղ իրականացվող ծրագրի շրջանակներում: Դասախոսության ընթացքում նախագահն անդրադարձել է պետության կառույցում զինված ուժերի և բարձրագույն ռազմական կրթության առանձնահատուկ դերակատարությանը, խոսել բանակային բարեփոխումների հիմնադրույթների կարևորության մասին: Իր խոսքում նախագահը բարձր է գնահատել հայկական զինված ուժերի զարգացման գործում Ռազմական ակադեմիայի հիմնադրումը, որը կարևոր քայլ էր բանակի սպայական անձնակազմի համալրման և կադրային ապահովման համար: Դասախոսության ավարտին անմիջական մթնոլորտում Հանրապետության նախագահը պատասխանել է կուրսանտների տարաբնույթ հարցերին, ինչպես նաև պատրաստակամություն է հայտնել հնարավորության սահմաններում աջակցել Ռազմական ակադեմիայի կրթական ծրագրերին:

18:28 - 08 նոյեմբերի, 2024

Հասմիկ Հակոբյանը և Վահագն Ալեքսանյանը Կատարի գործընկերներին են ներկայացրել Ադրբեջանի հետ խաղաղության պայմանագրի շուրջ բանակցությունների ընթացքը

Միջխորհրդարանական միության երիտասարդ խորհրդարանականների 10-րդ գլոբալ համաժողովի շրջանակում կառույցում ՀՀ ԱԺ պատվիրակության անդամ, Միջխորհրդարանական միության երիտասարդ խորհրդարանականների ֆորումի խորհրդի անդամ Հասմիկ Հակոբյանը և ԱԺ պատգամավոր Վահագն Ալեքսանյանը սեպտեմբերի 13-ին հանդիպել են Կատարի Պետության պատվիրակության անդամ Ալ Մանայի հետ: Այդ մասին հայտնում են ՀՀ ԱԺ-ից: Հանդիպման ընթացքում կարևորվել է երկկողմ հարաբերությունների զարգացման դինամիկան: Հայ պատվիրակները կատարցի գործընկերներին ներկայացրել են տարածաշրջանային զարգացումները և Ադրբեջանի հետ խաղաղության պայմանագրի շուրջ բանակցությունների ընթացքը: Պատվիրակության ղեկավար Ալ Մանայն իր աջակցությունն է հայտնել տարածաշրջանային խաղաղության հաստատմանն ուղղված Հայաստանի ջանքերին: Երկու պետությունների խորհրդարանների միջև համագործակցության հուշագրի ստորագրման ընթացքն ինտենսիվացնելու պայմանավորվածություն է ձեռք բերվել:

14:50 - 13 սեպտեմբերի, 2024

Վահագն Ալեքսանյանը սուտ մատնության հատկանիշներով հաղորդում է ներկայացրել դատախազություն

ՀՀ ԱԺ պատգամավոր Վահագն Ալեքսանյանը սուտ մատնության հատկանիշներով հաղորդում եմ ներկայացրել դատախազություն։ Այս մասին տեղեկանում ենք իր ֆեյսբուքյան էջից։ 《Ընդդիմադիր շարժման պաշտոնական էջով և մամուլով տարածվում է «Նիկոլ Փաշինյանի թիմն այս պահին զբաղված է փոքր ջոկատներ կազմելով» վերնագրով նյութ։ Սրա հետ կապված սուտ մատնության հատկանիշներով հաղորդում եմ ներկայացրել դատախազություն։ Պահանջում եմ, որպեսզի դատախազությունը ստուգի գրառման իսկությունը և եթե հայտնաբերվեն «ապօրինի փոքր ջոկատներ», ապա թող պատասխանատվության ենթարկվեն դրանք կազմողներն ու մասնակիցները, իսկ եթե չհայտնաբերվեն, ապա թող այս կեղծիքը տարածողները ենթարկվեն պատասխանատվության՝ սուտ մատնության համար》։

17:28 - 25 մայիսի, 2024

«Ռոբերտ Քոչարյանի հերթական շարժման հետ բանակցություններ լավ չեմ պատկերացնում». Վահագն Ալեքսանյան

Հանրապետության ղեկավարը մշտական երկխոսության մեջ է ՀՀ ժողովրդի հետ, բայց թե Ռոբերտ Քոչարյանի հերթական շարժման հետ երկխոսության գնալը ինչ իմաստ ունի՝ մեծ հաշվով լավ չեմ հասկանում։ Իմ տպավորությամբ, «Հայրենիքի փրկության շարժման», «Դիմադրության» շարժման նույն անձնակազմը, ինչքան հասկացա նաև նույն քանակով իրագործում են իրենց սահմանադրական իրավունքը, շատ լավ։ Մի քանի անգամ շարժում են արել, հիմա էլ էլի նույն մարդկանցով երրորդ կամ չորրորդ անգամ շարժում են անում․ իրենց սահմանադրական իրավունքն է։ Այն հարցին, թե արդյոք վարչապետը չի գնա Բագրատ Սրբազանի հետ երկխոսության, Ալեքսանյանը պատասխանեց, որ իրավասու չէ վարչապետի անունից հայտարարություններ անել, սակայն շեշտեց, որ նման երևույթ՝ ինչպիսին Ռոբերտ Քոչարյանի հերթական շարժման հետ բանակցություններն է, լավ չի պատկերացնում։ Հրապարակում հնչած այն կարծիքին, որ Փաշինյանը ձախողել է 2021 թվականի նախընտրական խոստումները, և հիմա Կիրանցի և հարակից գյուղերի բնակիչներին պատերազմի սպառնալիքի տակ ստիպում է գնալ սահմանազատման, Ալեքսանյանն արձագանքեց․ «Նախ կհորդորեմ, որ Բագրատ Գալստանյանը խոսի միայն իր հովանավորների՝ Ռոբերտ Քոչարյանի, Սերժ Սարգսյանի կամ այլ գործիչների անունից, այլ ոչ թե Հայաստանի տարբեր գյուղերի բնակիչների։ Եվ երկրորդն էլ, եթե պարոն Գալստանյանը ուզում է տեսնել ձախողում բառի վառ արտահայտումը, ապա կարող է նայել իր հովանավորների դեմքին»։

19:37 - 09 մայիսի, 2024

Այդ երազանքն ուղղակի ներդրված է, որպեսզի դու երբեք չունենաս ինքնիշխանություն. իշխանական պատգամավորը՝ Արցախի մասին |news.am|

news.am: Երբ խոսում ենք պատմական արդարությունից, նախ պետք է հասկանանք, թե դա ինչ է նշանակում: Այս մասին այսօր՝ փետրվարի 2-ին, ԱԺ-ում լրագրողների հետ զրույցում նշեց ՔՊ-ական պատգամավոր Վահագն Ալեքսանյանը: «Երբ խոսում ենք պատմական արդարությունից եւ դրա տակ դնում ենք տարածքային պահանջներ մեր հարեւաններից, այնպես չէ, որ միայն այդ երկու հարեւաններն են, որ պատմական արդարությանը վատ աչքով են նայում: Երբ խոսում ենք վանա լճից, ինչի՞ չենք խոսում Ուրմիա լճից: Իսկ ո՞վ ասաց, որ տարածքային պահանջները պետք է բավարարել միայն վանա լճի մասով եւ չներառել, օրինակ, Ուրմիա լիճը: Եվ արդյոք այդ տեսանկյունից տրամաբանական է, որ 3 մլն բնակչություն ունեցող Հայաստանը տարածքային պահանջներ ունենա պատմական արդարության տեսանկյունից իր բոլոր հարեւաններից: Արդյոք դա տրամաբանական ու ողջամիտ է»,-ասաց նա: Հարցին՝ եթե Հայաստանն ընդունի նոր Սահմանադրություն, որտեղ չի լինի հղում Անկախության հռչակագրին, արդյոք դրանով թուրք-ադրբեջանական տանդեմի ախորժակը փակվելու է, Ալեքսանյանը պատասխանեց. «Երբ մենք խոսում ենք նոր Սահմանադրությունից, պետք է հասկանանք, որ այդ խոսակցությունը նախեւառաջ ինքներս մեզ հետ պետք է ունենանք: Դրանից հետո նոր անդրադառանք Թուրքիային, Ադրբեջանին, Իրանին ու Վրաստանին: Արդյոք էդ կոդով առաջ գնալը հայաստանին լավ տեղ է տանելու: Այն, ինչ մեզ հետ տեղի ունեցավ վերջին շրջանում, ապացուցում է, որ ոչ»: Դիտարկմանը, որ շատ երկրներ են պարտություն կրում, բայց չեն կորցնում իրենց կորցրած հայրենիքը վերականգնելու երազանքը, զինվում են եւ հետագայում հետ են բերում կորցրածը, Վահագն Ալեքսանյանն ասաց. «Շատ լավ բան է երազանքով առաջնորդվելը, մինչև այն պահը, երբ պարզվում է, որ այդ երազանքն ուղղակի ներդրված է, որպեսզի դու երբեք չունենաս ինքնիշխանություն: Ես ասում եմ, որ մեր սերունդը և մենք պետք է ունենանք ամենակարևոր երազանքը։ Դա ինքնիշխան Հայաստանի Հանրապետությունն է և ոչ թե գնանք այն ճանապարհով, որը տարիներ առաջ գրվել է մեզ համար, դրվել է մեր տակ, որպեսզի ինչ-որ մի պահի մենք կորցնենք մեր ինքնիշխանությունը՝ գնալով մի բանի հետևից, որին փաստացի հասնել չենք կարող: Լավ, պատկերացնենք, որ ինչ-որ մի պահի լինում է այնպես, որ ռազմական բալանսը հօգուտ մեզ է խախտվում՝ է հետո՞: Հետո էլ Ադրբեջանն է նորից հզորանում, ունենում է միջազգային լեգիտիմությունը, նորից է հարձակվում և հետ նվաճում։ Դուք հասկանո՞ւմ եք, որ աշխարհի ոչ մի պետություն չի ճանաչել Լեռնային Ղարաբաղն անկախ Հայաստանի մաս»,-ավելացրեց նա։

15:20 - 02 փետրվարի, 2024

Ալեն Սիմոնյանի հետ մեր թիմը ոչ մի խնդիր չունի, իսկ երեկ չենք հանդիպել նրան. Վահագն Ալեքսանյան |news.am|

news.am: Ես միայն կարող եմ ասել, որ Հայաստանում ոչ մի պարագայում կոռուպցիան տեղ չունի. ես ինքս ինձ համարում եմ կոռուպցիայի դեմ պայքարի առաջամարտիկներից: Այս մասին այսօր՝ փետրվարի 2-ին, ԱԺ-ում լրագրողների հետ զրույցում նշեց ԱԺ ՔՊ խմբակցության պատգամավոր Վահագն Ալեքսանյանը՝ անդրադառնալով էկոնոմիկայի նախարարությունում աղմկահարույց զարգացումներին եւ կալանավորումներին: «Պետք է սպասել, որպեսզի համապատասխան մարմինները տան իրենց եզրակացությունը, նախ քննչական մարմինները, հետո դատարանները, հետո անել եզրակացություններ»,-ասաց նա: Հարցին՝ ինչո՞վ է բացատրում այն, որ էկոնոմիկայի նախկին փոխնախարար Անի Իսպիրյանին տնային կալանք տվեցին, իսկ Ալեն Սիմոնյանի եեղբոր կնոջը, որ երկու անչափահաս երեխաների մայր է, կալանավրեցին, ՔՊ-ական պատգամավորը պատասխանեց. «Այդ հարցով թույլ տվեք չմեկնաբանել, որովհետեւ ինչպես դատարանի այլ որոշումները չեմ կարող մեկնաբանել, օրինակ, մի շարք ընդդիմադիր գործիչների մասին, թե ինչու մեկին կալանք, մյուսին ոչ կալանք, նույնն էլ այս պարագայում է, ես չեմ կարող եւ իրավասու էլ չեմ մեկնաբանել»: Դիտարկմանը, որ հնարավոր է Ալեն Սիմոնյանը հեռանա ՔՊ-ի քաղաքական թիմից, նաեւ ԱԺ նախագահի պաշտոնից, Վահագն Ալեքսանյանն ասաց. «Ալեն Սիմոնյանը ՔՊ վարչության անդամ է, ՀՀ ԱԺ նախագահն է, մեր թիմակիցն է, եւ մեր թիմը իր հետ ոչ մի խնդիր չունի: Երեկ չենք հանդիպել, բայց ձեր ասածը, թե թիմն իր հետ խնդիր ունի, բացարձակապես չի համապատասխանում իրականությանը»։ Ինչ վերաբերում է տեսակետին, որ իշխանությունն ըստ էության, չի խնայել Ալեն Սիմոնյանին, որով մեսիջ են ուղարկում իշխող ուժի մնացած անդամներին, ՔՊ-ական պատգամավորն արձագանքեց. «Ի՞նչ է նշանակում՝ չեն խնայել Ալեն Սիմոնյանին: Ես չեմ պատրաստվում մեկնաբանել դատարանի որոշումները: Եթե իրավապահների գործում անօրինական ինչ-որ բան կա, դա միանշանակ ինչ-որ կերպ կբացահայտվի»: Հիշեցնենք, որ էկոնոմիկայի նախարարությունում երկու օր առաջ 7 անձ է ձերբակալվել, այդ թվում մեկ օր առաջ էկոնոմիկայի փոխնախարարի պաշտոնից ազատված Անի Իսպիրյանը: Ձերբակալվել է նաեւ ԱԺ նախագահ Ալեն Սիմոնյանի եղբոր կինը՝ Անի Գեւորգյանը: Էկոնոմիկայի նախարարությունում ձերբակալություններից հետո ձերբակալվել են նաև IT ամենահայտնի կազմակերպություններից մեկի` «Սիներջիի» մի խումբ աշխատակիցներ։ Ավելի ուշ հայտնի դարձավ, որ Աշոտ Հովհաննիսյանը եւ Ալեն Սիմոնյանի եղբոր կինը՝ Անի Գեւորգյանը կալանավորվել են: Իսկ էկոնոմիկայի փոխնախարար Անի Իսպիրյանի նկատմամբ կիրառվել է տնային կալանք:

14:54 - 02 փետրվարի, 2024

Գյումրիում այսօր տեղի է ունեցել ՔՊ 3-րդ քաղաքական ժողովը

Գյումրի քաղաքում դեկտեմբերի 16-ին տեղի է ունեցել «Քաղաքացիական պայմանագիր» կուսակցության 3-րդ քաղաքական ժողովը: Այդ մասին տեղեկացվում է «Քաղաքացիական պայմանագիր» կուսակցության Ֆեյսբուքի էջում: «Քննարկվել են Հայաստանում կոռուպցիայի դեմ պայքարի արդյունավետության բարձրացմանը և Հայաստանի Հանրապետության Կառավարության արտաքին քաղաքական տեսլականին առնչվող հարցեր։ Կուսակցության վարչության նախագահի տեղակալ Վահագն Ալեքսանյանը և ՀՀ արտաքին գործերի նախարար Արարատ Միրզոյանը հանդես են եկել զեկույցներով և պատասխանել քաղաքական ժողովի մասնակիցների հարցերին։ Կուսակցության վարչության նախագահ, ՀՀ վարչապետ Նիկոլ Փաշինյանը հանդես է եկել ելույթով»,- նշված է գրառման մեջ։

20:12 - 16 դեկտեմբերի, 2023

ՆԱՏՕ ԽՎ-ում ՀՀ ԱԺ պատվիրակությունը Բելգիայի ներկայացուցիչների հետ քննարկել է ԼՂ-ից բռնի տեղահանվածների կարիքների հետ կապված հարցեր

ՆԱՏՕ ԽՎ-ի շրջանակներում հանդիպում ունեցանք Բելգիայի պատվիրակության անդամների հետ։ Այդ մասին ասված է ՀՀ ԱԺ «Քաղաքացիական պայմանագիր» խմբակցության պատգամավոր Վահագն Ալեքսանյանի Ֆեյսբուքի էջում: «Քննարկեցինք ԼՂ-ից բռնի տեղահանված քաղաքացիների կարիքների հետ կապված հարցեր։ Ընդգծեցինք Հարավային Կովկասում երկարաժամկետ և կայուն խաղաղության հաստատման անհրաժեշտությունը և դրանում ԵՄ-ի և անդամ պետությունների դերի կարևորությունը»,- նշված է գրառման մեջ:

10:57 - 09 հոկտեմբերի, 2023

Ազգակործանն էլ եք, կապիտուլյանտն էլ եք, հողատուն էլ եք․ Վահագն Ալեքսանյանն՝ ընդդիմությանը |tert.am|

tert.am: Ո՞ւմ եք ազգակործան անվանում, ազգակործան, որ ասում եք, ձեր հայացքը ճիշտ ուղղությամբ տարեք։ Կարո՞ղ է գիտեք չենք հիշում, թե ինչ էյֆորիայի մեջ եք, ոնց էիք տոնում, որ Արցախում իշխանազավթում իրականացրեցիք։ Այս մասին ԱԺ-ում ի պատասխան «Հայաստան» խմբակցության քարտուղար Արծվի Մինասյանի հայտարարության՝ արձագանքեց «Քաղաքացիական պայմանագիր» խմբակցության պատգամավոր Վահագն Ալեքսանյանը։ «Չե՞ք հիշում, որ ասում էիք՝ այսուհետև ԼՂ-ում հայրենասերների իշխանություն է, էդ ո՞ր հայրենասերների իշխանությունն չէ, որ ԼՂ-ի լուծարման հրամանագիր են ստորագրում։ Մեր պատմության ընթացքում ինչքան կապիտուլացիա կա Ձեր վրա է, պարո՛ն Մինասյան, ձեր խմբակի վրա։ Նոյեմբերի 9-ի փաստաթուղթը կապիտուլյացիա անվանելով ման էիք գալիս, գոռգոռում էիք պատերի տակ, գնացիք աշխարհի ամենաուղղիղ կապիտուլյացիան ստորագրեցիք, ձեր քաղաքական խմբակը ստորագրեց։ Տո՛ ազգակործանն էլ եք, տո՛ կապիտուլյանտն էլ եք, տո՛ հողատուն էլ եք»,- հայտարարեց իշխանական պատգամավոր։ Տեղից «Հայաստան» խմբակցության պատգամավորները հարցրեցին՝ «Բա դուք, ի՞նչ եք»։ Վահագն Ալեքսանյանն էլ պատասխանեց, որ ԱԺ պատգամավոր է։ «Եվ ոչ երբեք օտարերկրյա գործակալ ի տարբերություն շատերի»,- եզրափակաեց նա։

10:50 - 03 հոկտեմբերի, 2023

Եթե Վարդան Օսկանյանը հասկանար բառի արժեքը դիվանագիտության մեջ, Մեղրիի շրջանը սակարկության առարկա չէր դարձնի. Վահագն Ալեքսանյան |tert.am|

tert.am: «Քաղաքացիական պայմագիր» կուսակցության Վարչության փոխնախագահ Վահագն Ալեքսանյանը իր ֆեյսբուքյան էջում արձագանքել է նախկին արտգործնախարար Վարդան Օսկանյանի երեկվա ուղերձին. «Եթե Վարդան Օսկանյանը հասկանար բառի արժեքը դիվանագիտության մեջ՝ 1. Հայաստանի Հանրապետության ինքնիշխան տարածքը՝ Մեղրիի շրջանը, սակարկության առարկա չէր դարձնի: 2. 1996 թվականի Լիսաբոնի գագաթաժողովում չէր հասնի նրան, որ միջազգային հանրությունն արձանագրի, որ ինքնորոշման իրավունքը ԼՂ համար նշանակում է ինքնավարություն Ադրբեջանի կազմում: 3. 1999թ. ԵԱՀԿ ստամբուլյան գագաթաժողովում Եվրոպայում անվտանգության խարտիային կողմ չէր քվեարկի, որով բացառվեց ԼՂ կարգավիճակը Ադրբեջանի կազմից դուրս: 4. Լեռնային Ղարաբաղը բանակցային գործընթացից դուրս չէր թողնի: 5. Լեռնային Ղարաբաղի կարգավիճակի որոշման հարցում Ադրբեջանին վետոյի իրավունք չէր շնորհի (Մադրիդյան սկզբունքներով): 6. Լեռնային Ղարաբաղի՝ 1991 թվականի դեկտեմբերի 10-ի անկախության հանրաքվեն քաղաքականապես չէր զրոյացնի փաստացի այն հիմնավորմամբ, որ ԼՂ ադրբեջանցիները դրան չեն մասնակցել (Մադրիդյան սկզբունքներով): 7. Հայկական ԽՍՀ Գերագույն խորհրդի և ԼՂԻՄ Ազգային խորհրդի 1989 թվականի դեկտեմբերի 1-ի համատեղ որոշումը Հայաստանի և Լեռնային Ղարաբաղի վերամիավորման մասին քաղաքականապես չէր զրոյացնի (Մադրիդյան սկզբունքներով): 8. Առանց բանակցություններում արդյունք ստանալու 7 շրջանները օկուպացված տարածք չէր անվանի եւ այսպիսով Հայաստանին օկուպանտի պիտակ չէր կպցնի (2001 թվականի մայիսի 8-ին «Ա1+»-ի եթերում)»:

11:31 - 11 հուլիսի, 2023

Վահագն Ալեքսանյանը՝ բանակցային գործընթացի փուլերի մասին |1lurer.am|

1lurer.am: ԱԺ «Քաղաքացիական պայմանագիր» խմբակցության պատգամավոր Վահագն Ալեքսանյանն ԱԺ-ում անդրադարձավ բանակցային գործընթացի բոլոր փուլերին՝ սկսած 1991 թվականից: «Կար Գերագույն խորհուրդների որոշում միավորման մասին: Կա՞ր. կար: Շատ լավ: Այդ որոշումից հետո Արցախն անում է Անկախության հանրաքվե, ինչը տրամաբանորեն հակասում է նախորդ որոշմանը, որովհետև նախորդիվ արդեն վերամիավորվել էին»,- հիշեցրեց Ալեքսանյանը: «1997թ․-ին պատերազմում հաղթած Հայաստանին առաջարկում են փաթեթային լուծման տարբերակ, որով Արցախը պետք է լիներ Ադրբեջանի կազմում: Լևոն Տեր-Պետորսյանը հրաժարվում է այդ տարբերակից: 1998թ․-ին առաջարկվում է փուլային լուծում՝ տարածքների վերադարձ, Արցախի կարգավիճակի հարցը՝ ապագային: Սա որպես պատրվակ օգտագործելով՝ Հայաստանում տեղի է ունենում հեղաշրջում: Հեղաշրջման եկած զույգը՝ Քոչարյանն ու Սարգսյանը, ասում են. «Չէ, սա մեզ համար անընդունելի է, պետք է տարածքները տանք միայն անկախության դիմաց»: Շատ Լավ: Բայց գալիս են, ու 99-ին Ռոբերտ Քոչարյանը սկսում է քննարկել ընդհանուր պետության մոդելի շուրջ: Ի՞նչ է նշանակում ընդհանուր պետություն, որ Արցախն ու Ադրբեջանը դառնում են ընդհանուր պետություն»,- ասաց Ալեքսանյանը: Պատգամավորը նաև հիշեցրեց, որ դրան է հաջորդել 2001-ի Քի Վեսթը, որի շրջանակում որոշվել է «Ղարաբաղը մեզ տվեք, մենք էլ ձեզ Մեղրին տանք»: «2007-ին Մադրիդյան սկզբունքներով խոսում են, որ պետք է լինի և՛ տարածքային ամբողջականության սկզբունքը, և՛ ինքնորոշման իրավունքը: Բայց ինքնորոշման իրավունքի հետ կապված կա մի բայց, որ Արցախում անցկացվելիք հանրաքվեն ցանկացած պարագայում պետք է համաձայնեցված լինի Ադրբեջանի հետ: Այսինքն՝ մինչև Ադրբեջանը չասի՝ այսինչ օրը անցկացրեք հանրաքվե, այդ հանրաքվեն անցկացվել չի կարող: Բայց սա ներկայացվել է շատ դրական լուծում տարիներ շարունակ»,- ասաց իշխանական պատգամավորը: Ըստ Վահագն Ալեքսանյանի՝ միայն 2011-ին Կազանում ստորագրված փաստաթուղթն է, որ խնդրի լուծման ամենալավ տարբերակն է. «Բայց խնդիրը գիտե՞ք որն է Կազանի. որ Ալիևը դրան էլ համաձայն չէր»: Ալեքսանյանը նաև հիշեցրեց, որ հետո եղել են 1-2 տարբերակներ, ապա 2016-ին՝ Լավրովյան պլանը, որից սկզբում Հայաստանը հրաժարվել է, ապա տեղի է ունեցել Ապրիլյան պատերազմը, որից հետո փաստաթուղթն ընդունվել է որպես բանակցային պրոցեսի հիմք: «Բայց այս ամբողջ բանակցային պրոցեսում Անկախության հանրաքվեն չկա»,- ընդգծեց պատգամավորը:

12:52 - 25 մայիսի, 2023

Խաղաղության պայմանագիրը վաղուց ստորագրված կլիներ, եթե Ադրբեջանը ՀՀ-ի՝ 3 սկզբունքային հարցերին մոտ դիրքորոշում ունենար. Խանդանյան

Մայիսի 4-ին ԱԺ-ում տեղի ունեցած խորհրդարանական ճեպազրույցների ժամանակ «Քաղաքացիական պայմանագիր» խմբակցության պատգամավոր Վահագն Ալեքսանյանն անդրադարձել է նախօրեին նախկին ոստիկանապետի՝ լրագրողների հասցեին հնչեցրած սեռական բնույթի հայհոյանքներին ու խստորեն դատապարտել նման վերաբերմունքը: Սարգիս Խանդանյանն էլ շնորհավորել է լրագրողներին երեկվա՝ Մամուլի ազատության օրվա առթիվ ու հայտնել, որ «Լրագրողներ առանց սահմանների» կազմակերպության 2023 թվականի զեկույցի համաձայն՝ Հայաստանի դիրքերը նորից բարելավվել են մամուլի ազատության տեսանկյունից: Այդ մասին հայտնում են Ազգային ժողովի լրատվական ծառայությունից: Լրագրողի հարցադրմանը, թե հնարավոր է՝ Նիկոլ Փաշինյանն անընդունելի պարամետրերով խաղաղության պայմանագիր կնքի Ադրբեջանի հետ, խմբակցության պատգամավոր Վահագն Ալեքսանյանը վստահեցրել է՝ ոչ: «Վարչապետն ասել է, որ Ադրբեջանի կողմից խաղաղության պայմանագիր կնքելու համար հնարավոր է՝ անընդունելի պայմաններ առաջարկվեն, բայց պետք է անել այնպես, որ դրանք ընդունելի լինեն»,- ասել է պատգամավորը: Քննարկվել է նաև Հնդկաստանից զենքի գնման ու մատակարարման հարցը: Լրագրողը նկատել է՝ իշխանական նախկին պատգամավոր Գայանե Աբրահամյանը հայտնել է՝ ՌԴ-ն խոչընդոտում է, որ ՀՀ-ն Հնդկաստանից գնված զինամթերքը ՀՀ տեղափոխի, ինչին ի պատասխան՝ Վահագն Ալեքսանյանը տեղեկացրել է, որ նման թեմայից տեղյակ չէ, ու հորդորել զենքի գնման ու տեղափոխման թեմաների մասով հանրային քննարկումներ չծավալել: Անդրադարձ է կատարվել նաև Արցախի հարցին: Արցախի ժողովրդի անվտանգության ու ինքնորոշման իրավունքի հարցերը քննարկվո՞ւմ են Վաշինգտոնում, տեղացիները հետաքրքրվում են՝ Արցախն Ադրբեջանի կազմում լինելո՞ւ է, թե՝ ոչ հարցին պատասխանելով՝ Սարգիս Խանդանյանը նշել է. «Հայաստանի բանակցողները բոլոր հարթակներում խոսում ու բանակցում են ԼՂ հայության իրավունքների ու անվտանգության ապահովման հասցեագրման թեմաների շուրջ: Բանակցությունների բովանդակության ու նրբերանգների մասին տեղեկացվում են նաև ԼՂ իշխանությունները: 4 ամիս է՝ ԼՂ-ն շրջափակված է, տեղացիների հումանիտար խնդիրներն օր առաջ պետք է լուծվեն: Պատասխանատուները, որոնք պետք է ԼՂ հայության իրավունքների պաշտպանությունն ապահովեն, պետք է ավելի գործուն քայլեր ձեռնարկեն: 30 տարուց ավելի է՝ ԼՂ հայությունը դժվար կացության մեջ է: Ակնկալում ենք, որ այս հակամարտությունն ու խնդիրն օր առաջ կլուծվի»: Պատգամավորն անդրադարձել է նաև ամերիկացի պաշտոնյայի գրառմանը, որում ասվում է՝ առաջընթաց կա Հայաստան-Ադրբեջան բանակցություններում: «Ամերիկյան բանակցություններն այսօր ավարտվելու են: Բանակցությունների բովանդակության վերաբերյալ շատ ասելիք չունեմ: Բանակցողները կվերադառնան ու հավանաբար կխոսեն առաջընթացի մասին: Երեկվա եռակողմ հանդիպումից հետո ԱԳՆ-ն հայտարարություն է տարածել, որում երևում է, որ բանակցությունների ընթացքում բարձրաձայնվել են ԼՂ հայության իրավունքների, նրանց անվտանգության հասցեագրման ու ՀՀ տարածքից ադրբեջանական զորքերի դուրսբերման հարցերը: Արդեն մի քանի ամիս է՝ հանրային քաղաքական դաշտում ընթանում է ԼՂ ինքնորոշման իրավունքի մասին խոսակցությունը: Պետք է արձանագրել այսօրվա խնդիրը ԼՂ հայության անվտանգության հարցն է ու առաջ շարժվել դրանք հասցեագրելու ուղղությամբ: Խնդրի լուծմանը պետք է Բաքու-Ստեփանակերտ երկխոսության միջոցով հասնենք»,- ասել է Սարգիս Խանդանյանն ու նշել, որ մայիսին ՀՀ-ի ու Ադրբեջանի ԱԳ նախարարների միջև հանդիպում է սպասվում: «ՀՀ-ն վերահաստատում է դիրքորոշումը՝ երեք սկզբունքները, որոնք ընկած են Ադրբեջանի հետ բանակցությունների հիմքում (ՀՀ ինքնիշխան տարածքի պահպանում, Հայաստան-Ադրբեջան խաղաղության հնարավոր պայմանագրի հարցում միջազգային երաշխավորի ինստիտուտի ներդնում ու Բաքու-Ստեփանակերտ երկխոսության համար միջազգային մեխանիզմների ստեղծում), պահպանվում են, դրանց գումարվել են նաև այլ հարցեր: Նախաստորագրվող փաստաթղթի մասին որևէ բան ասել չեմ կարող: Խաղաղության համաձայնագրի նախագիծ կա, տեղյակ չեմ՝ մինչև դրա ստորագրումը կողմերը կուզե՞ն որևէ այլ նախագիծ ստորագրել, թե՝ ոչ: Խաղաղության համաձայնագիրը վաղուց ստորագրված կլիներ, եթե Ադրբեջանը ՀՀ-ի՝ 3 սկզբունքային հարցերի մասով ՀՀ-ին մոտ դիրքորոշում ունենար»,- ասել է Սարգիս Խանդանյանը:

17:19 - 04 մայիսի, 2023

Չավուշօղլուն խոսել է «Նեմեսիսի» արձանը հանելու մասին. Վահագն Ալեքսանյանը սխալվում է

Ազգային ժողովում խորհրդարանական «Քաղաքացիական պայմանագիր» խմբակցության ներկայացուցիչների ճեպազրույցի ժամին լրագրողը հիշեցրեց, որ Թուրքիայի արտգործնախարար Մեւլութ Չավուշօղլուն երեկ հայտարարել էր, որ Թուրքիայի օդային սահմանը Հայաստանից թռիչքների համար փակվել է «Նեմեսիսի» հուշարձանի տեղադրման պատճառով․ «Երեկ Թուրքիայի ԱԳ նախարարը հայտարարեց, որ Թուրքիայի օդային սահմանը փակվել է, քանի որ տեղադրվել է Նեմեսիսի արձանը, ու սպառնաց՝ եթե չապամոնտաժվի, այլ քայլեր կհետեւեն սրան,- պատգամավորներ Սարգիս Խանդանյանից ու Վահան Ալեքսանյանից հետաքրքրվեց լրագրողը՝ հարցնելով,- «Ի՞նչ է պատրաստվում Հայաստանի կառավարությունն անել, արդյոք հնարավո՞ր է՝ ապամոնտաժվի արձանը»։ Պատգամավոր Վահագն Ալեքսանյանին հարցի այսպիսի ձեւակերպումը զարմացրեց, նա այսպես պատասխանեց․ «Նախ՝ արձանները ՀՀ կառավարության տիրույթում չեն, այլ Երեւանի քաղաքապետարանի տիրույթում են, բայց Ձեր հարցի մեջ սխալ կա, որովհետեւ նման բան, որ «եթե չապամոնտաժվի», նման արտահայտություն առնվազն չկար Թուրքիայի ԱԳՆ-ի խոսքում, այլ կար, կարծեմ, եթե չեմ սխալվում, «եթե նման քայլերը շարունակական լինեն», էս կոնտեքստում էր, բայց ձեր ասածի նման արտահայտություն չկար»։ Վահագն Ալեքսանյանը, սակայն, սխալվում է, քանի որ Չավուշօղլուն երեկ ոչ միայն ասել է «նման քայլերի» շարունակականության մասին, այլ նաեւ արձանի հեռացման իրենց ակնկալիքի։ Մասնավորապես, երեկ՝ մայիսի 3-ին, NTV հեռուստաալիքի եթերում Թուրքիայի արտգործնախարար Մևլութ Չավուշօղլուն հայտարարել է, որ Թուրքիայի օդային տարածքով թռիչքների արգելքը պայմանավորված է Երևանում «Նեմեսիս» գործողության հերոսներին նվիրված հուշարձանի բացմամբ։ Արտգործնախարարը նշել է, թե «հուշարձանը տեղադրվել է թուրք դիվանագետներին, քաղաքացիներին, ինչպես նաև ադրբեջանցիների սպանած ահաբեկիչներին փառաբանելու համար»․ «Ես՝ որպես նախարարության ղեկավար, որի ներկայացուցիչներն ուժային կառույցների ներկայացուցիչներից հետո ամենաշատը տուժել են տեռորից, չեմ կարող դա ընդունել․․․ Նրանք ցույց են տալիս, որ դրական մտադրությամբ չեն արել, իսկ ես ձեռքներս ծալած չէի կարող նստել, դրա համար էլ որոշում կայացվեց փակել մեր օդային տարածքը հայկական ավիաընկերությունների համար։ Իսկ եթե շարունակեն, ուրեմն մենք այլ միջոցներ կձեռնարկենք, թող չնեղանան»,- ասել է Չավուշօղլուն։ Ապա լրագրողի ճշտող հարցին՝ օդային տարածքը փակելու մասին որոշումը նո՞ր է, Չավուշօղլուն դրական պատասխան է տվել՝ նշելով, որ միայն ՀՀ Ազգային ժողովի նախագահ Ալեն Սիմոնյանին է թույլատրվել թռչել Թուրքիա՝ մասնակցելու Սեւծովյան տնտեսական համագործակցության խորհրդարանական վեհաժողովի հիմնադրման 30-ամյակին նվիրված անդամ պետությունների խորհրդարանների ղեկավարների գագաթնաժողովին եւ Գլխավոր վեհաժողովի լիագումար նիստի աշխատանքներին։ Չավուշօղլուն նշել է, որ դրանից զատ VIP թռիչքները չեն թույլատրվի, եւ շարունակել է․ «Եթե շարունակեն, եթե դա չհանեն, այլ միջոջներ կձեռնարկենք։ Անհնար է, որ մենք դրա հետ համակերպվենք, դա դրական մտադրությամբ չանելն էլ արդեն տեսել ենք»։ Այսպիսով, Չավուշօղլուն իսկապես արձանի հեռացման «պայմանի» մասին խոսել է, ուստի Վահագն Ալեքսանյանը սխալվում է։ Ի հիշեցում՝ Թուրքիայի ավիացիոն իշխանություններն առանց նախօրոք տեղեկացնելու ապրիլի 29-ին չեղարկել են Flyone Armenia ավիաընկերությանը նախօրոք տրամադրված թույլտվությունը Թուրքիայի օդային տարածքով դեպի Եվրոպա չվերթեր իրականացնելու համար։ Այս մասին հայտնել էր Flyone Armenia ավիաընկերության տնօրենների խորհրդի նախագահ Արամ Անանյանը։ Աննա Պալաքյան

14:44 - 04 մայիսի, 2023