Ռոբերտ Քոչարյան

Դատարանը Ռոբերտ Քոչարյանին, Սեյրան Օհանյանին, Յուրի Խաչատուրովին բերման ենթարկելու որոշում է կայացրել |civilnet.am|

15:02 - 15 նոյեմբերի, 2024

Քոչարյանը վստահեցնում է՝ քաղաքականությունից դեռ դուրս չի գա, դժգոհում է անարդարությունից |azatutyun.am|

azatutyun.am: Նորից դատարան կանչված ՀՀ երկրորդ նախագահն այսօր այդպես էլ չպատասխանեց լրագրողների հարցին՝ արդյոք իրեն պատասխանատու համարում է Երևանի կենտրոնում 10 մարդկանց սպանության համար։ Ռոբերտ Քոչարյանը քաղաքականությունից դուրս չի գա: երկրորդ նախագահն ինքն այդ մասին այսօր ասաց՝ իր դեմ նոր դատաքննության մեկնարկին։ Միաժամանակ վստահեցրեց, թե չի հավակնում վարչապետի պաշտոնին: «Ոչ, ոչ, դա ի՛մ իրավունքն է, ես չեմ զբաղվել քաղաքականությամբ, բայց երկիրը այնպիսի վտանգների տակ է հայտնվել և այնպիսի արհավիրքների տակ է հայտնվել, և ինքս, նաև ինձնով են սկսել զբաղվել որպես քաղաքականությամբ, այդ ամբողջական պատկերը, այո, ինձ ստիպել է վերադառնալ քաղաքականության մեջ: Եվ մինչև այդ սպառնալիքները չվերանան, իմ իրավունքն է և իմ թիմի իրավունքն է զբաղվել քաղաքականությամբ», - հայտարարեց Քոչարյանը: Վարչապետի հրաժարականը պահանջող Բագրատ արքեպիսկոպոս Գալստանյանի շարժմանն իր առաջնորդած «Հայաստան» դաշինքով սատարող երկրորդ նախագահն անդրադարձավ վերջերս Շիրակի թեմի առաջնորդի դիտարկմանը, թե շարժումը չի հաջողում, քանի որ երկրորդ և երրորդ նախագահների ուրվականները քայքայել են այն։ «Իսկական առաջնորդին, բնածին առաջնորդին ոչ մեկի ստվերը չի կարող խանգարել: Մեծ մարդը միշտ ունի մեծ ստվեր, փոքր մարդը ունի փոքր ստվեր: Կոնկրետ Բագրատ սրբազանին ոչ մեկի ստվերը չի խանգարի», - ասաց նախկին նախագահը: Ռոբերտ Քոչարյանը Հակակոռուպցիոն դատարան էր եկել Մարտի 1-ի գործով։ Երկրորդ նախագահը դեռ 2021-ին առաջին ատյանի դատարանի կողմից արդարացվեց, բայց վերջերս վճռաբեկ ատյանը բեկանեց այդ վճիռն ու գործն ուղարկեց նոր քննության։ Քոչարյանն այսօր այդպես էլ չպատասխանեց լրագրողների համառ հարցին՝ արդյոք իրեն պատասխանատու համարում է իր նախագահության օրոք մայրաքաղաքի կենտրոնում 10 մարդկանց սպանության համար։ Ավելին՝ երկրորդ նախագահը, որ դեռ 2018-ից պնդում է, թե անմեղ է, այսօր դատական նիստից հետո անարդարությունից դժգոհեց. - «Ավելի քան մեկուկես տարի կալանավորված եմ եղել ապօրինաբար, չեղած հոդվածով, և մինչ այսօր ինձնից ներողություն չի խնդրել ո՛չ Դատախազությունը, ո՛չ ընդհանրապես որևէ պետական մարմին: Ավելին՝ շարունակում են աճպարարությամբ, ինչ-որ, այս գործը հետ բերել դատարան՝ ինչ-ինչ նպատակներով: Այն, ինչ կատարվում է ընդհանրապես, իրավական խուլիգանություն է»: Ռոբերտ Քոչարյանն իր նախագահության վերջին՝ արյունալի օրերի մասին հարցերին ըստ էության պատասխաններ չտվեց: 16 տարի առաջվա դեպքերի չբացահայտման մասին էլ ասաց. - «Ո՞վ է իրենց ձեռքից բռնել, խանգարել, թող ամբողջությամբ քննեն»: Երկրորդ նախագահը մեղադրյալի կարգավիճակ ստացավ 2018 թվականին, 2021-ին առաջին ատյանի դատարանի դատավոր Աննա Դանիբեկյանն արդարացրեց Քոչարյանին ու նրա երեք բարձրաստիճան ենթականերին՝ ոչ թե ապացուցելով նրանց անմեղությունը, այլ հիմք ընդունելով Սահմանադրական դատարանի որոշումը: Բարձր դատարանը հակասահմանադրական էր ճանաչել նրանց վերագրվող՝ սահմանադրական կարգը տապալելու մասին հոդվածը։ Դրանից հետո Գլխավոր դատախազությունը բողոքարկեց վճիռը։ Ի վերջո Վճռաբեկը բեկանեց արդարացման որոշումն ու գործը հետ ուղարկեց Հակակոռուպցիոն դատարան՝ նոր քննության։ Շարունակությունը՝ սկզբնաղբյուր կայքում

17:44 - 11 հոկտեմբերի, 2024

Մինչև սպառնալիքները չվերանան, իմ իրավունքն է զբաղվել քաղաքականությամբ. Ռոբերտ Քոչարյան |civilnet.am|

civilnet.am: Հայաստանի երկրորդ նախագահ Ռոբերտ Քոչարյանը հայտարարել է, որ շարունակելու է զբաղվել քաղաքականությամբ, քանի դեռ չեն վերացել իր անձի, երկրի նկատմամբ սպառնալիքները։ «Ես չեմ զբաղվել քաղաքականությամբ, բայց երկիրն այնպիսի արհավիրքների, վտանգների տակ է հայտնվել, նաև ինձնով են սկսել զբաղվել։ Այդ ամբողջական պատկերը, այո, ինձ ստիպել է վերադառնալ քաղաքականություն։ Մինչև այս սպառնալիքները չվերանան, իմ և իմ թիմի իրավունքն է զբաղվել քաղաքականությամբ»,- հոկտեմբերի 11-ին դատարանի բակում լրագրողների հետ զրույցում ասաց Քոչարյանը։ Նա վստահեցնում է, որ Բագրատ արքեպիսկոպոս Գալստանյանի ղեկավարած «Սրբազան շարժմանը» ֆինանսական աջակցություն չի տրամադրել․ «Ո՛չ, չի եղել [ֆինանսական աջակցություն]։ Մեր աջակցությունը եղել է «Հայաստան» դաշինքի և խմբակցության հայտարարությունը։ Դրանից բացի որևէ աջակցություն չի եղել։ Սրբազանը նման կարգի աջակցության համար չի էլ դիմել, նաև հենց նրա համար, որ չհամարեք, թե Բագրատ սրբազանի շարժումը նախկին նախագահների ծրագիրն է»,- ասաց երկրորդ նախագահը։ Անդրադառնալով Միքայել արքեպիսկոպոս Աջապահյանի այն մտքին, թե նախկին նախագահների ստվերն է խանգարում Բագրատ սրբազանին, Քոչարյանն ասաց․ «Իսկական առաջնորդին ոչ մեկի ստվերը չի կարող խանգարել։ Բագրատ սրբազանին ոչ մեկի ստվերը չի խանգարի։ Տարօրինակ է ինձ համար, թե ինչու են մարդիկ նման որակում տալիս»։ Ռոբերտ Քոչարյանին, նախկին փոխվարչապետ Արմեն Գևորգյանին, պաշտպանության նախկին նախարար Սեյրան Օհանյանին և գլխավոր շտաբի նախկին պետ Յուրի Խաչատուրովին մեղադրանք էր առաջադրվել ՀՀ քրեական օրենսգրքի 300.1 հոդվածով (սահմանադրական կարգը տապալելը): 2021-ի մարտին Սահմանադրական դատարանը ՀՀ քրեական օրենսգրքի 300.1-րդ հոդվածը ճանաչեց անվավեր և հակասահմանադրական, նրանց նկատմամբ քրեական հետապնդումը դադարեցվեց: Քոչարյանի և մյուսների վերաբերյալ գործը, որի վճիռը կայացրել էր առաջին ատյանի նախկին դատավոր Աննա Դանիբեկյանը, Վճռաբեկ դատարանի սեպտեմբերի 12-ի որոշմամբ բեկանվել է։ Վճռաբեկ դատարանն այն ուղարկել ՀՀ հակակոռուպցիոն դատարան՝ նոր քննության։ Այսօր՝ հոկտեմբերի 11-ին, վերաբացված գործով հերթական նիստն էր։

14:02 - 11 հոկտեմբերի, 2024

Ռոբերտ Քոչարյանի և մյուսների նկատմամբ քրեական հետապնդումն այս պահին դադարեցված չէ և նրանք շարունակելու են ունենալ մեղադրյալի կարգավիճակ. դատախազ |tert.am|

tert.am: ՍԴ-ն արձանագրել է, որ Սահմանադրական դատարանի կողմից քրեական օրենսգրքի հատուկ մասով նախատեսված որևէ նորմը Սահմանադրությանը հակասող և անվավեր ճանաչելու պարագայում, որևէ կերպ չի կարող համարվել քրեական վարույթը բացառող հանգամանք: Այս մասին ՀՀ երկրորդ նախագահ Ռոբերտ Քոչարյանի և մյուսների գործով դատական նիստին հայտարարեց դատախազը: Նրա խոսքով՝ ինչպես նախկին այդպես էլ գործող քրեական դատավարության օրենսգրքով նման վարույթը բացառող հանգամանք նախատեսված չէ: «Քիչ առաջ հնչեցված պնդումը, որ Սահմանադրական դատարանի որոշումից հետո նախկին ամբաստանյալները, ներկայիս մեղադրյալները չունեն մեղադրյալի կարգավիճակ, չի բխում այդ որոշումներից, բացի այդ Ռոբերտ Քոչարյանի և մյուսների նկատմամբ քրեական հետապնդումն այս պահին դադարեցված չէ: Այդ հետապնդումը դադարեցնելու մասին որոշումը բեկանվել է Վճռաբեկ դատարանի կողմից և այս պահի դրությամբ և մինչև քրեական հետապնդումը դադարեցնելու և վարույթը կառճելու հարցի լուծումը, մեղադրյալները շարունակելու են ունենալ մեղադրյալի կարգավիճակ»,- ասաց դատախազը: Բացի այդ, վերջինս նշեց, որ եթե Ռոբերտ Քոչարյանն ու մյուսները չունեն ամբաստանյալի կարգավիճակ այն պահից երբ ՍԴ-ն Սահմանադրությանը հակասող և անվավեր է ճանաչել քրեական օրենսգրքի 2003 թվականի ապրիլի 18-ին ընդունված քրեական օրենսգրքի 300.1 հոդվածը և այդ որոշման ուժով իսկ մեղադրյալի կարգավիճակը դադարեցվել է, ապա իրավաչափ հարց է առաջանում, թե ինչու էին պարոն Քոչարյանի և մյուսների պաշտպաներն այդ որոշումից հետո դատարանին ներկայացնում քրեական հետապնդումը դադարեցնելու և գործի վարույթը կառճելու միջնորդություն, որը բավարարվել էր դատարանի կողմից և հետագայում բեկանվել Վճռաբեկ դատարանի կողմից: «Գտնում ենք, որ այս պահին պետք է քննարկվի բացարկի և ինքնաբացարկի հարցը, որից հետո մեղադրանքի կողմը հանդես կգա համապատասխան հայտարարությամբ»,- ասաց դատախազը Հիշեցնենք, որ Հակակոռուպցիոն դատարանում արդարացումից երեք տարի անց վերաբացվել ու քննվում է ՀՀ երկրորդ նախագահ Ռոբերտ Քոչարյանի, ՀԱՊԿ նախկին քարտուղար Յուրի Խաչատուրովի, նախկին փոխվարչապետ Արմեն Գրիգորյանի և նախկին ՊՆ նախարար Սեյրան Օհանյանի վերաբերյալ քրեական գործը։ Վճռաբեկ դատարանը բեկանել էր Ռոբերտ Քոչարյանի, Յուրի Խաչատուրովի, Սեյրան Օհանյանի և Արմեն Գևորգյանի գործը կարճելու վերաբերյալ դատավոր Աննա Դանիբեկյանի որոշումը։

11:46 - 11 հոկտեմբերի, 2024

Մեկնարկել է Ռոբերտ Քոչարյանի գործով դատավարությունը

Հակակոռուպցիոն դատարանում մեկնարկել է Ռոբերտ Քոչարյանի գործով դատավարությունը։ Վերջինս, պատասխանելով լրագրողի հարցին, թե մտավախություն կա՞, որ իրեն դարձյալ կկալանավորեն, ասաց․ «Կապրենք, կտեսնենք»։ Հիշեցնենք, որ դատախազ Հայկ Հովհաննիսյանը հայտնել էր՝ Ռոբերտ Քոչարյանի և մյուսների գործի քննությունը սկսվելու է զրոյից։ «Գործի քննությունն իրականացվում է 2022 թվականի հուլիսի 1-ից գործող կարգով, այսինքն՝ նոր քրեական դատավարության օրենսգրքով։ Նոր քրեական դատավարության օրենսգիրքը նախնական դատալսումների համար նախատեսում է հստակ ընթացակարգեր, որոնք ունեն որոշակի հաջորդականություն, գրեթե բացառված է այդ հաջորդականությունը փոխելու հնարավորությունը։ Բացառություն են կազմում միայն խափանման միջոցի հետ կապված հարցերը։ Առաջնորդվելով այդ ընթացակարգով՝ համապատասխան փուլում, բնականաբար, մեր կողմից դատարանին կներկայացվի համապատասխան որոշում։ Դեռ այս պահի դրությամբ այն չի ներկայացվել»։ Թե ինչ հոդվածով է փոխվելու՝ Հովհաննիսյանը չի մանրամասնել։

10:33 - 11 հոկտեմբերի, 2024

Ռոբերտ Քոչարյանի և մյուսների գործի քննությունը սկսվելու է զրոյից. դատախազ |armenpress.am|

armenpress.am: ՀՀ երկրորդ նախագահ Ռոբերտ Քոչարյանի և մյուսների գործի քննությունը սկսվելու է զրոյից։ Այս մասին լրագրողների հետ ճեպազրույցում ասաց դատախազ Հայկ Հովհաննիսյանը։ «Գործի քննությունն իրականացվում է 2022 թվականի հուլիսի 1-ից գործող կարգով, այսինքն՝ նոր քրեական դատավարության օրենսգրքով։ Նոր քրեական դատավարության օրենսգիրքը նախնական դատալսումների համար նախատեսում է հստակ ընթացակարգեր, որոնք ունեն որոշակի հաջորդականություն, գրեթե բացառված է այդ հաջորդականությունը փոխելու հնարավորությունը։ Բացառություն են կազմում միայն խափանման միջոցի հետ կապված հարցերը։ Առաջնորդվելով այդ ընթացակարգով՝ համապատասխան փուլում, բնականաբար, մեր կողմից դատարանին կներկայացվի համապատասխան որոշում։ Դեռ այս պահի դրությամբ այն չի ներկայացվել»,- նշեց Հայկ Հովհաննիսյանը։ Թե ինչ հոդվածով է փոխվելու՝ Հովհաննիսյանը չմանրամասնեց։ Վճռաբեկ հակակոռուպցիոն դատարանը սեպտեմբերի 12-ին բեկանել էր Հայաստանի Հանրապետության երկրորդ նախագահ Ռոբերտ Քոչարյանի, ՀԱՊԿ նախկին գլխավոր քարտուղար Յուրի Խաչատուրովի, Պաշտպանության նախկին նախարար Սեյրան Օհանյանի և նախկին փոխվարչապետ Արմեն Գևորգյանի գործը կարճելու վերաբերյալ դատավոր Աննա Դանիբեկյանի 2021 թվականի որոշումը և գործն ուղարկվել նոր քննության։ Ավելի վաղ, Սահմանադրական դատարանը ՀՀ Քրեական օրենսգրքի 309.1-րդ հոդվածի 3-րդ մասը (հոդվածը սահմանում է առաջադրված մեղադրանքը փոփոխելու և լրացնելու սահմանները) Սահմանադրությանը համապատասխանող էր ճանաչել։ Այս որոշումը դատախազությանը հնարավորություն տվեց վերաորակավորել Ռոբերտ Քոչարյանի և մյուսների դեմ մեղադրանքները և նոր քննություն սկսել:

15:23 - 23 սեպտեմբերի, 2024

Ռ․ Քոչարյանի և մյուսների գործով դատավորը՝ համացանցում շրջանառվող տեսանյութի և ՔՊ-ի հետ իր ենթադրյալ կապերի մասին |iravaban.net|

iravaban.net: «2018 թվականի դեկտեմբերից ես որևէ կապ չեմ ունեցել «Քաղաքացիական պայմանագիր» կուսակցության և ուժի պաշտոնյաների հետ։ Ես որևէ անգամ քաղաքականացված չեմ եղել և քաղաքականությամբ չեմ զբաղվել։ Ընդամենը 2018-ին օրենսդիր մարմնում քաղաքական պաշտոն զբաղեցնելու հայտ եմ ներկայացրել»,-այս մասին Iravaban.net-ի հետ զրույցում նշեց Հակակոռուպցիոն քրեական դատարանի դատավոր Սարգիս Ռաֆիկի Պետրոսյանը։ Ավելի վաղ հայտնել էինք, որ ՀՀ 2-րդ նախագահ Ռոբերտ Քոչարյանի, Յուրի Խաչատուրովի, Սեյրան Օհանյանի և Արմեն Գևորգյանի գործը մակագրվել է նշված դատավորին։ Վերջինս 2018 թվականի ԱԺ ընտրությունների ժամանակ եղել է «Իմ քայլը» խմբակցության պատգամավորի թեկնածու Շիրակի մարզից: «Ցուցակում ընդգրկվելու առաջարկն եղել է քաղաքական թիմի կողմից որպես իրավաբանի և ես տվել եմ իմ համաձայնությունն ու ԱԺ պատգամավոր դառնալու հայտ եմ ներկայացրել։ Իմ համարն անցողիկ չի եղել։ Այնուհետև ես դիմում եմ գրել ու ասել, որ դադարեցնեն իմ անդամակցությունը կուսակցությանը»,- նշեց նա՝ հավելելով, որ «Մարտի 1»-ի գործն իրեն էլեկտրոնային եղանակով է մակագրվել և ընթանալու է բացառապես պրոֆեսիոնալ և մրցակցային դատավարություն։

14:17 - 23 սեպտեմբերի, 2024

Քոչարյանը ներկա չէր իր գործով Հակակոռուպցիոն դատարանում մեկնարկած առաջին նիստին |civilnet.am|

civilnet.am: Հայաստանի երկրորդ նախագահ Ռոբերտ Քոչարյանի և մյուսների վերաբերյալ գործի վերաքննության առաջին նիստը Հակակոռուպցիոն դատարանը սկսեց մեղադրյալ, Ազգային ժողովի պատգամավոր Արմեն Գևորգյանի խափանման միջոցի քննարկմամբ։ Սեպտեմբերի 23-ին հանրային մեղադրողները պետք է ներկայացնեին իրենց միջնորդությունը՝ գործի վերաքննության մասով, սակայն նիստին ներկա չէր մեղադրյալ Ռոբերտ Քոչարյանը։ Մեղադրողներն առաջարկեցին դատը հետաձգել՝ նշելով, թե չկա որևէ «պատշաճ ծանուցում նրա բացակայության վերաբերյալ»։ Արմեն Գևորգյանի պաշտպան Լուսինե Սահակյանը, ընդհակառակը, պնդեց, որ պետք է քննարկել իր պաշտպանյալի տեղաշարժը սահմանափակող հանգամանքները։ Լուսինե Սահակյանն ասաց, որ իրենք ունեն բացարկի միջնորդություն, որը չի առնչվում Քոչարյանի իրավունքներին։ Ուստի նա խնդրեց միջնորդությունը քննարկել առանց ՀՀ երկրորդ նախագահի մասնակցության։ Պաշտպանի խոսքով՝ Արմեն Գևորգյանի անձեռնմխելիությունը խախտվում է, քանի որ «ոստիկանությունն ապօրինի սահմանափակում է նրա տեղաշարժման իրավունքը»՝ մասնավորապես երկրից մեկնելու հետ կապված։ Սահակյանը խնդրեց հարցը քննարկել դռնփակ նիստում։ Թեև հանրային մեղադրողները առարկեցին, դատարանը որոշեց, որ այս հարցը պետք է քննարկել՝ դռնփակ նիստում։ Հայաստանի երկրորդ նախագահ Ռոբերտ Քոչարյանի և մյուսների վերաբերյալ գործը, որով վճիռը կայացրել էր առաջին ատյանի նախկին դատավոր Աննա Դանիբեկյանը, Վճռաբեկ դատարանի սեպտեմբերի 12-ի որոշմամբ բեկանվեց։ Վճռաբեկ դատարանը նաև որոշեց գործն ուղարկել ՀՀ հակակոռուպցիոն դատարան՝ նոր քննության։ Շարունակությունը՝ սկզբնաղբյուր կայքում

11:33 - 23 սեպտեմբերի, 2024

Հուսով եմ՝ պատվով կհաղթահարենք մեր պետության համար այս դժվարին ժամանակաշրջանը․ Ռոբերտ Քոչարյանը՝ անկախության 33-րդ տարեդարձի առիթով

ՀՀ երկրորդ նախագահ Ռոբերտ Քոչարյանը շնորհավորական ուղերձ է հղել Հայաստանի Հանրապետության անկախության 33-րդ տարեդարձի առիթով, որում ասված է. «Հարգելի հայրենակիցներ, Շնորհավորում եմ Հայաստանի Հանրապետության Անկախության տոնի կապակցությամբ: Հուսով եմ՝ պատվով կհաղթահարենք մեր պետության համար այս դժվարին ժամանակաշրջանը»:

11:01 - 21 սեպտեմբերի, 2024

Ռոբերտ Քոչարյանին և մյուսներին առնչվող քրգործով դատախազը Հակակոռուպցիոն դատարան կներկայացնի համապատասխան որոշում

2024 թվականի սեպտեմբերի 12-ին Վճռաբեկ դատարանի հակակոռոուպցիոն պալատը հրապարակել է թիվ ԵԴ/0253/01/19 քրեական գործով (ըստ մեղադրանքի Ռոբերտ Քոչարյանի, Սեյրան Օհանյանի և մյուսների) կայացված որոշումը, որով բեկանել է Երևան քաղաքի ընդհանուր իրավասության դատարանի՝ 2021 թվականի ապրիլի 6-ի՝ Ռոբերտ Քոչարյանի, Սեյրան Օհանյանի, Արմեն Գևորգյանի և Յուրի Խաչատուրովի նկատմամբ՝ 2003 թվականի ապրիլի 18-ին ընդունված Քրեական օրենսգրքի 300.1 հոդվածով հարուցված քրեական հետապնդումը դադարեցնելու մասին որոշումը և գործն ուղարկել է Հակակոռուպցիոն դատարան՝ նոր քննության: Այս մասին հայտնում են դատախազությունից: Ի թիվս այլնի, Վճռաբեկ դատարանն արձանագրել է, որ առկա պայմաններում Առաջին ատյանի դատարանի՝ Ռոբերտ Քոչարյանի, Սեյրան Օհանյանի, Արմեն Գևորգյանի և Յուրի Խաչատուրովի նկատմամբ հարուցված քրեական հետապնդումը դադարեցնելու մասին որոշումն իրավաչափ չէ, և որ Սահմանադրական դատարանի կողմից Քրեական օրենսգրքի 300.1 հոդվածը Սահմանադրությանը հակասող և անվավեր ճանաչվելուց հետո, մինչև դատարանի կողմից խորհրդակցական սենյակ հեռանալը, մեղադրողն իրավասու է եղել փոփոխելու նշված անձանց մեղսագրված արարքի իրավաբանական գնահատականը: Ի պատասխան լրատվամիջոցներից ստացված հարցումների՝ տեղեկացնում ենք, որ նկատի ունենալով, որ Ռոբերտ Քոչարյանին և մյուսներին վերագրվող արարքներում առկա են Քրեական օրենսգրքի այլ հոդվածով նախատեսված հանցագործության հատկանիշներ՝ վերոնշյալ քրեական գործով մեղադրողն առաջիկայում Հակակոռուպցիոն դատարան կներկայացնի համապատասխան որոշում: Գործի շահերից ելնելով՝ այս փուլում այլ մանրամասներ չեն ներկայացվում:

11:44 - 17 սեպտեմբերի, 2024

Արդարացումից երեք տարի անց Քոչարյանն ու մյուսները կրկին կկանգնեն դատարանի առջև |azatutyun.am|

azatutyun.am: Արդարացումից երեք տարի անց երկրորդ նախագահ Ռոբերտ Քոչարյանն ու նրա նախկին երեք ենթակաները՝ Սեյրան Օհանյանը, Յուրի Խաչատուրովը և Արմեն Գևորգյանը, 2008-ի մարտի 1-ի գործով դարձյալ կկանգնեն դատարանի առջև։ Վճռաբեկ դատարանն օրերս բեկանել է արդեն նախկին դատավոր Աննա Դանիբեկյանի՝ դեռ ուժի մեջ չմտած արդարացման վճիռն ու գործն ուղարկել նոր քննության՝ Հակակոռուպցիոն քրեական դատարան։ Դեռ պարզ չէ, թե որ դատավորին կմակագրվի այս գործի քննությունը, և երբ կսկվի դատավարությունը։ «Սա ավելի շուտ քաղաքականություն է, որտեղ օգտագործվում է իրավաբանությունը՝ որպես միջոց խնդիրները լուծելու համար», - «Ազատության» հետ զրույցում հայտարարեց իրավապաշտպան Վարդան Հարությունյանը: Գլխավոր դատախազությունն, ըստ ամենայնի, Քոչարյանին ու մյուսներին նոր հոդվածով մեղադրանք կառաջադրի՝ պաշտոնեական լիազորություններն անցնելու համար։ Նրանք անգամ մեղավոր ճանաչվելու դեպքում չեն ազատազրկվի՝ այս հոդվածով վաղեմության ժամկետն անցնելու պատճառով։ Իրավապաշտպան Վարդան Հարությունյանը տպավորություն ունի, որ իրավական հետևանք չունեցող այս քայլն արվեց ոչ թե Քոչարյանին ու մյուսներին դատելու, այլ հենց իշխանության համար, որ ցույց տան, թե կատարում են իրենց խոստումները։ «Ե՛վ Մարտի 1-ի գործը, և շատ գործեր փորձում են ուղղակի օգտագործել իրենց քաղաքական նպատակների համար: Հատկապես որ առջևում ընտրությունների տարի է մոտենում, ավելի հակված եմ ես կարծել, որ սա խաղ է՝ հերթական խաղ քաղաքական, որի ընթացքում պետք է ցույց տան, թե իրենք հավատարիմ են իրենց խոստումներին, թե Մարտի 1-ը իրենց մտքում կա, թե բոլոր հանցագործությունները պետք է բացահայտվեն», - ընդգծեց Հարությունյանը: 2018-ի հեղափոխությունից հետո մարտի 1-ի հետընտրական արյունալի իրադարձությունների գործով սահմանադրական կարգը տապալելու հոդվածով մեղադրանք էր առաջադրվել Քոչարյանին ու մյուսներին։ Նրանց փաստաբանները, սակայն, շարունակաբար պնդում էին, որ այդ հոդվածը հակասահմանադրական է, ունի խնդիրներ և չի կարող գոյություն ունենալ։ Նույնը եզրահանգել էր Սահմանադրական դատարանը, ինչից հետո գործը քննող դատավոր Աննա Դանիբեկյանն արդարացրել էր ամբաստանյալներին՝ հրաժարվելով լսել այդ ժամանակ գլխավոր դատախազ Արթուր Դավթյանի ու մյուսների պնդումները։ Դատախազները դատավորին խնդրել էին չգնալ խորհրդակցական սենյակ, այլ՝ հնարավորություն ստեղծել վերաորակել հոդվածը։ Ապա Դատախազության բողոքարկման արդյունքում Վճռաբեկ ատյանը եզրահանգեց, որ ստորադաս դատարաններն ակտ կայացնելիս դատական սխալ են թույլ տվել, օրենք են խախտել, երբ Սահմանադրական դատարանի հայտնի որոշումից հետո դադարեցրել են քրեական հետապնդումը։ Ըստ Վճռաբեկի՝ նախքան խորհրդակցական սենյակ մտնելը դատավորը պետք է դատախազներին հնարավորություն տար վերաորակել ամբաստանյալների արարքը։ Նախկին նախագահի փաստաբանները դեռ մեկնաբանություն տալ չեն ցանկանում։

16:12 - 16 սեպտեմբերի, 2024

Քոչարյանի և մյուսների գործի քննությունը կսկսվի նորից․ Վճռաբեկ հակակոռուպցիոն դատարանը բեկանել է Մարտի 1-ի գործը կարճելու որոշումը |factor.am|

factor.am: Վճռաբեկ հակակոռուպցիոն դատարանը բեկանել է Հայաստանի երկրորդ նախագահ Ռոբերտ Քոչարյանի, ՀԱՊԿ նախկին գլխավոր քարտուղար Յուրի Խաչատուրովի, Պաշտպանության նախկին նախարար Սեյրան Օհանյանի և նախկին փոխվարչապետ Արմեն Գևորգյանի գործը կարճելու վերաբերյալ դատավոր Աննա Դանիբեկյանի 2021 թվականի որոշումը։ Գործն ուղարկվել է հակակոռուպցիոն դատարան՝ նոր քննության։ Այս մասին տեղեկանում ենք Վճռաբեկ դատարանից։ Հիշեցնենք, որ վերը նշված 4 նախկին բարձրաստիճան պաշտոնյաները 2018 թվականից մեղադրվում էին 2008 թվականի մարտի իրադարձությունների ժամանակ սահմանադրական կարգը տապալելու կամ դրան օժանդակելու մեջ։ 2021 թվականին, սակայն, Սահմանադրական դատարանը որոշեց, որ 300․1 հոդվածը հակասահմանադրական է։ Դրանից հետո 4 ամբաստանյալների պաշտպանները միջնորդեցին իրենց պաշտպանյալների նկատմամբ քրեական հետապնդումը դադարեցնել հանցակազմի բացակայության հիմքով՝ հաշվի առնելով այն հանգամանքը, որ նրանց վերագրվող հոդվածը ճանաչվել է հակասահմանադրական։ Դատավոր Աննա Դանիբեկյանը կարճեց գործի վարույթը՝ չնայած դատախազության պնդումներին, որ ամբաստանյալներին մեղսագրվող արարքը կարող է վերաորակվել։ Դատավոր Աննա Դանիբեկյանի այս որոշման դեմ Դատախազությունը վերաքննիչ բողոք ներկայացրեց, սակայն վերաքննիչ դատարանը անփոփոխ թողեց կարճման որոշումը։ Դրանից հետո այն ժամանակ գլխավոր դատախազ Արթուր Դավթյանը վճռաբեկ բողոք ներկայացրեց։ Վճռաբեկ դատարանը դիմեց Սահմանադրական դատարան: Ըստ Վճռաբեկի՝ ՍԴ ներկայացրած դիմումի՝ մեղադրողի կողմից անձին մեղսագրվող արարքի իրավաբանական որակումը փոխելու հնարավորության բացակայությունը և դատարանի կողմից քրեական գործի վարույթը կարճելու և քրեական հետապնդումը դադարեցնելու մասին որոշում կայացնելու բացարձակ պահանջն այն պարագայում, երբ հատուկ հանցակազմ սահմանող քրեաիրավական նորմը, որով որակված է անձի արարքը, ճանաչվում է ՀՀ Սահմանադրությանը հակասող և անվավեր, սակայն այդ արարքն առերևույթ համապատասխանում է ՀՀ քրեական օրենսգրքով նախատեսված մեկ այլ հանցակազմի հատկանիշներին, հանգեցնում է տուժողի դատական պաշտպանության և արդար դատաքննության սահմանադրական իրավունքների խախտման։ Սահմանադրական դատարանը 2024 թվականի հուլիսին որոշմամբ արձանագրեց, որ մեղադրողը կարող է մինչև դատարանի խորհրդակցական սենյակ հեռանալը փոխել ամբաստանյալին առաջադրված մեղադրանքը (նրան մեղսագրվող արարքի իրավական որակումը)՝ ամբաստանյալի արարքում քրեական օրենքով նախատեսված այլ արարքի հատկանիշների առկայության պարագայում՝ անկախ դատական քննության ընթացքում ապացույցների հետազոտումից: Ավելի մանրամասն՝ սկզբնաղբյուրում։

19:08 - 13 սեպտեմբերի, 2024

Բագրատ Սրբազանը հանդիպել է Ռոբերտ Քոչարյանի և Սերժ Սարգսյանի հետ

Բագրատ Սրբազանը հանդիպել է Ռոբերտ Քոչարյանի և Սերժ Սարգսյանի հետ: Լևոն Տեր-Պետրոսյանի հետ հանդիպում դեռևս չի եղել վերջինիս գրասենյակի կողմից ներկայացված հարգելի պատճառներով։ Այս մասին հայտնում է «Սրբազան պայքար» թելեգրամյան ալիքը։

11:07 - 12 սեպտեմբերի, 2024

Ռոբերտ Քոչարյանը, ըստ ամենայնի, կրկին կկանգնի դատարանի առջև |azatutyun.am|

azatutyun.am: Հայաստանի երկրորդ նախագահ Ռոբերտ Քոչարյանը, ըստ ամենայնի, կրկին կկանգնի դատարանի առջև։ Այս հնարավորությունը դատարաններին տվել է Սահմանադարական դատարանը։ Բայց եթե նույնիսկ Քոչարյանը մեղավոր ճանաչվի, նա չի ազատազրկվի՝ ենթադրյալ հանցանքի վաղեմության ժամկետն անցնելու պատճառով։ «Հերթական անգամ անօրինական ձևով դատավարությունը փորձ է արվելու սկսել: Էս դատավարությունը ինքը անօրինական է չէ՞ եղել, պարզվեց չէ՞, որ հակասահմանադրական հոդվածի հիման վրա Ռոբերտ Քոչարյանը տարիներով մեղադրվել է և տարիներ անց է կացրել կալանքի տակ: Հիմա էլ հերթական անօրինականությունն են անում», - «Ազատության» հետ զրույցում հայտարարեց նախկին նախագահի փաստաբան Հայկ Ալումյանը: 2008-ի արյունալի իրադարձությունների գործով երկրորդ նախագահն արդարացվեց երեք տարի առաջ առաջին ատյանի դատարանի կողմից, այս որոշումը սակայն, դեռ ուժի մեջ չի մտել։ Նախկին նախագահի արդարացման պատճառը ոչ թե այն էր, որ նա քննության արդյունքում անմեղ էր ճանաչվել, այլ՝ Սահմանադրական դատարանի որոշումը, որով հակասահանադրական ճանաչվեց նրան վերագրվող՝ սահմանադրական կարգը տապալելու հոդվածը։ Գլխավոր դատախազությունը դեռ այդ օրերին էր հայտարարել՝ օրենքն իրեն թույլ չի տալիս վերաորակել Քոչարյանի մեղադրանքը, և բողոքարկել էր արդարացման դատավճիռը Վերաքննիչ, ապա՝ Վճռաբեկ դատարան, խնդրել էր ստուգել՝ օրինակա՞ն է արդյոք 10 մարդու կյանք խլած իրադարձությունների գործով Ռոբերտ Քոչարյանի և նրա նախկին երեք ենթակաների արդարացման վճիռը, և իրավունք ունի՞ արդյոք վերաորակել մեղադրանքը։ Իր հերթին, Վճռաբեկ դատարանը երկու տարի քննեց ու եզրահանգեց, որ իսկապես օրենքը նման հնարավորություն չի տալիս և Սահմանադրության հետ խնդիր ունի, ու չորս ամիս առաջ դիմեց Սահմանադրական դատարան։ 4-ամսյա քննությունից հետո բարձր դատարանը որոշեց, որ օրենքը, մի կողմից, Սահմանադրությանը չի հակասում, բայց, մյուս կողմից, նաև հնարավորություն տալիս է վերաորակել մեղադրանքը։ Մեղքը չընդունող երկրորդ նախագահի փաստաբանը պնդում է՝ Սահմանադրական դատարանը սխալ ճանապարհով է գնացել՝ դուրս է եկել իր լիազորություններից: Շարունակությունը՝ սկզբնաղբյուր կայքում։

18:11 - 26 հուլիսի, 2024

Քոչարյանին և մյուսներին ներկայացված մեղադրանքը կարող է վերաորակվել. ՍԴ-ն որոշում է կայացրել |1lurer.am|

1lurer.am: Սահմանադրական դատարանը մասամբ բավարարել է Վճռաբեկ դատարանի դիմումը: Վճռաբեկը Մարտի 1-ի վարույթով անցնող 2-րդ նախագահ Ռոբերտ Քոչարյանի, Սեյրան Օհանյանի, Յուրի Խաչատուրովի և Արմեն Գևորգյանի գործով դիմել էր բարձր դատարան՝ միջնորդելով որոշել Քրեական դատավարության օրենսգրքի մի շարք հոդվածների Սահմանադրությանը համապատասխանելու հարցը: Խնդիրը 1998-ին ընդունված, այժմ մասնակի գործող Քրեական դատավարության օրենսգրքի 309.1 հոդվածի 3-րդ մասն էր, որը հնարավորություն չէր տալիս հոդվածը հակասահմանադրական ճանաչելուց հետո դատարանում վերաորակել մեղադրանքը: Բարձր դատարանը որոշել է, որ թեև հոդվածը համապատասխանում է Սահմանադրությանը, այն մեկնաբանությամբ, որ ամբաստանյալին մեղսագրվող արարքը հակասահմանադրական ճանաչվելիս մեղադրողը կարող է մինչև դատարանի խորհրդակցական սենյակ հեռանալը փոխել ամբաստանյալին առաջադրված մեղադրանքը մեղադրյալի արարքում քրեական օրենքով նախատեսված այլ արարքի հատկանիշների առկայության պարագայում՝ անկախ դատական քննության ընթացքում ապացույցների հետազոտումից: Սա նշանակում է, որ Քոչարյանին և նախկին բարձրաստիճան պաշտոնյաներին ներկայացված մեղադրանքը պետք է վերաորակվել: Վճռաբեկի դիմումի մյուս մասը մերժվել է

21:28 - 22 հուլիսի, 2024

Բագրատ սրբազանը չի հերքում, որ կարող է հանդիպել ՀՀ նախկին երեք նախագահներին |azatutyun.am|

azatutyun.am: Վարչապետի հրաժարականը պահանջող Բագրատ արքեպիսկոպոսն այսօր լրագրողների հետ զրույցում ըստ էության չհերքեց՝ առաջիկայում կհանդիպի Հայաստանի նախկին երեք նախագահների հետ: Շարժման ձևավորումից հետո, ինչպես սրբազանն է պնդում, ինքը ոչ Ռոբերտ Քոչարյանի, ոչ Սերժ Սարգսյանի, ոչ էլ Լևոն Տեր-Պետրոսյանի հետ չի հանդիպել: «Ժամանակով բոլորի հետ էլ կլինի, ինչո՞ւ չպիտի լինի», - նշեց Տավուշի թեմի առաջնորդը: «Տավուշը հանուն հայրենքի» շարժման առաջնորդը, որ Երևան հասնելուց հետո խոստանում էր անհնազանդության խաղաղ ակիցաների միջոցով մի քանի օրում հասնել Նիկոլ Փաշինյանի ու Կառավարության հեռացմանը, մոտ մի շաբաթ է՝ հարցի քննարկումը տեղափոխել է դահլիճային ձևաչափ, հանդիպումներ է անցկացրել քաղաքական կուսակցությունների, մասնագիտական շրջանակների հետ, այսօր էլ հերթը տնտեսագետներինը և կրթության ոլորտի ներկայացուցիչներինն է: «Պիտի ներկայացնեմ իմ պատկերացումները՝ իր հոգևոր բովանդակությամբ, ժամանակին մենք հայեցակարգերով ենք զբաղվել, և թե ինչ է նշանակում մեզ համար տնտեսությունը, և ապա լսել իրենց՝ իրենց կարծիքները, վերլուծություններ եթե կունենան անելու: Հստակ կերպով, ճիշտ, անաչառ գնահատականով՝ մեր այսիրվա իրավիճակի վերլուծությունն ու գնահատականը», - ասաց Բագրատ արքեպիսկոպոս Գալստանյանը: Մինչ Բագրատ սրբազանը դահլիճային հանդիպումներում իշխանությանը հեռացնելու ուղիներ է փնտրում, խորհրդարանում իշխանական պատգամավորն առանց որևէ կոնկրետ փաստ ներկայացնելու կրկին պնդեց՝ ոչ միայն ընդդիմադիրները, նաև Հայաստանի շատ քաղաքացիներ այլ երկրների շահեր են սպասարկում: Եթե այդպես շարունակվի, Խաչատուր Սուքիասյանը զգուշացրեց. - «Եվ եթե մենք գնանք տարիներ հետ և տեսնենք, թե Հայաստանի Հանրապետությունը ովքեր են ղեկավարել, ինչ ձևով են կառավարել, և տեսնենք, թե նրանք ինչ ձևով էին վերաբերվում այն մարդկանց, ովքեր որ մի օտար երկրի անուն էին տալիս. շատ վատ էին վարվում՝ կա՛մ էդ մարդիկ բանտում էին հայտնվում, կա՛մ էդ մարդիկ մահանում էին, կա՛մ էդ մարդիկ ունեզրկվում էին: Հիմա ձեզ ասում եմ՝ եթե դուք ձեր չափը չճանաչեք և դուք խանգարեք Հայաստանի Հանրապետության զարգացմանը, ձեզ հետ նույն գործիքներով կխոսեն»: Այն, որ Հայաստանի ինքնիշխանությանը սպառնացող գործակալներ կան, նաև երկրի վարչապետն է հայտարարում, մինչ այժմ, սակայն, իրավապահները դրան հրապարակային չեն արձագանքել։ Ավելին՝ գլխավոր դատախազը վերջերս պնդել էր՝ դրանք քաղաքական հայտարարություններ են, և իրավական ընթացք տալու հիմքեր չկան: Այդուհանդերձ, Բագրատ արքեպիսկոպոսն այսօր իրավապահ համակարգին կրկին կոչ արեց արձագանքել ոչ միայն իշխանական պատգամավոր Խաչատուր Սուքիասյանի սպառնալիքներին, այլև առհասարակ իշխանության մեղադրանքներին, որ սրբազանն ու նրա առաջնորդած շարժումն այլ երկրի շահեր են սպասարկում: «Շատ պարզ պատկեր է, ավելի բան ես կարող ե՞մ ասել: Վարքագիծը, որը դրսևորվում է, որը միգուցե թաքնված էր, բայց հիմա դրսևորվում է, իրավապահ համակարգը թող արձագանքի՝ օտարերկրյա շահեր, իրենք սպառնում են ունեզրկելու և սպանելու, բանտերով, թող արձագանքեն», - հայտարարեց Բագրատ սրբազանը:

16:43 - 22 մայիսի, 2024