Նոր Նորքի 4-րդ զանգվածի 2/4 ընտրատեղամասի մոտակայքում ակտիվ շրջում էր կողմնակի անձ։ Վերջինս անընդհատ ելումուտ էր անում նաեւ ընտրատեղամաս, սակայն հագուստի վրա որեւէ վկայական փակվցված չէր։
Infocom-ի լրագրողն այդ անձից հետաքրքրվել է՝ որպես ո՞վ է շրջում տեղամասում եւ դրա տարածքում, վերջինս պատասխանել է, որ վստահված անձ է, գրանցվել է գրանցամատյանում, պարզապես վստահված անձի վկայականը չի փակցրել հագուստին։ Թե որ քաղաքական ուժի վստահված անձն է, այդ անձը չի պատասխանել։
Infocom-ի լրագրողը հանձնաժողովի անդամից հետաքրքրվել է այդ անձի ինքնության մասին և տեղեկացել, որ վերջինս համատիրության ղեկավարն է, անունը՝ Արտակ։ Եւ չնայած հանձնաժողովի անդամը վստահեցրել է, որ նա գրանցվել է մատյանում, այդուհանդերձ, նրա անունն այնտեղ նշված չի եղել։
Ի պատասխան լրագրողի դիտարկմանը, որ տեղամասում առանց վկայականի անձ չի կարող լինել, հանձնաժողովի նախագահը ասել է, որ ինքը նույնպես մի քանի անգամ զգուշացրել է Արտակ Ավետիսյանին, սակայն նա ասել է՝ «իմ շենքն ա՝ մնում եմ»։
Ավելի ուշ Արտակ Ավետիսյանը «Քաղաքացիական պայմանագիր» կուսակցության վստահված անձի վկայականով ցանկացել է գրանցվել գրանցամատյանում։ Այս ընտրատեղամասում, սակայն, ՔՊ եւս մի վստահված անձ է ներկա եղել, ուստի հանձնաժողովի նախագահը հայտնել է, որ նրանցից միայն մեկը կարող է մնալ՝ ինչպես պահանջում է կարգը։ Դրանից հետո Արտակ Ավետիսյանը գրանցվել է մատյանում, իսկ ՔՊ մյուս վստահված անձը՝ Մհեր Բաբայանը, դուրս է եկել գրանցումից, սակայն շարունակել է մնալ տեղամասում։ Դրանից հետո Արտակ Ավետիսյանը միանգամից լքել է տեղամասը՝ առանց մատյանում դուրս գալու մասին նշման, ինչից հետո նորից գրանցվել է Մհեր Բաբայանը։
Գլխավոր լուսանկարում՝ համատիրության ղեկավար Արտակ Ավետիսյանը
comment.count (0)