Ջո Բայդեն

ԱՄՆ 46-րդ նախագահը՝ Դեմոկրատական կուսակցությունից։

Ծնվել է 1942 թվականի նոյեմբերի 20-ին, ԱՄՆ-ի Փենսիլվանիա նահանգում։ Ամերիկացի քաղաքական գործիչ է, 2009 թվականի հունվարի 20-ին դարձել է Միացյալ նահանգների փոխնախագահը։ Մինչ փոխնախագահ դառնալը՝ նա սենատոր է եղել Դելավեր նահանգից՝ 1973-2009 թվականներին։ Նա ԱՄՆ դեմոկրատական կուսակցությունից առաջադրվել է 2020 թվականի նախագահական ընտրություններում՝ ընդդեմ գործող նախագահ Դոնալդ Թրամփի եւ նոյեմբերի 7-ին` վերջնական արդյունքներով ընտրվել է ԱՄՆ-ի նախագահ։

Սովորել է Դելավերի համալսարանում՝ ստանալով իրավաբանի մասնագիտություն։ 1970 թվականին ընտրվել է Նյու Քասլի շրջանի խորհրդում եւ դարձել վեցերորդ ամենաերիտասարդ սենատորը ԱՄՆ-ի պատմության մեջ, երբ 1972 թվականի ԱՄՆ-ի սենատորների ընտրություններում հաղթեց Դելավերում։ Բայդենը երկար ժամանակ Սենատի արտաքին հարաբերությունների հանձնաժողովի անդամ է եղել, նաեւ հանձնաժողովի նախագահ։ Նա դեմ էր 1991 թվականի Իրաք-քուվեյթյան պատերազմին, սակայն կողմ էր ՆԱՏՕ-ի ընդարձակմանը՝ դեպի Արեւելյան Եվրոպա եւ նրա ներքաշմանը 1990-ականների Հարավսլավիայի պատերազմներին։ Նա կողմ էր 2002 թվականի Իրաքի պատերազմի բանաձեւին, բայց դեմ էր 2007 թվականին Իրաքի պատերազմում ԱՄՆ զորքերի ավելացմանը։ Բայդենը ղեկավարել է Սենատի դատական հանձնաժողովը՝ 1987 թվականից մինչեւ 1995 թվականը, զբաղվել թմրանյութերի քաղաքականությամբ, հանցագործությունների կանխարգելմամբ եւ քաղաքացիական ազատությունների խնդիրներով։

Բայդենը վերընտրվել է Սենատում վեց անգամ եւ հրաժարվել Սենատորի պաշտոնից 2008 թվականի նախագահական ընտրություններին մասնակցելու համար՝ որպես Բարաք Օբամայի փոխնախագահ։ Օբաման եւ Բայդենը վերընտրվել են 2012 թվականին։

«ԱՄՆ-ի հակառակորդներն այսօր ավելի թույլ են, քան երբ ես ստանձնում էի պաշտոնը»․ Բայդեն |azatutyun.am|

azatutyun.am: «ԱՄՆ-ի հակառակորդներն այսօր ավելի թույլ են, քան երբ ես ստանձնեցի պաշտոնը չորս տարի առաջ», - ըստ Reuters-ի՝ հայտարարել է ԱՄՆ նախագահ Ջո Բայդենն՝ իշխանությունը նորընտիր նախագահ Դոնալդ Թրամփին հանձնելուց մեկ շաբաթ առաջ ամփոփելով իր արտաքին քաղաքականությունը։ «Չորս տարի առաջվա համեմատ Ամերիկան այսօր ավելի ուժեղ է, մեր դաշինքներն ավելի ուժեղ են, իսկ մեր հակառակորդներն ու մրցակիցներն՝ ավելի թույլ», - ասել է Բայդենը՝ շեշտելով՝ հեռանում է հաջորդ վարչակազմին փոխանցելով ամուր դիրքեր: «Ամերիկան կրկին համաշխարհային առաջատար է», - նշել է ԱՄՆ հեռացող նախագահը։ Բայդենի ելույթից ժամեր անց նորընտիր նախագահ Դոնալդ Թրամփը հեռուստատեսային հարցազրույցում հակառակ գնահատականն է տվել Բայդենի արտաքին քաղաքականությանը, մասնավորապես, նշելով․ - «Դրանք չորս սարսափելի տարիներ էին»։ Բայդենն ելույթում խոստացել է իր վարչակազմի աջակցությունն Ուկրաինային և Իսրայելին։ Մինչ Ուկրաինայում և Մերձավոր Արևելքում պատերազմները շարունակվում են՝ պաշտոնյաները հույս են հայտնում, որ Իսրայելի և պաղեստինյան ծայրահեղական «Համաս» խմբավորման միջև հնարավոր կլինի համաձայնության հասնել նախքան Բայդենը կլքի Սպիտակ տունը՝ մինչև սեպտեմբերի 20-ը: ԱՄՆ նախագահը հայտարարել է, որ բանակցողները մոտ են համաձայնության հասնելուն, որի արդյունքում Գազայի հատվածում պահվող պատանդներն ազատ կարձակվեն, կդադարեցվեն մարտերը պաղեստինյան անկլավում, ինչը հնարավորություն կտա ավելի մեծ հումանիտար օգնություն հասցնել այնտեղ: «Այնքան անմեղ մարդիկ սպանվեցին, այնքան համայնքներ ավերվեցին: Պաղեստինի ժողովուրդն արժանի է խաղաղության, Իսրայելն արժանի է խաղաղության, պատանդներն ու նրանց ընտանիքներն արժանի են վերամիավորման»,- ասել է Բայդենը՝ շեշտելով՝ աշխատում են այս ամենն արագ իրագործելու ուղղությամբ։ Իրավիճակը Մերձավոր Արևելքում կտրուկ սրվել է 2023 թվականի հոկտեմբերի 7-ին, երբ «Համաս»-ի զինյալները Գազայի հատվածից անսպասելիորեն հարձակվել են հրեական խաղաղ ավանների վրա: Այդ գրոհների հետևանքով սպանվել է մոտ 1200 իսրայելցի, ևս ավելի քան 250 իսրայելցի պատանդառվել է: Ըստ պաղեստինյան անկլավի առողջապահության նախարարության՝ Գազայի հատվածում իսրայելան ռազմական գործողությունների հետևանքով զոհված պաղեստինցիների թիվը գերազանցել է 45 հազարը։ «Համաս»-ը ԱՄՆ-ի և ԵՄ-ի կողմից ահաբեկչական կազմակերպություն է ճանաչվել։ Իսրայելի կառավարությունը հայտարարել է, որ Գազայի հատվածն ամբողջությամբ մաքրելու է «Համաս»-ի ահաբեկիչներից: Մեծ թվով երկրներ անհամաչափ են համարում Իսրայելի պատասխան գործողությունները: Բայդենն էլ քննադատության է ենթարկվում Իսրայելին զենք և դիվանագիտական աջակցություն ցուցաբերելու համար։

10:10 - 14 հունվարի, 2025

Բայդենն ու Զելենսկին հեռախոսազրույց են ունեցել |azatutyun.am|

azatutyun.am: ԱՄՆ նախագահ Ջո Բայդենն ու Ուկրաինայի նախագահ Վլադիմիր Զելենսկին ուրբաթ օրը հեռախոսով քննարկել են Կիևին Վաշինգտոնի աջակցությունը, Ռուսաստանի դեմ ԱՄՆ նոր պատժամիջոցները և Ուկրաինայի հակաօդային պաշտպանության ուժեղացումը, X-ի իր էջում տեղեկացրել է Ուկրաինայի նախագահը։ Զելենսկին շնորհակալություն է հայտնել Բայդենին՝ գրեթե երեք տարի շարունակվող պատերազմում Ուկրաինային ԱՄՆ աջակցության համար։ Ուկրաինայի նախագահը նաև տեղեկացրել է, որ Բայդենի հետ քննարկել են Ռուսաստանի էներգետիկ ոլորտի դեմ ԱՄՆ-ի նոր պատժամիջոցների հարցը։ «Նա [Պուտինը] պետք է զգա պատերազմի գինը՝ զգալով դրա ուղղակի ազդեցությունն իր գրպաններին»,- գրել է Զելենսկին։ Ըստ Սպիտակ տան հաղորդագրության՝ Բայդենն ընդգծել է Ուկրաինային աջակցելու կարևորությունն՝ ուկրաինացի ժողովուրդի արդար և կայուն խաղաղության համար։Շարունակությունը՝ սկզբնաղբյուր կայքում։

13:23 - 11 հունվարի, 2025

Ջո Բայդենն այցելել է Նոր Օռլեան, որտեղ տեղի էր ունեցել ահաբեկչություն |shantnews.am|

shantnews.am: ԱՄՆ նախագահ Ջո Բայդենը և առաջին տիկին Ջիլ Բայդենը այցելել են Նոր Օռլեան (Լուիզիանա), որտեղ Ամանորի գիշերը տեղի է ունեցել ահաբեկչություն: Դրա հետևանքով զոհվել է առնվազն 14 մարդ։ Այս մասին երկուշաբթի օրը հայտնել է Սպիտակ տունը։ Ինչպես երևում է տարածված փաստաթղթից, Բայդենը և նրա կինը հանդիպել են զոհվածների ընտանիքների, ինչպես նաև տեղական իշխանությունների ներկայացուցիչների հետ։

11:07 - 07 հունվարի, 2025

Բայդենը հունվարի 9-ը ԱՄՆ-ում սգո օր է հայտարարել |shantnews.am|

shantnews.am: ԱՄՆ նախագահ Ջո Բայդենը 2025 թվականի հունվարի 9-ը հայտարարել է ազգային սգո օր՝ կապված նախկին նախագահ Ջիմի Քարթերի մահվան հետ, ասվում է Սպիտակ տան կայքում հրապարակված հայտարարության մեջ։ «Ես 2025 թվականի հունվարի 9-ը հայտարարում եմ ազգային սգո օր ամբողջ Միացյալ Նահանգներում»,- ասված է հայտարարության մեջ։ Նա նաև որոշել է 30 օրով խոնարհել ԱՄՆ բոլոր դրոշները երկրի ներսում և դրսում գտնվող կառավարական շենքերում, ներառյալ ռազմական բազաները և դիվանագիտական ներկայացուցչությունները:

12:04 - 30 դեկտեմբերի, 2024

Բայդենը հանձնարարել է Պենտագոնին արագացնել զենքի մատակարարումն Ուկրաինային |azatutyun.am|

10:48 - 26 դեկտեմբերի, 2024

Բայդենը հաստատել է 2025թ․ պաշտպանության բյուջեն՝ 895 միլիարդ դոլար արժողությամբ |news.am|

news.am: ԱՄՆ նախագահ Ջո Բայդենը երկուշաբթի օրը հաստատել է 2025 ֆինանսական տարվա (մեկնարկել է հոկտեմբերի 1-ին) երկրի պաշտպանության բյուջեն՝ 895 միլիարդ դոլարի չափով։ Այս մասին ասվում է Սպիտակ տան մամուլի ծառայության տարածած հաղորդագրության մեջ։ 1800 էջի վրա կազմված փաստաթուղթը նախատեսում է միջոցների հատկացում հետախուզության, Պենտագոնի պլանների, ինչպես նաև էներգետիկայի նախարարության նախագծերի ծրագրերի իրականացման համար։ Բացի այդ՝ Բայդենի ստորագրած ակտը պարունակում է արգելք հանածո վառելիքի ոլորտում Ռուսաստանի հետ համագործակցության և տեղեկատվության փոխանակման՝ Ռազմավարական հարձակողական սպառազինությունների հետագա կրճատման և սահմանափակման մասին պայմանագրի (START) համաձայնագրով։ Բացառություն կարող է լինել, եթե պաշտպանության նախարարը կամ պետքարտուղարը ծանուցեն օրենսդիրներին, որ Ռուսաստանը տրամադրել է նմանատիպ տեղեկություն: Փաստաթուղթը պարտավորեցնում է հետախուզությանը գնահատել «ԱՄՆ անվտանգության ռիսկերը Ուկրաինային զենքի մատակարարման դադարեցման և ռուսական հատուկ գործողության հաջող ավարտի դեպքում»: Հետախուզությանը հանձնարարվել է վերլուծել Ուկրաինայի Զինված ուժերի մարտունակությունը պահպանելու հնարավորությունները ինչպես ռազմական և տնտեսական աջակցության շարունակման և դադարեցման, այնպես էլ հեռահար զենքերով խորը հարվածներ հասցնելու որոշման համաձայնությամբ կամ չեղարկումով:

10:06 - 24 դեկտեմբերի, 2024

Բայդեն. Ասադի անկումն «արդարության հաղթանակ» է, բայց նաև «ռիսկեր կան» |azatutyun.am|

azatutyun.am: Սիրիայի նախագահ Բաշար ալ-Ասադի վարչակարգի տապալումն «արդարության հաղթանակ» է, երեկ երեկոյան Սպիտակ տանն իր ելույթում հայտարարել է ԱՄՆ նախագահ Ջո Բայդենը։ Ընդունելով, որ Սիրիայում իրավիճակն անկայուն է և հղի է նոր ռիսկերով՝ ԱՄՆ նախագահը խոստացել է օգնել տարածաշրջանի երկրներին և Սիրիային անցումային այս շրջանում։ Բայդենն ասել է, որ Ասադի գտնվելու մասին ստույգ տվյալներ չունի, սակայն նշել է՝ տեղեկություններ կան, որ նա Մոսկվայում է։ Ռուսական РИА "Новости" գործակալությանն էր նաև երեկ ուշ երեկոյան, հղում անելով Կրեմլի իր աղբյուրը, հողորդել, որ Ասադը Մոսկվայում է և որ Ռուսաստանը Սիրիայի նախագահին ու նրա հարազատներին «ապաստան է տվել՝ հումանիտար նկատառումներով»: Դեկտեմբերի 8-ին սիրիացի զինյալները գրավեցինԴամասկոսը, իսկ երկիրը 24 տարի ղեկավարած Բաշար ալ-Ասադը, լքեց Սիրիան։ Իր ելույթում Բայդենը նշել է, որ Ասադի դաշնակիցները՝ Ռուսաստանը, Իրանը և լիբանանյան արմատական «Հեզբոլա» շարժումը (ԱՄՆ-ում ահաբեկչական ճանաչված) «առաջին անգամ» Սիրիայում քաղաքացիական պատերազմի ընթացքում չկարողացան օգնել Ասադին։ Բայդենը սա կապել է նաև ԱՄՆ-ի և նրա դաշնակիցների վարած քաղաքականության հետ, որը, ըստ ԱՄՆ նախագահի, հանգեցրել է Մոսկվայի և Թեհրանի թուլացմանը։ Պատմական հնարավորություն է բացվում Սիրիայի ժողովրդի համար, նաև հայտարարել է Բայդենը՝ միաժամանակ ընդգծելով, որ մի շարք ընդդիմադիր ուժեր, որոնք այժմ եկել են իշխանության, նախկինում ներգրավված են եղել ահաբեկչական գործողությունների և մարդու իրավունքների խախտումների մեջ։ «Հայաթ Թահրիր ալ-Շամ»-ը, որն առանցքային դեր ունի ընդդիմության վերջին հարձակման մեջ, Միացյալ Նահանգների կողմից ահաբեկչական խմբավորում է ճանաչվել։ Բայդենը նշել է, որ Վաշինգտոնը ընդդիմության առաջնորդներին կգնահատի ըստ իրենց արած քայլերի՝շեշտելով՝ ԱՄՆ-ն պատրաստ է օգնություն ցուցաբերել Սիրիային անցումային շրջանում։

09:34 - 09 դեկտեմբերի, 2024

«Հուսով եմ՝ ամերիկացիները կհասկանան». Բայդենը ներում է շնորհել իր որդուն, որը երկու քրեական գործերով սպասում էր դատավճիռների |aravot.am|

aravot.am: ԱՄՆ նախագահ Ջո Բայդենը ներում է շնորհել իր որդուն՝ Հանթեր Բայդենին, որը մեղավոր էր ճանաչվել զենքի և հարկային հարցերով քրեական գործերով սպասում էր դատավճիռների: Նախագահ Բայդենն ավելի վաղ ասել էր, որ չի օգտագործի իր նախագահական լիազորությունները՝ որդուն ներում շնորհելու կամ դատապարտվելուց հետո նրա պատիժը փոխելու համար։ «Ես հավատում եմ արդարադատության համակարգին, բայց քանի որ պայքարել եմ դրա դեմ, նաև կարծում եմ, որ կոշտ քաղաքականությունը վարակել է այս գործընթացը և դա հանգեցրել է արդարադատության սխալի, և երբ ես այս որոշումը կայացրի այս , իմաստ չկար հետաձգել այն», – ասված է ԱՄՆ նախագահի հայտարարության մեջ: «Հուսով եմ՝ ամերիկացիները կհասկանան, թե ինչու հայրն ու նախագահը պետք է գան այս որոշմանը»:

10:59 - 02 դեկտեմբերի, 2024

Սպիտակ տունը հաստատել է, որ Բայդենը ներկա կգտնվի Թրամփի երդմնակալությանը |armenpress.am|

armenpress.am: ԱՄՆ նախագահ Ջո Բայդենը և առաջին տիկին Ջիլ Բայդենը կմասնակցեն ընտրված նախագահ Դոնալդ Թրամփի երդմնակալության արարողությանը։ Այս մասին հաղորդում է Reuters-ը՝ վկայակոչելով Սպիտակ տան ներկայացուցչին։ «Նախագահը խոստացել էր, որ կմասնակցի երդմնակալությանը, անկախ նրանից, թե ով կհաղթի ընտրություններում։ Նա և առաջին տիկինը պատրաստվում են հարգել այդ խոստումը և մասնակցել երդմնակալությանը», - ասել է Սպիտակ տան մամուլի քարտուղարի ավագ տեղակալ Էնդրյու Բեյթսը։ Նոյեմբերի 5-ին կայացած նախագահական ընտրություններում հաղթանակ տարած Դոնալդ Թրամփի երդմնակալությունը տեղի կունենա 2025 թ. հունվարի 20-ին։

14:08 - 26 նոյեմբերի, 2024

Բայդենը վրդովեցուցիչ է անվանել իսրայելական առաջնորդների ձերբակալության համար օրդեր տալու ՄՔԴ-ի որոշումը |hy.armradio.am|

hy.armradio.am: ԱՄՆ նախագահ Ջո Բայդենը վրդովեցուցիչ է անվանել Իսրայելի վարչապետ Բենիամին Նեթանյահուի և պաշտպանության նախկին նախարար Յոավ Գալանտի ձերբակալության համար օրդեր տրամադրելու Միջազգային քրեական դատարանի որոշումը։ «ՄՔԴ-ի կողմից Իսրայելի ղեկավարության ձերբակալության համար օրդեր տրամադրելը վրդովեցուցիչ է: Թույլ տվեք կրկին պարզաբանել. Իսրայելն ու Համասը հավասար չեն: Մենք միշտ Իսրայելի կողքին կլինենք՝ ընդդեմ նրա անվտանգության սպառնալիքների», - ասվում է Բայդենի հայտարարության մեջ, որը տարածել է Սպիտակ տան մամուլի ծառայությունը : Հինգշաբթի ՄՔԴ-ն Նեթանյահուի և Գալանտի ձերբակալության համար օրդեր էր տվել Գազայի հատվածում ենթադրյալ ռազմական հանցագործությունների համար: Դատարանը նաև մերժել էր փաստարկները, որոնցով վիճարկվում էր դատարանի իրավասությունը՝ Իսրայելի քաղաքացիների դեմ օրդեր տրամադրելու վերաբերյալ:

09:51 - 22 նոյեմբերի, 2024

Մակրոնը ողջունել է ԱՄՆ որոշումը՝ չեղարկելու Ուկրաինայի կողմից հեռահար հրթիռների օգտագործման սահմանափակումները

Նախագահ Ջո Բայդենը «լավ որոշում» է կայացրել՝ թույլ տալով Ուկրաինային հեռահար զենքերով հարվածելու Ռուսաստանին: Այս մասին հայտարարել է Ֆրանսիայի նախագահ Էմանուել Մակրոնը երկուշաբթի երեկոյան, հայտնում է Politico-ն։ Մակրոնի խոսքով Բայդենի նոր որոշումը պատասխան է Ռուսաստանի կողմից Ուկրաինայի հետ կոնֆլիկտը սրելուն՝ Հյուսիսային Կորեայից զինվորականների բերելով: «Ռուսաստանը միակ ուժն է, որ էսկալացիայի որոշում է կայացրել: Իրապես, սա այն շրջադարձային կետն է, որ ԱՄՆ-ին մղել է նման որոշման»,- ասել է Ֆրանսիայի նախագահը Ռիո դե Ժանեյրոյում G20 գագաթնաժողովի ժամանակ: Հիշեցնենք, որ ամերիկյան լրատվամիջոցները երեկ հայտնել են, որ ԱՄՆ նախագահ Ջո Բայդենի վարչակազմը չեղարկել է սահմանափակումները, որոնք արգելում էին Ուկրաինային օգտագործել ամերիկյան զենքը ռուսական տարածքի խորքը հարվածելու համար։ Սպիտակ տունը չի մեկնաբանել այս լուրերը։ Ֆրանսիական Le Figaro-ն էլ նախ գրել էր, որ Ֆրանսիան և Մեծ Բրիտանիան ևս թույլատրել են օգտագործել իրենց հրթիռները ՌԴ խորքերը հարվածելու համար, հետո սակայն, պարբերականը ջնջել էր այս հաղորդագրությունը: Ավելի ուշ Ֆրանսիայի ԱԳ նախարարը հայտնել է, որ Փարիզը չի փոխել իր դիրքորոշումը այս հարցում:

11:31 - 19 նոյեմբերի, 2024

Բայդենը թույլ է տալիս Ուկրաինային հարվածել Ռուսաստանին հեռահար զենքով. ԶԼՄ-ներ |azatutyun.am|

azatutyun.am: Ամերիկյան լրատվամիջոցները հայտնում են, որ նախագահ Ջո Բայդենի վարչակազմը չեղարկել է սահմանափակումները, որոնք արգելում էին Ուկրաինային օգտագործել ամերիկյան զենքը ռուսական տարածքի խորքը հարվածելու համար։ The New York Times-ը, AP-ն և Reuters-ը վկայակոչում են հարցին քաջատեղյակ աղբյուրների: Սպիտակ տունը չի մեկնաբանել այս լուրերը։ Եթե դա հաստատվի, կնշանակի ԱՄՆ քաղաքականության լուրջ փոփոխություն՝ Կիևի կողմից նման գործողություններ թույլ տալու երկարամյա խնդրանքների ֆոնին: Reuters-ը, հղում անելով իր աղբյուրներին, հայտնում է, որ Կիևը նախատեսում է առաջիկա մի քանի օրվա ընթացքում իրականացնել նման հեռահար հարձակումներից առաջինը, սակայն մանրամասներ չի հայտնել։ Ուկրաինան, ամենայն հավանականությամբ, կօգտագործի ATACMS հրթիռները, որոնք ունեն մինչև 300 կիլոմետր հեռահարություն, հայտնում է Reuters-ը՝ վկայակոչելով երեք աղբյուրների։ Ռուսաստանի նախագահ Վլադիմիր Պուտինը ավելի վաղ հայտարարել է, որ Արևմուտքը «պատերազմի» մեջ կմտնի Ռուսաստանի հետ, եթե թույլ տա Ուկրաինային հարվածել արևմտյան արտադրության հեռահար հրթիռներով, իսկ ԱԽ փոխնախագահ Դմիտրի Մեդվեդևը շեշտել է, թե այդ դեպքում Ռուսաստանը կարող է ոչնչացնել Ուկրաինայի մայրաքաղաքը սովորական սպառազինությամբ։

09:27 - 18 նոյեմբերի, 2024

Բայդենն ընդունել է Թրամփին Սպիտակ տանը

ԱՄՆ նորընտիր նախագահ Դոնալդ Թրամփը չորեքշաբթի օրը ժամանել է Սպիտակ տուն՝ հանդիպելու նախագահ Ջո Բայդենի հետ, հայտնում են ամերիկյան լրատվամիջոցները։ Քաղաքական գործիչները բանակցություններ են վարում Օվալաձև աշխատասենյակում։ Բայդենը Թրամփին խոստացել է, որ կապահովի իշխանության սահուն անցումը ԱՄՆ հաջորդ վարչակազմին։ «Դե, պարոն նորընտիր նախագահ, նախկին նախագահ Դոնալդ, շնորհավորում եմ»,- ասել է Բայդենը՝ ողջունելով Թրամփին: Թրամփը պատասխանել է, որ քաղաքականությունը կոշտ և հաճախ ոչ այնքան հաճելի աշխարհ է, բայց այսօր այստեղ ամեն ինչ լավ է, և որ ինքը գնահատում է դա։ Սպիտակ տան մամուլի քարտուղար Կարին Ժան Պիերը, մեկնաբանելով Թրամփի և Բայդենի նախօրեին կայանալիք հանդիպումը, ասել է, որ ամերիկացի առաջնորդն այն անցկացնում է, քանի որ «հավատում է նորմերին»։ «Սա կարևոր է ոչ միայն իր, այլև ամերիկյան ժողովրդի համար»,- ընդգծել է նա։

21:27 - 13 նոյեմբերի, 2024

Թրամփն ու Բայդենը կհանդիպեն Վաշինգտոնում նոյեմբերի 13-ին |shantnews.am|

shantnews.am: Ամերիկայի ներկայիս առաջնորդ Ջո Բայդենը և ԱՄՆ նորընտիր նախագահ Դոնալդ Թրամփը կհանդիպեն Սպիտակ տանը չորեքշաբթի՝ նոյեմբերի 13-ին։ Այս մասին ասված է Սպիտակ տան մամուլի քարտուղար Կարինե Ժան Պիերի գրավոր հայտարարության մեջ։ Այն հստակեցնում է, որ հանդիպումը տեղի կունենա Սպիտակ տան Օվալաձեւ աշխատասենյակում: Զեկույցում ասվում է, որ հանդիպման վերաբերյալ լրացուցիչ մանրամասներ կհաղորդվեն ավելի ուշ: Թրամփի օգնականներն ավելի վաղ հայտնել էին, որ նրա հանդիպումը Բայդենի հետ շուտով տեղի կունենա։

21:12 - 09 նոյեմբերի, 2024

Փելոսին նշել է ԱՄՆ ընտրություններում դեմոկրատների պարտության պատասխանատուին |shantnews.am|

shantnews.am: ԱՄՆ Կոնգրեսի Ներկայացուցիչների պալատի նախկին խոսնակ Նենսի Փելոսին մեղադրել է նախագահ Ջո Բայդենին նախագահական ընտրություններում ԱՄՆ Դեմոկրատական կուսակցության և նրա թեկնածու Քամալա Հարիսի պարտության համար։ The New York Times-ի հետ զրույցում նա ասել է, որ եթե Բայդենը հրաժարվեր առաջադրվել երկրորդ ժամկետի համար, ամեն ինչ կարող էր այլ կերպ լինել։ «Եթե նախագահն ավելի շուտ հեռանար, կարող էին այլ թեկնածուներ էլ լինել»,- ասել է Փելոսին։ Նրա խոսքով՝ այս դեպքում Քամալա Հարիսը կարող էր «հաջողության հասնել», բայց դա տեղի չունեցավ։ Բայդենի որոշումը կուսակցության համար ավելի է դժվարացրել մյուս «կենսունակ թեկնածուներին» գնահատելը», -ասել է Փելոսին:

10:09 - 09 նոյեմբերի, 2024

Բայդենը վերահաստատեց՝ իշխանությունն անցնցում կփոխանցի Թրամփին

ԱՄՆ նախագահ Ջո Բայդենը վերահաստատեց՝ իշխանությունն անցնցում, խաղաղ կփոխանցի նոյեմբերի 5-ին նախագահական ընտրություններում հաղթած հանրապետական թեկնածու Դոնալդ Թրամփին։ Ընտրություններում դեմոկրատների ջախջախիչ պարտությունից հետո իր առաջին հրապարակային ելույթում Սպիտակ տան ղեկավարը շեշտեց՝ ընդունում է քվեարկության արդյունքները, հարգում է ամերիկացիների ընտրությունը։ «Մենք ընդունում ենք ընտրությունը, որն արել է երկիրը։ Ես բազմիցս եմ ասել՝ չի կարելի սիրել երկիրդ միայն այն ժամանակ, երբ դու հաղթած ես։ Չես կարող սիրել հարևանիդ միայն այն ժամանակ, երբ համաձայն ես նրա հետ»,- հայտարարեց ԱՄՆ 46-րդ նախագահը։ Բայդենը հայտարարեց՝ ամերիկյան ընտրական համակարգը վստահելի և թափանցիկ է, ի տարբերություն Դոնալդ Թրամփի, որը 2020 թվականին հրաժարվեց ընդունել մրցակցի հաղթանակը։ «Ես նաև հույս ունեմ, որ մենք կկարողանանք վերջ տալ ամերիկյան ընտրական համակարգի ազնվության մասին հարցերին։ Այն ազնիվ է, արդար և թափանցիկ»,- պնդեց նախագահ Բայդենը։

21:27 - 07 նոյեմբերի, 2024