Օլաֆ Շոլց

Տեղի է ունեցել Նիկոլ Փաշինյանի և Օլաֆ Շոլցի հանդիպումը

Մյունխենի անվտանգության համաժողովի շրջանակում վարչապետ Նիկոլ Փաշինյանը հանդիպում է ունեցել Դաշնային կանցլեր Օլաֆ Շոլցի հետ: Այս մասին հայտնում են ՀՀ վարչապետի աշխատակազմից։ Վարչապետ Փաշինյանն առողջություն է մաղթել Մյունխենում օրերս տեղի ունեցած միջադեպից տուժածներին: Հանդիպման ընթացքում կողմերը քննարկել են Հայաստան-Գերմանիա երկկողմ հարաբերությունների օրակարգը և բազմոլորտ համագործակցության խորացման հեռանկարները: Վարչապետ Փաշինյանը կարևորել է երկկողմ կապերի ընդլայնումն ու առևտրատնտեսական կապերի ակտիվացումը: Զրուցակիցներն անդրադարձել են նաև տարածաշրջանային անվտանգության ու կայունության հարցերին: Վարչապետ Փաշինյանը ներկայացրել է Հայաստանի Կառավարության՝ տարածաշրջանում խաղաղության հաստատմանն ուղղված ջանքերը, այդ համատեքստում մանրամասներ հաղորդել «Խաղաղության խաչմերուկ» նախաձեռնության` հիմնված ինքնիշխանության, իրավազորության, հավասարության և փոխադարձության սկզբունքների հիման վրա, ինչպես նաև Հայաստան-Ադրբեջան խաղաղության գործընթացի զարգացումների մասին: Կանցլեր Շոլցն իր հերթին նշել է, որ Գերմանիան պատրաստ է շարունակել աջակցել Հայաստանի ժողովրդավարական բարեփոխումների օրակարգին, ինչպես նաև խաղաղության հաստատմանն ուղղված քայլերին: Հանդիպման ավարտին կողմերը վերահաստատել են փոխգործակցության խորացման պատրաստակամությունը և կարևորել երկկողմ քաղաքական երկխոսության շարունակականությունը:

14:48 - 15 փետրվարի, 2025

Ալիևն ու Շոլցը Դավոսում քննարկել են Ադրբեջան-Եվրամիություն գործակցության զարգացման հեռանկարը |1lurer.am|

1lurer.am: Դավոսում Համաշխարհային տնտեսական համաժողովի շրջանակում հանդիպել են Գերմանիայի կանցլերը և Ադրբեջանի նախագահը: Ադրբեջանական կողմի տվյալով՝ հանդիպումը տեղի է ունեցել գերմանական կողմի առաջարկով: Պաշտոնյաները քննարկել են Ղազախստանում ադրբեջանական ինքնաթիռի կործանման հետաքննության ընթացքը, Բաքու-Բեռլին հարաբերությունները, Ադրբեջան-Եվրամիություն գործակցության զարգացման հեռանկարը և այլ հարցեր։ Օլաֆ Շոլցը հայտարարել է, որ Գերմանիան աջակցում է Հարավային Կովկասում խաղաղության և կայունության հաստատման ջանքերին։

20:09 - 21 հունվարի, 2025

Գերմանիայի արտգործնախարարը հեռացել է խորհրդակցությունից, երբ Շոլցը հրաժարվել է Ուկրաինային օգնելուց. Bild |news.am|

news.am: Գերմանիայի կանցլեր Օլաֆ Շոլցը չի կարողացել հասնել երկրի ԱԳ նախարար Աննալենա Բերբոքի հետևից, որը լքել է կառավարության նիստը։ Դեպքը տեղի է ունեցել այն բանից հետո, երբ նիստի ժամանակ Շոլցն արգելափակել է Ուկրաինայի օգնության նոր փաթեթը, գրել է գերմանական Bild պարբերականը։ Լրատվամիջոցի տեղեկացմամբ՝ Բերբոքի և Շոլցի միջև տարաձայնության պատճառը 3 մլրդ եվրոյիօգնության փաթեթն էր, որի ընդունման հարցը պնդել է Գերմանիայի պաշտպանության նախարար Բորիս Պիստորիուսը։ Բերբոքը հրապարակայնորեն քննադատել է կանցլերի վետոն։ Տեղեկացվել է, որ Բերբոքը և Պիստորիուսը փաստաթղթերի փաթեթը կազմել են մի քանի ամսվա ընթացքում։ Նոյեմբերի սկզբին Շոլցն ինքը մեղադրել էր Գերմանիայի Ազատ դեմոկրատական կուսակցության առաջնորդ, ֆինանսների նախարար Քրիստոֆեր Լինդներին Ուկրաինային խիստ անհրաժեշտ միջոցներն արգելափակելու մեջ, բայց այս անգամ ինքն է արգելափակել այդ փաթեթը։

16:16 - 18 հունվարի, 2025

Գերմանիայի կանցլերն անդրադարձել է Ակտաուում տեղի ունեցած ավավթարին |tert.am|

tert.am: Գերմանիայի կանցլերն անդրադարձել է «Ադրբեջանական ավիաուղիներ»-ի ինքնաթիռի կործանմանը, որի հետևանքով տասնյակ մարդիկ են զոհվել: Օլաֆ Շոլցը X-ի միկրոբլոգում գրել է, որ ռուս-ուկրաինական պատերազմն աստիճանաբար ավելի շատ անմեղ մարդկանց վրա է ազդում՝ նույնիսկ Ուկրաինայի սահմաններից դուրս: «Այդ մասին է վկայում Ակտաուում տեղի ունեցած ավիավթարը, այն պետք է ամբողջությամբ հետաքննվի։ Մեր մտքերը զոհվածների ընտանիքների հետ են»,- գրել է կանցլերը։

14:58 - 31 դեկտեմբերի, 2024

Թրամփն ու Շոլցը քննարկել են Եվրոպայում անվտանգային քաղաքականության հետ կապված խնդիրները |1lurer.am|

1lurer.am: ԱՄՆ ընտրված նախագահ Դոնալդ Թրամփը և Գերմանիայի կանցլեր Օլաֆ Շոլցը հեռախոսազրույց են ունեցել: Գերմանական կողմի հաղորդագրության համաձայն՝ օրակարգում են եղել Եվրոպայում անվտանգային քաղաքականության հետ կապված խնդիրները։ «Նրանք համաձայնել են, որ Ուկրաինայի դեմ Ռուսաստանի պատերազմը շատ երկար է ձգվում, և կարևոր է հնարավորինս շուտ շարժվել արդար և կայուն խաղաղության ուղով»,- ասված է Գերմանիայի նախարարների կաբինետի հայտարարության մեջ: Նշվում է, որ կանցլեր Շոլցը պատրաստակամություն է հայտնել՝ շարունակելու Ուկրաինային աջակցությունն այնքան, որքան անհրաժեշտ է։ Շոլցը և Թրամփը հեռախոսազրույց էին ունեցել նաև նոյեմբերին, պայմանավորվել աշխատել Եվրոպայում խաղաղության վերականգնման ուղղությամբ:

12:09 - 20 դեկտեմբերի, 2024

Շոլցը Կիև է ժամանել անակնկալ այցով

Գերմանիայի կանցլեր Օլաֆ Շոլցը չհայտարարված այցով ժամանել է Կիև։ Վերջին անգամ նա Ուկրաինայի մայրաքաղաք այցելել էր 2022 թվականին Ֆրանսիայի նախագահ Էմմանուել Մակրոնի և Իտալիայի Մարիո Դրագիի հետ միասին: Նշվում է, որ Գերմանիայի կառավարության ղեկավարը կհանդիպի Վլադիմիր Զելենսկու հետ։ «Ես ցանկանում եմ այստեղ հստակեցնել, որ Գերմանիան կմնա Ուկրաինայի ամենաուժեղ աջակիցը Եվրոպայում»,- ժամանելուն պես ասել է Շոլցը՝ խոստանալով դեկտեմբերին 650 միլիոն եվրոյի լրացուցիչ զենքի մատակարարումներ: Նշենք, որ կանցլերի այցը տեղի է ունենում ՌԴ նախագահ Վլադիմիր Պուտինի հետ նրա հեռախոսազրույցից հետո, որը քննադատության էր արժանացել Կիևում: Հեռախոսազրույցը մեկնաբանելիս Շոլցն ասել էր, որ այն ցույց է տվել, որ ուկրաինական պատերազմի վերաբերյալ Ռուսաստանի նախագահի հայացքներում փոփոխության նշույլ անգամ չկա։

11:24 - 02 դեկտեմբերի, 2024

Զրույցը ցույց տվեց, որ պատերազմի վերաբերյալ Պուտինի տեսակետը չի փոխվել. Շոլց |azatutyun.am|

azatutyun.am: Գերմանիայի կանցլեր Օլաֆ Շոլցն ասել է, որ օրերս Վլադիմիր Պուտինի հետ իր զրույցը ցույց է տվել, որ ուկրաինական պատերազմի վերաբերյալ Ռուսաստանի նախագահի հայացքներում փոփոխության նշույլ անգամ չկա։ Շոլցն ասել է, որ արժեր խոսել Պուտինի հետ՝ փարատելու այն պատրանքները, որոնք նա կարող է ունենալ, որ Արևմուտքը պատրաստվում է հրաժարվել Ուկրաինային աջակցությունից: «Զրույցը շատ մանրամասն էր... քիչ բան է փոխվել պատերազմի վերաբերյալ Ռուսաստանի նախագահի տեսակետներում, և դա լավ նորություն չէ», - ասել է Գերմանիայի կանցլերը, ում հեռախոսազանգը Պուտինին քննադատության է ենթարկվել։ Սա երկու երկրների առաջնորդների առաջին հեռախոսազրույցն էր 2022 թվականի դեկտեմբերից ի վեր։Շարունակությունը՝ սկզբնաղբյուր կայքում։

17:36 - 17 նոյեմբերի, 2024

Պուտինի և Շոլցի հեռախոսազրույցը տևել է մեկ ժամ |factor.am|

factor.am: Ռուսաստանի նախագահ Վլադիմիր Պուտինի և Գերմանիայի կանցլեր Օլաֆ Շոլցի՝ ուրբաթ օրը տեղի ունեցած հեռախոսազրույցը տևել է մեկ ժամ։ Այս մասին հայտնել է ՌԴ նախագահի մամուլի քարտուղար Դմիտրի Պեսկովը լրագրող Պավել Զարուբինին տված հարցազրույցում․գրում է regnum.ru-ն։Հարցազրույցում Կրեմլի խոսնակը նշել է, որ զրույցի կարևորությունը հենց քաղաքական կամքն է՝ առաջին ձեռքից պարզելու դիրքորոշումը։ Նրա խոսքով՝ «Ուկրաինական թեմայի շուրջ քննարկումները եղել են անկեղծ, սակայն հնարավոր չէ խոսել կարծիքների համընկնման մասին՝ խորը տարաձայնությունների պատճառով։ Սակայն այն, որ խոսակցությունը կայացել է, դրական է»։ Հիշեցնենք՝ ՌԴ նախագահ Վլադիմիր Պուտինը երկու տարվա ընթացքում առաջին անգամ հեռախոսազրույց է ունեցել Գերմանիայի կանցլեր Օլաֆ Շոլցի հետ:

17:47 - 16 նոյեմբերի, 2024

Շոլցն ու Պուտինը հեռախոսազրույց են ունեցել շուրջ 2 տարվա դադարից հետո |azatutyun.am|

azatutyun.am: Գերմանիայի կանցլեր Օլաֆ Շոլցը հեռախոսազրույց է ունեցել Ռուսաստանի նախագահ Վլադիմիր Պուտինի հետ, հայտնում է Գերմանիայի կառավարությունը՝ նշելով, որ զրույցը տևել է մեկ ժամ։ Սա երկու երկրների առաջնորդների առաջին հեռախոսազրույցն է 2022 թվականի դեկտեմբերից ի վեր։ Գերմանիայի կառավարության խոսնակի փոխանցմամբ՝ կանցլեր Շոլցը Կրեմլի ղեկավարին կոչ է արել դադարեցնել պատերազմը, դուրս բերել զորքերն Ուկրաինայից՝ ընդգծելով, որ Գերմանիան կաջակցի Կիևին այնքան ժամանակ, որքան անհրաժեշտ է։ Գերմանիայի առաջնորդը Պուտինի հետ զրույցում նաև պնդել է, որ Մոսկվան պետք է պատրաստվի Ուկրաինայի հետ բանակցություններին՝ արդար և կայուն խաղաղության հասնելու համար։ Ռուսական կողմը հեռախոսազրույցի մասին առայժմ չի հաղորդել։

18:48 - 15 նոյեմբերի, 2024

Շոլցն ու Թրամփը պատրաստակամություն են հայտնել համագործակցել հանուն Եվրոպայի խաղաղության |armenpress.am|

armenpress.am: Գերմանիայի կանցլեր Օլաֆ Շոլցը և ԱՄՆ-ի ընտրված նախագահ Դոնալդ Թրամփը հեռախոսազրույցի ընթացքում համաձայնության են եկել, որ համագործակցելու են Եվրոպայում խաղաղություն ապահովելու շուրջ: Այս մասին հաղորդում է Deutsche Welle-ն՝ վկայակոչելով Գերմանիայի կառավարության պաշտոնական ներկայացուցիչ Շտեֆեն Հեբեշտրայթին։ Շոլցը հեռախոսազրույցի ընթացքում ընդգծել է Ուկրաինային աջակցությունը շարունակելու կարևորությունը։ Կողմերը պայմանավորվել են «միասին աշխատել խաղաղությունը Եվրոպա վերադարձնելու ուղղությամբ»։ Նրանք նաև կարծիքներ են փոխանակել Գերմանիայի և ԱՄՆ-ի հարաբերությունների և առկա աշխարհաքաղաքական մարտահրավերների շուրջ։ Հեբեշտրայթի խոսքով՝ Շոլցը նաև «ընդգծել է Գերմանիայի կառավարության պատրաստակամությունը՝ շարունակելու երկու երկրների կառավարությունների միջև երկար տարիների հաջող համագործակցությունը»: Սա նոյեմբերի 5-ին կայացած նախագահական ընտրություններում Դոնալդ Թրամփի հաղթանակից հետո նրա առաջին հեռախոսազրույցն էր Օլաֆ Շոլցի հետ։ Նոյեմբերի 10-ին կայացած հեռախոսազրույցից հետո Շոլցը հյուրընկալվել է ARD հանրային հեռարձակողի եթերում և խոսել Թրամփի հետ ապագա համագործակցության հեռանկարների մասին։ «Իմ սկզբունքը միշտ հետևյալն է, եթե կարելի է դա ասել պարզ բառերով, դու պարում ես այն մարդկանց հետ, ովքեր սենյակում են։ Դա նաև վերաբերում է ԱՄՆ ապագա նախագահին», - ասել է նա։ Նոյեմբերի 10-ին ԱՄՆ ընտրված նախագահ Դոնալդ Թրամփն Ուկրաինայի թեման քննարկել է նաև ՌԴ նախագահ Վլադիմիր Պուտինի հետ հեռախոսազրույցի ընթացքում։

11:32 - 11 նոյեմբերի, 2024

Ալիևը Շոլցին ասել է՝ Երևանն ու Բաքուն մոտ են խաղաղության պայմանագրի շուրջ վերջնական համաձայնությանը |azatutyun.am|

azatutyun.am: Գերմանիայի կանցլերի հետ հեռախոսազրույցում Ադրբեջանի նախագահ Իլհամ Ալիևը կրկին շեշտել է, թե «Ադրբեջանի նկատմամբ Հայաստանի Սահմանադրությամբ ամրագրված տարածքային պահանջները դեռևս պահպանվում են»։ Միաժամանակ Իլհամ Ալիևն Օլաֆ Շոլցին ասել է, որ կողմերը մոտ են փաստաթղթի տեքստի շուրջ վերջնական համաձայնության գալուն, և բանակցությունները կշարունակվեն COP-ի ավարտից հետո, փոխանցում են ադրբեջանական ԶԼՄ-ները։ Հայտարարելով, որ Գերմանիան աջակցում է Երևանի և Բաքվի միջև խաղաղության և բարիդրացիական հարաբերությունների հաստատմանը, Օլաֆ Շոլցն ընդգծել է՝ Բեռլինը կողմերին կոչ է անում համարձակ քայլեր ձեռնարկել։ Գերմանիայի կանցլերը փոխանցել է, որ չի մասնակցելու Ադրբեջանում COP29-ի գագաթնաժողովին։

10:48 - 10 նոյեմբերի, 2024

Գերմանիայի կանցլերը չի մասնակցի Բաքվում կայանալիք COP29 կլիմայի գագաթնաժողովին |armenpress.am|

armenpress.am: Գերմանիայի կանցլեր Օլաֆ Շոլցը չի մասնակցի Բաքվում կայանալիք COP29 կլիմայի գագաթնաժողովին։ «Արմենպրես»-ի հաղորդմամբ՝ այս մասին հայտնում է Bloomberg-ը։ Շոլցը, ով պետք է ներկա գտնվեր գագաթնաժողովի առաջնորդների հանդիպմանը, չեղարկել է իր մասնակցությունը՝ Գերմանիայում քաղաքական ճգնաժամը հաղթահարելու նպատակով։ Եվրոպական հանձնաժողովի նախագահ Ուրսուլա ֆոն դեր Լայենը նույնպես չի մասնակցի, քանի որ կենտրոնացած է իր երկրորդ ժամկետին անցնելու վրա։ Ֆրանսիայի նախագահ Էմանուել Մակրոնը նույնպես բաց կթողնի գագաթնաժողովը՝ ըստ ելույթների ցուցակի։ Այս բացակայությունները կարող են ազդեցություն ունենալ գագաթնաժողովի բանակցությունների վրա, որտեղ Եվրոպան ավանդաբար կարևոր դեր է խաղում կլիմայի փոփոխության դեմ պայքարում։

21:45 - 07 նոյեմբերի, 2024

Քանի դեռ Վրաստանը չի փոխել ներկայիս կուրսը, չենք կարողանա աջակցել ԵՄ անդամակցության բանակցությունների մեկնարկին. Մակրոնի, Շոլցի, Տուսկի հայտարարությունը |tert.am|

tert.am: Ֆրանսիայի նախագահ Էմանուել Մակրոնը, Գերմանիայի կանցլեր Օլաֆ Շոլցը և Լեհաստանի վարչապետ Դոնալդ Տուսկը համատեղ հայտարարություն են տարածել Վրաստանում քաղաքական իրավիճակի վերաբերյալ, հայտնում է eadaily.com կայքը։«Քանի դեռ Վրաստանը չի փոխել իր ներկայիս կուրսը և ջանքեր չի ցուցաբերել շոշափելի բարեփոխումների առումով, մասնավորապես՝ հետ կանչելով եվրոպական արժեքներին և սկզբունքների հակասող օրենքները, մենք չենք կարողանա աջակցել ԵՄ անդամակցության բանակցությունների մեկնարկին»,- ասել են եվրոպացի առաջնորդները:ԱՄՆ-ն և ԵՄ-ն դժգոհ են այսպես կոչված «օտարերկրյա գործակալների» և ԼԳԲՏ քարոզչության արգելքի մասին «Վրացական երազանք»-ի ընդունած օրենքներից:

13:02 - 07 նոյեմբերի, 2024

Գերմանիայի իշխող կոալիցիան կազմալուծվել է. Շոլցը Բունդեսթագից վստահության քվե կխնդրի |armenpress.am|

armenpress.am: Գերմանիայում իշխող «լուսացույցի կոալիցիան», կազմված Գերմանիայի Սոցիալ-դեմոկրատական կուսակցությունից, Ազատ դեմոկրատական կուսակցությունից և «Միություն 90»-ից (կանաչներ), կազմալուծվել է։ Գերմանիայի կանցլեր Օլաֆ Շոլցը հունվարի 15-ին Բունդեսթագից վստահության քվե կխնդրի իր կառավարության համար, որպեսզի կարողանա մարտին արտահերթ ընտրություններ անցկացնել։ Այս մասին հաղորդում է Deutsche Welle-ն։ «Մեզ հարկավոր է մի կառավարություն, որը կարող է գործել, որն ուժ ունի՝ մեր երկրի համար անհրաժեշտ որոշումներ կայացնելու», - ասել է Շոլցը լրագրողներին: Դրա հետ մեկտեղ նա հայտարարել է, որ պաշտոնից ազատում է իշխող կոալիցիայի կազմում Ազատ դեմոկրատական կուսակցությունից ֆինանսների նախարար Քրիստիան Լինդներին, որը նաև կուսակցության ղեկավարն է։ Շոլցը պարզաբանել է, որ նախարարը կառուցողական չի գործել բյուջետային հարցերում և արգելափակել է անհրաժեշտ օրենքների ընդունումը։ Իր հերթին Լինդները Շոլցին մեղադրել է կարմիր-կանաչ-դեղին (կուսակցությունների գույները) կոալիցիայի կազմալուծման համար։ Շոլցի և Լինդների միջև լուրջ տարաձայնություններ կան տնտեսական, ֆինանսական և սոցիալական քաղաքականության հետ կապված, որի պատճառով նրանք չեն կարողանում ընդունել 2025 թվականի բյուջեն։

12:04 - 07 նոյեմբերի, 2024

Բայդենը, Շոլցը, Մակրոնը և Սթարմերը քառակողմ հանդիպում են անցկացրել |1lurer.am|

1lurer.am: ԱՄՆ նախագահ Ջո Բայդենը ուրբաթ՝ 18 հոկտեմբերին, կոչ է արել Արևմուտքին պահպանել իր աջակցությունն Ուկրաինային, քանի որ Կիևին սպասում է խստաշունչ ձմեռ, իսկ ԱՄՆ նախագահի ընտրությունը մտահոգություններ է առաջացնում Վաշինգտոնի վճռականության հարցում: Բայդենը Բեռլին կատարած մեկօրյա այցի ժամանակ Գերմանիայի կանցլեր Օլաֆ Շոլցի հետ փակ բանակցություններ է վարել՝ քննարկելու հարցեր, սկսած Ուկրաինայից մինչև Մերձավոր Արևելքում ընդլայնվող հակամարտությունը: Մեծ Բրիտանիայի վարչապետ Քիր Սթարմերը և Ֆրանսիայի նախագահ Էմանուել Մակրոնը կեսօրին միացել են Բայդենին և Շոլցին՝ «քառյակի հանդիպմանը», որը հիմնականում կենտրոնացած է եղել այն հարցի ուղղությամբ, թե ինչպես դադարեցնել մարտերն Ուկրաինայում, քանի դեռ ռուսական ուժերը առաջ են շարժվում:

21:01 - 18 հոկտեմբերի, 2024

Գերմանիայում կկայանա Բայդենի, Մակրոնի, Շոլցի և Սթարմերի հանդիպումը․ CNN |tert.am|

tert.am: ԱՄՆ նախագահ Ջո Բայդենն այս շաբաթ Գերմանիա այցի ընթացքում կհանդիպի Գերմանիայի կանցլեր Օլաֆ Շոլցի, Ֆրանսիայի նախագահ Էմանուել Մակրոնի և Մեծ Բրիտանիայի վարչապետ Քիր Սթարմերի հետ, հայտնում է CNN-ը՝ հղում անելով աղբյուրներին։ Ղեկավարները պետք է բանակցություններ վարեին հոկտեմբերի 12-ին «Ռամշտայն» բազայում և քննարկեին Ուկրաինային օգնություն տրամադրելու հարցը, սակայն ԱՄՆ նախագահը չեղարկել էր այցը ԱՄՆ-ն պատուհասած «Միլթոն» փոթորիկի պատճառով։ CNN-ը չի հստակեցրել Բեռլինում նախատեսված հանդիպման մանրամասները։ Գերմանական լրատվամիջոցները գրել են, որ Ջո Բայդենի այցի ծրագիրը «էականորեն կրճատվել է»՝ ի սկզբանե նախատեսվածի համեմատ։ Նշվում էր, որ հոկտեմբերի 18-ին ԱՄՆ նախագահը պետք է հանդիպի Օլաֆ Շոլցի և Գերմանիայի նախագահ Ֆրանկ Վալտեր Շտայնմայերի հետ։

10:07 - 16 հոկտեմբերի, 2024