Վլադիմիր Վարդանյան

8-րդ գումարման Ազգային ժողովի «Քաղաքացիական պայմանագիր» խմբակցության պատգամավոր, ԱԺ պետական-իրավական հարցերի մշտական հանձնաժողովի նախագահ։

Ծնվել է 1979թ. օգոստոսի 26-ին։

2000թ. ավարտել է Երեւանի պետական համալսարանի իրավագիտության ֆակուլտետը: 2002թ.՝ նույն ֆակուլտետի մագիստրատուրան: 2002թ. ընդունվել է ՀՀ ԳԱԱ Հայոց ցեղասպանության թանգարան-ինստիտուտի ասպիրանտուրան, 2004թ.՝ տեղափոխվել ԵՊՀ ասպիրանտուրան:

2003-2006թթ. եղել է ՀՀ սահմանադրական դատարանի աշխատակազմի իրավախորհրդատվական ծառայության գլխավոր մասնագետ, 2006-2013թթ.՝ նույն ծառայության միջազգային պայմանագրերի բաժնի վարիչ, 2013-2016թթ.՝ նույն ծառայության պետ: 2016-2018թթ.՝ ՀՀ ՍԴ խորհրդական: 2005 թվականից ԵՊՀ դասախոս է: 2007-2015թթ.՝ Հայ-ռուսական (սլավոնական) համալսարանի դասախոս: 2014-2015թթ.՝ Հայ-ռուսական (սլավոնական) համալսարանի միջազգային եւ եվրոպական իրավունքի ամբիոնի վարիչ: 2016-ից մինչև 2019թ.-ի հունվար աշխատել է «Սահմանադրական մշակույթ» միջազգային վերլուծական կենտրոնի գործադիր տնօրեն: 2018թ. ապրիլ-2019թ. հունվար՝ ՀՀ սահմանադրական դատարանի աշխատակազմի ղեկավար:

2015 թվականից Իրավաբանների համահայկական խորհրդաժողովի խորհրդին առընթեր «Հայոց ցեղասպանության իրավական հարցերի» գիտավերլուծական կենտրոնի համակարգողն է: 2018 թվականից՝ Հայոց ցեղասպանության թանգարան ինստիտուտի հոգաբարձուների խորհրդի անդամ:

2019-2021թթ. եղել է ԱԺ պատգամավոր («Իմ քայլը» կուսակցությունների դաշինքի համապետական ընտրական ցուցակ):

Ո՞նց կարող է Ստեփանակերտն անցնել Ադրբեջանի վերահսկողության ներքո. «Իմ քայլի» պատգամավոր |armtimes.com|

armtimes.com: «Հերիք եղավ, բոլ եղավ, չի կարելի ազգային անվտանգության հարցերը դարձնել միջանձնային հարաբերությունները պարզելու բան». ԱԺ-ում լրագրողների հետ զրույցում այս մասին ասաց ԱԺ պետաիրավական հարցերի հանձնաժողովի նախագահ Վլադիմիր Վարդանյանը: Ըստ նրա՝ բոլորս շահագրգռված ենք՝ սկսած սովորական մշակից, ավարտած Հանրապետության նախագահով, վարչապետով, Կառավարությունով, ընդդիմությամբ, ապահովել երկրի անվտանգությունը, բայց երկրի անվտանգությունը ապահովելու համար պետք է գործով զբաղվել, ոչ թե այս կամ այն կերպ մանիպուլյատիվ դատողություններ անել, ինչը ավելի է վտանգում երկիրը: «Ցանկացած տեսակի արտահայտություն, որն իր բնույթվ ոչինչ չի տալիս, այլ երկրի պաշտպանունակությունն է թուլացնում, անընդունելի է: Չափազանց կարեւոր է երկրի պաշտպանության համար ներքին կոնսոլիդացիան, առնվազն այն հարցերի վերաբերյալ, որոնք վերաբերում են երկրի պաշտպանունակությանը: Ելնելով այն իրավիճակից, որ հարեւան երկրների դիկտատորները անում են ամեն ինչ, որպեսզի ապակայունացվի իրավիճակը Հայաստանի Հանրապետությունում, որ ավելի մեծ դիվիդենտներ ստանան, դրան զուգհահեռ երբ լսում ես ինչ-որ արտահայտություններ, որոնք հավատացեք ոչ մի անվտանգային հարց չեն լուծում, այլ մեծացնում են այդ կոնսոլիդացիայի բացակայությունը, անընդունելի է ինձ համար: Մի փորձեք թուլացնել բանակը, մի փորձեք նսեմացնել ՀՀ զինված ուժերը, մի փորձեք նսեմացնել այն հերոսությունը, որ ՀՀ զինված ուժերը կատարել են Հայաստանի ձեւավորումից հետո»,- հայտարարեց Վարդանյանը: Հարցին, թե ո՞ր շրջանակներին նկատի ունենալով է այդ ամենն ասում, հանձնաժողովի նախագահը հստակեցրեց. «Ասում եմ այն սուբյեկտներին, որոնք արհեստականորեն փորձում են բարձրացնել խնդիրներ, որոնք կապված են ոչ թե անվտանգության հետ, այլ այս նախընտրական փուլում դիվիդենտներ շահելով»: Պետաիրավական հարցերի հանձնաժողովի նախագահը լրագրողներից մեկի հարցին ի պատասխան անդրադարձավ նաեւ ադրբեջանական պաշտոնյաներից մեկի այն հայտարարությանը, թե Ստեփանակերտը կարող է անցնել Ադրբեջանի վերահսկողության տակ: Այդ հայտարարությանը արձագանքել էր նաեւ Արցախի նախկին ՄԻՊ-ը: «Ո՞նց կարող է Ստեփանակերտն անցնել Ադրբեջանի վերահսկողության ներքո, ձեր այս հարցերը հիմա լսում են Բաքվում, ոգեշնչվում են. ո՛չ նման բան չկա», - ասաց Վարդանյանը:

15:36 - 03 մայիսի, 2021

Հրաժարականից հետո վարչապետի պաշտոնակատարի կարգավիճակում պաշտոնավարելու սահմանադրական որևէ արգելք չկա. Վարդանյան |1lurer.am|

1lurer.am: Հրաժարականից հետո վարչապետի պաշտոնակատարի կարգավիճակում պաշտոնավարելը շարունակելու սահմանադրական որևէ արգելք չկա. հայտարարել է ԱԺ պետաիրավական հարցերի մշտական հանձնաժողովի նախագահ Վլադիմիր Վարդանյանը լրագրողների հետ ճեպազրույցում: Նրա խոսքով՝ որևէ քաղաքական ուժ այդ հանգամանքը չի վիճարկել, ոչ էլ սահմանադրաիրավական վեճ կա: Ըստ Վարդանյանի՝ կան որոշակի սահմանափակումներ՝ նախընտրական քարոզարշավի ժամանակ, երբ պաշտոնակատարն ու քարոզչություն իրականացնողը չպետք է նույն սուբյեկտը լինեն: «Խնդիրը վերաբերում է բացառապես այն փուլին, երբ կնախաձեռնվի նախընտրական քարոզչություն, և այդ ընթացքում անձինք չեն կարողանա համատեղել ընտրական քարոզի մասնակցողի և պետական պաշտոնյայի կարգավիճակները»,- ասաց նա:

12:35 - 26 ապրիլի, 2021

Ադրբեջանում պահվող հայ ռազմագերիների կյանքին վտանգ է սպառնում. Վլադիմիր Վարդանյանի ելույթը ԵԽԽՎ-ում |1lurer.am|

1lurer.am: ԵԽԽՎ-ի լիագումար նիստում հայ ռազմագերիների, այլ գերեվարվածների ու տեղահանված անձանց հարցի քննարկումների շրջանակում ելույթ է ունեցել ԵԽԽՎ հայաստանյան պատվիրակության անդամ Վլադիմիր Վարդանյանը: «Շատ կարևոր է ունենալ այնպիսի փաստաթուղթ, որն ընդգծում է մեր կազմակերպության ռազմավարական առաջնահերթություններն առաջիկա տարիներին: Այս զեկույցում շատ կարևոր է նաև ընդգծել մեր կազմակերպության առաջիկա խնդիրները: Մենք չպետք է մոռանանք մեր հիմնարար արժեքները, մարդու հիմնարար իրավունքները, որոնք նույնպես պետք է պաշտպանվեն, որոնք չի կարելի թերագնահատել նույնիսկ ներկա ճգնաժամի ժամանակ: Եվրախորհուրդը, ինչպես նաև Խորհրդարանական վեհաժողովը քաղաքական քննարկումների ու երկխոսությունների հարթակներ են, քաղաքական հասարակության ու ժողովրդավարական անվտանգության հիմքն են: Ցանկանում եմ ասել, որ այս կազմակերպությունը ստեղծվել է Երկրորդ աշխարհամարտի կրկնությունը թույլ չտալու, մարդու իրավունքները պաշտպանելու, օրենքի գերակայությունն ապահովելու և ժողովրդավարության սկզբունքները պահպանելու համար: Այն ստեղծվել է, որպեսզի չկրկնվի Հոլոքոստը՝ մարդկայնության դեմ հանցանքը»,- հայտարարել է Վլադիմիր Վարդանյանը: Անդրադառնալով Ադրբեջանում պահվող հայ ռազմագերիների թեմային՝ Վլադիմիր Վարդանյանը մասնավորապես ասել է. «Ավելի քան 200 ռազմագերի գտնվում է Ադրբեջանում, և մենք հիմքեր ունենք ենթադրելու, որ նրանց կյանքը վտանգված է: Եվս մեկ անգամ կրկնում եմ՝ սա քաղաքական հարց չէ: Սա մարդու իրավունքների ու ժողովրդավարության խնդիր է, և նրանց իրավունքները պետք է պաշտպանվեն»,- հայտարարել է Վլադիմիր Վարդանյանը:

16:07 - 20 ապրիլի, 2021

ԱԺ պետաիրավական հարցերի հանձնաժողովի նիստի համար քվորում չապահովվեց |armenpress.am|

armenpress.am: ՀՀ ազգային ժողովի պետաիրավական հարցերի մշտական հանձնաժողովի նիստը, որում երկրորդ ընթերցմամբ պետք է քննարկվի Ընտրական օրենսգրքի փոփոխությունների նախագիծը, չսկսվեց քվորում չապահովվելու պատճառով, մինչև 3 ժամվա ընթացքում քվորում ապահովելու դեպքում նիստը կկայանա: Հանձնաժողովի նախագահ Վլադիմիր Վարդանյանն ասաց. «Քվորում ըստ էության չի ապահովվել: Ես առաջարկում եմ ԱԺ կանոնակարգ օրենքով և մեր կանոնադրությամբ սահմանված կարգով սպասել մինչև 3 ժամ: Երբ ապահովվի քվորում, նիստը կսկսենք»: ՀՀ ազգային ժողովն այսօր՝ ապրիլի 1-ի նիստում առաջին ընթերցմամբ արդեն ընդունել է «Հայաստանի Հանրապետության ընտրական օրենսգիրք» սահմանադրական օրենքում փոփոխություններ եւ լրացումներ կատարելու մասին օրենքի նախագիծը, որով նախատեսվում է ընտրություններից առաջ հանել ռեյտինգային ցուցակները և ընտրությունների գնալ պարզ համամասնական ընտրակարգով: Նախագիծը քննարկվում է հատուկ ընթացակարգով, ըստ այդմ՝ երկրորդ ընթերցմամբ քննարկումը ևս նախատեսվում է անցկացնել ապրիլի 1-ին:

17:08 - 01 ապրիլի, 2021

Վլադիմիր Վարդանյանը վերընտրվել է ԵԽԽՎ Իրավաբանական հարցերի և մարդու իրավունքների հանձնաժողովի նախագահ

ՀՀ ԱԺ «Իմ քայլը» խմբակցության պատգամավոր, ԵԽԽՎ հայաստանյան պատվիրակության անդամ Վլադիմիր Վարդանյանը տեղեկացրել է, որ այսօր վերընտրվել է Եվրոպայի խորհրդի Խորհրդարանական վեհաժողովի Իրավաբանական հարցերի և մարդու իրավունքների հանձնաժողովի՝ Մարդու իրավունքների ենթահանձնաժողովի նախագահ:

17:54 - 22 մարտի, 2021

Պատգամավորները փոփոխություն են առաջարկել դատավորի կենսաթոշակի սահմանման կարգում |armenpress.am|

armenpress.am: ՀՀ ազգային ժողովն առաջին ընթերցմամբ ընդունելու համար քննարկեց դատավորի կենսաթոշակի սահմանման կարգում փոփոխությունների օրենքի նախագիծը: Նախագիծը հեղինակել են «Իմ քայլը» խմբակցույթան անդամներ Արթուր Դավթյանը, Վլադիմիր Վարդանյանը և Աննա Կարապետյանը: «Առաջարկվում է դատավորի կենսաթոշակը սահմանել հետեւյալ կերպ. զբաղեցրած վերջին պաշտոնի համար սահմանված աշխատավարձի հարկված գումարի 75%-ի և դատավորին նշանակված՝ անուիտետի և ծրագրային վճարների ձեւով վճարվող կուտակային կենսաթոշակի տարբերության չափով: Գործող կարգավորումներով դատավորները կենսաթոշակ են ստանում աշխատավարձի հարկված գումարի 55%-ի չափով»,- ասաց Դավթյանը:

15:33 - 04 մարտի, 2021

Արտահերթ ընտրություններ անցկացնելու համար անհրաժեշտ են որոշակի սահմանադրական հիմքեր. Վլադիմիր Վարդանյան |1lurer.am|

1lurer.am: Ես պարոն Հովակիմյանի հետ դեռ չեմ հանդիպել և չեմ խոսել հիմքերի մասին, իսկ Ֆեյսբուքում տեղ գտած հայտարարությունն ինձ բավարար ինֆորմացիա չի տալիս, որպեսզի ես կարողանամ որպես իրավաբան եզրակացություն անել այս հարցի վերաբերյալ: Այս մասին ԱԺ-ում՝ լրագրողների հետ զրույցում, ասաց «Իմ քայլը» խմբակցության պատգամավոր, Պետաիրավական հարցերի մշտական հանձնաժողովի նախագահ Վլադիմիր Վարդանյանը՝ ի պատասխան լրագրողների հարցին՝ մեկնաբանել ԱԺ «Իմ քայլը» խմբակցության պատգամավոր Վահագն Հովակիմյանի գրառումը, որում ասվում է, որ հիմքեր է տեսնում ՀՀ նախագահին անվստահություն հայտնելու համար: «Եվս մեկ անգամ պետք է կրկնեմ՝ եթե ես ծանոթ չեմ այն փաստաթղթին, որոնք հիմք են հանդիսացել պարոն Հովակիմյանին նման հայտարարություն անելու համար, առնվազն ոչ պրոֆեսիոնալ կլինի դրա վերաբերյալ որևէ մեկնաբանություն անելը»,- ասաց պատգամավորը: Հարցին՝ ինչ կարծիք ունի ԱԺ «Լուսավոր Հայաստան» խմբակցության պատգամավոր Էդմոն Մարուքյանի երեկ արած առաջարկի մասին, Վարդանյանն ասաց, «ցանկացած լուծում, որը համապատասխանում է Սահմանադրությանը և օրենքներին, իր համար ընդունելի է»: «Լուծումներն այստեղ քաղաքական են, տարբերակ է, շատ տարբերակներ են առաջարկվում»,- ասաց պատգամավորը՝ ընդգծելով, որ ինքը չէ հարցի հասցեատերը և որևէ դիրքորոշում չի կարող հայտնել: «Կարճ հաղորդագրությունն իրավաբանի համար ոչ բավարար է, որպեսզի վերջնական եզրակացության գա: Ցանկացած սահմանադրական լուծում ընդունելի է: Արտահերթ ընտրությունները ևս Սահմանադրությամբ նախատեսված ինստիտուտ է, բայց արտահերթ ընտրություններ անցկացնելու համար անհրաժեշտ են որոշակի սահմանադրական հիմքեր»,- հավելեց Վարդանյանը:

16:05 - 01 մարտի, 2021

Պետք է ունենանք 21-րդ դարին համահունչ դատական համակարգ. Վարդանյան |1lurer.am|

1lurer.am: Առաջին անգամ Հայաստանի պատմության մեջ հնարավորություն կա, որ բարձրագույն դատական ատյանի նախագահի պաշտոնը ստանձնի կին՝ հայտարարեց ԱԺ պետաիրավական հարցերի մշտական հանձնաժողովի նախագահ Վլադիմիր Վարդանյանը՝ Վճռաբեկ դատարանի նախագահի ընտրություններին: «Իմ կարծիքով, եթե ուզում ենք հեղափոխական փոփոխություններ, մենք այս հանգամանքը ևս պետք է հաշվի առնենք: Սա այն եզակի դեպքերից է, որ առանց որևիցե քվոտայի մասնագիտական կարողությունների շնորհիվ կինը կարողացել է հասնել ամենաբարձր դատական պաշտոնին հավակնողի կարգավիճակին: Սա պետք է միանշանակ հարգվի և դիտարկվի որպես դրական փոփոխություն»,- ասաց Վարդանյանը՝ շեշտելով, որ պետք է ունենանք 21-րդ դարին համահունչ դատական համակարգ:

15:14 - 09 փետրվարի, 2021

Հաջողությունը դիվանագիտական դաշտում հայթայթվում է փոքրիկ քայլերի միջոցով․ Վլադիմիր Վարդանյան |armtimes.com|

armtimes.com: Երբ խոսում են պատվիրակության հաջողության, անհաջողության մասին, նախ պետք է հստակ հասկանանք, որ ԵԽԽՎ-ն չի զբաղվել ռազմագերիների կամ որևիցե այլ սուբյեկտների փոխանակման կամ հայրենադարձման հարցով: Մամուլի ասուլիսի ընթացում ասաց ԵԽԽՎ-ում հայկական պատվիրակության անդամ Վլադիմիր Վարդանյանը։ «Մենք 47 անդամ պետություն ունենք Եվրոպայի խորհրդում, և ամեն մեկը գալիս է իր օրակարգով: Ինչքանով քո օրակարգը կլինի հոգեհարազատ մնացածների համար՝ պայմանավորված է քաղաքական կոնյունկտուրայով, որը ձևավորվում է այս կամ այն փուլում»,-ասաց Վարդանյանը։ Պատգամավորի խոսքով՝ դիվանագիտական դաշտում հաջողությունը հայթայթվում է փոքրիկ քայլերի միջոցով։ «Սա ռազմի դաշտ չէ, երբ հաջողությունը կարող է լինել ակներև։ Հաջողությունը դիվանագիտական դաշտում հայթայթվում է փոքրիկ քայլերի միջոցով՝ ելույթ, զեկույց, բանաձև, այնուհետև այդ ամենը կարող է արտացոլվել մասնավորապես Եվորապական դատարանի որոշումներում, նախարարների կոմիտեի շրջանակներում կարող է քննարկվել։ Առանձին առանձին քայլերով կարող ենք ասել, որ որևէ միջոց անհրաժեշտ է, բայց բավարար չէ, բայց միջազգային ճնշումը տարբեր հարթակներում բանեցնելու մեթոդը միակ տարբերակն է՝ Ադրբեջանին հետ վերադարձնել բնականոն միջազգային հարաբերությունների հուն»։

13:25 - 02 փետրվարի, 2021

Հույս ունեմ, որ մի օր Ձեր երկիրը կդրսևորի այս հարցի վերաբերյալ պատասխանատու վարքագիծ․ Վլադիմիր Վարդանյանը ԵԽԽՎ ելույթում պատասխանել է ադրբեջանցի գործընկերոջը

10:36 - 28 հունվարի, 2021

Իրավաբան-գիտնականի համար տարիքային սահմանափակում չկա. պատգամավորը՝ Ջհանգիրյանի թեկնածության մասին |armenpress.am|

armenpress.am: ՀՀ ազգային ժողովի «Իմ քայլը» խմբակցության պատգամավոր, պետաիրավական հարցերի մշտական հանձնաժողովի նախագահ Վլադիմիր Վարդանյանը վստահեցնում է, որ Բարձրագույն դատական խորհրդի անդամի պաշտոնի համար իրավաբան-գիտնականի թեկնածությունն առաջադրելու համար որևէ տարիքային սահմանափակում չկա օրենքով: Վարդանյանն այս մասին ասաց ԱԺ-ում Ջհանգիրյանի ընտրության հարցով քննարկմանը՝ անդրադառնալով խոսակցություններին, թե Ջհանգիրյանը 65 տարեկան է, իսկ խորհրդի անդամի թեկնածու կարող է լինել մինչև 63 տարեկան դատավորը: Վարդանյանը նաև նշեց, որ ԲԴԽ-ն կազմված է երկու կարգի սուբյեկտներից՝ դատավորներ, որոնց ընտրում է Դատավորների ընդհանուր ժողովը, որոնց նկատմամբ ներկայացվում են ուրույն պահանջներ, մասնավորապես 10 տարվա դատավարական գործունեության փորձ և այլն, և ԱԺ-ի կողմից ընտրված իրավաբան-գիտնական, որոնց ներկայացվում են այլ պահանջներ: «Դատական օրենսգրքի 80-րդ հոդվածը հստակորեն նշում է, որ ԱԺ-ի կողմից որպես ԲԴԽ անդամ չի կարող ընտրվել այն անձը, որն ունի օրենսգրքով դատավոր նշանակվելու համար որևէ սահմանափակում: Սահմանափակումները հստակ նշված են 112-րդ հոդվածում, և որևիցե տարիքային սահմանափակում որպես այդպիսին, նախատեսված չէ»,-ասաց Վարդանյանը: Նա շեշտեց՝ հստակ պետք է տարբերակել դատավորի տարիքին ներկայացվող պահանջները, դատավորի թեկնածուին ներկայացվող պահանջները և ԲԴԽ-ի գիտնական անդամներին ներկայացվող պահանջները: Անդրադառնալով դատավոր նշանակվելու սահմանափակումներին՝ պատգամավորն ասաց, որ սահմանափակումների մեջ որևէ դրույթ չկա, որն այս կամ այն եղանակով կարգելեր գիտնական անդամին զբաղեցնել ԲԴԽ անդամի պաշտոնը:

13:49 - 22 հունվարի, 2021

Գերիներին չվերադարձնելը միջազգային ոչ իրավաչափ արարքի տարրեր պարունակող խնդիր է. պատգամավոր |armenpress.am|

armenpress.am: ՀՀ ազգային ժողովի պետաիրավական հարցերի մշտական հանձնաժողովի նախագահ Վլադիմիր Վարդանյանը Ադրբեջանում հայ ռազմագերիներին և այլ պահվող անձանց վերադարձի հիմանխնդիրը համարում է լրջագույն միջազգային իրավական խնդիր: Վարդանյանն այս մասին ասաց ԱԺ ամբիոնից իր ելույթում: «Յուրքանչյուրիս համար ռազմագերիների և այլ պահվող անձանց վերադարձի հիմնախնդիրը առաջնային, օրակարգային է: Եվ յուրաքանչյուրս առվնազն սեպտեմբերի 27-ից հետո ապրում ենք այդ խնդրով, իսկ շատերն այդ խնդրով ապրում էին նաև դեռ ավելի վաղ, քանի որ գերեվարված անձինք կային նաև նախկինում: Եվ սա լրջագույն միջազգային իրավական խնդիր է: Միջազգային ոչ իրավաչափ արարքի տարրեր պարունակող խնդիր է ռազմագերիներին և այլ պահվող անձանց չվերադարձնելը»,- ասաց Վարդանյանը: Նրա խոսքով՝ կառավարությունը սկսել է իրավական գործընթացներ՝ ատելության մթնոլորտի հետ կապված, որ տարածվում է Ադրբեջանում: «Այդ իրավական գործընթացների մասին մասնագիտական հարթակներում խոսվում է 10-ից ավելի տարի, և այս կառավարությունն ի վերջո համարձակություն է գտել՝ գնալ այդ գործընթացների, թեև հասկանում է, թե ինչքան մեծ բարդություններ դրանք կարող են առաջացնել»,- ասաց պատգամավորը: Անդրադառնալով խորհրդարանական աշխատանքին՝ նա նշեց, որ պետաիրավական հարցերի մշտական հանձնաժողովի անդամների մեծամասնությունը եղել և մնում է այն կարծիքի կողմնակից, որ գերիների հետ կապված հարցով անհրաժեշտ է ամենօրյա աշխատանք, և այդ առումով պետք է գտնել ճիշտ ձևաչափը: «Մենք առաջարկել ենք աշխատանքային խմբի ձևավորում: Մեր միջազգային գործընկերներին պետք է ամենօրյա ռեժիմով տեղյակ պահենք խնդիրների մասին»,- նշեց Վարդանյանը:

12:03 - 18 հունվարի, 2021

Վլադիմիր Վարդանյանը նշանակվել է մահապատժի վերացման հարցով ԵԽԽՎ գլխավոր զեկուցող

ՀՀ Ազգային ժողովի պետական-իրավական հարցերի մշտական հանձնաժողովի նախագահ Վլադիմիր Վարդանյանը նշանակվել է մահապատժի վերացման հարցով ԵԽԽՎ գլխավոր զեկուցող: Այս մասին հայտնում է ՀՀ Ազգային ժողովի պաշտոնական կայքը: «Դեկտեմբերի 8-ին Եվրոպայի խորհրդի խորհրդարանական վեհաժողովի (ԵԽԽՎ) իրավաբանական հարցերի եւ մարդու իրավունքների հանձնաժողովի նիստում ՀՀ Ազգային ժողովի պետական-իրավական հարցերի մշտական հանձնաժողովի նախագահ, ԵԽԽՎ-ում Հայաստանի Հանրապետության պատվիրակության անդամ Վլադիմիր Վարդանյանը նշանակվել է մահապատժի վերացման հարցով ԵԽԽՎ գլխավոր զեկուցող»,- ասված է հաղորդագրությունում:

21:00 - 09 դեկտեմբերի, 2020

Պատգամավորը ռազմական դրությունը վերացնելուց առաջ իրավական մեխանիզմներ ստեղծելու կարիք է տեսնում |armenpress.am|

16:45 - 26 նոյեմբերի, 2020

Ալեն Սիմոնյանի և Վլադիմիր Վարդանյանի գործուղումը Մոսկվա աշխատանքային է |factor.am|

factor.am: Աշխատանքային այցով նոյեմբերի 5-11-ը Մոսկվա են գործուղվել Ազգային ժողովի նախագահի տեղակալ Ալեն Սիմոնյանը և Ազգային ժողովի պետական-իրավական հարցերի մշտական հանձնաժողովի նախագահ Վլադիմիր Վարդանյանը: Այս մասին փոխանցում են ԱԺ աշխատակազմից: Պատգամավորների գործուղման մասին կառույցից այլ մանրամասներ չեն փոխանցում: «Իմ քայլը» խմբակցության առանձին պատգամավորներ ևս հրաժարվեցին այս թեման մեկնաբանել:

16:34 - 06 նոյեմբերի, 2020

Այս հանցագործությունը չունի վաղեմության ժամկետ. պատգամավորը՝ հայ ռազմագերիների սպանության մասին |armenpress.am|

armenpress.am: Ադրբեջանական լրատվամիջոցներում տարածված՝ հայ ռազմագերիներին գնդակահարելու վերաբերյալ տեսանյութը փաստում է այն մասին, թե ինչպես է Ադրբեջանը կատարում պատերազմական հանցագործություններ և տուրք տալիս ահաբեկչական գործություններին: Նման կարծիք հայտնեց ՀՀ ազգային ժողովի «Իմ քայլը» խմբակցության պատգամավոր, ԱԺ պետական-իրավական հարցերի մշտական հանձնաժողովի նախագահ Վլադիմիր Վարդանյանը: ԱԺ պետական-իրավական հարցերի մշտական հանձնաժողովի նախագահը նախ հիշեցրեց Ադրբեջանի իշխանություններին, որ գերեվարված անձը պետության իրավազորության ներքո է և այդ անձանց հետ տեղի ունեցող ցանկացած արարքի համար պատասխանատվություն է կրում տվյալ երկիրը: «Տվյալ պարագայում պատասխանատվություն է կրում Ադրբեջանի Հանրապետությունը և այն անձինք, ովքեր հանցագործություն են կատարում, և ինքը` պետությունը, պետք է ենթարկվի պատասխանատվության նման արարքների համար»,- ընդգծեց Վարդանյանը: ԱԺ պետական-իրավական հարցերի մշտական հանձնաժողովի նախագահի խոսքով` առաջին տեսանյութը ուսումնասիրելիս պարզ է դառնում, որ գերեվարության մեջ գտնվող անձինք դադարեցրել են դիմադրությունը թշնամական որևէ գործողություններ չեն իրականացնում: Նրա խոսքով` առաջին տեսանյութում երևում է, թե ինչպես են նրանց ստիպում հանել իրենց վերնահագուստը, երկրորդ` նրանց նստեցնում են ճանապարհի եզրին: «Սա ոչ թե սոսկ գերեվարված անձանց սպանություն է, ինչն ինքնին դատապարտելի է միջազգային մարդասիրական իրավունքի նորմերով և դիտարկվում է որպես ռազմական հանցագործություն, սա այսպես կոչված կոլեկտիվ հաշվեհարդար տեսնելն է կամ կոլեկտիվ պատիժ իրականացնելու փորձ է: Անձինք առանց դատի և դատավարության, դեմոնստրատիվ, ձեռքերը կապված ռազմագերիներին նստեցնում են ճանապարհի եզրին, նրանց ուսերին գծում են Հայաստանի Հանրապետության դրոշը, որպեսզի ևս մեկ անգամ ընդգծեն իրենց գործողությունների ահաբեկչական բնույթը և դրանից հետո համապատասխան հրամանով հրազենով արձակում են բազում գնդակներ, որի հետևանքով գերեվարված անձինք մահանում են : Ընդ որում, մահանալուց հետո դիակների նկատմամբ վատ վերաբերմունքը, հարվածները շարունակվում են»,- շեշտեց Վարդանյանը: ԱԺ պետական-իրավական հարցերի մշտական հանձնաժողովի նախագահի կարծիքով` սրանից հետո Ադրբեջանի Հանրապետության կողմից վկայակոչել որևիցե միջազգային մարմնի որևիցե փաստաթուղթ պարզապես անբարոյականություն է: «Սա կանոնների խախտում է, որոնք գոյություն են ունեցել ոչ թե ՄԱԿ-ի ստեղծման ընթացքում, սա պատերազմի օրենքներն ու սովորույթներն են , որոնք հայտնի են համաշխարհային հանրությանը դեռևս անտիկ ժամանակաշրջանում: Սա դասական ռազմական հանցագործություն է,որի համար չկա ոչ տարածաշրջանային սահմաններ: Այդ հանցագործություն կատարող անձինք կարող են ենթարկվել պատասխանատվության ցանկացած երկրում և այդ հանցագործությունների նկատմամբ չեն կիրառվում վաղեմության որևէ ժամկետներ: Հետևաբար, այդ անձինք երբ էլ հայտնաբերվեն, ենթարկվելու են քրեական պատասխանատվության»,- եզրափակեց Վարդանյանը:

22:09 - 15 հոկտեմբերի, 2020